تازيون خبرون

Daily Archives: July 19, 2017

وزيراعظم پنهنجي ڳالهه ثابت نه ڪئي، مواد جو جائزو وٺي نااهلي بابت فيصلو پاڻ ڪنداسين: سپريم ڪورٽ

اسلام آباد( ويب ڊيسڪ ) سپريم ڪورٽ پاناما ليڪس بابت عملدرآمد ڪيس ۾ چيو آهي ته وزيراعظم نواز شريف سميت سمورن ماڻهن کي صفائي جو موقعو ڏنو ويو پر حقيقتون لڪايون ويون، سوالن جا جواب نه ڏنا ويا آهن. پاناما لڪيس ڪيس جي ٻڌڻي جسٽس اعجاز افضل جي سربراهيءَ ۾ جسٽس شيخ عظمت سعيد ۽ جسٽس اعجاز الحسن تي ٻڌل خاص بئنچ ڪئي. وزيراعظم نواز شريف جي وڪيل خواجه حارث پنهنجي دليلن دوران سپريم ڪورٽ جو 20 اپريل وارو حڪم نامو پڙهي ٻڌايو ۽ چيو ته سپريم ڪورٽ پنهنجي حڪم ۾ جاچ جو رخ طئي ڪري ڇڏيو هو. هن چيو ته سپريم ڪورٽ جي سوالن ۾ نواز شريف بابت تحفن جو ذڪر هو جڏهن ته سپريم ڪورٽ نواز شريف خلاف ڪنهن ڪيس کي ٻيهر کولڻ جو حڪم نه ڏنو هو. وزيراعظم نواز شريف جي وڪيل چيو ته سپريم ڪورٽ لنڊن فليٽس، قطري شهزادي جي خط، بيئررز سرٽيفڪيٽ بابت سوال پڇا ۽ سپريم ڪورٽ جيڪي سوال ڪيا انهن جا ئي جواب گهريا ويا ها، جي آءِ ٽي 13 سوالن سان گڏ وڌيڪ 2 سوال اٿاري ڇڏيا جنهن تي جسٽس عظمت سعيد رمارڪس ڏيندي چيو ته 2 سوال ڪهڙا آهن، ڇا توهان چوڻ چاهيو ٿا ته ملڪيت جي نشاني جي آءِ ٽي جو مئنڊيٽ نه هو. خواجه حارث جواب ڏيندي چيو ته جيڪي ڪيس عدالتن ۾ ختم ٿي چڪا آهن جي آءِ ٽي تنهن جي به پڙتال ڪئي، جڏهن ته عدالت ڪيس کولڻ جو حڪم نه ڏنو هو. جسٽس اعجاز الحسن رمارڪس ڏيندي چيو ته کين ته مني ٽريل ۽ آمدني جي ذريعن جو پهرين ڏينهن کان انتظار آهي. جسٽس عظمت سعيد چيو ته توهان پنهنجي جواب ۾ ڪنهن به دستاويز جي ترديد نه ڪئي آهي، توهان لاءِ در بند نه پيا ڪيا وڃن. خواجه حارث چيو ته اثاثا آمدني کان وڌيڪ هجن ته پوءِ به صفائي جو موقعو ملندو آهي، عدالت پاڻ به پنهنجي حڪم کان ٻاهر نه ٿي وڃي سگهي. خواجه حارث چيو ته ڪنهن به ڪيس جو 13 سوالن جي جوابن سان ڪو به تعلق ناهي، عدالت هر ڪيس جو رڪارڊ گهرائي الڳ جائزو وٺي. جسٽس عظمت سعيد رمارڪس ڏيندي چيو ته جي آءِ ٽي جيڪڏهن جاچ ڪري سفارش ڪئي ته ڇا خراب ڪيو، جي آءِ جي سفارشن کان وڌيڪ عدالتي حڪم اهم هوندو. جسٽس اعجاز افضل رمارڪس ڏيندي چيو ته وزيراعظم سميت سڀني کي صفائي جو موقعو ڏنو ويو، حقيقتون لڪايون ويون ۽ جواب نه ڏنا ويا. هن چيو ته ڪو چوي ٿو ته ياد ناهي، ڪو چوي ٿو اڪائونٽنٽ کي خبر هوندي. سندس چوڻ هو ته  اهو چوڻ غلط آهي ته صفائي جو موقعو نه ڏنو ويو، حڪومت پنهنجي صفائي ۾ جيڪو چوڻ چاهي چئي پئي سگهي پر نه چيو ويو. جسٽس اعجاز افضل چيو ته  جي آءِ ٽي رڳو سفارشون پيش ڪيون، آرڊر عدالت کي جاري ڪرڻو آهي.  جسٽس اعجاز الحسن چيو ته وزيراعظم ۽ سندس پٽن جي اها اپرووچ هئي ته ڪجهه نه ٻڌايو وڃي. جسٽس اعجاز افضل چيو ته سمورن سوالن جو جواب انڪوائري کانسواءِ ممڪن ناهي. خواجه حارث چيو ته عدالت اهڙي رپورٽ تي آرڊر جاري نه ٿي ڪري سگهي، وزيراعظم سميت دستاويزن تي موقف نه ورتو ويو. جسٽس شيخ عظمت سعيد سوال ڪيو ته ڇا وزيراعظم حسن جو والد ۽ ايف زيڊي اي ڪمپني جو مالڪ ناهي. خواجه حارث چيو ته ايف زيڊ اي ڪمپني حسن نواز جي ملڪيت آهي، وزيراعظم نه ڪمپني جو مالڪ آهي ۽ نه ڪڏهن پگهار ورتي آهي. جسٽس عظمت سعيد سوال ڪيو ته ڇا توهان چئو ٿا ته وزيراعظم تي اهو الزام غلط آهي. خواجه حارث چيو ته جي ها اهو الزام غلط آهي، وزيراعظم نه ته ڪنهن آف شور ڪمپني جو مالڪ آهي ۽ نه ڪا پگهار ورتي. جسٽس عظمت سعيد چيو ته هل ميٽل ڪمپني جي رقم پاڪستان ڪيئن آئي اها ڳالهه پاڻ ئي توهان عدالت ۾ ٻڌائي. جسٽش اعجاز چيو ته وزيراعظم هل ميٽل آمدني سياسي مقصدن لاءِ استعمال ڪرڻ جي ترديد ڪئي. خواجه حارث چيو ته جي آءِ ٽي ڪنهن به ڌر کان دستاويزن تي وضاحت نه گهري. جسٽس عظمت سعيد چيو ته توهان جڏهن چاهيو متفرق درخواست کي چئلينج ڪري سگهو ٿا، توهان پنهنجو جواب اسان وٽ ڏئي ڇڏيو. جسٽس عظمت سعيد چيو ته جيڪي ڳالهيون جي آءِ ٽي کي پڇڻيون هيون اسان پڇي ڇڏيون، معاملو ختم ٿي ويو. جسٽس اعجاز افضل رمارڪس ڏيندي چيو ته وزيراعظم تقرير ۾ چيو هو ته ذريعن ۽ وسيلن جو رڪارڊ موجود آهي، سندس ڪم هو ته لنڊن فليٽس جي خريداري جا ذريعا ٻڌائي ها. هن چيو ته لنڊن فليٽس جي خريداري وقت ٻارڙن جي آمدني نه هئي. جسٽس اعجاز الحسن چيو ته وزيراعظم چيو هو ته هو ثابت ڪندا پر عدالت ۾ ڪجهه نه ڏنو ويو آهي. هن چيو ته وزيراعظم پاڻ دستاويز ڏيڻ واري بيان کان آجو نه ٿو ٿي سگهي. سندس چوڻ هو ته هو پاڻ سموري مواد جو جائزو وٺندا پوءِ طئي ڪندا ته نااهل بڻجي ٿي يا نه؟ خواجه حارث چيو ته وزيراعظم جا اثاثا آمدني کان وڌيڪ هئا ته جي آءِ ٽي ٻڌائي ها،  ملڪيون ۽ ملون وزيراعظم جي ملڪيت نه آهن. هن چيو ته  عدالت تقرير ۾ تضاد تي ڪو حڪم جاري نه ٿي ڪري سگه، عدالت پنهنجي ئي حڪم تي نظرثاني نه ٿي ڪري سگهي. سندس چوڻ هو ته آڏي پڇا کانسواءِ جي آءِ ٽي جي رپورٽ هڪ طرفي هوندي.

 

پ پ جو حڪومت مخالف تحريڪ تي غور، ڪارڪن کي تيار رهڻ جي هدايت

لاهور (اين اين آءِ) پ پ پ  جو چيرمين بلاول ڀٽو زرداري پ پ پ  ڏکڻ پنجاب پاران ملتان، بهاولپور ۽ ڊيراغازي خان، مظفر ڳڙهه، بهاولنگر لياهه ۾ گو نواز گو جي ريلين جي انعقاد کي شروعات قرار ڏيندي چيو آهي ته ان کان ڪيترائين هر پاڪستاني نوازشريف کي ريڊ ڪارڊ ڏيکاري ان کي اقتدار کان الڳ ڪري، اها ڳالهه هن ڏکن پنجاب پارٽي جي صدر مخدوم سيد احمد محمود سان ٽيليفون تي ڳالهائيندي ڪئي بلاول ڀٽو زرداري تصور، جمهوريت ۽جمهوري اقتدار کي سخت نقصان پهچائڻ واري نوازشريف ۽ ان جي ٽولي هڪ ئي وقت يلغآر ڪرڻ تي ڏکڻ پنجاب  جي صدر ۽ ان ٽيم ۾ شامل ٻين عهديدارن ۽ پارٽي ڪارڪنن ۽ اڳواڻن جي تعريف ڪئي ۽ چيو ته نوازاينڊ ڪمپني ثابت ڪري ڇڏيو آهي ته آمرن جي ڪڇ پلجي وڏا ٿيندڙ قوم ۽ملڪ جي خدمت ڪرڻ بدران صرف پنهنجي ناپاڪ ارادن کي پورو ڪرڻ لاءَ سياست ۾ اچن ٿا. هن  چيو ته نوازشريف جي اڳيان صرف استعيفا ڏيڻ جو رستو آهي، ان نشآندهي ڪندي چيو ته ڇا اها حيران ڪندڙ ڳالهه نه آهي ته پاناما رپورٽ موجب وزيراعظم هائوس اچڻ کانپوءِ شريف فيملي هر فرد دوران 1991، 1992، 1993 هر سال پنهنجي اثاثن ۾ گڏيل طور تي 16.6 سيڪڙو واڌ ڪئي. بلاول ڀٽو چيو ته پاڻ نوازشريف واعدو ڪيو ته ڪو هڪ به ثبوت ان جي خلاف مليو ته هواستعيفا ڏيندو پر هاڻي ثبوتن سان ڀريل دٻو سڄي قوم جي اڳيان اهي پر هو پنهنجي واعدي کان ڦري ويو. هن چيوته  پ پ پ ورڪر سڄي ملڪ ۾ گو نوازگو جا نعرا لڳائڻ ۽ ريليون ڪڻ بند نه ڪندا جيستائين پاڪستان جو عوام نوازشريف کي استعيفا ڏيڻ تي مجبور نه ٿي ڪري. هن پنهنجي پارٽي ۽ عوام کي اپيل ڪئي ته سمورن ضلعي هيڊڪوارٽرن ۾ گو نوازگو ريلين جو انعقاد ڪن.

 

جي آءِ ٽي رپورٽ ۾ وزير اعظم جي گهرواري ۽ ٻي ڌيءَ بابت به انڪشاف

اسلام آباد(ويب ڊيسڪ) پاناما ليڪس جي وڌيڪ جاچ ڪندڙ جي آءِ ٽي پنهنجي رپورٽ ۾ وزير اعظم نواز شريف، مريم، حسين ۽ حسن نواز سان گڏوگڏ ڪلثوم نواز ۽ وزير اعظم جي ٻي ڌيءَ اسما نواز جي اثاثن بابت به حيران ڪندڙ انڪشاف ڪيا آهن. جي آءِ ٽي دستاويز ۾ ٻڌايو آهي ته وزير اعظم نواز شريف جي گهر واري ڪلثوم نواز فيملي واپار جو حصو آهي جنهن جا اثاثا رڳو هڪ سال دوران ئي ساڍا 17 سيڪڙو وڌيا. وزير اعظم جي ٻي ڌيءَ ۽ ناڻي وري وزير اسحاق ڊار جي ننهن اسما نواز جي اثاثن ۾ به 5-12 سيڪڙو واڌ ٿي جيڪي وڌي 3 ڪروڙ 15 تائين وڃي پهتي. سپريم ڪورٽ ۾ جمع ڪرايل جي آءِ ٽي رپورٽ ۾ وڌيڪ انڪشاف ڪيو ويو آهي ته 1991ع کان 1993ع دوران اسما نواز جا اثاثا ساڍا 21 سيڪڙو ڌي 3 ڪرڙو 15 لک رپيا ٿا ۽ اهي به بنا ڪيس ظاهري آمدن آهي. حيران ڪندڙ طور تي خساري ۾ هلندڙ چوڌري شگر مل به اسما نواز کي فائدو ڏيندي آهي. رپورٽ ۾ چيو ويو آهي ته چوڌري شگر مل اسما نواز کي 11 لک 28 هزار جو فائدو ڏنو جڏهن ته والد نواز شريف طرفان به ان کي 3 ڪروڙ 8 لک رپيا مليا پر ان جي نواز شريف کي خبر ناهي.

 

مولانا فضل الرحمان جي وزيراعظم سان ملاقات، پانامه ڪيس بابت ڳالهيون، حمايت جي خاطري

اسلام آباد( ويب ڊيسڪ ) وزيراعظم نواز شريف سان جي يو آءِ ف جي سربراهه ملاقات ڪئي آهي. وزيراعظم هائوس ۾ ملاقات دوران ملڪي سياسي صورتحال ۽ پاناما ليڪس ڪيس تي ڳالهيون ڪيون ويون. ذريعن موجب ملاقات دوران ڪي پي ۾ ترقياتي رٿائن تي به خيالن جي ڏي وٺ ڪئي وئي. ذريعن موجب ملاقات دوران مخالف ڌر جي کي منهن ڏيڻ جي حڪمت عملي تي به ڳالهيون ڪيون ويون. ملاقات دوران مولانا فضل الرحمان وزيراعظم  جي ڀرپور حمايت ڪرڻ جو عزم ورجايو. ٻنهي اتفاق ڪيو ته وزيراعظم مخالف ڌر جي ڪنهن به دٻاءَ ۾ نه ايندو.

 

نواز شريف ڪيس وڌيڪ نه وڌائي، پاناما ڪيس جيترو کلندو حڪومت ڦاسندي ويندي: خورشيد شاهه

اسلام آباد (اين اين آءِ) آپوزيشن ليڊر خورشيد شاهه چيو آهي ته نظام ضروري آهي پهريان جمهوريت ۽ پارليامينٽ کي به محفظ بڻايووڃي. پاناماڪيس جي ٻڌڻي کانپوءِ سپريم ڪورٽ کان ٻاهر ايندي ميڊيا سان ڳالهائيندي چيو ته اهڙين حالتن ۾ هڪ ئي رستو آهي ته وزيراعظم استعيفا ڏئي. آپوزيشن ليڊر چيو ته دنيا جي وڏين عدالتن مان انصاف جي اميد هوندي آهي. جڏهن ته سڀ کان وڏي عدالت الله جي آهي ۽ انسانن جي لاءَ وڏي عدالت سپريم ڪورٽ آهي. هن چيو ته آپوزيشن سپريمڪورٽ ۾ موجود آهي ان لاءِ آپوزيشن جي ٻڌي لاءِ آيو آهيان، هن چيو ته انشاءَ الله بهتر ٿيندو اسانکي ادارن تي يقين ڪرڻ گھرجي، سپريم ڪورٽ ۾ انصاف ٿيندو. ادارن تي شڪ نه ڪرڻ گھرجي، هن چيو ته عدالتن سان اسان جي شڪوه ضرور رهي آهي پر ماڻهون انهي عدالتن ۾ ايندا آهن ته جيئن انصاف ملي. ميڊيا سان ڳالهائن جي دوران هن چيوته 2014 ۾ جمهوريت کي خطرو هيو ته پارليامينٽ سان گڏ هياسين ۽ جيڪي ماڻهون سمجھن ٿا ته نوازشريف سان گڏ هياسين پر اسان جمهوريت کي بچايو ۽نوازشريف سان گڏ نه هياسين اڄ نوازشريف جمهوريت لاءَ خطرو بڻجي چڪو آهي. اسان جمهوريت جيل وياسين ڪوڙا کاڌاسين، ڦاهيون آيون، پ پ پ جمهوريت جي لاءِ قربانيون ڏنيون.

 

راحيل شريف ڪنهن عسڪري اتحاد جي قيادت نه پيو ڪري: سرتاج عزيز

اسلام آباد (ويب ڊيسڪ): پرڏيهي صلاحڪار سرتاج عزيز چيو آهي ته پاڪ فوج جو اڳوڻو سربراهه راحيل شريف ڪنهن عسڪري اتحاد جي قيادت نه پيو ڪري، سينيٽ چيئرمين رضا رباني جي صدارت هيٺ سينيٽ اجلاس دوران پرڏيهي صلاحڪار سرتاج عزيز سعودي اتحاد ۽ اڳوڻي آرمي چيف راحيل شريف جي مقرري بابت پاليسي بيان ڏيندي چيو ته پاڪ فوج جو اڳوڻو سربراهه اها ئي پاليسي اختيار ڪندو، جيڪا پاڪستان جي پارليامينٽ بڻائيندي، پرڏيهي صلاحڪار جو چوڻ هو ته اسان جي اطلاع مطابق اڃا تائين عسڪري اتحاد جي حوالي سان ڪا فوج ناهي جوڙي وئي، جڏهن ته اسلامي ملڪن جي فوجي اتحاد جي لاءِ ٽي او آرز تي مشاورت ڪندڙ دفاع وارن وزيرن جو اجلاس اڃا تائين ناهي ٿيو، ان موقعي تي سينيٽ چيئرمين چيو ته اڃا تائين سعودي اتحاد جا ٽي او آرز ناهن بڻيا ۽ اوهان اڳوڻي آرمي چيف کي اماڻي ڇڏيو ۽ اوهان ته انهن کي اتحاد جو سربراهه به مقرر ڪري ڇڏيو، سينيٽ چيئرمين سوال ڪيو ته جيڪڏهن ٽي او آرز پاڪستان جي مرضي جا نه بڻيا ته حڪومت ڇا ڪندي؟، جنهن تي سرتاج عزيز جو چوڻ هو ته اڳوڻو آرمي چيف اها ئي پاليسي اختيار ڪندو، جيڪا پاڪستان جي پارليامينٽ بڻائيندي، پرڏيهي صلاحڪار سرتاج عزيز آمريڪي سينيٽ جي وفد جي پاڪستان جي دوري بابت به سينيٽ کي ٻڌايو ته سينيٽر جان مڪين پاڪستان جي دوري ۾ وزيراعظم نواز شريف، آرمي چيف جنرل قمر جاويد باجوه ۽ مون سان ملاقات ڪئي، جڏهن ته آمريڪي وفد سان گڏ ٿيل ملاقاتون مثبت رهيون، پرڏيهي صلاحڪار موجب اسان آمريڪي وفد کي ٻڌايو تب بنا ڪنهن فرق جي آپريشن ڪري رهيا آهيون ۽ حقاني نيٽ ورڪ ۽ عسڪريت پسندن خلاف ڪارروائي تي اسان جي پاليسي واضح آهي، جڏهن ته اسان آمريڪي وفد کي افغانستان بابت پنهنجو نقطه نظر ڏنو ۽ ٻڌايو ته پاڪستان پرامن افغانستان چاهي ٿو.

 

ڀارت ڪشمير ۾ انسانيت کان ڪريل حرڪتون ڪري رهيو آهي: پاڪستان

اسلام آباد (ويب ڊيسڪ): پرڏيهي ترجمان نفيس ذڪريا چيو آهي ته ڪشمير پاڪستان جو حصو آهي، ڀارت ڪشمير ۾ انسانيت کان ڪريل حرڪتون ڪري رهيو آهي، هن چيو ته گڏيل قومن جي ٺهرائن موجب ڪشمير کي پنهنجو حق ملڻ گهرجي، پرڏيهي ترجمان نفيس ذڪريا چيو ته ڀارت ڪشمير ۾ انسانيت کان ڪريل حرڪتون ڪري رهيو آهي، ڪشمير پاڪستان جو حصو آهي ۽ اهو چوڻ درست ناهي ته پاڪستان جو آواز دنيا تائين نٿو پهچي.

 

شاهه محمود جهڙا ماڻهو درگاهن جو تيل چوري ڪري وڪرو ڪندا آهن: عابد شير علي

اسلام آباد (اين اين آءِ) پاڪستان مسلم ليگ نون جي اڳواڻ عابد شير علي چيو ته خان صاحب قوم، آئين ۽ جمهوريت جي فتح جو جشن ضرور ملهائيندي. شاهه محمود قريشي ٻڌائي ته ان کي ڪيترو نظرانو مليو ۽ ڪيتري ٽيڪس ادا ڪئي، جمهوريت تي حملو ڪندڙ ڪامياب نه ٿيندا اڱاري سپريم ڪورٽ جي ٻاهران ميڊيا سان ڳالهائيندي هن چيو ته شاهه محمود قريشي کان پڇيو ته ڪيترو نظرانو مليو۽ٽيڪس ڪيتروادا ڪيو ، شاهه محمود قريشي نظرانون کائيندو آهي ۽اهي ماڻهون درٻارين جو تيل چوري ڪري وڪرو ڪندا آهن، هن چيو ته شاهه محمود قريشي ڊبل شاهه نه آهي پر ٽرپل شاهه آهي ۽ جعلي پير  آهي جيڪوماڻهن جورت چوسي رهيو آهي. هن چيو ته شِيخ رشيد کي چيلينج ڪيان ٿو ته جيڪڏهن هو مزدور آهي ته منهنجي پراپرٽي پنهنجي نالي ڪرائي ۽ پنهنجي منهنجي نالي ڪرائي پاڻهي خبر پئجي ويندي ته هي ڪيترو مزدور آهي. جيڪڏهن هو منهنجي چيلينج قبول نه ٿو ڪري ته ان کي نالي ۾ ٻڏي ۾ مرڻ گھرجي، عابد شير علي عمران خان کي مخاطب ٿيندي چيوته عدالتون ڪنهن جي چوڻ تي فيصلو نه ڪنديون آهن اسانکي اميد آهي ته عدالتون اسان سان انصاف ڪنديون، ڇو ته عدالتن ۾ شاهديون ۽ قانون ڳالهائيندو آهي جڪو نوازشريف جي حق ۾ ڳالهايئندو، هن چيو ته شيخ رشيد ڪڏهن نوازشريف نه ٿو بڻجي سگھي. مملڪتي وزير چيوته گذريل ڏينهن سپريم ڪورٽ ۾ چوڌري شجاعت پرائي شادي ۾ ڪراڙو ديوانو بڻجي  پهتو.

 

ڪرپشن جو جنازو سپريم ڪورٽ مان ئي نڪرندو ۽ آخري فتح عوام جي ٿيندي: سراج الحق

اسلام آباد(ويب ڊيسڪ) جماعت اسلامي جي امير سراج الحق چيو آهي ته ڪرپشن جو جنازو سپريم ڪورٽ مان ئي نڪرندو ۽ آخري فتح عوام جي ٿيندي، جي آءِ ٽي مان پاناما ڪيس جي بينچ ۾ شامل ٻن ججن جي فيصلي کي تقويت ملي آهي، پاناما اسڪينڊل ۾ اشرافيا، ڪاروباري ماڻهن ۽ ججن سميت جن 600 ماڻهن جا نالا آهن انهن سڀني جو احتساب ٿيڻ گهرجي. اسلام آباد ۾ ميڊيا سان ڳالهائيندي سراج الحق چيو ته حڪومتي وڪيل قانوني دليل ڏيڻ جي بدران ڪيس کي سياسي ايشو بڻائڻ تي لڳل آهن جيئن پنهنجي موڪل کي سياسي شهيد جي طور تي پيش ڪن، حڪمران آئين کي ” ٽوٿ پڪ“ جيان استعمال ڪندا آهن اسان اها ئي اپيل هئي ته قلم 63،62 جي روشني ۾ وزير اعظم کي نااهل قرار ڏنو وڃي، وزير اعظم اسيمبلي فلور کي پنهنجي ذاتي ڪاروبار جي لاءِ استعمال ڪيو ۽ عدالت ۽ اسيمبلي ۾ ڪوڙ ڳالهايو. هن وڌيڪ چيو ته جي آءِ ٽي انڪشاف کان پوءِ سڄي قوم جو ڪنڌ شرم کان جهڪي ويو آهي.

 

ايڇ آءِ وي متاثرن ۾ ڪراچي پاڪستان جو ٻيو وڏو شهر قرار

ڪراچي (ويب ڊيسڪ): سروي دوران ملڪ جي جاچ ڪيل 23 شهرن مان 22 ۾ ايڇ آءِ وي وائرس مليو آهي، جنهن سلسلي ۾ قصور کانپوءِ ڪراچي پاڪستان جو ٻيو وڏو شهر سامهون آيو آهي، جتي ايڇ آءِ وي متاثرن جو وڏو انگ موجود آهي، ماهرن موجب هي وائرس انهن ماڻهن ۾ ڏٺو ويو آهي، جيڪي انجيڪشن ذريعي منشيات جو استعمال ڪندا، جنس تبديل ڪن ٿا، مرد ٻين مردن سان جنسي تعلق رکن ٿا ۽ عورت جسم فروشن ۾ پڻ اهو وائرس گهڻي قدر ڏٺو ويو آهي، گذريل ڀيري جنهن 2011 ۾ سروي ڪئي وئي هئي، ان وقت ايڇ آءِ وي محدود حد تائين موجود هئي، ان وقت رڳو ٻن گروپن تائين اهو محدود هيو، جڏهن ته هاڻي اهو سمورن چئن گروپن ۾ لڳ ڀڳ ٻن درجن شهرن تائين ڦهلجي ويو آهي، سروي ۾ ڪراچي، ڪوئيٽا، لاهور، پشاور، بهاولپور، تربت، بنون، ڊيرا غازي خان، فيصل آباد، گجرانوالا، گجرات، جهلم، قصور، ملتان، سرگوڌا، شيخوپوره، سيالڪوٽ، حيدرآباد، لاڙڪاڻو، ميرپور خاص، نوابشاهه ۽ سکر شهر شامل ڪيا ويا هئا، رپورٽ ظاهر ڪري ٿي ته نه رڳو ايڇ آءِ وي متاثرن جو انگ وڌيو آهي پر جڳهن جي ۾ پڻ اضافو ٿيو آهي.