تازيون خبرون

Daily Archives: August 18, 2017

خان صاحب غير سياسي ماڻهو آهي، شريف خاندان کي مستقبل ۾ سياست ۾ نه پيو ڏسان: آصف علي زرداري

لاهور (ويب ڊيسڪ) اڳوڻي صدر آصف علي زرداري چيو آهي ته ملڪ ۾ جمهوريت کي ڪو خطرو ناهي، پ پ ڪنهن پارٽي نه پر سدائين پارليامينٽ جو ساٿ ڏنو آهي، جمهوريت کانسواءِ ملڪ جو ڪو مستقبل ناهي. لاهور ۾ بلاول ڀٽو زرداري سان گڏ پريس ڪانفرنس ڪندي آصف علي زرداري چيو ته ماضي ۾ پيپلز پارٽي نواز شريف جو نه پر  جمهوريت جو ساٿ ڏنو. اسان رڳو جمهوريت ۽ پارليامينٽ سان گڏ آهيون. سندس چوڻ هو ته ميان صاحب سان ڪڏهن به پاوا ناهن کاڌا، ڪيئن يقين ڏياريان ته هو نواز شريف سان نه پر جمهوريت سان گڏ آهن. اڳوڻي صدر چيو ته نواز شريف چئن سالن دوران جمهوري رويو اختيار نه ڪيو، نه ئي کائنس ڪو فائدو ورتو ويو. سندن لاهور اچڻ کانپوءِ سياسي پارو وڌي ويو آهي. آصف علي زرداري چيو ته اسان جي حڪومتي دور ۾ ڪڏهن به اهڙو سياسي بحران پيدا نه ٿيو، نه ئي ڪو سياسي قيدي هو، سياست ۾ ڪا آخري ڳالهه ناهي هوندي. هن چيو ته عمران خان  سان ڪڏهن به ملاقات ناهي ٿي نه ئي ٿيندي، ميان صاحب ۽ سندس خاندان جو سياسي مستقبل نظر نٿو اچي. ان موقعي تي بلاول ڀٽو زرداري جو چوڻ هو ته ماڻهن کي غلط فهمي آهي ته پ پ نواز شريف جو ساٿ ڏنو هو. اسان جمهوريت سان گڏ آهيون ۽ رهنداسين. هن چيو ته شريف خاندان پ پ کان رليف چاهي ٿو ته اهو نه ڏنو ويندو. اسان سدائين ان موقف تي قائم رهيا آهيون ته احتساب سڀني جو ٿيڻ گهرجي، پ پ نظرياتي سياست ڪري رهي آهي. پ پ چيئرمين جو چوڻ هو ته سڀني کي خبر آهي ته نواز شريف معصوم نه پر ڏوهي آهي، ڪي پي ۽ پنجاب ۾ سياسي سرگرميون شروع ڪري رهيا آهيون، 19 آگسٽ تي مانسهرا ۽ 26 آگسٽ تي ايبٽ آباد ۾ جلسو ڪيو ويندو. سندس چوڻ هو ته نيشنل ايڪشن پلان ۾ واضح آهي ته ڪا به پابندي پيل تنظيم نالو تبديل ڪري سياست ۾ نٿي اچي سگهي.27

 

ميثاق جمهوريت جي ڀڃڪڙي ناهي ڪئي، پي ٽي آءِ سبب جمهوريت کي نقصان پهتو: نواز شريف

لاهور (ويب ڊيسڪ): اڳوڻي وزيراعظم نواز شريف چيو آهي ته اسان جي حڪومت 2013 ۾ قائم ٿي ۽ وڏو واضح مينڊيٽ هيو، پي ٽي آءِ پهرين ڌانڌلي جي رٽ لڳائڻ شروع ڪري ڇڏي ۽ پوءِ احتجاج شروع ڪري ڇڏيو، ميان نواز شريف چيو ته ملڪ ۾ امن قائم ٿيو آهي، ڪراچي جو امن اسان بحال ڪيو آهي، سي پيڪ تمام بهتر انداز ۾ هلي رهيو هيو، ڌرڻي دوران سخت متاثر ٿيو، ملڪ ۾ انفرااسٽرڪچر بڻجي رهيو آهي، سي پيڪ زورن سان هلي رهيو هيو پر ان تي ڪم ڌرڻن سان متاثر ٿيو، هن چيو ته پاڪستان جي معاشي بدحالي جو ڪير ذميدار هوندو؟، پي ٽي آءِ سبب پاڪستان ۾ جمهوريت کي نقصان پهتو، مون کي ٻڌايو ته ڌرڻو هيو ڇا جي لاءِ؟، مون کي ٻڌايو وڃي ته ڌرڻي جي ڪهڙي ضرورت هئي؟، هن چيو ته ڌرڻي جي ڪردارن جي باري ۾ بعد ۾ ٻڌائيندس، سپريم ڪورٽ پهرين پاناما جي درخواست رد ڪئي ۽ پوءِ منظور ڪري ورتي، جي آءِ ٽي ۾ شامل سمورا ماڻهو اسان جا بدترين مخالف هئا، مان بطور وزيراعظم جي آءِ ٽي ۾ پيش ٿيس، اڳوڻي وزيراعظم نواز شريف چيو ته پورو خاندان جي آءِ ٽي سامهون پيش ٿيو، ڪهڙي ڳالهه جو احتساب ٿي رهيو آهي؟، شهباز شريف، مريم، حسن ۽ حسين نواز به جي آءِ ٽي ۾ پيش ٿيا، 1972 کان احتساب ڪيو ويو، ٻڌايو وڃي ته مون سرڪاري پئسن ۾ گهوٻيون هنيون آهن؟، ڪي سرڪاري پئسن ۾ گهوٻيون هجن ها ته اڄ اوهان جي سامهون شرمسار ويٺو هجان ها، مان ته 70 سالن کان هن ملڪ ۾ اهو ئي ڪجهه ٿيندي ڏسي رهيو آهيان، مون ته ڪرپشن جو ڪو داغ ناهي، اسان جي پنهنجي ڪاروباري معاملن جي ڇنڊ ڇاڻ ٿي رهيو آهي، ستر سالن ۾ اسان ملڪ جو ٻيڙو ٻوڙڻ ۾ ڪا ڪسر ناهي ڇڏي، جيڪڏهن عوام جي حڪمراني جي حق تي قائم رهون ها ته پاڪستان ڪڏهن نه ٽٽي ها، ووٽ جي گھحرمت کي جڏهن ڇڏيو ويو ته ملڪ ٽٽي ويو، ڇا اسان ماضي مان ڪو سبق ناهي سکيو؟، هن چيو ته جيڪڏهن سبق سکيو هجي ها ته پهرين مارشل لا بعد ٻيو ۽ ٽيون نه لڳي ها، ٽي مارشل لا ڊڪٽيٽر ٽيهه سال کائي ويا، هر وزيراعظم جي حصي ۾ سراسري ڏيڍ سال آيو، نواز شريف چيو ته مشرف مارشل لا لڳايو ته مشرف منهنجي خلاف هيو، فوج منهنجي خلاف نه هئي، فوج جو وڏو حصو مشرف جي قدمن جو حامي نه هيو، بنگلاديش ۾ عوام جو حق حڪمراني مڃيو ويو هجي ها ته ملڪ نه ٽٽي ها، ڇا هي عوام جي ووٽ جو احترام آهي؟، ڇا ان طرح سان ملڪ بڻجندو آهي؟ ڇا ان طرح سان قومون بڻجنديون آهن؟، فوج جو هڪ حصو منهنجي خلاف ڇو هوندو؟، مشرف ۽ ان جا ڪجهه ساٿي منهنجي خلاف هيا، باقي فوج کي ته معلوم ئي نه هيو ته مارشل لا لڳو، فوج جو وڏو حصو مشرف جي فيصلي سان متفق نه هيو، ڪجهه ماڻهن فيصلو ڪيو ۽ حڪمراني سنڀالي ورتي ۽ ووٽ کي ڦاڙي قوم جي منهن تي هنيو ويو، ووٽ جي تقدس لاءِ اسان پوري جدوجهد ڪنداسين، ووٽ جي تقدس جي جدوجهد قوم ۾ ڦهلجندي ويندي، ملڪ ۾ ووٽ جو احترام نه هيو، ان سبب ملڪ کي اهي مصيبتون ڏسڻيون پيون، قانون جي حڪمراني تي پختو يقين رکان ٿو، هن چيو ته ڪوئي جيڪڏهن قانون جي حڪمراني تي يقين نٿو رکي ته اهي ان سان اتفاق نٿا رکن، ڪجهه فوجي سربراهن سان منهنجا لاڳاپا سٺا رهيا آهن ۽ تمام سٺا رهيا آهن، مون هميشه پاڻ کي آئين مطابق رکڻ جي ڪوشش ڪئي آهي، قانون جي حڪمراني تي هميشه يقين ڪيو آهي، حڪومت جي پاليسين جو رخ درست هئڻ گهرجي، مان انگن اکرن جي ڳالهه ڪندو آهيان، مسرف ۽ ڪجهه فريقن وچ ۾ اين آر او ميثاق جمهوريت خلاف هيو، مون اڄ تائين ميثاق جمهوريت جي ڀڃڪڙي ناهي ڪئي، گذريل چئن سالن ۾ نظريي کان هٽي ڪري ڪو ڪم ناهي ڪيو، اسان ضبط ۽ صبر کان ڪم ورتو، اسان وڏي بردباري جو مظاهرو ڪيو هيو، عمران خان جي باري ۾ ڇا چوان، دنيا ڄاڻي ٿي، هي ڪم پنهنجي قوم لاءِ مون تي قرض آهي، مان ان لاءِ ناهيان چئي رهيو وزيراعظم جي ڪرسي تي ٻيهر اچي ويهان، هي ملڪ بدلجندو، ملڪ جو بدلجڻ ضروري آهي، وزيراعظم جي سيٽ ڪنڊن جي سيج آهي، اڳوڻي وزيراعظم نواز شريف چيو ته ووٽ جي تقدس جي تحريڪ پوري ملڪ ۾ ڦهلجندي.

 

سنڌ حڪومت جو هڪ لک ڀرتيون ڪرڻ جو فيصلو، وڏي وزير منظوري ڏئي ڇڏي

ڪراچي (اين اين آءِ) سنڌ حڪومت عوام کي خوشخبري ٻڌائي ڇڏي، سرڪاري نوڪرين تي هڪ لک ڀرتيون ڪرڻ جو فيصلو ڪيو ويو آهي، پهرين مرحلي ۾ گريڊ هڪ کان 11 تائين ڀرتيون ڪيون وينديون، تفصيل موجب سنڌ حڪومت پاران عوام لاءِ تحفو هڪ لک وڌيڪ خالي آسامين تي ڀرتيون ڪرڻ جو فيصلو ڪيو آهي، سنڌ جي وڏي وزير منظوري ڏئي ڇڏي آهي، شروعاتي مرحلي ۾ هڪ کان 11 گريڊ تائين ڀرتيون ڪيون وينديون، ڀرتي ڪرڻ جا اختيار واسطيدار ضلعي آفيسر کي ڏنا ويا آهن، ملازمن جي ڀرتين کي شفاف بڻائڻ لاءِ نگران ڪميٽيون قائم ڪيون ويون آهن، ڪميٽي جو سربراهه واسطيدار کاتي جو سيڪريٽري هوندو، ڪميٽي ۾ ڊويزنل ڪمشنر، ڊي سيز ۽ کاتي جو ڊويزنل آفيسر بطور ميمبر شامل هوندو، صحت، تعليم، آبپاشي، زراعت، سڌ سماءَ، سروسز اينڊ ايڊمنسٽريشن سميت ٻين کاتن ۾ ڀرتيون ڪيون وينديون، ٻئي مرحلي ۾ 16 گريڊ تائين جون ڀرتيون ڪيون وينديون، وڏي وزير 17 گريڊجي خالي آسامين جا تفصيل فوري طور تي سنڌ پبلڪ سروس ڪميشن ڏانهن موڪلڻ جي هدايت ڪري ڇڏي آهي. ان گريڊجي ملازمن جون ڀرتيون سنڌ پبلڪ سروس ڪميشن ذريعي ڪيون وينديون.

 

 تعليم کاتي ۾ 13 هزار ڀرتيون جائز قرار، پير مظهر خلاف جاچ ختم

ڪراچي(اين اين آءِ)نيب سنڌ ۾ پ پ پ  جي اڳوڻِي صوبائي وزير پير مظهر الحق تعليم کاتي ۾ 13 هزار جعلي ڀرتين جي  انڪوائري ختم ڪري ڇڏي. خميس تي سنڌ هائي ڪورٽ ۾ پير مظهرالحق جي نيب انڪوائري ضمانت واري درخواست جي ٻڌڻي ٿي ، نيب جي پراسيڪيوٽر عدالت کي ٻڌايو ته انڪوائري مڪمل ٿي وئي آهي ۽ وڌيڪ جاچ ڪرڻ جي ضرورت نه آهي انڪوائري جي نتيجن جي موجب پير مظهرالحق جي دور ۾ تعليم کاتي ۾ ڪابه ڪرپشن نه ٿي ان ۾ نه ته سرڪاري آفيس جو استعمال ٿيو ۽ نه ئي سرڪاري ناڻي کي ڪو نقصان ٿيو ان لاءِ جعلي ڀرتين کي انڪوائري ختم ڪئي وڃي. نيب آڪٽوبر 2015 ۾ پير مظهر الحق جي وزارت جي دور ۾ 13 هزار کان وڌيڪ ڀرتين جي جاچ شروع ڪئي هئي.

 

پڙهيل لکيل نوجوان داعش جو وڏو هدف آهن، تمام گهڻو هوشيار رهن: آرمي چيف

راولپنڊي (ويب ڊيسڪ): آءِ ايس پي آر موجب آرمي چيف جنرل قمر جاويد باجوه آءِ ايس پي آر ڊائريڪٽوريٽ جو دورو ڪيو آهي، آرمي چيف آءِ ايس پي آر ۾ انٽرن شپ ڪندڙ نوجوانن سان ملاقات ڪئي، آءِ ايس پي آر موجب آرمي چيف چيو ته الله پاڪستان کي ذهين ۽ متحرڪ نوجوانن سان نوازيو آهي، پاڪستان جو مستقبل نوجوانن سان جڙيل آهي، آرمي چيف جنرل قمر جاويد باجوه چيو ته پاڪستاني فوج اندروني، بيروني خطرن کي منهن ڏيڻ جي ڀرپور صلاحيت رکي ٿي، آرمي چيف چيو ته پورو يقين آهي ته پاڪستاني نوجوانن کي پنهنجي صلاحيتن جو احساس آهي، هر پاڪستاني شهري آپريشن ردالفساد جو سپاهي آهي، آرمي چيف چيو ته پاڪستان نوجوان ملڪ کي امن ۽ خوشحالي طرف وٺي ويندا، نوجوان ميرٽ ۽ قانون جي حڪمراني تي عمل ڪن، نوجوان ڪاميابي جي لاءِ شارٽ ڪٽس طرف نه وڃن، هن چيو ته پورو يقين آهي ته پاڪستاني نوجوانن کي پنهنجي صلاحيتن جو احساس آهي، تشدد، دهشتگردي کان ملڪ کي نجات ڏيارڻ ۾ پاڪ فوج عظيم ڪاميابي حاصل ڪئي، هن چيو ته پاڪ فوج هڪ محفوظ ۽ مستحڪم پاڪستان جي قيام لاءِ عزم ڪيو آهي، پائيدار امن لاءِ اسان مان هر هڪ کي پنهنجو ڪردار ادا ڪرڻو آهي، پڙهيل لکيل نوجوان داعش جو وڏو هدف آهن، تمام گهڻو محتاط رهن، نوجوان شاگرد سوشل ميڊيا تي بيانن وقت چوڪس رهن، نوجوان داعش سان جڙيل تنظيمن کان به محتاط رهن.

 

ايران سان ثقافتي، عوامي لاڳاپن کي هٿي وٺرائڻ جا خواهشمند آهيون: مريم اورنگزيب

اسلام آباد (ويب ڊيسڪ): سڌ سماءَ واري مملڪتي وزير مريم اورنگزيب سان ايران جي سفير مهدي هنردوست ملاقات ڪئي آهي، ملاقات دوران فلم ڪميشن جي قيام بابت خيالن جي ڏي وٺ ڪئي وئي، ان موقعي تي ايراني سفير فلم ڪميشن جي قيام ۾ ڀرپور سهڪار جي خاطري ڪرائي، ان موقعي تي ڳالهائيندي مملڪتي وزير مريم اورنگزيب چيو ته ايران سان لاڳاپن کي انتهائي قدر جي نگاهه سان ڏسون ٿا، هن چيو ته ايران سان ثقافتي، عوامي لاڳاپن کي هٿي وٺرائڻ جا خواهشمند آهيون.

 

پاناما  ڪيس بابت نيب کي فيصلو وقت تي ڏيڻ گهرجي: خورشيد شاهه

اسلام آباد( ويب ڊيسڪ ) مخالف ڌر جي اڳواڻ خورشيد شاهه چيو آهي ته نواز شريف پنهنجي عقلمندي سبب اڄ اهڙا ڏينهن ڏسي رهيو آهي، نيب کي پنهنجو فيصلو وقت تي ڏيڻ گهرجي. اسلام آباد ۾ ميڊيا سان ڳالهائيندي خورشيد شاهه چيو ته سپريم ڪورٽ پاڻ نيب جي نگراني ڪري رهي آهي، نيب چيئرمين جي مقرري آڪٽوبر ۾ مڪمل ٿيڻ گهرجي، مان مخالف ڌر اڳواڻ طور بهتر ۽ اڻ تڪراري شخص جي ڳولا ۾ آهيان. هن چيو ته نيب چيئرمين جي چونڊ تمام گهڻي ذميواريءَ جو ڪم آهي، جڏهن ته حالتون ڏسي فيصلا ڪرڻا پوندا آهن. سندس چوڻ هو ته ڪنٽينر وقت چيو ويندو هو ته اسيمبلي کي نه ٿا مڃون ان کي ختم ڪرڻ گهرجي، جڏهن پارليامينٽ کي خطرو هو ته پ پ نظام بچائڻ لاءِ ميدان تي لٿي، نواز شريف تنهن وقت عدليه سان گڏ هلي رهيو هو. خورشيد شاهه چيو ته پ پ پهريون ئي چوندي هئي ته عدليه جو فيصلو قبول ڪرڻ گهرجي، هنن ڪڏهن به عدليه تي حملو نه ڪيو آهي.

 

ملڪي تاريخ  ۾ هڪ به وزيراعظم پنهنجو مدو پورو نه ڪري سگهيو آهي: احسن اقبال

اسلام آباد( ويب ڊيسڪ ) وفاقي گهرو وزير احسن اقبال چيو آهي ته پاڪستان جو وجود ۾ اچڻ هڪ معجزو آهي، افسوس آهي ته 70 ورهين ۾ هڪ به وزيراعظم پنهنجو مدو پورو نه ڪري سگهيو آهي. اسلام آباد ۾ تقريب کي خطاب ڪندي احسن اقبال چيو ته 70 ورهين دوران ملڪ ڪيترن ئي اهم مرحلن مان گذري رهيو آهي، جنهن دوران ڪيتريون ئي ڪاميابيون به حاصل ڪيون ويون آهن. هن چيو ته 90 جي ڏهاڪي ۾ پاڪستان جي ترقي جي بلند ترين شرح سطح تي هئي پر ٻن ٻن سالن دوران حڪومتون برطرف ڪري 90 جي ڏهاڪي کي غير مستحڪم ڪيو ويو. سندس چوڻ هو ته 70 ورهين ۾ ڪيترائي ملڪ پوئتي هئا جيڪي اڳتي نڪري چڪا آهن، ترقي ڪندڙ ملڪن ۾ ڊگهي استحڪام جو دور نظر ايندو. احسن اقبال چيو ته 1960ع ۾ پاڪستان کي جاپان کانپوءِ اڀرندڙ معيشت چيو پئي ويو، وزيراعظم محمد خان جوڻيجي ۾ گهڻي خرابي هئي، هو تمام معصوم وزيراعظم هو. هن چيو ته پاڙيسري ملڪ افغانستان ۾ به حڪومتن ۾ تسلسل نظر اچي رهيو آهي ۽ اهو به اسان کي پوئتي ڇڏڻ جي تياري ڪري رهيو آهي. سندس چوڻ هو ته من موهن جڏهن وزيراعظم هو ته سرتاج عزيز کان سڌارن ايس آر اوز گهريا هئا . سندس چوڻ هو ته هاڪاري سوچ ڪاميابي آڻيندي آهي ۽ ناڪاري سوچ ناڪامي. احسن اقبال چيو ته پاڪستان کي ترقي ۽ اڳتي وڌڻ لاءِ اسان کي پنهنجي سوچ هاڪاري رکڻ گهرجي.

 

چوڌري نثار پارن پارٽي جو وقتي صدر چونڊڻ جي طريقي ڪار تي ڪاوڙ اظهار، خواجه سعد رفيق به تائيد ڪري ڇڏي

اسلام آباد (ويب ڊيسڪ) اڳوڻي وفاقي گهرو وزير چوڌري نثار پارٽي جو وقتي صدر چونڊڻ واري طريقي ڪار تي خدشن جو اظهار ڪيو آهي. ن ليگ جي مرڪزي ايگزيڪيوٽو ڪميٽي جو اجلاس چيئرمين راجا ظفر الحق جي صدارت هيٺ پنجاب هائوس ۾ ٿيو، جنهن ۾ وزيراعظم شاهد خاقان عباسي به شرڪت ڪئي. اجلاس دوران وقتي صدر جي چونڊ جي طريقي ڪار تي چوڌري نثار سخت خدشن جو اظهار ڪندي چيو ته اجلاس کان اڳ پارٽي جي قائم مقام صدر جي نالي جو اعلان ڇو ڪيو ويو. هن چيو ته جڏهن سڀ فيصلا لاهور ۾ ويهي ڪرڻا آهن ته پوءِ مرڪزي ايگزيڪيوٽو ڪميٽي جو اجلاس گهرائڻ جي ڪهڙي ضرورت هئي. چوڌري نثار پنهنجي کٽڪا وزيراعظم اڳيان ظاهر ڪيا پر ڪنهن به پارٽي ميمبر ان موقعي تي جواب نه ڏنو، جڏهن ته خواجا سعد رفيق چيو ته چوڌري نثار درست چئي رهيو آهي.27

 

ٺٽو لڳ روڊ حادثو، 2 سئوٽن سميت 5 ڄڻا فوت، 15 زخمي، اسپتال ۾ ايمرجنسي لاڳو، وين ڊرائيور خلاف ڪيس داخل

ٺٽو (ڊ_ر) گجو لڳ مسافر وين ۽ بس ۾ ڏکوئندڙ حادثو 5 ڄڻا فوت 15 ڄڻا زخمي زخمين ۾ هڪ ئي گهر جا 2 سئوٽ شامل، ٻن فوتين جي سڃاڻپ نه ٿي سگهي حادثي واري هنڌ فوج جا جوان پهچي فوتين ۽ زخمين کي سول اسپتال مڪلي پهچايو سول اسپتال مڪلي ۾ ايمرجنسي لاڳو ڪئي ويئي اسپتال ۾ وارثن پاران روڄ راڙو قانوني قدم کڻي بس ۽ /ڏسو صفحو 3 بقايا نمبر 50

وين ڊرائيور خلاف ڪيس داخل ڪيو ويندو ايس ايس پي ٺٽو جي وارثن کي يقين ڌياني خبر موجب گجو لڳ هاليجي لنڪ روڊ تي ڪراچي کان جاتي ويندڙ بابو جان بس نمبر J-A 2186  کي ڪراچي کان بدين ويندڙ تيز رفتار وين نمبر R-7791  پٺيان کان بس کي زوردار ٽڪر هڻي وڌو جنهن جي نتيجي ۾ وين ۾ سوار 5 ڄڻا موقعي تي فوت ٿي ويا آهن فوتين ۾ سجاول لڳ ٻيلو شهر جا رهواسي ٻه سئوٽ انور علي ولد آچار ولڙو، حضور بخش ولد ناٿو ولڙو شامل آهن جڏهن ته ڳولاڙچي جو رهائشي علي بخش ولد مولا بخش لغاري فوتين ۾ شامل آهن جن جا لاش سڃاڻپ کان پوءِ وارثن حوالي ڪيا ويا آهن جڏهن ته فوتين ۾ ٻن ڄڻن جي سڃاڻپ نه ٿي سگهي هئي جن جا لاش آخري اطلاعن تائين مڪلي جي سول اسپتال ۾ پيل رهيا ٻئي طرف حادثي ۾ 10 سالا ٻارڙو ڪراچي جي قائد آباد جي رهائشي عاقب سندس پيءُ مختيار احمد ۽ سندس ڏاڏو نور مصطفيٰ شامل آهن جن مان نور مصطفيٰ جي حالت ڳڻي جوڳي هئي ٽنهي زخمين کي ڪراچي نيو ويو آهي جڏهن ته باقي زخمين ۾ ايوب مجاهد پٺاڻ،حاجي سلام، گل محمد،منور سعيد ۽ ٻيا شامل آهن حادثي جو اطلاع ملڻ کانپوءِ فوج جي جوانن، ايڌي جي رضاڪارن گجو شهر۽ آس پاس جي ڳوٺاڻن واقعي واري هنڌ پهچي فوتين ۽ زخمين کي سول اسپتال مڪلي ۽ گهارو رورل هيلٿ سينٽر پهچايو جڏهن ته  8 زخمين کي رورل هيلٿ سينٽر گهارو پهچايو ويو آهي ٻئي طرف ٺٽي جي سول اسپتال مڪلي ۾ ايمرجنسي لاڳو ڪري ڊاڪٽرن جون موڪلون رڌ ڪيون ويون ۽ سيڪيورٽي جا سخت انتظام ڪيا ويا هئا جڏهن ته لاش کڻڻ وقت اسپتال ۾ روڄ راڙي جا منظر ڏسڻ ۾ آيا وارث اسپتال جي ڀتين سان ٽڪر هڻي پنهنجي پيارن لاءِ رڙيون ڪندا رهيا هوڏانهن ايس ايس پي ٺٽو فدا حسين مستوئي ۽ ٺٽي جي سياسي سماجي ڌريون سول اسپتال مڪلي پهچي زخمين جي عيادت ڪئي ۽ فوتين کي وارثن حوالي ڪرڻ ۾ مدد ڪندا رهيا. ان موقعي تي ايس ايس پي ٺٽو چيو ته ڪراچي ۽ ٺٽو کان 49 ڪلوميٽرن تائين جي رستي جي تعمير هلندڙ آهي جنهن ڪري حادثو پيش  آيو آهي اعليٰ اختياريون روڊ جي فوري تعمير لاءِ جلد اپاءُ وٺن هن چيو ته ڏکوئندڙ واقعو آهي فوتين ۽ زخمين سان دلي همدردي جو اظهار ڪريا ٿو ۽ وارثن کي انصاف ڏيڻ لاءِ وين ۽ بس جي ڊرائيورن جي خلاف ڪيس داخل ڪري وڌيڪ جانچ ڪئي ويندي.