تازيون خبرون

Daily Archives: August 9, 2017

جمهوريت ۽ پاليسين جو تسلسل نه رهيو ته پاڪستان ڪڏهن به ترقي نه ڪري سگهندو: نواز شريف

اسلام آباد(ويب ڊيسڪ) اڳوڻي وزير اعظم نواز شريف جو چوڻ آهي ته پهريون ڀيرو نيب تي سپريم ڪورٽ جو جج ويهاريو ويو ۽ جج صاحب پنهنجي مرضي جو ٽرائل ڪرايو ۽ فيصلو ڪيو جڏهن ته فيصلي کان پوءِ اپيل به ان ئي جج صاحب وٽ ويندي. پنجاب هائوس اسلام آباد ۾ پرڏيهي ميڊيا سان ڳالهائيندي اڳوڻي وزير اعظم نواز شريف چيو ته ملڪ جي ٺهڻ کان وٺي هن وقت تائين 18 وزير اعظم گذري چڪا آهن پر هڪ کي به آئيني مدو پورو ڪرڻ ناهي ڏنو ويو، آئين کي ٽوڙيو ويو، وزير اعظم کي ڦاهيون ڏنيون ويون، ملڪ بدر ڪيو ويو، ڇا عوام جي ووٽ کي ائين ئي ذليل ڪيو ويندو. انهن سوالن جو جواب سول سوسائٽي، ميڊيا ۽ اسان سڀني تي فرض آهي، ملڪ ۾ جمهوريت ۽ پاليسين جو تسلسل نه رهيو ته پاڪستان ڪڏهن به ترقي نه ڪري سگهندو. آئون سمجهان ٿو ته يوسف رضا گيلاني جو معاملو نااهلي تائين نه وڃڻ گهرجي ها، پنهنجي نااهلي بابت سپريم ڪورٽ جي فيصلي جو احترام ڪيان ٿو پر ان سان اختلاف به آهن،  مون جيڪي قربانيون ڏنيون انهن جو فائدو ملڪ کي هئڻ گهرجي. هن وڌيڪ چيو ته مون کي پهريون ڀيرو صدر ڪڍيو، ٻيون ڀيرو ڊڪٽيٽر هاءِ جيڪر بڻائي ڇڏيو ۽ ٽيون ڀيرو پٽ جي ڪمپني کان پگهار وٺڻ تي عدليه مون کي ڪڍي ڇڏيو ۽ هاڻ نيب ۾ پهرين ڀيرو خانگي ڪاروبار جو ريفرنس تيار ڪيو پيو وڃي، معاملو اڄ جو ناهي، منهنجي اسڪول جي دور جو آهي، 1973ع ۾ منهنجي والد پرڏيهه ملڪ وڃي سيڙپڪاري ڪئي.

 

دهشتگردي ملڪ کي ڪمزور ڪرڻ جي سازش آهي، حوصلي سان جنگ وڙهڻي پوندي: چيف جسٽس

ڪوئيٽا( ويب ڊيسڪ ) چيف جسٽس آف پاڪستان ثاقب نثار چيو آهي ته دهشتگردي ملڪ کي ڪمزور ڪرڻ جي سازش آهي. ڪوئيٽا سانحي جي ياد ۾ تعزيتي ريفرنس کي خطاب ڪندي چيف جسٽس ثاقب نثار چيو ته جيڪڏهن سازش کي ڪامياب ٿيڻ ڏنو ويو ته ايندڙ نسل کي ڪجهه نه ملي سگهندو. هن چيو ته دهشتگردي ملڪ کي ڪمزور  ڪرڻ ۽ امن جي فقدارن جي هڪ سازش آهي. سندس چوڻ هو ته سينئر وڪيلن کي ٻين وڪيلن جي رهنمائي ڪرڻ گهرجي. چيف جسٽس ثاقب نثار چيو ته دهشتگردي خلاف هر اداري کي پنهنجو حصو وجڻو آهي. هن چيو ته عدالتن جي سڪيورٽي لاءِ هو گهرو وزير سان رابطي ۾ آهن. سندس چوڻ هو ته پاڪستان کي قربانين کانسواءِ حاصل نه ڪيو ويو آهي، بي شمار ماڻهو ملڪ جي تخليق دوران بي گهر ۽ شهيد ٿيا. چيف جسٽس چيو ته دشمن نه ٿو چاهي ته پاڪستان خوشحال ۽ ترقي ڪندڙ ملڪ بڻجي. هن چيو ته دهشتگردي خلاف جنگ حوصلي سان وڙهڻي آهي، دهشتگردي خلاف جنگ ۾ ڪمزور نه ٿيڻو آهي. سندس چوڻ هو ته دهشتگرديءَ جا سبب هڪ ڊگهو بحث آهي. چيف جسٽس ثاقب نثار چيو ته ڪوئيٽا سانحو هڪ واقعو ناهي، پشاور ۾ ننڍن ٻارڙن کي شهيد ڪيو ويو. هن چيو ته عدليه سانحي جي رپورٽ تي عملدرآمد ڪرائيندي.

 

دهشتگردي خلاف جنگ ۾ پاڪ فوج جو ڪردار ساراهه جوڳو آهي: وزير اعظم

اسلام آباد( ويب ڊيسڪ ) وزيراعظم شاهد خاقان عباسي سان آرمي چيف جنرل قمر جاويد باجوه ملاقات ڪئي آهي. وزيراعظم ۽ آرمي چيف جي ملاقات ۾ ملڪي جي اندروني سڪيورٽي ۽ سرحدي صورتحال تي ڳالهيون ڪيون ويون. وزيراعظم شاهد خاقان عباسي آپريشن رد الفساد ۽ خيبر فور ۾ پاڪ فوج جي ڪردار جي واکاڻ ڪئي. هن چيو ته دهشتگردي خلاف جنگ ۾ پاڪ فوج جو ڪردار ساراهه جوڳو آهي. سندس چوڻ هو ته پاڪ فوج جون قربانيون فخر جوڳيون آهن. وزيراعظم شآهد خاقان عباسي چيو ته پاڪ سرزمين تان دهشتگردي جا پاڙ پٽي ويندي.

 

ايڪشن پلان تي عمل نه ٿيڻ سبب دهشتگردي مضبوط ٿي رهي آهي: بلاول ڀٽو زرداري

ڪراچي (اين اين آءِ) پاڪستان پيپلز پارٽي جي چيرمين بلاول ڀٽو زرداري چيو ته نيشنل ايڪشن پلان تي عمل نه ٿيڻ سان دهشتگردي جو پاڙون مضبوط ٿي رهيون آهن. بلاول ڀٽو زرداري پاران ڪوئيٽآ جي شهيدن کي ڀيٽا پيش ڪئي وئي. هن چيو ته ڪوئيٽآ ۾ وڪيلن جي رت سان هولي کيڏندڙ اڃان تائين ضابطي ۾ نه آيا آهن . نيشنل ايڪشن پلان تي عمل نه ٿيڻ سان دهشتگردي جو پاڙون مضبوط ٿي رهيون آهن. سمورن شهيد ٿيندڙن وڪيلن جي خاندان سان واعدو آهي ته اسان انهن جي غم ۾ برابر جا شريڪ آهيون، پ پ پ  ملڪ جي سمورن شهيدن جي حقيقي وارث آهي  ۽ انهن سان گڏ آهي . جڏهن ته  وڪيلن تي حملو ڪندڙ دهشتگرد اصل ۾ ملڪ ۽ آئين تي حملو ڪندڙ آهن، دهشتگردي اصل قائداعظم ۽ قائدعوام جي پاڪستان تي حملو آهي، انکي روڪڻ لاءِ اسان سڀني کي گڏجي مقابلو ڪرڻو پوندو، بلاول ڀٽو چيو ته شهيد بينظير ڀٽو ۽ ٻين  شهيدن جي وارث پوري پاڪستان جي قوم آهي، شهيد بي بي قربانيون ڏئي سموري قوم کي هڪ اهڙو رستو ڏيکاريو جيڪو قومن کي سرخرو رکي ٿو، شهيد بي بي جا ڀائر، ڀينرون، ڌيئرون، پٽ ۽ جيالا دهشتگردي جي خلاف آخري  ساهه تائين وڙهندا.

 

وزير اعظم جي نواز شريف سان ملاقات، سياسي صورتحال تي ڳالهيون

اسلام آباد (ويب ڊيسڪ) وزيراعظم شاهد خاقان عباسي اڳوڻي وزيراعظم نواز شريف سان ملاقات ڪئي آهي، جنهن دوران ٻنهي وچ ۾ ملڪ اندر سياسي صورتحال تي خيالن جي ڏي وٺ ڪئي وئي. ان موقعي تي وزيراعظم شاهد خاقان عباسي جو چوڻ هو ته سستي بجلي لاءِ حڪومت گهربل توانائي جو هدف حاصل ڪرڻ لاءِ ڪوششن ۾ آهي، ملڪ مان لوڊشيڊنگ جي خاتمي لاءِ اثرائتا قدم کڻي رهيا آهيون. هن چيو ته واٽر ريسورس ڊويزن ملڪ ۾ پاڻي جي کوٽ ختم ڪرڻ لاءِ منصوبن تي ڪم تيز ڪري، پاڪستان جو روشن مستقبل پهرين ترجيح آهي.27

 

نواز شريف چارٽر آف ڊيموڪريسي تي هلي ها ته گهر نه وڃي ها: خورشيد شاهه

قصور (ويب ڊيسڪ) مخالف ڌر جي اڳواڻ سيد خورشيد شاهه چيو آهي ته نواز شريف کي مخالف ڌر جي صلاح تي عمل ڪرڻ گهرجي ها، ميان صاحب چارٽر آف ڊيموڪريسي تي هلي ها ته گهر نه وڃي ها. صحافين سان ڳالهائيندي خورشيد شاهه جو چوڻ هو ته ن ليگ کي سپريم ڪورٽ جو فيصلو تسليم ڪرڻ گهرجي، ڇو ته عدالت ڪڏهن به سازشن تي ٻڌل فيصلا ناهي ڪندي، ماضي ۾ به اهڙا فيصلا ايندا رهيا آهن، جيڪي سڀني قبول ڪيا آهن. نواز شريف الائي ڇو عوام جو سهارو وٺڻ ڇو چاهي؟ هن چيو ته اڄ نواز شريف مڃي ٿو ته ذوالفقار ڀٽو درست چوندو هو طاقت جو سرچشمو عوام آهي.27

 

اليڪشن ڪميشن طرفان مسلم ليگ ن کي پارٽيءَ جو نئون صدر چونڊڻ جو حڪم

اسلام آباد( ويب ڊيسڪ ) اليڪشن ڪميشن مسلم ليگ ن کي نواز شريف جي جاءِ تي نئون پارٽي صدر چونڊڻ جو حڪم ڏئي ڇڏيو آهي. اليڪشن ڪميشن مسلم ليگ ن کي نئون پارٽي صدر چونڊڻ لاءِ نوٽيس جاري ڪيو آهي. اليڪشن ڪميشن طرفان جاري ڪيل نوٽيس ۾ چيو ويو آهي ته پوليٽيڪل آرڊر 2002ع تحت نااهل شخص پارٽي جو عهدو نه ٿو رکي سگهي. نوٽيس ۾ چيو ويو آهي ته ن ليگ جي پارٽي آئين تحت پارٽيءَ جي صدارت جو عهدو هڪ هفتي کان وڌيڪ عرصي تائين خالي نه ٿو رهي سگهي. اليڪشن ڪميشن جو چوڻ آهي ته مسلم ليگ ن پارٽيءَ جو صدر چونڊي فوري طور کين آگاهه ڪري.

 

مسلم ليگ ن جو بيگم ڪلثوم نواز کي اين اي 120 تي چونڊ ويڙهائڻ جو فيصلو

اسلام آباد(ويب ڊيسڪ) پاڪستان مسلم لگ ن طرفان اين اي 120 لاهور ٿري تان بيگم ڪلثوم نواز کي اميدوار بڻائڻ جو فيصلو ڪيو آهي. لاهور مان قومي اسيمبلي جي تڪ اين اي 120 جي سيٽ اڳوڻي وزير اعظم نواز شريف جي نااهلي سبب خالي ٿي. ان کان اڳ مسلم ليگ ن ان سيٽ تي پنجاب جي وڏي وزير شهباز شريف کي اميدوار بنائڻ جو فيصلو ڪيو هو تنهن هوندي نواز شريف گذريل ڏينهن سينيئر صحافين سان ڳالهه ٻولهه دوران هڪ سوال جي جواب ۾ چيو ته شهباز شريف کي پنجاب ۾ برقرار رکڻ جو فيصلو ٿيو آهي ۽ وزير اعظم شاهد خاقان عباسي ئي رهندو. ذريعن جو چوڻ آهي ته مسلم ليگ ن لاهور جي ڄاڻايل تڪ تان بيگم ڪلثوم نواز کي اليڪشن ويڙهائڻ جو فيصلو ڪيو آهي تنهن هوندي ان جي حتمي منظوري نواز شريف ڏيندو.

 

سپريم ڪورٽ ۾ جعلي دستاويز پيش ڪيا ويا، نواز شريف شڪر ڪري جيل ناهي ويو: طاهر القادري

لاهور( ويب ڊيسڪ ) پاڪستان عوامي تحريڪ جي سربراهه ڊاڪٽر طاهر القادري چيو آهي ته پاناما ليڪس ڪيس ۾ نواز شريف ۽ سندس ڪٽنب جو ڦاسڻ الله جو پلاند آهي. لاهور جي ناصر باغ  ۾ جلسي کي خطاب ڪندي ڊاڪٽر طاهر القادري چيو ته هڪ شخص اقتدار کان برطرف ٿيو ۽ پڇي ٿو ته سندس ڏوهه ڪهڙو آهي،  نواز شريف کان خبر آهي ته سندس ڪهڙو ڏوهه آهي. هن چيو ته نواز شريف سپريم ڪورٽ ۾ به ڪوڙ ڳالهايو ۽ جعلي ڪاغذ جمع ڪرايا. سندس چوڻ هو ته جي آءِ ٽي شريف خاندان جي هڪ هڪ فرد کي گهرائي پڇا ڪئي ته ڪرپشن نه ٿي آهي ته ٻڌايو رقم ڪٿان آندي وئي آهي. ڊاڪٽر طاهر القادري چيو ته شريف خاندان جي آءِ ٽي ۾ به ڪوڙ ڳالهائيندو رهيو. هن چيو ته کيس ٻڌايو ته ماڊل ٽائون ۾ 14 ماڻهن کي ڇو شهيد ڪيو ويو. سندس چوڻ هو ته سپريم ڪورٽ پنهنجي حڪم ۾ لکيو آهي ته نواز شريف صادق ۽ امين نه رهيو آهي، شڪر ڪري ته کيس جيل نه موڪليو ويو آهي. ڊاڪٽر طاهر القادري چيو ته نواز شريف اڄ قوم کي چوي ٿو ته ساڻس زيادتي ٿي آهي. هن چيو ته سپريم ڪورٽ لکيو ته نواز شريف ڪوڙو ۽ بدديانت شخص آهي. سندس چوڻ هو ته نڪ جي پڪائي اها آهي ته شرم کان گهر ويهڻ بدران جي ٽي روڊ تي احتجاج ڪيو پيو وڃي. ڊاڪٽر طاهر القادري چيو ته سپريم ڪورٽ پاناما ليڪس ڪيس جو فيصلو آئين موجب ڏنو آهي. هن چيو ته عدليه آئين موجب فيصلو ڪيو نواز شريف چيو ته پنج ماڻهو گهر موڪلي ڇڏين ٿا. سندس چوڻ هو ته نواز شريف جنهن آزاد عدليه لاءِ مهم هلائي تنهن ئي کيس گهر موڪليو ڊاڪٽر طاهر القادري چيو ته خبر پئي آهي ته نواز شريف کي جمهوريت تي يقين ناهي.  لاهور ايئرپورٽ تي آجيان لاءِ ايندڙ ڪارڪنن کي خطاب ڪندي ڊاڪٽر طاهر القادري چيو ته سپريم ڪورٽ انصاف ڏيڻ ۾ تاريخي فيصلو ڪيو آهي، الله وٽ دير آهي پر انڌير ناهي.هن چيو ته سپريم ڪورٽ آرٽيڪل 62 ۽ 63 تحت جوتا هڻي نواز شريف کي ڪڍيو آهي. سندس چوڻ هو ته سپريم ڪورٽ نواز شريف کي بديانت قرار ڏنو ته سازشون ڳولي رهيو آهي، اسان جي ٽي روڊ تي نظام خلاف احتجاج ڪيو، توهان ۾ همت آهي ته نالو کڻو ڪنهن خلاف احتجاج ڪري رهيا آهيو ته جيئن اڇو چٺو پڌرو ٿي وڃي. ڊاڪٽر طاهر القادري چيو ته هو اپريل کان هن وقت تائين  ڪئنيڊا واپس نه ويو آهي، پاڪستان سندس گهر ۽ وطن آهي. هن چيو ته حڪومت جي سڪيورٽي تي کيس ڀروسو ناهي، ماڊل ٽائون جي شهيدن جو خون ضايع نه ٿيندو. سندس چوڻ هو ته ڪارڪنن جي خون جو قصاص هو وٺي دم پٽيندا، چور پڪڙيو ويو پر قاتل اڃا باقي آهي.

 

ن ليگ سرعام چئي رهي آهي ته عدالت جو فيصلو قبول ناهي، اهي بليڪ ميلر آهن: عمران خان

اسلام آباد (ويب ڊيسڪ) پاڪستان تحريڪ انصاف جي سربراهه عمران خان چيو آهي ته اسان جي پارٽي هڪ مافيا خلاف جنگ ۾ وڏي جدوجهد ڪئي، پاناما ڪيس جي جدوجهد ۾ هڪ سال لڳو، ملڪي تاريخ ۾ پهريون ڀيرو جمهوريت جي نالي تي ڊڪٽيٽر شپ خلاف فيصلو آيو، اسان جمهوريت کي مضبوط ڪرڻ لاءِ ڪنٽينر تي چڙهياسين، هي ڇا جي لاءِ ڪنٽينر تي چڙهي رهيا آهن؟ اسلام آباد ۾ پريس ڪانفرنس ڪندي عمران خان چيو ته ن ليگ سرعام چئي رهي آهي ته عدالت جو فيصلو قبول ناهي، اهي بليڪ ميلر آهن، وفاقي حڪومت به انهن جي، پنجاب حڪومت به انهن جي، اهي پوءِ به ڪنٽينر تي چڙهي رهيا آهن، اهي عدالت جو فيصلو نه مڃي ڪهڙو پيغام ڏيڻ چاهين ٿا؟ سندس چوڻ هو ته سڄي ن ليگ هڪ خاندان کي بچائڻ ۾ لڳي پئي آهي، انهن تي ته آرٽيڪل 6 لڳڻ گهرجي. هن چيو ته مون کي لڳي رهيو آهي ته هاڻ معاملو چونڊن ڏانهن وڃي رهيو آهي، سڄي پارٽي کي چونڊن جي تياري ڪرائي رهيا آهيون، 13 آگسٽ تي پي ٽي آءِ شيخ رشيد سان گڏجي راولپنڊي ۾ وڏو جلسو ڪندي، 14 آگسٽ کان پارٽي ميمبر شپ شروع ڪنداسين. عمران خان وڌيڪ چيو ته اسان نواز شريف کان وڌيڪ عوام گڏ ڪري ڏيکارينداسين، ماڊل ٽائون سانحي تي طاهر القادري جي حمايت ڪيون ٿا.27