تازيون خبرون

Daily Archives: August 18, 2017

ريا سين دوست شيوم تيواري سان شادي جو فيصلو ڪري ورتو

ممبئي(شوبز نيوز) بالي ووڊ جي من موهڻي اداڪارا ريا سين پنهنجي دوست شيوم تيواري سان شادي ڪرڻ جو فيصلو ڪري ڇڏيو آهي. پرڏيهي ميڊيا مطابق ريا سين پنهنجي دوست شيوم تيواري سان گڏ موڪلون ملهائي رهي آهي، جڏهن ته هلندڙ مهيني جي آخر ۾ شيوم تيواري سان شادي ڪندي. اهڙي تصديق ريا سين سماجي ويب سائيٽ تي ڪئي آهي. ياد رهي ته ريا سين جي ڏاڏي سچترا سين، ماءُ مون مون سين ۽ ڀيڻ رائما سين به بهترين اداڪارائون رهيون آهن، جڏهن ته ريا سين فالگني پاٺڪ جي وڊيو گيت ياد پيا ڪي آني لگي ذريعي شوبز ۾ انٽري ڏني هئي، پر بالي ووڊ ۾ ٻوٽو نه ٻاري سگهي آهي.

 

اداڪارا يمي گوتم پنهنجون اکيون خيرات ڏيڻ جو ارادو ظاهر ڪري ڇڏيو

ممبئي (شوبز نيوز)معروف باليووڊ اداڪارا گوتم يمي پنهنجون اکيون خيرات ڪرڻ جو ارادو ظآهر ڪري ڇڏيو. هن ڀارتي ميڊيا سان ڳالهائيندي چيوته نه صرف مان پر منهنجو خاندان به اهو نيڪ ڪم ڪرڻ جي خواهش رکي ٿو خاندان جي ان عهد تي مونکي فخر آهي.  اداڪارا اڄ ڪلهه ماڻهن ۾ عضوا خيرات ڪرڻ جي باري ۾ آگاهي پيدا ڪرڻ جيڪوشش ڪري رهي آهي.  ان ورلڊ آرگن ڊونيشن ڊي تي عضوار خيرات ڪرڻ جي اهميت تي روشني وجھندي ٻڌايو ته محسوس ڪيان ٿي جيڪي ماڻهون نابين آهن اسان انهن جي لاءِ ڪجھه به نه ٿا ڪري سگھون پر انهن جي لاءِ پنهنجا عضوا ضرور خيرات ڪري سگھون ٿا، ان ڪري مان پنهنجون به اکيون خيرات ڪرڻ جو ارادو ڪيو آهي. ياد رهي باليووڊ جي اداڪارا گوتم يمي فلم ڪابل ۾ انڌي ڇوڪري جو ڪردار ادا ڪيو هو، ۽ ان فلم سائن کان پهريان عهد ڪيو هو ته هوءَ پنهنجون اکيون خيرات ڪندي.

 

نيشنل اسٽيڊيم ڪراچي پرڏيهي رانديگرن جي لاءِ غير محفوظ قرار

لاهور(اسپورٽس نيوز)نيشنل اسٽيڊيم ڪراچي غير ملڪي رانديگرن جي لاءِ غير محفوظ قرار ڏنو ويو آهي، چيئرمين پي سي بي نجم سيٺي جو چوڻ آهي ته پي ايس ايل ۾ شامل پرڏيهي رانديگرن ۾ ۱۰۰ سيڪڙو قائد جي شهر ۾ چيچ کيڏڻ جي لاءِ تيار ناهن، هتي فاٽا يا بلوچستان وانگر القاعده ۽ دهشتگردي جا عنصر به ناهن، هڪ عرصي تائين ڏوهن جي شرح وڌي آهي، هن چيو ته اسان پي ايس ايل فائنل سميت ۵ ميچون ڪراچي ۾ ڪرائڻ جا خواهشمند آهيون، پر ان جي لاءِ وڏا وڏا معاملا ڏسڻا پوندا آهن، ڇهين فرنچائز جي شموليت کانپوءِ مختلف ٽيمن ۾ ۵۰ جي ويجهو غير ملڪي ڪرڪٽرز ۽ آفيشلز شامل ڪيا ويا آهن، انهن سڀني کي قائل ڪرڻ آسان ڪم ناهي، ۱۰۰ سيڪڙو رانديگرڪراچي جڏهن ته ۵۰ لاهور ۾ راند کيڏڻ کان انڪار ڪري رهيا آهن

 

اعصام الحق کي پهرين رائونڊ ۾ شڪست، سنسناٽي ايونٽ مان آئوٽ

واشنگٽن(اسپورٽس نيوز) پاڪستاني ٽينس اسٽار اعصام الحق سنسناٽي ماسٽرز ٽينس ٽورنامينٽ جي مينز ڊبل جي پهرين رائونڊ ۾ شڪست کان پوءِ ٽائٽل جي ڊوڙ کان ٻاهر ٿي ويو آهي، آمريڪا ۾ جاري ايونٽ ۾ کيڏيل ڊبلز جي پهرين رائونڊ ۾ جرمني جي زيوريف ۽ سندس ارجنٽائن جي جوڙيدار ڊائيگو شاندار پرفارمنس جو مظاهرو ڪندي پاڪستان جي ٽينس اسٽار اعصام الحق ۽ سندس ڪروشيا جي ساٿي دارنيڪولا مڪٽڪ کي سخت مقابلي کان بعد ۷.٦، ۳.٦ ۽ ۱۳.۱۵ تان هارائي پري ڪوارٽر فائنل ۾ جاءِ پڪي ڪري ڇڏي آهي، جڏهن ته پهرين رائونڊ ۾ شڪست ملڻ کان پوءِ اعصام الحق پنهنجي ساٿي سميت ايونٽ مان آئوٽ ٿي ويو آهي.

 

نيب جي گهيري هيٺ آيل شريف خاندان…!!: غلام مصطفيٰ جمالي

نيب پاڪستان اندر نيب اهو واحد ادارو آهي جنهن جي اڪثر بحث هلندا رهن ٿا،پر سوچڻ جهڙي ڳالهه آهي ته اهو ادارو پاڪستان اندر ڇا ڪري رهيو آهي.؟۽ سندس ڪهڙي ڪارڪردگي آهي،ڇا نيب سڀ ڪجهه درست طريقي سان ڪري رهي آهي.يا سڀ ڪجهه غلط ڪري رهي آهي.؟نيب ڪنهن جي اشاري تي سڀ ڪجهه ڪري رهي آهي يا پنهنجي مرضي هلائي رهي آهي.؟ڪيترا سوال ذهن ۾ ايندا رهندا آهن.جڏهن نيب پنهنجي ڪاروائين ۾ تيزي آڻيندي آهي.يا وري پنهنجي جاچ ۾ ڪنهن وڏي مڇي کي ڦاسائيندو آهي.پر اها به هڪ واضع ڳالهه آهي ته نيب ادارو اهڙو آهي.جيڪو  ڪجهه به نه ڪري پر تنقيد جو نشانو ضرور بڻبو آهي.۽ جيڪڏهن نيب پنهنجي ڪم ۾ تيزي آڻي ته پوءِ به کيس تنقيد جو نشانو ضرور بڻايو ويندو آهي.ان ڪري نيب به عجيب مشڪلاتن جي گهيري ۾ آهي.جڏهن ته نيب جي ڪاروائين جي هڪ سواليه نشان آهي.پر شايد هن وقت نيب ادارو عوام جي سوچ مطابق ڪجهه بهتر ڪم ڪري رهيو آهي.پر ان جي ڀيٽ ۾ نيب حڪمرانن جي سوچ مطابق سڀ ڪجهه غلظ ڪري رهيو آهي.ان ڪري اهو به هڪ سوال آهي ته ڇا نيب پاڪستان مان واقعي ڪرپشن ختم ڪرڻ ۾ ڪو ڪرادر ادا ڪندو..؟ان ڪري هن وقت جيڪي ڳاليهون سامهون آيون آهن ان مان اهو واضع ظاهر آهي ته نيب جي جاچ به“ڪجهه دنون چاندي فر انڌيري رات”وارو ئي مثال بڻجي ويندي آهي.اهو ان ڪري جو نيب جيڪي به ڪيس پاڪستان اندر ظاهر ڪيا آهن.انهن مان ڪنهن به هڪ جو نتيجو سامهون نه آيو آهي..
جڏهن ته نيب اهو ادارو آهي جيڪو پنهنجي طاقت جي زور تي ڪيترن ئي ڪرادرن کي پنهنجي انجام تائين پهچائي سگهي ٿو .۽ نيب انهن لٽيرن جي خلاف سڀ ڪجهه ڪري سگهي ٿو.جيڪي پاڪستان جي معصوم عوام کي پئسي کي لٽي رهيا آهن.پر نيب ادارو اهڙو ڪو به ڪارنامو ڪرڻ ۾ اڃان تائين ڪامياب نه ويو آهي.ان ڪري شايد هاڻ عام ۽ ننڍي طبقي جو  ماڻهو،سرڪاري،ملازم،۽ حڪومتي اميدوارن کان ويندي،خد حڪومت به تنقيدي نشاني جي ور چڙهي ويو آهي..جڏهن ته ڪجهه وقت پهرين نيب ڪجهه اهڙيون به ڪاروايون ڪيون.جيڪي هليون ته ٿورڙي وقت لاءِ پر انهي ڪاروائي ملڪ جي ڪيترن ئي لٽيرن جون ننڊون ڦٽائي ڇڏيون هنيون.پر ڪجهه وقت لاءِ ئي هو.۽ جيئن وقت پاسو بدلي ڪيو ته نيب انهن وڏن مڇن کي ڇڏي ڪري ويچارن معصوم سرڪاري ملازمن جي اچي پويان پئي.ان ڪري خد حڪومت نيب جي حوالي سان پنهنجي هڪ موقف  ۾ چيو هوُ ته نيب معصوم سرڪاري تي ڪاروايون ڪرڻ بند ڪري..جڏهن ته ڪيتري عرصي کان پوءِ اهڙي بيان بعد آصف علي زرادي ۽ سابق وزيراعظم نواز شريف جي اهڙي بيان تي دلچسپي جو اظهار ڪيوهوُ.

پرهاڻي قومي احتساب بيورو اڳوڻي وزيراعظم نواز شريف ۽ سندس ٻارن کي ڪرپشن ڪيسن جي جاچ لاءِ 18 آگسٽ تي طلب ڪري ورتو آهي.۽  نيب جي ٽيم لاهور پهچي جاچ ڪندي، جڏهن ته سپريم ڪورٽ جي آءِ ٽي جي رپورٽ جو 10 هون واليم نيب کي ڏيڻ کان پڻ انڪار ڪري ڇڏيو آهي. سپريم ڪورٽ جي حڪم تي شريف خاندان خلاف ڪيسن جي جاچ ڪندڙ نيب جي ٽيم اڳوڻي وزيراعظم نواز شريف سندس پٽن حسين نواز ۽ حسن نواز کان 18 آگسٽ تي جاچ ڪرڻ جو فيصلو ڪيو آهي، جنهن لاءِ نوٽيس اماڻيا ويا آهن ۽ اهي نوٽيس 11 آگسٽ تي وصول پڻ ڪيا ويا آهن. نيب جي ٽيم عزيزيه اسٽيل مل ڪيس بابت جاچ ڪندي، جنهن لاءِ نيب راولپنڊي جي ٽيم لاهور ۾ واقع نواز شريف جي رائيونڊ واري گهر پهچي جاچ ڪندي پر نواز شريف ٽيم آڏو پيش نه ٿيڻ جو فيصلو ڪيو آهي، جڏهن ته سندس پٽَ پڻ ملڪ کان ٻاهر آهن، جڏهن ته نيب جي ٽيم ناڻي واري وزير اسحاق ڊار بابت جاچ لاءِ سيڪيورٽي اينڊ ايڪسچينج ڪميشن پاڪستان کي نوٽيس اماڻي ڇڏيو آهي.جنهن بابت پڻ فيصلو اچي چڪو آهي ته نيب پاڪستاني جي ناڻي واري وزير ۽ سندس خاندان ڪمپنن جا پڻ تفصيل گهري ورتا آهن، ٻئي طرف  عدالت عظميٰ جي رجسٽرار آفس پاناما ليڪس جي جاچ جي لاءِ قائم گڏيل جاچ ٽيم ( جي آءِ ٽي) جي رپورٽ جي جلد 10 جو نقل قومي احتساب بيورو (نيب) کي ڏيڻ کان هڪ ڀيرو ٻيهر انڪار ڪري ڇڏيو آهي تنهن هوندي شريف ڪٽنب خلاف ريفرنس داخل جي لاءِ رپورٽ جي باقي جلدن جون وڌيڪ 3 -3 ڪاپيون ڏنيون ويون آهن. رجسٽرار آفيس نيب جي درخواست تي جلد 10 کان سواءِ جي آءِ ٽي جي باقي رپورٽ جي نقل ڏيڻي هئي پر جلد 10 ڏيڻ جي درخواست خارج ڪئي هئي. نيب هڪ ٻي درخواست جمع ڪرائي هئي جنهن ۾ چيو ويو هو ته 4 ريفرنسز داخل ڪرڻ جي لاءِ جي آءِ ٽي جي رپورٽ جون وڌيڪ 3 نقل ڪاپيون گهربل آهن. نيب اهو به چيو آهي ته جلد 10 کي ريفرنسن جو حصو بڻائڻ جي لاءِ ان جي نقل به گهربل هوندي تنهن هوندي رجسٽرار آفيس جلد 10 ڏيڻ کان هڪ ڀيرو ٻيهر انڪار ڪيو آهي انڪري

نيب هڪ اهڙو ادارو آهي جنهن جي دهشت کان هر ادارو ۽ آفيسر لهرائي ٿو.ان ڪري جو پاڪستان اندر گذريل پنجاهه سال کان وٺي ڪرپشن جو عروج رهيو آهي. انهي ڪرپشن ڪلچر جي ڪري سرڪاري آفيسر ۾ ڪارو ناڻو ٺاهيو آهي ۽ حڪومتي ادارن جي سياستدانن به ڪارو ناڻي مان گهر ڀريا آهن. نيب جنهن به اداري تي ڪاروائي ڪئي آهي.انهي نيب کان اهو ئي سوال ڪيو آهي ته آئون ڇو.جيڪو ڪجهه آئون ڪري رهيو آهيان اهو ته ٻيا به ڪن پيا.انهي ڪري اهي ادارا جيڪي ڪرپشن مان ڪارو ناڻو ڪمائي رهيا آهن.اهي  سوال ڪري جان ڇڏائڻ ٿا چاهين ته آخرمان ڇو.مان سمجهان ٿو ته نيب کي پنهنجي ڪاروائين کي شفاف ڪرڻ لاءِ پنهجي طريقڪار کي فوري بدلائڻ گهرجي ۽ پاڻ مٿان ٿيندر تنقيد جو جواب ڏيڻ گهرجي.هن وقت پاڪستان جو ڪهڙو ادارو آهي.جيڪو ڪرپشن کان

آجو آهي.جهن اندر ڪرپشن نه ٿيندي هجي، پاڪستان اندر ميگا ڪرپشن جو نالو ڇو ڏنو ويو آهي.پر ايترو ضرور آهي جو نيب پنهنجي ڪاروائين ۾ جيتري تيزي آِڻيندي آهي.جيڪڏهن انهي ڪسين کي حل ڪرڻ ۾ به اهڙي تيزي آڻي ته شايد اها پوءِ ڪجهه تنقيد کان بچي وڃي. سرڪاري ملازم سڀ هڪ جهڙا نه ناهن.ڪي پنهنجي فرض سان سچا ۾ فاڪا ڪشي ته برداشت ڪري سگهن ٿا.پر حرام جو هڪ رپيو به کائي نه سگهن.مون ڏٺو آهي.انهن ايماندار آفيسرن کي جن جي گهرن جي چلهه ڪيترائي ڏينهن ناهي ٻرندي جن مان معصوم ٻار پنج رپين واري چاڪليٽ لاءِ پيا سڪندا آهن ۽ پنهنجي پاڙي ۾ ڪاري ناڻي سان پيٽ ڀريندڙ وڏن پيٽن وارن جي ٻارن کي مهانگيون شيون کائيندي پيا اکين مان لڙڪ واهيندا آهن.پر ميان صاحب کي ايترو ضرور سوچڻ گهرجي اگر اهڙن آفسيرن جي خلاف اگر نيب جاچ به ڪري ٿي جنهن ۾ هو خد به شامل آهي ته انهن جي گهرن مان نڪرندو به ڇا..جن جي ٻار کي بکايل پيٽ ڀرڻ لاءِ هڪ وقت تي ماني به نصيب نه ٿي انهن تي اگر نيب ڪاروايون به ڪري پوءِ به انهن جي دامن مان ڇا نڪرندو.ان ڪري اهو ضرور آهي ته نيب انهن جي خلاف ئي جاچ ڪئي وڃي.جن ڪاري ناڻي مان گهر ڀريا آهن.ان ڪري هن دفعي ميان صاحب جي نيب جي گهيري ۾ آهي. نيب ڪا ڪالهه پاڪستان ۾ ايجاد ناهي ٿي ۽ نه ئي تازيون ڪارايون ڪيون آهن.ڇو ته نيب پ پ جي ڪيترن ئي سياستدانن خلاف وٽ پڪڙ ڪري کين گرفتار ڪيو.پر ان تي به ان وقت ميان صاحب ڪو بيان نه ڏنو هو.ڊاڪٽر عاصم گرفتار ٿيو ته ميان صاحب کي حڪومت ۾ چوڌري چيو ته ڊاڪٽر عاصم جي اسان وٽ فر فر واري اعتراَضي وڊيو پيل آهي.پر افسوس ته اهو آهي ته  آخر نيب تي اهڙو تنقيدي بيان ڇو ڏنو هو، ان ڪري لڳي ائين ته شايد نيب هاڻي سنڌ کي ڇڏي ڪري پنجاب جو رخ ڪيو آهي.ان ڪري  وفاق کي نيب تي ڪاروائين تي اعتراض ٿي پيو آهي ۽ اهو سجهه کان ٻاهر آهي.برحال نيب اگر سنڌ کان پوءِ پنجاب اندر ڪرپشن جي ڪيس جاچ جو گهيرو تنگ ڪري ته اها به سٺي ڳالهه ٿيندي.آخر سنڌ کان پنجاب جو وارو به اچڻ گهرجي .ان ڪري نيب اگر پنجاب حڪومت خلاف ڪاروايون ڪرڻ تي موڊ ۾ آهي ته کيس تنقيد کان ڊڄڻ نه گهرجي.ڇو ته اگر هو ڪارويوان ڪندي ته به تنقيد ٿيندس.. نه ڪندي ته به تنقيد ٿيندس.ان ڪري ايترو ضرور آهي ته جيڪڏهن نيب پنهنجي ڪاروايون ڪري ته ان ۾ سچائي هجي.ته جيئن انهن ڪاروائين جي ور ڪو معصوم نه چڙهي…..

*****

 

 

ليڊي هيلٿ ورڪرز جي تاريخي تحريڪ: حنيف سوڍر

جيڪڏهن موجوده سياسي ڪلچر تي چڱيءَ ريت ويچار ڪري ڏسبو، ته اها جاگيرداريت جي اشڪنجي ۾ ڦاٿل نظر ايندي، جنهن سبب طبقاتي ڪلچر کي جيئن پوءِ تيئن هٿي ملندي رهي ٿي. اهو ئي سبب آهي جو وقت سر سياسي ڌرين کي پاڻ ۾ اٽڪائي انهن جي چيلهه چٻي ضرور ڪئي ويندي آهي. ليڪن وقت جي حڪمرانن کي اهو نه وسارڻ گهرجي ته وقت هميشه ساڳيو ناهي رهڻو. هڪ نه هڪ ڏينهن تبديليءَ جو سج اڀرڻو آهي ۽ ضرور حالات ڦيرو ضرور کائيندا آهن.

هن وقت سنڌ جي موجوده صورتحال تي جيڪر سوچجي، معلوم ٿيندو ته اسان جو آئيندو روشن ٿيڻ بجاءِ انڌهاري ڏانهن ويندو محسوس ٿيندو. جهڙيءَ ريت سماجي، سيڪيولر ۽ قومپرست جماعتن کان ويندي سياسي ڌرين کي هڪ پاسي خاموش رهڻ لاءِ مجبور ڪيو پيو وڃي، ته ٻئي پاسي ٿيندڙ ناانصافين خلاف سنڌ جو عوام حقن جي حاصلات لاءِ جڏهن ڪٺو ٿي روڊ رستن تي نڪري نروار ٿئي ٿو، ته بروقت انهن جا جائز مطالبا مڃڻ بجاءِ الٽو کين حراسان ڪري ماٺ ڪري ويهي رهڻ لاءِ هيسايو ۽ ڌمڪايو وڃي ٿو. جنهن سبب سنڌ جو عوام ڏينهون ڏينهن بيشمار مسئلن جي ور چڙهندو پيو وڃي. سنڌ ۾ ڪر کڻي وڌندڙ انيڪ مسئلن کي حل ڪرڻ ۽ نبيرڻ جي سموري ذميواري اخلاقن قانون موجب آئيني طور تي رياست ۽ حڪومت جي عملدارن تي مڙهيل هوندي آهي. ليڪن انهن ڳالهين کان انڪار ڪرڻ ناممڪن آهي ته اهڙي سماجي مسئلن تي قومپرست پارٽين، سيڪيلور جماعتن کان ويندي سياسي ڌرين جي اڳواڻن کي ڪيئن ٿو خاموش ڪرايو وڃي! ڪيئن ٿو ڪڏهن مزدورن کي پاڻ ۾ ويڙهائڻ کان پوءِ انهن جي مسئلن کي نبيريو وڃي! ڪيئن ٿا ڪڏهن ٻين صوبن مان لاشن جا تحفا موڪليا وڃن! ڪيئن ٿو عوام جي حقن لاءِ آواز اٿاريندڙ سياسي توڙي سماجي شخصيتن کي کنڀي گم ڪيو وڃي! اهي سموريون ڳالهيون هڪ پاسي پنهنجي جاءِ تي اهم سوال آهن، ته ٻئي پاسي ڄاڻي واڻي انهن مسئلن کي حل ڪرڻ بجاءِ اڪثر ويتر وڌائي پيش ڪيو ويندو آهي، جنهن سان افرارتفريءَ وارو ماحول مچائي بدامني کي هٿي ڏيئي هڪ پاسي لاقانونيت جو ثبوت ڏنو پيو وڃي، ته وري ٻئي پاسي خاصي بجيٽ هئڻ باوجود سنڌ جي عوام جي جائز مسئلن کان ڄاڻي واڻي ڪن لاٽار ڪيا پيا وڃن. ان سموري نظام کي ذهن نشين ڪري مستقبل لاءِ مفڪرمند ٿي ڪري ويچار ڪجي ۽ پوءِ ان سوال جو نتيجو ڪڍجي ته اسان جي ان موجوده سياسي ڪلچر جا اسان جي ۽ نسل جي مستقبل تي ڪهڙا اثر پوندا؟ جيڪر اڃان به اسان کي سمجهڻ ۾ مشڪلات محسوس ٿئي، ته پاڻ عورتن واري احتجاجي بک هڙتال جي لڳل سينچريءَ مان با آساني سمجهي سگهون ٿا. اڃان به جيڪر نه سمجهون يا سمجهڻ باوجود ڪن لاٽار ڪري چپ چاپ ٿي ويهي رهون، ته پوءِ يقين ڪريو اسان ئي سنڌي عورت جي عظمت ۽ سنڌ جي عظيم ثقافت، تهذيب، ريتن ۽ رسمن ۽ تمدن جي تباهيءَ ڏانهن رخ تبديل ڪرڻ جا ذميوار هونداسين. پاڻ ئي پنهنجن پير تي ڪهاڙو هڻڻ وارن بيوقوفن مان هونداسين.

دنيا ۾ سنڌ جي عظيم ثقافت ۽ سنڌي عورت جي عظمت جو شاهه لطيف جي شاعريءَ کان وڌ ٻيو ڪهڙو ثبوت کپي! سنڌي شاعريءَ ۾ اڄ تائين سنڌي عورت ماءُ جي روپ ۾ ماءُ جي مامتا جي واکاڻ ٿيندي آئي آهي، ونيءَ واري روپ ۾ وفا شعار زال جو وجود قائم رکندي آئي آهي، ڌيءُ جي روپ ۾ پيڪن جي اڪير سمائيندي نظر ايندي رهي آهي، ته ڪڏهن وري ڀيڻ جي روپ ۾ ڀائرن جي عزت ۽ وقار جي علامت ٿيندي نظر ايندي رهي آهي. اهو ئي سبب آهي جو اڄ به ٻهراڙيءَ وارن علائقن توڙي شهرن ۾ سنڌي عورت جي عظمت ۽ بلند اخلاقيءَ جو جيئرو جاڳندو ثبوت ملي ٿو. عورتون پنهنجن ورن کي زندگيءَ جو محور سمجهن ٿيون، جنهن سبب ساڻن عقيدت ۽ محبت ٿئي ٿي. ڀينر پنهنجي ڀائرن تان قربان ٿينديون آهن. مائرون اولاد تي ساهه صدقو ڪنديون آهن. ڌيئر پنهنجي پيڪن لاءِ سڪنديون آهن. اهو ئي سبب آهي جو شاهه لطيف پنهنجي شاعريءَ جي گهڻائيءَ واري حصي ۾ سنڌي عورت جي سچائي، دليري، وفاداري، لڄ ۽ حياءَ، وقار ۽ قوت برداشت جي نمائندگي ڪندي نظر اچي ٿو.

خير، پاڻ ڳالهه پئي ڪئيسون انهن ليڊيز هيلٿ ورڪرز جي، ته جن پنهنجي حقن جي حاصلات لاءِ ڪجهه مهينه اڳ گوزي کان خيرپور ناٿن شاهه تائين اونهاري جي تيز تپش هئڻ ڪري گرم روڊ ۽ رستن تي معصوم ٻارڙن سان گڏ اٺ، نو ڪلو ميٽر فاصلو طئي ڪري لانگ مارچ ڪيو هو. انهن سنڌ جي نياڻين پنهنجي معصوم ٻارڙن سميت شديد گرمين ۽ لوڊ شيڊنگ جهڙين مشڪلاتن سان مهاڏو اٽڪائيندي هڪ وڻ جي معمولي ڇانو هيٺان ڪيمپ لڳائڻ کان پوءِ احتجاجي بک هڙتال تي مسلسل ان اميد سان ويٺيون ته هڪ نه هڪ ڏينهن اسان سان انصاف ٿيدو! ليڪن انهن ليڊيز هيلٿ ورڪرز ۽ سندن معصوم ٻارڙن جي تحريڪ کي 100 ڏينهن مڪمل ٿي ويا. افسوس! ڪو ٻوٽو نه ٻريو. انهن سنڌ جي نياڻين جا جائز مسئلا سنڌ جي ڪنهن سياسي، سماجي، قومپرست پارٽين جي اڳواڻن توڙي ڪارڪنن سان گڏ ٻين ساڃاهوندن عورتن توڙي مردن، شاگردن توڙي شاگردياڻين ۽ هر عام کي چڱي ريت معلوم آهي. گذريل ڪالم ۾ اهڙو ذڪر ڪري چڪو آهيان. ڪهڙو ويهي انهن کي تفصيل سان لکجي. سچ اهو آهي ته انهن جي جائز مطالبن کي اڃان تائين تسليم نه ڪيو ويو آهي. اها ڳالهه مڃڻ جوڳي آهي ته سنڌ ۾ عورتن جي ان لڳاتار احتجاجي بک هڙتال واري هلندڙ تحريڪ کان اڳ اهڙي ڊگهي تحريڪ ناهي هلي. ڌيان طلب ڳالهه آهي، ته ڇا ليڊيز هيلٿ ورڪرز جي مسلسل جاري رهندڙ 100 ڏينهن واري تحريڪ اتي دنگ ڪندي يا اڃان وڌيڪ جاري رهندي!؟ جيڪر جاري رهي، ته تاريخ ۾ ان کان وڌ وقت جي حڪمرانن جي اڃان ٻي ڪهڙي بيحسي چئبي!؟

پروين کوکر، فاطمه ملاح، رخسانه عباسي، نور بانو ملاح، پروين ناريجو، نجمه مگسي، زاهده خاتون ۽ رابيعه ناريجو جي اڳواڻيءَ هيٺ حقن جي مطالبن واري مسلسل جاري رهندڙ ان جدوجهد دوران انهن عورتن سان ڇا وهيو واپرايو انهن کان به هر ساڃاهوند با خبر آهي. ان تحريڪ ۾ 7 معصوم ٻارڙن جي ماءُ ليڊي هيلٿ ورڪر ”عاليه ميراڻي“ جيون جي جنگ هارائي ويٺي ”سنديس ٻچڙن جو خدا ڄاڻي ڇا ٿيندو!“ تحريڪ دوران مٿن آنسو گئس جا گولا به اڇلايا ويا هئا، نوڪرين تان لاهي ڇڏڻ جون ڌمڪيون ڏيڻ سان گڏوگڏ بيهوده تهمتون لڳائي کين خوار ڪرڻ جون به ڪوششون ڪيون ويون هيون ته ڪن نياڻين کي وارن کان گهليو ويو هو. تنهن باوجود به هنن حوصلو نه هاريو ۽ عيدن سان گڏ رمضان جهڙو ڀلارو مهينو به انهن  گرمين ۽ ڪانو جي اک ڪڍندڙ گرم ڏينهن جي تپش ۽ ڪاڙهن ۾ گذاريا. ان کان علاوه گهر گهاٽ ڇڏڻ ۽ صبح شام سفر جون تڪليفون سر تي سهي ڪشالا ڪاٽينديون رهيون.

سنڌ ۾ ٻين انيڪ مسئلن سان گڏ اهڙا به مسئلا روز جو معمول بڻيل آهن جيڪي عورتن سان ٿيندا رهن ٿا. ساڻن جانورن جهڙو سلوڪ ڪيو وڃي ٿو. ڪڏهن غيرت جي نالي تي ڪاري ڪارو ڪري ماريو وڃي ٿو. ڪٿي ٿوريءَ گهڻي ڳالهه تي ڪاوڙ ۾ اچي ڪٿي ڀاءُ، ڪٿي مڙس، ڪٿي ڏير ته ڪٿي وري پيءُ يا ڪو ٻيو ماڻهو آتشي يا غير آتشي هٿيارن جا وار ڪندي سندن ڳلو ڪپيو ٿو وڃي ته ڪٿي مٿن تيزاب هاري ماريون يا شديد زخمي ڪندي کين کاريو وڃي ٿو، ته ڪٿي وري چوديواريءَ اندر ئي اندر کين قيد ڪري مختلف طريقن سان حراسان ڪيو وڃي ٿو. ان ئي عظيم عورت کي وحشي درندن پاران پنهنجن مفادن خاطر ڏاڍ ۽ جبر ڪندي استعمال ڪيو ٿو وڃي ته ڪٿي وري جرڳن جي ور چاڙهي چند ٽڪن عيوض کين ڪنهن پوڙهن جي وني بڻايو وڃي ٿو يا پهاڄ تي پرڻائي مٿس مصيبتن جا پهاڙ کڙا ڪيا وڃن ٿا. جنهن ڪري يا ته هوءَ زهر جا ڍڪ ڀري سٺ ستر سال ڪنڌ جهڪائي غلامن وانگر جيئي ٿي يا وري دنيا کان ڪناره ڪشي ڪري ٿي. ان ئي سنڌي عورت کي ريتن رسمن جي ور چاڙهي ننڍڙي عمر ۾ گهر اندر قيد ڪري يا وري شادي ڪرائي تعليم جهڙي زيور کان تاحيات محروم ڪيو وڃي ٿو.

اسان جي معاشري اندر اهڙي کوکلي انسان پاران عورتن کي جسماني ۽ ذهني طور تي تشدد ڪيو وڃي ٿو. جنهن ڪري عورت جو گھر کان ٻاهر قدم رکڻ ۽ ناانصافي خلاف آواز اٿارڻ ڏاڍو مشڪل ٿي پيو آهي. اهڙي سماج ۾ هڪ ليڊيز هيلٿ ورڪر کي پنهنجي ٻارڙن، مڙس يا گهر جي سموري خاندان جي ذميوارين جا بار ڪلهن تي هئڻ باوجود خدا ڄاڻي در در وڃي پنهنجي فرضن جي ادائگي ڪرڻ لاءِ ڪيترين ڪٺن حالتن ۽ مشڪلاتن جو منهن ڏسڻو پوندو هوندو! اهڙي مرداڻي سماج ۾ سموريون ذميواريون نڀائڻ ۽ ڪشالا ڪاٽڻ باوجود ليڊيز هيلٿ ورڪرز احتجاجي ڪئمپ واري جدوجهد کي مسلسل جاري رکنديون آيون آهن. اها سنڌي عورت جي بلند حوصلي، اٽل ارادو، بهادري ۽ منجهن دليري هئڻ جو ثبوت آهي.

اڄ جي هن جديد دور جي تقاضا اها آهي ته مرد ۽ عورت ٻنهي کي برابر جو شهري تسليم ڪندي کين برابري جا حق ڏنا وڃن. تنهنڪري ضرورت ان جي آهي ته هي مسئلو نه صرف انهن ليڊيز هيلٿ وڪرز جو آهي، جيڪي روزانو ڪئمپ تي موجود هجن ٿيون، پر سموري سنڌ جون موجود ليڊي هيلٿ ورڪرز پنهنجو مسئلو سمجهن ۽ ساڻن ٿيندڙ ناانصافين کي پاڻ تي لاڳو ڪري گڏجي جدوجهد جو آغاز ڪن ۽ ان سان گڏ هر ساڃاهوند عورت جو فرض آهي ته هوءَ به ساڻن جدوجهد جو حصو بڻجي، ۽ سنڌ هر جي ساڃاهوند کي گهرجي ته هو سنڌي عورت جي حفاظت، عظمت ۽ عزت کي سنڌي هئڻ ناتي پنهنجي سنڌي نياڻي سمجهي ۽ سندن همٿ ۽ حوصلي افزائي ڪرڻ لاءِ فرض سمجهي، نيڪ نيتي ۽ سچائيءَ سان انهن جي جدوجهد جي دائري کي وسيع ڪرڻ ۾ اڳڀرو ٿئي. ڇاڪاڻ جو انهن جي مسئلن کي نه صرف سپريم ڪورٽ آف پاڪستان جائز قرار ڏئي چڪي آهي، پر سنڌ جي وڏي وزير ”سيد مراد علي شاهه“ بجيٽ اجلاس دوران پڻ انهن کي پڪو ڪرڻ جو اعلان ڪري چڪو آهي.

100 ڏينهن گذرڻ باوجد جڏهن اهڙن فيصلن کي نظرانداز ڪيو ويو آهي ته پوءِ هاڻي حڪومت کان چڱائيءَ جي ڪهڙي يقين جي آڌار اڃان وڌيڪ اميد ۽ توقع ڪري سگهجي ٿي؟ تنهن ڪري اهو سمورو مسئلو سنڌ جي نه صرف ليڊيز هيلٿ ورڪرز جو پر عورت جو آهي. سنڌ ۽ سنڌي نياڻين سان ناانصافيون ڪرڻ ڪرڻ وارو معاملو آهي ۽ ان سان گڏوگڏ سياسي، سماجي ۽ حقن لاءِ آواز بلند ڪندڙ ورڪرن ۽ شخصيتن کي کنڀي گم ڪرڻ وارو معاملو به نه وسارڻ گهرجي. سنڌ ۾ نه صرف اهي ٻئي اهم معاملا پر ان سان گڏ ٻيا به کوڙ سارا مسئلا آهن جيڪي سنڌ جي غريب عوام ۽ مستحق ماڻهن جي حقن تي ڌاڙو هڻڻ برابر آهن. تنهن ڪري اهڙن مسئلن سان گڏوگڏ ٻين انيڪ مسئلن جي حل ٿيڻ لاءِ به اسان سڀن ساڃاهوندن سياسي، قومپرست پارٽين کان ويندي عورت جي ڀلائيءَ لاءِ ڪم ڪندڙ ادارا ۽ ونگز سانگڏ  سنڌ جون سموريون خيرخواه سيڪولير جماعتن کي گڏ ٿيڻ گهرجي. سڀ جا سڀ ملي ڪري گڏجي ان احتجاج جو دائرو وزيراعليٰ هائوس ڪراچي تائين وڌائي ڪامياب بڻائڻ لاءِ آواز اٿارڻ کپي.

جتي پاناما جهڙن مسئلن کي حل ڪيو ٿو وڃي، اتي اهڙن معمولي مسئلي کي نظرانداز ڇو ٿو ڪيو وڃي؟ جتي سنڌ کان علاوه ٻين صوبن جي ليڊيز هيلٿ ورڪرز جا مسئلا ڏاڍي غور ۽ ويچار سان ٻڌڻ کان پوءِ حل ڪيا وڃن ٿا، اتي سنڌ جا ڇو نه!؟ ان لاءِ سنڌ جي آواز جي ترجماني ڪندڙ سنڌي ميڊيا کي به تن معاملن تي سچائي، بردباري ۽ ايمانداريءَ سان پنهنجي فرضن جي ادائگي ڪندي روڊ تي نڪري ايندڙ عوام ۽ تحريڪن کي ڪوريج ڏيندي سچي صحافت هئڻ جو ثبوت ڏيڻ ۾ اڳڀرو ٿيڻ گهرجي.

پاڻ ئي پنهنجا ويڄ ٿياسين،

درد اسان کان دور ڀڄي وڃ.

hanifsodhar2017@gmail.com

 

 

نئب کي ڪم جاري رکڻ جو حڪم…!

سنڌ هاءِ ڪورٽ قومي احتساب بيورو جي ميمبرن کي سنڌ اسيمبلي ۽ بيورو ڪريٽس خلاف انڪوائري جاري رکڻ جو حڪم ڏئي ڇڏيو آهي، چيف جسٽس سنڌ هاءِ ڪورٽ جسٽس احمد علي شيخ جي سربراهي ۾ ۲ رڪني بينچ سنڌ حڪومت پاران صوبي ۾ نيب جي اختيارن کي ختم ڪرڻ متعلق متحده قومي موومينٽ پاڪستان ۽ مسلم ليگ فنڪشنل جي گڏيل درخواست جي ٻڌڻي ڪئي، ٻڌڻي جي لاءِ ايڊيشنل اٽارني جنرل سلمان طالب الدين، ايڊووڪيٽ جنرل سنڌ بيرسٽر ضمير گهمرو، پراسيڪيوٽر جنرل نيب وقاص ڊار سنڌ هاءِ ڪورٽ ۾ پيش ٿيا، جڏهن ته اپوزيشن جي پيروي بيرسٽر فرغ نسيم ۽ سول سوسائٽي جي پيروي فيصل صديقي ايڊووڪيٽ ڪئي، سنڌ اسيمبلي ۾ اپوزيشن پارٽين پاران داخل درخواست ۾ الزام لڳايو ويو ته پيپلز پارٽي جي وزيرن ۽ مشيرن ڪرپشن ڪئي آهي، ان جي لاءِ سنڌ ۾ نيب آرڊيننس کي ڪلعدم قرار ڏنو ويو آهي،

عدالت چيو ته جن ميمبرن خلاف نيب ۾ انڪوائري هلي رهي آهي، انهن جي فهرست عدالت ۾ پيش ڪئي وڃي ۽ انهن ميمبرن کي اسيمبلي جي فهرست مان خارج ڪيو وڃي، ايڊووڪيٽ جنرل سنڌ عدالت کي ٻڌايو ته ۱۸ هين ترميم تحت سنڌ اسيمبلي کي ان بل جي منظوري جو اختيار حاصل آهي جنهن ۾ نيب کي صرف وفاقي ادارن ۾ ڪارروائي ڪرڻ جا اختيار ڏنل آهن، چيف جسٽس جا ريمارڪس هئا ته مطلب اهو آهي ته وفاقي اينٽي ڪرپشن ڪورٽ، دهشتگردي جي خاص عدالت ۽ اينٽي نارڪوٽيڪس ڪورٽ کي تالا لڳائي ڇڏجن، عدالت نيب کي سنڌ اسيمبلي ميمبرن خلاف ڪارروائي جاري رکڻ ۽ انڪوائري ڪرڻ جو حڪم ڏئي ڇڏيو .

ياد رهي ته  سنڌ حڪومت جا ڪيترائي سياستدان ۽ آفيسر نيب جي پڪڙ ۾ آهن، صوبي ۾ ٦۰ کان وڌيڪ سياستدانن ۽ آفيسرن خلاف جاچ جاري آهي، نيب پاران هن وقت به قانون واري وزير ضياءُ النجار، ايم پي اي فقير داد کوسو، شرجيل ميمڻ ۽ ٻين حڪومتي شخصيتن خلاف انڪوائري جاري آهي، ايم پي اي اويس مظفر خلاف نيب ۾ انڪوائري هلي رهي آهي، اڳوڻي چيف سيڪريٽري صديق ميمڻ، اعجاز چوڌري ۽ ٻين خلاف نيب جاچ ڪري رهي آهي، اڳوڻي تعليم واري وزير پير مظهر الحق خلاف نيب جي انڪوائري آخري مرحلي ۾ آهي، ايم اين اي مير منور ٽالپر ۽ ايم پي اي علي مردان شاهه خلاف نيب جون انڪوائريون بند ٿي چڪيون آهن، اطلاعن موجب سنڌ ۾ هن وقت ۵ درجن کان وڌيڪ ڪيس التوا هيٺ آهن، جڏهن ته نيب پاران گذريل سال هڪ سئو کان وڌيڪ ريفرنس داخل ڪيا ويا هئا، جيڪي هن سال به ۱۲ ريفرنس فائل ٿي چڪا آهن.