تازيون خبرون

Daily Archives: October 4, 2017

نواز شريف بنا مقابلي ن ليگ جو صدر چوندجي ويو، پانامه نه اقامي تي وزير اعظم کي ڪڍيو ويندو آهي: نواز شريف

اسلام آباد( ويب ڊيسڪ ) اڳوڻو وزيراعظم نواز شريف مسلم ليگ ن جو بنا مقابلي صدر چونڊجي ويو آهي. اليڪشن ڪميشن ۾ پارٽي صدارت لاءِ نواز شريف جي مقابلي ۾ پارٽي جي ڪنهن به ٻي ميمبر طرفان نامزدگي ڪاغذ نه جمع ڪرايا ويا آهن. پارٽي طرفان رٽرننگ آفيسر امير افضل مندوخيل کي مقرر ڪيو ويو هو. ان کان اڳ ڊاڪٽر طارق فضل چوڌري ۽ راڻا محمد افضل اڳوڻي وزيراعظم نواز شريف جا نامزدگي ڪاغذ جمع ڪرايا ويا جنهن کي اليڪشن ڪمشنر درست قرار ڏنو هو. نامزدگي ڪاغذ جمع ٿيڻ کانپوءِ ڇنڊ ڇاڻ جو عمل مڪمل ٿيو جنهن بعد پولنگ ڪئي وئي. مسلم ليگ ن جي چيف اليڪشن ڪمشنر چوڌري جعفر اقبال نواز شريف جي پارٽي صدر طور ڪاميابيءَ جو اعلان ڪيو. هن پنهنجي اعلان ۾ چيو ته مسلم ليگ ن جي آئين جي شق 120 تحت پارٽي جي نئين صدر جي چونڊ ڪئي وئي  آهي. هن چيو ته آئين جي شق 122 تحت اليڪشن ڪميشن قائم ڪئي وئي جنهن جو پهريون اجلاس 29 آگسٽ تي گهرايو ويو جنهن ۾ مسلم ليگ ن جي نئين صدر جي چونڊ لاءِ تاريخ جو اعلان ڪيو ويو. سندس چوڻ هو ته نواز شريف بنا مقابلي ايندڙ چئن سالن تائين مسلم ليگ ن جو صدر هوندو. چوڌري جعفر اقبال چيو ته شهباز شريف، طارق فضل چوڌري، راڻا محمد افضل، راجا اشفاق سرور، صابر شاهه، راجا فاروق حيدر، شآهه غلام حيدر، ثناءَ الله زهري، نصيب الله، امير مقام ۽ مرتضيٰ جاويد عباسي نواز شريف جي ڪاغذن جا تائيد ۽ تجويز ڪندڙ آهن. ٻئي طرف  اڳوڻي وزيراعظم نواز شريف چيو آهي ته ڍاڪا سانحي مان ڪو به سبق حاصل نه ڪيو ويو آهي،  غلط فيصلن جي ملڪ ۽ عوام کي ڳري قيمت ادا ڪرڻي پوندي آهي. مسلم ليگ ن جي جنرل ڪائونسل جي اجلاس کي خطاب ڪندي نواز شريف چيو ته ملڪ کي ائٽمي طاقت بڻائيندڙن سان ڏسو ڪهڙو سلوڪ ڪيو ويندو آهي، آمرن جا قسم کڻندڙ صادق به آهن ۽ امين به آهن. هن چيو ته مون کي سياست مان بار بار بي داخل ڪرڻ جي ڪوشش ڪئي وئي پر عوام کيس ٻيهر سياست ۾ داخل ڪيو آهي. سندس چوڻ هو ته 70 ورهين کان ملڪ سان ڪهڙي راند کيڏي پئي وڃي، ايئن آخري ڪيستائين هلندو رهندو، مان اقتدار نه پر قدرن جي سياست ڪندو آهيان. اڳوڻي وزيراعظم نواز شريف چيو ته مان ڪو به غلط ڪم نه ڪيو آهي، نااهلي جي سبب بابت عوام کي خبر آهي. هن چيو ته جيڪڏهن پاناما ۾ ڪجهه نه هو ته عوام کي سچ ٻڌايو وڃي ها، قوم سان سچ ڳالهائڻ گهرجي، ڪرپشن ثابت نه ٿي ته مون کي اقامي تي نااهل قرار ڏنو ويو. سندس چوڻ هو ته قدرن جي سياست لاءِ بينظير ڀٽو سان ميثاق جمهوريت ڪيو،  اطمينان جي ڳالهه آهي ته باشعور عوام مسلم ليگ ن سان گڏ آهي.نواز شريف چيو ته تميز الدين ڪيس کان وٺي بينظير ڀٽو تائين ڪهڙا ڪهڙا فيصلا آيا آهن. هن چيو ته پرويز مشرف منهن جو رستو روڪڻ لاءِ قانونسازي ڪئي، اڄ ڊڪٽيٽر جو قانون سندس منهن تي هنيو ويو آهي. سندس چوڻ هو ته پاڪستان لاءِ نفرتن جو سلسلو بند ڪرڻو پوندو. نواز شريف چيو ته ملڪي حالتون تبديل ڪرڻ جي ڪوشش نه ڪئي وئي ته پاڪستان اسان کي معاف نه ڪندو. هن چيو ته قوم ملڪ کي 2 ٽڪرا ڪندڙ سببن تي غور ڪري، اميد آهي ته 2018ع ۾ ن ليگ 2013ع جي ڀيٽ ۾ وڏي ڪاميابي حاصل ڪندي.  سندس چوڻ هو ته اقتدار مان ڪڍڻ ۽ داخل ڪرڻ جي ڪنجي عوام وٽ هئڻ گهرجي، عوام جنهن کي ووٽ ڏي اهو ئي حڪومت ڪري ۽ فيصلا ڪري، پاڪستان ۽ عوام خاطر نفرتون ۽ ٽڪراءُ ختم ڪرڻو پوندو. نواز شريف چيو ته امانت ۾ خيانت جو سلسلو ختم ڪرڻو پوندو، عوام فيصلو ڪري ته ڪير معيار تي پورو لهي ٿو ۽ ڪير نه ٿو لهي.

 

نااهلي ڪيس، بني گالا ايراضي بي نامي هجي ته به اصل مالڪ جمائمه هئي: سپريم ڪورٽ

اسلام آباد  (اين اين آءِ) سپريم ڪورٽ ۾ عمران خان جي نااهلي ڪيس جي ٻڌڻي دوران چيف جسٽس پنهنجي رمارڪس ۾ چيو ته بني گالا زمين بنا نالي جي هجي به ته اصل مالڪ جمائمه هئي صرف 6.5 سيڪڙو رقم جي ٽڙائيل ثآبت نه ٿي آهي. درخواست ڪندڙ موجب اڪائونٽ ۾ موجود 99 هزار پائونڊ به  ظاهر ڪرڻ گھرجن هان. اڱاري تي چيف جسٽس آف پاڪستان ميان ثآقب نثار جي سربراهي ۾ جسٽس عمر عطا بنديال ۽ جسٽس فيصل عرب تي ٻڌل ٽي رڪني بينچ پي ٽي آئي جي پرڏيهي فنڊنگ ۽ عمران خان جي نااهلي جي درخواست جي ٻڌڻي ڪئي، ٻڌڻي دوران چيف جسٽس پنهنجي رمارڪس ۾ چيو ته نيازي سروس لنڊن فليٽ جو ٽيڪس بچائڻ جي لاءِ ٺآهي وئي، ان جي اڪائونٽ ۾ عمران خان جي ذاتي رقم به ايندي  رهي جڏهن ته 2003 کانپوءِ اڪائونٽ جا تفصيل به نه ڏنا ويا. درخواست ڪندڙ مسلم ليگ نون جي اڳواڻ حنيف عباسي جي وڪيل عدالت ۾چيو ته پيش ڪيل دستاويز شڪن کان مٿانهون هجڻ گھرجن هان. دستاويز شڪي آهن. ٻه خط پيش ڪيا  ويا جنهن جون صحيحون پاڻ ۾ نه ملي رهيون آهن ان تي چيف جسٽس چيو ته اسان گذريل ٻڌڻي تي به اهو اعتراض ٻڌي نوٽ ڪيو هو درخواست ڪندڙ جو موقف آهي ته دستاويز جعلي آهن ٽيڪس نمبر ۽ صحيحن سان گڏ ٻيون به غلطيون آهن. اڪرم شِيخ چيو ته ڪو ئي به وڪيل  اهڙا دستاويز سپريم ڪورٽ جي اڳيان پيش نه  ٿو ڪري سگھي توهان جي اڳيان دستاويز رکڻ جو مطلب آهي  ته ۽ اها اميد نه ڪئي وئي هئي ته دستاويز شڪي آهن، جسٽس عمر عطا بنديال ڪاوڙ جو اظهار ڪندي چيو ته ڇا توهان اسانکي اڪائونٽنٽ سمجھيو آهي؟ توهان زال مڙس جون ننڍيون شيون هتي آڻي رکو ٿا. جنهن تي حنيف عباسي جي وڪيل معذرت ڪندي چيو  ته مان توهان کان اهڙو ڪم ڪو به نه ٿو وٺي سگھان، غير ضروري شيون ناهن ۽ نه دهرائيندس منهنجو ڪيس عمران خان جي ٽيڪس ادائيگي جو  نه پر اثاثا ظاهر نه ڪرڻ جو آهي چيف جسٽس چيو ته عمران خان ٽي ٽرانزيڪيشن ثابت ڪري ڇڏيون آهن صرف مئي  ۾ ايندڙ رقم ثآبت نه ٿي سگھي، ٻڌڻي دوران فيصل عرب پڇيو ته نيازي سروس کان سواءِ ڪو ٻيو اثاثو سامهون نه آيو، اڪرم شيخ چيو ته منهنجا ايترا وسيلا ناهن ته معلوم ڪري سگھان ته ڪو ٻيو ڪو اثاثو هيو اها حقيقت آهي ته نيازي سروس لميٽڊ ڪمپني 2015 تائين بحال رهي. جڏهن ته عمران خان 2013 جي اليڪشن ۾ نيازي سروس لميٽڊ ڪمپني کي ظاهر ڪري سگھي پيو. ڪمپني جي اڪائونٽ ۾ عمران خان جو ڪتاب ۽ ڪرڪيٽ آمدني به ايندي رهي ، جڏهن ته عمران خان اين ايل ايس ڪمپني جي اڪائونٽ ۾ رکيل پيسن کي استعمال ڪندو رهيو. چيف جسٽس چيو ته اهڙن حالتن ۾ اسان چاڪيو، ڇا اسان وٽ رڪارڊ طلب ڪرڻ جو اختيار آهي، جنهن تي اڪرم شيخ چيو ته نيازي سروس اڪائونٽ ۾ موجود هڪ لک پائونڊ ڪنهن جو هيو. عمران خان اين ايس  ايل جا اثاثا 2002 ۽ 1997 جي ڪاغذن ۾ نه ٻڌايا. جسٽس فيصل عرب پڇيو ته پيسو ڪٿي به رکيو وڃي ان سان اسانجو ڇا؟ جنهن تي اڪرم شيخ چيو ته ڪنهن جو ڪجھه به نه ٿو وڃي قانون جو سڀ ڪجھه و ڃي ٿو. عدالت پاڻ ڏسي. ته اين ايس ايل کي ظاهر ڪيو ويو جڏهن ته منهن جو ڪيس اثاثا ظاهر نه ڪرڻ جو آهي، جمائمه کي هڪ لک 80 هزار ڊالر قرض کان وڌيڪ ادا ڪيا جيترو قرض هيو اوتروئي ادا ڪرڻ گھرجي هان.، عمران خان جي وڪيل نعيم بخاري چيو ته منهنجي طبعيت گذريل ڏينهن کان وٺي خراب آهي  جنهن تي     چيف جسٽس چيو اڪرم شيخ سنجده سوال ڪيا آهن. جمائمه پاران راشد خان کي رقم موڪلڻ  تي سوال نه ڪيا ، جڏهن ته عمران خان جو قرض وٺڻ اليڪشن ڪيمشن جي رڪارڊ سان ثابت نه ٿو ٿئي انڪري جيڪو ڪيس ثابت ٿيل آهي انهي تي زور وجھندس. اڪرم شيخ چيو ته اهو ثابت ٿيل آهي ته جمائمه کان عمران خان قرض ورتو.  ڪاغذن ۾ قرض ظآهر نه ڪيو ويو . جنهن تي جسٽس عمر عطا بنديال چيو ته  اهو  زال مڙس جي وچ ۾ معاملو هيو، اڪرم شيخ چيو ته معاملو پيءَ پٽ جو هجي يا زال مڙس جو قانون جي نظر ۾ ڏسڻون آهي ، چيف جسٽس رمارڪس ڏنا ته قرض ظاهر نه ڪيو پر جمائمه جي نالي  زمين کي ظاهر ڪيو ويو جنهن تي شيخ اڪرم چيو ته عمران خان پنهنجي پهرين لکت واري جواب ۾ ڪٿي للکيو آهي ته زمين جمائمه جي لاءِ خريد ڪئي جڏهن ته آخري جواب ۾ عمران خان نئون موقف پيش ڪري ٿو هو چوي ٿو ته زمين سان ان جو تعلق ناهي ، هن چيو ته زمين جمائمه خريد ڪئي. مونکي ٻڌايو ته مان عمران خان جي ڪهڙي جواب تي دارومدار ڪيان.  شيخ اڪرم چيو ته 30 جون 2002 تائين عمران خان جي نالي قرض واجب الادا هيو اليڪشن جي ڪاغذن ۾ قرض کي ظآهر نه ڪيو ويو، جسٽس چيو ته پاناما ۾ معاملا ڪمپني جي وچ ۾ هيا ۽ پاناما ۾ پگھار جو معاملو پٽ ۽پيءُ جي وچ ۾ نه هيو جنهن تي شيخ اڪرم چيو ته  اها خانداني ڪمپني هئي خانداني معاملو هيو، شيخ اڪرم چيو ته عمران خان جي اپيل منظور ٿيڻ تي هو قومي اسمبلي جو ميمبر بڻجي ويو. جڏهن ته پرويز مشرف عمران خان وزيراعظم بنائن چاهي ٿو، چيف جسٽس پڇا ڪئي ته  ڇا 2013 جي اليڪشن عمران خان غلط بياني ڪئي آهي. 2002 جي اليڪشن ۾ نااهلي جو وقت گذري ويو انڪري اسانکي 2013 جي اليڪشن جي باري ۾ ٻڌايو وڃي.  شيخ اڪرم چيو ته عدالت 2002 جي معاملي تي هڪ ميمبر کي 2013 ۾ نااهل ڪري چڪي آهي. جڏهن ته عدالت کي فيصلو ڪرڻون آهي. جڏهن عمران خان  مرد بڻجي ۽ پنهنجي ملڪيت ظاهر ڪري ۽ سينو تاڻي چوي ته اها زمين مان خريد ڪئي آهي ، عمران خان ملڪ جو وزيراعظم بڻجن چاهي ٿو. وڪيلن جا دليل مڪمل ٿيڻ کانپوءِ چيف جسٽس رمارڪس ڏنا ته اڃان فيصلو محفوظ نه ڪري رهيا آهيون، فيصلو محفوظ ڪيو ته بعد سوال ڪرڻ ممڪن نه ٿيندو.  جھانگير ترين ڪيس ۾ آفشور ڪمپني جو معاملو  اهي، جيڪڏهن عمران خان ڪيس بابت وڌيڪ سوالن جا جوابن جي ضرورت پئي ته جواب پڇنداسين، جھانگير ترين جي  خلاف حنيف عباسي جي درخواست جي ڌڻي اڄ اربع تي ٿيندي.

 

نيشنل ايڪشن پلان ملڪ مان دهشتگردي جي پاڙ پٽڻ لاءِ جوڙيو ويو : خواجا آصف

اسلام آباد(م.ڊ)  پرڏيهي وزير خواجا محمد آصف چيو آهي ته پاڪستان جي هٿياربند فوجن دهشتگردي خلاف جنگ ۾ ڪيتريون ئي ڪاميابيون حاصل ڪيون آهن. هڪ نجي ٽي وي چئنل سان ڳالهائيندي خواجا محمد آصف چيو ته موجوه حڪومت دوران شروع ڪيل فوجي آپريشن ڪامياب رهيا. هن چيو ته نيشنل ايڪشن پلان ملڪ مان دهشتگردي جي پاڙ پٽڻ لاءِ جوڙيو ويو آهي. هن چيو ته ملڪ اندر جمهوري نظام سگهارو ٿي رهيو آهي. امريڪا جي سندس ايندڙ دوري بابت هڪ سوال جي جواب جو ڏيندي هن چيو ته پاڪستان ان گڏجاڻي ۾ پنهنجي پوزيشن واضح ڪندو. هڪ سوال جي جواب ۾ پرڏيهي وزير چيو ته ڀارتي عوام نريندر مودي کي وزيراعظم چونڊيو آهي جيڪو انساني حقن جي خلاف ورزين ۽ مسلمانن جي قتل عام ۾ ملوث هو.

 

بايوميٽرڪ نظام متعارف ڪرائڻ کانپوءِ ۴ هزار کان وڌيڪ استادن استعيفائون ڏنيون آهن: وڏو وزير

ڪراچي(م.ڊ)  سنڌ جي وڏي وزير سيد مراد علي شاهه چيو آهي ته سکر بئراج جي بحالي جو ڪم شروع ٿي ويو آهي، ان جي بحالي سان صوبي جي ۲.٦ ملين ايڪڙ زرعي زمين تائين پاڻي باقائدگي سان پهچندو، اسان استادن جي حاضري تي نگراني لاءِ بائيو ميٽرڪ سسٽم متعارف ڪرايو آهي، جنهنڪري ۴ هزار کان وڌيڪ استادن استعيفائون ڏنيون آهن. جاري ڪيل پڌرائي موجب اهڙو اظهار هن وزير اعليٰ هائوس ۾ عالمي بينڪ جي ڪنٽري ڊائريڪٽر جي سربراهي ۾ هڪ وفد سان ملاقات دوران ڪيو. عالمي بينڪ جي وفد ۾ مئنيجر آپريشنز ملينڊا گوڊ ، ليڊي ڪنٽري اڪنامسٽ انريڪيو بلانڪو آمس، سينئر ٽرانسپورٽ اسپيشلسٽ سعيد ڊاڊا ۽ ٻيا شامل هئا، جڏهن ته سنڌ جي وڏي وزير سان گڏ صوبائي وزير ترقي ۽ منصوبابندي مير هزار خان بجاراڻي، نيوٽريشن پروگرام جو صوبائي ڪوآرڊينيٽر مير حسين علي، اسپيشل سيڪريٽري آبپاشي احمد جنيد ميمڻ، سيڪريٽري زراعت ساجد جمال ابڙو سيڪريٽري لائيو اسٽاڪ ۽ فشريز، سيڪريٽري تعليم ۽ ٻيا آفيسر هئا. ملاقات دوران سکر بيراج جي بحالي ۽ ٻين معاملن تي خيالن جي ڏي وٺ ڪئي وئي. ان موقعي تي رٿابندي ۽ ترقي واري کاتي جي چيئرمين محمد وسيم بريفنگ ڏيندي ٻڌايو ته سنڌ ۾ عالمي بينڪ جا ۱۲ منصوبا هلي رهيا آهن سکر بيراج جي مرمت، مڪينيڪل ورڪ يعني دروازن ۽ مشينري جي تبديلي ۽ بجلي جي ڪم جي بحالي جي منصوبن تي ۲۰.۲۴ ارب روپيا خرچ ايندو جنهن مان ۱۸ ارب عالمي بينڪ ڏيندي ۽ ۱.۹ ارب سنڌ حڪومت ادا ڪندي. ان موقعي تي وڏي وزير چيو ته سکر بيراج جي بحالي سان ۲۰ لک کان وڌيڪ ايڪڙ زمين تائين پاڻي پهچي سگهندو. ان موقعي تي عالمي بينڪ جي ڪنٽري چيف اجلاس کي ٻڌايو ته پبلڪ پرائيوٽ پارٽنر شپ جي ڪري سنڌ گروٿ اسٽريٽجي پروگرام ۾ سنڌ حڪومت صحت ۽ تعليم جي شعبن ۾ بهتر ڪم ڪيو آهي.

 

پوين سيٽن تي ويهندڙ ماڻهو هيس، پارٽي طاقت وزير اعظم بڻايو: وزير اعظم

اسلام آباد(ويب ڊيسڪ) وزير اعظم شاهد خاقان عباسي چيو آهي ته پوين سيٽن تي ويهڻ وارو ماڻهو هيس، پارٽي جي طاقت مون وزير اعظم بڻايو، مون کي فخر آهي ته 30 سال پهرين مسلم ليگ ن کي جوائن ڪيو ۽ اڄ به پارٽي سان گڏ بيٺو آهيان، اها پارٽي جي طاقت ئي هئي جنهن مون کي وزير اعظم بڻايو، آئون نواز شريف کي ٻيهر ن ليگ جو صدر چونڊجڻ تي واڌاريون پيش ڪيان ٿو. ن ليگ جي مرڪزي جنرل ڪونسل اجلاس کي خطاب ڪندي شاهد خاقان عباسي چيو ته اڳوڻي وزير اعظم ذوالفقار علي ڀٽو کي عدالتن ڦاسي ڏني، جنهن نه عوام قبول ڪيو ۽ نه ئي وري تاريخ قبوليو، اهڙي ريت 28 جولاءِ تي سپريم ڪورٽ اسان جي خلاف فيصلو ٻڌايو ۽ اسان عدالتي حڪمن تي عمل ڪيو پر عوام ان فيصلي کي به قبول نه ڪيو. هن چيو ته آمريت ۽ پيپلز پارٽي جي دورن جو ن ليگ جي دورن سان ڀيٽ ڪيو اسان جا منصوبا 100 سيڪڙو وڌيڪ نڪرندا، هن چيو ته ايندڙ چونڊن ۾ 8 مهينا باقي آهن ۽ اسان انهن 8 مهينن ۾ انهن منصوبن کي مڪمل ڪنداسين جيڪي 4 سال پهرين نواز شريف شروع ڪيا هئا، هي اهي منصوبا جن کي گهڻو پهرين مڪمل ڪرڻ گهرجي ها، اُهي نواز شريف 4 سالن ۾ مڪمل ڪيا ۽ انهن منصوبن سان عوام جا مسئلا هل ٿيندا ۽ مون کي يقين آهي ته جيڪو مينڊيٽ عوام نواز شريف ڏنو آهي ۽ ايندڙ چونڊن ۾ نواز شريف کي ڏيندو ۽ مون کي اميد آهي ته نواز شريف ۽ سندس پارٽي اڳتي لاءِ به ملڪ ۽ قوم جي خدمت ڪندي.

 

آرمي چيف جي صدارت ۾ ڪور ڪمانڊرس ڪانفرنس: ملڪي سڪيورٽي صورتحال جو جائزو ورتو ويو

راولپنڊي (ويب ڊيسڪ): آرمي چيف جنرل قمر جاويد باجوا جي صدارت هيٺ 7 ڪلاڪ جاري رهندڙ اسپيشل ڪور ڪمانڊرز ڪانفرنس ۾ ملڪي سڪيورٽي سميت مجموعي صورتحال ۽ افغانستان بابت غور ويچار ڪيو ويو، جي ايڇ ڪيو راولپنڊي ۾ آرمي چيف جنرل قمر جاويد باجوا صدارت هيٺ اسپيشل ڪور ڪمانڊرز ڪانفرنس ٿي، آرمي چيف جي صدارت هيٺ اسپيشل ڪور ڪمانڊرز ڪانفرنس 7 ڪلاڪن تائين جاري رهي، اسپيشل ڪور ڪمانڊرز ڪانفرنس ۾ ملڪ جي اندروني ۽ ٻاهرين سڪيورٽي صورتحال جو جائزو ورتو ويو، آرمي چيف جنرل قمر جاويد باجوا، ڪور ڪمانڊرز کي افغانستان جي صوري بابت پڻ اعتماد ۾ ورتو، ذريعن موجب، اجلاس ۾ اهم ملڪي معاملن سميت ايل او سي تي ڀارت طرفان سيز فائر جي لاڳيتي ڀڃڪڙين جو پڻ جائزو ورتو ويو.

 

هڪ شخص کي بچائڻ لاءِ آئين ۾ ترميم ڪئي وئي، نيب چيئرمين جي مقرري 8 آڪٽوبر کان اڳ ٿي ويندي: خورشيد شاهه

لاهور  (اين اين آءِ)  قومي اسيمبلي ۾ مخالف ڌر جي اڳواڻ سيد خورشيد شاهه چيو  ته نااهلي ماڻهون جي لاءِ پارٽي سربراهه بڻجن جي قانون کي پارليمينٽ جي بي توقيري قرار ڏيندي چيو ته هڪ  ماڻهون جي لاءِ ترميم سٺي روايت ناهي، ان سان پارليميٽ جو قدر ننڍو ٿيندو آهي، چونڊ سڌارن واري بل جي معاملي تي پي ٽي آئي ۽ ايم ڪيو ايم جي سنيٽ ۾ ڪردار جي جاچي ٿيڻ گھرجي، ٻنهي پارٽين پنهنجين غلطين کي لڪائڻ لاءِ قومي اسيمبلي ۾ احتجاج ڪيو، خورشيد شاهه چيو ته اسان نون ليگ سان ڄمي مقابلو ڪندا آهيون  ۽ پارليمينٽ جي دائري کي نه ڇڏيندا آهيون. اها پارليمينٽ  ڪنهن جنرل جي اليڪشن جي ۽ ڪنهن جنرل جي ورديءَ واري پارليمنٽ ناهي، اسان ان جو تقدس پامال نه ڪندا آهيون. هن چيو  ته نيب جي چيرمين جي مقرري جي مشاور ت سان  رڪجي نه ٿي سگھي ، ڇو ته 8 آڪٽوبر تائين ان  پراسيس کي مڪمل ڪرڻون آهي. پي ٽي آئي 7 ايم ڪيو ايم سان رابطا ڪيا پر انهن نالو نه ڏنو، پي ٽي آئي ۽ ايم ڪيو ايم ٻئي مونکي هٽائڻ ۾ مصروف آهن. هن چيو  ته پي ٽي آئي ۽ ايم ڪيو ايم پارا ان لاءِ نالو نه ڏيئ رهيا آهن ڇو ته هو مونکي مڃن ئي نه ٿا، انهن کي ان ڳالهه جو احساس آهي ته ڪهڙي منهن  سان نيب جي چيرمين جي لاءِ نالاڏيون ان لاءِ هو ڪيٻائي رهيا آهن.

 

پ پ آئيني ترميم جي مخالفت ڪري ذوالفقار ڀٽو جو روح رنجايو آهي: احسن اقبال

اسلام آباد (اين اين آءِ) پاڪستان مسلم ليگ نون جي جنرل سيڪريٽري احسن اقبال   چيو آهي ته ڪو به آمر اچي يا سپريم ڪورٽ جو فيصلو نوازشريف کان کٽڻ وارو ناهي، ملڪ ۾ جمهوريت مضبوط نه ٿيندي ته دفاع به مضبوط نه ٿيندو. چور دروازي جو قانون سياسي پارٽين کي قيادت کان الڳ نه ٿو ڪري سگھجي. ڪنوينش سينٽر اسلام آباد ۾ مسلم ليگ نون جي مرڪزي جنرل ڪونسل کي خطاب ڪندي گھرو وزير احسن اقبال چيو ته نوازشريف پوري قوم توهان سان گڏ آهي چاهي ڪوئي به آمر اچي يا سپريم ڪورٽ جو فيصلو توهان کان رشتو نه ٽٽندو. پاڪستان جي ويهه ڪروڙ عوام کي هن ملڪ جي فيصلي ڪرڻ جو حق آهي.  گھرو وزير چيو ته ڊو مور چوڻ وارن کي پيغام ڏيان ٿو ته بس گھڻو ٿي چڪو هاڻِي نو مور نو مور . جنهن قانون جي ڀٽو منظوري ڏني هئي اسان انهيءَ کي ٻيهر منظور ڪيو، ايوب خان سياسي پارٽين کي گھٽو ڏيڻ لاءِ آئين ۾ ترميم ڪئي پر ڀٽو جي حڪومت ايوب خان جي ان ڪاري قانون کي ختم ڪيو. جڏهن ته پرويز مشرف ٻيهر ساڳو ئي ڪارو قانون آندو ۽ نيب جي قانون کي به انتقامي ڪاروائي لاءِ استعمال ڪيو ويو، گھرو وزير چيو ته پيپلز پارٽي ذوالفقار علي ڀٽو جي قانون جي مخالفت ڪري پنهنجي قائد جي سياسي روح کي تڙپائي رهي آهي. هن چيو ته سپريم ڪورٽ پاڪستان جي آئين ۽ قانون جي محافظ آهي جنهن جي ذريعي پاڪستان جي سياست کي زير ۽ زبر ڪرڻ جو ڪوششون ملڪ جي حق ۾ ناهن ۽ اهي آئين ۽ انصاف جي خلاف به آهن. هن چيو  ته جيڪڏه ن ڪائي پارٽي يا شخص پنهنجي خواهشن جي لاءِ سپريم ڪورٽ کي سياسي پارٽيءَ ۾ تبديل ڪرڻ جو خواهشمند آهي ته اهو پاڪستان جو دشمن آهي. هن چيو  ته ترقياتي منصوبن کي مڪمل ڪرڻ لاءِ ڏينهن رات ڪم ڪري رهيا آهيون ته جيئن عوام سان ڪيل واعدن کي پورو  ڪيون ته جيئن قيادت کي ٻيهر عوام وٽ سرخرو ڪري موڪليون.

 

جماعت اسلامي پاران چونڊ سڌارن بابت بل خلاف عدالت وڃڻ جو اعلان، هاڻ اهڙو نظام نه هلندو: سراج الحق

لاهور (ويب ڊيسڪ): جماعت اسلامي جي امير سراج الحق چيو آهي ته هو چونڊ سڌارن بابت بل خلاف عدالت ۾ ويندا، ملڪ ۾ فرد ۽ خاندان بدران قانون جي حڪمراني هجڻ گهرجي، لاهور ۾ ميڊيا سان ڳالهائيندي سراج الحق چيو ته هو 5 آڪٽوبر تي آل پارٽيز گهرائي رهيا آهن، جنهن ۾ هو ايندڙ حڪمت عملي ٻڌائيندا، هن چيو ته چو واٽن تي فيصلا ٿيڻ لڳن ها ته عدالتن ۾ وڃڻ جي ضرورت نه پوي ها، تنهن ڪري هو سمجهن ٿا ته هاڻ اهڙو نظام نه هلندو، سراج الحق چيو ته هو چاهين ٿا ته جمهوريت، روايتون ۽ ادارا محفوظ رهن، ملڪ اندر فرد ۽ خاندان بدران قانون جي حڪمراني هجڻ گهرجي، سندس چوڻ هو احتساب رڳو هڪ فرد جو نه پر سڀني جو ٿيڻ گهرجي، جن سبب ملڪ بحرانن ۾ آهي، سراج الحق چيو ته ملڪ ۾ جمهوريت بدران آمريت هجڻ باوجود هو ڪرپشن خلاف ڪوشش ڪن پيا.

 

تحريڪ انصاف جو اليڪشن بل 2017 کي سپريم ڪورٽ ۾ چئلينج ڪرڻ جو فيصلو

اسلام آباد (ويب ڊيسڪ): تحريڪ انصاف اڳواڻ فواد چوڌري چيو آهي ته اليڪشن بل 2017 کي سپريم ڪورٽ ۾ چئلينج ڪنداسين، ترميم شهباز شريف کي پارٽي صدر بڻجڻ کان روڪڻ لاءِ ڪرائي وئي، تفصيلن موجب فواد چوڌري پريس ڪانفرنس ڪندي چيو ته عمران خان خان خلاف ڪيس ختم ٿي ويو ۽ هاڻي تحريڪ انصاف عوامي رابطا مهم جو آغاز ڪري رهي آهي، عمران خان ڪيس نواز شريف جي ڪيس کان تمام گهڻو مختلف آهي، ڇو ته خان صاحب چاليهه سال پراڻي بينڪنگ ٽرانزيڪشنز عدالت ۾ پيش ڪيون، هن نواز شريف کي مخاطب ڪندي چيو ته ميان صاحب! عمران خا اوهانوانگر ڪوڙ جو داستان ناهي ٻڌايو ۽ نه ئي ان قطري خط پيش ڪيو، اهو ئي نه عمران خان هڪ ڏينهن به عوامي عهدو ناهي رکيو، جڏهن ته ڪنوينشن سينتر ۾ اڄ چورن جو اجتماع ٿيو هيو ۽ هي محفل عوام جي پئسن سان سجائي وئي هئي، فواد چوڌري جو وڌيڪ چوڻ هيو ته نواز شيرف ي ان لاءِ ڪڍيو ويو جو اهو 300 ارب رپين بابت سوال جو جواب نه ڏئي سگهيو هيو، پر اڄ پاڪستان جي سڀ کان وڏي مني لانڊرر کي پارٽي جو سربراهه بڻايو ويو آهي.