تازيون خبرون

Daily Archives: July 19, 2017

ايشا ديول مڙس سان گڏ گهمڻ لاءِ يونان پهچي وئي

ممبئي (شوبز نيوز) بالي ووڊ اداڪارا ايشا ديول مڙس ڀرت تختاڻي سان گهمڻ لاءِ يونان پهچي وئي آهي. ميڊيا مطابق يونان پهتل ايشا ديول اميد سان ٿيڻ بعد سوشل ميڊيا تي تازيون تصويرون به شيئر ڪيون آهن. رپورٽ ۾ چيو ويو آهي ته ايشا ديول ۽ سندس مڙس ڀرت کي سمنڊ جو ڪنارو ۽ ريتي وڻن ٿا، تنهنڪري هن سمنڊ ڪناري وارا شهر ئي گهمڻ لاءِ چونڊيا آهن. جڏهن ته اميد سان ٿيڻ بعد ايشا ديول ڪرينا جيان فوٽو شوٽ ڪرائڻ ۾ مصروف آهي. ميڊيا ڄاڻايو آهي ته يونان گهمڻ لاءِ آئيڊيل آهي، تنهنڪري ايشا ديول ۽ سندس مڙس ڀرت سٺي چونڊ ڪئي آهي.

 

ڪيريئر جي شروعات ۾ والدين حوصلو وڌايو: اليانا ڊي ڪروز

ممبئي (شوبز نيوز) بالي ووڊ جي من موهڻي اداڪارا اليانا ڊي ڪروز چيو آهي ته ڪيريئر جي شروعات ۾ والدين منهنجي وڏي حوصلا افزائي ڪئي. پنهنجي تازي ڳالهه ٻولهه ۾ 30 ورهين جي خوبصورت اداڪارا اليانا ڊي ڪروز چيو ته جڏهن مان فلمي ڪيريئر جي شروعات ڪئي ته ڪنهن به منهنجي راهه ۾ رنڊڪ پيدا نه ڪئي پر ان وقت والدين منهنجي تمام گهڻي حوصلا افزائي ڪئي، هنن جو چوڻ هو ته تون ڪوشش ڪر، ڪڏهن نه ڪڏهن ڪامياب ضرور ٿينديئن. هن چيو ته مون کي خوشي آهي ته والدين ڪيريئر جي شروعات ۾ حوصلا افزائي ڪئي، انهن جي ڪري ئي مان ڪامياب ٿيس.27

 

ڀارتي ڪرڪيٽر محمد شامي تي حملو، ۳ جوابدار گرفتار

ممبئي (اسپورٽس نيوز)  ڀارتي ڪرڪيٽ ٽيم جي فاسٽ بالر محمد شامي تي گهر ٻاهران حملو ٿيو جڏهن ته پوليس ٽن شڪي ماڻهن کي گرفتار ڪري ورتو آهي، ڀارتي ميڊيا مطابق ڪولڪتا جي شهر ڪٽجو نگر ۾ ڪرڪيٽر محمد شامي گهر واپسي تي پنهنجي گاڏي پارڪ ڪري رهيو هو ته ان موقعي تي ۳ موٽرسائيڪل سوار نوجوانن ان تي حملو ڪري ڏنو حملي کانپوءِ ڪرڪيٽر محمد شامي جو ملازم ان کي بچائڻ لاءِ گهر کان ٻاهر آيو ته نوجوانن ان کي تشدد جو نشانو بڻايو واقعي کانپوءِ ڪرڪيٽر فوري طور تي پوليس کي حملي جو اطلاع ڏنو جڏهن ته پوليس سي سي ٽي وي فوٽيج جي مدد سان ٽنهي حملو ڪندڙن کي گرفتار ڪري ورتو پوليس مطابق ڪرڪيٽر کي تشدد جو نشانو بڻائيندڙ جوابدارن جي سڃاڻپ جيانتا سرڪار، سواروپ سرڪار ۽ شيوا پرامانيڪا طور ٿي آهي جڏهن ته ٽي ئي جوابدار ڪرڪيٽر تي حملو ڪرڻ کانپوءِ ويجهي سيلون تي هليا ويا هئا جن کي سي سي ٽي وي فوٽيج جي مدد سان گرفتار ڪيو ويو

 

پاڪستاني ڪرڪيٽر محمد حفيظ پائليٽ بڻجي ويو

ڪراچي(اسپورٽس نيوز)  پاڪستاني آل رائونڊر محمد حفيظ پائليٽ بڻجي ويو، هن جهاز اڏارڻ جي بنيادي سکيا کانپوءِ آسٽريا ۾ پنهنجي پٽ روشان سان گڏ ننڍو جهاز اڏايو جنهن جي وڊيو هن سوشل ميڊيا تي پنهنجن مداحن لاءِ جاري ڪري ڇڏي آهي، هن جو چوڻ آهي ته جهاز اڏائڻ جي تربيت دوران سفر بهترين تجربو ثابت رهيو هن جي پٽ به جهاز ۾ ويهي تمام گهڻو مزو ورتو ۽ اهو به هن ايڊوينچر کي شاندار تصور ڪري ٿوياد رهي ته محمد حفيظ پنهنجي فيملي سان گڏ يورپ گهمڻ ويو آهي.

 

ڇا وزيراعظم جي استيفيٰ تي اتفاق ٿي سگهندو.؟؟: غلا مصطفيٰ جمالي

شايد اها ڳالهه عمران خان جي لاءِ اڻوڻندڙ هجي. ڇو ته ميان نواز شريف جي استيفيٰ جنهن لاءِ عمران خان پنهنجي سموري سياسي طاقت آزمائي ڇڏي آهي .انهي استيفيٰ تي اتفاق نه ٿي سگهيو.جڏهن ته تجزيڪار پهرين به اهي ئي چئي رهيا ته عمران خان ڀلي ڪيتيريون ئي ڪوششون ڪري پر جيڪو مقصد هو اپوزيشن مان وٺڻ ڇو چاهي اهو کيس ڪڏهن به نه ملي سگهندو. ملڻ ته پري جي ڳالهه آهي ويتر کيس وٺڻ  جي بدران ڏيڻو پوندو.عمران خان صاحب اپوزيشن کي وٺي ڪري وڏيون وڏيون ڳالهيون ڪري رهيو هو جنهن مان اهو ان وقت ظاهر ٿي رهيو هو ته انهي اپوزيشن اجلاس اندر ميان صاحب جي استيفيٰ پڪي آهي.پر اهين ٿي نه سگهيو.۽ عمران کي جيتري اپوزيشن مان اميد هئي انهي اميد مان کيس افسوس جو نااميد ٿيڻو پيو.اعتراز احسن ته تمام گهڻي نرم لهجي سان اهو چئي رهيو هو ته اپوزيشن جماعتون ميان نواز شريف کان استيفيٰ جو مطالبو نه ٿيو ڪن. ان ڪري انهي اختلاف جو احترام ڪيو وڃي.شيخ رشيد به چيو  ته انهي راءِ جو احترام ڪيو وڃي.پ پ ته عمران خان کي وڏي اونچائي تان کڻي ڪري هيٺ اڇلايو آهي.بلاول خد نواز ليگ کان استيفي جو مطالبو ڪري رهيو هو ۽ اپوزيشن اندر پ پ جو اهڙو رويو سمجهه کان ٻاهر آهي.ڇو ته جنهن ڳالهه تي ملڪ  اندر هڪ مهم هلي رهي هئي اها ڳالهه هئي ميان نواز شريف جي استيفيٰ ڏي.جيڪڏهن اها ئي رهجي ٿي وڃي ته پوءِ ته سمورو ڊرامو ئي ختم ٿي ويندو.ان کان بهتر ته اهو ئي هو ته ٻنهي پاسن کان اپوزيشن اي اين پي شير پائو قرباني ڏئي ها.۽ باقي جماعتون ملي ڪري نواز شريف جي استيفي جو مطالبو اعلانيه سهي ڪري ڇڏين هان.پر اهين به نه ڪيو ويو.پپيلز پارٽي اين اي پي شير پائو جي بيان جي موقف تي اتفاق ڪيو .جڏهن ته پ پ هڪ دفعو ٻيهر عمران خان کي اهو پيغام ڏنو آهي جنهن پيغام کي عمران خان هاڻ نه سجهيو ته پوءِ ڪڏهن به نه سجهي نه سگهندو.ڇو ته پ پ عمران خان سا ڪا به راند کيڏڻ لاءِ تيار ناهي.جيڪڏهن تيار  آهي ته پ پ پنهنجي مرضي جي راند رهندي.هڪ اهم سوال جيڪو هر ڪنهن جي ذهن ۾ ضرور آيو هوندو ته آخر اعتراز احسن ڪنهن جي ڳالهه مڃي اپوزيشن اندر اهڙو بيان ڏنو.هن بلاول جي ڳالهه مڃي يا آصف علي زرداري جي ڳالهه.!ڇو ته بلاول اڃان ڪجهه ڏينهن پهرين پنهنجي هڪ تقرير اندر اها ڳالهه وڏي آواز سان چئي رهيو هو ته هو هر حال اندر ميان نواز شريف جي استيفي چاهي هو جڏهن ته بلاول پنهنجي بيان اندر ميان نواز صاحب کي چيو ته مودي جي ياد کي هڪ ڌڪو ٻيو به ڏيو.مطلب ته پنهنجي بيان اندر بلاول نواز شريف کي مودي جو يار قرار ڏنو هو.پر اتي سوچڻ جهڙي ڳالهه اها به آهي ته انهي سموري سياست اندر آصف علي زرداري خاموش رهيو هو آصف علي زرداري جي طرفان بلاول جي تقرير جي مطعق ڪو به وضاحتي بيان ميڊيا جي سامهون نه آيو هو.ان ڪري ملڪ اندر اها ڳالهه عام هئي ته اعتراز حسن اپوزيشن اجلاس اندر پ پ جي طرفان تحريڪ انصاف جو نمائدو ٿيندو.ڇو ته بلاول ان وقت نواز ليگ جي خلاف بيان ڏئي رهيو هو ۽ پاڪستان اندر هن وقت به آصف کي ڇڏي ڪري پ پ کي بلاول جي پارٽي سڏيو پيو وڃي پر اهين ٿي نه سگهيو جنهن مان اها ڳالهه صاف ظاهر ٿيو آهي ته پاڪستاني اندر جيڪا پ پ آهي اها اڃان به آصف زرداري جي هٿ ۾ آهي انهي  پ پ جون واڳون اڃان به آصف علي زرداري جي ئي هٿ ۾ آهن.ڇو ته اهي واڳون جيڪڏهن بلاول جي هٿ ۾ هجن ها ته اعتراز احسن ڪڏهن به اهڙو بيان نه ڏئي ها جيڪو سڌو سنئون بلاول جي خلاف هجي!.ڇو ته ٻه ڏينهن پهرين پ پ جي ساڄِي ٻانهن ڏسجندڙ بلاول چوي  ٿو ته نواز شريف استيفي ڏئي ۽ ٻن ڏينهن کان پوءِ سندس ئي پارٽي جو هڪ اهم اڳواڻ سندس پارٽي جي خلاف ورزي ٿو ڪري ته ان مان صاف ظاهر آهي ته پ پ جي سياسي ماحول جو وايو منڊل تبديل ٿي ويو آهي.تجريڪار ته آصف علي کان اهو منسوب ڪري چڪا آهن ته خورشيد رشيد منهنجي ڪنٽرول ۾ آهي ۽ اعتراز احسن منهنجي ڪنٽرول ۾ ناهي.جڏهن ته بلاول جي تقرير کان پوءِ سڀئي اهو چئي رهيا هئا ته اعتراز احسن بلاول جي مشن تي نڪتل آهي.پوءِ اهو سڀني ڏٺو ته سڀ ڳالهيون هڪ طرفيون ثابت ٿيون.آخر اهو ئي ٿيو جيڪو آصف علي زرداري چاهيو ٿي.عمران ته پهرين دفعا پ پ  جي ايترو ويجهو آيو هو.جڏهن ته  اي اين  پي ۽ َآصف علي ته چولي دامن جو ساٿ آهي.آصف علي زرادي جي به اسفند يار ولي سان تمام گهڻي ويجهڙائپ آهي. ۽ اهو ڪيئن ممڪن آهي ته آصف علي زرداري چاهي ته اي اين پي وزيراعظم جي استيفيٰ جو مطالبو ڪري.اي اين پي کي معلوم آهي ته سندس ڪا حيثيت ناهي.ان ڪري سندن ڪو به موقف هڪ طرفو ناهي.ان ڪري اهو بيان هڪ طرف ئي اچي نه ٿو سگهي جيستائين انهن کي ڪنهن هڪ طرفان ڪو اشارو نه ملي.

تجريڪارن جو اهو به چوڻ آهي ته اي اين پي کي لنڊن مان اهو اشارو مليو هو ته اوهين پنهنجي فيصلي تي پڪو پهه ڪري  ڇڏيجو اوهانجي انهي فيصلي جو سڀ احترام ڪندا.انهي ڪري شير پاو به پنهنجي ڳالهه تي پڪو پهه ڪري ڇڏيو.اگر اي اين پي کي شڪ هجي ها ته سندس ڳالهه به مڃي ويندي.ته ڪڏهن به اهڙو سخت موقف نه ڏين ها.ان ڪري اهو سڀ ڪجهه هڪ ڊرامو هو جيڪو عمران خان سان ڪيو ويو.۽ عمران خان به انهي ڄار ۾ هر زور ڦاسيندو ويو. عمران خان ته پنهنجي لاهور واري بيان اندر اهو به چيو هو ته هو اپوزيشن جي اجلاس اندر پنهنجي ٽي او آروز پيش ڪندو. جيڪڏهن اها ڳالهه هجي ها ته عمران خان کي گهٽ  ۾ گهٽ اهو اندو ته هجي ها ۽ هو لاهور واري جسلي اندر اهو اعلان  ته نه ڪري ها.پر هاڻ سوال اهو آهي ته هاڻ ڇا ٿيندو.ڪنهن حد تائين اهو چئي سگهجي ٿو ته استيفي واري فوڪڻي مان هوا نڪري چڪي آهي.عمران خان کي ته اپوزيشن اجلاس اتي اچي پهچايو آهي جتي شايد کيس پاڻي ڍڪ به نصيب نه ٿيندو.جيتوڻيڪ هن وقت عمران خان اڪيلو ڀلي استيفيٰ جو مطالبو به ڪري پر مان سمجهان ٿو ته اهو مطالبو ايترو اثرائتو نه هوندو.جيترو سموريون اپوزيشن پارٽيون ملي ڪري ڪن ها.انهي ڪري هن وقت تجزيڪار اهو به پچئي رهيا آهن ته عمران خان اهو سڀ ڪجهه نه پر اسڪپرٽ رائيٽرسان اهو سڀ ڪجهه ٿيو آهي.کيس وچ سمونڊ ۾ بي يارو مددگار ڇڏيو ويو آهي.جڏهن ته پ پ ته انهن سان اهڙي شطرنج راند کيڏي آهي جنهن جو اندازو به نه ٿا لڳائي سگهن.اسڪرپٽ رائٽر کي پهرين ئي رائونڊ ۾ فلاپ ڪرڻ جي ڪوشش ڪئي وئي آهي.پر اميد اهائي آهي ته اسڪرپٽ رائيٽر نااميد نه ٿيندو.۽ پنهنجون ڪوششون جاري رکندو.۽ سپريم ڪورٽ کان وڌيڪ اميدون لڳايون وينديون.۽ اهو چيو ويندو ته پ پ جي حمايت ته رڳو اخلاقي بنياد ئي ڪئي وئي هئي نه ته انهي حمايت جي ڪابه ضرورت به هئي.پر اها به حقيقت آهي ته پهرين رائونڊ اندر اسڪرپٽ رائٽر کي ناڪامي ملي ۽ نواز شريف کي فائدو.۽ عمران کي سياسي طور تي نقصان ۽ پ پ کي فائدو.انجي باوجود به اهو چيو پيو وڃي ته اهو بحران اڃان وڌيڪ ٽي مهينا  هلندو.ان ڪري ڏسڻو هاڻ اهو آهي ته هاڻ ڇا ٿو ٿئي ۽ اسڪرپٽ وري ڪهڙي ڪهاڻي ٿو لکي.

***

 

عام ماڻھو کان پوء هڪ وڪيل جو قتل ذميوار ڪير ؟؟؟‎: احسان جوڻيجو

هر روز اخبارون هڪ مختصر خبر سان نظر اينديون ت سنڌ جي علائقي هتان لاڙڪاڻو ، سکر يا دادو مان  هڪ نوجوان جو چچريل لاش مليو آهي سنڌ جي هن ڪئنال مان ٻڏل هڪ نوجوانو جو لاش مليو آهي يا وري ڪراچي مان لاڙڪاڻي دادو يا ڪشمور  جي شھر واسي نوجوان جو ٻوري بنڌ لاش مليو آهي پر اڄ تائين اهو ڪو ن ٻڌو آهي ت ان واقعي ۾ ملوث جوبدار گرفتار ڪري ڪورٽن  عبرتناڪ سزائون ڏياريون ويون آهن يا وري واقعي جي متاثر ماڻھن ڏي ڪو حڪومتي وزير لڙي آيو هجي ۔

هوئن ت هر روز ڪراچي ۾ ٻوري بند لاش ملندا هيا هر روز سر ڌڙ کان ڌار ٿيل يا تشدد ٿيل لاش ملندا هيا پر اڄ لاڙڪاڻي واسي نوجوان وڪيل نياز کھاوڙ جو 3 ڏينھن پھريان اغوا بعد اڄ بقاپور مان ٻوري بند لاش ملڻ هڪ افسوس ناڪ ء مذمتي واقعو آهي اهڙا واقعا سنڌ ۾ بد امني ڦھلائڻ ۽ سنڌ جو امن سبوتار ڪرڻ جون ڪڌيون سازشون آهن ۔ هي واقعو ڀلي ذاتي دشمني جو هجي يا ان وقعي ۾ ڪا ٽئين قوت ملوث هجي جيڪا شايد هن جي ڪردار کان ڊڳل هجي ڪي ب هجي پر جيڪڏهن هرروز ڪو ن ڪو نوجوان کنڀيو وڃي ٿو ماريو وڃي ٿو ٻوري ۾ ويڙهي لاش موڪليو ڃي ٿو ان جو ذميوار ان واقعي جا جوابدار ڪھڙي ليڪي ۾ لڪيل آهن جو هتان جي قانوني ادارن حڪومتي عملدارن کان ڳولجھي ن ٿاسگھن يا اهي ڪھڙيون طاقتون آهن جيڪي هر روز ڪارو برڪو اوڙي رات جي پيٽ ۾ سنڌي نوجوان شاگرد توڙي نياز کھاوڙ جيان نوجوان وڪيل کنڀي گم ڪن ٿيون ۽ انھن جا لاش تشدد ڪري چچري يا ٻوري ۾ بند لاش ملن ٿا ۔ هي جيڪا بيچيني وڌندي ٿي وڃي آخر هي واقعا ڪيسيتائين سنڌي قوم سھندي رهندي آخر ڪيسيتائين نوجوانن جا لاش کڻندي رهندي يا هنن واقعن جي اصل حقيقت ڇاآهي جو هر ايندي روز ڪو ن ڪو ڪٺو وڃي ٿو پر حڪومتي ارڪانن جي ڪن تي ڪا جونء ب ڪو نن چري ٿي ۔

هت حڪومتي عملدارن کان اهو سوال ڪيان ٿو ت هن نوجوان جو ڏوھ ڪھڙو هيو ، هي ڪنهن جي هٿان کنڀيو ، هن کي ڪھڙي سازش تحت ماريو ويو ، هن جو آواز ڪھڙي ڪاريھر نانگ ڌٻايو , 3 ڏينھن اڳ هي نوجوان لاڙڪاڻي  مان کنڀيو وڃي ٿو هن جي آزادي لاء ڪھڙا قدم کنيا ويا ، هن جي موبائل فون جو جيڪو رڪارڊ هٿ ڪيوويو ان کان بعد ڪاروائي عمل ۾ ڇو ن آندي وئي ، جوبدارن جو نيٽ ورڪ مطلب ايڏو ت مضبوط هيو جو توهان اتي پھچي ن سگھيو ڀلا جي توهان جون اهي اهڙيون ڪمزوريون رهيون ڀلا جي  اوهان جون اهي ڪوتاهيون رهيون ت سنڌ جي  نوجوانن جي ناحق قتل جو حساب ڪير ڏيندو ؟؟؟؟؟

آخر توهان جا قانوني ادارا اهڙن عناصرن تائين پھچڻ ۾ ڇو ناڪام آهن يا اهي عناصر ايترا ت ڏاڍا آهن جو اوهان انھن کي ڇھي ب نٿا سگهو ؟ ڪالھ سنڌ اندر عام ماڻھو جو قتل عام عروج تي هيو روز نوجوان جا مختلف قسمن جي واقعن ۾ لاش پيا ملن ۽۽ ملندا اچن ٿا پر اڄ هڪ ايڊوڪيٽ جو لاش هتان جي قانوني ادارن جا پول پڌرا ڪري ٿو هنن جا ڪارڪردگي توڙي ڪردار تي سواليه نشان ٿي بيھي ٿو ۔ جنھن ملڪ جا قانوني ادارا هتان  جي سبين محمود جيان هڪ سوشل ورڪر کي تحفظ ن ڏيئي سگھن ، ڪنھن جج يا معزز شخصيت يا نياز کھاوڙ جيان ايڊوڪيٽ کي تحفظ ڏيڻ ۾ ناڪام وڃن اهي ادارا عام ماڻھو کي ڀلا ڪھڙو تحفظ ڏيئي سگھندا ؟؟

روز ڪوڪ دانھون احتجاج ڪندي پنھنجي انصاف لاء دانھيندي هي سنڌ جون نياڻيون دڳن تي نظر اچن ٿيون پر حڪومتي وزيرن جي چپ ڪيئي سوال جنم وٺن ٿا ۔ جيڪڏهن هن وزيرن جو پنهنجو پٽ ڀاء يا ڪو رشتي دار ان واقعي جو شڪار ٿئي ت ڇا انھن جي اهائي چپ هوندي ۔ ڪڏهن ڪو وزير يا مشير جو پٽ اغوا يا ايئن بيدردي سان قتل ناهي ٿيو ڇو جو هنن جي پويان  ڪاري وردي وارا پھرو ڏيندي نظر اچن ٿا هو عوام جا رکولا پٽيوالي ڪندي وزيرن جي درن تي نظر اچن ٿا ۽ عوام کي رحم۔ڪرم تي ڇڏي ڏين ٿا ۔ هي سنڌي قوم جي ووٽن تي  اسيمبلين ۾ چونڍجي آيل ڪڏهن سنڌي قوم جا حقيقي نمائندا بڻبا هنن بي ضميرن جا ضمير ڪڏهن جاڳندا هنن معصومن جو قتل عام ڪڏهن رڪندو هنن جا جوابدار هنن جا قاتل ڪڏهن پڪڙيا ويندا  ۽ هي تازو ٻوري بند لاش جنھن بيچيني پکيڙي ڇڏي آ ڇا هي واقعو ڇا چچريل لاشن جيان هي   ب معمول بڻجي ويندو يا هي هن قسم جا واقعا روڪڻ لاءء ڪي جوڳا قدم کنيا ويندا ۔اسين سنڌ حڪومت اعلي عملدارن کان هنن واقعن جي روڪٿام جي گھر ڪيون ٿا۽ هنن واقعن م۾ ملوث جوبدارن خلاف تڪڙا مثبت ايڪشن کڻڻ جي پڻ گھر ڪيون ٿا ت جيئن آئيندا اهڙا واقعا ٻيھر پيش ن اچن ۽ ڪنھن ماء جا پٽ ايئن ٻوري بند لاش جي شڪل ۾ کنڀي ن ملن ۔

 

جي آءِ ٽي تي واريل اعتراض…

سپريم ڪورٽ ۾ وزيراعظم جي آءِ ٽي ۾ شامل آءِ ايس آءِ ميمبر تي اعتراض واريندي جاچ رپورٽ کي به جانبدار قرار ڏنو آهي، سپريم ڪورٽ ۾ جي آءِ ٽي رپورٽ تي ٻڌل 9 صفحن تي مشتمل پنهنجا اعتراض جمع ڪرايا آهن، جن ۾ استدعا ڪئي وئي آهي ته زميني حقيقتون اڳيان رکندي جي آءِ ٽي جي رپورٽ کي رد ڪيو وڃي، ٻڌڻي دوران شريف خاندان جي وڪيل خواجه حارث پنهنجا دليل ڏيندي چيو ته اسان ٻه متفرق درخواستون داخل ڪيون آهن، هڪ درخواست جلد 10 فراهم ڪرڻ بابت آهي ۽ ٻي درخواست جي آءِ ٽي جي رپورٽ تي اعتراضن بابت آهي. دستاويز گڏ ڪرڻ ۾ جي آءِ ٽي قانون جي خلاف ورزي ڪئي آهي، جي آءِ ٽي پنهنجي اختيارن کي اورانگهيو آهي، ان ۾ شامل دستاويزن کي ثبوت طور تسليم نه ٿو ڪري سگهجي، جي آءِ ٽي عدالتي حڪمن کان گهڻو اڳتي نڪري وئي، جي آءِ ٽي عدالت جو ڪم پاڻ ڪيو آهي، رپورٽ جي بنياد تي ريفرنس داخل نه ٿو ٿي سگهي، جاچ ٽيم ۾ شامل آءِ ايس اءِ جو آفيسر برگيڊيئر نعمان سعيد نامزدگي وقت انهيءَ اداري ۾ مقرر ٿيل نه هو، جڏهن ته شاهدن جي بيانن دوران به هن جو رويو جارحاڻو هو. وزيراعظم جي آءِ ٽي جي سربراهه واجد ضيا تي اعتراض واريندي چيو ته برطانيا ۾ هن جاچ لاءِ پنهنجي سئوٽ اختر راجا جي فرم ڪوسٽ جون خدمتون حاصل ڪري قانون جي ڀڃڪڙي ڪئي، لا فرم کي وڏي رقم ڏني وئي جيڪا قومي خزاني کي وڏو نقصان پهچائڻ برابر آهي، جي آءِ ٽي ۾ نامزدگي وقت آءِ ايس آءِ جي ميمبر جو رويو جارحاڻو هو، جي آءِ ٽي ۾ نامزدگي وقت هو آءِ ايس اءِ جو حصو ئي نه هو ۽ ان کي معاهدي تحت ايجنسي سان لڳائڻ قانون جي خلاف ورزي آهي، جڏهن ته انهي آفيسر جي آءِ ايس آءِ سروس ۽ پگهار واري رڪارڊ ۾ اظهار ئي ناهي. شريف خاندان جي خلاف غير تصديق دستاويزن ۽ زباني ڄاڻ تي نتيجا اخذ ڪيا ويا آهن، درخواست ۾ چيو ويو آهي ته پوري رپورٽ شڪ شبهن، مفروضن تي مشتمل آهي ۽ وزيراعظم کي عوام جي نگاهه ۾ بدنام ڪرڻ جي ڪوشش آهي. غير جانبدار جاچ کانسواءِ منصفاڻو ٽرائيل نٿو ٿي سگهي، جي آءِ ٽي اختيارن جو غلط استعمال ڪندي شاهدن کان پنهنجي مرضي موجب بيان وٺڻ جي ڪوشش ڪئي، شاهدن تي نه رڳو نوازشريف جي حق ۾ ڏنل بيان واپس وٺڻ لاءِ دٻاءُ وڌيو ويو، بلڪه کين هراسان به ڪيو ويو. جي آءِ ٽي عدالتي اختيارن کي استعمال ڪيو ۽ دستاويزن لاءِ غيرقانوني طور چيئرمين نيب کي سڏايو، جڏهن ته ايس اي سي پي ۽ اسٽيٽ بئنڪ جي نمائندن تي ٻڌل اعتراض به اٿاريا. عدالت عظميٰ ۾ داخل ڪرايل درخواست ۾ جي آءِ ٽي رپورٽ جو جلد 10 بابت موقف اختيار ڪيو ويو آهي ته جلد نمبر 10 فراهم نه ڪرڻ بنيادي حقن جي خلاف ورزي آهي، ان کي مشتهر نه ڪرڻ بدنيتي ظاهر ڪري ٿو، ڪيس هلائڻ کان اڳ جلد نمبر 10 فراهم ڪيو وڃي. جنهن کانپوءِ ئي وزيراعظم عدالت جي سامهون موقف پيش ڪري سگهي ٿو.