تازيون خبرون

Daily Archives: August 16, 2017

عوام جي خدمت مشن آهي، هر رڪاوٽ ختم ڪري اڳتي وڌائينداسين: نواز شريف

لاهور  (اين اين آءِ) مسلم ليگ نون جي اهم غير رسمي مشآورتي اجلاس جاتي امراهه ۾ ڪوٺايو ويو جنهن ۾ پارٽي جي تنظيم سازي تڪ اين اي 120 جي ننڍي چونڊ پارٽي جي آئندا جي لائحه عمل سيمت گڏيل صورتحال تي ڳالهيون ڪيون ويون، اجلاس ۾ اڳوڻي وزيراعظم نوازشريف، پنجاب جي گورنر ملڪ محمد رفيق رڌوانا، پنجاب جي وڏي وزير، اسپيڪر سردار ايازصادق، خواجا محمد آصف، حمزا شهباز، احسن اقبال ، زاهد حامد، پرويز رشيد ۽ ٻين شرڪت ڪئي اجلاس ۾ نوازشريف جي آئينداجي سرگرمين  بابت ڳالهيون ڪيون وييون ۽ فيصلو ڪيو ويو ته ان سلسلي ۾ اڳواڻن ۽ ڪارڪنن جي وڌيڪ صلاح سان آخري فيصلو ٿيندو.ان موقعي تي پارٽِي جي تنظيم سازي بابت به ڳالهه ٻول ٿي جڏهن تڪ 120 جي چونڊ مهم جي حوالي سان تجويزن تي به غور ڪيو ويو. ان موقعي تي نوازشريف جو چوڻ هو ته نون ليگ جي حڪومت ملڪ کي معاشي طور تي صحيح وقت ۾  آندو آهي. عوام جي خدمت مشن آهي ۽ هر رڪاوٽ کي ختم ڪري انکي اڳتي وڌائينداسين، هن چيو ته اسلام آباد کان لاهور جي سفر دوران عوام جھڙي طرح محبت ڏني انکي فراموش نه ڪري سگھندس. پاڪستان ۽ عوام جي ترقي جي ايجنڊي کي هر صورت ۾ اڳتي وڌائيندس، اجلاس کانپوءِ سردار اياز صادق ميڊيا سان ڳالهائيندي چيو ته سڄو پاڪستان نوازشريف جي آجيان ڪرڻ لاءِ تيار اهي. هن چيو ته نوازشريف منهنجي دل ۾ اڃان تائين وزيراعظم آهي. ان لاءِ وزيراعظم نوازشريف جو لفظ منهنجي منهن بار بار وزيراعظم نڪري ٿو. اجلاس بابت هڪ سوال جي جواب ۾ اسپيڪر چيو ته ڪڏهن ڪنهن اداري سان تڪرار جي ڳالهه نه ڪئي آهي. پاڪستان جي هر ڪنڊ نوازشريف جي آجيان تيار آهي نوازشريف هر هنڌ ويندو. آئين ۾ ترميم جي حوالي سان آپوزيشن جي تنقيد کي رد ڪندي اسپيڪر چيو ته جيڪو ٿيڻو هو اهو ٿي چڪو آهي هاڻي اڳتي ڏسڻو آهي هن ٻڌايو ته جمعي ۽ خميس اليڪشن سڌارن واري بل جي حوالي سان ملاقات ٿيندي جنهن لاءِ 125 اجلاس ٿي چڪا آهن، سينيٽر آصف ڪرماڻي ميڊيا سان ڳالهائيندي چيو ته اڄ جي اجلاس ۾62 ۽ 63 جي حوالي سان ڪابه ڳالهه نه ٿي اسان بار بار چئي چڪا آهيون ته عدليا جو احترام ڪيون ٿا، نوازشريف عوامي اڳواڻ ۽ ملڪ جو ٽي ڀيرا وزيراعظم رهي چڪو آهي. هن چيو ته نوازشريف عدليا کي چيلينج ناهي ڪيو پر هو عدليا جو احترام ڪري ٿو. نوازشريف ڪنهن به موقعي تي ڪنهن اداري جو نالو نه ورتو پر سازش جو ضرور ذڪر ڪيو آهي ۽ وقت اچڻ تي هو خود ٻڌائيندو، هن چيو ته اجلاس ۾ اين اي 120 جي ننڍي چونڊ جي حوالي سان دوستن رائي ڏني آهي جنهن  تي ڳالهه ٻول ٿي. آئندا وڌيڪ اجلاس ٿيندا جنهن ۾ وڌيڪ لائحه عمل جوڙيو ويندو.

 

تعليم جي شعبي ۾ ڪاميابي حاصل نه ڪرڻ جو اعتراف، بهتري ڏانهن وڃون پيا: مراد علي شاهه

ڪراچي(ويب ڊيسڪ/اين اين آءَ) سنڌ جي وڏي وزير سيد مراد علي شاهه چيو آهي ته پاڪستان کي درپيش چيلنجن جو حل تعليم ۾ آهي، خانگي شعبي جي شراڪتداري سان سنڌ ۾ تعليم جو معيار بهتر ٿيو آهي. هن اها ڳالهه اڄ اقراءَ يونيورسٽي جي تقريب کي خطاب ڪندي چئي. ان موقعي تي وڏي وزير سان گڏ سنڌ اسميبلي جو ميمبر سعيد غني ۽ ٻيا عملدار پڻ موجود هئا. وڏي وزير چيو ته تعليم صوبائي حڪومت جي پهرين ترجيح آهي، بجيٽ جو وڏو حصو تعليم تي خرچ ڪيو ويندو آهي. اسان تعليمي ايمرجنسي لڳائي آهي. هن چيو ته حڪومت تعليم جي شعبي ۾ ڪا وڏي ڪاميابي حاصل نه ڪري سگهي پر اسان بهتري ڏانهن وڃون پيا. هن چيو ته پاڪستان کي درپيش چيلنجن جو حل تعليم ۾ آهي جيڪڏهن اسان اعليٰ معيار جي تعليم فراهم ڪريون ته ملڪ جو مستقبل محفوظ هوندو. هن چيو ته سنڌ حڪومت جي ڪوشش آهي ته صوبي جي سرڪاري تعليمي ادارن ۾ معياري تعليم ڏني وڃي. هن چيو ته تعليم جي شعبي جو سڀ کان وڏو مسئلو ايليمنٽري ۾ آهي، نجي شعبي جي ڀاڱيواري سان سنڌ ۾ تعليم جو معيار بهتر ٿيو آهي. اسان تعليم جي معيار ۾ اضافي لاءِ پبلڪ پرائيويٽ پارٽنرشپ متعارف ڪرائي آهي. وڏي وزير يونيورسٽي جي انتظاميه ۽ چيئرمين جنيد لاکاڻي کي اقراءَ يونيورسٽي جو هارورڊ بزنس اسڪول سان معاهدي ڪرڻ تي مبارڪباد پيش ڪندي چيو ته اهو اقراءَ يونيورسٽي لاءِ وڏي اعزاز جي ڳالهه آهي. اقراءَ يونيورسٽي شروعات کان ئي معياري تعليم ڏني ۽ اقراءَ يونيورسٽي جو سنڌ ۾ تعليم جي ميدان ۾ اهم ڪردار رهيو آهي. اقراءَ يونيورسٽي گذريل ڪيترن ئي سالن کان بهترين ڪارناما انجام ڏنا. اڄ پڻ اقراءَ يونيورسٽي لاءِ تاريخي ڏينهن آهي. معياري تعليم جو فائدو فرد، ڪٽنب ۽ ملڪ کي ٿيندو آهي. هن وڌيڪ چيو ته هارورڊ بزنس اسڪول سان اقراءَ يونيورسٽي جو معاهدو نهايت اهم آهي. اقراءَ يونيورسٽي پنهنجي شاگردن کي عالمي معيار جي تعليم سان گڏ ايڇ بي ايڪس ڊگري ڏيندو. ايڇ بي ايڪس سرٽيفڪيشن سان عالمي معيار جي ڊگري اقراءَ يونيورسٽي کي پڻ ملندي. ان کان پهرين وڏي وزير يونيورسٽي جي مختلف شعبن جو دورو پڻ ڪيو. ٻئي طرف سنڌ جي وڏي وزير سيد مراد علي شاهه ڪمبائينڊ افليوئينٽ ٽريٽمينٽ پلانٽ ڪوٽڙي جي تڪميل لاءِ 63.781 ملين رپين جي منظوري ڏيندي صنعت واري کاتي کي هدايت ڪئي آهي ته اهي شهر ۾ ڪم ڪندڙ صنعتي يونٽن جي ڳڻپ ڪرائن ته جيئن ماحولياتي فائدن تي عملدرآمد کي يقيني بڻائي سگهجي. هن اها ڳالهه اڄ وزيراعليٰ هائوس ۾ افليوئينٽ ٽريٽنمينٽ پلانٽ بابت اجلاس جي صدارت ڪندي ڪئي. اجلاس ۾ صوبائي وزير پي اينڊ ڊي مير هزار خان بجاراڻي، صوبائي وزير ماحوليات محمد علي ملڪاڻي، چيئرمين پي اينڊ ڊي محمد وسيم، ايڊووڪيٽ جنرل سنڌ ضمير گهمرو، پرنسپل سيڪريٽري سهيل راجپوت، سيڪريٽري صنعت عبدالرحيم سومرو ۽ ٻين شرڪت ڪئي. سيڪريٽري صنعت عبدالرحيم سومري چيو ته سپريم ڪورٽ جي حڪم تي سائيٽ لميٽيڊ ڪمائينڊ افليوئينٽ پلانٽ ڪوٽڙي ڪانٽريڪٽر کان وٺي ڇڏيو آهي. سائيٽ ان کي فعال بڻائڻ لاءِ باقي رهيل ڪم ڪري رهي آهي. وڏي وزير چيو ته اليڪٽريڪل ۽ مڪينيڪل ڪم جي منظوريءَ بعد هن ان جي لاڳت لاءِ 63.781 ملين رپين جي منظوري ڏني آهي. ڪوٽڙي ٽريٽمينٽ پلانٽ جي باقي رهيل ڪمن بابت تفصيل ٻڌائيندي صنعت واري سيڪريٽري چيو ته سمورن ٽينڪُن جي صفائي ڪئي وئي آهي ۽ اهو ڪم هڪ ٻيو ڪانٽريڪٽر ڪري رهيو آهي. سپريم ڪورٽ جي حڪم تي عملدرآمد بابت ٻڌائيندي سيڪريٽري صنعت چيو ته مختلف صنعتن کي 1700 نوٽيس ۽ انهن جا رمائينڊر جاري ڪيا ويا آهن، اٽڪل 50 يونٽن جواب ڏنا آهن ۽ جيڪي ماڻهن اڃا جواب ڏيڻ ۾ ناڪام رهيا آهن انهن خلاف ضروري ڪارروائي عمل ۾ آندي ويندي. ڪمبائينڊ افليوئينٽ ٽريٽمينٽ پلانٽ (سي اِي ٽي پي) بابت هڪ سوال جي جواب ۾ هن چيو ته 5 سي اِي ٽي پي جي قيام جي حوالي سان 11390 ملين رپين جي منظوري عمل هيٺ آهي. سائيٽ وٽ 19 ايم جي ڊي ڊسچارج ڊزائين آهي، جنهن لاءِ 25 ايڪڙ ايراضي دستياب آهي ۽ ان تي 2.243 ملين رپيا لاڳت ايندي. ٽرانس لياري سي اِي ٽي پي جو ڊسچارج ڊزائين 27 ايم جي ڊي آهي، جنهن لاءِ 35 ايڪڙ ايراضي دستياب آهي ۽ ان جي لاڳت 3672 ملين رپيا آهن. ايف بي ايريا / نارٿ ڪراچي جو ڊسچارج ڊزئاين 12 ايم جي ڊي آهي ۽ 7 ايڪڙ زمين دستياب آهي ۽ ان تي 1590 ملين رپيا لاڳت ايندي. لانڍي / ڪورنگي سي اِي ٽي پي جو ڊسچارج 262 ايم جي ڊي آهي ۽ ان کي 35 ايڪڙ جي ايراضيءَ تي قائم ڪيو ويندو ۽ اٽڪل 3258 ملين رپيا لاڳت ايندي. هاءِ وي سائيٽ فيز ٽو جو ڊسچارج 10 ايم جي ڊي آهي ۽ 627 ملين رپين جي لاڳت سان 10.45 ايڪڙ ايراضي تعمير ڪئي ويندي. چيئرمين پي اينڊ ڊي محمد وسيم وڏي وزير کي برينفگ ڏيندي چيو ته 5 سي اِي ٽي پيز گدلاڻ کي قابو ڪرڻ ۽ صنعتي يونٽس لاءِ گهٽ لاڳت موئثر ٽريٽمينٽ پلانٽ جي قيام جي حوالي سان حڪومتي پاليسين تي عملدآمد ۾ مدد ڏيندا. هن چيو ته ان منصوبي سان وڏي صنعتي گدلاڻ واري پاڻي جي بي قائدگيءَ سان ٿيندڙ ڊسچارج کي ڪنٽرول ڪرڻ ۾ به مدد ملندي ۽ واٽر باڊي وصول ڪرڻ جي صورتحال به بهتر ٿيندي ۽ ان سان علائقي جي سماجي ۽ معاشي ترقي سان گڏوگڏ ماحول به بهتر ٿيندو. ماحوليات واري صوبائي وزير محمد علي ملڪاڻيءَ چيو ته سنڌ انوائرمينٽ پروٽيڪشن ايجنسي (اِي پي اي) فعال طرقي سان ڪم ڪري رهي آهي ۽ ان ۾ هن وقت تائين پاڻي جي معيار تي 37 رپورٽس جنريٽ ڪيون آهن. هن چيو ته انهن ٽيسٽ رپورٽ جي بنياد تي ڪارروائيءَ جي شروعات ڪئي وئي آهي. صوبائي وزير چيو ته اي پي اي جا 10 وڌيڪ آفيس کوليا پيا وڃن جنهن لاءِ فنڊ گهربل آهن ان تي وڏي وزير 100 ملين رپيا جاري ڪرڻ جي هدايت ڪئي. سيڪريٽري ماحوليات بقاءُ الله انڙ اجلاس کي ٻڌايو ته سنڌ انوائرمينٽل ٽربيونل سامهون 25 ڪيس پيش ڪيا ويا آهن. هن چيو ته 35 صنعتي يونٽن کي اِن هائوس ويسٽ واٽر ٽريٽمينٽ پلانٽس قائم ڪرڻ جي هدايت ڪئي وئي آهي ۽ گدلاڻ کي قابو ڪرڻ لاءِ انوائرمينٽل مئنيجمينٽ پلان (اِي ايم پي) تحت خاطر خواهه اپاءَ ورتا پيا وڃن. هن چيو ته اِي پي اي جي مداخلت بعد 125 صنعتي يونٽن پنهنجا ويسٽ واٽر ٽريٽمينٽ پلانٽ قائم ڪيا آهن. هن چيو ته ڪوٽڙي ۽ ڪورنگي ۾ چمڙي جي صنعتن پنهنجا 100 ٽريٽمينٽ پلانٽ لڳايا آهن جيڪي بهتر ريت ڪم ڪري رهيا آهن. هڪ سوال جي جواب ۾ هن چيو ته انوائرمينٽل پروٽيڪشن ايجنسيءَ اسپتالن ۽ صنعتن کي 127 خط لکيا آهن جن مان 100 خط پرسنل هائيرنگ لاءِ جاري ڪيا ويا آهن. وڏي وزير چيو ته شهر جي صنعتي علائقن ۾ مٽي جي اخراج جون رپورٽس آهن ان تي صوبائي ماحوليات واري وزير محمد علي ملڪاڻيءَ چيو ته 62 يونٽ آهن جيڪي ڪريشنگ ڪندا آهن، انهن خلاف ڪارروائي ڪئي پئي وڃي. هن چيو ته اي پي اي 2.2 ملين رپيا ڏنڍ جي مد ۾ 11 صنعتي يونٽن کان اي پي اي جي قائدن جي خلاف ورزي تي ورتا آهن. وڏي وزير صنعت ۽ ماحوليات کاتن کي هدايت ڪئي ته اهي صنعتي يونٽن ۾ ٽريٽمينٽ پلانٽ لڳائڻ کي يقيني بڻائڻ لاءِ گڏجي ڪم ڪيو وڃي. هن چيو ته اهو ڳنڀير مامرو آهي ۽ ان کي سنجيدگيءَ سان ورتو وڃي ۽ هر 15 ڏينهن اندر رپورٽ ڏني وڃي.

 

بلوچستان ڌماڪو، 6 ايف سي اهلڪار شهيد، 3 زخمي

هرنائي( ويب ڊيسڪ ) بلوچستان جي ضلعي هرنائيءَ ۾ ڌماڪي جي نتيجي ۾ 6 ايف سي اهلڪار شهيد ٿي ويا. هرنائيءَ ۾ شاهه برگ ويجهو شرپسندن  ايف سي جي گاڏيءَ کي تنهن وقت نشانو بڻايو جڏهن اها معمول موجب گشت ڪري رهي هئي. ڌماڪي جي نتيجي ۾ پيرا ملٽري فورسز جا 6 اهلڪار شهيد ٿي ويا  ۽ 3 زخمي ٿي پيا. ڌماڪي ۾ زخمي ٿيل ايف سي اهلڪارن کي فوري طور طبي امداد لاءِ ڪوئيٽا منتقل ڪيو ويو آهي.  ڌماڪي کان فوري پوءِ ايف سي ۽ ليويز اهلڪارن واقعي کي ڪڙو چاڙهي معاملي جي جاچ شروع ڪري ڇڏي آهي. ٻي طرف وزيراعظم شاهد خاقان عباسي ۽ بلوچستان جي وڏي وزير نواب ثناءَ الله زهري ڌماڪي جي شديد مذمت ڪندي جوابدارن کي فوري طور گرفتار ڪرڻ جي هدايت ڪئي آهي.

Share

 

 

دهشتگردي ڪيسن جي اشتهاري ڏوهارين جا نالا اي سي ايل ۾ وڌا وڃن: آءِ جي سنڌ

ڪراچي  (اين اين آءِ) سينيٽرل پوليس آفيس ڪراچي ۾ آءِ جي سنڌ اي ڊي خواجه جي صدارت ۾ اپيڪس فالو اپ اجلاس ٿيو، ان اجلاس ۾ امن امان جي صورتحال ۽ نيشنل ايڪشن پلان تي عملدرآمد جي قدمن جو تفصيلي جائزو ورتو ويو  ۽ وڌيڪ ضروري حڪم ڏنا ويا، اجلاس ۾ هيڊڪوارٽر سنڌ سکر، ميرپور خاص، حيدرآباد، بينظير آباد، لاڙڪاڻي سميت زونل ڊي آءِ جيز ڪراچي، ڊي آءِ جي ايڊمن ڪراچي، فنانس، ٽِي اينڊ ٽي کانسواءِ اي آءِ جي آپريشن به شرڪت ڪئي. انهن فرار ٿيل جوابدارن جي گرفتاري جي حوالي سان ڪارڪردگي جو جائزو وٺندي پوليس پروگريس تي عدم اطمينان جو اظهار ڪيو، اجلاس کي هدايتون ڏنيون ته اهڙن سمورن گرفتار جوابدارن جي مڪمل تفصيل تي ٻڌل هر 15 ڏينهن جي رپورٽ موڪلي وڃي ته جيئن پهرين مرحلي ۾ اشتهاري جوابدارن جا نالا اي سي ايل ۾ وجهڻ جا قدم کنيا وڃن. هن چيو ته نيشنل ايڪشن پلان تي ان جي روح موجب عملدرآمد کي يقيني بڻايو وڃي، هن سمورن ڊي آءِ جيز کي حڪم ڏنا ته فورٿ شيڊول لسٽ جو نئين سر جائزو ورتو وڃي، هن ايس ايس پيز کي چيو ته فورٿ شيڊول ماڻهن کي طلب ڪري انهن جي خود تفصيل وٺن، جڏهن ته سمورا ايس ايڇ اوز، واسطيدار فورٿ شيڊول لسٽ جي ماڻهن کي هر هفتي ۾ ٿاڻي تي طلب ڪن، جيڪڏهن ڪير تعاون نٿو ڪري ته ان جي رپورٽ سي ٽي ڊي کي ڏني وڃي ته جيئن انهن جا بينڪ اڪائونٽ ڪلوزي ۽ نالا اي سي ايل ۾ وجهڻ جا قدم کنيا وڃن، هن حڪم ڏنا ته سنڌ ۾ قائم سمورن مزارن جي سيڪيورٽي جي آڊٽ ڪئي وڃي، هن وڌيڪ چيو ته سمورا ايس ايڇ اوز وقت تي صبح نائين وڳي بينڪن جي وزٽ ڪن ۽ بينڪن جي اي ٽي ايم جي اندر ۽ ٻاهر سي سي ٽي وي ڪيمرائن کي چيڪ ڪن ۽ بينڪ انتظاميا کي بينڪ سيڪيورٽي مينيوئل تي عملدرآمد جو پابند بڻائين ته جيئن بينڪ رابري کي ختم ڪرڻ وارن قدمن کي وڌيڪ بهتر بڻائي سگهجي، هن پوليس ڪلنگ تي ڳڻتي جو اظهار ڪندي شهيد اهلڪارن جي ڪيسن ۾ هن وقت تائين ٿيندڙ جاچ ۾ اڳڀرائي کي موثر ۽ مضبوط بڻائيندي ملوث دهشتگردن جي گرفتاري يقيني بڻائي وڃي.

ٻئي طرف  ايم ڪيو ايم جي دور ۾ ڪير ڪهڙي عهدي تي سنڌ پوليس ۾ ڀرتي ٿيو، سي ٽي ڊي مڪمل جاچ لاءِ ڪراچي پوليس کي خط لکي ڇڏيو، سي ٽي ڊي ذريعن موجب اسڪرونٽي جي درخواست ٽارگيٽ ڪلر رضوان جي انڪشافن تي ڪئي وئي جنهن کي گذريل مهيني ساٿين سميت گرفتار ڪيو ويو هو، ٽارگيٽ ڪلر رضوان سنڌ پوليس ۾ ڪانسٽيبل جي حيثيت سان ڊيوٽي ڪري رهيو هو، جوابدار ساٿين سان گڏ پوليس اهلڪارن سميت ڪيترن ئي ماڻهن کي ٽارگيٽ ڪلنگ جو نشانو بڻايو، ذريعن موجب جوابدار سائوٿ آفريڪا سيٽ اپ کان هدايتون ملڻ تي ڪلنگ ڪندو هو، سي ٽي ڊي ذريعن موجب 2002 کان 2013 تائين پوليس ۾ ڀرتين جو رڪارڊ چيڪ ڪيو ويندو، 2002 کان 2007 تائين گهرو وزارت ايم ڪيو ايم وٽ هئي، جڏهن ته 2008 کان 2013 تائين حڪومت ۾ متحده ٻيهر پنهنجا ڪارڪن ڀرتي ڪرايا، سي ٽي  ذريعن موجب ايم ڪيو ايم اٽڪل 2 هزار 2 ويجهو پنهنجي ڪارڪنن کي ڀرتي ڪرايو جنهن ۾ هر سيڪٽر مان 50 کان 60 ڪارڪن شامل هئا، ٽارگيٽ ڪلر رضوان جي جي آءِ ٽِي کانپوءِ ٻيهر اسڪرونٽي جو فيصلو ڪيو ويو آهي.

 

وفاق جي انتظام هيٺ قبائلي علائقن ۾ تعميري تبديلي حڪومت جي ترجيح آهي: وزيراعظم

اسلام آباد (اين اين آءِ) وزيراعظم شاهد خاقان عباسي چيو آهي ته وفاق جي انتظام هيٺ قبائلي علائقن ۾ تعميري تبديلي حڪومت جي ترجيح آهي، فاٽا کي قومي ڌاري ۾ آڻڻ جا خواهشمند آهيون، سمورن سماجي شعبن ۾ فاٽا جي رهواسين سان هڪجهڙو ورتا ڪيو ويندو، هو اڱاري تي فاٽا سان تعلق رکندڙ سينيٽ جي ميمبرن سان ڳالهائي رهيو هو، وزيراعظم آفيس ۾ ان سان ملاقات ڪندڙ سينيٽرز ۾ هدايت الله، حاجي مومن آفريدي، اورنگزيب، سجاد حسين طوري ۽ ٻيا شامل هئا، فاٽا جي سينيٽر وزيراعظم کي عهدو سنڀالڻ تي مبارڪ ڏني، هن چيو ته تبديلي اسان جي حڪومت جي ترجيح آهي، وزيراعظم چيو ته فاٽا ۾ تبديلي جي گهڻي ضرورت آهي، موجوده حڪومت پاران ان ڏس ۾ پهريائين قدم کنيا ويا آهن ۽ ڌرين جي صلاح سان قانوني سڌارن سان گڏ فاٽا جي معاملن ۾ تعميري تبديلي کي ترجيح ڏني پئي وڃي، هن چيو ته صحت، تعليم ۽ سماجي شعبن ۾ بهتري لاءِ فاٽا لاءِ وڌيڪ وسيلا رکيا ويندا، وزيراعظم چيو ته هو جلد فاٽا جو دورو پڻ ڪندو.

 

آئيني ادارن کي حق ڏنا وڃن، تڪرار کان بچڻو پوندو: رضا رباني

اسلام آباد (ويب ڊيسڪ) سينيٽ جي چيئرمين رضا رباني چيو آهي ته آئين جي تحفظ ۽ پاسداري جي لاءِ قوم کي گڏ ٿيڻو پوندو. ميڊيا سان ڳالهين دوران هڪ سوال جي جواب ۾ رضا رباني چيو ته آئين جي تحفظ ۽ پاسداري جي لاءِ قوم کي گڏ ڪرڻو پوندو، پارليمان عوامي امنگن جي ترجمان آهي ۽ جمهوريت جي مضبوطي ۾ پارليمان جو ڪليدي ڪردار آهي. اڄ تجديد عهد جو ڏينهن آهي ۽ وفاق کي مضبوط بڻائي ملڪ کي عظيم بڻائڻو آهي. اسان کي ان عهد جي تجديد به ڪرڻي پوندي ته آئيني ادارن کي ان جا صحيح حق ڏنا وڃن ۽ تڪرار جو رستو اختيار ڪرڻ کان سواءِ ملڪ کي ترقي ۽ خوشحالي تي گامزن ڪرڻو پوندو. سينيٽ چيئرمين وڌيڪ چيو ته اسان تاريخ جي اهڙي هنڌ تي بيٺا آهيون جتي اسان کي ادارن تحت تڪرار کان بچڻو پوندو جيڪڏهن اسان اڄ به دانشمنداڻو فيصلو نه ڪيو ته تاريخ اسان کي ڪڏهن به معاف نه ڪندي.

 

ايئرپورٽ تي ڪنهن کي پروٽوڪول نه ڏنو ويندو: وفاقي گهرو وزير جو حڪم

اسلام آباد (ويب ڊيسڪ): وفاقي گهرو وزير احسن اقبال سڄي ملڪ جي ايئرپورٽس تي پروٽوڪول ڏيڻ تي پابندي لڳائيندي ايف آءِ اي کي حڪم جاري ڪري ڇڏيو آهي، جڏهن ته سندس خصوصي حڪم تي ڊائريڪٽر اميگريشن سڄي ملڪ جي ايف آءِ اي زونز کي خط لکي ان پابندي تي فوري عملدرآمد ڪرڻ جون هدايتون جاري ڪري ڇڏيون آهن، ايف آءِ اي سڄي ملڪ جي ايئرپورٽس تي پروٽوڪول ڏيڻ تي پابندي لڳائي ڇڏي، ڊائريڪٽر اميگريشن سڄي ملڪ جي ايف آءِ اي زونز کي خط لکي ان پابندي کان آگاهه ڪري ڇڏيو آهي، پروٽوڪول ڏيڻ تي پابندي وفاقي گهرو وزير احسن اقبال جي حڪم تي لڳائي وئي آهي، ڊائريڪٽر اميگريشن جي خط موجب ڪو به آفيسر ڪنهن ڪائونٽر تي مسافر کي پروٽوڪول ڏيندي نه ڏٺو وڃي نه ته پروٽوڪول ڏيڻ تي اميگريشن جي عملي کي معطل ڪيو ويندو، خط ۾ ايف آءِ اي جي عملي کي آگاهه ڪيو ويو آهي ته پرڏيهه ويندڙ مسافرن کي هراسان ڪرڻ تي به ڪارروائي ڪئي ويندي، ان کانسواءِ اميگريشن ڪائونٽر تي سي سي ٽي وي ڪيمرائن سان لازمي مانيٽر ڪيو وڃي، اهلڪارن جي مانيٽرنگ ۽ سڃاڻپ سي سي ٽي وي ڪيمرائن سان ڪئي ويندي، جڏهن ته پروٽوڪول ڏيڻ تي عملي ۽ شفٽ انچارج خلاف به ڪارروائي ٿيندي.

 

پيپلز پارٽي پورهيتن جي درسگاهه، پيار امن ۽ ترقي جي پارٽي آهي: ناصر حسين شاهه

ڪراچي(اسٽاف رپورٽر) اطلاعات، پورهئي، ٽرانسپورٽ ۽ ماس ٽرانزٽ سيد ناصر حسين شاهه چيو آهي ته پيپلز پارٽي پيار امن ۽ ترقي جي پارٽي آهي، جتي انسان کي پيار، امن ۽ ترقي ملي ٿي، ڇو ته هو عوام کي خدمت ڪرڻ واري پارٽي جو حصو بڻجي ٿو. اهڙن خيالن جو اظهار هن اڄ 70هين جشن آزادي جي تقريب جي سلسلي ۾ پاڪستان پيپلز پارٽي ۽ بلاول لورز آرگنائيزيشن (بي ايل او) جي چيئرمين، سنڌ ڪونسل جي ميمبر ۽ پي ايس 252 لاءِ اميدوار اصغر بهاري پاران پيپلز سيڪريٽريٽ ۾ ڪيڪ ڪٽڻ واري تقريب کي خطاب ڪندي ڪيو. تقريب ۾ پاڪستان پيپلز پارٽي جي مقامي اڳواڻڻ سليم سومرو، راڻا غفران سميت ڪارڪنن جي وڏي تعداد شرڪت ڪئي. ان موقعي تي خطاب ڪندي صوبائي وزير اطلاعات سيد ناصر حسين شاهه وڌيڪ چيو ته اڄ اسان جشن آزادي وڏي جوش ۽ جذبي سان ملهائي رهيا آهيون. پيپلز پارٽي پورهيتن جي درسگاهه آهي ۽ ان جو ثمر آهي ته مختلف پارٽين مان شخصيتون عوامي پارٽي ۾ محبت ۽ امن جي پيغام کي پکيڙڻ لاءِ شموليت اختيار ڪري رهيون آهن. تقريب کي اصغر بهاري، سليم سومرو ۽ متحده قومي موومينٽ ڇڏي پاڪستان پيپلز پارٽي ۾ شموليت ڪندڙ عمر گوگا ۽ ٻين به جشن آزادي کي خطاب ڪيو ۽ شهيدن لاءِ مغفرت جي دعا ڪندي 70هين جشن آزادي جو ڪيڪ ڪاٽيو. ٻئي طرف صوبائي وزير سيد ناصر حسين ڪراچي پريس ڪلب جي جشن آزادي فيسٽول ۽ فن گالا تقريب کي خطاب ڪندي چيو ته اڄ پوري قوم زرو شور سان جشن آزادي جون تقريبون منعقد ٿي رهيون آهن. ڪراچي وارن سڀني کان وڌيڪ خوشي جو ڏينهن آزادي جو ڏينهن سهڻي نموني ملهائي زندهه قوم جو ثبوت ڏنو آهي. زندهه قومون پنهنجن بزرگن ۽ محسنن جي قربانين کي ياد رکن ٿيون. زندگي ۾ ڪم ڪرڻ ۽ ملڪ ۽ قوم جي ترقي لاءِ پنهنجون زندگيون وقف ڪرڻ تمام وڏو ڪم آهي. الله تعاليٰ اسان جي ملڪ پاڪستان کي شاد ۽ آباد، قائم دائم رکي ۽ اهڙيون خوشيون سالن تائين ملهائيندا رهون. هن فيسٽيول ۾ مختلف پروگرامن ۽ سرگرمين ۾ حصو وٺندڙ ٻارڙن ۾ انعام ۽ شيلڊز به ورهايا. ان کان اڳ پريس ڪلب جي صدر سراج احمد ۽ سيڪريٽري مقصود يوسفزئي پروگرام جي مقصد جي باري ۾ آگاهي ڏني ۽ پريس ڪلب جي ميمبرن ۽ خاندان جي سرگرمين ۾ دلچسپي جي حوالي سان انهن کي شامل قدم رهڻ لاءِ ترغيب ڏني ۽ جشن آزادي جي تقريب ۾ ڀرپور حصو وٺڻ تي زور ڏنو ۽ چيو ته آزادي کي قائم رکڻ لاءِ پنهنجو ڪردار ادا ڪن.  مختلف پروگرامن ۽ سرگرمين ۾ ڪامياب ٿيندڙ ٻارن ۽ نوجوانن کي شيلڊ ۽ انعام ڏنا ويا، جنهن ۾ ملي نغمن سميت محمد عمر، ذوالفقار، عبدالرزاق، عادل حسين، ڪنور عارف هاشمي، فاطمه، عبيري، احسن لاشاري ۽ ٻين کي مبارڪون ڏنيون. ان موقعي تي اڳوڻي صدر پريس ڪلب عارف هاشمي، فاضل جميلي، اي ايڇ خانزاده، خورشيد عباسي، شمس ڪيريو، ضياءُ قريشي، شڪيل حسنين، حاجي الطاف مجاهد ۽ سينيئر صحافين ۽ سندن خاندان به تقريب ۾ موجود هئا.

 

پاڪستان جي حفاظت ڪرڻ اسانجو ايمان آهي هن ڌرتي کي هڪ صالح نظام جي ضرورت آهي : سراج الحق

ٽيڪسلا (اين اين آءِ) پاڪستان جي حفاظت اسانجو ايمان آهي هن ڌرتي کي هڪ نيڪ نظام جي ضرورت آهي. قوم انگريزي استعمال جي غلامي قبول ڪرڻ جي لاءِ تيارنه آهي، ڪرپشن ڪوڙ ڌانڌلي جو خاتمو ئي اسانجي ڪاميابي ۽ ترقي جو رستو آهي، اسان پاڪستان کي امن ۽ سلامتي جو خطو بنائڻ چاهيون ٿا، ڪرپشن جي خلاف اسانجي تحريڪ جو مقصد عوام جي بنيادي تحريڪ جو مقصد آهي جيڪي ڪرپٽ ماڻهن جمهوريت ۽ سياست جي آڙ ۾ غضب ڪري ويٺا آهن. آئين کي پنهنجي مرضي خواهش موجب بنائيندڙ جمهوريت جا دشمن آهن، 62 ۽ 63 جي خاتمي جي ڪوشش هڪ خطرناڪ غلطي هوندي، اهڙن خيالن جو اظهار جماعت اسلامي جي امير سينيٽر سراج الحَق ٽِڪسلا ۾ جماعت اسلامي ج ضلعي اڳوان شمس الرحمان سواتي جي پٽ جي دعوت جي وليمي جي شرڪت تي اين اين ائي جي صحافي سان ڳالهائيندي ڪئي. شمس الرحمان سواتي جي پٽ جي شادي  تي مبارڪ ڏيندي چيو ته اولهندي طاقتون پاڪستان ۾ نظآم تبديلي نه ٿيون چاهين هو ان ڪرپٽ نظآم کي مضبوط ڪرڻ لاءِمختلف طريقا اختيار ڪري رهيا آهن. هن چيو ته ستر سال گذري ويا. پر اسان پاڻ کي اڃان تائين سنڀالي نه سگھِياسين ڇو ته انگريز هليو ويو پر هڪ اهڙو نظام ڇڏي ويو جنهن پاڪستان جي ترقي جا رستاروڪي ڇڏيا آهن، هن چيو ته نوازشريف پاڻ کي سوڙهي گھٽي ڏانهن بند ڪري رهيو آهي اسانکي جنگ نوازشريف يا ڪنهن ماڻهون جي خلاف نه اسانجي جنگ ڪنهن سياسي پارٽي جي خلاف نه پر اسان سڀني جي احتساب جو  مطالبو ڪيو آهي اسان جنرلن، ججن ۽ سمورن سياسي قيادت جو احتساب جو مطالبو ڪيو، سڀ کان اڳ اسان پاڻ کي احتساب لاءِ پيش ڪيون ٿا، هن چيو ته پاڪستان جي عوام امن ۽ سڪون جي زندگي ڇاهي ٿي. هميشا انجي صبر جو امتحان ورتو ويو ۽ انهن جي خوابن کي مٽي ۾ ملايو ويو، جمهوريت جي نالي انهن جي جذبن سان کيڏيو ويو هي ڪهڙو جمهوري نظام آهي جنهن ۾ عوام کي انجا بنيادي حق ئي نه ملي سگھن. هن چيو ته جماعت  اسلامي پاڪستان جي عوام جي حقن جو تحفظ ۽ اهڙي ڪرپٽ نظام جي خاتمي جي لاءِ عملي جدوجھد جاري رکندي.

 

پاڪستان کي ڪرپشن، ظلم کان بچائڻ لاءِ پنجاب جي عوام کي اٿڻو پوندو: عمران خان

اسلام آباد (ويب ڊيسڪ): عمران خان سان شيخوپوره جي مشهور سياسي شخصيتن ملاقات ڪئي آهي،ملاقات ڪندڙن ۾ شفقت رسول گهمن ۽ افتخار رسول گهمن شامل آهن، شفقت رسول ۽ افتخار رسول گهمن تحريڪ انصاف ۾ شموليت جو اعلان ڪري ڇڏيو، ان موقعي تي پي ٽي آءِ چيئرمين عمران خان گهمن ڀائرن کي پي ٽي آءِ ۾ شموليت تي ڀليڪار ڪيو، عمران خان چيو ته پاڪستان کي ڪرپشن، ظلم کان بچائڻ لاءِ پنجاب جي عوام کي اٿڻو پوندو، هن چيو ته پنجاب تبديلي جو مرڪز بڻجي چڪو آهي، پنجاب جو عوام آئين، رياست تي حملو ناڪام ڪرڻ تي تحسين جو مستحق آهي، عمران خان چيو ته پاڪستان تاريخ جي اهم موڙ تي بيٺل آهي.