تازيون خبرون

Daily Archives: July 14, 2017

ڇا وزيراعظم نواز شريف استعيفيٰ ڏيندو …….؟؟: حسن ناز سومرو

ڪيتري عرصي کان وزيراعظم ميان محمد نواز شريف جي خلاف پاناما ليڪس جي الزامن خلاف تحقيقات جاري هئي جنهن جي لاءِ هڪ ڪاميٽي جوڙي ويئي هئي جنهن کي جي آءِ ٽي (جوائنٽ انويسٽيگيشن ٽيم) جو نالو ڏنو ويو هو. جنهن ۾وزيراعظم نواز شريف جي خلاف گڏيل هڪ ٽيم جوڙي ويئي هئي جنهن تحقيقات ڪري پوري رپورٽ تيار ڪري ورتي آهي، هن رپورٽ ۾ ميان محمد نواز شريف، مريم نواز ۽ سندس پٽ حسن نواز کي ڏوهي قرار ڏنو ويو آهي

جي آءِ ٽي جي هن رپورٽ ۾ پڻ اهو ڄاڻايو ويو آهي 1970ع  ۾ ميان شريف جيڪو ميان محمد نواز شريف صاحب جو والد هو جنهن جا اثاثا تقريبن 10 لک روپيه هئا  ته 1980ع ۽ 1990ع ۾ ميان صاحب جي اثاثن ۾ اچانڪ اضافو ٿي ويو پر وري 1992 ۽ 1993ع ۾ هڪ  سال دوران ميان نواز شريف جا اثاثا اچانڪ وڌي 3 ڪروڙ 20 لک روپيه ٿي ويا ويا جن جو ڪوبه رڪارڊ موجود نه آهي، ان کان علاوه ڪيتري عرصي کان وزيراعظم پاران ٽيڪس به ادا نه ڪيو ويو آهي جڏهن ته دبئي ۽ لنڊن ۾ مريم نواز ۽ حسن نواز جون ڪيتريون ئي آف شور ڪمپنيون پڻ آهن جن جو ڪوبه رڪارڊ موجود نه آهي،

پر وزيراعظم ميان محمد نواز شريف هن رپورٽ کي تعصب تي ٻڌل رپورٽ قرار ڏيئي ڇڏيو آهي پر وري ٻئي طرف ٻڌڻ ۾ اچي رهيو آهي ته ميان محمد نوازشريف هر ڏکئي وقت ۾ سنڌ جي کڙپيل سياستدان جناب آصف علي زرداري کان مدد وٺندو آهي سو پهريان به جڏهن تحريڪ انصاف جي اڳواڻ عمران خان اسلام آباد ۾ ڊي چوڪ وٽ ڌرڻو لڳايو هو ته ان وقت حڪومت کي تمام وڏو خطرو لاحق ٿيو هو ته ان وقت ميان محمد نواز شريف سنڌ جي مشهور سياستدان آصف علي زرداري جون خدمتون حاصل ڪيون هيون جنهن جي نتيجي ۾ اها آيل آفت ٽري ويئي هئي پر هينئر جڏهن جي آءِ ٽي جي رپورٽ ۾ ميان محمد نواز شريف کي ڏوهي قرار ڏنو ويو آهي ته هڪ ڀيرو ٻيهر ميان محمد نواز شريف آصف علي زرداري سان رابطي ۾ اچي چڪو آهي جنهن جي تصديق شيرين رحمٰن پڻ  ڪري چڪي آهي.

هاڻي سوال هي پيدا ٿي رهيو آهي ته ڇا وزيراعظم ميان محمد نواز شريف تي جي آءِ ٽي جي رپورٽ  ۾لڳل الزامن تي کيس آصف علي زرداري بچائي سگھندو يا اردو جي هڪ شعر مطابق ته

هم تو صنم ڊوبي هين

پر تمهين بهي لي ڊوبين گي

سو هن وقت ميان محمد نواز شريف جنهن مصيبت ۾ ڦاٿل آهي سڀاڻي ان مصيبت ۾ آصف علي زرداري به ڦاسي سگھي ٿو، سو ان باري ۾ سوچڻ وقت کان اڳ واري ڳاله آهي پر هن وقت ميان محمد نوازشريف پاڻ کي مصيبت ۾ ڦاسندو ڏسي ڪيترن ئي اڳواڻن سان رابطا شروع ڪري ڏنا آهن جڏهن ته جي يو آءِ اڳواڻ مولانا فضل الرحمٰن صاحب به ميان محمد نواز شريف کي دلاسو ڏنو آهي ته هو سندس ضرور ساٿ ڏيندو.

پاناما ليڪس جي جي آءِ ٽي رپورٽ جي سلسلي ۾ هن سال جو ٽيون وفاقي ڪابينا جو اجلاس پڻ گھرايو ويو آهي، ان کان اڳ ۾ پهريون اجلاس 11 مئي تي گھرايو ويو هو جڏهن ته ٻيو اجلاس 26 مئي تي وفاقي بجيٽ دوران سڏايو ويو هو جڏهن ته اڄ ٽيون اجلاس پڻ ڪوٺايو ويو آهي، هن اجلاس ۾ پاناما جي  جي آءِ ٽي رپورٽ سان پيدا ٿيل بحران ۽ ملڪ لاءِ ونڌندڙ مسئلن کي منهن ڏيڻ لاءِ حڪمت عملي جوڙڻ ۽ جي آءِ ٽي جي هن رپورٽ کي ڪورٽ ۾ چيلينج ڪرڻ جهڙن فيصلن کان علاوه الزام ثابت ٿيڻ جي صورت ۾ وزيراعظم جي عهدي تان استعيفيٰ ڏيڻ جهڙن فيصلن تي غور ۽ ويچار ڪرڻ جهڙا فيصلا زير غور ايندا، سو هاڻي ڏسڻو اهو آهي ته پاناما ليڪس جي جي آءِ ٽي جي هن رپورٽ تي ڪهڙو ايڪشن ورتو وڃي ٿو، ڇا پاڪستان جو وزيراعظم ميان محمد نواز شريف جي آءِ ٽي جي آيل هن رپورٽ تي استعيفيٰ ڏئي ٿو يا ڪورٽ سڳوري ۾ وڃي پنهنجي بچاءِ لاءِ درخواست وجھي مدو پورو ڪري ويندو پر اڃان اهڙي پيشنگوئي ڪرڻ وقت کان اڳ واري ڳاله هوندي ته وزيراعظم پاناما جي جي آءِ ٽي رپورٽ تي استعيفيٰ ڏيندو.

m.hassannazsoomro@gmail.com

 

 

ڌيان طلب ايڇ آر سي پي جي رپورٽ…!

پاڪستان ۾ انساني حقن جي تنظيم ايڇ آر سي پي ملڪ ۾ انساني حقن جي صورتحال جي ٽه ماهي رپورٽ جاري ڪري ڇڏي آهي، جنهن ۾ چيو ويو آهي ته پهرين اپريل کان 31 جون تائين 77 ڏوهارين کي ڦاهي ڏني وئي ۽ 32 کي موت جي سزا ملي، حڪومتي ادارن وڌيڪ 144 کي کنڀي گم ڪرڻ جي تصديق ڪئي آهي. حڪومت جي جوڙيل گم ڪيل ماڻهن بابت جاچ ڪندڙ ڪميشن انگ اکر جاري ڪيا آهن ته ملڪ ۾ ماڻهن کي کنڀڻ جا وڌيڪ 144 ڪيس سامهون آيا آهن. رپورٽ ۾ ملڪ ۾ وڌندڙ انتهاپسندي ۽ عوام جي پاڻ منصف بڻجڻ واري رجحان جو به ذڪر ڪيو ويو آهي ۽ 13 اپريل 2017ع تي مردان جي ولي خان يونيورسٽي ۾ هجوم هٿان شهيد ڪيل شاگرد مشعال خان جو خاص طور ذڪر ڪيو ويو آهي. ايڇ آر سي پي جو چوڻ آهي ته مختلف سببن جي ڪري فردن کي هجوم پاران نشانو بڻائڻ وارو رجحان وڌي رهيو آهي.جي آءِ ٽي مشعال جي قتل کي منصوبابندي تحت قتل قرار ڏنو ۽ هڪ شاگرد اڳواڻ ۽ ملازم يونين اڳواڻ کي ملوث قرار ڏنو آهي. مشعال جو قتل ان ڳالهه جو ثبوت آهي ته ڪيئن مذهب ۽ توهين رسالت جي الزام کي ذاتي دشمني ڪڍڻ لاءِ استعمال ڪيو ويندو آهي. هن ڪيس جي جوابدارن کي سزا ڏئي ٻين ماڻهن لاءِ مثال بڻائي سگهجي ٿو. اهڙا ٻيا واقعا به پيش آيا. 21 اپريل تي چترال ضلعي ۾ به ماڻهن هڪ مستاني کي مارڻ جي ڪوشش ڪئي، جنهن کي مسجد جي پيش امام بچايو. مانسهره ۾ هڪ نينگر کي ڇوڪريءَ سان ناجائز لاڳاپن جو الزام هڻي تشدد ڪري ماريو ويو. اهي واقعا رياست جي عوام کي تحفظ ڏيڻ جي صلاحيت کي ڪمزور ڪرڻ کي ثابت ڪن ٿا ۽ اهو به ظاهر آهي ته اسان جو معاشرو ڪيترو رت پياڪ بڻجي چڪو آهي. ان کي روڪڻ لاءِ معاشري کي مستقل بنيادن تي ڪم ڪرڻو پوندو. مئي ۾ بدين ضلعي مان رضا جروار، علي احمد ٻگهئي، شادي خان سومري ۽ عبدالعزيز گرگيز کي کنڀيو ويو. اسلام آباد ويجهو 9 جون تي پسند جي شادي لاءِ نڪتل ڇوڪريءَ کي پڪڙي گولي هڻي زخمي ڪيو ويو. ساڳئي ڏينهن لاهور ۾ مذهبي معاملن جي رپورٽنگ ڪندڙ صحافي راڻا تنوير کي گوليون هڻي زخمي ڪيو ويو. 23 جون تي پارا چنار ۾ عيد کان اڳ ٻن خودڪش حملن ۾ 72 ڄڻا مارجي ويا، جنهن جي ذميواري لشڪر جهنگوي قبول ڪئي. ساڳئي ڏينهن ڪوئيٽا ۾ جماعت الاحرار جي حملي ۾ 14 ڄڻا مارجي ويا. 5 اپريل تي بنو ويجهو مڙس ڪارنهن شڪ ۾ زال ۽ ڀاءُ کي ماري ڇڏيو. 27 اپريل تي هنزه گلگت بلتستان ۾ سياسي ڪارڪن تي سندس ئي پارٽي جي اڳواڻ تشدد ڪيو. 13 مئي تي گوادر ۾10 پورهيت قتل ڪيا ويا. 18 مئي تي ايف آءِ اي هڪ صحافي کي سوشل ميڊيا سرگرمين تي گرفتار ڪيو. 19 مئي تي هشاب بلوچستان ۾ خيرپور سنڌ جا 3 پورهيت قتل ڪيا ويا. 12 مئي تي مستونگ ۾ جي يو آءِ (ف) جي اڳواڻ عبدالغفور حيدري تي خودڪش حملي ۾ 26 ڄڻا مارجي ويا ۽ 30 ڄڻا زخمي ٿي پيا. رپورٽ موجب ٽن مهينن ۾ موت جي سزا مليل 77 ڄڻن کي ڦاهي ڏني وئي، جڏهن ته عدالتن 32 ڄڻن کي موت جي سزا ٻڌائي، جڏهن ته ان کان اڳين ٽماهي جنوري کان مارچ 2017ع تائين اهو انگ 13 هو. هي رپورٽ رياست جون اکيون کولڻ لاءِ ڪافي آهي ته مذهب جي آڙ ۾ پنهنجا ذاتي مفاد حاصل ڪندڙ ڪئين انساني جانين سان کيڏي رهيا آهن، رياست کي عرض آهي ته مذهب جو غلط استعمال ڪندڙن خلاف مثال بڻجندڙ ڪارروائي ڪئي وڃي جئين اڳتي ڪو به مذهب کي پنهنجي ذاتي مفاد لاءِ استعمال نه ڪري سگهي.

 

ضمير تي ڪو به ٻوجھه ناھي، جمهوريت فروش سازشي ٽولي جي چوڻ تي استعيفيٰ نه ڏيندس: نواز شريف

اسلام آباد (اين اين آءِ) وزيراعظم نوازشريف چيو آهي ته الله تعاليٰ جي فضل ۽ ڪرم سان منهنجي ضمير تي ڪوبه ٻوجهه نه آهي ڇا جمهوريت فروش جي چوڻ تي استعفا ڏيان، اسانجي خاندان سياست ڪمايو ڪجھه به نه آهي پر وڃايو گھڻو آهي. ملڪ ۾ اربين روپين جا  پروجيڪٽ لڳي رهيا آهن، اسان تعمير ۽ ترقي جو ايترو ڪم ڪيو جيترو ٻن ڏهاڪن ۾ نه ٿيو، ٻيهر اونداهين کي پنهنجي بستين، ڪارخانن جو رخ نه ڪرڻ ڏينداسين. خميس تي وفاقي ڪابينا جي اجلاس جو خطاب ٿيندو، وزيراعظم نوازشريف چيو آهي ته جي آئي ٽي جي رپورٽ اسانجي ذاتي ڪاروبار جي باري ۾ الزامن جو مجموعو آهي، هن چيو ته مان استعيفا جو مطالبو ڪرڻ وارن جي گڏيل ووٽن کان وڌيڪ ووٽ ورتا آهن، هن چيو ته منهنجي ضمير تي ڪو به ٻوجهه نه آهي، هن چيو ته وقت اچڻ تي سڀ راض کلي ويندا. هن چيو ته تعمير ۽ ترقي جي سفر کي ڊي ريل نه ٿيڻ ڏينداسين. پاڪستان ماضيءَ ۾ انهن تماشائن جي وڏي قيمت ادا ڪري چڪو آهي. هاڻي اهو سلسلو بند نه ٿيڻ گھرجي، ڪابينا جي ميمبرن وزيراعظم جي استعيفا نه ڏيڻ جي اعلان جي زبردست ڀليڪار ڪندي ڊيسڪ وڄائي فيصلي جي تعريف ڪئي

 

پيپلز پارٽي خلاف ڪات ڪهاڙا استعمال ڪرڻ ڪا نئين ڳالھ ناهي: مراد علي شاھ

سڪرنڊ(ويب ڊيسڪ) سنڌ جي وڏير وزير سيد مراد علي شاھ چيو آهي ته جي آئي ٽي جي رپورٽ کانپوءِ نواز شريف جو بطور وزير اعظم رهڻ جو ڪو به اخلاقي جواز ناهي کيس ٻه جج اڳيئي نااهل قرار ڏئي چڪا آهن، هو سڪرنڊ ويجهو ڳوٺ محرابپور ۾ ايم اين اي سيد غلام مصطفيٰ شاھ جي امڙ جي لاڏاڻي تي عذرخواهي وقت سڪرنڊ پريس ڪلب جي وفد سان ڳالهائي رهيو هو، هن چيو ته پيپلز پارٽي خلاف ڪات ڪهاڙا استعمال ڪرڻ ڪا نئين ڳالھ ناهي ماضيءَ جي تاريخ رهي آهي ته جنرل ضياء، نوازشريف ۽ جنرل مشرف جا دور سدائين پيپلز پارٽي خلاف رهيا آهن پر پيپلز پارٽي اڄ به پنهنجي عروج تي قائم آهي، ڇاڪاڻ جو عوام جي کيس سگھ حاصل آهي، ان ڪري ئي ڪنهن جابر ۽ آمر آڏو جهڪي ناهي، جڏھن ته نوازشريف معافي نامو لکي ملڪ بدر رهيو آهي، هن اهو پڻ چيو ته پي ٽي آئي پاڻ کي صاف سٿرو ظاهر ڪرڻ جي ڪوشش ڪري رهي آهي، جيڪڏھن ايئن آهي ته پوءِ ملڪي ۽ غير ملڪي کربن جا اثاثا عدالتن جي پڇاڻي باوجود عدالتن ۾ ثابت ڇو نٿا ڪن، ان موقعي تي ساڻس گڏ صوبائي وزير ضياء الحسن لنجار، ڄام مدد علي، شرجيل انعام ميمڻ، ڄام خان شورو، غلام قادر چانڊيو، خان محمد ڏاهري ۽ ٻيا ڪيترائي سياسي اڳواڻ موجود هئا

 

ڪشمير مسئلي جي حل کانسواءِ خطي ۾ امن هڪ خواب ئي رهندو:  پاڪستان

اسلام آباد (اين اين آءِ) پرڏيهي آفيس جي ترجمان نفيس ذڪريا چيو آهي ته پاڪستان ۾ دهشتگردي جي واقعن ۾ ملوث موت جي سزا حاصل ڪيل ڀارتي ڳجهي ايجنسي را جي ايجنٽ ڪل ڀوشن جي والده پٽ سان ملاقات جي درخواست ڪئي آهي جنهن جو جائزو ورتو پيو وڃي، لائين آف ڪنٽرول تي ڀارت جي اڳرائي ۽ فائرنگ سان 18 شهري شهيد ٿيا، دهشتگردي ڪرائي پاڪستان تي الزام مڙهڻ ڀارت جي عادت رهي آهي، پاڪستان ڀارت سان سمورا مسئلا ڳالهين ذريعي حل ڪرڻ چاهي ٿو، افغانستان ۾ 2 گم ٿيل سفارتي اهلڪار جلال آباد مان پشاور ويندي اغوا ٿيا، ٻن وڌيڪ پاڪستاني جي شهرين جي اغوان جون رپورٽون ڏٺيون آهن، معاملا افغان انتظاميا سان اٿاريا آهن، ڪرنل حبيب جي معاملي تي نيپالي انتظاميا سان رابطي ۾ آهيون، خميس تي پرڏيهي آفيس ۾ هفتيوار بريفنگ ۾ هن چيو ته ڪل ڀوشن ياديو جي ماءُ پاران ملاقات جي درخواست ڪئي آهي ۽ پاڪستان ان جو جائزو وٺي رهيو آهي، هن ميڊيڪل ويزا حاصل ڪرڻ لاءِ ڀارتي شرط رد ڪندي چيو ته ڀارتي ويزا لاءِ پرڏيهي صلاحڪار جو خط سفارتي ادب جي خلاف آهي، ڀارت پاران علاج ڪرائيندڙ مريضن کي ويزا جاري ڪرڻ ۾ شرط رکڻ افسوس جي ڳالهه آهي، هلندڙ هفتي ڪشمير ۾ 6 ڪشميرين کي شهيد ڪيو ويو، احتجاج ڪندڙن تي به تشدد ڪيو ويو، اڄ سڄي دنيا ۾ ڪشميري 1931 ۾ شهيد ٿيلن جي ياد ۾ شهادت جو ڏهاڙو ملهائي رهيا آهن.

 

خيبرپختونخوا ۾ برسات جون تباهيون، ۵ ڄڻا فوت، دريائن ۾ ٻوڏ

پشاور(ويب ڊيسڪ) خيبرپختونخوا ۾ هاڻوڪي برساتن سبب گهر ڪرڻ سبب ۵ ڄڻا فوت ٿي ويا آهن جڏهن ته صوبي جي مختلف دريائن ۾ هيٺين سطح جي ٻوڏ رڪارڊ ڪئي وئي آهي. رپورٽ مطابق صوبي ۾ شديد برساتن سبب گهر ۽ ديوارون ڪرڻ سبب ۵ ڄڻا فوت ٿي ويا آهن جڏهن ته ٦ ماڻهو زخمي پڻ ٿيا آهن. ٻئي طرف فلڊ سيل خيبرپختونخوا مطابق ڪابل ندي ۾ ورسڪ جي هنڌ وٽ هيٺين سطح جي ٻوڏ رڪارڊ ڪئي وئي. سنڌو درياءَ ۾ تربيلا وٽ هيٺين سطح جي ٻوڏ آهي جڏهن ته سوات ندي ۾ به چارسده روڊ وٽ هيٺين سطح جي ٻوڏ آهي. فلڊ سيل مطابق باقي دريائن ۾ پاڻي جو وهڪرو معمول مطابق آهي.

 

نااهلي ڪيس، عمران خان ٻڌائي ته لنڊن فليٽس جون ادائيگيون ڪيئن ٿيون: سپريم ڪورٽ

اسلام آباد( ويب ڊيسڪ ) چيف جسٽس ميان ثاقب نثار نااهلي ڪيس جي ٻڌڻي دوران رمارڪس ڏيندي چيو ته عمران خان لنڊن فليٽس جي ملڪيت تسليم ڪري ٿو ته ٻڌائي ادائيگيون ڪيئن ڪيون ويون؟ چيف جسٽس ميان ثاقب نثار جي سربراهيءَ ۾ سپريم ڪورٽ جي 3 رڪني بئنچ عمران خان جي نااهلي ڪيس جي ٻڌڻي ڪئي. عدالتي پڇاڻي تي پي ٽي آءِ جي وڪيل فيصل چوڌري چيو ته  اليڪشن ڪميشن جي جواب تي جواب الجواب جمع ڪرايو ويو آهي، پرڏيهي فنڊنگ بابت اڌ رڪارڊ ملي ويو آهي، رڪارڊ ملندي ئي هڪ هفتي۾ جمع ڪرايو ويندو جنهن تي چيف جسٽس پڇاڻو ڪيو ته انور منصور کي جواب جمع ڪرائڻو هو، کين عدالتي حڪم تي عملدرآمد سان ڪم آهي، آگسٽ ۾ ڪجهه ججن کي پرڏيهه وڃڻو آهي، جج پنهنجي 10 هفتن جي موڪلين کي گهٽ ڪري 2، 2، هفتن ۾ موڪلون ڪري رهيا آهن، چاهين ٿا ته هي ڪيس جلد ختم ٿي وڃي ته جيئن ڪيس به ٻڌي سگهن. ٻڌڻي دوران عمران خان جي وڪيل نعيم بخاري دليل چيو ته سندس عمران خان ۽ انور منصور سان ڳالهيون ٿيون آهن، انور منصور هارٽ سرجري لاءِ اسپتال ۾ آهي، هو علاج کانپوءِ 27 جولاءِ تي واپس اچي سگهي ٿو. هن چيو ته عدالت ڪرڪيٽ جي آمدني بابت آبزرويشن ڏني لنڊن فليٽس جي ڪرڪيٽ جي آمدني مان خريداري تي ڪنهن اعتراض نه ڪيو آهي. عمران خان جي وڪيل جي درخواست تي ڪيس جي ٻڌڻي 25 جولاءِ تائين ملتوي ڪري ڇڏي.

 

آرمي چيف سان ڪينيڊين هاءِ ڪمشنر جي ملاقات

راولپنڊي (ويب ڊيسڪ): آرمي چيف جنرل قمر جاويد باجوه سان ڪينيڊين هاءِ ڪمشنر ملاقات ڪئي، آءِ ايس پي آر موجب آرمي چيف جنرل قمر جاويد باجوه سان ڪينيڊا جي هاءِ ڪمشنر ملاقات ڪئي، جنهن ۾ خطي جي سڪيورٽي صورتحال ۽ گڏيل دلچسپي جي معاملن تي خيالن جي ڏي وٺ ڪئي وئي، ملاقات دوران ڪينيڊا جي هاءِ ڪمشنر امن ۽ استحڪام لاءِ پاڪستان جي ڪاوشن جو اعتراڦ ڪيو، آءِ ايس پي آر موجب ڪينيڊين هاءِ ڪمشنر خطي ۾ امن جي قيام لاءِ پاڪ فوج ۽ پاڪستاني قوم جي قربانين جو به اعتراف ڪيو.

 

وزيراعظم وٽ هڪ منٽ به جواز ناهي ته اهو پنهنجي ڪرسي تي ويهي: خورشيد شاهه

اسلام آباد (ويب ڊيسڪ): قومي اسيمبلي ۾ مخالف ڌر اڳواڻ سيد خورشيد شاهه چيو آهي ته حڪمرانن ماضي ۾ سپريم ڪورٽ تي حملو ڪيو، حڪمرانن ادارن کي ناقابل تلافي نقصان پهچايو، پريس ڪانفرنس ڪندي خورشيد شاهه چيو ته عدالت تي حملو ڪرڻ تي نواز شريف خلاف ڪا ڪارروائي نه ٿي، نواز شريف خلاف ڪارروائي نه ٿيڻ بدقسمتي جي ڳالهه هئي، هن چيو ته وزيراعظم ۾ جرئت ناهي جو سياسي جماعتن سان محاذ آرائي ڪري سگهي، پيپلز پارٽي پنهنجي ادارن جي پٺيان بيٺل آهي، 2014 ۾ به اسان تي فرينڊلي اپوزيشن جو الزام لڳو، هن چيو ته ن ليگ ماضي ۾ سمورن ادارن سان ٽڪراءَ واري پاليسي اختيار ڪئي، هي 90 جو ڏهاڪو ناهي، وقت بدلجي چڪو آهي، هر حڪومت جو هڪ ترجمان هوندو آهي پر هن وقت جا ست اٺ ترجمان آهن، خورشيد شاهه چيو ته حڪمرانن 4 سالن ۾ ڪو قابل ذڪر ڪم ناهي ڪيو، حڪمرانن هارين کي تباهه ڪري ڇڏيو، هن چيو ته اڳ ۾ 6 ڪلاڪ لوڊشيڊنگ ٿيندي هئي، هاڻي 9 ڪلاڪ لوڊشيڊنگ پئي ٿئي، مخالف ڌر اڳواڻ چيو ته جنهن ڪابينا ۾ وزيراعظم جي استعيفيٰ جو ذڪر اچي وڃي، ان جو وزيراعظم رهڻ شرم جوڳي ڳالهه آهي، وزيراعظم وٽ هڪ منٽ به جواز ناهي ته اهو پنهنجي ڪرسي تي ويهي، وزيراعظم کي پهريون ئي اخلاقي طور استعيفيٰ ڏئي ڇڏڻ گهرجي ها.

 

گلگت کان ڪراچي تائين پاڪستان پيپلز پارٽي هڪ طاقت جو نالو آهي: بلاول ڀٽو زرداري

اسلام آباد (ويب ڊيسڪ): پيپلز پارٽي چيئرمين بلاول ڀٽو زرداري چيو آهي ته ايندڙ چونڊن ۾ ڌانڌلي ٿيڻ نه ڏني ويندي، بلاول ڀٽو زرداري چيو ته پارا چنار دهشتگردي سان وڌيڪ متاثر ٿيو، دهشتگردن پارا چنار کي رتورت ڪري ڇڏيو، هن چيو ته شدت پسندي کي هٿي ڏيڻ واري سوچ ختم ڪنداسين، پيپلز پارٽي چيئرمين بلاول ڀٽو زرداري چيو ته ايندڙ چونڊن ۾ ڌانڌلي ٿيڻ نه ڏني ويندي، پيلز پارٽي ڪارڪن عوام جي قوت سان چونڊون کٽڻ جون تياريون ڪن، پيپلز پارٽي جو منشور ئي عوام جي بنيادي مسئلن جو حل آهي، بلاول ڀٽو چيو ته گلگت کان ڪراچي تائين پاڪستان پيپلز پارٽي هڪ طاقت جو نالو آهي.