تازيون خبرون

Monthly Archives: September 2017

اسٽوڪس کي جهيڙو ڳچيءَ ۾ پهچي ويو، پوليس هٿان گرفتار، ٽيم مان به ٻاهر

لنڊن (اسپورٽس نيوز) انگلش ڪرڪيٽ ٽيم جي بهترين آل رائونڊر بين اسٽوڪس کي گرائونڊ ٻاهران جهيڙي ۽ مارڪُٽ جي الزام ۾ پوليس گرفتار ڪري ورتو، جنهن کانپوءِ کيس انگلش اسڪواڊ مان پڻ ڊراپ ڪيو ويو آهي. ويسٽ انڊين ٽيم کي ٽين ون ڊي ميچ ۾ شڪست ڏئي انگلينڊ سيريز ۾ سرسي ته حاصل ڪئي پر ان ئي رات ٽيم جي فتح ۾ اهم ڪردار ادا ڪندڙ آل رائونڊر بين اسٽوڪس ساٿي رانديگر ايليڪس هيلز سان گڏ هڪ تڪرار ۾ ملوث ٿيو. رپورٽن موجب بين اسٽوڪس آچر ۽ سومر جي وچ واري رات برسٽل ۾ جهيڙو ڪيو، جنهن جي نتيجي ۾ 27 ورهين جي شخص کي چهري تي ڏاڍا ڌڪ لڳا ۽ کيس اسپتال وڃڻو پئجي ويو. اهڙي واقعي کانپوءِ پوليس بين اسٽوڪس کي گرفتار ڪري ورتو، جنهن کانپوءِ پڇا ڳاڇا ڪري کيس آزاد ڪيو ويو پر پوليس اکين ڏٺن شاهدن جي ڳولا ۾ مصروف آهي ته جيئن ڪارروائي عمل ۾ آڻي سگهجي. ان واقعي ۾ ايليڪس هيلز به اسٽوڪس سان گڏ هو، جنهن پڻ مارڪُٽ ۾ آل رائونڊر جو ساٿ ڏنو. اهڙي واقعي کانپوءِ انگلش ڪرڪيٽ بورڊ حرڪت ۾ ايندي ٻنهي رانديگرن کي ويسٽ انڊيز خلاف ايندڙ ون ڊي ميچ کان ٻاهر ڪري ڇڏيو آهي.

 

نوازليگ لاءِ بهتر ٿيندڙ سياسي ماحول: صاحب خان ڀٽي

عوامي مسلم ليگ سربراهه شيخ رشيد  نوازشريف جي ڏيهه واپسي کي ڏاهپ تي ٻڌل  فيصلو قرار ڏئي ڇڏيو آهي ، شيخ رشيد چيو آهي ته هن اڳ ئي چيو هو ته نوازشريف ڏيهه ضرور ورندو، ڪجهه ڏينهن اڳ  مملڪتي وزير طلال چوڌري به اسلام آباد ۾ ميڊيا سان ڳالهائيندي چيو  هو ته  جادوگرن کي الائي خبر ٿي پئي، جيڪو به چون ٿا اهو ايئن ٿي رهيو آهي، انهن ئي جادوگرن چيو هو ته سپريم ڪورٽ مان فيصلو نوازشريف خلاف ايندو ۽ بعد اهو ئي ٿيو، مطلب ته انهن سڀني جادوگرن جون سموريون اڳڪٿيون سچيون ٿي رهيون آهن،

جڏهن نوازشريف نااهل نه ٿيو هو ته ان وقت عوامي مسلم ليگ سربراهه شيخ رشيد چيو هو ته پپو پنجن ئي پيپرن ۾ فيل ٿيندو ۽ حقيقت ۾ اهو ايئن ئي ٿيو، هاڻ شيخ  رشيد چئي رهيو آهي ته نوازشريف ادارن خلاف نه ڳالهايو ته  حالتون بهتر ٿي ويندو،  هن وقت تحريڪ انصاف عمران خان اڃا به نوازشريف خلاف ڳالهائي رهيو آهي پر شيخ رشيد پنهنجي توپن جو رخ تبديل ڪري ڇڏيو آهي ۽ هاڻ هوائي فائر ڪري رهيو آهي، بهرحال شيخ رشيد جي بيان مان لڳي رهيو آهي ته ملڪ اندر حالتون تبديل ٿي رهيون آهن تمام جلد نوازشريف ۽ سندس پارٽين جون سرگرميون به  تيز ٿي وينديون،

هاڻ جڏهن سينيٽ مان به چونڊ سڌارن جو بل منظور ڪيو ويو آهي ته ان کان پوءِ اها ڳالهه واضح ٿي وئي آهي ته نااهل شخص به پارٽي جو سربراهه ٿي سگهي ٿو ۽ آئين ۾ اهڙي ترميم سان فائدو نوازشريف سان گڏ ٻين جماعتن کي  به ٿيندو.  پر اڳتي هلي ان سان هن ملڪ تي ڪهڙا اثر پوندا، اهو  ته وقت ئي ٻڌائندو پر هن وقت سڀ کان اهم ڳالهه اها آهي ته اها ترميم نوازشريف لاءِ تمام گهڻو فائديمند ثابت ٿيندي.  جڏهن نوازشريف پنهنجي گهر واري جي عيادت ڪرڻ لاءِ لنڊن ويو هو ته ان وقت چيو ويو هو ته هاڻ نوازشريف ڏيهه مشڪل واپس وري ڇاڪاڻ ته سندس خلاف ڏيهه ۾ تمام گهڻا ڪيس هلي رهيا آهن ۽ انهن کي منهن ڏيڻ نواز سرڪار لاءِ تمام گهڻو ڏکيو آهي،

بهرحال هن وقت نوازشريف ڏيهه واپس اچي ويو آهي ۽ ايندي سياسي سرگرميون تيز ڪري ڇڏيون آهن ۽ پارٽي اڳواڻن سان به ملاقاتون ڪري رهيو آهي. ايتري قدر جو  نوازليگ کان ناراض اڳواڻ چوڌري نثار به پنجاب هائوس پهچي نوازشريف سان  ملاقات ڪئي. ٻنهي اڳواڻن ۾ اها ملاقات 45 کان 50 منٽ تائين جاري رهي، جنهن دوران ملڪ جي مختلف معاملن  بابت خيالن جي ڏي وٺ ڪئي وئي، چوڌري نثار بيگم ڪلثوم نواز جي صحتابي بابت به نوازشريف کان معلومات حاصل ڪئي، جيڪڏهن ڏٺو وڃي ته  نوازشريف ۽ چوڌري نثار وچ ۾ٿيل ملاقات ڏيڍ مهيني کانپوءِ ٿي آهي ۽ اها ملاقات تمام گهڻو اهميت رکي ٿي، ڇاڪاڻ ته چوڌري نثار واحد شخص آهي، جنهن سڀ کان پهرين پنهنجي عهدي تان استعيفيٰ ڏني ۽ نواز ليگ خلاف گهٽ وڌ ڳالهايو پر سندس خلاف نوازليگ جي ڪنهن به پارٽي ڳالهائڻ جي همت نه ڪئي هئي،

جڏهن نوازشريف ڏيهه واپس آيو هو ته سندس ملاقات جا امڪان تمام گهٽ هئا پر ٻين اڳواڻن جيان اڳوڻي وفاقي گهرو وزير چوڌري نثار پنجاب هائوس پهچي نوازشريف سان ملاقات ڪئي هئي، جنهن بابت هر طرف اهي افواهه هئا ته چوڌري نثار آخر ڪهڙو پيغام کڻي نوازشريف سان ملاقات ڪئي، ڇاڪاڻ ته چوڌري نثار اهو واحد شخص هو، جنهن نوازشريف کي استعيفيٰ جو مشورو ڏنو هو. هن وقت به سندس ملاقات تمام گهڻا سوال اٿاري ڇڏيا آهن ۽ ان ملاقات مان لڳي رهيو آهي نوازشريف جي لاءِ ملڪ اندر ماحول بهتر ٿي رهيو آهي ۽ اڳتي  حلي نواز ليگ خلاف هلندڙ ڪيس ختم ٿي ويندا. جڏهن اڳوڻي وزيراعظم نوازشريف ڏيهه پهتو هو ته ان وقت  سندس صدارت هيٺ مشاورتي اجلاس ٿيو هو، جنهن ۾ اسپيڪر اياز صادق، خواجه سعد رفيق، پرويز رشيد، طلال چوڌري ۽ ٻين شرڪت ڪئي هئي، جنهن ۾ نيب ڪيسز، ملڪ جي سياسي صورتحال ۽ پارٽي معاملن تي ڳالهيون ڪيون ويون هيون. ۽ ان ئي اجلاس ۾ احتساب عدالت ۾ پيش ٿيڻ جو فيصلو ڪيو ويو هو.

هڪ ٻه ڏينهن اڳ نوازشريف چيو هو ته ڪيس پاناما جو هو پر سزا اقاما تي ٻڌائي وئي، هي ڪهڙو انصاف آهي؟، ڳالهه پاناما کان شروع ٿي ته ختم به ان تي ٿيڻ گهرجي ها.جن ججن سندن خلاف فيصلو ڏنو انهن ئي سندن جي اپيل ٻڌي، اهڙي طرح جتي به اهو معاملو ويندو اتي ساڳيا جج موجود هوندا. بهرحال نوازشريف ان وقت ڏيهه وريو آهي، جڏهن سينيٽ ۾  چونڊ سڌارن جو بل منظور ڪيو ويو هو، ايم ڪيو ايم پاڪستان به نواز ليگ جي حمايت ۾ ووٽ ڏئي بل کي منظور ڪرائڻ ۾ اهم ڪردار ادا ڪيو هو پر هاڻ ايم ڪيو ايم سربراهه فاروق ستار چئي رهيو آهي ته جنهن به اڳواڻ حمايت ۾ ووٽ وڌو ان خلاف ڪارروائي ڪئي وئي آهي. هاڻ جڏهن بل به منظور ٿي ويو آهي، باقي صرف صدر ممنون حسين جي منظوري جي ضرورت آهي، جيڪو به لڳي ٿو تمام جلد مڪمل ٿي ويندو. جيڪڏهن ايم ڪيو ايم ان شخص خلاف ڪارروائي ڪري به ته ان جو ڪو به فرق نه پوندو،

هن وقت هڪ طرف ملڪ اندر دهشتگردي آهي ته ٻي طرف وري سياسي پارٽين ۾ ڇڪتاڻ وارو ماحول آهي، جنهن سان ڪنهن به وقت هن ملڪ ۾ حالتون خراب ٿي سگهن ٿيون. چيئرمين رضا رباني چيو آهي ته ٻن ادارن پارليامينٽ جي اختيارن ۾ مداخلت ڪئي آهي ۽ جيڪڏهن ٻئي ايوان ۽ صوبائي اسيمبليون آئيني ڪردار ادا ڪن ته جمهوريت مضبوط ٿيندي،اقتدار جي ٽڪنڊي ۾ پارليامينٽ سڀني کان ڪمزور ادارو آهي، رضا رباني ته اهو به چيو هو ته پارليامينٽ جا ٻئي ايوان ۽ صوبائي اسيمبليون پنهنجي آئيني حدن مطابق ڪم ڪن ته ملڪ ۾ جمهوريت جي مضبوطي جا مثبت نتيجا ايندا، اختيارن کي محدود ڪنداسين ته ٻيا ادارا پارليامينٽ جي حدن ۾ جڏهن چاهين پنهنجي مرضي سان داخل ٿيندا، پيپلز پارٽي اڳواڻ قمر زمان ڪائر چيو هو ته نواز شريف اهو تاثر ڏيڻ جي ڪوشش ڪري رهيو آهي ته ان تي ڪرپشن جو ڪو ڪيس ناهي جڏهن ته نواز شريف کي ملڪ جي اعليٰ عدالت جي پنج ججز چيو آهي ته اهو صادق ۽ امين ناهي رهيو، نواز شريف خلاف عدليه ڪا سازش ناهي ڪئي، عدليه سازش ڪري به ڪيئن سگهي ٿي؟، انهن کي پنهنجي صفائي پيش ڪرڻ جو پورو موقعو ڏنو ويو هو،

هاڻ ڏسڻو اهو آهي ته نوازشريف احتساب عدالت کي ڪهڙي ريت منهن ڏئي ٿو، ڇاڪاڻ ته نوازشريف کي هن وقت ريفرنسز کي به منهن ڏيڻو پئجي  رهيو آهي، جنهن مان کيس جند آجي ڪرائڻ تمام ڏکيو پئجي ويندو؟ بهرحال جيڪڏهن  اسٽيبلشمينٽ ۽ نوازسرڪار وچ ۾ ڳالهيون طئي ٿي ويون هونديون ته پوءِ نوازشريف جي نااهلي وارو ٽپو به مٽجي  ويندو۽  هي جماعت  وڏي مارجن سان اقتدار ۾ اچي ويندو، جنهن جو ثبوت لاهور جي قومي اسيمبلي جي تڪ اين اي 120 تي ٿيل چونڊ مان به ملي سگهي ٿو. جيڪڏهن ڏٺو وڃي ته ڏيهه واپسي کان پوءِ نوازشريف اڳ جي ڀيٽ ۾ ٿورو تبديل ٿي چڪو آهي ۽ سندس قانوني ماهرن ۽ پارٽي اڳواڻن سان ملاقات به وڏي اهميت رکي ٿو. هاڻ ڏسڻو اهو آهي ته آخر  نوازسرڪار هڪ دفعو ٻيهر اقتدار ۾ اچي ۽ عوام کيس ووٽ ڏيندو يا نه؟  باقي رهي ڳالهه ايندڙ وزيراعظم جي ته  بلاول ڀٽو  به هن ملڪ جو ٻيو وزيراعظم ٿي سگهي ٿو ۽ ٻئي نمبر تي تحريڪ  انصاف اچي سگهي ٿي. هاڻ ته اهو وقت ئي ٻڌائندو ته ايندر  وقت ۾ ڪهڙي پارتي اقتدار ۾ ايندي.

sahibalisindhi@gmail.com

 

 

پاڪستان جي تَرقي ڪيئن مُمڪن بَڻجي سگھي ٿي..؟ : فدا حسين ڪُٻر 

پاڪستان جي آزادي کي ستر سال مڪمل ٿي چُڪا آھن، آزادي جو وجود تہ اسان جي اکين جي اڳيان آزاد ٿي ويو آھي، پر ان وجود جي ڪا ڪَڙي اڃان تائين ڪٿي قيد بڻيل نظر اچي رھي آھي، جنھن سبب ترقي جو نالو پاڪستان جي نالي کان ساڀيان ۾ رٺل نَظر اچي رھيو آھي. پاڪستان اندر اسان جيستائين شخصيتُن کي ادارن کان وڌيڪ عزت ڏيندا رھنداسون تيستائين پاڪستان ۾ ترقي ناممڪن آھي، وزير اعظم نواز شريف ھُجي، آصف زرداري ھُجي يا وري شاھد خاقان عباسي ھُجي پاڪستان جي آئين ۾ لکيل قانون ۽ ليجسليٽوز سڀ ڪنھن تي برابر سان عائد ٿيڻ گھُرجڻ جي سخت ضرورت آھي. جيڪڏھن پاڪستان جي ڪا وڏي شخصيت ڪنھن ڊيپارٽمنٽ ۾ ڪنھن ڪم سان وڃي ٿي تہ اداري اندر ڪم ڪندڙ ملازم  کي سامھون واري جَي شخصيت جي نہ پر اداري جي رولز ۽ ريگليوليشن قانون جي پاسداري جي عملدرآمد تي ڪم ڪري کيس سندس وقت اچڻ تي ڪم ڪري ڏيڻ کپڻ جي ضرورت آھي. جيڪڏھن ان لا۽ کيس لائن ۾ بيھڻو پوي تہ بيھاريو وڃينس جيستائين اسان پاڪستان جي آئين اندر موجود قانون جي پاسداري نہ ڪنداسون، اسان ادارن کي شخصيتن کان وڌيڪ اھميت نہ ڏينداسون تيستائين ملڪ ترقي نہ ڪري سگھندو، ڇو تہ  شخصيتون ادارن جي مٿان مڙھيل نہ ھونديون آھن. بلڪي ادارا شخصيتن تي مڙھيل ھُوندا آھن ۽ اسان کي ادارن کي شخصيتن کان وڌيڪ اھميت ڏيڻ گھُرجي. پاڪستان اندر وچين طبقي کي ھٿ سان نظرانداز ڪري انھن جي زندگي تباھ ڪئي پئي وڃي، ھيٺين طبقي جو انسان اڄ جي سماج ۽ حڪومت پاران عائد ڪيل قانونن جي ڪري سخت متاثر نظر اچي رھيو آھي، انھن جا پُٽ ۽ ڌيئرون نوڪري لا۽ در در واجھائڻ ۽ ھر وڏي ماڻھون جي اڳيان ھٿ ٺنگڻ تي مجبور ڪيا ويا آھن. اسان ڪنھن کي بہ وزير اعظم ڪيون،

ڪير به وزير اعظم ٿئي اسان کي ان ڳالهھ سان وابستگي ناھي پر ڪير بہ ھُجي پر  قوم جو ھمدرد ھُجڻ گھُرجي، ھن ملڪ کي اھڙي حُڪمران جي ضرورت آھي، جيڪو عوام کي بنيادي سھولتون ڏئي انھن کي در در دھڪا ڪارائڻ کان پرھيز ڪرائي سگھي، اسپتالن ۾ سھولتيون ڏنيون وڃن، انھن جي لا۽ دوا درمل جو بندوبست ڪري سگھي، انھن کي اسپتال ۾ رھائش جو بندوبست سُھڻي نموني سان ڪري ڏئي سگھي. عوام کي سھولت ڏئي روڊ رستا ٺھرائي ڏئي سگھي ۽ ٻيون بہ کوڙ ساريون بنيادي شيون ڏئي سگھي. جيڪڏھن اسان مٿين بطقي کي ڇڏي انھن جي حصي جي اوڳاڙي ھيٺين طبقي کان وصول ڪيون تہ پو۽ ملڪ ترقي ڪٿان ڪندو، بئنڪ آڪائونٽن ۾ کربين روپين جو مالڪ جيڪڏھن ھڪ روپيو بہ ٽيڪس ادا نہ ڪري ۽ ھيٺين بطقي واري کان اُھا اوڳاڙي کئي وڃي تہ پو۽ ملڪ جي ترقي ممڪن ناھي، ھاڻي اسان ٽيڪس انھن کان پيا وصول ڪريون جنھن جي في ڏينھن جي ڪمائي ٻه سو روپيا آھي، جنھن جون ڌيئرون ۽ پٽ بيروزگار آھن.!ملڪ ۾ اڻ کُٽ قدرتي معدنيات ملڻ کان پو۽ بہ ھي قوم يتمين وانگر وات پٽيو ويٺي آھي،

سون، قيمتي پٿر، گئس، تيل، ڪوئلي، ۽ ٻين انمول ذخيرن جي ھُجڻ جي باوجود اسان جو ملڪ پوئتي پيل آھي، حقيقت ۾ اسان جي ميڊيا جيترو فوڪس سياسدانن جي خبرن ھلائڻ ۾ ضايع پئي ڪري جيڪڏھن اوترو وقت قدرتي ذخيرن جي خوجنائن ۽ مليل ذخيرن جون خبرون ميڊيا تي دنيا جي سامھون پيش ڪن تہ پاڪستان جي ترقي جي راھ ۾ ڪير بہ رُڪاوٽ بڻجي نٿو سگھي، ميڊيا اسان جي ملڪ ۾ اھم ڪردار ادا ڪري رھي جنھن کي چاھي ھيرو بڻائي جنھن کي چاھي زيرو بڻائي، ملالا يوسف زئي به ميڊيا جي سپورٽ جي ڪارڻ ايتري منزل تي پھتي آھي. نہ تہ پاڪستان اندر روز ھزارين ملالائون جنم ٿيو وٺن جيڪي دھشتگردي جو نشانو بڻجو وڃن، پر سوشل ميڊيا تي انھن جي باري ۾ ھيڊلائن بہ نٿي ھلي، ۽ حُڪمران انھن جي تعزيت تي بہ نٿا پھچي سگھن. جيڪڏھن ميڊيا پنھنجو رول پِلي ڪري تہ پاڪستان ڪامياب ٿي سگھي ٿو ميڊيا جي ماڻھن کي چڳي ريت خبر آھي تہ ڪير ڪٿي ڪيئن ۽ ڇا پيو ڪري؟ پاڪستان جي زوال ۾ عوام جو ڪو به ڏُوھ ناھي، نہ ئي وري دشمنن ۽ دھشتگردن جي پراسرار واقعن پاڪستان جي ترقي ۾ رڪاوٽ وڌي آھي، پر پاڪستان جي ليڊرز جي نااھلي ئي پاڪستان کي اھڙي منزل تي پھچايو آھي، سياستدانن عوام جي مسئلن کي سنجيدگي سان حال ڪرڻ بجائي ھڪ ٻئي تي تنقيد ۽ گُدا لفظ ڳالھائڻ ۾ مصروف آھي،

آصف زرداري پرويز مشرف کي ڊيڄارڻ دمڪائڻ ۾ پورو آھي، ۽ کيس چوندي تہ مڙس ماڻھون آھين تہ ڪورٽ ۾ اچ.! عمران خان بلاول ڀُٽي کي چوي تہ ٻارن جو سياست ۾ ڪھڙو ڪم؟ تہ نواز شريف سپريم ڪورٽ کي چوي ٿو ”منھنجو ڏوھ ڪھڙو ڪُيو”؟ سياستدان جيستائين پنھنجا مفاد ڇڏي عوام جي ڪمن ۾ سنجيدگي سان ھٿ وجھندو پو۽ ئي مسئلا حل ٿيڻ جو نالو وٺندا. پاڪستان جو عوام کي پيرن، فقيرن، مخدومن، جي غلامي کي ڇڏي پنھنجي پيرن ٿي بيھي ڏيکارڻ گھُرجي، منھنجي چوڻ جو مقصد آھي تہ عوام کي انھن جي عزت ڪرڻ گھُرجي! پر انھي سان گڏوگڏ اھيو بہ سوچڻ ۽ سنجھڻ جي ضرورت آھي تہ عزت ڪرڻ ۽ غلامي ڪرڻ ۾ فرق آھي، جنھن فرق کي سَمجھڻ جي عوام کي شديد ضرورت آھي. پاڪستان عوام کي پنھنجي ووٽ جو صحيح استعمال ئي پنھنجي اصل منزل تي پھچائي سگھي ٿو، پر اسان جي سماج ۾ ووٽ کي را۽ نہ بلڪي وڏڙڻ جِي امانت سمجھي سياستدانن جي جھولي ۾ وجھو ڇڏيون، اسان کي کپي تہ ووٽ کي پنھنجي امانت نہ بلڪي را۽ سمجھي ڏيون تہ جيئن اسان جي مستقبل جو صحيح فيصلو ٿي سگھي. اسٽبلشمنٽ ۽ پاڪستان حڪومت کي قبضاگيري خلاف بہ سخت لفظن مذھمت ڪرڻ جي ضرورت آھي، ڏينھون ڏينھن شھرن اندر دڪاندار روڊن ٿي ضبضاگيريون ڪري رھيا آھن، ڪجھ ڏينھن پھريان پاڪستان نامور ليکڪ محمود شام جو آرٽيڪل پڙھيم جنھن ۾ قبرستانن تي بہ قبضا گيري جون خبرون ٻڌڻ ۾ آيون. حڪومت کي کپي  قبضاگري تي  ڪو عملي قدم کنيو وڃي، تعليمي معيار کي بھتري ڪرڻ لا۽ اسان کي ڌنڌو وڻج واپار ۽ تجارت ڪندڙ اسڪولن، يوونيورسٽين، ۽ ڪاليجن تي تالا ھڻي، انھن تي بينڊ ھڻڻ کپي، جيڪي تعليم جي نالي سان عوام جي اکين ۾ ڌوڙ وجھي پيسن جو تجوريون ڀري رھيا آھن. پاڪستان جي بند پيل سڀني اسڪولن کي کولي انھن ۾ ٻارن ۽ ماسترن جي حاضري کي يقيني بنايو وڃي پاڪستان جي آئين ۾ ترميم ڪري سپريم ڪورٽ مان اھڙو بل پاس ڪرائڻ جي ضرورت آھي، جنھن جي قانون تحت ڪو بہ پاڪستان جو شھريت رکندڙ شخص پنھنجي ذاتي ملڪيت پاڪستان کان ٻاھر خريد يا وري سوئز بئنڪ جيئان ڪنھن بئنڪ ۾ جمح نٿو ڪري سگھي ٿو، پر اسان جا سياستدان اھڙي قسم جو بل پاس نہ ٿيڻ لا۽ نُھ چوٽي جو زور آزمائيندي اربين روپين منجھ جج خريد ڪري وٺندا، باقي سياستدانن جي لا۽ ڦاھي جو پنڌو بڻجندڙ 62 ۽ 63 جھڙن آرٽيڪل کي خارج ڪرڻ لا۽ سپريم ڪورٽ ۾ آئين جي تريمينن پٽيشنو لازمي جمع ڪرائيندا! آئون سمجھان ٿو تہ اُھي ڪجھ مناسب قدم پاڪستان جي ترقي جي گاڏي کي منزل تائين پھچائي سگھن ٿا، جيڪڏھن ايئن نه ته پو۽ پاڪستان جي ترقي ۾ اڃان ستر سال ٻيا لڳي ويندا….!

 

 

وقت کان اڳ چونڊن جو مطالبو….!

تحريڪ انصاف جي سربراهه عمران خان هڪ ڀيرو ٻيهر وقت کان اڳ چونڊن جو مطالبو ڪيو آهي، جيتوڻيڪ هفتو اڳ اين اي 120 ۾ پي ٽي آءِ کي ن ليگ جي ڳڙهه مان شڪست ملي آهي، ان هوندي به تحريڪ انصاف جي چيئرمين پاران ملڪ ۾ وقت کان اڳ چونڊون ڪرائڻ جو مطالبو غير اهم آهي، پريس ڪانفرنس ڪندي عمران خان چيو ته اشتهارن ۾ ته خوشحالي اچي رهي هئي، هاڻي خبر پئي ته قرضي ٿي ويا آهيون، قرض وڌندا پيا وڃن، قسطون ادا ڪرڻ لاءِ پئسا وٺڻا پئجي رهيا آهن، ملڪي جون معاشي حالتون ڳڻتي جوڳيون آهن، ملڪ ۾ پرڏيهي سيڙپڪاري نه پئي اچي، عوام تي ٽيڪس لڳائي پئسا گڏ ڪيا پيا وڃن، سڀني کان مهانگي بجلي برصغر ۾ پاڪستان ۾ آهي، مشرف دور کان گهٽ سيڙپڪاري زرداري جي دور ۾ آئي ۽ زرداري جي دور کان به گهٽ سيڙپڪاري نواز شريف جي دور ۾ آئي، جڏهن افغان پاليسي بڻجي رهي هئي ته اسان جو پرڏيهي وزير نه هيو، نواز شريف پاناما ڪيس ۾ لڳل هيو، ان جي پرواهه نه ڪئي، خواجا آصف، احسن اقبال هائوس ان آرڊر ڪرڻ جو چيو، ڀارت به اهو ئي چئي رهيو آهي، چار سال پنهنجو هائوس ان آرڊر نه ڪيو، نيشنل ايڪشن پلان تي عمل نه ڪري رهيا آهن، سمورين سياسي جماعتن نيشنل ايڪشن پلان تي اتفاق ڪيو هيو، شاهد خاقان عباسي اڃا به چوندو آهي نواز شريف ئي منهنجو وزيراعظم آهي، ڪوئي مثال ٻڌايو ته نااهل شخص پارليامينٽ ۾ نٿو اچي سگهي پر پارٽي جو ليڊر بڻجي سگهي ٿو، جمهوريت جي گهرج آهي ته وزيراعظم پاڻ کي احتساب لاءِ پيش ڪري، چونڊ سڌارن جو بل منظور ڪرائي جمهوريت جو مذاق بڻايو پيو وڃي، شيخ رشيد به چئي رکيو آهي قطر سان ايل اين جي معاهدا سامهون رکو، وزيراعظم کي ايل اين جي ڪانٽريڪٽ تي پارليامينٽ ۾ بريفنگ ڏيڻ گهرجي، وزيراعظم چونڊن ڪرائڻ جو اعلان ڪري مينڊيٽ ٻيهر وٺي، ملڪ ۾ فوري چونڊون ڪرايون وڃن، چيئرمين نيب، نواز شريف، اسحاق ڊار جو نالو اي سي ايل ۾ وجهي، اپوزيشن ليڊر خورشيد شاهه کي نه هئڻ گهرجي، نيب جو نئون چيئرمين چاهيون ٿا، اليڪشن ڪميشن تي اعتماد ناهي، اتفاق راءِ آهي ته حڪومت فاٽا کي ڪي پي ۾ ضم ڇو نه ٿي رڪي، اليڪشن ڪميشن هڪ ايڊمنسٽريشن ادارو آهي، اليڪشن ڪميشن کي اختيار ناهي ته اها توهين جو نوٽيس ڏئي، خواجا آصف جو حشر نواز شريف جهڙو ٿيندو.

ڏٺو وڃي ته گذريل عام چونڊن کانپوءِ خاص ڪري پي ٽي آءِ پاران ڪي پي ڪي ۾ حڪومت قائم ڪرڻ بعد عمران خان وڏي واڪي اها دعويٰ ڪندو رهي ٿو ته هن صوبي ۾ تعليم ۽ صحت سميت ٻين شعبن ۾ وڏي پئماني تي بهتري آندي آهي ۽ هن ڪي پي ڪي ۾ انقلاب برپا ڪيو آهي، پر افسوس سان چوڻو ٿو پوي ته عمران خان پاڻ کي نوجوانن جو ليڊر سڏائيندي تبديلي جي ڳالهه ته ڪري ٿو، پر سندس بيانن ۾ عملي عنصر نظر نٿو اچي.هن وقت اسان جي موجوده ملڪي نظام ۾ طاقت جو مرڪز ڪير آهي ۽ ڪنهن کي قانونسازي جو اختيار آهي؟ اهي ٻه اهڙا سوال آهن، جيڪي اسان جي جمهوري نظام لاءِ گهڻي اهميت رکن ٿا ۽ انهن جا جواب ملڻ سان اهو واضح ٿي ويندو ته اسان جي ملڪ ۾ جمهوري نظام ڪيترو خودمختيار ۽ ادارن وٽ ڪيترا اختيار آهن. ساڳي ريت اسان جي ملڪي سياست ۾ روز نوان ڊراما معمول بڻجي چڪا آهن، عمران خان جيان اچانڪ اهڙا مطالبا ڪيا ٿا وڃن، جن جو ڪو منطق ئي نه آهي ۽ اهڙيون بي تُڪي ڳالهيون ماحول کي خراب ڪن ٿيون. هڪ پاسي رياستي ادارا سمجهن ٿا ته هو ئي قومي سلامتي جي بهترطريقي سان نگراني ڪري سگهن ٿا، ان ڪري بنيادي فيصلن جو حق انهن کي حاصل هجڻ گهرجي، ٻئي پاسي ايوانن مان اهڙي قانونسازي ٿي ڪئي وڃي، جيڪا عوامي نمائندن جي ذاتي مفادن جي واضح عڪاسي ٿي ڪري، آخر عوام ان نظام مان تنگ نه ٿيندو ته ٻيو ڇا ڪندو!

 

نواز شريف جي احتساب عدالت ۾ پيشي، فول پروف سيڪيورٽي ڏيڻ جو فيصلو

اسلام آباد( ويب ڊيسڪ )نواز شريف جي احتساب عدالت ۾ پيشي، فول پروف سيڪيورٽي ڏيڻ جو فيصلو، تفصيل موجب:  اڳوڻي وزيراعظم نواز شريف سان وزير اعظم شاهد خاقان عباسي ۽  اڳوڻي وفاقي گهرو وزير چوڌري نثار ملاقات ڪئي. لنڊن مان ڏيهه واپسيءَ بعد پنجاب هائوس ۾ نواز شريف سان ٻنهي اڳواڻن ملاقات ڪئي. ملاقات دوران ملڪي سياسي صورتحال تي ڳالهيون ڪيون ويون. ذريعن موجب ملاقات دوران اڳوڻي وزير اعظم نواز شريف وزير اعظم شاهد خاقان عباسي ۽ وزيرن جي ڪارڪردگي تي اطمينان جو اظهار ڪيو، ملاقات دوران چوڌري نثار علي نواز شريف جي قيادت تي اعتماد جو اظهار ڪيو. چوڌري نثار علي نواز شريف سان بيگم ڪلثوم نواز جي صحت بابت دريافت دريافت ڪيو. چوڌري نثار علي ۽ نواز شريف ۾ ڏيڍ مهيني کانپوءِ ٿيل ملاقات دوران هڪ ٻي کي ميارون پڻ ڏنيون ويون. چوڌري نثار علي اڳوڻي وزيراعظم کي پنهنجي خدشن کان آگاهه ڪيو. ٻئي طرف اڳوڻي وزير اعظم نواز شريف جي احتساب عدالت ۾ پيشي دوران فول پروف سيڪيورٽي ڏيڻ جو فيصلو، اڳوڻي وزير اعظم نواز شريف احتساب عدالت ۾ پيشي جي حوالي سان وفاقي وزيرن، پارٽي اڳواڻن ۽ قانوني ماهرن سان مشاورت مڪمل ڪري ورتي، فيصلو ڪيو ويو ته ڪارڪنن کي نه گهرايو ويندو ۽ نه روڪيو ويندو، عدالت ۾ نواز شريف سان گڏ پارٽي جا مرڪزي اڳواڻ ويندا، پيشي دوران احتساب عدالت اندر رينجرز ۽ ايليٽ فورس جو دستو مقرر ڪيو ويندو، ٻڌڻي دوران ميڊيا کي احاطي ۾ داخل ٿيڻ جي اجازت نه هوندي

 

ايمرجنسي لاڳو ڪرڻ، ججن جي نظربندي مشرف جو ذاتي فيصلو هو: ڪرنل (ر) انعام الرحيم

اسلام آباد (ويب ڊيسڪ): دهشتگردي ٽوڙ عدالت ۾ ججز نظربندي ڪيس جي ٻڌڻي دوران جنرل (ر) پرويز مشرف جي خلاف استغاثه جي آخري گواهه ڪرنل (ر) انعام الرحيم جو بيان رڪارڊ ڪيو ويو، ٻڌڻي دوران ڪرنل (ر) انعام الرحيم موقف اختيار ڪيو ته ايمرجنسي جو نفاذ ۽ ججز جي نظربندي پرويز مشرف جا ذاتي فيصلا هئا، هن چيو ته نومبر جي ايمرجنسي ۾ پرويز مشرف وردي جو غلط استعمال ڪيو ۽ پاڪ فوج جي ساک کي نقصان پهچايو، عدالت ۾ پنهنجي بيان ۾ سندس چوڻ هيو ته ججز جي نظربندي ۾ ڪور ڪمانڊرز جي مرضي شامل نه هئي، سندس چوڻ هيو ته ايمرجنسي خلاف وڪيلن ۽ اڳوڻن فوجين به احتجاج ڪيو، هن ٻڌايو ته عدليه بحالي تحريڪ ۾ سرگرم وڪيلن کي جيل اماڻيو ويو، پراسيڪيوٽر عامر نديم چيو ته سمورن گواهن جون شاهديون مڪمل ٿي ويون آهن، بعد ۾ ٻڌڻي کي پنج آڪٽوبر تائين ملتوي ڪيو ويو، مشرف خلاف 60 ججن کي نظربند ڪرڻ تي 11 آگسٽ 2009 تي ايف آءِ آر داخل ڪئي وئي، جنهن ۾ دهشتگردي جون دفعات به شامل ڪيون ويون، جون 2013 ۾ ان تي فرد جرم لاڳو ڪئي وئي، جنهن موجب اڳوڻي صدر ججز کي نظربند ڪيو ۽ ملڪ ۾ ايمرجنسي لاڳو ڪئي.

 

غير قانوني اثاثه ڪيس: اسحاق ڊار تي فرد جرم لاڳو ڪرڻ لاءِ تاريخ مقرر

اسلام آباد( ويب ڊيسڪ ) احتساب عدالت غير قانوني اثاثن جي ڪيس ۾ ناڻي واري وزير اسحاق ڊار تي فرد جرم لاڳو ڪرڻ لاءِ 27 سيپٽمبر جي تاريخ مقرر ڪري ڇڏي آهي. ضمانت ٿيڻ جوڳا گرفتاري وارنٽ جاري ٿيڻ کانپوءِ ناڻي وارو وزير اسحاق ڊار احتساب عدالت ۾ جج محمد بشير جي اڳيان پيش ٿيو. ٻڌڻي دوران جج سوال ڪيو ته جوابدار جا وارنٽ اڃا برقرار آهن پر مچلڪا داخل ڇو نه ڪيا ويا آهن. اسحاق ڊار جي وڪيل موقف اختيار ڪيو ته هو ضمانتي مچلڪا گڏ کڻي آيا آهن جيڪي هاڻي جمع ڪرايا ويندا. نيب پراسيڪيوٽر عدالت کي آگاهه ڪيو ته عدالتي حڪم ملندي ئي اسحاق ڊار جي لاهور ۽ اسلام آباد جي گهرن ۾ ڇاپا هنيا ويا پر جوابدار جي گرفتاري عمل ۾ نه اچي سگهي پر جوابدار اڄ عدالت ۾ اوچتو پيش ٿيو، عدالت کي اپيل آهي ته جوابدار جا ضمانت نه ٿيڻ جوڳا گرفتاري وارنٽ جاري ڪيا وڃن. اسحاق ڊار 10 لک رپين جا ضمانتي مچلڪا جمع ڪرائيندي عدالت کان 10 ڏينهن جي مهلت طلب ڪئي جنهن تي عدالت ريفرنس جا مڪمل نقل اسحاق ڊار کي ڏيڻ جو حڪم ڏيندي جوابدار  تي فرد جرم لاءِ 27 سيپٽمبر جي تاريخ مقرر ڪري ڇڏي آهي. عدالت چيو ته اسان روزاني بنياد تي ڪيس جي ٻڌڻي ڪنداسين، عدالت جوابدار جي ايندڙ ٻڌڻي تي حاضري يقيني بڻائڻ جو حڪم ڏيندي ڪيس جي وڌيڪ ٻڌڻي 27 سيپٽمبر تائين ملتوي ڪري ڇڏي.

 

ٽماٽر جي گهرج ۽ رسد ۾ فرق ختم ڪرڻ لاءِ افغانستان مان گهرائڻ جو فيصلو

لاهور (اين اين آءِ)  وفاقي نيشنل فوڊ سيڪيورٽي واري وزير سڪندر حيات بوسڻ چيو آهي ته ڀارت مان ڪنهن به صورت ۾ ٽماٽر نه گهرائينداسين، بلوچستان ۾ ٽماٽرن جو فصل تيار آهي ۽ جلد بحران ختم ٿي ويندو، محمد نواز شريف جو ملڪي سياست ۾ اهم ڪردار آهي، ان جي ڏيهه واپس اچڻ سان سمورا افواهه ۽ مخالفن جون خواهشون مٽي ۾ دفن ٿي ويون آهن، ملڪ جي ترقي لاءِ سمورين سياسي پارٽين کي سخت محنت ڪرڻ گهرجي، وزيراعظم فيڊرل فوڊ سيڪريٽري جي اداري جي منظوري ڏئي ڇڏي، جڏهن ته پلانٽ بريڊرز رائيٽس بل قومي اسيمبلي ۽ سنيٽ مان منظور ٿيڻ سان گڏ ان جا رولز به تيار ڪيا ويا آهن، اهڙن خيالن جو اظهار هن پاڪستان بايو ٽيڪنالاجي انفارميشن سينٽر ۽ فارمين گريچ ڪاليج جي تعاون سان بايو ٽيڪنالاجي جي حوالي سان ڪوٺايل 3 ڏينهن واري ورڪشاپ جي افتتاحي سيشن کي خطاب ڪندي ڪيو، وفاقي وزير چيو ته عوام پاران سياسي پارٽي کي ڏنل مينڊينٽ کي تسليم ۽ ان کي پورو ٿيڻ گهرجي، اسيمبليون پنهنجو آئيني مدو پورو ڪنديون، وقت کان اڳ چونڊن جو مطالبو درست نه آهي، چونڊو مقرر وقت تي ٿيڻ گهرجن، هن چيو ته اڄ جو ورڪشاپ هڪ سٺي ڪوشش آهي ۽ اهڙا ايونٽ تمام ضروري آهن جتي ننڍن هارين ۽ ملڪ جي پيداوار وڌائڻ جي حوالي سان ڳالهه ٻولهه ٿيندي آهي، اهڙن ورڪشاپن جو انقاد ٿيڻ گهرجي، هن چيو ته بلوچستان ۾ بصرن ۽ ٽماٽرن جو فصل تيار ٿي چڪو آهي ۽ ڪجهه ڏينهن ۾ اهي سبزيون وڏي مقدار ۾ موجود هونديون، جڏهن ته عارضي کوٽ پوري ڪرڻ لاءِ ٽماٽر ڀارت کان نه گهرائينداسين، هن چيو ته ڏڪار کان بچڻ لاءِ ماحولياتي تبديلي تي ڌيان ڏئي رهيا آهيون، زراعت جو شعبو ملڪ جي ڪرنگهي جي هڏي جي حيثيت رکي ٿو جنهن ۾ بهتري لاءِ ڪوشش ڪري رهيا آهيون ته جيئن ان کي مڪمل صنعت جو درجو ملي سگهي.  ٻئي طرف  ڪابينا جي سب ڪميٽي پرائيس ڪنٽرول جو اجلاس بصرن جي اگهه ۾ گهٽتائي تي اطمينان جو اظهار ڪندي ٽماٽرجي گهرج ۽ رسد ۾ فرق ختم ڪرڻ لاءِ افغانستان مان ان جي درآمد وڌائڻ جو فيصلو ڪيو آهي، ان ڏس ۾ برآمد ڪندڙن جا خدشا ختم ڪرڻ لاءِ وزيرن ۽ سينيئر آفيسرن جي ٽيم انهن سان ملاقات ڪندي، افغانستان ۽ ايران ۾ پاڪستاني سفارتخانن سان به رابطو ڪيو ويندو، اجلاس جي صدارت پنجاب جي چيف سيڪريٽري زاهد سعيد ڪئي، سب ڪميٽي نوٽ ڪيو ته بلوچستان جيڪو ٽماٽر جي ملڪ جي پيداوار جو وڏو حصو پيدا ڪري ٿو اتي غير توقع جي طور تي وائرس جي حملي سبب فصل تباهه ٿي ويو، سنڌ ۾ ٽماٽر جو فصل تيار آهي ۽ جلد مارڪيٽ ۾ اچي ويندو، ڀارت مان ٽماٽر گهرائڻ جي پابندي برقرار رکڻ واري فيصلي جي حمايت ڪئي وئي، شرڪت ڪندڙن چيو ته پاڪستان ۾ ٽماٽر جو فصل متاثر ٿيڻ جو سبب به ڀارتي ٽماٽر جو وائرس آهي، چيف سيڪريٽري چيو ته خوراڪ کاتي ۽ صنعت کاتي جي خاص ٽيم ڪي پي ڪي ۽ افغانستان وڃي ٽماٽر جي درآمد جي امڪانن جو جائزو وٺندي، خوراڪ واري وزير بلال ياسين چٽن لفظن ۾ چيو ته ڏکيائي جي باجود ڀارت کان بيمار ٽماٽر ڪڏهن به خريد نه ڪنداسين.

 

عمران خان چئن سالن دوران ادارن کي ڪمزور ڪرڻ کانسواءِ ڪجهه ناهي ڪيو: مريم اورنگزيب

اسلام آباد (اين اين آءِ) سڌ سماءَ واري مملڪتي وزير مريم اورنگزيب چيو آهي ته ميان نوازشريف هميشا آئين ۽ قانون جو احترام ڪيو آهي. نوازشريف ۽ خاندان پنهنجي خلاف ڪيس ۾ قانون جي پاسداري ڪئي ۽ نئون تاريخي مثال قائم ڪيو. مني لانڊرنگ جي نالي تي شروع ٿي اقامي تي ختم ٿيندڙ ڪيس تي پوري قوم سوال ڪري رهي آهي . سپريم ڪورٽ ۾ ڪرپشن جا نعرا لڳائيندڙ پاڻ عدالتن کان فرار آهن، عمران خان ادارن کي گاريون ڏئي ٿو. هن چئن سالن ۾ ادارن کي ڪمزور ڪرڻ کان سواءِ ڪجھه نه ڪيو. هن چيو ته  شينهن ايندو مان چيوهو ۽ سڄو پاڪستان ڏسندو. هر پاڪستاني شهري وانگر شريف خاندان کي سمورا قانوني حق حاصل آهن. پاڪستان جي  آئين ۽ قانون کي به شريف خاندان جي قانوني ۽ بنيادي حقن جو خيال رکڻون پوندو.  هن چيو ته عمران خان ڪي پي ڪي ۾ پنهنجي حڪومت جي ڪرپشن لڪائڻ لاءِ احتساب ڪميشن کي اڄ تائين تالو هڻي ڇڏيو آهي، هن چيو ته عمران خان پارٽي فنڊنگ جي لاءِ جوا کيڏندو آهي ۽ چوي ٿو ته  جوا نه کيڏي پر  ايڊوائيز ڏني  هئي.

 

خطي ۾ جوهري ڦهلاءُ روايتي بحري قوت ۾ واڌ سبب مسلسل هوشيار رهڻ جي ضرورت آهي: صدر ممنون حسين

لاهور (اين اين آءِ)  صدر ممنون حسين چيو آهي ته خطي ۾ جوهري ڦهلاءُ ۽ روايتي بحري قوت ۾ واڌ سبب مسلسل چوڪنار رهڻ جي ضرورت آهي، سي پيڪ کي درپيش خدشن ۽ خطرن کي اڳيان رکندي ان جي تحفظ لاءِ به بهتر قدم کنيا وڃن، خطي جو روشن ۽ خوشحال مستقبل سي پيڪ سان جڙيل آهي، ان جي فعالي صرف هڪ بندرگاهه جي وجود ۾ اچڻ ۽ مختلف خطن کي هڪ روڊ ذريعي گڏيل ملائڻ جو ڪم ئي نه ڪندي پر بري ۽ سامونڊي فوج ٻنهي شعبي ۾ انفرا اسٽرڪچر جي تعمير جو ذريعو بڻجندي، اهڙن خيالن جو اظهار هن پاڪستان نيول وار ڪاليج ۾ ميري ٽائيم جي پهرين محفوظ سمنڊ، خوشحال پاڪستان جي موضوع تي 15 ڏينهن واري ورڪشاپ جي پڄاڻي واري تقريب کي خطاب ڪندي ڪيو، هن چيو ته مون کي خوشي آهي ته پاڪ نيوي انهن معاملن تي ڀرپور ڌيان ڏئي رهي آهي، اميد ڪريان ٿو ته اهڙي قسم جا پروگرام پاڪستان جي سامونڊي وسيلن مان ڀرپور فائدن جو ذريعو بڻجندا، يقين آهي ته نيوي ۽ ان سان جڙيل ادارا ان قومي جذبي تحت پنهنجون خدمتون ادا ڪندا رهندا، هن چيو ته ميري ٽائيم سيڪيورٽي ورڪشاپ جي شريڪ ٿيندڙن ان سلسلي ۾ جنهن محنت سان پنهنجون سفارشون تيار ڪري پيش  ڪيون ان تي کين مبارڪ ڏيان ٿو ۽ يقيني ڪريان ٿو ته معيشت کي مضبوط ڪرڻ سان گڏ بحري رستن جو تحفظ يقيني بڻايو ويندو. هن چيو ته ورڪشاپ سي پيڪ جي تعلق جي حوالي سان ان جي سياسي ۽ اقتصادي صورتحال ۾ هميشه اهم ڪردار ادا ڪيو آهي. هن چيو ته يقين آهي ته اهڙي نموني جي ورڪشاپ ۽ سيمينار ان مقصد کي حاصل ڪرڻ ۾ مددگار ثابت ٿيندا.