تازيون خبرون

Daily Archives: August 10, 2017

مشن کڻي نڪتو آهيان، خواهش آهي ته شاهد خاقان ايندڙ مدي لاءِ وزير اعظم رهي: نواز شريف

اسلام آباد(ويب ڊيسڪ) اسلام آباد(ويب ڊيسڪ) اڳوڻي وزير اعظم نواز شريف اسلام آباد کان لاهور روانگي لاءِ سفر جو آغاز ڪري ڇڏيو آهي. ميان نواز شريف جي روانگي کان اڳ وزير اعظم شاهد خاقان عباسي اڳوڻي  وزير اعظم سان پنجاب هائوس ۾ ملاقات ڪئي جنهن کان پوءِ وزير اعظم ميان نواز شريف کي ڀاڪر پائي پنجاب هائوس مان رخصت ڪيو. ميان نواز شريف جي پنجاب هائوس روانگي جو وقت صبح 10 وڳي مقرر ڪيو ويو هو پارٽي اڳواڻن سان ملاقات ۽ ڳالهين جي ڪري روانگي ۾ ڪجهه دير ٿي ۽ اڳوڻو وزير اعظم ساڍي يارهين وڳي پنجاب هائوس مان روانو ٿيو. ريلوي وارو وفاقي وزير خواجا سعد رفيق ۽ سينيٽر پرويز ميان نواز شريف سان گڏ گاڏي ۾ موجود هئا،  مري روڊ تي سمورا پيٽرول پمپ بند ڪرايا ويا ۽ مري روڊ ۽ ڀرپاسي وارا روڊ مڪمل طور بند رهيا، . ان موقعي تي ڪارڪنن جو وڏو انگ  جهنڊا کڻي ميان نواز شريف جي قافلي سان گڏ هيو، مسلم ليگ ن جي ريلي جي لاءِ خاص طور تي تيار ڪيل ميان نواز شريف جي قافلي سان گڏ گاڏي ۾ اسپيڪر ۽ سائونڊ سسٽم لڳايو ويو آهي جڏهن ته ان جي مٿان اڳوڻي وزير نواز شريف ۽ مريم نواز جا پوسٽر لڳل آهن. اها خاص وين اڳوڻي وزير اعظم سان جي قافلي سان گڏ لاهور ويندي، ان کان سواءِ اسپيڪر ۽ سائونڊ سسٽم جي سان گڏ 8 خاص گاڏيون تيار ڪيون ويون آهن. سمورن شهرن ۾ نواز شريف جي ريلي جو استقبال ايم اين اي ۽ ايم پي اي ڪندا. ريلي تي رستن تي جاءِ جاءِ تي ڪيمپ لڳايا ويا آهن جتي ڪارڪنن جي لاءِ پاني ۽ کائڻ جو به انتظام هوندو. ريلي پنجاب هائوس کان مارگلا روڊ، ميريٽ هوٽل سگنل کان ڊي چوڪ کان گذري ۽ ڊي چوڪ تي اسلام آباد جي مختلف سيڪٽرن مان جمع ٿيل ڪارڪن استقبال ڪيو،  ريلي ڊي چوڪ کان جناح ايونيو ۽ ايڪسپريس هاءِ وي کان فيض آباد پهچندي، راولپنڊي ۾ سمورن چوراهن تي پاڻي، کاڌي ۽ سائونڊ سسٽم جا ڪيمپ لڳا ويا هئا، وزارت تان هٽائڻ بعد اڳوڻو وزير اعظم نواز شريف اسلام آباد کان لاهور روانو، جڳهه تي متوالن جا هجوم، 10 منٽن جو سفر  6 ڪلاڪن ۾ طئي ٿيو، عوام جي پيهه سبب نواز شريف جي  قيام جو منصوبو تبديل ڪيو ويو، رات پنجاب هائوس راولپنڊي ۾ گذارڻ بعد صبح جهلم جي لاءِ روانو ٿيندو،  جڏهن ته ريلي مريڙ چوڪ کان ڪچهري کان ٿيندي جي روڊ تي داخل ٿيندي. ريلي جي استقبال جي لاءِ ڪچهري چوڪ تي وڪيل ۽ راولپنڊِ ڪينٽ جا سمورا پارليامينٽرينز موجود هوندا، ريلي ڪچهري کان ايوب پارڪ، ڪهوٽا موڙ ۽ ٽي چوڪ پهچندي، ريلوي روات بازار، چڪ بيلي اسٽاپ، مندره ۽ گوجر خان کان گذرند . ريلي ڪامونگي، مريد ڪي ۽ شاهدره کان ٿيندي لاهور ۾ داخل ٿيندي، سوهاوه، دينا، جهلم سرائي عالمگير، کاريان ۽ لالي موسيٰ کان گذرندي. ذريعن جو چوڻ آهي ته ريلي دوران نواز شريف جي ڪچهري چوڪ راولپنڊي، روات بازار، گوجر خان، جهلم، لالا موسيٰ، گجرات ۽ وزير آباد ۾ عوام سان خطاب جو امڪان آهي. گهرو وزارت موجب اڳوڻي وزير اعظم نواز شريف کي بلٽ پروف گاڏي ۾ لاهور آندو ويندو ۽ سيڪيورٽي ڪليئرنس کان پوءِ ان کي گاڏي کان ٻاهر نڪرڻ جي اجازت هوندي. صوبائي گهرو وزارت جي ذريعن جو چوڻ آهي ته ريلي جي رستي ۾ بازار بند رکيا ويا آهن ۽ پوليس جا هٿياربند اهلڪار ۽ نشاني باز ڇتين تي مقرر ڪيا ويا آهن. راولپنڊي ۾ پوليس ريلي جي رستي ۾ ايندڙ گهرن ۽ دڪانن جي مالڪن کان حلف ناما ورتا آهن جنهن موجب انهن کان حلف ورتو ويو آهي ته پنهنجي مڪان يا دڪان کي قانون خلاف استعمال ٿيڻ نه ڏينداسين، پنهنجي دڪان يا مڪان جي ڇت تي ڪنهن کي حرڪت نه ڪرڻ ڏينداسين جڏهن ته ريلي روڊ تي شڪي ماڻهن جي نشاندهي ڪندس. ڪنهن به ناخوشگوار واقعي کان بچڻ جي لاءِ جي ٽي روڊ تي موجود تحريڪ انصاف جي آفيس کي بند رکيو ويندو ۽ پي ٽي آءِ اڳواڻن کان ريلي جي رستي ۾ گڙٻڙ نه ڪرڻ جو يقين ورتو ويو. روانکي کان اڳ اڳوڻي وزير اعظم نواز شريف چيو آهي ته عوام جا ٿورا مڃڻ ۽ هڪ مشن کڻي وڃي رهيو آهيان.  پنجاب هائوس اسلام آباد کان روانگي جي موقعي تي وزير اعظم شاهد خاقان عباسي ۽ ٻين پارٽي اڳواڻڻ سان غير رسمي ڳالهه ٻولهه ڪندي نواز شريف چيو ته خواهش آهي ته شاهد خاقان عباسي ايندڙ مدي لاءِ وزير اعظم رهي، جيڪو ڪم مون شروع ڪيو هاڻ هي ان کي مڪمل ڪندو. هن چيو ته شهباز شريف پنجاب جي جان ۽ پاڪستان جي شان آهي، هن پنجاب کي رول ماڊل بڻايو آهي، شهباز شريف اڃان به گهڻو ڪجهه ڪرڻو آهي.  پنهنجي گهر وڃي رهيو آهيان ان جي پٺيان ڪو به مقصد ناهي، هڪ مشن کڻي وڃي رهيو آهيان، جنهن عوام مون کي چونڊيو ان جا ٿورا مڃڻ لاءِ وڃي رهيو آهيان. هن وڌيڪ چيو ته توهان سڀني جي لاءِ نيڪ خواهشون آهن، الله اسان کي پاڪستان جي ترقي ۽ عوام جي خدمت جي توفيق ڏئي.

 

سڀ چون ٿا ناانصافي ٿي، عوام پانامه ڪيس جو فيصلو قبول ناهي ڪيو: وزير اعظم

اسلام آباد(ويب ڊيسڪ) وزيراعظم شاهد خاقان عباسي چيو آهي ته عوام پاناما ڪيس جو فيصلو قبول ناهي ڪيو، نجي ٽي وي پروگرام ۾ ڳالهائيندي وزيراعظم شاهد خاقان عباسي جو چوڻ هو ته جي ٽي روڊ تان وڃڻ لاءِ سڀني اصرار ڪيو، جي ٽي روڊ تان وڃڻ پارٽي جو فيصلو آهي، هن چيو ته اهو احتجاج ناهي، نواز شريف جي آجيان آهي، عوام پاناما ڪيس جو فيصلو قبول ناهي ڪيو، فيصلي خلاف نظرثاني جي درخواست ڏينداسين، هن چيو ته وزيراعظم نه هجان ها ته اڃا وڌيڪ کلي اظهار ڪريان ها، ٻيون جماعتون به چئي رهيون آهن ته ناانصافي ٿي، وزيراعظم چيو ته ٽيڪس نه ڏيڻ ڏوهه آهي، ان سان رياست ڪمزور ٿيندي آهي.  ٻئي طرف وزيراعظم شاهد خاقان عباسي سان سرتاج عزيز ملاقات ڪئي آهي، وزيراعظم چيو آهي ته بهادر فوج  دهشتگردي خلاف جنگ ۾ تمام گهڻيون قربانيون ڏنيون آهن. وزيراعظم شاهد خاقان عباسي سان اڳوڻي صلاحڪار سرتاج عزيز ملاقات ڪئي. ذريعن موجب، ملاقات دوران ٻنهي اڳواڻن وچ ۾ گڏيل دلچسپي وارن معاملن سميت مختلف معاملن تي خيالن جي ڏي وٺ ڪئي وئي. ملاقات دوران شاهد خاقان عباسي ۽ سرتاج عزيز وچ ۾ ملڪ جي موجوده سياسي صورتحال تي به ڳالهيون ڪيون ويون. ان کان اڳ وزيراعظم شاهد خاقان عباسي  اپر دير ۾ سڪيورٽي فورسز جي اهلڪارن جي شهادت تي ڏک جو اظهار ڪندي چيو آهي ته دهشتگردي خلاف جنگ ۾  پاڪ فوج تمام گهڻيون قربانيون ڏنيون آهن. وزيراعظم چيو آهي ته دهشتگردن جي ڪاررواين جي ڪري حوصلا ڪمزور نٿا ڪري سگهجن. شاهد خاقان عباسي چيو ته اهلڪارن جي شهادت تي کيس تمام گهڻو ڏک پهتو آهي، دهشتگردي خلاف جنگ بقا جي جنگ آهي.

 

اپر دير ۾ دهشتگردن خلاف آپريشن، ميجر سميت ۴ جوان شهيد

اسلام آباد/راولپنڊي (اين اين آءِ/م.ڊ)  اپر دير ۾ دهشتگردن خلاف آپريشن دوران پاڪ فوج جي ميجر سميت ۴ جوان شهيد ٿي ويا، پاڪ فوج جي عوامي رابطن واري اداري (آءِ ايس پي آر) موجب دهشتگردن جي خلاف اپردير جي علائقي تيمر گره ۾ آپريشن دوران ڳجهن ادارن جي ميجر سلمان سميت ۴ جوان شهيد ٿي ويا، آءِ ايس پي آر موجب ڳجهي اداري جي ميجر علي سلمان پنهنجي ٽيم سان گڏ تمر گره ۾ آپريشن ڪري رهيو هو ته شهيد ٿي ويو، جڏهن ته ميجر سان گڏ حولدار غلام نذير، حولدار اختار ۽ سپاهي عبدالڪريم شامل هئا، آءِ ايس پي آر موجب دهشتگردن خلاف گذريل رات شيروٽ ڪئي ۾ ڳجهي اطلاع تي آپريشن شروع ڪيو ويو هو. وزيراعظم شاهد خاقان عباسي تيمر گرهه ۾ ميجر علي سليمان سميت چار فوجي اهلڪارن جي شهادت تي گھري ڏک جو اظهار ڪندي چيو آهي ته دهشتگردي جي خلاف جنگ درحقيقت خودمختيار قوم جي حيثيت سان اسانجي وجود  جي بقا جي جنگ آهي. اڱاري تي وزيراعظم آفيس مان جاري پنهنجي بيان ۾ وزيراعظم چيو ته اسانجي بهادر فوج دهشتگردن کي وڏو  نقصان پهچايو آهي ۽ ان سان گڏڏگڏ بيمثال قربانيون پيش ڪيون آهن، هن چيو ته اسانجي هيروز جي رت جو هر ڦڙو ان ڳالهه جو ثبوت آهي ته اسان پنهنجي ملڪ کي دهشتگرد ماڻهن کان پاڪ ڪرڻ لاءِ قوم جي حثيت سان گڏ آهيون، هن چيو ته اسانجي قانون نافض ڪندڙ ادارن کي اهڙا بزدلاڻا حملا دهشتگردي جي خلاف اسانجي عزم کي ڪمزور نه ٿا ڪري سگھن. وزيراعظم الله تعاليٰ کان شهيدن جي درجن جي بلندي ۽ وارثن جي لاءِصبر جي دعا ڪئي.

 

قوم متحد آهي، دهشتگرديءَ کي پاڙ کان پٽي ڇڏينداسين: ناصر شاهه

ڪراچي(م.ڊ)  سنڌ جي اطلاعات واري صوبائي وزير سيد ناصر حسين شاھ اپردير ۾ شهيد فوجي جوانن کي خراج عقيدت پيش ڪندي چيو ته وطن لاءِ پاڪ فوج جون قربانيون ناقابل فراموش آهن. هن اپردير آپريشن جي شهيدن ميجر علي سلمان ۽ انهن جي ساٿين پاران دهشتگردن سان وڙهندي جام شهادت نوش ڪري قوم جو ڳاٽ فخر سان بلند ڪيو آهي، دهشتگردن خلاف سينا سپر ٿي هميشه پاڪ فوج هراول دستي جو ڪردار ادا ڪيو آهي. هن شهيدن جي پوئنرن سان مڪمل يڪجهتي جو اظهار ڪندي انهن کي صبر جميل عطا ڪرڻ لاءِ الله پاڪ کان دعا ڪئي آهي، هن وڌيڪ چيو ته انهن جون قربانيون رائيگان نه وينديون، دهشتگرديءَ کي پاڙ کان پٽي ڇڏينداسين، قوم متحد آهي ۽ اهڙي مڪروھ ڪارروائين جي ڀرپور مذمت ڪريون ٿا. سنڌ جي اطلاعات واري صوبائي وزير سيد ناصر حسين شاھ پاڪستان ايسوسي ايشن آف پريس فوٽو گرافرز جي نئين چونڊيل ڪابينا کي مبارڪون ڏنيون آهن، اڄ پنهجي جاري ڪيل بيان ۾ صوبائي وزير نئين چونڊيل عهديدارن صدر عرفان علي، نائب صدر ابوالحسن، جنرل سيڪريٽري سيد حامد حسين، خزانچي آصف حسن، جوائينٽ سيڪريٽري عمران علي، گورننگ باڊي جي ميمبرن سيد مسرور عابدي، قيصر خان، آصف راٺور، ايمن سيموئيل ۽ عمران گيلاني لاءِ پنهنجي نيڪ خواهشن جو اظهار ڪيو آهي.

 

آرمي چيف سان سعودي نائب دفاع واري وزير جي ملاقات، خطي جي صورتحال تي ڳالهيون

راولپنڊي (ويب ڊيسڪ): آرمي چيف جنرل قمر جاويد باجوه سان سعودي جي دفاع واري نائب وزير محمد بن عبدالله العيش ملاقات ڪئي آهي، ٻنهي اڳواڻن خطي جي سڪيورٽي صورتحال ۽ گڏيل دلچسپي جي معاملن تي ڳالههٻولهه ڪئي آهي، آءِ ايس پي آر موجب آرمي چيف جنرل قمر جاويد باجوه سعودي نائب دفاع واري وزير محمد بن عبدالله العيش سان ملاقات ۾ چيو ته پاڪستان سعودي عرب سان گڏ ڀائيواري ۽ دفاعي لاڳاپن کي انتهائي اهميت ڏيندو آهي، آرمي چيف حرمين شريفين ۽ سعودي عرب جي جاگرافيائي خودمختياري جي حفاظت جو عزم به دهرايو، آرمي چيف جنرل قمر جاويد باجوه سان ڳالهائيندي سعودي نائب دفاع واري وزير دهشتگردي خلاف پاڪستان جي ڪوششن، ڪاميابين ۽ قربانين کي ساراهيو، سعودي نائب دفاع واري وزير محمد بن عبدالله العيش عالمي معاملن تي پاڪستان جي موقف جي ڀرپور تائيد ڪئي.

 

نواز شريف عوام جي وچ تي وڃڻ وارو فيصلو دير سان ڪيو: خورشيد شاهه

اسلام آباد (اين اين آءِ) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته ريلي ڪڍڻ هر پارٽي جو حق آهي، نواز شريف کي عدالت نااهل قرار ڏئي چڪي آهي، پاڻ کي بچائڻ لاءِ اهو ئي طريقو هو، اپوزيشن اڳواڻ ميڊيا سان ڳالهائيندي چيو ته ڪيترائي ڀيرا چيو هو ته ميان صاحب طاقت جي بدران پارليامينٽ تي ڀروسو ڪيو، ان کي ڀٽي جو فلسفو سمجهه ۾ اچي ويو آهي ته طاقت اصل ۾ عوام ئي آهي، هن چيو ته جڏهن ڪرسي ملندي آهي ته ميان صاحب سڀ ڪجهه وساري ويهندو آهي، نواز شريف جي عوام جي راءِ ۽ سوچ کي سمجهڻ ۾ وڏي دير ڪري ڇڏي، نااهلي تي عوام ڏانهن وڃڻ ۾ نواز شريف تمام دير ڪري ڇڏي، قطري خط ميان صاحب کي نقصان پهچايو، هن چيو ته پ پ ايندڙ چونڊن ۾ سرپرائيز ڏيندي، جيڪڏهن اين اي 120 تي بيگم ڪلثوم نواز کي اميدوار بڻايو ويو ته ن ليگ چونڊ کٽي ويندي، هن چيو ته پي ٽي آءِ سان ڪو به معاملو نه آهي، هوءَ به اپوزيشن ۾ آهي ۽ اسان به.

 

نيشنل ايڪشن پلان تي مڪمل عمل ڪري دهشتگردي جو ناسور ختم ڪيو وڃي: پيپلز پارٽي قيادت

اسلام آباد (اين اين آءِ)پ پ پ  جي چيرمين بلاول ڀٽو زرداري دير بالا ۾ آپريشن دوران پاڪ فوج جي شهيدن کي خراد عقيدت پيش ڪندي چيو آهي ته دهشتگردي جا خاتمي لاءِ سڄي قوم متحدد آهي، هڪ بيان ۾ بلاول ڀٽو چيو ته دير بالا ۾ شهيد ٿيندڙ خاندانن سان مڪمل ٻڌي جو اظهار ڪيون ٿا، هن چيو ته ميجر علي سليمان ۽ انجو ساٿين دهشتگردن سان وڙهندي شهادت جو جام نوش ڪيو. هنن آپريشن جي شهيدن کي ڀيٽآ پيش ڪئي ۽ چيو ته دهشتگردي جي خاتمي لاءِ سڄي قوم متحدد آهي، آصف علي زرداري به شهيدن جي وارثن سان تعزيت جو اظهار ڪيو ۽ چيو ته نيشنل ايڪشن پلان تي مڪمل عمل ڪري دهشتگردي جو ناسور ختم ڪيو وڃي.

 

ٻوڏ جي بچاءَ واري پاليسي تحت ٿورو ڪم وقت اندر ڪيو وڃي ته وڏي نقصان کان بچي سگهجي ٿو : مراد علي شاهه

ڪراچي (اسٽاف رپورٽر) سنڌ جي وڏي وزير سيد مراد علي شاهه چيو آهي ته سندس ٻوڏ جي بچاءَ واري پاليسي اهڙي ريت آهي جيڪڏهن ٿورو ڪم وقت اندر ڪيو وڃي ته وڏي نقصان کان بچي سگهجي ٿو. `A stitch in time saves nine’ ۽ اها پاليسي بندن خاص طور تي حساس هنڌن جي مرمت ۽ سارسنڀال وارن ڪمن لاءِ اپنائڻ گهرجي. هن اها ڳالهه اڄ وزيراعليٰ هائوس ۾ ٻوڏ واري صورتحال بابت اجلاس جي صدارت ڪندي ڪئي. اجلاس ۾ سيڪريٽري آبپاشي سيد جمال شاهه، اسپيشل سيڪريٽري جنيد ميمڻ، ايم ڊي سيڊا محمد خان نظاماڻي، چيف انجنيئر گڊو بئراج فاروق چنار، چيف انجنيئر ڀائي خان لاکو، چيف انجنيئر سکر بئراج رائٽ بينڪ اعجاز شيخ، چيف انجنيئر ڪوٽڙي بئراج عبدالقادر پليجو، چيف انجنيئر (ترقيات) ارشاد ميمڻ ۽ ايگزيڪيوٽو انجنيئر شهباز اختر شريڪ هئا. هن چيو ته هن فلڊ سيزن جي شروع ٿيڻ کان اڳ ڪيترائي اجلاس گهرايا ۽ پري آبڪلاني سيزن لاءِ انتظام ۽ حساس هنڌن کي مضبوط بڻائڻ لاءِ ضروري هدايتون جاري ڪيون. سيڪريٽري آبپاشيءَ وڏي وزير کي بريفنگ ڏيندي چيو ته 9 آگسٽ (اڄ) اپ اسٽريم گڊو بئراج ۾ ڊسچارج پوزيشن 456521 ڪيوسڪ آهي جڏهن ته ڊائون اسٽريم ۾ 453380 ڪيوسڪ آهي. هن چيو ته سنڌو درياهه جي مختلف بندن تي 48 حساس هنڌ آهن. وڏي وزير جي هڪ سوال جي جواب ۾ هن چيو ته حساس هنڌن جو تعين مٽيءَ جي جزن، پراڻي گهارن وارن هنڌن، تاريخي ليڪس ۽ ڇولين جي رفتار کي ڏسندي ڪيو ويندو آهي. سيد جمال شاهه چيو ته سکر بئراج وٽ 27 حساس هنڌ آهن جن مان 9 ليفٽ بينڪ ۽ 18 لاڙڪاڻي ريجن جي رائيٽ بينڪ تي آهن. گڊو بئراج ريجن سکر ۾ 6 حساس هنڌ آهن. هن چيو ته سنڌ ايريگيشن اينڊ ڊرينج اٿارٽي جي حدن ۾ 7 حساس هنڌ آهن جن ۾ 3 ليفٽ بينڪ ڪئنال ايريا واٽر بورڊ بدين ۽ 4 گهوٽڪي فيڊر ڪئنال ايريا واٽر بورڊ تي آهن. ڪوٽڙي بئراج ريجن حيدرآباد ۾ 8 حساس هنڌ آهن. اسپيشل سيڪريٽري ايريگيشن جنيد ميمڻ اجلاس کي ٻڌايو ته سمورن حساس هنڌ تي ڪم جاري آهي. ان تي وڏي وزير چيو ته هي وقت ٻوڏ سان مقابلي ڪرڻ جو آهي. هن چيو ته بندن کي مضبوط ڪرڻ جو ڪم اڳئي شروع ٿيڻ گهرجي ۽ آف فلڊ سيزن تائين جاري رهڻ گهرجي. چيف انجنيئر سکر بئراج رائيٽ بينڪ ريجن اعجاز شيخ چيو ته درياهه جي کاٻي پاسي کي ڪنٽرول ڪرڻ لاءِ سکر-لاڙڪاڻو (ايس ايل) بند ۽ لاڙڪاڻو-سيوهڻ (ايل ايس) بند تعمير ڪيا ويا. پاڻي جي وهڪري ۽ هٽنگ ايڪشن جي ڪري درياهه جو پاڻي ايس ايل ۽ ايل ايس بندن جا مختلف حصا متاثر ٿيا آهن جنهن جي نتيجي ۾ نوان فرنٽ لائين بند ۽ سيڪنڊ لائين ڊفينس بند جوڙيا ويا آهن. هن ٻڌايو ته هڪڙا واري هنڌ وٽ (ايل ايس بند ڀرسان موهن جو دڙو) حساس هنڌ هو، جنهن جي اسٽون پچنگ ڪئي وئي آهي ۽ رتوديرو ڀرسان موري لوپ بند به حساس هنڌ هو، جنهن جي پڻ سٺي ريت اسٽون پچنگ ڪئي وئي آهي. اجلاس کي ٻڌايو ويو ته پري آبڪلاني اپاءَ پهرين جون کان شروع ڪيا ويا آهن ۽ بندن جي بهتر ريت مرمت ڪئي وئي آهي. ڪچي جي زمين به بندن جي هرهڪ اڌ ڪلوميٽر بعد تعمير ڪئي وئي آهي ۽ اتي آبڪلاني مٽيريل جهڙوڪ طوفاني ليپس، ٽارچز، خالي ٻوريون، ٿمبا وغيره جو هنگامي صورتحال کي منهن ڏيڻ لاءِ حساس هنڌن تي اسٽاڪ ڪيو ويو آهي. وڏي وزير چيف انجنئيرز کي هدايت ڪئي ته اهي حساس هنڌ تي پٿرن جي پچنگ واري ڪمن جي نگراني ڪن. هن چيو ته اوهان وٽ خاطر خواهه بجيٽ آهي انڪري بهتر ڪم ٿيڻ گهرجي. هن چيو ته گڊو بئراج وٽ 3 لک ڪيوسڪ يا ان کان ڪجهه گهٽ ٻوڏ رهندي.

 

ن ليگ جو جنون مٿي چڙهي ويو، عوام جو حق حاڪميت تسليم ڪيو وڃي: سعد رفيق

اسلام آباد(ويب ڊيسڪ) ريلوي واري وفاقي وزير خواجا سعد رفيق چيو آهي ته ن ليگ جو جنون مٿي چڙهي ويو آهي، جڏهن ته عوامي وزير اعظم نواز شريف جي لاءِ اهل وطن وٽ احترام آهي.زرداري دور ۾ هڪ ميگا واٽ بجلي پيدا نه ٿي، اسان جو رستو روڪيو ويو، هن چيو ته اسان پاڪستان جي ترقيءَ جو سفر بيهڻ ناهي ڏنو، جتي اسان چونڊون کٽيون، چيو ويو اتي ڌانڌلي ٿي، جتي شيخ رشيد کٽيو، اتي ڌانڌلي نه ٿي، هن چيو ته نواز شريف کي اقتدار کان ڪڍي ڇا مليو؟، 4 سال نواز شريف جي قيادت ۾ سازشن جو مقابلو ڪيو، هن چيو ته نواز شريف جي حڪومت ڪراچي ۾ امن واپس آندو، خواجا سعد رفيق چيو ته بلوچستان ۾ قومپرستن جي حڪومت بڻائي، اڄ بلوچستان قومي وهڪري ۾ تيزيءَ سان واپس اچي رهيو آهي، ڪراچي وانگر بلوچستان جو امن به واپس اچي رهيو آهي، زرداري دور ۾ هڪ ميگا واٽ بجلي پيدا نه ٿي، اسان جي رستي ۾ ڌرڻا نه ڏنا ويا هجن ها ته اوندهه مان جان ڇٽي وڃي ها.  سماجي رابطن واري ويب سائيٽ ٽوئيٽر تي ريلوي واري وفاقي وزير خواجا سعد رفيق چيو آهي ته عوام جو حق حاڪميت تسليم ڪيو وڃي، ووٽ جي حرمت مقدم هئڻ گهرجي جڏهن ته چونڊيل وزير اعظم جي مينڊيٽ جو احترام ناهي ڪيو ويو ان ڪري ناانصافي ۽ استحصال ڪنهن طور تي قبول ناهي. هن چيو ته هزارين گاڏيون روانگي جي ويجهو آهن ۽ ماڻهو پنهنجي قائد جي هڪ جهلڪ ڏسڻ لاءِ بيتاب آهن.

 

نواز شريف جي ريليءَ جي شروعات مايوس ڪندڙ رهي: اعتزاز احسن

اسلام آباد (ويب ڊيسڪ): پيپلز پارٽي اڳواڻ اعتزاز احسن چيو آهي ته مصدق ملڪ ڪجهه دير اڳ چيو هيو ته نواز شريف سان گڏ 280 گاڏيون آهن، سينيٽ ۾ خيالن جو اظهار ڪندي اعتزاز احسن چيو ته جيڪڏهن 400 گاڏيون به مڃي وٺون ته وڌ کان وڌ 2000 ماڻهو هوندا، هن چيو ته نواز شريف جي ريليءَ جي شروعات مايوس ڪندڙ رهي،