تازيون خبرون

Daily Archives: July 21, 2017

صبر جو امتحان ورتو پيو وڃي، جي آءِ ٽي ۽ پي ٽي آءِ جو احتساب ڪير به قبول نه ڪندو: وزيراعظم

دير ( ويب ڊيسڪ ) وزيراعظم نواز شريف چيو آهي ته اسان تي ڪرپشن جو ڪو به داغ ناهي، جي آءِ ٽي ۽ پي ٽي آءِ جو احتساب ڪير به قبول نه ڪندو. دير ۾ لواري ٽنل جي افتتاح کانپوءِ تقريب کي خطاب ڪندي وزيراعظم نواز شريف چيو ته جي آءِ ٽي ميمبر فرشتن وانگر صادق ۽ امين بڻجي ويٺل آهن. هن چيو ته  روز ننڊ مان اٿي استعيفيٰ جي خيرات گهرندڙن کي شرم اچڻ گهرجي، ڇا اسان سندن ووٽن سان اقتدار حاصل ڪيو آهي. سندس چوڻ هو ته منهنجي صبر جو امتحان نه ورتو وڃي، هاڻي تماشو بند ٿيڻ گهرجي. وزيراعظم نواز شريف چيو ته اسان جو احتساب نه پر استحصال ٿي رهيو آهي، مان کي پاڻ کي خبر ناهي ته ڇا جو احتساب ٿي رهيو آهي؟ هن چيو ته ان نواز شريف جي احتساب جون ڳالهيون ٿي رهيون آهن جيڪو اوندهه ختم ڪري رهيو آهي. سندس چوڻ هو ته 49 هزار پائونڊ ڦريندڙن جو سرعام احتساب ٿيڻ گهرجي. وزيراعظم نواز شريف چيو ته 2013 ۽ 2017ع جي پاڪستان ۾ ڪيترو فرق آهي. هن چيو ته ڇا مان ٽمبر، وڻن ۽ سنگ مرمر جا ٺيڪ حاصل ڪيا آهن.

 

ٻار مني ٽريل جو جواب نه ڏئي سگهيا ته اثر عوامي عهدو رکڻ واري تي پوندو: سپريم ڪورٽ

اسلام آباد(م.ڊ) سپريم ڪورٽ پاناما ليڪس عملدرآمد ڪيس جي ٻڌڻي اڄ تائين ملتوي ڪري ڇڏي، جسٽس عظمت سعيد چيو آهي ته ڪيس بادي النظر ۾ جعلي دستاويز ڏيڻ جو آهي، سپريم ڪورٽ اکيون بند ڪري نٿي ويهي سگهي، نتيجا سٺا نه نڪرندا، قانون پنهنجو رستو پاڻ ٺاهيندو، جسٽس اعجاز الاحسن جو چوڻ آهي ته جعلي دستاويز ڏيڻ جي 7 سال سزا آهي، جسٽس اعجاز افضل خان رمارڪس ڏنا ته ثابت ٿي وڃي ته فليٽ اولاد پاڻ خريد ڪيا ته پبلڪ آفيسر هولڊر بچي ويندو، ثابت نه ٿيو ته ڳالهه پبلڪ آفيس هولڊر تائين ويندي. سپريم ڪورٽ ۾ جسٽس اعجاز افضل خان جي سربراهي ۾ ٽي رڪني بئنچ پاناما ليڪس عملدرآمد ڪيس جي ٻڌڻي ڪئي، حسين نواز، حسن ۽ مريم نواز وڌيڪ دستاويز عدالت ۾ جمع ڪرايا.  حسين، حسن ۽ مريم نواز جي وڪيل سلمان اڪرم راجا دليل ڏنا ته جي آءِ ٽي دبئي اختيارن جي خط تي حسين نواز کان ڪوبه سوال نه پڇيو، جي آءِ ٽي 12 ملين درهم ٽرانزيڪشن جي به ترديد ڪئي، حسين نواز کان تصديق ٿيل دستاويز نه ورتا ويا. جسٽس اعجاز الاحسن چيو ته 12 مئي 1988ع ۽ 30 مئي 2016ع جي دستاويزن کي دبئي اختيارين جعلي ۽ غلط قرار ڏنو، دبئي اختيارين چيو ته مُهرون به هُنن جو ناهن. جسٽس اعجاز الاحسن سلمان اڪرم راجا کي چيو ته پهرين اوهان چيو ته مشينري دبئي کان جده وئي، هاڻي چئي رهيا آهيو ته مشينري ابوظهبي کان جده وئي، جيڪڏهن مشينري دبئي کان جده وئي ته ان جو رڪارڊ به هئڻ گهرجي.. سلمان اڪرم راجا چيو ته دبئي اندر سامان جي چرپر جو رڪارڊ ناهي هوندو، مشينري دبئي کان ابوظهبي رستي ذريعي جده وئي، جنهن تي جسٽس اعجاز الاحسن کيس چيو ته دبئي اختيارين اسڪريپ جده وڃڻ ترديد ڪئي، سلمان اڪرم راجا جو چوڻ هو ته اهو اسڪريپ نه پر مشينري هئي، جي آءِ ٽي غلط سوال ڪيا. .جسٽس عظمت سعيد سلمان اڪرم راجا کي چيو ته اوهان جي آءِ ٽي نتيجن تي حملو نه ڪريو، انهن جي دستاويزن جو جواب ڏيو.. سلمان اڪرم راجا چيو ته لنڊن فليٽ حسين نواز 2006ع ۾ حاصل ڪيا، وزيراعظم جي اولاد ڪوبه غلط ڪم ناهي ڪيو، اهي چئون ٿا ته مريم نواز مالڪياڻي آهي ۽ هُو چوي ٿو ته حسين نواز مالڪ آهي. جسٽس عظمت سعيد چيو ته جيڪڏهن مريم نواز بينيفشل اونر ناهي ته دستاويزن مان ثابت ڪريو، جيڪڏهن ڪو ٻيو بينيفشل اونر آهي ته اهو به ٻڌايو، موزيڪ ۽ فونسيڪا موجب مريم نواز لنڊن فليٽس جي مالڪياڻي آهي.. جسٽس اعجاز افضل خان چيو ته الزام آهي ته لنڊن فليٽس نواز شريف خريد ڪيا، درخواستگذار چئون ٿا ته وزيراعظم فنڊ ٻڌائي، الزام اهو به آهي ته مريم وزيراعظم جي ڪفالت هيٺ آهي.. جسٽس عظمت سعيد چيو ته هُو پڇي رهيا آهن ته جده ۾ رقم ڪٿان آئي، ان جو جواب نه هيڏانهن اچي ٿو نه هوڏانهن. جسٽس اعجاز الاحسن چيو ته مني ٽريل بابت سندن سوال اڃا به پنهنجي جاءِ تي موجود آهي، بار ثبوتن جو اوهان ته آهي جيڪو اڃا به آهي.. جسٽس اعجاز افضل خان رمارڪس ڏنا ته ثابت ٿي وڃي ته فليٽ اولاد پاڻ خريد ڪيا ته پبلڪ آفيسر هولڊر بچي ويندو، ثابت نه ٿيو ته ڳالهه پبلڪ آفيس هولڊر تائين ويندي. سلمان اڪرم راجا دليل ڏنا ته حسين نواز جي بي نامي ملڪيت ثابت ناهي ٿي، جنهن تي جسٽس عظمت سعيد چيو ته جن جي ملڪيت هوندي آهي انهن کي وضاحت ڏيڻي پوندي آهي. جسٽس عظمت سعيد چيو ته هل ميٽل لاءِ رقم ڪٿان آئي..؟ اها به خبر ناهي، هل ميٽل مان فائدو ڪنهن کنيو اها سڀني کي خبر آهي، فنڊ جا ذريعا معلوم ناهن پر فائدو حاصل ڪندڙ سامهون آهي… جسٽس عظمت سعيد سلمان اڪرم راجا کان پڇاڻو ڪيو ته ڇا نواز شريف ڪمپني جو چيئرمين نه هو..؟ جنهن تي سلمان اڪرم راجا چيو ته نواز شريف چيئرمين هو، پر هُن پگهار نه کئني. جسٽس عظمت سعيد چيو ته بادي النظر ۾ ڪيس جعلي دستاويز ڏيڻ جو آهي، في الحال بادي لنظر ۾ اڳتي نٿا وڃن، راجا صاحب اهو اوهان ڇا ڪري ڇڏيو، هُو سوچي به نه پيا سگهن ته ائين ٿيندو. جسٽس عظمت سعيد چيو ته سپريم ڪورٽ اکيون بند ڪري نٿي ڪري ويهي سگهي، نتيجا سٺا نه نڪرندا، قانون پنهنجو رستو پاڻ ٺاهيندو.. جسٽس اعجاز الاحسن رمارڪس ڏنا ته جعلي دستاويز ڏيڻ جي 7 سال سزا آهي، 4 فيبروري 2006ع ۾ برطانيا ۾ موڪل هئي، موڪل واري ڏينهن تي برطانيا ۾ ڪير فون به ناهي کڻندو، ان جو اوهان وٽ هاڻي ڪهڙو جواب آهي.. سلمان اڪرم راجا چيو ته ممڪن آهي ڪا غلط ٿي هجي، سينيئر وڪيل اڪرم شيخ ان وقت ڪيس هلائي رهيو هو، هُو معلوم ڪندو ته اهو ڪيئن ٿيو..؟ جسٽس اعجاز الاحسن چيو ته قطري کي پيش ڪرڻ حسين نواز جي ذميواري هئي، قطري بيان رڪارڊ ڪرائي ها ته ڪهاڻي ئي ختم ٿي وڃي ها، قطري ته پنهنجي محل مان نڪرڻ لاءِ به تيار ناهي.. جسٽس عظمت سعيد چيو ته ڇا قطري پاڪستان اچڻ لاءِ تيار آهي..؟ جنهن تي سلمان اڪرم راجا چيو ته کيس ان بابت آگاهه ناهي ڪيو ويو. عدالت ڪيس جي ٻڌڻي اڄ صبح جو ساڍي 9 وڳي تائين ملتوي ڪري ڇڏي، سلمان اڪرم راجا اڄ به دليل جاري رکندو.

 

جي آءِ ٽي ڪجهه مٽيريل لڪايو، سوال ڪرڻ جو طريقو درست ناهي: داخل ڪيل اعتراض

اسلام آباد  (اين اين آءِ) سپريم ڪورٽ ۾ وزيراعظم نوازشريف جي ٻارڙن جي وڪيل سلمان اڪرام خواجا نوان دستاويز 17 صفحن تي ٻڌل اعتراض جمع ڪرائي ڇڏيا ۽ اپيل ڪئي عدالت جي آئي ٽي جي رپورٽ ۽ شآهدين کي رد ڪري، جڏهن ته سپريم ڪورٽ واضع ڪيو آهي ته مني ٽرائيل جو جواب جيڪڏهن ٻارڙ ا نه ڏئي سگھيا ته ان جا نتيجا عوامي عهدو رکڻ واري تي پوندا. اسان ان جي خلاف فيصلو ڏيڻ تي مجبو ر ٿي وينداسين، جسٽس اعجاز الا احسن ٽرسٽ ڊيڊ جي تصديق ٿيڻ تي اعتراض واريندي چيو ته دستاويز تيار ڪنهن ٻئي ڏينهن ۽ تصديق ڪنهن ٻئي جي ڪرائي وئي، ان دستاويزن جي تصديق ڇنڇر جي ڏينهن ڪرائي وئي پر ان ڏينهن برطانيا ۾ ته موڪل هوندي آهي، جڏهن جسٽس عظمت سعيد چيو ته عدالت جي اڳيان ڪيس بابي النظر ۾ جعلي دستاويز ڏيڻ جو آهي. في الحال ان کا اڳتي وڃڻ نه ٿا چاهيون ، پاناما ڪيس جي جاچ ڪندڙ جي آئي ٽي جي رپورٽ جمع ٿيڻ کان پوءِ عدالت جي ٽي رڪني بينچ ڪيس جي چوٿين ٻڌڻي خميس تي ڪئي، ٻڌڻي کان اڳ اڳوڻي قطري وزراعظم حماد بن جاثم جو جي آئي ٽي ڏانهن موڪليل ٽيون خط به سپريم ڪورٽ ۾ پيش ڪيو ويو جنهن ۾ جي آئي ٽي کي ايندڙ هفتي جي آخر ۾ دوها دعوت ڏني وئي. حماد بن جاثم پاران جي آئي ٽي جو اهو خط هلندڙ مهيني 17 جولائي تي لکيو ويو جنهن ۾ پهريان موڪلين ٻن خطن جي به تصديق ڪئي وئي، پنهنجي خط ۾ اڳوڻِي قطري وزيراعظم واضع ڪيو آهي ان  تي پاڪستاني قانون لاڳو نه ٿو ٿئي. ان لاءِ هو پاڪستان اچي ڪنهن به عدالت يا ٽربيونل جي اڳيان پيش نه ٿو ٿي سگھي، ٻڌڻي سروع ٿي ته وزيراعظم نوازسريف جي ٻارڙن جي وڪيل وڌيڪ دستاويز جمع ڪرايا، عدالتي بينچ ان کان اڳ ميڊيا تي ليڪ ٿيڻ واري معاملي تي ڪاوڙ جو اظهار ڪيو جسٽس اعجاز افضل سلمان اڪرم راجا کي مخاطب  ٿيندي چيو ته توهان دستاويز وقت تي جمع ڪرائڻ جو چيو هو وڪيل جواب ڏنو ته مان ڪوشش ڪئي جنهن تي جج چيو ته سمورا دستاويز ميڊيا تي بحث هيٺ رهيا، جسٽس اعجاز احسن  چيو ته ميڊيا تي جاري ٿيندڙ دستاويزن ۾ هڪ خط اڳوڻي قطري وزيراعظم  جو به آهي جسٽس عظمت سعيد چيو ته توهان ميڊيا تي پنهنجو ڪيس هلايو، ته ميڊيا کي دليل به ڏيو هان جنهن تي وڪيل چيو ته ميڊيا تي دستاويز منهنجي پاران جاري نه ٿيا. جسٽس اعجاز الا احسن چيو ته هن وقت تائين اسان آمدني جو ذريعو ۽ مني ٽرائيل نه ڳلي سگھياسين، جسٽس عظمت چيو ته لنڊن فليٽ جي نيلسن ۽ نيسڪول ملڪيت هجڻ تي ڪو به جھيڙو نه آهي ۽ موضيڪ فونسيڪا موجب مريم نواز  فيلٽن جي مالڪ آهن. وڪيل موقف اختيار ڪيو ته ان جو چوڻ آهي ته مريم مالڪ اهي جڏهن ته اسان جو حسين مالڪ آهي فرق نه آهي، جنهن تي جسٽس اعجاز احسن چيو ته وڏو فرق آهي جيڪڏهن مريم مالڪ آهي ته اسان فنڊن کي ڏسنداسين. جسٽس اعجاز افضل چيو ته 1993 ۾ ٻارڙن جون عمريون ڏسو ته معلوم ٿيندو ته هو فليٽ خريد ڪري نه سگھن پيا. جسٽس اعجاز افضل چيو ته الزام اهو آهي ته فليٽ وزيراعطم خريد ڪيا ۽ درخواست ڪندڙ چوي ٿو ته وزيراعظم فنڊ ٻڌائي، جسٽس عظمت سعيد چيو ته ماڻهون پڇن ٿا ته اسان تي الزام ڇا آهي ته چئون ٿا ته نيب جي سيڪشن 9A 5 ڪرپشن جي حوالي سان آهي، ٻڌڻي دوران حماد بن جاسم ۽ برٽش ۽ جن آئيلينڊ جا دستاويز کوليا ويا جنهن جي آئي ٽي ڏانهن موڪليل ٻه خط به شامل هيا، عدالت چيو ته اسان کلي عدالت ۾ دستاويزن جو جائزو ورتو، ٻئي ڌريون ان رڪارڊ کي حاصل ڪري سگھن ٿيون، عدالتي بيان تي سلمان اڪرم راجا پاران پيش ڪيل ڪيترن ئي دستاويزن کي رد ڪندي چيو آهي ته ان دستاويزن جي يو اي اي جي انصاف واري وزارت پهريان ئي تصديق ڪري ڇڏي هئي. جسٽس اعجاز احسن ٽرسٽ ڊيڊ جي تصديق ٿيڻ تي اعتراض واريندي چيو ته دستاويز تيار ڪنهن ٻئي ڪيا ۽ تصديق ڪنهن ٻئي ڏينهن ڪرائي. جسٽس عظمت سعيد چيو ته راجا صاحب اهو توهان ڇا ڪري ڇڏيو اسان سوچي به نه ٿا سگھون ته ائين ٿي ڪيئن ويو، جعلي دستاويزن جو معاملو منهنجي دل کي ٽوڙي ڇڏيو. ان جعلسازي تي قانون پنهنجو رستو پاڻ اختيار ڪندو. وڪيل چيو ته ٽيڪنڪي بنيادن تي  ڪيلبري فوٽس جو معاملو صحيح نه آهي، جسٽس عظمت سعيد چيو ته گورا نه لڇ ڏيندا آهن ته رومال اڳيان ڏيندا آهن، ڇا ڪوئي قانوني فونٽ چوري ڪندو، جسٽس اعجاز احسن چيو ته ٽرسٽ ڊيڊ سان ڪيترائي مسئلا آهن، هر شخص جي آئيني اختيارن تي اسان تمام محتاط آهيون، جسٽس اعجاز الا احسن وڪيل کان پڇا ڪئي ته 4 فروري 2006 تي برطانيا ۾ موڪل هئي توهان وٽ ان جو ڪهڙو جواب آهي، ان تي وڪيل آهي ته ممڪن آهي ته غلطي ٿي وئي هجي. جسٽس عظمت شيخ چيو ته توهان جي ڳالهين مان دبئي حڪومت تمام گھڻيون غلطيون ڪري ٿي. وڪيل چيو ته سينئرن وڪيل اڪرم شيخ ان وقت ڪيس هلائي رهيو واسطيدار فورم ڏانهن معاملو وڃي ته وضآحت به ايندي، جسٽس عظمت سعيد شيخ چيو ته ڪنهن جا بنيادي حق متاثر نه ٿا ڪرڻ چاهيون اهڙو ڪجھه نه چونداسين  جنهن سان ڪيس تي اثر پوي، جج عظمت سعيد چيو ته توهان چاهيو ته ٿا اسان سرڪاري سطح تي ايندڙ دستاويزن تي يقين نه ڪريون وڪيل چيو ته اسان جو موقف ان حوالي سان وڌيڪ جاچ جو آهي. وزيراعظم جي ٻارڙن جي وڪيل دليل ڏيندي چيو ته يواي اي اختيار جو گلف مل جي معاهدي جا رڪارڊ نه هجڻ جو جواب ڏنو، 12 ملين درهم جي ٽرانسڪيشن جي به ترديد ڪئي. خط تي حسين نواز سان ڪو سوال نه پڇيون ويو، حسين نواز جي تصديق ٿيل دستاويز کي نه گھريو ويو. جنهن تي جسٽس اعجاز الا حسن پڇيو ته يو اي اي مان به حسين نواز جي دستاويزن جي تصديق گھري وئي هئي. جج چيو ته يو اي اي اختيارن چيو هيو ته اها مهر اسانجي آهي ئي نه. مهر جي تصديق نه هجڻ جا جيڪي اثر هوندا اهي عدالت بحث ڪرڻ نه ٿي چاهي. وڪيل چيو ته اهڙو ڪجھه به ٿيندو ڪجھه غلط فهمي ۽ غلطي ٿي آهي، جسٽس اعجاز الا حسن جو چوڻ هو ته حسين نواز ۽ طارق شفيع کان پڇيو ته اسان نوٽ نه ڪرايو، سڀني چيو ته هو ان مهر کي نه ڄاڻين، ان جو مطلب ته اهي دستاويز غلط آهن.  پبلڪ کان تصديق ڪرايا ويا، حسين نواز جي آئي ٽي کي ٻڌايو هو ته هو دبئي نه هيو ڪنهن پبلڪ کان تصديق ڪرايا، ان سان ته اهي دستاويز جعلي لڳن ٿا. جسٽس عظمت سعيد شيخ چيو ته ذاتي دستاويزن ۾ ته اهو لکي سگھجي ٿو ته سامان طائي ٽينڪ ۾ ويو، ڪي تصديق ٿيل دستاويز آڻيو جي آئي ٽي جي نتيجن تي حملو نه ڪيو ان جي دستاويزن جو جواب ڏيو، جسٽس اعجاز الا حسن سلمان اڪرم راجا کي چيو ته اسان توهان کان پڇي رهيا آهيون ته توهان پنهنجو موقف ٻڌايو ته جنهن تي ان جو چوڻ هيو جي آئي ٽي حسين نواز تي جرح نه ڪئي. جي آئي ٽي غلط سوال ڪيا، جج چيو ته هاڻي توهان نوان دستاويز آڻيو، ان ڪيس تي اثر ڏسنداسين توهانکي گھرجي هان ته سمورو رڪارڊ جي آئي ٽي کي ڏيو هان جنهن تي وڪيل چيو ته جي آئي ٽي ته منهنجي سمورن دستاويزن کي جعلي قرار ڏئي ڇڏيو، جسٽس اعجاز احسن چيو ته دبئي اختيارن دبئي کان اسڪريپ جدي وڃڻ جي ترديد ڪئي جنهن تي سلمان اڪرام راجا چيو ته اها اسڪريپ نه مشينري هئي، جج چيو ته جڏهن مشينري دبئي کان ابو ظهبي وئي ته انجو رڪارڊ هجڻ گھرجي جنهن تي سلمان اڪرم چيو ته مشينري دبئي کان ابوظهبي جي رستي جدي وئي. ججن چيو ته توهان چئي رهيا آهيو ته مشينري ابوظهبي کان دبئي وئي توهان پهريان مشنيري دبئي کان جدي وئي جنهن تي سلمان اڪرم چيو ته يو اي اي جي اندر سامان جو رڪارڊ نه هوندو آهي، جسٽس عظمت سعيد چيو ته ڪي تصديق وارا دستاويز کڻي اچو توهان جيڪي ڏيکاري رهيا آهيو، اهي پرائيويٽ آهن دستاويز ڏيڻا آهن ته ڪسٽم آفيس کي ڏيو، جسٽس اعجاز احسن پڇيو ته ڇا وڪرو ڪرڻ وقت عزيزيا مل تي ڪي رهتون هيون جنهن تي سلمان اڪرم چيو ته جيڪي رهتون هيون اهي ادا ڪيون ويون هيون ،. سلمان اڪرم چيو ته جي آئي ٽي پاڻ نتيجي ڪڍيو ته حماد بن جاسم جي انٽرويو جي ضرورت نه آهي، جنهن تي جج چيو ته عدالت چئي چڪي آهي فيصلو دستاويزن تي ٿيڻو آهي، وڌيڪ جاچ جو چئي توهان نئين ڳالهه ڪري ڇڏي. سلمان اڪرم راجا چيو ته مان صرف اهو چئي رهيو آهيان ته مڪمل انڪوائري ٿيڻ گھرجي، جسٽس عظمت سعيد وڪيل کان پڇيو ته معاملو احتساب عدالت ڏانهن موڪليو جنهن تي وڪيل چيو ته مان صرف انڪوائري جو چئي رهيو آهيان، جج وڪيل کي چيو ته قطري کي پيش ڪرڻ توهان جي ذميواري هئي هو توهان جو گواهه هيو پر توهان هن کي پيش نه ڪيو، توهان صرف قطري سيڙپڪاري جو رسيدون ڏيکاريون ، توهان نه ٽرانسيڪشن ڏيکاري ۽ نه رسيدون، ته اسان ڪيئن مڃون، جج چيو ته حماد بن جاسم خطن ۾ رقم موڪلڻ جو هڪ لفظ به نه لکيو آ. جج چيو ته شهزادي کي چيو ته اچو هن چيو ته مان نه ٿو اچان، پاڪستاني سفارتخاني اچڻ جو چيو ۽ ان ڳالهه کي به نه مڃيو، ڇا سان سڀ هاڻي دوها هليا وڃون؟ جج چيو ته لافرم جو اڪائونٽ ڏيکاريو رقم جو وهڪرو واضع ٿي ويندو، اهو افريڪا يا پاناما نه انگلينڊ آهي، سمورو رڪارڊ ملي ويندو آهي، رڪارڊ آڻيو ڳالهه ختم ٿي ويندي. اهو اهو سوال آهي جنهن جو جواب نه آهي. سلمان اڪرم راجا چيو ته شيخ حمد ان جو جواب ڏئي سگھي ٿو، جنهن تي جج چيو ته قطري ته ويڊيو لنڪ کان جواب ڏيڻ کان به انڪار ڪري ڇڏيو شايد ان جي تصوير سٺي نه ٿي اچي ان لاءِ هو نه آيو، جج چيو ته قطري چيو ته منهنجي محل ۾ اچو، جج چيو ته پاڪستان ۽ پاڪستاني سفارتخاني ۽ ويڊيو لنڪ تي نه اچڻ باقي ڇا رهجي ويو، جنهن تي وڪيل چيو ته ارسلان افتخار کي ڪيس موجب قطر وڃڻ جي ضرورت نه هئي. جسٽس اعجاز افضل چيو ته ڇا وزراعظم دبئي ڪمپني جو چيرمين آهي جنهن تي وڪيل چيو ته ها چيرمين آهي. جج چيو ته جبل ڪمپني مان 615 هزار پائونڊ فليگ شپ ڪمپني کي موڪليا ويا توهان چئي رهيا آهيو ته ان ڪمپني جا ڪي بي اثاثا نه آهن، جنهن تي سلمان اڪرم عدالت کان سوال جي جواب جي مهلت ورتي، سلمان اڪرم راجا چيو ته منهنجا اڄ جمعي ختم ٿي ويندا، جنهن تي پي ٽي آئي جي وڪيل چيو ته هو جوابن تي مختصر دليل ڏيندو جسٽس عظمت سعيد چيو ته ڪيپٽن صفدر پاران ڪو به پيش نه ٿيو، جيڪڏهن ڪو آيو  ته صحيح نه ڇڏي ڏيو، جنهن تي سلمان اڪرم چيو ته شآيد شاهد حامد ڪيس ۾ صفدر جووڪيل آهي، جنهن تي جسٽس اعجاز افضل چيو ته جيڪڏهن وڪيل آيو ته ٻڌنداسين نه ته فيصلو ڏينداسين جنهن تي ٻڌڻي اڄ جمعي تائين ملتوي ڪري ڇڏي.

 

پاڪ فوج جي ڪارروائي، 13 دهشتگرد مارجي ويا، هڪ جوان شهيد

راولپنڊي (ويب ڊيسڪ) پاڪ فوج طرفان آپريشن خيبر 4 تحت راجگال ۽ شوال ۾ ڪيل تازي ڪارروائي ۾ 13 دهشتگرد مارجي ويا آهن ۽ 6 زخمي ٿي پيا آهن، جڏهن ته فائرنگ جي ڏي وٺ ۾ هڪ جوان به شهيد ٿيو آهي. آءِ ايس پي آر موجب پاڪ فضائيا، آرمي ايوي ايشن ۽ آرٽلري ڪارروائي ڪندي دهشتگردن جا ڪيترائي ٺڪاڻا تباهه ڪري ڇڏيا، جڏهن ته 13 دهشتگردن کي ماريو ويو ۽ 6 زخمي ٿيا آهن. بيان موجب دهشتگردن جي فائرنگ ۾ سپاهي عبدالجبار شهيد ٿي ويو، جڏهن ته پاڪ فوج 90 اسڪوائر ڪلو ميٽر حصو دهشتگردن کان پاڪ ڪرايو. آءِ ايس پي آر جو چوڻ آهي ته دهشتگردن مختلف هنڌن تي آءِ ڊيز لڳايون هيون، جن کي پاڪ آرمي جي انجنيئرن جي ٽيم ناڪارا بڻائي ڇڏيو. واضح رهي ته پاڪ فوج 16 جولاءِ تي آپريشن الفساد تحت راجگال ۽ شوال ويلي ۾ آپريشن خيبر 4 شروع ڪرڻ جو اعلان ڪيو هو. 27

 

اعليٰ عدالت به چئي چڪي آهي ته پاناما ڪيس ڪرپشن جو آهي ئي نه: مريم اورنگزيب

اسلام آباد (اين اين آءِ) پاناما ڪرپشن جو ڪيس ناهي، اعليٰ عدالت به اها ڳالهه چئي چڪي آهي، حقيقت ۾ ڪيس ان تماشي جو هو، جيڪو مخالف ڌر لڳائڻ پئي چاهي. مملڪتي وزير  مريم اورنگزيب چيو ته ٽيون ڀيرو چونڊيل وزيراعطم عوام لاءِ آخري وقت تائين وڙهندو رهندو، وزيراعظم جي خلاف ڪيس ڪرپشن جو نه پر اقتدار جو هوس جو هيو. اميد آهي ته پاڪستان جي اعليٰ عدليا تماشو ڪرڻ وارن جي درخواست رد ڪندي. عمران خان جي شڪل ۾ سازشن جي ٽولي کي پاڪستان جي عوام به رد ڪندي. عمران خان ٽن عدالتن مان فرار آهي. خميس تي ميڊياسان ڳالهائيندي مريم اورنگزيب چيوته پاناما ڪيس ۾ درخواست ڪندڙ ڪرپشن مني لانڊرنگ ۽ اثاثا لڪائڻ جا الزام لڳايا جڏهن ته ڪيس اتي ئي بيٺو آهي ۽ سپريم ڪورٽ توثيق ڪري چڪي آهي، ٻڌڻي ڪيل ڪيس ڪرپشن جو آهي ئي نه. هن چيوته عدالت توثيق ڪئي ته وزيراعظم تي ڪنهن اقتدار جي دور تي ڪرپشن ثابت نه ٿي، هن پنهنجي ڪنهن به دور ۾ اختيارن جو غلط استعمال نه ڪيو، هن چيو ته مخالف پاناما ڪيس کي سياسي حساب سان استعمال ڪرڻ جي ڪوشش ڪئي. هن چيو ته وزيراعظم 50 سال پراڻو حساب ڏئي رهيو آهي، جنهن پاڻ کي قانون جي اڳيان پيش ڪيو، جڏهن وزيراعظم سپريم ڪورٽ ۾ عوامي ميڊٽ، ملڪي ترقي، دهشتگردي جي خاتمي ۽ سي پيڪ منصوبي جو ڪيس پاڪستان جي عوام لاءِ وڙهي رهيو آهي.  هن چيو ته بني گالا ۾ ويٺل شخص جي ذهني حالت تي ڳڻتي آهي، ڪي پي ڪي ۾ احتساب ڪميشن کي لڳائيندڙ تالو عمران خان کي پنهنجي منهن تي وات بند ڪرڻ لاءِ کڻڻ گھرجي، هن چيو ته جي آئي ٽي جي خلاف جيڪي خدشا پهرين هيا هاڻي به آهن.  هن چيو ته مخالفن جي پيش ڪيل بنا تصديق جي دستاويزن کي ڪوڙو ثابت ڪنداسين

 

وزيراعظم جلدي ۾ آهي، اڻپورن منصوبن جو افتتاح ڪري همدرديون ميڙڻ چاهي ٿو: خورشيد شاهه

ڪراچي (ويب ڊيسڪ): قومي اسيمبلي ۾ مخالف ڌر اڳواڻ سيد خورشيد شاهه چيو آهي ته وزيراعظم نواز شريف ملڪ ۾ جاري اڻپورن منصوبن جو افتتاح ڪري پاناما ڪيس مان جان ڇڏائڻ لاءِ عوامي همدرديون ميڙڻ چاهي ٿو، قومي اسيمبلي ۾ مخالف ڌر اڳواڻ سيد خورشيد شاهه وزيراعظم نواز شريف جي دير ۾ تقرير ۽ لواري ٽنل جي افتتاح کي پاناما ڪيس سان جوڙي ڇڏيو، اپوزيشن ليڊر جو چوڻ هو ته نواز شريف اڻپورن منصوبن جو جلدي جلدي افتتاح ڪري رهيو آهي، ڪراچي حيدر آباد موٽر وي جي اڻپوري منصوبي جو افتتاح ڪيو ويو، هاڻي لواري ٽنل جو افتتاح ڪيو ويو، جيڪو اڃا اڻپورو آهي.

 

نواز شريف جو اقتدار ڪرپشن سبب ٻڏي رهيو آهي: بلاول ڀٽو

اسلام آباد (ويب ڊيسڪ): پيپلز پارٽي چيئرمين بلاول ڀٽو زرداري سان پيپلز پارٽي خيبر پختونخواهه جي اڳواڻن ملاقات ڪئي آهي، ملاقات دوران ڪارڪنن کي هدايت ڪندي بلاول ڀٽو زرداري چيو ته پارٽي اڳواڻ ۽ عهديدار سرگرم ٿي وڃن، هن چيو ته شهر شهر ۽ ڳوٺ ڳوٺ پارٽي کي مضبوط ۽ منظم ڪريو، بلاول ڀٽو زرداري چيو ته نواز شريف جو اقتدار ڪرپشن سبب ٻڏي رهيو آهي، هن چيو ته 2013 جون چونڊون اسان کان چورايون ويون هيون، خيبر پختونخواهه ۾ اسان جي پارٽي اڳواڻن ۽ اميدوارن کي شهيد ڪيو ويو.

 

پي ايس ۱۱۴: ايم ڪيو ايم جي درخواست رد، سعيد غني جي ڪاميابيءَ جو نوٽيفڪيشن جاري

اسلام آباد (بيورو)  اليڪشن ڪميشن ڪراچي جي تڪ پي ايس ۱۱۴ جي چونڊ بابت ايم ڪيو ايم جي درخواست رد ڪندي معاملو اليڪشن ٽربيونل کي اماڻي ڇڏيو آهي، جڏهن ته سعيد غني جي ڪاميابي جو نوٽيفڪيشن جاري ڪيو ويو آهي، پي ايس ۱۱۴ ۾ ايم ڪيو ايم جي ڪامران ٽيسوري جي ووٽن جي ٻيهر ڳڻپ جي درخواست تي چيف اليڪشن ڪمشنر جي سربراهي ۾ ۵ رڪني ڪميشن فيصلو ٻڌائي ڇڏيو آهي، فيصلي ۾ ايم ڪيو ايم جي درخواست رد ڪئي وئي ۽ معاملو اليڪشن ٽربيونل کي موڪليو ويو ۽ ايم ڪيو ايم کي ٽربيونل سان رابطو ڪرڻ جي هدايت ڪئي وئي. جنهن کانپوءِ سعيد غني صحافين سان ڳالهائيندي چيو ته شفاف ترين اليڪشن ٿي، رينجرز ۽ سياسي اڳواڻ ڄاڻين ٿا ته ڪابه ڌانڌلي ناهي ٿي، ايم ڪيو ايم به اها ڳالهه ڄاڻي ٿي، پوليس جو هڪ به ماڻهو اندر موجود نه هو، پر اتي هڪ سوچيل سمجهيل رٿا تحت هنگامو ڪرايو ويو. ايم ڪيو ايم اڳواڻ فاروق ستار چيو ته اليڪشن ڪميشن جي فيصلي تي ڏک ۽ افسوس ٿيو، انصاف جي تقاضا پوري ناهي ٿي.

 

وزيراعظم نواز شريف پاڻ استعيفيٰ نه ڏني ته خوار ٿي ويندو: سراج الحق

اسلام آباد ( ويب ڊيسڪ ) جماعت اسلامي جي امير سراج الحق چيو آهي ته وزيراعظم نواز شريف پاڻ استعيفيٰ نه ڏني ته خوار ٿي ويندو. سپريم ڪورٽ ٻاهران ميڊيا سان ڳالهائيندي سراج الحق چيو ته  سپريم ڪورٽ ڪرپشن جي خاتمي جو فيصلو ڪري ته کين ڪير به روڪي نه ٿو سگهي. هن چيو ته پاڪستان جا ٻار ۽ ايندڙ نسل قرضي ٿي چڪا آهن. سندس چوڻ هو ته گار گند ۽ گوڙ ڪرڻ ڪرپشن جي مسئلي جو حل ناهي. سراج الحق چيو ته پاناما ليڪس ڪيس ۾ حڪمرانن پنهنجي انجام کي ڏسي ڇڏيو آهي. هن چيو ته پاناما وزيراعظم جي پنهنجي ڪرتوتن جو عمل آهي، عدالتي سازش ناهي. سندس چوڻ هو ته وزيراعظم جي تقرير ۽ پنهنجا لفظ ئي کيس ڦاسائي رهيا آهن. سراج الحق چيو ته وزيراعظم نواز شريف لاءِ بهتر آهي ته پاڻ ئي استعيفيٰ ڏئي هليو وڃي.

 

عمران خان جي پيءِ پاڪستان ۾ ڪرپش جو بنياد رکيو، ذوالفقار علي ڀٽو کيس نوڪري مان ڪڍي ڇڏيو: عابد شير علي

اسلام آباد (اين اين آءِ) پاڻي ۽ بجلي واري مملڪتي وزير عابد شير علي چيو ته عمران خان جو پيءُع پاڪستان ۾ ڪرپشن جو بنياد رکيو جنهن کي ذوالفقار علي ڀٽو نوڪري مان ڪڍيو هو، عمران خان صرف هڪ نسل جو جواب ڏئي، عمران خان جو وڪيل بابر اعواڻ هڪ فراڊ وارو انسان آهي. خميس تي سپريم ڪورٽ جي ٻاهران ميڊيا سان ڳالهائيندي هن چيو ته بني گالا کان زمان پارڪ تائين ملڪيت ڪرپشن جي پئسي سان ٺاهي وئي ان جي نيازي سروس به ڪرپشن جي ڪمائي ۾ ٻڌل آهي، عابد شير علي چيو ته تاريخ ان ڳالهه جي گواهه آهي ته عمران خان جي والد کي ذوالفقار علي ڪرپشن جي بنياد تي نوڪري مان ڪڍيو هو. عمران خان چوري جي پيسن سان لنڊن جي يونيورسٽي ۾ پڙهڻ ويو. عمران خان ته پنهنجي ڌيءُ جي ولديت قبول ڪرڻ کان به انڪار ڪيو هو. سڄي دنيا جي ميڊيا تي ان جي اصليت ثابت ٿي چڪي هئي. اسانجي ليڊر 40 جو حساب ڏنو، عمران خان صرف هڪ نسل جو حساب ڏئي.