تازيون خبرون

Daily Archives: August 3, 2017

موجوده ۽ اڳوڻي وزير اعظمن وچ ۾ ملاقات، توهان تي وڏي ذميواري آهي، عوامي فلاحي منصوبن تي ڌيان ڏيو: نواز شريف

اسلام آباد /مري(ويب ڊيسڪ) نئين چونڊيل وزير اعظم شاهد خاقان عباسي جي اڳوڻي وزير اعظم نواز شريف سان گورنر هائوس مري ۾ ملاقات ٿي، وفاقي ڪابينا سميت اهم معاملن تي ڳالهيون ڪيون ويون، نواز شريف خاقان عباسي کي عهدو سنڀالڻ تي مبارڪ ڏن ۽ نيڪ خواهشن جو اظهار ڪيو. ان موقعي تي اڳوڻي وزير اعظم نواز شريف جو چوڻ هو ته پارتي توهان تي وڏي ذميواري لاڳو ڪئي آهي، توهان عوامي فلاحي منصوبن کي ترجيح ڏيو، نئين چونڊيل وزير اعظم شاهد خاقان عباسي جو چوڻ هوت توهان جي سوچ کي اڳتي کڻي هلندس ۽ پارٽي جي اعتماد تي پورو لهڻ جي ڪوشش ڪندس، ان ملاقات ۾ پنجاب جي وڏي وزير شهباز شريف، چوڌري نثار، احسن اقبال، پرويز رشيد ۽ مهتاب عباسي به شريڪ هئا.ٻئي طرف نئين چونڊيل وزيراعظم شاهد خاقان عباسي چيو آهي ته دنيا کي ٻڌائڻ چاهيون ٿا ته وزيراعظم مَٽجي سگهي ٿو پر حڪومت جون پاليسيون ساڳيون رهنديون. وفاقي ڪابينا لاءِ اڳوڻي وزيراعظم نواز شريف ۽ ن ليگ اڳواڻن سان مشاورتي اجلاس کانپوءِ صحافين سان ڳالهائيندي شاهد خاقان عباسي چيو ته ڪابينا ۾ شامل ٿيندڙ وزيرن لاءِ مشاورتي عمل جاري آهي، ايندڙ هڪ ٻن ڏينهن ۾ ڪابينا حلف کڻندي. ڪابينا جو مرحلو مڪمل ٿيڻ کانپوءِ نواز شريف لاهور ويندو. اڳوڻي وفاقي گهرو وزير چوڌري نثار جي ڪابينا ۾ شموليت بابت سوال تي نئين وزيراعظم چيو ته في الحال ڪجهه نٿو چئي سگهجي، ان معاملي تي صلاحون جاري آهن ۽ جلد ڪابينا حلف کڻندي. شاهد خاقان عباسي چيو ته جمهوريت جي تسلسل کي چئن ڏينهن ۾ وڏي اڪثريت سان بحال ڪيو، نواز شريف هدايت ڪئي آهي ته هلندڙ ترقياتي منصوبن کي وڌيڪ تيزي سان مڪمل ڪيو وڃي.27

 

پاڪ فوج دهشتگردي جي ناسور کي ختم ڪرڻ لاءِ ڪوششون جاري رکندي: آرمي چيف

راولپنڊي(ويب ڊيسڪ) چيف آف آرمي اسٽاف جنرل قمر جاويد باجوه چيو آهي ته پاڪ فوج دهشتگردي جي ناسور کي ختم ڪرڻ جي ڪوش جاري رکندي. هن چيو ته اسان سرحدن جي تحفظ جي لاءِ هر حد تائين وينداسين، اسان پنهنجي سرحدن جا امين آهيون. آءِ ايس پي آر طرفان جاري بيان ۾ چيو ويو آهي ته چيف آف آرمي اسٽاف جنرل قمر جاويد باجوه ايبٽ آباد جو دورو ڪيو جتي هن 2 ڏينهن واري بلوچ رجمنٽ ڪانفرنس ۾ شرڪت ڪئي جتي اڳوڻي آرمي چيف اشفاق پرويز ڪياني، ڪمانڊر 10 ڪور ليفٽيننٽ جنرل نديم رضا ۽ ٻيا ريٽائرڊ جنرل شريڪ ٿيا. ان موقعي تي آرمي چيف کي اعزازي طور تي چيف آف بلوچ رجمنٽ جا رينڪ پيش ڪيا ويا، ان کي ڪرنل ان چيف جي رينڪ به لڳائي وئي. آرمي چيف پاڪ فوج ۾ بلوچ رجمنٽ جي خدمتن کي ساراهيو. هن وڌيڪ چيو ته بلوچ رجمنٽ سان تعلق رکندڙ شهدين جي قربانين کي هميشح ياد رکيو ويندو، ملڪ  بچاءَ ۾ بلوچ رجمنٽ جي اهم ڪردارن تي فخر آهي.

 

نااهلي ڪيس: ڪهڙي بنياد تي عمران خان جي سرٽيفڪيٽ کي ڪوڙو چئون: چيف جسٽس

اسلام آباد(ويب ڊيسڪ) سپريم ڪورٽ ۾ تحريڪ انصاف جي چيئرمين عمران خان نااهلي ڪيس جي ٻڌڻي دوران چيف جسٽس سوال اٿاريو ته ڪهڙي بنياد تي عمران خان جي سرٽيفڪيٽ کي ڪوڙو چئون تنهن هوندي ان حد تائين متفق آهيون ته پرڏيهي فنڊنگ نٿي وٺي سگهي. چيف جسٽس آف پاڪستان جسٽس ميان ثاقب نثار جي سربراهي ۾ جسٽس عمر عطا بنديال ۽ جسٽس ۽ جسٽس فيصل عرب تي ٻڌڻي ٽي رڪني بينچ تحريڪ انصاف جي پرڏيهي فنڊنگ ۽ عمران خان جي نااهلي جي درخواست تي ٻڌڻي ڪئي. درخواست گذار مسلم ليگ ن جي اڳواڻ حنيف عباسي جي وڪيل ارم شيخ جواب الجواب دليل ڏيندي چيو ته تحريڪ انصاف طرفان پرڏيهين ۽ ڪمپنين مان ملندڙ فنڊنگ لڪائي وئي، عدالت  اهو رستو نه روڪيو ته فلڊ گيٽ کلي ويندو جنهن تي چيف جسٽس چيو ته پرڏيهي پيسي جو دروازو بند ڪرڻ جي لاءِ لاڳاپيل فورم موجود آهي. وڪيل اڪرم شيخ چيو ته دهشتگردين کي به پرڏيهي فنڊنگ ٿيندي آهي، پرڏيهي پيسي جو دروازو بند ڪرڻ جو وقت اچي ويو آهي، آمريڪا ۾ ويهي به پاڪستاني شهري وفاداري جا پابند هوندا آهن جڏهن ته عدالت به ملڪ جي تحفظ جو حلف کنيو آهي. جسٽس عمر عطا بنديال چيو ته ڳالهه فنڊنگ جي ٿي رهي آهي سازش جي نه، منع ڪيل فنڊنگ جي جاچ ٿيڻ گهرجي پر فنڊن ۾ ڪيترو منع ٿيل آهي ۽ ڪيترو منع نه ٿيل اهو ڪيئن ڏسجي. حنيف عباسي جي وڪيل چيو ته تحريڪ انصاف طرفان فنڊنگ وڌيڪ ورتي وئي ۽ گهٽ ڏيکاري وئي جڏهن ته ڪمپني جي معاهدي ۾ لکيل آهي ته فنڊ پي ٽي آءِ جي سرگرمين تي خرچ ٿيندا، ڪمپني معاهدي ۾ منع ڪيل فنڊنگ نه وٺڻ جو ذڪر ناهي، عوام عدالت جو 28 جولاءِ جو فيصلو به ڏسي رهي آهي. جسٽس عمر بنديال چيو ته ڇا ڪٿي لکيل آهي ته سمورا فند پاڪستان موڪلڻ لازمي آهن جڏهن ته دستاويزن ۾ واضع لکيل آهي ته فنڊ پاڪستانين کان ورتا ويا جڏهن ته چيف جسٽس چيو ته هن وقت تائين فنڊن جي نوعيت جو جائزو ناهي ورتو ويو، ملندڙ هڪ هڪ فنڊ جو جائزو وٺڻو پوندو. حنيف عباسي جي وڪيل چيو ته اليڪشن ڪميشن وٽ عمران خان کي نااهل قرار ڏيڻ جو اختيار ناهي ۽ تحريڪ انصاف اليڪشن ڪميشن جو اختيارن وارو دائرو  تسليم ناهي ڪندي انهيءَ ڪري سپريم ڪورٽ سان رابطو ڪيو جنهن تي چيف جسٽس ريمارڪس ڏنا ته اختيارن جي دائري جو فيصلو عدالت ڪندي.

 

ملڪ جي مختلف علائقن ۾ تيز مينهن، 5 ڄڻا فوت

اسلام آباد (اين اين آءِ) سڄي ملڪ ۾ برساتن دوران مختلف واقعن ۾ 5 ڄڻا فوت ٿي ويا، اسلام آباد، راولپنڊي جا علائقا پاڻي هيٺ اچي ويا، پاڻي گهرن ۾ ڪاهي پيو جنهن سبب ماڻهو ڏکيائين کي منهن ڏيڻ لڳا، تفصيل موجب بنو ۾ گذريل رات 3 ڪلاڪ مسلسل برسات سبب اسڪول ۽ ڪيترن ئي گهرن کي نقصان پهتو ۽ مختلف حادثا پيش آيا جن ۾ 3 ڄڻا فوت ٿي ويا، سڀني کان وڌيڪ نقصان آمدي حنيف ۽ بقا خيل جي علائقي ۾ ٿيو، چار سده جي مختلف علائقن ۾ برسات جو پاڻي گهرن ۾ بيهجي ويو، شب قدر جي علائقي اٽڪي ۾ 5 سالن جو ٻارڙو پاڻي ۾ ٻڏي فوت ٿي ويو، جنهن جو لاش ڪڍيو ويو، مٽا مغل خيل جي علائقي غريب آباد ۾ برسات سبب گهر جي ڇت ڪري پئي، ڇت هيٺان 9 ورهين جو ٻارڙو دٻجي فوت ٿي ويو، جڏهن ته 3 عورتون زخمي ٿي پيون، سنڌ جي ضلعي بدين ۾ هڪ سئو کان وڌيڪ اسڪولن ۾ گذريل ڏينهن پيل برسات جو پاڻي جمع ٿي ويو، گرمين جون موڪلون ختم ٿيڻ کانپوءِ متاثر اسڪول نه کلي سگهيا، پنجاب ۾ گجرات حافظ آباد سميت ڪجهه شهرن ۾ برسات پئي جنهن سبب علائقن ۾ پاڻي گڏ ٿي ويو، موسميات کاتي اسلام آباد،لاهور، پشاور سميت ڪي پي ڪي فاٽا ۽ ڪشمير ۾ برسات جي اڳڪٿي ڪئي آهي.

 

منڇر ڍنڍ آلودگي ڪيس: سپريم ڪورٽ جو سنڌ حڪومت جي رپورٽ تي ڪاوڙ جو اظهار

ڪراچي  (اين اين آءِ) سپريم ڪورٽ ۾ منڇر ڍنڍ آلودگي ڪيس جي ٻڌڻي تي سنڌ حڪومت جي رپورٽ تي عدالت ڪاوڙجي پئي، علائقي جي رهواسين موقف اختيار ڪيو ته منڇر ۾ لڳايل آر او پلانٽ غير فعال آهن، انهن کي زهريلو پاڻي پيئڻ تي مجبور ڪيو پيو وڃي، عدالت سنڌ حڪومت جي رپورٽ تي عدم اطمينان جو اظهار ڪيو، سپريم ڪورٽ ڪراچي جي رجسٽري ۾ جسٽس گلزار احمد جي سربراهي ۾ 2 رڪني بينچ منڇر ڍنڍ ۾ گندو پاڻي شامل ڪرڻ بابت ڪيس جي ٻڌڻي ڪئي، ايڊيشنل اٽارني جنرل ٻڌايو ته ايڪنڪ آر بي او ڊي 2 جو منصوبو مڪمل ڪيو آهي، عدالت ريمارڪس ڏنا ته واٽر ڪميشن ۾ جيڪو ڪجهه به ٿيو آهي سپريم ڪورٽ جي حڪم تي ٿيو، منڇر ڍنڍ جي رهواسين بيان ڏنو ته پاڪ اوسز ۽ آر بي او ڊي پاران لڳايل آر او پلانٽ فعال نه آهن ۽ کين زهريلو پاڻي پيئڻ تي مجبور ڪيو پيو وڃي، آبپاشي جي سيڪريٽري جمال مصطفيٰ چيو ته 39 آر او پلانٽس مان 3 فعال نه آهن، سنڌو درياءَ جي سطح جڏهن منڇر سان ڀرجي ويندي آهي ته پوءِ پاڻي ڇڏيو ويندو آهي، عدالت آر او پلانٽ، آر بي او ڊي جي منصوبي جي شروعات، ايڪنڪ اجلاس سميت سنڌو درياءَ جو پاڻي منڇر ۾ڇڏڻ بابت خميس تائين تفصيل رپورٽ طلب ڪندي ٻڌڻي ملتوي ڪري ڇڏي.

 

عائشه گلالئي جو مسئلو تحريڪ انصاف جو اندروني معاملو آهي، الزامن جي جاچ ڪئي وڃي: مريم اورنگزيب

اسلام آباد (ويب ڊيسڪ): نواز ليگ اڳواڻ مريم اورنگزيب چيو آهي ته عائشه گلالئي جو معاملو تحريڪ انصاف جو اندروني معاملو آهي پر ان طرفان چيئرمين پي ٽي آءِ ٽي لڳايل الزامن جي جاچ ڪئي وڃي، اسلام آباد ۾ ميڊيا سان ڳالهائيندي مريم اورنگزيب جو چوڻ هو ته پاڪستان تحريڪ انصاف کي عورتن جي عزت ڪرڻ ناهي ايندي، عائشه گلالئي عمران خان جو ڪردار بي نقاب ڪيو، ڪالهه تائين گلالئي پاڪستان تحريڪ انصاف جي سچي ۽ باڪردار نمائنده هئي ۽ اڄ ان جي ڪردار ڪشي ڪئي پئي وڃي، پي ٽي آءِ الزام تراشي جي سياست سبب اڄ ان حالت ۾ آهي، فواد چوڌري الزام لڳايو آهي ته مسلم ليگ ن گلالئي کي ميسج ڪرڻ جو مشورو ڏنو آهي ته اهو قوم کي ٻڌائي ته فواد چوڌري عمران خان کان ٻين تي گند اڇلائڻ جو ڪيترو معاوضو وٺندو آهي؟ عائشه گلالئي جو معاملو تحريڪ انصاف جو اندروني معاملو آهي  پر عائشه گلالئي جي عمران خان تي الزامن جي جاچ ضرور ٿيڻ گهرجي، مسلم ليگ ن اڳواڻ جو چوڻ هيو ته فواد چوڌري نئين چونڊيل وزيراعظم کي ريلو ڪٽو چيو آهي پر مان ان کي ٻڌايان ٿي ته ريلو ڪٽو اهو آهي، جيڪو 4 سالن ۾ 4 پارٽيون بدلائي هاڻي پي ٽي آءِ جو ترجمان آهي.

 

عمران خان شيخ رشيد کي تڏهن ووٽ ڏيندو جڏهن پٽيوالي جي چونڊ وڙهندو: خواجا آصف

لاهور(ويب ڊيسڪ) پاڪستان مسلم ليگ جي اڳواڻ خواجا آصف سماجي رابطن واري ويب سائيٽ ٽوئيٽر جاري پيغام ۾ چيو آهي ته شيخ رشيد رحم دل ماڻهو آهي عمران خان ان کي وزير اعظم جي عهدي لاءِ اميدوار نامزد ڪيو ۽ ان کي ووٽ ڏيڻ لاءِ پاڻ ئي اسيمبلي ۾ نه آيو. هن چيو ته عمران خان شيخ رشيد کي تڏهن ووٽ ڏيندو جڏهن ته پٽيوالي جي چونڊ وڙهندو. هن وڌيڪ چيو ته عمران خان پنهنجي اميدوار شيخ رشيد کي ووٽ  ڏيڻ لاءِ نه آيو شايد ان کي ڪا شرم ۽ حيا اچي وئي.

 

ن ليگ ڪنهن به حد تائين ڪِري سگهي ٿي، اها ضميرن جي سوداگر آهي: عمران خان

اسلام آباد (ويب ڊيسڪ) پي ٽي آءِ سربراهه عمران خان پارٽي ڇڏيندڙ اڳواڻ عائشا گلالئي جا الزام رد ڪندي چيو آهي ته الزامن جي سياست ڪرڻ ن ليگ جو ڪم آهي، مستقبل ۾ به اهڙا ڪردار ڪشي جا حملا ناڪام ٿيندا، ن ليگ سياسي، اخلاقي ۽ قانوني طور ختم ٿي وئي آهي. اهڙن خيالن جو اظهار هن پارٽي جي مشاورتي اجلاس کانپوءِ ڳالهائيندي ڪيو. اجلاس ۾ عائشا گلالئي طرفان عمران خان ۽ سندس ويجهن ساٿين تي لڳايل الزامن جو جائزو قانوني ٽيم جي موجودگي ۾ ورتو ويو ۽ حڪمت عملي تي غور ڪيو ويو. اجلاس ۾ شاهه محمود قريشي، نعيم الحق، شفقت محمود ۽ ٻين شرڪت ڪئي. عمران خان جو چوڻ هو ته ن ليگ اربين ڊالر ضبط ٿيڻ جي خوف سبب ڪنهن به حد تائين ڪِري سگهي ٿي، اها ضميرن جي سوداگر آهي، هنن شهيد بينظير ڀٽو بابت به گهٽ وڌ ڳالهايو هو ۽ هاڻ اهو سلسلو اسان تائين پهتو آهي. هن چيو ته تحريڪ انصاف جي عورتن ن ليگ جو مڪروهه چهرو بي نقاب ڪيو، جنهن تي فخر ڪيون ٿا، اسان جون عورتون بااختيار ۽ احترام جي لائق آهن.27

 

خواهش آهي ته اين اي 120 جي لاءِ اپوزيشن گڏيل اميدوار آڻي: سراج الحق

اسلام آباد (ويب ڊيسڪ): جماعت اسلامي امير سراج الحق چيو آهي ته حڪومت قبيلائي عوام سان ڪيل واعدا پورا ڪري، ملڪي قانونن ۾ تبديلي آڻي باهر ملڪيتون ٺاهيندڙن جو رستو روڪيو وڃي، هن چيو ته اسان کي سياست ۾ شائستگي ۽ برداشت جو مظاهرو ڪرڻ گهرجي، اسان چاهيون ٿا ته جيڪو به وزيراعظم هجي، صادق ۽ امين هجي، 62، 63 کي ائين مان ڪڍڻ جي ڳالهه ڪندڙ پاڪستان بڻائڻ جي مقصد جي نفي ڪن ٿا، هن چيو ته اسان چاهيون ٿا حڪومت عدالتن سان وڙهڻ بدران ڪارڪردگي بهتر بڻائي، سراج الحق چيو ته سپريم ڪورٽ هڪ قدم اڳتي وڌي ۽ پاناما ڪيس ۾ ملوث ماڻهن خلاف ڪارروائي ڪري، هي ڪيس اڃا ختم ناهن ٿيا، اڃا پهريون مرحلو آهي، اين اي 120 تي اميدوار جو فيصلو ناهي ڪيو، خواهش آهي ته اين اي 120 جي لاءِ اپوزيشن گڏيل اميدوار آڻي.

 

آئين جي توهين نه ٿيڻ گهرجي، ادارن جو تحفظ سياسي جماعتن جي ذميداري آهي: جاويد هاشمي

ملتان (ويب ڊيسڪ): سينئر سياستدان مخدوم جاويد هاشمي چيو آهي ته ملڪ جي آئين جي توهين نه ٿيڻ گهرجي، ادارن جو تحفظ سياسي جماعتن جي ذميداري آهي، پريس ڪانفرنس ڪندي جاويد هاشمي چيو ته مون تي ڪرپشن جو ڪوئي الزام نٿو لڳائي سگهي، سينئر سياستدان جو چوڻ هو ته ڪا به پارٽي ناهي بدلي، جنهن اصول ڇڏيو ان جي پارٽي ڇڏي ڏني، هن چيو ته ادارن جو تحفظ سياسي جماعتن جي ذميداري آهي، نيب جي ڪارروائي جي حوالي سان سندس چوڻ هو ته ان کان اڳ جيترا به ڪيس نيب ۾ هليا اهي چار کان پنج سالن تائين هلندا رهيا، نئون قانون آندو پيو وڃي ته عدالت جي مٿان عدالت بڻائي پئي وڃي.ٻئي طرف  سينيئر سياستدان جاويد هاشمي چيو آهي ته مون کي خبر آهي ته عمران خان عورتن جي عزت ناهي ڪندو، ڪجهه حيا هوندي آهي هڪ ماڻهوءَ کان چورايو ته مون پيسا وٺي ٽڪيٽ ڏني عمران خان وات سنڀالي ڳالهائي جيڪڏهن مون ڏوهه ڪيو آهي ته مون کي پڪڙڻ گهرجي ها. جاويد هاشمي پنهنجي ويڊيو پيغام ۾ چيو آهي ته عمران خان توهان کي شرم اچڻ گهرجي، عمران جنهن جج بابت تو ڳالهائڻ چيو هو اهي به توکي ڪوڙو چئي رهيو آهي. هن چيو ته عمران خان وضاحت ڪري، نه ته جيڪو ڪجهه چوندس ته توهان ڳالهائڻ جي لائق نه رهندا. عمران خان معافي نه ورتي ته عزت خراب ڪرڻ جي دعويٰ ڪندس، عمران خان هاڻ توهان جي ساک ڪهڙي بچي آهي.