تازيون خبرون

Daily Archives: August 9, 2017

قاضي احمد لڳ مسافر ڪوچ جو چنگچي رڪشا کي ٽڪر، هڪ ئي ڪٽنب جا ٦ ڀاتي اجل جو شڪار

قاضي احمد(رپورٽر)  قاضي احمد لڳ مسافر ڪوچ جي چنگچي رڪشا کي ٽڪر جي نتيجي ۾ ٽن عورتن ۽ ٻن ٻارن سميت هڪ ئي ڪٽنب جا ٦ ڀاتي فوت ٿي ويا آهن. رپورٽ مطابق قاضي احمد لڳ قومي شاھراھ تي چانڊيہ پئٽرول پمپ جي سامهون سکر کان ڪراچي ڏانهن ويندڙ تيز رفتار مسافر ڪوچ اڳيان ويندڙ چنگچي رڪشا کي زوردار ٽڪر هنيو جنهن جي نتيجي ۾ سرڪاري کوھ جي ڳوٺ پنجو سولنگي جي بدنصيب ھڪ ئي گھر جا ۵ ڀاتي ٿڏي تي ئي اجل جو شڪار ٿي ويا جن ۾ رڪشا ڊائيور ميھار سولنگي، مسمات گل بي بي سولنگي، مسمات مريم سولنگي، معصوم ٻارڙا شازيہ سولنگي ۽ شاھزيب سولنگي شامل آهن جڏھن تہ ٦ ڄڻا زخمي ٿي پيا جن مان زخمي عورت مسمات فاطمہ سولنگي زخمن جا سور نہ سهندي فوت ٿي ويئي جنهن سان فوتين جو انگ ٦_ ٿي ويو آھي جڏھن تہ ۵ ڄڻا زخمين ۾ خالدہ، صاحبہ، زاھدان، اعجاز ۽ پرويز سولنگي شامل آهن. لاشن ۽ زخمين کي پوليس توڙي ايڌي ايمبولينس ذريعي قاضي احمد اسپتال آندو ويو حادثي دوران اسپتال ۾ ھنگامي حالتون لاڳو ڪيون ويون پر ڊاڪٽرن جي کوٽ سبب زخمي تڙپندا رهيا. واقعي بابت مليل ڄاڻ موجب مذڪوره بدنصيب خاندان رڪشا ۾ سوار ٿي قاضي احمد شھر ڏانهن اچي رهيو هو تہ هڪ خوفناڪ حادثي جو شڪار ٿي ويو.

 

فلم ۾ مداحن جي راءِ کي نظر ۾ رکڻ گهرجي: اجي ديوگن

ممبئي(شوبز نيوز) بالي ووڊ اداڪار اجي ديوگن چيو آهي ته مداحن جي راءِ کي پڻ نظر ۾ رکڻ گهرجي. ڀارتي سڌ سماءَ وارن ذريعن موجب اداڪار اجي ديوگن چيو آهي ته سندس شهرت سڄي دنيا ۾ وڏي انگ ۾ موجود سندس مداحن جي محبت ۽ قدرداني سبب آهي ۽ هو جڏهن ڪا فلم ٺاهيندو آهي ته مداحن جي خواهشن ۽ چاهتن کي ضرور ذهن ۾ رکندو آهي. هن چيو ته اسان جا مداح اسان کي اسٽار بڻائيندا آهن، اسان سان محبت ڪندا آهن ته اسان کي پڻ پنهنجن مداحن جي راءِ کي نظر ۾ رکڻ گهرجي. هن چيو ته سندس فلم ”گول مال فور“ ۽ ”بادشاهو“ به منفرد فلمون آهن. ٻنهي جا موضوع هڪ ٻئي کان مختلف آهن ۽ مداحن کي ۲ مختلف فلمون ڏسڻ جو موقعو ملندو ۽ کيس ان حوالي سان ڪا پريشاني ناهي.

 

ڪجهه ماڻهو اهو فيصلو نٿا ڪري سگهن ته ڪروڙين ماڻهن کي ڇا ڏسڻ گهرجي: ننديتا داس

ممبئي(شوبز نيوز)بالي ووڊ اداڪارا ۽ هدايتڪارا ننديتا داس چيو آهي ته جيڪڏهن فلم سنسر بورڊ پنهنجي موجوده پاليسي کي جاري رکيو ته پوءِ هي سماج اڳتي نه وڌي سگهندو. هوءَ ڀارتي سنسر بورڊ طرفان نوازالدين صديقي جي ايندڙ فلم موشائي بندوق باز مان ۴۸ سين ڪٽڻ واري خبرن تي ڳالهائي رهي هئي. ننديتا داس چيو ته مان شروع کان ئي سينسر شپ جي خلاف رهي آهيان ڇوجو مون جڏهن ۲۰۰۸ع ۾ فلم فراق ٺاهي هئي ته مون کي به سنسرشپ واري معاملي سبب ساڳي صورتحال مان گذرڻو پيو هو. مون کي خبر ناهي ته ڪميٽي ۾ شامل ڪجهه ماڻهو اهو فيصلو ڪيئن ٿا ڪري سگهن ته پوري قوم کي ڇا ڏسڻ گهرجي ۽ ڇا نه ڏسڻ گهرجي. هن چيو ته اڄڪلهه انٽرنيٽ تي سڀ ڪجهه ڏسي سگهجي ٿو، انهن منظرن کي سينسر ڪرڻ منافقت ٿيندي ڇوجو اوهان اهي ساڳيا سين انٽرنيٽ يا پائريٽ ٿيل ورزن وسيلي ڏسي سگهو ٿا. هن چيو ته ڪنهن فلم بابت ماڻهن جا رايا مختلف ٿي سگهن ٿا ڇوجو هر ماڻهو جي سوچ ۽ پسند پنهنجي پنهنجي هوندي آهي، ٻين ملڪن ۾ ۱۸ سالن کان وڌيڪ ڄمار وارن ماڻهن کي اهي فلمون ڏسڻ جي اجازت حاصل آهي ۽ اهو انهن تي آهي ته اهي انهن کي سٺو سمجهن ٿا يا خراب.

 

نئين ٽيلنٽ جي ڳولا ۽ ڪرڪيٽ کي هٿي وٺرائڻ لاءِ گراس روٽ ليول تي ڪم ڪرڻ ضروري آهي: يونس خان

مردان(اسپورٽس نيوز) پاڪستان ڪرڪيٽ ٽيم جي اڳوڻي ڪپتان يونس خان چيو آهي ته نئين ٽيلنٽ جي ڳولا ۽ ڪرڪيٽ کي هٿي وٺرائڻ لاءِ گراس روٽ ليول تي ڪم ڪرڻ ضروري آهي. ڇاڪاڻ ته اهڙي طرح نئين صلاحيت سامهون اچي سگهندي. اهڙن خيالن جو اظهار هن مردان ۾ ڪلچرل جرنلسٽس فورم مردان جي ڊيپي ڪنوينٽر عبدالله شاهه بغدادي سان هڪ ملاقات دوران ڪيو. هن چيو ته ڪرڪيٽ کي هٿي وٺرائڻ لاءِ پاڪستان سپر ليگ سڄي پاڪستان ۾ ڪرائي وڃي ۽ ان لاءِ گراس روٽ ليول تي ڪم ڪرڻ جي ضرورت آهي. يونس خان چيو ته راندين جي ترقي لاءِ هو پنهنجو ڪردار ادا ڪندو رهندو.

 

نواز ليگ ۽ فرشتن هلندڙ قانوني جنگ: صاحب خان ڀٽي

سپريم ڪورٽ پاران نااهل قرار ڏنل اڳوڻو وزيراعظم نوازشريف چئي رهيو آهي ته هاڻ هڪ نظرياتي سياستدان ٿي ويو آهي۽ عوام ساڻس گڏ آهي، ان حوالي سان اسلام آباد کان جي ٽي روڊ تان لاهور  ريلي جي صورت ۾ روانگي جون تياريون به ڪري رهيوآهي، جنهن سبب ڪجهه ماڻهن کي پريشاني به ٿي رهي آهي ته ڪجهه وي خوفزده به نظر اچي رهيا آهن، ڇاڪاڻ ته اڳ ۾ جڏهن نوازشريف لاهور کان اسلام آباد ريلي ڪڍي هئي ته ان وقت جي صدر آصف علي زرداري سندس سپريم ڪورٽ جي چيف جسٽس کي بحال ڪرڻ جو اعلان ڪيو هو پر هن ڀيري ريلي لاهور کان نه پر اسلام کان نڪري رهي آهي، نااهل قرار ڏنل اڳوڻو وزيراعظم جيڪو ماضي ۾ يوسف رضا گيلاني جي نااهلي تي تمام گهڻو خوش نظر اچي رهيو  ۽ هاڻ هو پاڻ گيلاني کان به وڌيڪ  پريشان نظر اچي رهيو آهي، ڇاڪاڻ ته گيلاني صرف ڪجهه سالن لاءِ نااهل ٿيو هو پر نوازشريف هڪ ته پارٽي سربراهه آهي ته ٻيو وزيراعظم هيو، ان وقت ئي کيس نااهل قرار ڏنو ويو، جنهن سبب نوازشريف گيلاني جي ڀيٽ تمام گهڻو پريشان آهي،

جيتوڻيڪ  ظاهري طور نواز ليگ جا اڳواڻ اهو چئي رهيا آهن ته هو سپريم ڪورٽ جي فيصلي کي نه ٿا مڃين ۽  تمام جلد سپريم ڪورٽ ۾ نظرثاني جي اپيل داخل ڪرائي ويندي، جيڪڏهن ڏٺو وڃي ته نوازشريف تي تاحيات نااهلي واري ٺپو لڳي چڪوآهي، هاڻ ڀلي نواز ليگ ڪجهه به چون پر اهو ٺپو شايد تاريخ ۾ ڪڏهن به ختم نه ٿي سگهندو، آرمي چيف جنرل قمر باجوه به پنهنجي بيان ۾ چئي چڪو آهي ته ملڪ اندر آئين قانون جي بالادستي قائم رهندي. بهرحال پاناما ليڪس وارو معاملو صرف نوازشريف جي  تاحيات نااهلي تي ختم نه ٿو ٿئي، اڃا به کوڙ سارا نالا پاناما ليڪس ۾ آهن، جن خلاف به جاچ ٿيڻ ضروري آهي،

جيڪڏهن صرف نوازشريف تي پاناما ليڪس وارو ختم ٿي ويو ته اهو درست عمل نه هوندو ۽ انهن ماڻهن خلاف به قانوني ڪارروائي جي ضرورت آهي، جن ڀتي خوري ۽ خيرات جي پيسن مان آفشور ڪمپنيون کوليون آهن. جيڪڏهن ٻين خلاف وڏي عدالت نوٽيس نه ورتو ته اهو ئي تاحيات نااهل قرار ڏنل اڳوڻو وزيراعظم به عدالت عظميٰ ڏي آڱريون کڻندو رهندو. هونئن ته جماعت اسلامي جي امير سراج الحق به پنهنجي بيان چيو آهي ته پاناما ۾ 4 سئو کان وڌيڪ ماڻهن جا نالا شامل آهن، جيڪڏهن انهن خلاف به ڪارروائي  ٿي ته ملڪ فري ڪرپشن بڻجي ويندو ۽ سندن مهم به ڪامياب ٿي ويندي. ڪجهه سياسي اڳواڻ چئي رهيا آهن ته ملڪ ۾ قانون سڀني لاءِ برابر آهي ۽  کين اها اميد به آهي ته  جن به ماڻهن جا پاناما ليڪس ۾ نالا آهن، انهن جو احتساب ضرور ٿيندو.

بهرحال تحريڪ انصاف، جماعت اسلامي  ۽ ٻيون پارٽيون نوازشريف کي تاحيات نااهل قرار ڏيڻ ۾ ڪامياب ٿي ويون آهن ۽ هاڻ اليڪشن ۾ نوازشريف جي ڪٽنب مان اهڙوڪو به شخص نه بچيو آهي،جيڪو ايندڙ اليڪشن ۾ چونڊ ۾ حصو ڀرپور نموني ڪامياب ٿي سگهي، مطلب ته عمران خان جي لاءِ رستا صاف ٿي ويا آهن، ڪي پي ۾ هونئن به تحريڪ انصاف جي حڪومت قائم آهي، جتي امن امان جي صورتحال به ٻين صوبن جي ڀيٽ بهتر نه آهي پر ان باوجود عمران خان اها دعويٰ ڪندو رهيو آهي ته هنن خيبرپختونخواهه ۾ وڏا ڪم ڪرايا آهن، جيئن ته نوازشريف جي تاحيات نااهل ٿيڻ بعد عمران خان به ڀرپور نموني ميدان ۾ اچي ويو آهي ’پر مٿس اڃا به تلوار لٽڪيل آهي، جيڪا ڪڏهن به مٿس ڪري سگهي ٿي ۽ هو به پوئتي ٿي سگهي ٿو، ڇاڪاڻ ته هڪ طرف تحريڪ انصاف جا اڳواڻ پارٽي کي ڇڏي رهيا آهن ته ڪجهه عورتون سندس خلاف باغي به ٿيون آهن ۽ عمران خان تي الزام لڳائي رهيون آهن ته سندس پارٽي ۾ هوندي ڪنهن به عورت جي عزت محفوظ نه هوندي، ايتري قدر جو سندس اڳوڻي گهر واري ريحام خان به اهو چئي رهي آهي ته جيڪو  شخص پنهنجي گهر ۾ انصاف نه ڪري سگهي، اهو ٻين کي ڪهڙو انصاف  ڏيندو.

هن وقت هڪ طرف عمران خان باغي ڪارڪنن کي منهن ڏيڻو پئجي رهيو آهي ته ٻئي طرف وري نواز سرڪار به سندس خلاف سندرا ٻڌي ميدان تي لهي آئي آهي، جنهن سبب ملڪ هڪ ڀيرو ٻيهر افراتفري وارو ماحول بڻجي ويو آهي، سپريم ڪورٽ جي فيصلي کانپوءِ تحريڪ انصاف سربراهه عمران خان جي چهري تي خوشي نظر اچڻ گهرجي ها پر تحريڪ انصاف سربراهه عمران خان نه فيصلي جي وقت سپريم ڪورٽ ويو ۽ نه ئي وري وڏي عدالت جي فيصلي  بعد سندس چهري تي ڪا خوشي نظر آئي، جيتوڻيڪ تحريڪ انصاف سربراهه پريس ڪانفرنس ڪئي ۽ شڪراني جو ڏينهن به ملهائڻ جو اعلان ڪيو، ايتري قدر جو سڄي ملڪ تحريڪ انصاف جي ڪارڪنن جشن به ملهايو پر عمران خان جي چهري تي اها خوشي نظر نه آئي، جنهن کي عوام ڏسڻ چاهي پيو،

اڳ ۾ جڏهن تحريڪ انصاف سربراهه عمران خان جلسن ۾ وڏي جوش سان تقريرون ڪندو هو ۽ وڏا  وڏا اعلان ڪندو هو پر اڄڪلهه سندس چهرو  لٿل نظر اچي رهيو آهي، ان جا به ڪيترائي سبب آهن، هڪ ته سندس خلاف عائشه گلا لئي ميدان تي اچي وئي آهي ته ٻيو وري سندس خلاف اليڪشن ڪميشن پرڏيهي پارٽي فنڊنگ ڪيس ۽ حنيف عباسي جي درخواست تي سندس خلاف نااهلي جا ڪيس هلي رهيا آهن، ڀلي کڻي هن وقت ميڊيا جو ڌيان سندس ڪيسن ڏانهن نه آهي ۽ نه ئي ميڊيا سندس ڪيسن کي ايتري سنجيدگي سان ڏسي رهي آهي پر سندس خلاف هلندڙ ڪيس به تمام وڏا سنگين آهن، ڇاڪاڻ ته عدالت ۾ سندس پارٽي تي پرڏيهي جو جيڪو ڪيس هلي رهيو آهي، ان ڪيس ۾ موقف اختيار ڪيو ويو آهي ته تحريڪ انصاف آمريڪا ۽ ڀارت سميت ٻين ملڪن کان  فنڊ ورتا آهن، جنهن بابت حنيف عباسي جي وڪيل دليل ڏيندي چيو  هو ته آمريڪا ۽ ڀارت کان فنڊ وٺڻ هڪ وڏو سنجيده معاملو هو.

بهرحال  هن ملڪ ۾ جيڪڏهن ڪو ڀارت يا آمريڪا کان وٺندو آهي ته اهو سمجهيو ويندو آهي ته اهو غلط آهي ۽ ان  پارٽي تي ايترا ته الزام لڳايا ويندا آهن جو ان شخص جو اڳتي هلڻ نه ممڪن ٿي ويندو آهي، واحد شخص عمران خان آهي جو هن وقت تائين مٿس پرڏيهه کان فنڊ وٺڻ تي ڪا خاص پڇا ڳاڇا نه ڪئي وئي آهي. بهرحال  اهو معاملو هاڻ عدالت ۾ آهي، ڏسون ٿا وڏي عدالت ان  سنجيده معاملي تي ڪهڙو فيصلو ٿي ڏي پر سڀ کان اڳ وڏو مسئلو اهو آهي ته نوازشريف جي تاحيات نااهلي بعد ملڪ اندر ظاهري طور تي ڪو وڏو بحران نظر نه اچي رهيو آهي پر  نوازشريف جي اسلام آباد کان لاهور قافلي جي صورت ۾ روانگي بعد حالتون تبديل ٿي سگهن ٿيون ڇاڪاڻ ته ميڊيا تي به ان ريلي بابت تمام گهڻو بحث ٿي رهيو آهي، ايتري قدر جو  سينيئر تجزيي نگار به نوازشريف کي مشورو ڏئي رهيا آهن ته هو  جلسن ۽ جلوسن ۾ پنهنجي سڪيورٽي جو خاص خيال رکي، اهو صرف ان ڪري چئي رهيا آهن ته هن وقت ملڪ جون حالتون ايتريون بهتر نه ٿيون آهن، هن وقت به هن ملڪ ۾ جيڪي دهشتگردي پلجي رهيا آهن، اهي ڪنهن به وقت ملڪ ۾ ڪارروائي ڪري سگهن ٿا،

هونئن ته نواز ليگ طرفان  اسلام آباد کان لاهور طرف جيڪو قافلو نڪري رهيو آهي، ان بابت واضح طور اهو نه چيو ويو آهي ته اهو قافلو ڇاجي ڪري ڪڍيو پيو وڃي، ريلوي واري وفاقي وزير خواجا سعد رفيق ته پنهنجي بيان چئي چڪو  آهي ته هو سپريم ڪورٽ جي فيصلي کي نٿا مڃين ۽ هو اهو به چئي چڪو  آهي ته کين باغي نه بڻايو وڃي، اهو به چيو ته نوازشريف سندن ليڊر آهي ۽ هميشه رهندو. پر جيڪڏهن ڏٺو وڃي ته هاڻ حالتون تبديل ٿي چڪيون آهن ۽ سياست  هڪ نئون رخ اختيار ڪري ورتو آهي، سڀني پارٽين طرفان اهڙي ته ٻولي استعمال ڪئي پئي وڃي، جيڪا ٻڌي هر هڪ جو ڪنڌ شرم  وچان جهڪي رهيو آهي. ڪيتريون ئي اهڙيون پارٽيون آهن جيڪي اخلاق جي دائري ۾ رهي ڪري نه ڳالهائي رهيون آهن، جنهن جو ثبوت ڪجهه ڏينهن اڳ پنجاب جي قانون واري وزير رڻا ثناءَ الله جي بيان مان لڳي ٿو ته جنهن چيو هو ته عائشه احد هڪ پيشه ور عورت آهي، جنهن تي کيس حرجاڻي جو نوٽيس به موڪليو ويو آهي،

ان کان علاوه تحريڪ انصاف جي باغي ڪارڪن عائشه گلا لئي  کي به ڌمڪيون ملي رهيون آهن ۽ سندس خلاف سوشل ميڊيا تي به واويلا ٿي رهي آهي، مطلب ته عورتن کي به سياست اندر بدنام ڪرڻ جو سلسلو شروع ٿي ويو آهي، جيڪو  سياسي اڳواڻن کي نٿو سونهين، تنهن جي ڪري سمورين پارٽين کي گهرجي ته اخلاق جي دائري ۾ هڪ ٻئي تي الزام لڳايا وڃن ته تمام بهتر ٿيندو. جيتوڻيڪ اخلاقيات ڪميٽي به جڙي چڪي آهي پر ان تي عمل ٿيندي نظر نه پيو اچي، جيڪڏهن ميڊيا تي  عورتن خلاف اهڙي قسم جا بيان  ڏيڻ جو سلسلو بند نه ٿيو ته اسان اهو ئي سمجهنداسين ته  اهو  نئين پاڪستان جو ڊيمو آهي ۽ جيڪڏهن نئون پاڪستان ٺهيو ته ان جي حالت ان کان به وڌيڪ بگڙيل هوندي جتي عورتن جي عزت نالي ڪا به شي نه هوندي. بهرحال نواز ليگ جي ريلي نوازشريف جي نااهلي جي ردعمل ۾ ڪڍي پئي وڃي يا وري ڪنهن تي دٻاءُ وجهڻ لاءِ ڪڍي پئي وڃي ان سان سپريم ڪورٽ جي فيصلي تي هاڻ ڪو به فرق نه پوندو، ڇاڪاڻ ته نوازشريف هاڻ تاحيات نااهل ٿي چڪوآهي، ان کي هو تسليم به ڪري چڪو آهي، جيڪڏهن نوازشريف کي سپريم ڪورٽ جوفيصلو قبول نه هجي ها ته پوءِ هو استعيفيٰ ڇو ڏئي ها، ڇاڪاڻ ته کيس پڪ ٿي وئي هئي ته هاڻ سندس آخري ڏينهن آهن ۽ هو ٻيهر ڪڏهن به وزيراعظم بڻجي نه سگهندو. جيڪڏهن ڏٺو وڃي ته اهو هن ملڪ جي تاريخ ۾ پهريون ڀيرو ٿيو آهي جو پنجاب جي هڪ سياستدان کي عدالت مان سزا ملي هجي، هونئن ته سنڌ سان تعلق رکندڙ ذوالفقار علي ڀٽي کي وڏي عدالت موت جي سزا ٻڌائي هئي، جنهن کي ميثاق جمهوريت تي صحيحون ڪرڻ بعد نوازشريف اهو تسليم ڪيو هو ته ڀٽو جي ڦاهي عدالتي قتل هو، بهرحال هاڻ نوازليگ ڪو به دڳ نه بچيو آهي ۽ نوازشريف جي هي ريلي سندس ڳچي ۾ پئجي ويندي ۽ پارٽي به ڌڙا بندي جو شڪار ٿي ويندي، هونئن به اڳ ئي نوازليگ ۾ اختلاف به هلي رهيا آهن. جيڪي اڳتي هلي الائي ڪهڙي صورت اختيار ڪندا.

sahibalisindhi@gmail.com

 

 

ٿرين لاءِ خوشحاليءَ جو خواب! : منير نارائي

محترمه بينظير ڀٽو پنهنجي حڪومتي دور ۾ جنهن گورڊن وو پاور پراجيڪٽ جو معاهدو ڪيو هو، جيڪڏهن ان کي سياسي مخالفت جي ور چاڙهي ختم  نه ڪيو وڃي ها ته اڄ اسان کي هن بدترين لوڊشيڊنگ کي منهن نه ڏيڻو پوي ها، پر بدقسمتي سان نواز شريف محترمه کان پوءِ اقتدار ۾ ايندي ئي ان منصوبي کي ختم ڪري ڇڏيو هو، جنهن جو ڪيتو اڄ سڄي ملڪ جو عوام لوڙي رهيو آهي. سڀني کي خبر آهي ته ٿر ۾ ايترو ڪوئلو موجود آهي جو جنهن کي استعمال ۾ آڻجي ته لڳاتار 200 سالن تائين ان مان بجلي پيدا ڪري سگهجي ٿي، اهو ڪوئلو 1950 ۾ دريافت ٿيو هو پر اڃا تائين ان جو استعمال نه ٿي سگهيو آهي. اسان جي پاڙيسري ملڪ هندستان واري ٿر ۾ ڪوئلي جا جيڪي ذخيرا هئا انهن اهي ڪڍي استعمال ڪري ختم به ڪري ڇڏيا آهن ۽ اسان اڃا تائين ان کي استعمال نه ڪري سگهيا آهيون. هاڻي جڏهن صوبائي توڙي وفاقي حڪومت کي توانائي جي بحران جي خاتمي جي لاءِ ٻي ڪا واهه نظر نٿي اچي ته انهن سنجيدگي جو مظاهرو ڪندي ان ڪوئلي کي استعمال ڪرڻ جي لاءِ عملي قدم کنيا آهن ۽ ان ڪوئلي کي ٻاهر ڪڍڻ جي لاءِ ڪم شروع ڪيو ويو آهي پر روايتي مخالفت شروع ٿي وئي آهي.

ڪجهه ڏينهن اڳ سي پيڪ منصوبي تحت ٿر ۾ پاور پلانٽ لڳائيندڙ ڪمپني اينگرو پاران لڳايل پاور پلانٽ ۽ گوڙاڻو ڊيم جو دورو ڪرايو ويو ان موقعي تي پروجيڪٽ جي جنرل مئنيجر برگيڊيئر رٽائرڊ طارق قادر لاکير بريفنگ ڏيندي اسان کي ٻڌايو ته سنڌ اينگرو ڪول مائيننگ ڪمپني پاران ٿر جي بلاڪ ٽو مان ڪوئلو ڪڍي ان مان بجلي پيدا ڪرڻ واري رٿا جو ڪم تيزي سان جاري آهي، هي هڪ اهڙي بنيادي اهميت جي رٿا آهي جنهن سان نه رڳو ٿر پر سڄي سنڌ جي تقدير بدلجڻ پئي وڃي. هن ٻڌايو ان رٿا هيٺ لاڳاپيل کاڻ مان پاڻي جي نيڪال جي اسڪيم بابت ماڻهن جون ڪجهه غلط فهميون آهن ۽ ڪجهه حلقن پاران حقيقتن جي ابتڙ ناڪاري پروپيگنڊا به ڪئي پئي وڃي، جن جي وضاحت ڪرڻ ۽ اصل حقيقتون سنڌ جي ماڻهن جي آڏو رکڻ ضروري آهن، هن چيو ته هڪڙي غلط فهمي اها آهي ته (تلاءَ ۾ گڏ ٿيندڙ پاڻي زهريلو هوندو) پر حقيقت اها آهي ته اهو پاڻي بلڪل به زهريلو ناهي، اهو فقط کارو پاڻي آهي، جنهن ۾ ڪو به صنعتي نيڪال شامل ناهي، ليبارٽري ٽيسٽ موجب ان جي ٽي ڊي ايس سطح 5000 پي پي ايم جي لڳ ڀڳ آهي جڏهن ته پاڻي ۾ موجود ٻيا ڪيميائي جزا نيشنل انوائرومينٽل ڪوالٽي اسٽينڊرس جي اجازت ڏنل معيار کان به گهڻو گهٽ آهن، ان جي باوجود ان نقصان نه ڏيندڙ کاري پاڻي کي پوکائي جي لائق بنائڻ جي لاءِ ڪمپني هڪ رٿا تي ڪم شروع ڪيو  آهي، جنهن سان ان پاڻي مان چوپائي مال جي چاري سميت مختلف فصلن جي پوکائي شروع ڪئي وئي آهي ۽ هينئر تائين ان پاڻي تي وونئڻن ۽ ڀاڄين جا ڪامياب فصل پوکي چڪا آهيون، اهڙي ريت اهو تلاءُ زحمت بدران رحمت بنجي رهيو آهي. ٻي غلط فهمي اها آهي ته (تلاءَ ۾ گڏ ٿيندڙ پاڻي سان جر جو پاڻي زهريلو ٿي ويندو) جنهن جي اصل حقيقت ٻڌائيندي طارق قادر لاکير چيو ته ساک رکندڙ ادارن جهڙوڪ آر ڊبليو ئي جرمني پاران ڪرايل اڀياس موجب تلاءَ جي هيٺان زمين تي چن جا تهه قدرتي طور تي موجود آهن، جيڪي کاري پاڻي کي جر هيٺان پهچڻ نه ڏيندا، ان کان علاوه به جيڪڏهن اڳتي هلي ڪٿي پسگردائي ۾ کوهه جو پاڻي متاثر ٿيو ته ڪمپني آر او پلانٽ نصب ڪري ان مسئلي کي حل ڪندي، جڏهن ته ڪمپني اڳ ۾ ئي پنهنجي خرچ تي 3 آر او پلانٽ نصب ڪري چڪي آهي، جن مان ڳوٺاڻا فائدو حاصل ڪري رهيا آهن. هڪڙي غلط فهمي اها آهي ته (تلاءُ ٺهڻ سان هزارين ماڻهو لڏ پلاڻ ڪندا) پر حقيقت اها آهي ته تلاءَ جي اڏاوت سان ڳوٺ گوڙاڻو يا ڀرپاسي وارن ڳوٺن جو هڪڙو به ڪٽنب لڏ پلاڻ نه ڪندو. پنهنجي بريفنگ ۾ هن اهو به ٻڌايو ته اسان رڳو ڪوئلو نه پيا ڪڍون پر ان سان گڏ علائقي واسين جي خوشحالي جي لاءِ به ڪم ڪري رهيا آهيون ته جيئن هو سک جو ساهه کڻي سگهن، جهڙوڪ اسلام ڪوٽ ۾ 100 بسترن واري اسپتال قائم ڪري رهيا آهيون، جيڪا آغا خان اسپتال جي معيار جهڙي هوندي، اسڪول ٺاهيا پيا وڃن  ته جيئن هتان جا ٻار معياري تعليم حاصل ڪري سگهن. ان کان علاوه ٻن ڳوٺن ٿاريو هاليپوٽو ۽ ڳوٺ سينهڙي درس کي انٽرنيٽ جي مفت سروس فراهم ڪئي وئي آهي، جنهن کان پوءِ اهي سنڌ جا پهريان فري واءِ فاءِ ڳوٺ  بنجي چڪا آهن. هن چيو ته اسان ٿر بلاڪ ٽو کي 21 هين صدي جون سموريون سهولتون ڏيڻ چاهيون ٿا، اهڙي ريت بلاڪ ٽو جي باقي ڳوٺن کي به اها سهولت فراهم ڪئي ويندي. ٿر ڪول بلاڪ ٽو جي سمورن اسڪولن ۾ به مفت انٽرنيٽ جي سهولت فراهم ڪئي پئي وڃي ته جيئن هتان جا ٻار شهري ٻارن جيان معلومات تائين آساني سان رسائي حاصل ڪري سگهن. ٿر ڪول بلاڪ ٽو جي متاثرين جي نئين سر آبادڪاري سمورن متاثرن کي 1111 والن تي گهر تعمير ڪرائي ڏنا پيا وڃن جنهن ۾ ٽي ڪمرا، اوطاق، عورتن لاءِ ويهڻ جو ورانڊو، جنرل ورانڊو، ننڍڙو پارڪ، وٿاڻ، غسل خانو ۽ ٻيون سهولتون فراهم ڪيون وينديون، هن چيو ته سڀ کان پهريان ڳوٺ سينهڙي درس جي ڳوٺاڻن کي سال 2018 جي آخر ۾ لڏايو ويندو. ان مقصد جي لاءِ 172 ڪٽنبن لاءِ مثالي ڪالوني جو ڪم شروع ٿي ويو آهي، ان ڪالوني ۾ هر شادي شده جوڙي کي ڌار گهر ڏنو ويندو ۽ هر گهر  جي تعمير تي لڳ ڀڳ 30 لک روپيه خرچ ايندو، هن ٻڌايو ته گهرن جي ڊزائين ۽ نقشو مقامي ماڻهن ۽ عورتن جي صلاح مشوري سان نامياري آرڪيٽيڪٽ مرليڌر پاران تيار ڪيو ويو آهي ۽ اسان ان ڪالوني کي پاڪستان جي بهترين ڪالوني بنائڻ جو ارادو رکون ٿا، جنهن ۾ زندگي جون سموريون سهولتون فراهم ڪيون وينديون هن ٻڌايو ته هن مهل تائين هڪ هزار ٿرين کي نوڪريون ڏنيون ويون آهن، 1400 کان مٿي ٿرين کي فني سکيا فراهم ڪئي وئي آهي، ايندڙ سال ٽن کان چار هزار وڌيڪ ٿرين کي نوڪرين ۾ رکيو ويندو، اهڙي ريت هتان جي 25 مقامي انجنيئرن کي  ڪراچي جي ناميارن ادارن ۾ ٽرينڊ ڪري رهيا آهيون، جن تي ساليانو 10 ڪروڙ روپيا خرچ ٿيندو جنهن کان پوءِ اهي اسان جي معيار تي پورا لٿا ته انهن کي نوڪرين ۾ رکيو ويندو ۽ گهڻي ڀاڱي ننڍا وڏا ٺيڪا هتان جي ماڻهن کي ڏنا پيا وڃن، جنهن ڪري انهن جي معاشي حالت ۾ بهتري اچي رهي آهي. اسلام ڪوٽ ۾ ڳوٺ ٿاهريو هاليپوٽو ويجهو ٿر بلاڪ ٽو تي ڪوئلي جي کوٽائي ۽ بجلي گهر جي تعمير جو ڪم تيزي سان جاري آهي، ٿر ڪول مان وڏي پيماني تي اقتصادي  لاڀ فقط تڏهن ئي حاصل ڪري سگهجي ٿو جڏهن مائيننگ منصوبي کي توسيع ڏني وڃي، ملڪ مان توانائي واري بحران کي حل ڪرڻ ۽ سستي اگهه ۾ بجلي مهيا ڪرڻ وارو مقصد ئي ذهن ۾ رکندي سنڌ اينگرو ڪول مائيننگ ڪمپني ڪوئلي جي کوٽائي واري رٿا جو دائرو تمام تيزي سان وڌائي رهي آهي، اسان 2022 تائين هر سال 19 ملين ٽن پيداوار حاصل ڪرڻ ۽ انهي کي مختلف بجلي گهرن کي فراهم ڪرڻ جو اڳواٽ ئي رٿي ڇڏيو آهي، جنهن جي بنياد تي 3300 ميگا واٽ بجلي روزانو جي بنياد تي پيدا ڪئي ويندي. اهو به ٻڌايو ويو ته ٿر ڪول بلاڪ ٽو ۾ ٿيندڙ مختلف ٺيڪيداري ڪمن جا ٺيڪا بلاڪ ٽو ۾ ايندڙ ڳوٺاڻن کي ئي ڏنا ويندا جو اهڙا ٺيڪا ساليانو ڪروڙين روپين جا ٿيندا، جن ۾ مختلف قسمن جا ڪم مقامي ٺيڪيدارن کي ڏئي ٻين ڪيترن ئي ڳوٺاڻن جي روزگار جو پڻ بندوبست ڪيو ويندو، هن چيو ته ايندڙ وقت ۾ ٿر جو ڪوئلو پاڪستان جي توانائي جي بحران ۾ هڪ مسيحا ٿي اڀرندو، جنهن سان سنڌ سميت سڄي ۾  ملڪ ترقي جو نئون سج اڀرندو.

 

اڳڪٿي سچ ثابت، وزير اعظم تبديل نه ٿيندو…!

مسلم ليگ ن جي سربراهه ۽ اڳوڻي وزيراعظم نوازشريف اسلام آباد ۾ صحافين سان ڳالهائيندي  چيو آهي ته ڇا ملڪ ۾ اهڙا جج آهن، جيڪي پرويز مشرف جو احتساب ڪري سگهن ۽ کيس سزا ڏين، اهو منهنجو سوال ناهي، بلڪه پاڪستان جي مستقبل جو سوال آهي، آئون عدالت تي دٻاءُ نٿو وجهان، پر گهڻن ڏينهن کان جي ٽي روڊ ناهي ڏٺو، آئون ته پنهنجي گهر وڃي رهيو آهيان، سوچڻ جي ڳالهه آهي ته ملڪ ۾ آئين ٺهيو، پر ان جي باوجود به مارشل لا لڳندا رهيا، 1973ع کانپوءِ به آمر آيا، ڪوبه وزيراعظم پنهنجو مدو پورو نه ڪري سگهيو،  عدالت پهرين درخواست خارج ڪئي، پوءِ خبر ناهي ته ڪيئن قبولي ورتي، جي آءِ ٽي ۾ مخالفن کي وڌو ويو، ججن به پنهنجي آبزرويشن ۾ چيو ته مون تي ڪوبه الزام ناهي، نااهلي جو فيصلو ٿي چڪو هو، رڳو جواز ڳولڻو هو. وزارت عظميٰ کان مٿانهون ٿي ڪري قوم جي خدمت ڪرڻ چاهيان ٿو. نوازشريف پهرين چيو ته ڪنهن کي پنهنجو وڪيل ڪريون ۽ ڪنهن کان انصاف گهرون، بعد ۾ چيو ته مون کي سسلين مافيا چيو ويو، ڇا مافيا ڪڏهن جي آءِ ٽي جي سامهون پيش ٿيندي آهي؟ پاڻ کي بحال ڪرائڻ  نه پر پنهنجي گهر وڃي رهيو آهيان، جنهن روڊ ميپ جي ڳالهه ڪئي آهي، ڇا اهو ٽڪراءُ آهي؟ پاڪستان جي درست رستي جو تعين 70 سالن ۾ به نه ڪيو ويو، مناسب ناهي ته ڪروڙين ماڻهو اوهان کي ووٽ ڏين ۽ پنج قابل احترام جج اوهان کي پٽ کان پگهار نه وٺڻ تي نااهل ڪري ڇڏين. جيڪڏهن هڪ ادارو ٻئي اداري جو احترام نه ڪندو ته ان سان آئين جي پاسداري نه ٿيندي. فيصلي مان لڳو ته اڳ ئي منهنجي نااهلي جو فيصلو ٿي چڪو هو، رڳو ڪارڻ ڳوليو پيو ويو. اقتدار ۾ جيڪي گذريل چار سال گذاريا، اهي آئون ڄاڻان ٿو. پارليامينٽ اندر ۽ ٻاهر هڪ گرينڊ ڊائيلاگ هجڻ گهرجي. هڪ نئين پوليٽيڪل ۽ سوشل ڪانٽريڪٽ جي ضرورت آهي، گهڻن ماڻهن جي آءِ ٽي جي سامهون پيش نه ٿيڻ جو مشورو ڏنو هو، پر اهو تاثر نه پيو ڏيڻ چاهيان ته آئون احتساب کان ڀڄي رهيو اهيان، جيڪڏهن منهنجي دل ۾ چور هجي ها ته پاڻ کي احتساب لاءِ پيش نه ڪريان ها. نيب قانون جي خاتمي جو ارادو هو پر مون کي موقعو نه مليو، روزانو ٿيندڙ انهن تماشن کي هاڻ ختم ٿيڻ گهرجي. ڇا ملڪ ۾ اهڙا جج موجود آهن، جيڪي مشرف جو احتساب ڪن ۽ کيس سزا ڏين، آئون حالتن جي خراب نه پر درستگي چاهيان ٿو. جيڪڏهن نظرثاني درخواست تي آئون بحال به ٿي ويس ته وزيراعظم نه بڻجندس، شهباز شريف پنجاب ۾ ئي رهندو. وڪيل خواجه حارث مون سان ملاقات ڪندو، جنهن ۾ نظرثاني پٽيشن تي ڳالهايو ويندو، آئون ڀڄڻ وارن مان ناهيان، حالتن کي منهن ڏيندس، مون کي عمران خان ۽ پي ٽي آءِ خلاف ڳالهائڻ جي ضرورت ناهي، مون کي بحال ڪرڻ لاءِ نه بلڪه ناانصافي خلاف بيهڻو پوندو. مون هڪ جج پاران اڍيالا جيل بابت ريمارڪس ڏيڻ تي چيف جسٽس کي خط لکيو پر ڪوبه جواب نه آيو.

اڳوڻي وزير اعظم جي بيان مان سنڌ جي صوبائي وزير منظور حسين وساڻ جي ڪيل پيشنگوئي سچي ثابت ٿي آهي، منظور وساڻ اچ چئي چڪو هو ته وزير اعظم شاهد خاقان عباسي ئي رهندو ۽ شهباز شريف پنجاب جو وڏو وزير ئي رهندو، ڪا به تبديلي نه ٿيندي جيڪا سچي ثابت ٿي وئي.