تازيون خبرون

Monthly Archives: August 2017

ڪراچي شهر جي هيٺاهين وارن علائقن ۾ بيٺل برساتي پاڻي جي نيڪال لاءِ جنگي بنيادن تي قدم کنيا وڃن: بلاول ڀٽو زرداري

ڪراچي (اسٽاف رپورٽر) پاڪستان پيپلز پارٽي جي چيئرمين بلاول ڀٽو زرداري گذريل ٻن ڏينهن دوران انساني جانين جي نقصان تي گهري ڏک ۽ افسوس جو اظهار ڪندي چيو آهي ته لاڳاپيل اختياريون بنا دير عوام جي واهر ڪن. پنهنجي جاري ڪيل بيان ۾ پي پي پي چيئرمين چيو ته صوبائي گادي واري شهر ۾ برسات دوران حادثن جي نتيجي ۾ معصوم ماڻهن جي فوت ٿيڻ وارن واقعن کيس ۽ ملڪ جي ٻين سمورن شهرين کي ڏکارو بڻائي ڇڏيو آهي. هن چيو ته مستقبل ۾ اهڙن واقعن کي روڪڻ لاءِ اپاءُ ورتا وڃن، جڏهن ته شهر جي هيٺاهين وارن علائقن ۾ بيٺل برساتي پاڻي جي نيڪال لاءِ جنگي بنيادن تي قدم کنيا وڃن. بلاول ڀٽو زرداري چيو ته ڪراچي توڙي صوبي جي ٻين علائقن ۾ تيز برساتن جي ناڪاري اثرن کي گهٽائڻ لاءِ صوبائي ۽ مڪاني ادارا هڪٻئي سان سهڪار ڪندي گڏجي ڪم ڪن.

 

ناڻي واري وفاقي وزير اسحاق ڊار نيب ۾ پنهنجو جواب جمع ڪرائي ڇڏيو

لاهور (اين اين آءِ) سيڪيورٽي اينڊ ايڪسچينج  ڪميشن آف پاڪستان اسحاق ڊار ۽ ان جي گھر واري، ٻن پٽن ۽ ننهن جي ڪمپنين جو سمورو رڪارڊ نيب لاهور جي جاچ ٽيم کي جمع ڪرائي ڇڏيو. نيب کي بينڪ اڪائونٽنس جا تفصيل به ملي ويا ، ذريعن موجب اسحاق ڊار کي آمدني کان وڌيڪ اثاثا رکڻ جو الزام آهي ۽ پاناما ڪيس  ۾ سپريم ڪورٽ انجي خلاف نيب رفرنس جو حڪم ڏنو آهي ، جنهن جي لاءَ نيب تياري شروع ڪئي آهي. جوائنٽ ڊائريڪٽر ايس اي سي پي علي عدنان اسحاق ڊار جي ست خانگي ڪمپنين جو رڪارڊ نيب لاهور ڪمپائينڊ انويسٽيگيشن ٽيم کي جمع ڪرائي ڇڏيو، جن ڪمپنين جو رڪارڊ جمع ڪرايو ويو آهي انهن ۾ گلف انشورنس، ايڇ ڊي ايس سيڪيورٽي ايسپانسر ڊسٽريبيوشن ، سي اين جي پاڪستان ، حجويري هولڊنگ ڪمپنيون شآمل آهن، رڪارڊ ۾ فارن 11 ۽ فارم 29 سرٽيفڪيٽس آف ان  ڪارپوريشن ميمورينڊم آف ايسو سي ايشن به شامل آهن، نيب کي اسحاق ڊار ۽ انجي ڪٽنب جا بينڪ اڪائونٽسن جي تفصيل به ڏني وئي آهي، انهن جو جائزو وٺڻ لاءِ رپورٽ تيار ڪئي ويندي.  ياد رهي ته اسحاق ڊار تي اڱاري جي ڏينهن نيب ۾ طلب ڪيو ويو هو پر هو پيش نه ٿيو. هن نيب لاهور کي جواب جمع ڪرايو، جنهن موجب سپريم ڪورٽ ۾ نظرثاني اپيل پيش ٿيڻ کان انڪار ڪيو ويو.

 

چاهيون ٿا سپريم ڪورٽ پاناما ليڪس ۾ شامل ٻين ماڻهن کي به گهرائي: سراج الحق

لاهور (ويب ڊيسڪ): جماعت اسلامي امير سراج الحق چيو آهي ته پاناما ليڪس ۾ 436 ماڻهن جا نالا هيا، پريس ڪانفرنس ڪندي سراج الحق چيو ته سپريم ڪورٽ هيل تائين رڳو نواز شريف جي باري ۾ فيصلو ڪيو آهي، اسان چاهيون ٿا سپريم ڪورٽ هاڻي ٻين ماڻهن کي به گهرائي، سپريم ڪورٽ ٻين سمورن ماڻهن جي لاءِ به ڪميشن يا جي آءِ ٽي بڻائي، هن چيو ته اسان جو پهرين ڏينهن کان موقف آهي ته احتساب سڀني جو ٿيڻ گهرجي، هن چيو ته هن ڪيس جي پيروي ڪرڻ لاءِ اسان وڪيلن جي ٽيم بڻائي آهي، قوم جو مينڊيٽ سپريم ڪورٽ وٽ آهي، سپريم ڪورٽ کي هاڻي اڳتي وڌڻو آهي، هن چيو ته اسان چاهيون ٿا سپريم ڪورٽ احتساب لاءِ هڪ مڪينزم به ڏئي، اسلام ۾ ئي نه دنيا جي هر آئين ۾ حڪمران جي لاءِ صادق ۽ امين جي شرط آهي، اسان چئون ٿا 62 ۽ 63 کي آئين مان ڪڍڻ بدران سڀني تي لاڳو ٿيڻ گهرجي، جماعت اسلامي امير سراج الحق چيو ته پارٽين وچ ۾ جيڪڏهن ڳالهيون ٿيڻيون آهن ته ڪرپشن جي خاتمي لاءِ ٿيڻ گهرجن.

 

جيڪڏهن فارق ستار ڪانفرنس جي آڙ ۾ ڪراچي پيڪيج لاءِ لابي ٺاهي رهيو هو ته پ پ ان جو حصو نه پئي بڻجي سگهي : نثار کهڙو

ڪراچي(اين اين آءِ) پاڪستان پيپلزپارٽي سنڌ جي صدر نثار احمد کهڙو چيو آهي ته شايد ايم ڪيو ايم پاڪستان جي گهڻ جماعتي ڪانفرنس وفاقي حڪومت جي ڪراچيءَ لاءِ 25 ارب رپين جي پيڪيج لاءِ لابي ٺاهڻ هئي جيڪڏهن ڊاڪٽر فارق ستار ڪانفرنس جي آڙ ۾ ڪراچي پيڪيج لاءِ لابي ٺاهي رهيو هو ته پيپلز پارٽي ان جو حصو نه پئي بڻجي سگهي ۽ ٿي سگهي ٿو ته ايم ڪيو ايم پاڪستان لنڊن جي چوڻ تي ڪانفرنس ملتوي ڪئي هجي.اهڙن خيالن جو اظهار هن اربع ڏينهن سنڌ اسيمبليءَ جي ڪميٽي روم ۾ صوبائي وزير اطلاعات ناصر شاهه،وقار مهدي، راشد رباني ۽ ٻين اڳواڻن سان گڏجي پريس ڪانفرنس ڪندي ڪيو. نثار احمد کهڙو چيو ته ڊاڪٽر فاروق ستار ايم ڪيو ايم پاڪستان جي گهڻ جماعتي ڪانفرنس ۾ پيپلز پارٽيءَ جي حمايت ڪرڻ بابت غلط بياني ڪئي آهي ۽ ڪانفرنس ملتوي ڪرڻ کان پوءِ جيڪڏهن فاروق ستار اهڙا بيان ڏيندو ته اڳتي ڪهڙي سٺي رستي جي اميد رکي سگهن ٿا. هن چيو ته سنڌ اسمبليءَ ۾ مخالف ڌر جي اڳواڻ خواجه اظهارالحسن ڪانفرنس بابت ملاقات لاءِ وقت گهريو هو ۽ سندس اڳواڻيءَ ۾ ايم ڪيو ايم پاڪستان جي وفد ملاقات ڪري صرف زباني ڪانفرنس جي ڳالهه ڪئي پر نه ڪانفرنس بابت دعوت نامو ڏنو ۽ نه ئي ڪانفرنس جو موضوع ٻڌايو ويو . هن چيو ته پيپلز پارٽيءَ ايم ڪيو ايم پاڪستان کي سندن ڪانفرنس ۾ شرڪت ڪرڻ جي ڪا به يقين دهاني نه ڪرائي هئي ۽ ڪانفرنس ۾ شرڪت ڪرڻ يا نه ڪرڻ بابت فيصلو پارٽي قيادت جي مشاورت سان مشروط ڪيو هو ۽ پارٽي قيادت جي حڪم تي پيپلز پارٽي ايم ڪيو ايم پاڪستان جي ڪانفرنس ۾ شرڪت نه ڪئي. هن چيو ته ايم ڪيو ايم جا ڪٽر مخالف ڌڙا جيڪڏهن پاڻ ۾ ملي رهيا آهن ته ان ۾ اسان کي ڪو به اعتراض ناهي . نثار احمد کهڙو چيو ته ڊاڪٽر فارق ستار وضاحت ڪري ته هن تي زبردستي انضمام ڪرڻ لاءِ ڪير دٻاءُ وجهي رهيو آهي؟. نثار کهڙو چيو ته ايم ڪيو ايم پاڪستان جمهوريت جي خلاف سازش جي ڳالهه ڪري رهي آهي ته پوءِ ان جي پڻ وضاحت ڪري ته سازش ڪير ڪري رهيو آهي.هن چيو ته پيپلز پارٽيءَ هميشه جمهوريت جو ساٿ ڏنو آهي ۽ جمهوريت جي خلاف سازشن جو مقابلو ڪيو آهي هن چيو ته پيپلز پارٽي ڪڏهن به جمهوريت جي خلاف ڪنهن به سازش جو حصو نه بڻي آهي ۽ اسان ڪنهن فرد کي نه پر سسٽم کي بچائڻ لاءِ ڪردار ادا ڪيو آهي. هن چيو ته عمران خان جڏهن ڪنٽينر تي چڙهي سيٽي وڄن جي ڳالهه ڪئي هئي تڏهن به جمهوريت جو ساٿ ڏنو هو. هن چيو ته ميثاق جمهوريت جو معاهدو ٿيو ته پهريون نواز شريف ئي هو جنهن معاهدي جي خلاف ورزي ڪري اي پي ڊي ايم ٺاهي راهه فرار اختيار ڪئي. هن چيو ته بارش کان پوءِ سنڌ حڪومت جي ادارن روڊن تان پاڻي ڪڍڻ لاءِ ڀرپور ڪردار ادا ڪيو.

 

نالي واري اداڪار سڌارٿ ملهوترا ۽ عاليه ڀٽ جي وچ ۾ رستا الڳ ٿيڻ لڳا

ممبئي (شوبز نيوز) نالي واري اداڪار سڌارٿ ملهوترا ۽ عاليه ڀٽ جي وچ ۾ رستا الڳ ٿيڻ جي خبر سامهو اچي وئي . سڌارٿ ڀارتي ميڊيا سان ڳالهائيندي چيو ته ”مان سنگل آهيان ۽ ائون هن وقت ڪنهن سان به لاڳاپيل نه آهيان“. سڌارت ڪجهه وقت اڳ ميڊيا سان ڳالهائيندي چيو هو ته ”اسان هڪ ٻي جي نگاهون ۾ ڏساندا آهيون ته گم ٿي ويندا آهيون.عاليه منهنجي زندگي جو هڪ آهم حصو آهي. اُن مون کي گھڻون سپورٽ ڪيو آهي ۽ مونکي ان جو پنهنجي اکين ۾ گم ٿي وڃاڻ تمام وڻندو آهي “.۽ گزريل ڪجهه وقت کان سڌارٿ ۽ عاليهه گڏ نظر اچي رهيا هوا. جڏهن ته هاڻي ٻنهين جي علحيدگي واري خبر انهن جي چاهينداڙان کي حيرات ۾ وجهي ڇاڏيو آهي.

 

ڪاجول ۽ ڪرن جوهر جي دوستي تي اجي ديوگن پريشان

ممبئي(شوبز نيوز)بالي ووڊ ۾ هڪ ڀيرو ٻيهر اداڪاره ڪاجول ۽ ڪرن جوهر جي دوستي جا چرچا جاري آهن، ٻنهي جي وچ ۾ ٿيل اختلاف مڪمل ختم ٿي ويندا ۽ اهي هڪ ٻئي ويجهو اچي ويا ۽ ٻنهي جي ٻيهر دوست جون خبرون ميڊيا ۾ گردش ڪرڻ لڳيون، جنهن تي اجي ديوگن خوش نظر نه ٿو اچي، ڀارتي فلم انڊسٽري ۾ اداڪاره ڪاجول ۽ هدايتڪار ڪرن جوهر جي ۲۵ سالا پراڻي دوستي جو مثال ڏنو ويندو آهي، پر ان دوستي کي گذريل سال ان وقت نظر لڳي جڏهن ڪرن پنهنجي ڪتاب جي مهوريتي تقريب دوران ڪاجول تي الزام لڳايو ته ڪاجول مون مٿان رشوت جو الزام لڳايو هو، حقيقت ۾ گذريل سال ڪرن جوهر جي فلم “اي دل هي مشڪل“ ۾ اجي ديوگن جي فلم “شيوي“ گڏ رليز جي موقعي تي ٻنهي دوستن جا تعلقات خراب ٿيا هئا، ٻئي گذريل ۲۵ سالن کان هڪ ٻئي جا بهترين دوست هئا، ان خبر سٺي فلم انڊسٽري کي لوڏي ڇڏيو آهي، پر هاڻي ٻنهي پنهنجا سمورا اختلاف ختم ڪري هڪ ٻئي سان ٻيهر دوستي جو رشتو وڌائي ڇڏيو آهي.

 

نيٽ ويسٽ ٽرافي جي ڪوارٽر فائنل ۾ شاهد آفريدي ۴۲ بالن ۾ ۱۰۱ رنسون

نڊن(اسپورٽس نيوز) نيٽ ويسٽ ٽي ٽوئنٽي ڪرڪٽ ٽرافي ۾ پاڪستان جي ناليواري آل رائونڊر شاهد آفريدي ۴۲ بالن ۾ ۱۰۱ رنسن جي شاندار اننگ کيڏي، برطاني نشرياتي اداري موجب انگلينڊ ۾ کيڏي ويندڙ نيٽ ويسٽ ٽي ٽوئنٽي ڪرڪٽ ٽرافي جي پهرين ڪوارٽر فائنل ۾ پاڪستان جي ناليواري آل رائونڊر شاهد آفريديءَ همپشائر طرفان کيڏندي ۴۲ بالن ۾ ۱۰۱ رنس ٺاهي شاندار اننگ جو مظاهرو ڪيو، شاهد آفريدي اوپنر جي حيثيت سان کيڏندي ڊربي شائر جي بالرن جي سُٺي ڌُلائي ڪئي، آفريدي جي طوفاني بيٽنگ جي ڪري مقرره ۲۰ اوورن ۾ ۸ وڪيٽن جي نقصان تي ۲۴۹ رنسون ٺهيون.(۰۲)

 

ويسٽ انڊيز خلاف سيريز ۾ ٽيسٽ ڪيريئر جون ۵۰۰ وڪيٽون حاصل ڪرڻ لاءِ پر اميد آهيان: جيمز اينڊرسن

لنڊن(اسپورٽس نيوز) انگلينڊ ڪرڪيٽ ٽيم جو فاسٽ بالر جيمز اينڊرسن چيو آهي ته ويسٽ انڊيز خلاف سيريز ۾ ٽيسٽ ڪيريئر جون ۵۰۰ وڪيٽون مڪمل ڪرڻ لاءِ پر اميد آهي. جيمز اينڊرسن کي ٽيسٽ ۾ ۵۰۰ وڪيٽون حاصل ڪرڻ لاءِ ۸ وڪيٽن جي ضرورت آهي. اهو اعزاز حاصل ڪرڻ لاءِ انگلينڊ جو پهريون ۽ دنيا جو ٦ هون پليئر بڻجي ويندو. جيمز اينڊرسن هيستائين ۱۲۷ ٽيسٽ ميچن ۾ ۴۹۲ وڪيٽون حاصل ڪري چڪو آهي. ٽيسٽ جي تاريخ ۾ وڌيڪ وڪيٽون حاصل ڪرڻ جو عالمي رڪارڊ سريلنڪا جي مرلي ڌرن وٽ آهي هن ۸۰۰ وڪيٽون حاصل ڪري پهرين نمبر تي آهي. آسٽريليا جو شين وان ۷۰۸ وڪيٽن سان ٻئي ۽ ڀارت جو انيل ڪمبلي ٦۱۹ وڪيٽن سان ٽئين نمبر تي آهي.

 

انسان ۽ انسانيت…….: فرزانه نورمحمد چانڊيو/لاڙڪاڻو

انسان ۽ انسانيت هي ٻئي ڏسڻ ۾ عام لفظ پر حقيقت ۾ وڏي معنيٰ رکندڙ اهن، هي لفظ هڪ جهڙا پر معنيٰ ۾ مختلف ٿين ٿا هڪڳ ڳالهه جيڪا انسان کي ڌرتي کان مختلف ٿي ڪري سان آهي عقل، ڏاهپ ۽ سمجهه سوجهه، جيڪا انسان کي انسان هجڻ جو رتبو عطا ٿو ڪري، نه ته جيڪي توهان خاصخيتون بيان ڪيون اهن اهي سڀ جانورن ۾ پڻ آهن، ان ڪري انسان هڪ الڳ ئي مخلوق  آهي، جنهنجو دنيا جي ڪنهن به شئي سان مقابلو نٿو ڪري سگهجي جيڪڏهن اهو عقل نه هجي ها ته اڄ انسان پٿر جي چڻنگ مان باهه حاصل ڪرڻ کان ويندي جديد ٽيڪنالاجي وسيلي توانائي حاصل نه ڪري سگهجي ها، ان ڪري انسان جي فطرت کي اڃان سمجهڻ لاءِ ڪي صديون گهرجن ته اصل انسان آهي ڪهڙي بلا، اهو ڪيئن وجود ۾ آيو.؟

هاڻي هتي وڏي غور جو مقام آهي ته اهو انسان اشرف المخلوق جيڪو اعليٰ درجي تي رکيل آهي، سو جڏهن نفساني خواهشن جي ڄار ۾ ڦاسي ٿو، تڏهن حيوانيت جو مرتڪب ٿي، پنهنجي درجي تان ڪري، بي وقعت ٿي وڃي ٿو.. لفظ “انسانيت” انساني نيڪ گڻن جي مڪمل تصوير آهي. ڪردار جون اعليٰ خوبيون، جن ۾ خاص طور پيار، محبت، رحم دلي، نيڪي، سادگي، شرافت، سچائي، قناعت، همدردي، عدل ۽ انصاف، صبر ۽ شڪر، عزم ۽ استقلال، امانت داري، مهمان نوازي، شجاعت، بهادري ۽ ٻيون خاصيتون کيس مٿانهين درجي تي پهچائين ٿيون. مٿين نيڪ گڻن ۽ عملن جو هي گڏيل گلدستو ”انسانيت“ سڏجي ٿو، جنهن جي هر گل جو واس وڻندڙ آهي. جيڪڏهن ڪنهن به ماڻهوءَ ۾ مٿيون خوبيون نه آهن بلڪه ان جي بجاءِ، ڪوڙ ڪپت، ٺڳي، دولاب، خود غرضي ۽ ظالميت سندس وطيرو آهي ته هو انسان جي بجاءِ حيوان ۽ سندس وجود انسانذات لاءِ تڪليف جو باعث آهي. دنيا جا سڀ مذهب چڱائين ۽ نيڪين جي پرچار ڪندڙ آهن. اهي سڀ مذهب الڳ الڳ آهن، جيڪي انسانن کي الڳ الڳ فرقن ۾ ته ورهائين ٿا پر انهن سڀني مذهبن جون فلاسافيون کين ڳنڍين ٿيون. ڪنهن به مذهب ۾ نفرت جي سکيا شامل نه آهي، بلڪه انهن ۾ ته پيار، محبت، امن، آتشيءَ جا پيغام آهن، جيڪي فقط ۽ فقط ڳنڍڻ ۽ جوڙڻ سيکارين ٿا ته پوءِ اڄ جيڪا بک، افلاس، بيماري، بدحالي، انسانيت کي جڪڙي بيٺي آهي، ان جو سبب ڇا آهي؟ دنيا جا ڪروڙين ماڻهو هر پنجن انسانن تي هڪ انسان بکيو ڇو ٿو گهاري؟ ڪيترائي انسان پيڙائن ۽ عذابن سبب ان اجل جو شڪار ٿا ٿين. صرف انهيءَ ڪري جو ماڻهن مذهبن کي مفادن تحت استعمال ڪرڻ شروع ڪيو آهي. هنن جي انساني جامي مان نڪري وڃڻ ڪري، فرقابنديون، تعصب، ذاتي مفاد ۽ خود غرضيون چؤطرف ڇانيل آهن. خاڪ مان پيدا ٿيل انسان، انسانيت جي شرف کي سمجهندي به عمل پيرا ٿيڻ کان لنوائي ٿو. کيس ڪئين نصيحتون ملن ٿيون، پر هو ڌيان نٿو ڌري. انسانيت جي خدمت خدا جي خدمت آهي. حضرت عيسيٰ عليه السلام فرمايو ته ”جڏهن تون پنهنجي انسان ڀاءُ کي پيار نٿو ڪرين، جنهن کي تو ڏٺو آهي ته تون اڻ ڏٺي خدا سان ڪيئن ٿو پيار ڪري سگهين.“ چوندا آهن ته پيار سان پيار پيدا ٿئي ٿو. دل ڏيئي دل وٺڻي آهي. رب پاڪ به پنهنجي عبادت ۾ ذڪر کي افضل ۽ ياد کي مشروط ڄاڻايو آهي، پوءِ انسان جيڪڏهن انسانيت جي ڀلي ۽ هن ڪائنات جي سک، ڌرتيءَ جي چين ۽ امن لاءِ، انسانذات کي پيار ڪري، خدمت ڪري ۽ هڪ ٻئي کي ڪم اچي ته يقينن سچي ۽ سهڻي جيون جو مزو ماڻيندو. سندس دل صحيح طور تي روحانيت ڏي پڻ راغب ٿيندي. ڏٺو وڃي ته ديني عبادتون ته ايمان جي اجارڻ لاءِ آهن، پر انسانيت جي گڻن کي اپنائڻ سان اندر اجري اوجل ٿو ٿئي.  حقيقت ۾ فاني انسان جي بقا فقط ۽ فقط انسانيت جي جذبي جي بچاءَ ۾ آهي. اسان کي گهرجي ته انسانيت جي بقا ۽ هن سنسار جي سونهن کي قائم رکڻ لاءِ امن، محبت ۽ پيار جي جيون جي ترغيب پکيڙي، پنهنجن کي آماده ڪريون ته سچيءَ زندگيءَ جو مزو پيار، رحم ۽ خدمت ۾ آهي. ديا ۽ فراخدليءَ جي شروعات پنهنجي گهر ۽ آسپاس کان ڪري انهيءَ عمل کي ڪائناتي بڻايون. هيءَ ڌرتي هڪ ملڪ مثل ۽ سڄي دنيا هڪ ڪٽنب آهي. سڀ انسان ڀائر آهن،

 

وري ڊو مور جو مطالبو ۽ ڌمڪيون…!!

ڪمانڊر انچيف طور پنهنجي پهرئين خطاب ۾ ڊونلڊ ٽرمپ افغانستان پاڪستان ۽ ڏکڻ ايشيا بابت نئين پاليسي  ۽ افغانستان ۾ وڌيڪ 3900 فوجي مقرر ڪرڻ جو اعلان ڪندي چيو آهي ته پاڪستان کي اربين ڊالر ڏنا پر پاڪستان آمريڪا تي حملا ڪندڙ دهشتگردن کي پناهه ڏني، هاڻ چپ نه ٿا ڪري سگهون، پاڪستان پنهنجو رويو جلد تبديل، افغانستان ۾ اسان جو ساٿ ڏيڻ تي پاڪستان جو فائدو ۽ نه ڏيڻ سان نقصان ٿيندو. پاڪستاني عوام دهشتگردي خلاف جنگ ۾ بي پناهه قربانيون ڏنيون، دهشتگردن خلاف ڪارروائين تي پاڪستان جو قدر ڪريون ٿا پر اسان پاڪستان ۾ موجود دهشتگرد تنظيمن جي محفوظ ٺڪاڻن تي چپ نه ويهنداسين. پاڪستان کي اربين ڊالر ڏيون ٿا پر پوءِ به انهن ئي دهشتگردن کي پناهه ڏني آهي، جن خلاف اسان جي جنگ جاري آهي. پر هاڻ برداشت نه ڪنداسين. پاڪستان کي پنهنجي ڪمٽمينٽ ڏيکارڻي پوندي، پاڪستان کي منهن ڏيڻ لاءِ پنهنجي سوچ تبديل ڪري رهيا آهيون جنهن لاءِ پاڪستان کي پنهنجي صورتحال تبديل ڪرڻي پوندي ۽ تهذيب جو مظاهرو ڪري امن قائم ڪرڻ ۾ دلچسپي وٺي. ڏکڻ ايشيا ۾ هاڻ آمريڪي پاليسي ڪافي حد تائين بدلجي ويندي. پاڪستان جو اهو رويو بدلجڻ ۽ تمام جلد بدلجڻ گهرجي. پاڪستان ۽ ڀارت ايٽمي طاقتون آهن، ايٽمي هٿيار دهشتگردن جي ور چڙهڻ نه ٿا ڏيڻ چاهيون. افغانستان مان فوج جلد گهرائي ته خال پيدا ٿيندو، جنهن کي دهشتگرد ڀريندا.منهنجو نظريو هاڻ تصوراتي کان وڌيڪ حقيقت پسنداڻي  هوندو، افغانستان کي ملندڙ امداد ڪوڙو چيڪ نه آهي، قوم جي نئين سر تعمير نه پر دهشتگردن کي ختم ڪري رهيا آهيون. اثرائتين فوجي ڪوششن بعد سياسي حل ۾ افغان طالبان به شامل ٿي سگهن ٿا، پر خبر ناهي ته ائين ڪڏهن ٿيندو، پر طالبان جي مقابلي لاءِ افغان حڪومت ۽ فوج جي حمايت جاري رکنداسين. افغانستان کي پنهنجو مستقبل پاڻ طئي ڪرڻو آهي. افغانستان ۽ پاڪستان ۾ 20 کان وڌيڪ دهشتگرد تنظيمون ڪم ڪري رهيون آهن. جنگ کٽڻ لاءِ فوجي وڙهندا، چاهيون ٿا نيٽو اتحادي به نئين حڪمت عملي ۾ ساٿ ڏين، ان ۾ ڪا به ڊيڊ لائن نه هوندي، عراق مان تڪڙا نڪري داعش لاءِ جاءِ ٺاهي افغانستان ۾ ائين نه ٿيڻ ڏنو ويندو. سفارتي سياسي ۽ فوجي حڪمت  علي کي گڏائي قدم کڻنداسين. افغانستان ۾ امن لاءِ ڀارت جو ڪردار ساراهه جوڳو آهي. ڀارت سان واپار ۾ اربين ڊالر ملن ٿا، ڀارت افغانستان جي اقتصادي مدد ۾ ترقي لاءِ وڌيڪ ڪم ڪري نائن اليون کي ڪو به وساري نه ٿو سگهي، اهي حملا بدترين دهشتگردي هئا، جن جو منصوبو افغانستان ۾ جڙيو ۽ عمل آمريڪا ۾ ٿيو، ٻاهرين دشمنن کان بچڻ لاءِ متحد ٿيڻو پوندو ۽ دهشتگردي خلاف ساٿ ڏيندڙ هر ملڪ سان اتحاد ڪنداسين.