تازيون خبرون

Daily Archives: August 12, 2017

اداڪار سيتارام ڪينسر سان وڙهندي زندگي جي جنگ هاري ويٺو

نئي دهلي (شوبز نيوز) فلمن ۾ معاون ڪردار نڀائڻ وارو اداڪار سيتارام پنچل ڪينسر سان جنگ وڙهندي وڙهندي زندگي جي جنگ هارائي ويٺو، سيتارام پنچل گذريل ٽن سالن کان ڪينسر جھڙي موذي مرض جو شڪار هو، سيتار ام باليووڊ ۾ 1994 ۾ بنڊٽ ڪوئين جي ذريعي قدم رکيو. ان جون قابل ذڪر فلمون جولي ايل ايل بي، پيپلي لائيو، سلم ڊاگ ملينيئر، دي ليجنڊ آف ڀڳت سنگھه ۽ پان سنگھه ٽو مر شامل آهن. سيتارام گھڻو هلڪن ڦلڪن ڪردارن ۾ نظر ايندو هو ۽ هو ڪافي پريشانين جو شڪار هو ان جي لاءِ فيس بڪ جي ذريعي امداد جي لاءِ اپيل ڪئي هئي جنهن تي ان جي ڪنهن به اداڪار مدد نه ڪئي ڊاڪٽرن جي مطابق سيتارام پنچل ڦڦڙن جي ڪينسر ۾ مبتلا هيو.

 

توهان جو رويو بهتر آهي ته توهان لاءِ فلم انڊسٽري سُٺي جاءِ آهي: جيڪلين فرنانڊيز

ممبئي(شوبز نيوز)بالي ووڊ جي ناليواري اداڪارا جيڪلين فرنانڊيز جو چوڻ آهي ته جيڪڏهن توهان کي پنهنجو پاڻ مٿان اعتماد آهي ۽ توهان جو رويو بهتر آهي ته فلم انڊسٽري توهان جي لاءِ محفوظ جاءِ آهي، فلم ”ڪِڪ، رئوئي ۽ هائوس فل“ جي سيريز ۾ ڪم ڪرڻ واري سري لنڪا سان تعلق رکندڙ اداڪارا جيڪلين فرنانڊيز بالي ووڊ فلم انڊسٽري ۾ پنهنجا ۸ سال مڪمل ڪري ورتا آهن، فلم انڊسٽري ۾ ٻاهران ايندڙ ڪيترين ئي اداڪارائن جو چوڻ آهي ته فلم انڊسٽري ۾ دوست ٺاهڻ تمام مشڪل ڪم آهي، پر بي بي سي سان ڳالهائيندي جيڪلين ان موقف کي رد ڪري ڇڏيو آهي، جيڪلين جو چوڻ آهي ته فلم انڊسٽري ۾ دوست ٺاهڻ آسان آهي، توهان جون پريشانيون، فڪر، عدم تحفظ ۽ جدوجهد سڀ هڪ جهڙيون ئي هونديون آهن، جنهن تي توهان کي هڪ ٻئي سان ڳالهائڻ گهرجي، هن جو چوڻ هو ته اسان سڀ پنهنجي پنهنجي جاءِ ٺاهڻ جي ڪوشش ڪري رهيون آهيون، ڪاميابي سان گهڻو ڪجهه لاڳاپيل هوندو آهي، جنهن سان منهن ڏيڻو پوندو آهي، جيڪڏهن توهان جو رويو بهتر آهي ته فلم انڊسٽري بهترين جاءِ آهي

 

ڀارتي وومين ڪرڪيٽر سشما ورما کي ڊي ايس پي جي نوڪري ملي وئي

نئين دهلي(اسپورٽس نيوز) ڀارت جي وومين ڪرڪيٽ ٽيم جي رانديگرياڻي سشما ورما کي ورلڊ ڪپ ۾ شاندار ڪارڪردگي جي مڃتا طور هماچل پرديش رياست ۾ ڊي ايس پي مقرر ڪيو ويو آهي. هماچل پرديش جي وزيراعليٰ وير بهادر سنگهه ڪرڪيٽر سشما ورما کي پوليس کاتي ۾ ڊي ايس پي طور مقرريءَ جو آرڊر ڏنو ۽ ۵ لک رپيا انعام سان پڻ نوازيو. ان موقعي تي سشما وزيراعليٰ جا ٿورا مڃيندي چيو ته پوليس کاتي ۾ نوڪري ڪرڻ سندس ننڍپڻ جو خواب رهيو آهي.

 

راجر فيڊرر مونٽريال ٽينس ٽورنامينٽ جي ٽئين رائونڊ ۾ پهچي ويو

مونٽريال(اسپورٽس نيوز) ڪئنيڊا جي شهر مونٽريال ۾ هلندڙ ٽينس ٽورنامينٽ جي ٻئي مرحلي ۾ ومبلڊن چئمپين راجر فيڊرر ڪئنيڊا جي رانديگر پيٽر ڪوهرا کي شڪست ڏئي اڳئين مرحلي ۾ پهچي ويو آهي. راجر فيڊرر مئچ جو پهريون سيٽ ۲ڏ٦ تان پنهنجي نالي ڪيو ۽ ٻئي سيٽ ۾ به هو پنهنجي مخالف رانديگر خلاف ڇانيل رهيو. پيٽر ڪوهرا کي ٻئي سيٽ ۾ ۱ڏ٦ تان ناڪامي جو منهن ڏسڻو پيو، شاندار فتح بعد راجر فيڊرر ٽئين مرحلي لاءِ ڪواليفاءِ ڪري ورتو آهي

 

سنڌ ۾ ڌارين جي لوڌ کي ملندڙ سڃاڻپ: صاحب خان ڀٽي

گذريل ڪيتري ئي عرصي کان سنڌ ۾ ڌارين جي لوڌ جي آمد جو سلسلو جاري آهي،  جنهن سبب سنڌ جي آبادي ڏينهون ڏينهن وڌندي پئي ۽ مسئلا به وڌندا پيا وڃن پر افسوس جو ڪامورا ڪجهه ووٽن خاطر سنڌ ۾ ڌارين جي لوڌ کي روڪڻ لاءِ ڪي به قدم نه کڻي رهيا آهن،  جنهن سبب  سنڌ اندر ڌارين جي آبادي  ۾ اضافو ٿي رهيو آهي. افغانستان ۾ جنگ هجي يا ڪنهن ٻي علائقي ۾ آپريشن سڄي لوڌ جو رخ صرف سنڌ ڏانهن ئي ڪيو ويندو آهي، ڪجهه عرصو اڳ جڏهن ڌارين جي لوڌ خلاف سنڌ ۾ قومپرست پاران آواز اٿاريو ويو ته سنڌ سرڪار توڙي وفاقي سرڪار انهن جو آواز دٻائڻ لاءِ  انهن خلاف ڪارروايون ڪيون ويون ۽ قومپرست پارٽين جي ڪيترن ئي ڪارڪنن کي گرفتار ڪري احتجاج جو سلسلو روڪرايو ويو، هن وقت ڪراچي ۾ جيتري ڌارين جي لوڌ موجود آهي، شايد ملڪ جي ڪنهن ٻئي شهر ۾ اهڙي صورتحال هوندي،

جڏهن به سنڌ اندر ڌارين  جي آبادڪاري کي روڪڻ لاءِ احتجاج شروع ٿيا ته  سنڌ مان چونڊيل هر هڪ  نمائندي ان جي مخالفت ڪئي، خبر ئي نه ٿي پئي ته چونڊيل نمائندا اقتدار ۾ اچي اکيون الائي ڇو ڦيري ڇڏيندا آهن. اڄ  سنڌ جو ڪو به اهڙو شهر نه بچيو آهي، جتي غير ملڪي ترسيل نه هجن،  مختلف شهرن ۾  افغان شهري توڙي برمي، بهاري، بنگالي ۽ ٻيون کوڙ  قومون ترسيل آهن، اهو ئي سبب آهي جو اڄ سنڌ اندر بک، بدحالي ۽ بيروزگاري عروج تي پهتل آهي، سنڌ جي وسيلن جي ڦرلٽ  ۽ ڌاريلن جي آبادڪاري جو سلسلو به جاري آهي. سنڌ جا ماڻهو بک ۽ بدحالي سبب آپگهات ڪرڻ تي مجبور آهن پر هتان جي حڪمرانن جي ڪن تي جونءَ به نٿي چري.

جيڪڏهن ڪو ماڻهو ڪنهن ڪاموري کي ان بابت ايوان ۾ آواز اٿارڻ لاءِ چئي به ٿو، ان جي ڳالهه جو ڪو به اثر نه ٿو پئي، هن وقت سنڌ جا وڏا شهر خاص ڪري ڪراچي ته عالمي يتيم خانو ٿي ويو آهي، جتي الائي جي ڪهڙن ملڪن جا  ترسيل  آهن، هتي عرب سڳورا مٿي تي نوڙ ٻڌي به گهمي رهيا آهن  ته افغان متاثر به ترسيل آهن، جيڪي مختلف ڪاروبار به ڪري رهيا آهن ۽ ڪجهه غير ملڪين کي ته سنڌ ۾ نوڪريون به ڏنيون  ويون آهن، جيڪڏهن ڏٺو وڃي ٻين صوبن جي ڀيٽ سنڌ جي سرڪاري ادارن ۾ ڌارين جي لوڌ ڀريل آهي پر هتان جا حڪمران الائي جي ڪهڙي نشي ۾ آهن جو انهن کي سنڌ جي وسيلن جي ڦرلٽ ٿيندي نظر نه پئي اچي ۽ نه ئي سنڌ اندر وڌندڙ بيروزگاري ڏسڻ ۾ اچي رهي آهي، جيڪڏهن حالتون اهڙيون رهيون ته پوءِ آخر سنڌ جو ڇا ٿيندو،.

شهيدن جي نالن تي ووٽ وٺندڙ ته هاڻ پاڻ ئي ڌارين جي لوڌ کي سڃاڻپ ڪارڊ جاري ڪري رهيا آهن ۽ بنگالين ۽ ٻي ڌاري لوڌ کي سڃاڻپ ڪارڻ جا اعلان به ڪيا پيا و ڃن آخر سنڌ شهيدن جي نالي تي وٺندڙ جو ڪهڙو گناهه ڪيو آهي جو اڄ سنڌ اندر ڌارين جي لوڌ کي ڪڍڻ بدران انهن کي سنڌ جو ئي رهواسي ڏيڻ ڪوششون ڪيون پيون وڃن. هن وقت حڪمرانن سنڌ اندر اهڙيون حالتون پيدا ڪيون ويون آهن جو جيڪڏهن ڪو سنڌ جو ساڃاهه وند يا قومپرست ماڻهو ڌارين جي لوڌ ۽ وسيلن جي ڦرلٽ خلاف آواز اٿاري ٿو ته اهو ڏينهن ڏٺي گم ٿي وڃي ٿو، خبر ئي نه ٿي پئي ته الائي ڪير کڻي ويو، نه قانون لاڳو ڪندڙ گرفتاري ظاهر ڪن ٿا ۽ نه ئي وري پوليس ڪجهه ٻڌائڻ لاءِ تيار ٿئي ٿي. خبر ئي نه ٿي پئي ته سنڌ اندر الائي جي ڪهڙا فرشتا لٿا آهن جو ماڻهن کي هڪ اشاري تي گم ڪري ڇڏين ٿا.

هن وقت ڪراچي ۾ لکن جي تعداد ۾ پرڏيهي ترسيل آهن پر مجال آهي جو ڪو نمائندو ان خلا ف ايوان ۾ آواز اٿاري.  ڪجهه عرصو اڳ جڏهن سنڌ ۾ قومپرستن ڌارين جي لوڌ کي روڪڻ لاءِ احتجاج ڪيو هو ته ان  وقت اڳوڻي وڏي وزير سيد قائم علي شاهه چيو هوته هو ڌارين کي روڪڻ جي ڪوشش ڪن ٿا ته مٿان کان آرڊر جاري ٿئي ٿو ته انهن کي نه روڪيو،  هاڻ جڏهن مٿان کان ئي اهي آرڊر ٿين ته ڌارين کي سنڌ ۾ آباد ڪيو وڃي ته پوءِ ڪهڙي ريت اسان نه چئون ته سنڌ جي خلاف سازشون ٿي رهيون آهن. هونئن ته ان ڳالهه ۾ ڪو شڪ به نه آهي ته سنڌ ۾ ڌارين جي آبادڪاري ۽ انهن کي هتان جي سڃاڻپ ڏيڻ سنڌ جي خلاف سازش جو هڪ حصو آهي، جيتوڻيڪ سنڌ ۾ ڪوئلو ۽ ٻيا معدني وسيلا   موجود آهن پر ان مان به سنڌ کي ڪجهه به  نه ملي رهيو آهي،

جيڪڏهن سنڌ  جي ماڻهن کي سنڌ مان نڪرندڙ پيٽرول، گيس ۽ ڪوئلو  مان ڪجهه حصو ڏنو وڃي ها ۽  سنڌ جي ماڻهن جي تعليم، صحت ۽  ٻين بنيادي سهولتن جو خيال رکيو وڃي ها ته اڄ هتان جو ماڻهو غريب ۽ لاچار نه هجن ها ۽ نه ئي هتان جو نوجوان بيروزگار هجن ها. پر ڇا ڪجي هتان جا حڪمران ئي اهڙا آهن، جن ذهنيت ئي هڪ  ظالم وڏيري جهڙي آهي، جيڪي نٿا چاهين ته  سنڌ ۾ خوشحالي اچي، گذريل ڪيتري ئي عرصي کان سنڌ مان هڪ ئي پارٽي اقتدار ۾ اچي رهي  آهي پر ان پارٽي اڄ تائين سنڌ  ۾ ڌارين جي آبادڪاري کي روڪڻ لاءِ ڪي به قدم نه کنيا آهن ۽ نه ئي وري سنڌ اندر پاڻي  جو ڪو ڊيم ٺاهڻ جي ڪوشش ڪئي  آهي، ايتري قدر جو سنڌ مان نڪرندڙ پيٽرول، گيس ۽ ڪوئلو مان سنڌ کي ڪو فائدو  پهچايو آهي، جنهن  سبب  صوفين جي سرزمين جو عوام غريب آهي ۽ نوجوان نوڪرين لاءِ در بدر ڀٽڪي رهيا آهن، جن جي ڪير به ٻڌڻ وارو نه  آهي،

عالمي يتيم خاني ڪراچي جي به هن وقت تائين ڪا سار سنڀال نه پئي لڌي وڃي، جيتوڻيڪ هن ملڪ  جي قيام لاءِ سڀ کان وڌيڪ قربانيون سنڌين ئي ڏنيون هيون پر الائي جو  اڄ سنڌين کي ڪهڙي گناهه جي سزا ڏني پئي وڃي جو هتان جا ڪامورا توڙي وفاقي حڪومت صرف ان ڪوشش ۾ رڌل آهن ته ڪهڙي نموني ڌارين کي سنڌ ۾ آباد ڪري انهن جا سڃاڻپ ڪارڊ ٺهرايا وڃن. اهو ڪنهن جي اشاري تي ٿي رهيو آهي، ان جي ته خبر نه آهي پر هر هڪ سنڌي کي اها خبر ضرور پئجي وئي ته هتان جا حڪمران جي حضوري ۾ پورا آهن، سنڌ جي خلاف جيڪو فيصلو ٿئي ٿو، ان جي جي حضوري ۾ پورا آهن. ڪجهه ڏينهن اڳ ميڊيا  تي خبرون هلي رهيون هيون ته پيپلزپارٽي پاران ڪراچي ۾ ووٽ حاصل ڪرڻ لاءِ بنگالني کي پاڪستان جي شهريت ڏيارڻ جو اعلان ڪيوويو آهي، جنهن بعدسنڌ ۾ هڪ ڳڻتي لهر پکڙجي وئي،

هر هڪ سنڌي پريشان ٿي ويو ته آخر پيپلزپارٽي کي ڇا ٿي ويو آهي، اڳ ئي سنڌ ۾ افغان مهاجر سميت ٻيون الائي ڪهڙيون قومون ترسيل آهن، جن جي اچڻ سان  هن ڌرتي تي دهشتگردي جو راڄ قائم ٿيو آهي، طالبانن واري ذهنيت جنم وٺي رهي آهي، ايتري قدر جو دهشتگرد  درگاهن ۽ امام بارگاهن تي حملا ڪري رهيا آهن، ماضي ۾ سنڌ کي امن جي ڌرتي سڏيو ويندو هو پر غيرملڪين  جي آمد کانپوءِ دهشتگردن هتي رت جي راند شروع ڪري ڇڏي آهي، جڏهن سيوهڻ ۾ دهشتگردن معصوم ۽ بيگناهه ماڻهن جو رت وهايو ته هتي غير قانوني ترسيل افغان شهرين خلاف وٺ پڪڙ شروع ٿي ته ڪي پي جي حڪمرانن رڙيون شروع ڪيون هيون، جنهن مان لڳي رهيو هو ته هتي رهندڙ  غيرملڪين کي ڪي  پي ڪي سرڪار جو آشيروار حاصل آهي، جيڪي نٿا چاهين ته سنڌ مان پرڏيهي نڪرن ۽ هتي امن قائم ٿئي.

هاڻ جڏهن سنڌ ۾ قومپرستن جو گهيرو تنگ ڪيو  ويو آهي ۽ انهن جي احتجاجن تي اڻ سڌي طرح پابندي لڳائي وئي آهي ته ان وقت پيپلزپارٽي لاءِ سمورا دروازا کلي ويا آهن، جيڪو وڻي اهو فيصلو ڪري، جڏهن پيپلزپارٽي پاران ڌارين کي سڃاڻپ ڪارڊ جاري ڪرڻ جو اعلان ڪيو ويو، تڏهن سنڌ نيشنل پارٽي جي چيئرمين امير ڀنڀرو  16 آگسٽ تي احتجاج ڪرڻ جو اعلان ڪيو، جنهن جي ٻين پارٽين پاران حمايت جو اعلان ڪيو ويو آهي. هن وقت جيتوڻيڪ  وفاقي سرڪار توڙي صوبائي سرڪار سنڌ جي ساڃاهه وندن جو آواز دٻائي ڇڏيو آهي پر اڃا ڪجهه اهڙا  سنڌ جا بهادر پٽ موجود آهن، جيڪي پابندين باوجود سنڌ جي حقن لاءِ آواز اٿاري رهيا آهن، انهن مان امير ڀنڀرو صاحب به هڪ آهي، جنهن ڌارين کي سڃاڻپ ڪارڊ جاري ڪرڻ واري اعلان خلاف عوامي رابطا مهم شروع ڪري ڇڏي آهي، سنڌ نيشنل پارٽي جي چيئرمين امير ڀنڀري چيو آهي ته هو  16 آگسٽ تي سنڌ اسيمبلي جو گهيراءُ ڪندا ،

جيڪڏهن ڏٺو وڃي ته هي اعلان ڀلي کڻي سنڌ جي حقن لاءِ ڪيو پيو وڃي پر  سنڌ جي حڪمرانن تي ان جو ڪو به اثر نه پوندو ڇاڪاڻ ته انهن کي صرف اقتدار ئي کپي پوءِ ڀلي کڻي کين ڇا به ڪرڻو پيو. اسان کي ته اهو ڏينهن به ياد آهي ته هڪ نام نهاد پارٽي جڏهن سنڌ  جي ورهاڱي لاءِ  احتجاج ڪيو هو ته سنڌ جي حڪمرانن انهن کي جوس پياريو هو ۽ انهن مٿان ڪو به طاقت جو استعمال نه ڪيو ويو هو پر جڏهن سنڌي استادن پگهارن لاءِ احتجاج ڪيو ته سنڌ حڪومت انهن مٿان ائين ڪڙڪي پئي ڄڻ ڪو هو  طالبان دهشتگردن سان وڙهندا هجن. مطلب ته سنڌ جي دشمنن سان محبت جو اظهار ڪيو ويو ۽ جائز حقن لاءِ احتجاج ڪندڙن تي لٺيون ۽ شيلنگ ڪئي وئي.

بهرحال هاڻ سنڌ جون حالتون تمام گهڻو خراب ٿي چڪيون آهن ۽ ڌارين جي لوڌ کي سنڌ مان بي دخل جو وقت به اچي ويو آهي، جيڪڏهن  ڌارين جي لوڌ کي هتان بي دخل نه ڪيو ويو ته  ڌارين جي لوڌ جي روپ ۾ رهندڙ دهشتگرد هن صوفين جي سرزمين کي جهنم  بڻائي ڇڏيندا، جهڙي ريت انهن افغانستان ۽ ٻين ملڪن کي بڻائي ڇڏيو آهي.  سنڌ ۾ جڏهن به ڪا دهشتگرد ڪارروائي ٿي آهي ته ان جا پيرا به افغانستان ڏانهن ئي وڌا آهن.  سنڌ جي ڪامورن کي  هاڻ پنهنجو رويو تبديل ڪرڻو پوندو  ۽ اقتدار خاطر هن صوفين جي سرزمين کي دوزخ بڻائڻ کان پاسو ڪرڻو پوندو. سنڌ جي ماڻهن تي  طاقت جو استعمال ڪري آواز دٻائڻ  وارو به سلسلو بند ڪرڻو پوندو، شهيدن جي نالي تي ووٽ وٺي اقتدار ۾ ايندڙن کي سنڌ جي ڀلائي ۽ سنڌ ۾ ڌارين جي لوڌ کي روڪڻو پوندو، جيڪڏهن هن وقت سنڌ اندر ڌارين جي لوڌ کي نه روڪيو ويو ته سنڌي اقليت ۾ تبديل ٿي ويندا، جنهن جو سڀ کان وڌيڪ نقصان شهيدن جي پارٽي کي ٿيندو جيڪي هميشه سنڌين کان ووٽ وٺي اقتدار ۾ ايندا رهيا آهن.

sahibalisindhi@gmail.com

 

 

لاڙڪاڻي جو اتاترڪ ٽاور ۽ ميساريل قول  …: مسرورسيال

لاڙڪاڻي اتنظاميه تي حيرت  آهي پر ان کان وڌيڪ افسوس ته سنڌ حڪومت کان وٺي ضلعي چئيرمين ۽ مئير لاڙڪاڻو تي آهي جن جي نظر ايڏي وڏي ٽارو تي نه پئي آهي پر جي پئي به هوندي ته ٽاور تي چڙهيل سياسي جھنڊن ۽ پينافليڪس بينر سميت ، اشتهارن تي ضرور پئي هوندي جن ۾ اڪثر بينر هن وقت سندن پارٽي جا لڳل هوندا آهن هي ٽاور باقراڻي روڊ تي آهي جيڪو شهيد ذوالفقار علي ڀٽو جي نشاني آهي جنهن کي اتاترڪ ٽاور چيو ويندو آهي جيڪڏهن ٿورو غور ڪجي ته جنهن جاءِ تي سياسي . مذهبي ڌرين جا اشتهار لڳل هوندا آهن ان جاءِ تي اڳ سنهري اکرن سان قائدِ آعظم محمد علي جناح ۽ قائدِ عوام ذوالفقار علي ڀٽوشهيد  جا قول لکيل هوندا هئا ، جيڪي آمريت جي دور ۾ به لکيل هوندا هئا اُهي اڄ ڪالھه قول نظر نٿا  اچن  پر نظر اچن ٿا  اشتهار نظر اچن ٿا  ائين محسوس ٿي رهيو آهي جئين هاڻ  سياسي ۽ مذهبي ڌرين جا نوٽس  بورڊ ٺهيل هجن ، باقراڻي روڊ جيڪو اصل ۾ موهين جو دڙو روڊ آهي  هي روڊ سڌو موهين جو دڙو وڃي ٿو جتي ائيرپورٽ به آهي هن روڊ سان اڪثر وي آءِ پيز ايندا ويندا رهندا آهن انهن وي آءِ پيز ۾ وزير صاحبان به هوندا آهن جيڪي هن روڊ سان اچن وڃن ٿا ۽ کين اتاترڪ کي سامهون نه رڳو ڏسڻ جو موقعو ملندو رهندو آهي پر ان جي ڀرسان گذرڻو به پوندو آهي ان ڪري ته ٽاور چوراهي تي بڻيل آهي جنهن کي گول چڪر به ڏيڻو پوي ٿو ان باوجود به هن ٽاور تي سندن  نظر ڇو نٿي پوي ۽ کين شهيد قائد جي نشاني تي لکيل انهن سنهري اکرن وارن قولن تي نظر ڇو نٿي پوي شايد ان ڪري ته هاڻ اُهي مٽچي چڪا آهن ۽ اُها جاءِ سياسي ۽ مذهبي پارٽين جو نوٽيس بورڊ بڻجي چڪي آهي جتي اڪثر انهن وزيرن جا وڏا خوش آمديد وار سندن وڏين تصويرن وارا بينر لڳل  هوندا آهن هي مسئلو ڪنهن کي ڀل ته ننڍو لڳندو هجي پر اصل ۾ وڏو مسئلو آهي ان ڪري ته هي ٽاور ۽ مينار هڪ تاريخ آهن ۽ تاريخ سان هٿ چراند ڪو ننڍو مسئلو نه هندو آهي اصل ۾ ٽاور جو هجڻ ڪافي ناهي پر ان جو مقصد هجڻ ضروري هوندو آهي هڪ ته هي ٽاور شهيد ذوالفقار علي ڀٽو ان دور جي ترڪ صدرڪمال اتا ترڪ سان دوستي جي علامت طور يادگار طور جوڙايو هو ٻيو ته هن ٽاور وسيلي ملڪ جي باني ۽ جمهوريت جي باني جا قول تحرير ٿيل هئا جنهن کي عوام پڙهندو هو ۽ عوام رڳو ان دور جو نه پر هر دور جي نسل کي پڙهڻ گھرجي سو اسين ته ڏسون پيا ته اسان کان بعد واري نسل شايد اُهي قول پڙهيا هجن ۽ کين اِها به ڪا خبر هجي ته جتي سياسي پارٽين ۽ مذهبي پارٽين جا بينر ۽ اشتهار لڳل هجن  ٿا اتي ڪي قول به لکيل هوندا هئا شايد هاڻ هُو اِهو سمجھندا هجن ته هي جاءِ بينرن لڳائڻ ۽ اشتهار لڳائڻ لاءِ بڻائي وئي آهي ،

هن ٽاور سان جيالن جي ان ڪري به محبت آهي ته هي شهيد ڀٽي جي نشاني آهي پر ڏسجي ته سندن محبت جي دعويٰ ڪمزور نظر اچي رهي آهي ان ڪري ته  کين ٽاور سان محبت کان وڌيڪ قائدِ عوام شهيد جي قولن سان هئڻ گھرجي ها ….! ٿي سگھي ٿو کين قولن سان به محبت هجي پر اُهي ٻيهر بحال ڪرڻ لاءِ کين ڪا ڳري رقم گھربل هجي يا ان جو به کين ڪو وڏو ٽينڊر ڏيڻو هجي ۽ هن ڪم کي به ٺيڪي تي ڏيڻو هجي ان ٺيڪي لاءِ کين وڏي وزيرکان منظوري وٺڻي هجي ۽ ان منظوري لاءِ هڪ وڏي پراسيس مان گذرڻو پوي تنهن ڪري ايڏي وڏي خفي کان بچڻ لاءِ  سولو ڪم ڪرڻ کي اهميت ڏني وئي هجي مطلب ته ٽاور جي قولن وارين جاءِ تي اشتهار ۽ بينر لڳايا پيا وڃن ته جئين ايندڙ وقتن ۾ ٽاور جي اهميت گھٽجي وڃي ….. جي ائين ناهي ته پوءِ گذريل 9 سالن کان سنڌ تي  پ پ پ حڪومت ڪري رهي ۽ هن ننڍڙي نما هڪ وڏي مسئلي کي حل ڇونٿو ڪيو وڃي بلڪل ائين جئين هڪ جيالي چوڻ موجب ته نئوديرو هائوس ۾ جڏهن مڪاني چوندن کانپوءِ ٽائون چئيرمين شپ لاءِ انٽريو بورڊ اڳيان پيش ٿيڻ لاءِ وياسين ته اتفاق سان  ان هال ۾ ويڍاسين جنهن هال ۾ اسين اڳ ايم آر ڊي تحريڪ توڙي شهيد راڻي جي وقت ۾  گڏجاڻيون ڪندا هئاسين اتي مادرِ جمهوريت ۽ قوم جي امڙ بيگم نصرت ڀٽو جي هڪ وڏي تصوير لڳل هوندي هئي  مون غور سان ڏٺو ۽ چارئي طرف جاچ ڪئي ته اُها تصوير مون کي نظر نه آئي پر ڪنڊائتي هڪ ننڍڙي تصوير نظر آئي شو پيز طور ننڍي ٽيبل تي رکيل هئي  جنهن تي  به مٽي چڙهيل هئي مونکي ڏاڍو ڏک ٿيو جڏهن اسان کي انٽريو لاءِ گھرايو ويو ته آءٌ آغا سراج دراني ۽ نثار کهڙو سميت اتي موجود ڪاميٽي ميمبرن کي آگاهي ڏني ۽ چيو ته ڀل اوهان مون کي چئيرمين نه بڻايو پر قوم جي امڙ جي تصوير واري جاءِ تي تصوير لڳرايو جئين اڳ لڳل هوندي  هئي سو هاڻ جيالن کي اسان کي  ۽ پرانن ورڪرن کي ئي ياد ڏيارڻو پوندو ته هي جايون شهيدن جون نشانيون آهن ۽ هنن جي وڏي اهميت آهي ، خير اسين اِهو ڪم به ڪرڻ تيار آهيون پر اسان کي ٻڌو  ۽ سمجھيو ته وڃي انهن تاريخي نشاندهين ڏانهن توجھه ته ڏني وڃي خبر ناهي مادرِ جمهوريت بيگم نصرت ڀٽو جي تصوير نئين ديري هائوس جي ان هال ۾ لڳائي به وئي آهي يا نه …… ۽ وري اِهو به ڏسجي ته مون جيڪا يادگري ڏياري آهي ان کي نطر ۾ رکندي  شهيد ڀٽي جي نشاني اتاترڪ ٽاور کي بينرن ۽ اشتهارن کان صاف ڪري  قائدِ عوام شهيد ذوالفقار علي ڀٽو ۽ ملڪ جي باني قائدِ آعظم محمد علي جناح  جا قول تحرير ڪرايا وڃن ٿا يا نه ..

 

 

 

35 رپين جو تيل 80 رپين ۾ وڪرو….

پبلڪ اڪائونٽس ڪميٽي جي اجلاس ۾ سيد خورشيد شاهه چيو ته ملڪ ۾ 80 سيڪڙو صارفين جو تعلق غريب طبقي سان آهي، ان جي باوجود حڪومت 35 روپيا ليٽر وارو تيل عوام کي 80 روپين ۾ وڪري رهي آهي ۽ غريب صارف کي 2 روپيا يونٽ واري بجلي 7 روپين ۾ وڪرو ڪئي پئي وڃي ۽ سي پيڪ جي سيڪيورٽي جي نالي تي صارفين کان 17 ارب روپيا وصول ڪيا پيا وڃن، حڪمران ڀلي غريب عوام جو تيل ڪڍي مٿي تي هڻڻ پر وار پوءِ به نه نڪرندا. اجلاس ۾ پاڻي ۽ بجلي واري وزارت جي 13 -2012ع جي پنج ڪروڙ روپين کان وڌيڪ رهتن جو جائزو ورتو ويو، آڊٽ عملدارن ٻڌايو ته اهڙن وڏن باقيدارن جي ذمي 246 ارب 90 ڪروڙ روپين جون رهتون آهن جيڪي فوت ٿي ويا آهن يا ڪاروبار بند ڪري هليا ويا آهن، بجلي جي ورڇ ڪندڙ ڪمپنين جون سڄي ملڪ ۾ نجي ۽ سرڪاري ادارن ڏانهن 246 ارب 90 ڪروڙ روپين جون بقايائون آهن، نندي پور پاور منصوبي ۾ دير سان 43 ارب روپين کان وڌيڪ جو نقصان ٿيو جڏهن ته پي اي سي 10 آڪٽوبر تائين نندي پور پاور منصوبي جي جاچ رپورٽ پيش ڪرڻ جي هدايت ڪئي آهي. جڏهن ته بجلي جي ورڇ ڪندڙ ڪمپنين جا ادارن ڏانهن رهيل بقايائن جي تفصيلن ۾ ٻڌايو ويو ته مختلف سرڪاري ۽ نجي ادارن ڏانهن ورڇ ڪندڙ ڪمپنين جا 246 ارب 90 ڪروڙ روپيا بقايا آهن، سڀ کان وڌيڪ 86 ارب روپيا ڪوئيٽا ريجن جي ذمي آهن، سکر ريجن 60 ارب، پشاور ريجن 60 ارب روپيا، لاهور ريجن 40 ارب روپين جون رهتون آهن، جيڪي جلد کان جلد وصوليون ٿيڻ گهرجن، پاڻي ۽ بجلي واري وزرات جو چوڻ هو ته 39 ڪروڙ روپين جي بقايائن جا ڪيس عدالتن ۾ ٻڌڻي هيٺ جڏهن ته 10 ارب 20 ڪروڙ روپين جا ڪيس نيب وٽ آهن، آزاد ڪشمير حڪومت ڏانهن 6 ارب 29 ڪروڙ جا بقايا آهن، هڪ ارب 70 ڪروڙ وصولين جي ڪيسن ۾ بجلي به ڪٽي وئي آهي، پاڻي ۽ بجلي واري وزارت جي سيڪريٽري نسيم کوکر ٻڌايو ته گردشي قرضن ۾ گهٽتائي آڻڻ جي حوالي سان اسان وزيراعظم کي تجويزون ڏنيون آهن، شفقت محمود چيو ته لائن لاسز ۾ گهٽتائي آڻڻ وزيراعظم جو نه ورڇ ڪندڙ ڪمپنين جو ڪم آهي، 10، 10 مهينا ميٽر چيڪ ناهن ٿيندا پوءِ هڪدم لک روپين جو بل موڪليو ويندو آهي، پاڻي ۽ بجلي واري سيڪريٽري چيو ته اسان وٽ رڪوري جو باقاعده ميڪنزم موجود نه آهي جنهن سبب مشڪلاتون اينديون آهن، نيب عملدارن موجب ته نندي پور منصوبي جي جاچ منظوري جي لاءِ نيب ايگزيڪيٽو بورڊ ۾ پيش ڪئي وڃي، آڊٽ رپورٽ ۾ ٻڌايو ويو ته نندي پور منصوبي جي لاڳت ۾ 35 ارب روپين جو اضافو ٿيو آهي، دير سبب روينيو ۾ 7 ارب 32 ڪروڙ جو نقصان ٿيو آهي، دير سان مجموعي طور تي نندي پور پاور منصوبي ۾ 43 ارب 37 ڪروڙ جو نقصان ٿيو آهي، پي اي سي 10 آڪٽوبر تائين نندي پور پاور منصوبي جي حتمي رپورٽ پيش ڪرڻ جو حڪم ڏنو آهي.