تازيون خبرون

Daily Archives: August 11, 2017

لاڙڪاڻو ويجهو تيز رفتار ٻن موٽرسائيڪلن ۾ ٽڪر، ۳ ڄڻا فوت، هڪ زخمي

لاڙڪاڻو(رپورٽر) ميهڙ ڀرسان گاجي کهاوڙ روڊ تي ڳوٺ لونگ تنيو لاڙي ڀرسان تيز رفتار ٻن موٽرسائيڪلن ۾ آمهون سامهون ٽڪر ٿي پيو، جنهن جي نتيجي ۾ هڪ عورت مسمات ڪلثوم زال غفار بروهي، وارهه تعلقي جي ڳوٺ ظفرآباد جو رهواسي همت علي بروهي فوت ٿي ويا، جڏهن ته وحيد پٽ علي گل بروهي ۽ ۱۳ سالن جو ٻار محمد ايوب پٽ رحمت الله سولنگي سخت زخمي ٿي پيا، زخمين کي لاڙڪاڻي نيندي رستي ۾ ۱۳ سالن جو ٻار محمد ايوب به فوت ٿي ويو، اهڙي ريت فوتين جو انگ ۳ ٿي ويو، هوڏانهن حادثي ۾ ۳ سالن جي ٻارڙي کي روڊ ڀرسان پاڻي جي تلاءَ مان زندهه حالت ۾ هٿ ڪيو ويو، جڏهن ته فوتي عورت ۽ مرد جي وارثن کي اطلاع ڪيو ويو آهي. فوتين جو پوسٽ مارٽم ڪرڻ بعد لاش وارثن جي حوالي ڪيا ويندا.

 

فلمن ۾ مختلف ڪردار هميشه چئلينج سمجهي ڪيا آهن: هما قريشي

ممبئي (شوبز نيوز) بالي ووڊ جي خوبصورت اداڪارا هما قريشي چيو آهي ته مون هميشه فلمن ۾ مختلف ڪردار چئلينج سمجهي ڪيا آهن. فلم انڊسٽري ۾ اڄ جيڪو ڪجهه آهيان انوراگ ڪشپ جي ڪري ئي آهيان. هڪ انٽرويو ۾ هن چيو ته مون انوراگ ڪشپ جي فلم گينگز آف وسي پور ذريعي بالي ووڊ ۾ قدم رکيو هو، اها فلم ئي منهنجي مستقبل لاءِ بهترين رهي، ان فلم کي مختلف ٻولين ۾ ترجمو ڪيو ويو هو، جنهن سبب عالمي ليول تي مڃتا به ملي. هن وڌيڪ چيو ته هاڻي سئنيمائن سان گڏ مداح به تبديل ٿي رهيا آهن ۽ اهي مون کي منفرد ڪردار ۾ ڏسڻ چاهين ٿا، مون مختلف ڪردارن کي چئلينج طور نڀايو آهي. ياد رهي ته هما قريشي جي فلم عشقيا، جولي ايل ايل بي ۲ ۽ دوبارا باڪس آفيس تي بهتر بزنس ڪيو هو.

 

فلم جي ناڪامي تي شوقينن جو شاهه رخ خان کان پيسن جي واپسي جو مطالبو

ممبئي (شوبز نيوز) باليووڊ ڪنگ شاهه رخ خان ۽ انوشڪا شرما جي تازو ئي رليز ٿيندڙ فلم جب هيري ميٽ سيجل جي ناڪامي کان پوءِ شوقينن شاهه رخ خان کان پيسن جي واپسي جو مطالبو ڪيو آهي،  هڪ وقت هو جڏهن باليووڊ جي ڪنگ شاهه رخ خان جون فلمون رليز ٿيندي ئي رڪارڊ بزنس ڪنديون هيون، پر هاڻي باليووڊ تي حڪمراني ڪندڙ خانز جو وقت سٺو نه هلي رهيو آهي، جنهن جي ڪري پهريان سلمان خان جي فلم ٽيوب لائيٽ باڪس آفيس تي ناڪامي جو شڪار ٿي ۽ هاڻي شاهه رخ خان جي فلم جب هيري ميٽ سيجل شوقينن کي متاثر نه ڪري سگھي شوقين  ايتري قدرمايوس ٿيا آهن جو انهن ڀارتي وزير خارجا شسما سوراج کي مدد جي درخواست ڪرڻ سان گڏ پنهنجا پيسا واپس ڪرائڻ جو مطالبو ڪيو آهي، ڀارتي ميڊيا جي مطابق فلم ڏسڻ کان پوءِ ٽوئيٽر تي هڪ شوقين  رد عمل ظاهر ڪندي پيسن جي واپسي جو مطالبو ڪيو آهي. جڏهن ته هڪ ٻئي شوقين فلم جي هدايتڪار امتياز علي کي مخاطب ٿيندي چيو ته انهن ٻنهي  کي فلم ۾ گڏ ملائڻ جي ڪهڙي ضرورت هئي. واضع رهي ته فلم جب هيري ميٽ سيجل پنجن ڏينهن ۾ صرف 52 ڪروڙ 90 لک روپيا جو ئي بزنس ڪري سگھي، جيڪا هلندڙ سال رليز ٿيڻ واري فلمن ۾ هن وقت تائين سڀ کان گھٽ بزنس آهي.

 

پي سي بي فزيوٿراپسٽ شين هائز کي هٽائي ڇڏيو

لاهور (اسپورٽس نيوز) پاڪستان ڪرڪيٽ بورڊ ٽيم جي فزيوٿراپسٽ شين هائز کي ڊسيپلين جي ڀڃڪڙين ۽ سينئر رانديگرن جي شڪايتن تي هٽائي ڇڏيو آهي. پي سي بي جي نئين چونڊيل چيئرمين نجم سيٺي ان ڳالهه جو اعلان پنهنجي پريس ڪانفرنس ۾ ڪيو. هن ٻڌايو ته ٻين پرڏيهي ڪوچن سان معاهدن کي پورو ڪيو پيو وڃي. ذريعن جو چوڻ آهي ته شين هائز خلاف ڪيترائي ڀيرا ڊسيپلين جي خلاف ورزين جون شڪايتون مليون هيون

 

جي ٽي روڊ ياترا.!!!: غلام مصطفيٰ جمالي

اڳوڻي وزير اعظم نواز شريف جو جي ٽي روڊ وارو قافلو فيض آباد پهتو جنهن کانپوءِ  نواز شريف پنهنجي گاڏي ڇڏي ڪنٽينر ۾ هلڻ پسند ڪيو، نواز شريف اسلام آباد کان لاهور روانگي واري سفر دوران  وزيراعظم نواز شريف چيو آهي  ته شاهد خاقان عباسي اسان جي شروع ڪيل منصوبن جي پڄاڻي ۽ حڪومتي مدو پورو ٿيڻ تائين وزيراعظم رهندو.ڪو پاور شو نه ڪري رهيو آهيان، گهر موڪليو ويو آهي ته گهر وڃي رهيو آهيان.ا ميان نواز شريف جي پنجاب هائوس روانگي جو وقت صبح 10 وڳي مقرر ڪيو ويو هو پر پارٽي اڳواڻن سان ملاقات ۽ ڳالهين جي ڪري روانگي ساڍي يارهين وڳي شروع ٿي.ان وقت ريلوي وارو وفاقي وزير خواجا سعد رفيق ۽ سينيٽر پرويز ميان نواز شريف سان گڏ گاڏي ۾ موجود هئا. نواز شريف کي ججز ڪالوني ڏانهن وٺيو پيو ته  ان وقت  مري روڊ تي سمورا پيٽرول پمپ بند ڪرايا ويا هئا، ۽ مري روڊ ۽ ڀرپاسي وارا روڊ مڪمل طور بند هئا. ان موقعي تي ڪارڪنن جو وڏو انگ  جهنڊا کڻي ميان نواز شريف جي قافلي شامل ٿي چڪو هوُ. مسلم ليگ ن جي ريلي جي لاءِ خاص طور تي تيار ڪيل ميان نواز شريف جي قافلي سان گڏ گاڏي ۾ اسپيڪر ۽ سائونڊ سسٽم لڳايو ويو هو جنهن جي  مٿان اڳوڻي وزير نواز شريف ۽ مريم نواز جا پوسٽر لڳل ويا. اها خاص وين اڳوڻي وزير اعظم سان جي قافلي سان گڏ لاهور ويندي، ان کان سواءِ اسپيڪر ۽ سائونڊ سسٽم جي سان گڏ 8 خاص گاڏيون تيار ڪيون ويون هينون. سمورن شهرن ۾ نواز شريف جي ريلي جو استقبال ايم اين اي ۽ ايم پي اي ڪيو. ريلي جي استقبال لاءِ  رستن تي جاءِ جاءِ تي ڪيمپ لڳايا ويا هئا جتي ڪارڪنن جي لاءِ پاني ۽ کائڻ جو به انتظام ڪيو ويو هو . ريلي پنجاب هائوس کان مارگلا روڊ، ميريٽ هوٽل سگنل کان ڊي چوڪ کان گذري ۽ ڊي چوڪ تي اسلام آباد جي مختلف سيڪٽرن مان جمع ٿيل ڪارڪن سندس استقبال ڪندا رهيا.هي ڪالهه وارو ٿورڙو ريلي جو عنوان ان ڪري ڏنو آهي جو هن ڪالم جو سمورو تعلق نواز شريف جي ريلي سان آهي،ڇوته ڪالهه ريلي جي ناهي جيڪڏهن ريلي جي هجي هان ته ميان نواز شريف پنهنجي اقتدار جي ڇار سال ڪجهه ميهنا پاڪستان اندر ئي گذاريا آهن،انڪري اها ريلي ان وقت به نڪري ٿي سگهي پر ائين به نه ڪيو ويو،وري ٻئي ڳالهه به اوهين سوڇندا.ته ميان نواز شريف صاحب پنهنجي نااهلي کانپوءِ عوام کي اهو ڏسڻ ٿي چاهيو ته سندس پنجاب اندر قوت ڪيتري آهي ۽ سندس حمايت رکندڙ ڪارڪنن توڙي پنجاب ئي عوام ڪيتري آهي.پر ائين به ناهي ڇو ته ميان نواز شريف هڪ نااهل ٿيل وزيراعظم هو ۽ سندس خد اهو چو۾ هو ته هو نااهل ڪيو ويو آهي جنهن جي ڪري هو پنهنجي گهر وڃي رهيو آهي.انڪري مان به سوچيان پيو ته جيڪو وزيراعظم نااهل هجي ۽ اهو پنهنجي ماتم اهڙي نموني ڪري انهي تي افسوس ئي ڪري سگهجي ٿو ڇو ته جيڪڏهن ڳالهه صرف گهر وڃڻ تي آهي ته ميان نواز شريف عام ماڻهو وانگر سنڌو سنئون گهر هليو وڃي ها پوءِ ايترو شوز شرابو ڪرڻ جي ڪهڙي ضرورت هئي ۽ جيڪڏهن ميان نواز شريف جي ڪا ريلي ڪڍڻي هئي ته اها هو پوءِ به ڪڍي سگهيو ٿي ڇو وڏي الڪيشن ۾ اڃان ڪافي دير پئي آهي انڪري اهڙيون ريليون پوءِ به نڪري سگهيون ٿي،اوهانکي ياد هجڻ گهرجي ته لاهور اين اي 120تي جيڪا اليڪشن ٿيڻي آهي اصل راند انهي الڪيشن جي ڪري ڪئي پئي وڃي.

جڌهن ته ڪالهه واري ريلي کي ڏسي اهو به چئي سگهجي ٿو ته خاقان شاهه عباسي صرف ناهي جو وزيراعظم آهي باقي اختياريون مڪمل طور اڃان تائين سابق وزيراعظم وٽ ئي آهن.انڪري پاڪستاني جي سياست هن وقت اهڙو موڙ اچي ٻيٺو آهي جنهن اندر ڪا ڳالهه سمجهه ۾ نه پئي اچي ته اڳيان ڇا ٿيڻ وارو آهي ڇو ته اين اي 120 جي الڪيشن جي ڏسي ڪري اوهانکي پاڪستان اندر ٻه سياسي قوتون زور آهي جنهن ۾ هڪ ن ليگ ۽ ٻئي پارٽي تحريڪ انصاف آهي جيڪڏهن سوچئجي ته ٽئي سياسي پارٽي ڪهڙي آهي جيڪا مطبوط هوندي.انڪري اها به هڪ حقيقت آهي ته جيڪڏهن پاڪستان ۾ جيڪڏهن سڀاڻي چونڊون ڪرائڻ جو اعلان ڪبو ته توهانجي خيال ۾ ٻن مشهور جماعتن پيپلز پارٽي ۽ مسلم ليگ نواز کانپوءِ ٽين وڏي سياسي قوت يا آپشن ڪهڙي جماعت ٿي سگهي ٿي؟ جماعت اسلامي،  يا وري تحريڪ انصاف؟ ”عمران خان جو اليڪشن کٽڻ جي متعلق اعتماد ڏسي ڪري مونکي وڌيڪ ڀئو ٿيڻ لڳو“.هن جا ڪجهه اهم ڪارڻ آهن. بيشڪ عمران خان بهترين رانديگر ۽ مشهور فلاحي ڪارڪن طور مقبول آهي. عمران خان جتي به وڃي هتي ماڻهو گڏ ٿي ويندا آهن، ماڻهو کيس سر اکين تي ويهاريندا آهن ۽ سندس ڳالهيون غور سان ٻڌندا آهن. پر عمران خان انهيءَ اهميت کي پنهنجي سياسي حمايت سمجهي رهيو آهي؟ سياست جو مثال انهيءَ وياڪل اٺ وانگر آهي جنهن جي آخري وقت تائين خبر ناهي ته اُهو ڪهڙي پاسي ويهندو. مون جنهن سان به ذڪر ڪريان ٿو اُهو ٻن مشهور سياسي جماعتن جا مسئلا نبيرڻ ۾ ناڪامي تي لعنت ملامت ڪري ٿو پر انهيءَ ٻڏتر جو شڪار پڻ آهي ته ٽين آپشن جي غير موجودگي ۾ ڪنهن کي ووٽ ڏيندو.

مذهبي جماعتن جو مصروف ووٽ بئنڪ آهي جيڪو هنن کي سواءِ نائين اليون کانپوءِ ٿورو يا وڌيڪ ملي ٿو پر اصل مسئلو ٻڏتر ۽ مايوسي جو شڪار ووٽرن جو آهي جيڪي ووٽ ڏيڻ لاءِ نه ٿا اچن. سوال اِهو آهي ته ڇا عمران خان هنن ووٽرن کي ڪيش ڪري سگهندو؟ تحريڪ انصاف جو خيال آهي ته 15 سالن جي اپوزيشن کيس لائق بڻائي ڇڏيو آهي. عمران خان جو چوڻ آهي ته پيرسن نوجوان ۽ ٻارڙا پاڻ هن وٽ اچي ڪري حمايت ڪرڻ جو يقين ڏيارين ٿا. عمران خان جو چوڻ آهي ته ”ماڻهو منهنجي پارٽي ۾ شامل ٿي رهيا آهن ۽ مونکي يقين آهي ته اِها حمايت عام چونڊن تائين سونامي جهڙي بڻجي ويندي.“ پر هن کان پهريان عمران خان ۽ سندس جماعت کي وڏا ڪم ڪرڻا پوندا، هن وقت عمران خان عوام جي نظرن ۾ سياسي جماعت کان وڌيڪ ”ون مين شو“ آهي. اهڙو ون مين شو جيڪو ٽي وي جي هر چئنل تي هر وقت توهانکي ڏيکاربو. اهڙي جماعت جنهن ۾ عمران ئي عمران آهي ٻيو ڪير به ناهي. عمران خان جو چوڻ آهي ته عوام تائين پهچڻ لاءِ ٽي وي نهايت طاقتور ذريعو آهي پر عمران خان اِها ڳالهه تسليم نه ٿو ڪري ته ٽي وي تي وڌيڪ ڏيکارجڻ نقصانڪار پڻ ثابت ٿي سگهي ٿو. سندس چوڻ آهي ته سڀ کان وڏو مسئلو اِهو آهي ته ٽي وي وارا شيخ رشيد وانگر هن کان علاوه سندس جماعت جي ڪنهن به ڪارڪن کي گهرائڻ لاءِ تيار نه آهن. ادا توهان ئي خيال ڪريو، شايد توهانجي غير موجودگي ۾ ڪنهن ٻئي کي اچڻ جي دعوت ڏين. جيستائين هڪ ايڪٽيو ٽيم ٺاهڻ جي ڳالهه آهي ته عمران خان موجب چڱا، ايماندار ۽ باڪردار ماڻهو ڳولڻ ۾ دير ٿيندي آهي پر آئون اهڙا ماڻهو آڻيندس جيڪي هن ملڪ کي اقتصادي بحران جي ڌٻڻ مان ڪڍي سگهن. عمران خان لاءِ اِهو ٽاسڪ جلدي پورو ٿيڻ لازمي ۽ فائديمند آهي. تحريڪ انصاف لاءِ ڪهڙي ايشو لاءِ ايندڙ چونڊون وڙهڻ فائديمند ثابت ٿيندو؟ اِهو اهم سوال ڪاميابي ۽ شڪست ۾ اهم ڪردار نڀائيندو. عمران خان سمجهي ٿو ته اِهو موضوع بي ايماني هئڻ گهرجي. پر شايد مون جهڙن ماڻهن جي خيال ۾ امن عامه جي بحالي ۽ دهشتگردي جو انت لازمي آهي. ڪجهه ماڻهو هن کي آني ۽ ڪڪڙ واري بحث ڄاڻايو آهي پر منهنجي لاءِ امن جو قيام ضروري آهي جنهن کانپوءِ بي ايماني واري اهم اقتصادي مسئلي بابت سوچ ويچار ڪري سگهجي ٿو. هينئر تائين اليڪشنز ۾ وقت آهي شايد انڪري ڪنهن به سياسي جماعت کي اليڪشن جي تياري جي تڪڙ  آهي. توڙي هن وقت ملڪ ۾ اليڪشن ڪميشن اهڙي عمل مان گذري رهيو آهي جنهن جو ايندڙ چونڊن تي اثر پئجي سگهن ٿا. اِهو ڪم ووٽرن جي لسٽن جي تصديق ڪرڻ آهي. سڀنيءَ کي خبر آهي ته تحريڪ انصاف جو اصل اثاثو نوجوان نسل ثابت ٿي سگهي ٿو. پر ڇا تحريڪ انصاف پنهنجي فيس بُڪ ۽ ٽوئٽر سان چمبڙيل نوجوانن کي پنهنجو ووٽ داخل ڪرائڻ جي هدايت ڪئي آهي؟ شايد نه. عام چونڊون ماسي جو گهر نه آهن. هوم ورڪ جي ضرورت آهي جنهن کان هر سياسي جماعت لنوائي ٿي. تحريڪ انصاف پاڻ کي ٻين جماعتن کان ڌار پارٽي قرار ڏنو آهي. تحريڪ انصاف کي ٽي وي تي بحث ڪرڻ سان گڏ عملي ڪارروايون پڻ ڪرڻ گهرجن.

 

تعليم کاتو ۽ اسان جي ذميواري.!: فرزانه نورمحمد چانڊيو/لاڙڪاڻو

گذريل هفتي جاري ڪيل هڪ خبر ۾ انڪشاف ٿيو آهي ته تعليم کاتي ۾ جعلي ڀرتين ۽ انهن ڀرتين سان لاڳاپيل غيرقانوني پگهارن جي مد ۾ ٻه ارب روپين جا غبن ڪيا ويا آهن. ان سلسلي ۾ تعليم واري وزير سوين آفيسرن کي امڪاني برطرفي جا نوٽيس به جاري ڪيا آهن. جيتوڻيڪ اهو هڪ تمام لاڀائتو عمل آهي ته احتساب هرڪنهن جو ٿيڻ گھرجي، پر شرط اها ضرور آهي ته احتساب ٿيڻ سڀني جو گھرجي. مثال جي طور بينظيرآباد ضلعي ۾ ڪل سترهن ڪروڙ اٺهٺ لک روپين جون مالي بيضابطگيون صرف هڪڙي مد ۾ سامهون آيون آهن. ان جي نتيجي ۾ تعليم کاتي جي وزير پاران 46 هيڊماسترن ۽ تعلقه ايجوڪيشن آفيسرن ته کي نوٽيس موڪليا ويا آهن. پر اها ڳالھ اڃا ڳجھارت بڻي بيٺي آهي ته ايترن سارن جعلي ماڻهن کي آرڊر ڏيڻ وارا ماڻهو ڪير هيا؟ ڇا ضلعي جي مک آفيسرن جو ان غبن ۾ ڪوبه ڪردار ڪونه هوندو؟  يا وري ٽريزري آفيسر جيڪي ٽن ڏينهن جي  نوڪري ۾ “جڙئي مان جاڙو خان” ٿي وڃن ٿا، ڇا انهن جو به ڪو ڪردار ڪونه هوندو؟ شايد اهو ئي سبب آهي جو هن ڀيري احتساب کان وڏيون مڇيون بچي ويون آهن (يا وري کين زوريءَ بچايو ويو آهي).

تعليم واري وزير کي جس هجي جنهن پهريون ڀيرو ڪرپشن جي عادي تعليم کاتي ۾ احتساب جي عمل جي شروعات ڪئي آهي. اهو شايد بلاول جي ان وعدي جو ئي نتيجو آهي جيڪو هن نوازشريف جي برطرفيءَ واري ڏينهن ورجايو هيو ته اسان چاهيون ٿا ته سڀ ڪنهن جو احتساب ٿئي. جڏهن بلاول جي ان اعلان تي غور ڪجي ٿو ته به ڳالھ وري ساڳي جاءِ تي اچي بيهي ٿي ته اهو ڪٿان جو احتساب آهي ته وڏن آفيسرن ۽ خاص  ماڻهن کي ڇڏي ننڍن ۽ ماتحت ماڻهن جو احتساب ڪيو وڃي. جيڪڏهن عمران خان ۽ نوازشريف جي جائيداد جو مني ٽرائيل ٿي سگھي ٿو ته  هر هڪ ضلعي جي تعليمي آفيسر جي جائيداد جو به مني ٽرائيل ٿيڻ گھرجي ته صاحب وٽ سيٽ تي ويهڻ کان پهرين ڪيتري ملڪيت هئي ۽ سيٽ تي ويهڻ کان پوءِ ڪهڙي “مِداس” جو منتر هٿ لڳو، جو جنهن شيءِ کي هٿ لڳائي پيو ته سوني ٿي وڃي پئي ۽ سائين ڪجھ سالن ۾ ضلعي جو امير ترين ماڻهو ٿي ويو.  ڪوڙ يا سچ پر ٻڌڻ ۾ ته ائين به آيو آهي ته هڪ اڌ ضلعي تعليمي آفيسرن جا دبئي جي وڏن هوٽلن ۾ شيئر به آهن.

ان کانپوءِ صرف هڪڙي پگهارن واري  مد جو ئي احتساب ڇو ٿئي. ناڻي جي سال 2016_17 ۾ تعليم کاتي ۾ وڌ کان وڌ پئيسا اسڪول اسپيسيفيڪ بجيٽ جي مد ۾ رکيا ويا هيا. صرف ضلعي بينظيرآباد ۾ ساڳئي مد  ۾ اوڻٽيھ ڪروڙ اوڻهتر لک سٺ هزار روپيا رکيل هيا. احتساب ان جو به ٿيڻ گھرجي ته ايترن پئيسن مان ڪيترا سرڪاري اڪائونٽن مان واپس ڪيا ويا ۽ ڪيترن جو سامان ورتو ويو. اسڪول ايجوڪيشن ڊپارٽمينٽ جي سيڪريٽري کي گھرجي ته هرضلعي جي اسڪولن ۾ مليل سامان  جي لسٽ  ساڻ ڪري اوچتا دورا ڪري اهو به جانچي ته ڪهڙو خوشنصيب اسڪول آهي جنهن  کي ڏھ هزار روپين کان مٿي ماليت جو سامان ملي سگھيو آهي.

اها ساڳي ئي احتساب واري نظر سمورن ضلعن جي ٽريزري ڪلارڪن ۽ آفيسرن تي به وڌي وڃي. خلقِ خدا اڄڪلھ پوليس ۽ ڊاڪٽرن جون به ايتريون دانهون ڪونه ٿي ڪري جيتريون ضلعي جي ٽريزري آفيسرن ۽ ڪلارڪن جي من مانين جون ڪيون ٿيون وڃن. دانهون ڪجھ اهڙي قسم جون ملن ٿيون ته ملازمن جي هلندڙ پگھار مان هروڀرو ڪونه ڪو الائونس ڪٽيو وڃي ٿو. جڏهن ملازم دانهون ڪري ٽريزري پهچي ٿو ته ان کان رشوت وٺي سندس جائز پر هروڀرو پيدا ڪيل مسئلو حل ڪيو وڃي ٿو. تنهن ڪري انهن ڪلارڪن ۽ آفيسرن  جي ملڪيتن  جو به ساڳئي طرح سان مني ٽرائيل ضرور ٿيڻ گھرجي ته جيئن شفافيت جو هڪڙو ٻهارو ان طرف به ڦري گند ڪچري کي صاف ڪري وڃي.

ڳالھ احتساب جي هلي پئي ته نصابي ڪتابن جي مقدار ۽ معيار جو به احتساب ٿيڻ گھرجي. سنڌ ٽيڪسٽ بڪ بورڊ  پاران جيڪي نصابي ڪتاب ڇپجن ٿا ۽ اهي ٻارن تائين پهچن ٿا انهن جي معيار تي غور ڪجي ته حيرت لڳندي ته اسين ايڪويهين صديءَ ۾ رهون پيا يا سورهين صديءَ ۾ جي رهيا آهيون. ٻارن کي جيڪي ڪتاب مفت ۾ ڏنا وڃن ٿا تن جي پني جو معيار انتهائي سادي درجي جو آهي. مٿان وري پئيسن کي بچائڻ جي لاءِ ٽن ٽن ڪتابن جو هڪڙو ڪچي پاٺي وارو جلد ڪري ٻارن کي ڏنو وڃي ٿو. نتيجو اهو نڪري ٿو ته اهو ڪتاب ٻارن جي کڻڻ کان به وڏو ٿيو وڃي. ٻيو ته ٻار انهن ڪتابن کي هفتو به هلائي نه ٿا سگھن. پگھر ۽ اٿل پٿل جي ڪري هڪ ٻار کي سراسري طور سال ۾ ٽن ڪتابن جي ضرورت پوي ٿي، جنهنجو انگ استاد کي پورو ڪري ڏيڻو پوي ٿو. سوال اهو پيدا ٿئي ٿو ته تعليم کاتو آخرڪار ڇو نصابي ڪتابن جي ان ڪريل معيار کي برداشت ڪيو ويٺو آهي. ڪٿي ائين ته ڪونهي ته ڪتاب ڇپرائڻ وارن ادارن سان به ڪو اندر جو وڏو صاحب مليل هجي جنهن جو احتساب اڃا نه ٿي سگھيو هجي؟

الف اعلان پاران 2016  ۾ پڌري ڪيل ڊسٽرڪٽ رينڪنگ رپورٽ ۾  سڄي پاڪستان جي 145 ضلعن مان سنڌ جوڪوبه ضلعو پهرين 50 ضلعن جي فهرست ۾ شامل ڪونهي. ايڪونجانهين نمبر تي نوشهروفيروز آهي وري ان کانپوءِ ٽيهتر نمبر تائين سنڌ جو وري ڪوبه ضلعو ڪونهي. تعليمي حاصلات جي مد ۾ سنڌ بدستور پنهجي بيڪار ڪارڪردگيءَ سبب پنجين نمبر تي آهي ۽ 2015 جي رينڪنگ جي ڀيٽ ۾ ڪاٽو هڪ ڏهائي هڪ چار اسڪور آهي. مطلب ته سال به سال اڳتي اچڻ بجاءِ سنڌ جا پويان پير پوئتي آهن. سوال اتي به اهو آهي ته اهڙي صورتحال ۾ تعليم جي وزير، سيڪريٽري ۽ ٻين وڏن گريڊن جي آفيسرن جو احتساب آخر ڪڏهن ٿيندو؟ ڇا وڏا ماڻهو سدائين احتساب جي عمل کان پاڻ کي بچائيندا رهندا.

ڪلھ کان خبرون ائين به هلي رهيون آهن ته  ڪجھ ضلعن ۾ استاد تنظيمن جي اڳواڻن، آئي بي اي معرفت آيل سترهين گريڊ جي نوجوان هيڊ ماسترن کي چارج ڏيڻ کان ان لاءِ منع ڪئي آهي ته هو سندن مقرريون ڪورٽ ۾ چيلينج ڪري رهيا آهن. معاملو ڪورٽ تائين ته پهتو آهي يا نه، اها پوءِ جي ڳالھ آهي پر، ڇا تعليم کاتي جو اهو فرض نه آهي ته پنهنجي پاليسين تحت مقرر ٿيل نوجوانن جي پرگھور ئي لھي ته هنن کي اسڪول ۽ آفيسون خالي ٿي مليون به يا رڳو آرڊر کنيو تنظيمن جي اڳيان پويان گھمي رهيا آهن؟ سندن سرڪاري ڪم ڪار ۾ رنڊڪ وجھڻ وارن فردن ۽ گروهن جو احتساب ڪڏهن ٿيندو؟

ان کان پوءِ سنڌ ٽيچر ايجوڪيشن ڊولپمينٽ اٿارٽي ۾ اسٽاف جي شديد کوٽ آهي، پائيٽ سنڌ ۾ نان ڪيڊر آفيسر سالن کان ويهين گريڊ جي چارج وٺيون ويٺو آهي، سنڌ ۾ ارلي چائيلڊهوڊ ايجوڪيشن جا استاد ته ڀرتي ٿيڻ وڃي رهيا آهن پر ان لاءِ گھربل ڊپلومه جي لاءِ ڪنهن به اداري ڪوبه ڪم نه ڪيو آهي، ڪاليجن کي سالن کان بنا بلڊنگن جي هلايو پيو وڃي ۽ جن ڪاليجن جو بلڊنگون تيار ٿي چڪيون آهن، اتي گھربل ايس اين اي منظور نه پئي ڪري ڏني وڃي وغيره وغيره. انهن سڀني معاملن جي لاپرواهيءَ جو ذميوار صرف استاد ئي آهي ڇا، جو هر پاسي اها دانهن هوندي آهي ته استادن سنڌ جي تعليم جو ٻيڙو ٻوڙي ڇڏيو (جيتوڻيڪ ان ۾ ڪو به شڪ نه آهي ته استادن به تعليم کي تباه ڪرڻ ۾ چڱو ڪردار ادا ڪيو آهي). هينئر جڏهن بيڪار ڪارڪردگيءَ جي سلسلي ۾ مختلف ضلعن جي استادن جو پگهارن جون آئي ڊيز بند ڪيون پيون وڃن ته ڇا اتي ڪنهن آفيسر يا ڪنهن منتظم جي پگهار نه ٿي روڪي سگھجي.

جڏهن سوال سنڌ جي تعليم جو آهي ته، اها اسان سڀني جو گڏيل ورثو آهي. ان ۾ تعليم جي وزير کان ويندي اسڪولن جي پٽيوالن تائين ۽ والدين کان ويندي سماج تائين سڀ جا سڀ ماڻهو ذميوار آهيون. اسين سڀ جيڪڏهن چاهيون ته ڪرپشن جي انهن سڀني معاملن جي ڪڙي کان ڪڙي جاچ ڪري پنهجي ايندڙ نسلن جي مستقبل کي هينئر ئي بهتر حالتن ڏانهن ڌڪي سگھون ٿا. پر مسئلو صرف اهو آهي ته اسين ڪجھ ڪرڻ نه ٿا چاهيون جي نه انسان جي جذبي جي آڏو ڇا ممڪن نه آهي.

 

 

اڳوڻي وزير اعظم جو جي ٽي روڊ جو سفر…

سيڪيورٽي خدشن کي نظرانداز ڪندي ميان نواز شريف اسلام آباد کان لاهور تائين جي ٽي روڊ تي سفر لاءِ نڪري پيو . اسلام آباد مان نڪرندڙ قافلي جي رفتار ايتري ته سُست نظر آئي جو اندازو اهوئي لڳايو پيو وڃي ته لاهور تائين پهچڻ ۾ کين ٽي کان چار ڏينهن لڳي ويندا. قافلي جي روٽ تي اسلام آباد پوليس، اسپيشل برانچ ۽ حساس ادارن جا اڍائي هزار کان وڌيڪ اهلڪار مقرر ڪيا ويا هئا. سيڪيورٽي پلان موجب فيض آباد تائين اسلام آباد پوليس کي ذميداريون نڀائڻيون هيون ۽ اُن بعد پنجاب پوليس کي سيڪيورٽي فراهم ڪرڻي آهي، جڏهن ته ايمرجنسيءَ جي صورت ۾ راولپنڊيءَ ۾ 4 هيلي پيڊ پڻ تيار ڪرايا ويا آهن. اُن کان علاوه پنجاب سرڪار 11 آگسٽ تائين جي ٽي روڊ کي هر قسم جي ٽريفڪ لاءِ بند ڪري ڇڏيو آهي. اسلام آباد مان نڪرڻ وقت قافلي ۾ چڱو خاصو جوش ۽ خروش هو. جيڪو ڪالهه تائين ڪنٽينر سياست کي مُلڪ ۽ قوم لاءِ هاڃيڪار سڏي رهيو هو، اڄ پاڻ هو ڪنٽينر ۾ سوار آهي. ايترو ئي نه پر هو يوسف رضا گيلانيءَ خلاف آيل فيصلي کي به غلط ڪوٺي رهيو آهي. حالانڪه تنهن وقت هُو جوشِ خطابت ۾ يوسف رضا گيلانيءَ کي بنا دير گهر وڃڻ جو چئي رهيو هو. سندس اهڙين تقريرن جا ڪيترائي ڪلپس اليڪٽرانڪ ميڊيا تي بار بار ڏيکاريا وڃن پيا. مطلب ته ميان صاحب کي تڏهن ئي هوش اچي ٿو، جڏهن هُو پاڻ ڪنهن مسئلي جو شڪار ٿئي ٿو. پر شايد هن ڀيري اهڙي ادراڪ ۾ کانئس دير ٿي چُڪي آهي. پاڻي سِر تان گذري ويو آهي ۽ اڄ جيڪو ڪجهه ساڻس پيش اچي رهيو آهي، تنهن کي سندس مخالف مڪافات عمل ڪوٺين ٿا جو ماضيءَ ۾ هُو به پنهنجي مخالفن کي اهڙي ريت ئي گهر ڀيڙو ڪرائيندو رهيو آهي! هڪ اهڙي موقعي تي جڏهن نواز شريف کي وزارتِ عظميٰ لاءِ نااهل قرار ڏنو ويو آهي، سندس خلاف ريفرنس داخل ٿيڻ وڃن پيا، اهڙي وقت ۾ عوامي طاقت جو مظاهرو ڪرڻ جو ڪهڙو سبب ٿي سگهي ٿو؟ ڇا واقعي به ميان صاحب عدالتن ۽ اسٽبلشمينٽ سان ٽڪراءُ چاهي ٿو يا اها پارٽيءَ کي منظم ڪرڻ جي ڪوشش آهي؟ جيڪڏهن پارٽيءَ کي ئي منظم ڪرڻو آهي ته پوءِ اُن لاءِ ٻيا به ڪيترائي مثبت ذريعا ٿي سگهن ٿا، ڇو جو اڃا ڪيترائي مهينا اقتدار سندن هٿن ۾ آهي، انهيءَ عرصي دوران هُو پنهنجا واعدا پاڙي عوام کي اِهو ويساهه ڏياري سگهن ٿا ته سندن پارٽي ئي مُلڪ کي ترقيءَ جي راهن تي آڻي سگهي ٿي، مُلڪ کي قرضن جي ڌُٻڻ مان ڪڍي سگهي ٿي، بيروزگاريءَ جو خاتمو يقيني بڻائي سگهي ٿي ۽ سڀ کان اهم ڳالهه ته مُلڪ ۾ توانائيءَ جو بحران ختم ڪري سگهي ٿي! انهن ڳالهين تي عمل ڪرڻ کان پوءِ کين ايندڙ چونڊن ۾ سوڀ لاءِ ڪا گهڻي جدوجهد ڪرڻي به نه پوندي، پر اقتدار هوندي به مخالف ڌر وارو ڪردار ادا ڪرڻ وارو عمل سمجهه کان ٻاهر آهي! جيتوڻيڪ هر ڪنهن کي جلسا، جلوس ۽ ريليون ڪڍڻ جو حق حاصل آهي، پر جيڪڏهن اهڙن عملن سان مُلڪي وهنوار متاثر ٿيڻ جو انديشو هُجي ته پوءِ ڪو به ساڃاهه وند ماڻهو اُنهن عملن جي حمايت نه ڪندو. ٻيو ته ميان صاحب جنهن رستي جي چونڊ ڪئي آهي، اُن تي سيڪيورٽي جا خدشا پڻ ٻُڌايا ويا آهن، جنهن ڳالهه کي نظر ۾ رکندي جيتوڻيڪ سخت اُپاءَ ورتا ويا آهن، پر پوءِ به جيڪڏهن ڪو حادثو پيش اچي ٿو ته اُن لاءِ ڪير ذميوار هوندو؟ پر شايد اسين پنهنجي مفاد ۾ سڀ ڪجهه وساري ويهون ٿا، اسان کي نه ته عوامي زندگين سان ڪو سروڪار هُجي ٿو، نه وري معيشت جي تباهيءَ جو ڪو الڪو، بس پنهنجا پانڌ بچائڻا آهن ۽ هر صورت ۾ اقتدار حاصل ڪرڻو آهي، انهيءَ خفت ۾ جيڪڏهن اصولن جي ڀيل ٿئي ٿي ڀلي وڃي ٿئي!