تازيون خبرون

Monthly Archives: April 2017

اخلاق جي تقاضا آهي ته نواز شريف ڪرسي ڇڏي جيئن آزاداڻي جاچ ٿئي: سراج الحق

اسلام آباد(ويب ڊيسڪ) جماعت اسلامي جي امير سراج الحق چيو آهي ته اخلاق جي تقاضا آهي ته نواز شريف ڪرسي ڇڏي، آزاداڻي تحقيق جي لاءِ ضروري آهي ته وزير اعظم استعيفيٰ ڏئي. سراج الحق ميڊيا سان ڳالهائيندي چيو ته جي آءِ ٽي بڻائڻ وڏي ڳالهه آهي، ڪالهه عدالت وزير اعظم کي ڪليئر ناهي ڪيو، پاناما اسڪينڊل جو فيصلو انصاف سان گڏ ٿيڻ گهرجي، رائٽ ۽ ليفٽ بدران رائٽ ۽ رانگ جي سياست ڪرڻ گهرجي. هن چيو ته ڪالهوڪو ڏينهن تاريخي ڏينهن ه، سپريم ڪورٽ حڪومت خلاف فيصلو ڏنو ته ان خلاف ثبوت يقين جوڳا ناهن، اهو فيصو ڪاميابي ڏانهن پيش قدمي آهي. هن وڌيڪ چيو ته ملڪ جي ترقي جي لاءِ ڪرپشن خلاف جدوجهد جاري رکڻ گهرجي.

 

هاڻ سڀ نواز شريف کي ڪوڙو چئي رهيا آهن، عمران خان جو ايندڙ جمعي تي اسلام آباد ۾احتجاج جو اعلان

اسلام آباد (اين اين آءِ) تحريڪ انصاف جي چيئرمين عمران خان ايندڙ جمعي تي اسلام آباد ۾ جلسي ڪرڻ جو اعلان ڪندي چيو آهي ته اپوزيشن کي گڏ ڪرڻ جي دعوت ڏني آهي نيب جي ڪارڪردگي سڀني جي اڳيان آهي هي ادارو نواز شريف جي وزيراعظم هوندي ڪيئن جاچ ڪندو جي آءِ ٽي جي معاملي تي هاڻي اسان مشورو ڪنداسين، جج نواز شريف کي ڪوڙو قرار ڏنو آهي ليگي ڪارڪن مٺايون ڪهڙي ڳالهه تي ورهائي رهيا آهن پارليامينٽ هائوس ٻاهران ميڊيا سان ڳالهائيندي عمران خان چيو ته سپريم ڪورٽ وزيراعظم تي تاريخي ريمارڪس ڏنا جنهن ۾ ڪنهن به ملڪ ۾ اهڙو فيصلو اچي ها ته حڪمران پارٽي پاڻ وزيراعظم کان استعيفيٰ وٺي ها. ن ليگ ڪهڙي منهن سان عوام جي اڳيان ايندي هن چيو ته سپريم ڪورٽ جي ٻن سينئر ججن وزيراعظم کي نااهل قرار ڏيڻ جو چيو آهي ٻن ججن چيو ته وزيراعظم سچو ناهي عمران خان موجب سپريم ڪورٽ چيو آهي ته الزامن جي جاچ لاءِ جي آءِ ٽي جوڙي وڃي پر نواز شريف جو عهدي تي هوندي ادارا ڪهڙي طرح جاچ ڪندا جيڪڏهن ادارن کي جاچ ڪرڻي هجي ها ته هن وقت تائين ٿي چڪي هجي ها. هن چيو ته وزيراعظم اخلاقي طاقت سان حڪومت ڪري ٿو ڊيوڊ ڪيمرون بنيادي طور تي عهدي تان استعيفيٰ ڏني اسان سمورن اپوزيشن کي گڏجي هلڻ جي دعوت ڏني آهي.

 

جيڪولين فرنينڊس فلم جڙوان جي شوٽنگ لاءِ لنڊن پهچي وئي

نئين دهلي (شوبز نيوز) بالي ووڊ اداڪاره جيڪولين فرنينڊس فلم جڙوان جي شوٽنگ لا3 لنڊن پهچي وئي، ڀارتي ميڊيا مطابق اداڪاره جيڪو لين فرنينڊس ممبئي ۾ سوشانت سنگه راجپوت سان فلم ڊرائيو جنهن جي ڊائريڪشن ڪرن جوهر ڏني آهي، جي شوٽنگ مڪمل ٿيڻ کان پوءِ فلم جڙوان  لاءِ لنڊن پهچي وئي، فلم 29 سيپٽمبر تي رليز ڪئي ويندي.

 

اداڪاره اينڊي ميڪڊوول 59 سالن جي ٿي وئي

لاس اينجلس (شوبز نيوز) نالي واري اداڪاره ۽هدايتڪاره اينڊي ميڪڊوول 59 سالن جي ٿي وئي، اينڊي سائوٿ ڪيرولينا ۾ 21 اپريل 1959ع ۾ موسيقار پاولا جانسٽن جي گهر پيدا ٿي، هن پنهنجي فني ڪيريئر جي شروعات 1977ع ۾ ماڊل طور ڪئي، سندس هالي ووڊ ۾ پهرين فلم ”لاڊ آف دي ايپس“ هئي، جيڪا 1954ع ۾ رليز ٿي، هن ڪيترن ئي مشهور فلمن ۾ ڪم ڪيو، هن کي آسڪر ايوارڊ ۽ ايمي ايوارڊ سميت ڪيترائي ايوارڊ ڏنا ويا. ا

 

آسٽريليا انڊر 19 چوٿين ون ڊي ۾ سريلنڪا انڊر 19 کي 4 وڪيٽن تان هارائي سيريز کٽي ورتي

هوبارٽ (اسپورٽس نيوز) آسٽريليا انڊر 19 چوٿين ون ڊي ميچ ۾ سريلنڪا انڊر 19 کي 4 وڪيٽن تان شڪست ڏئي پنجن ميچن جي سيريز ۾ 1-3 تان سرسي حاصل ڪري ورتي آهي، هوبارٽ ۾ کيڏيل سيريز جي چوٿين ون ڊي ميچ ۾ سريلنڪا انڊر 19 اڳ ۾ بيٽنگ ڪندي مقرر 50 اوورن ۾ 8 وڪيٽن جي نقصان تي 163 رنسون ٺاهيون، زاڪ ايونز کي مين آف دي ميچ قرار ڏنو ويو،

 

ملڪي ڪرڪيٽ ٽيم لاءِ سچائي، ديانت ۽ بي لوث راند تي يونس خان کي يونيڪ خان جو نالو ڏيڻ گهرجي: شعيب اختر

اسلام آباد (اسپورٽس نيوز) قومي ٽيم جي اڳوڻي فاسٽ بالر ۽راولپنڊي ايڪسپريس شعيب اختر چيو آهي ته ملڪي ڪرڪيٽ ٽيم لاءِ سچائي، ديانت ۽ بي لوث راند تي منهنجي ويجهو يونس خان يک يونيڪ خان جو نالو ڏيڻ گهرجي، پنهنجي  هڪ بيان ۾ فاسٽ بالر چيو ته يونس خان جون ملڪي ڪرڪيٽ لاءِ خدمتن کي ڪڏهن به وساري نه ٿو سگهجي، يونس خان هميشه شاندار راند پيش ڪري انٽرنيشنل سطح تي ملڪ ۽ قوم جو نالو روشن ڪيو ۽ اسان سڀني کي سندس ڪارنامن تي فخر آهي، هن يونس خان جي عظمت کي سلام پيش ڪيو ۽ چيو ته عظيم بيٽسمين کي هڪ بي لوث شخصيت ۽ سٺي اخلاق تي هميشه ياد رکيو ويندو.

 

تلور کان پاناما تائين!: وسعت الله خان

1960ع جي ڏهاڪي تائين هڪ عام پاڪستاني جي ويجهو سعودي عرب جو تعارف مقدس جڳهه جي نگهبان ملڪ وارو هو. عام ماڻهو رياض کان واقف نه هو، بس مڪي ۽ مديني کي سڃاڻندا هئا. متحده عرب امارات، قطر، ڪويت ۽ بحرين جهڙن نالن کان اُن زماني جو ڪو پڙهيل لکيل پاڪستاني واقف هوندو هو ته جيتوڻيڪ ايران ۽ ترڪي سان گڏ ثقافتي ۽ تاريخي رشتن جو خوب سرڪاري ۽ غير سرڪاري چرچو هلندو هو. جڏهن 1970ع ڏهائي ۾ نار جي ملڪن ۾ نئين سر تعمير جو عمل شروع ٿيو ۽ پاڪستان کان افرادي قوت انهن ملڪن ۾ روزگار حاصل ڪرڻ لڳو ۽ نار جي ملڪن جي فوج جي تربيتي سهولتن ۾ پاڪستان اهم ڪردار ادا ڪرڻ شروع ڪيو ته روايتي علائقائي رشتن جو مدار به آهستي آهستي بدلجڻ لڳو.

آڪٽوبر 1973ع جي عرب اسرائيل جنگ کانپوءِ شاهه فيصل ۽ وري شاهه خالد کان ڀٽو صاحب جو ذاتي قرب ۽ احترام جي رشتي قائم ٿيڻ سان اوڀر پاڪستان جي عليحدگي سان متاثر ٿيندڙ اولهه جي پاڪستاني معيشت کي هڪ زبردست نفسياتي ۽ مالي سهارو مليو ۽ ائين بجيٽ خسارو گهٽ کان گهٽ رکڻ ممڪن ٿي سگهيو.

پاڪستاني سياست ۾ پهريون ڀيرو سعودي عرب سان خصوصي تعلق جي اهميت ان وقت سامهون آئي، جڏهن مارچ 1977ع جي عام چونڊن ۾ ڌانڌلي جي الزامن سبب مخالف ڌر جي نو پارٽين قومي اتحاد جي پليٽ فارم تان ڀٽو مخالف تحريڪ شروع ڪئي.

ڌرين جي وچ ۾ ڇڪتاڻ ايتري قدر وڌي وئي جو هڪ ٻئي جي شڪل ڏسڻ جهڙا به نه رهيا ته اسلام آباد ۾ مقرر سعوي سفير رياض الخطيب جي شٽل ڊپلوميسي ڪم ڏيکاريو ۽ پي اين اي، ڀٽو صاحب سان ڳالهين لاءِ راضي ٿيو پر هُن جو ميوو ضياءَ الحق کڻي ويو. ضياءَ الحق اسلامائيزيشن جو منصوبو شروع ڪيو ته سعودين پاران هن جي لاءِ پسنديدگي شروع ٿي. ديواني ۽ فوجداري قانون کي اسلامي دل ۾ وجهڻ جي ڪم ۾ سعودي حڪومت ۽ علماءَ پاران ضياءَ الحق جي ڀرپور مدد ڪئي. اُهي ئي حدون ۽ قانون جيڪي سعودي عرب ۾ لاڳو هئا، پاڪستان ۾ به لاڳو ٿي ويا. سعودي عرب ڀٽو کي ڦاسي ڏيڻ جو مخالف هو پر ڦاسي وري به ٿي پر ضياءَ الحق سان ڇڪتاڻ ان لاءِ اختيار نه ڪئي وئي، ڇو ته سعودي عرب پاڪستان جي جوهري پروگرام ۾ دلچسپي رکندو هو ۽ وري ڀٽو جي ڦاسي جي اَٺن مهينن کانپوءِ افغانستان ۾ سوويت فوجين جي اچڻ سان سمورو نقشو ئي بدلائي ڇڏيو.

افغان مجاهدين جي تربيت ۽ تياري جي لاءِ هڪ آمريڪي ڊالر جي بدلي سعودي عرب به هڪ ڊالر ڏن ڏنو. ان سان گڏوگڏ سوويت ڪفر سان مهاڏو اٽڪائڻ جي لاءِ نظرياتي افرادي قوت کي مسلسل پهچائڻ جي لاءِ سعودي ۽ خليجي نجي ۽ سرڪاري تعاون سان مسجدن ۽ مدرسن جو ڄار وڇايو ۽ هم خيال مجاهدين ۽ مذهبي ۽ سياسي گروهن جي لاءِ مالي امداد ڪو به مسئلو نه رهيو. ان دوران ايران ۾ شيعا انقلاب اچي چڪو هو. تنهن ڪري پاڪستاني اسٽيبلشمينٽ ان جغرافيائي ثقافتي ۽ تاريخي پنجوڙ مان به آزاد ٿي ويو، جيڪو هينئر تائين ايران سان ويجهڙائپ جو جواز فراهم ڪري رهيو هو. پنڊوليم پوري طرح سان خليج ڏانهن جهڪندو ويو ۽ پاڪستان جي سبز نظرياتي نقشي ۾ سعودي سبز به شامل ٿيندو ويو. دفاعي، نظرياتي ۽ سياسي لحاظ کان ٻئي ملڪ هڪ جان ۽ ٻه دليون نظر اچڻ لڳا.

جيتوڻيڪ ڀٽو صاحب سان سعودي شاهي خاندان جا خاص لاڳاپا هئا پر بينظير ڀٽو جو وزيراعظم ٿيڻ اهڙي گرمجوشي پيدا نه ڪري سگهيو. جيتوڻيڪ هن جو متبادل متحده عرب امارات جي شڪل ۾ موجود هو. متحده عرب امارات جي ڪمپنين پاران بينظير ڀٽو جي دور ۾ صنعت جي شعبن ۾ سرمائيڪاري شروع ڪئي ۽ اڄ اماراتي ڪمپنيون ٽيلي مواصلات، بينڪاري جي شعبن ۾ اهم حيثيت رکي ٿي.

دبئي ۾ اقتدار کان معزول بينظير ڀٽو جو گهر ٺهيو ۽ اڄ به عملي طور لڳندو آهي ته ڪراچي سان گڏوگڏ دبئي سنڌ جو ٻيو گادي وارو هنڌ آهي. ان پوري عرصي ۾ پاڪستان کان ٻاهر جيڪڏهن پاڪستانين سڀ کان وڌيڪ ملڪيت ڪنهن ملڪ ۾ خريد ڪئي ته اهو ملڪ امارات آهي. سعودي عرب کانپوءِ متحده عرب امارات ٻيو نار وارو ملڪ آهي، جتي سڀ کان وڌيڪ پاڪستاني ڪارڪن موجود آهن ۽ پاڪستان کي هر سال اُتي رهندڙ پرڏيهي ناڻو اماڻين ٿا، ان جو اڌ انهن ٻن رياستن کان ايندو آهي.

جيتوڻيڪ پاڪستان جي اندروني سياست ۾ اماراتي ڪردار به وڌندو هو. جنرل پرويز مشرف ۽ بينظير ڀٽو وچ ۾ اين آر او جي بنياد تي سمجهوتو به امارات ۾ طئي ٿيو. جنرل مشرف کي صدارت کان هٽائڻ کانپوءِ بنا ڪيس پاڪستان کان خيريت سان 18 آگسٽ 2008ع تي ٻاهر وڃڻ جي ضمانت ڏيڻ وارن ملڪن ۾ آمريڪا ۽ برطانيا سان گڏوگڏ اماراتي اسٽبلشمينٽ به ٻڌائي پئي وڃي.

پرويز مشرف جو هڪ گهر جيڪڏهن لنڊن ۾ آهي ته ٻيو دبئي ۾ ۽ پاڪستان ته خير هن جو آهي ئي آهي. ڪجهه مهينا پهرين مشرف صاحب هڪ پاڪستاني ٽيليويزن چينل کي انٽرويو ڏيندي اهو اعتراف به ڪري چڪو آهي ته هن لنڊن ۽ دبئي ۾ جلاوطني کانپوءِ جيڪي گهر خريد ڪيا، ان جي رقم هن جي ويجهي دوست مرحوم شاهه عبدالله پاران فراهم ڪئي وئي. بقول جنرل صاحب ايتري ته ويجهڙائپ هئي جو جيڪڏهن شاهه عبدالله ڪڏهن سگريٽ نوشي جو شوق ڪندو هو ته صرف مون سان گڏ.

انهيءَ شاهه عبدالله جو احسانمند نواز شريف به آهي، جنهن کي عبدالله پاران پنهنجي دوست مشرف جي چنبي مان 10 ڊسمبر 2000ع جي رات شاهي طياري ۾ ويهاري رفيق الحريري ۽ سعودي انٽيليجنس چيف شهزاده مقرن بن عبدالعزيز جي ذريعي معاهدو ڪرائي ننڍي ۽ وڏي ميان صاحب کي جده جي سرور پيلس ۾ ورهين تائين رکيو. (هونئن هي فيصلو نواز شريف جي جده روانگي کان ٽي مهينا پهرين قطر جي گادي واري هنڌ دوها ۾ اسلامي سربراهه ڪانفرنس جي موقعي تي شاهه عبدالله ۽ پرويز مشرف جي وچ ۾ مبينه طور تي زباني طئي ٿيو هو.) ۽ هن کان گهڻو اڳ جڏهن پاڪستان پاران مئي 1998ع ۾ ايٽمي ڌماڪو ڪيو ته سعودي عرب بين الاقوامي اقتصادي ٻوجهه ورهائڻ ۾ پنهنجي دوست نواز شريف جي چڱي خاصي مدد ڪئي.

هن کان اڳئين سال جنرل مشرف پاران ڪارگل جو ايڊونچر ڪيو ته ان ڪمبل مان جان ڇڏائڻ ۾ به سعودي عرب ڀرپور مدد ڪئي ۽ جڏهن وزيراعظم نواز شريف صدر ڪلنٽن سان ملڻ لاءِ چار جولاءِ 1999ع تي واشنگٽن پهتو ته سعودي سفير شهزاده بندر بن سلطان پاران هن کي بليئر هائوس تائين ڇڏيو ۽ نواز شريف جي ڪلنٽن سان باضابطا ملاقات کان اڳ پاڪستاني موقف ۽ خدشن جي وڪالت ڪري ڪلنٽن جي دل نرم ڪئي.

وري به شاهه عبدالله جي هڪ دوست 12 آڪٽوبر تي هن جي ٻئي دوست جون ٻوريون ۽ بستر گول ڪرڻ کان پاسو نه ڪيو پر سعودين کي اهڙي اندروني تبديلين جي باري ۾ ڪڏهن به ڪو خاص فڪر نه رهيو. ڇو ته پاڪستان ۾ جيڪو به جنهن جاءِ تي ايندو پهرين ته هو رياض ئي ويندو.

وقت گذرڻ سان گڏوگڏ پاڪ عرب ڀاءُ ڀاءُ ۾ ٽيون خليجي ملڪ قطر به شامل ٿي ويو، جڏهن سوا سال پهرين قطر کان 16 ارب ڊالر جي ايل اين جي درآمد ڪرڻ جو معاهدو طئي ٿيو ته عام تاثر اهو ئي هو ته قطر سان اقتصادي نوعيت جو لاڳاپو آهي، وري ڀلو ٿئي پاناما پيپرز ڪيس جو، جنهن سان گلو خلاصي جي ڪوشش ۾ شريف خاندان کي اهو تاثر ڏيڻو پيو ته صرف سعودي سان ئي نه بلڪه قطري شاهي خاندان سان به سڳن ڀائرن جهڙا لاڳاپا آهن. سعودي عرب ته نواز شريف کي ٽيون ڀيرو اقتدار ۾ اچڻ تي ڏيڍ ارب ڊالر جي سلامي ڏني هئي پر قطري شاهي خاندان ته شريف خاندان جو ڪاروباري پارٽنر به نڪري آيو ۽ اهو به اڄ کان نه بلڪه 30-35 ورهيه پهرين کان.

جڏهن شريف برادران جي والد پاران اڳوڻي قطري وزيراعظم شيخ حماد بن جاسم الثاني جي والد کي 12 ملين درهم ڪچي رسيد تي سرمائيڪاري جي لاءِ ڏنا ۽ ان جي بدلي شيخ حماد پاران لنڊن ۾ شريف خاندان کي چار فليٽ ڏنا. رهيو ان ٽرانزيڪشن جو رڪارڊ ته عدالت کي اهو ٻڌايو ويو ته جنرل مشرف جي تختي اونڌي ڪرڻ جي مهم جي نتيجي ۾ هڪ ظلم اهو ٿيو ته شريف خاندان جو 40 سالا ڪاروباري رڪارڊ ضايع ٿي ويو. هاڻ رڳو ان خط تي اعتبار ڪيو وڃي جيڪو قطري شهزادي پاران عدالت جي لاءِ لکيو هو.

(ان خط تي مون کي اهو سادو ڪاغذ ياد اچي ويو، جيڪو ٻار ڊرائينگ ٽيچر کي اهو چوندي ڏنو ته سائين هي ڊرائينگ ڏسو، ڳئون گاهه چري رهي آهي. استاد پڇيو ته هن ۾ گاهه ڪٿي آهي پٽ؟ ٻار چيو ته گاهه چري وئي آهي سائين!! ۽ ڳئون ڪٿي آهي پٽ؟ اهو ته گاهه چري هلي وئي سائين).

اڄ تصوير هيئن آهي ته پاڪستاني اسٽبلشمينٽ ۽ سعودي فوجي اسٽيبلشمينٽ جا سڌا سنوان لاڳاپا آهن. پاڪستان جيتوڻيڪ يمن جي جنگ ۾ موثر ڪردار ادا نه پيو ڪري پر جنرل ريٽائرڊ راحيل شريف سميت 34 رڪني مسلمان عسڪري اتحاد جو حصو ضرور آهي. متحده عرب امارات ۽ نواز شريف حڪومت جي وچ ۾ بظاهر ڇڪتاڻ آهي پر زرداري خاندان ۽ اماراتي خاندانن ۾ پهرين جهڙي گرمجوشي برقرار آهي.

جيتوڻيڪ خليجي ملڪن ۾ پاڪستاني ڪارڪنن سان ڪو بهتر سلوڪ نٿو ڪيو وڃي پر پاڪستاني تلور بهرحال پاڪ خليج تعلقات جو هڪ اهم ۽ اولين ستون آهي، ڇو ته ايوب خاني دور ۾ پهرين تلور آيو وري عرب شيخ پاڻ ئي هلي آيا، ائين قطرو قطرو بڻجندو ويو.

خليجي ملڪ پاڪستان جي اندروني سياست تي نه صرف سڌو سنئون بلڪه حمايت يافته مذهبي تنظيمن ۽ علماءَ جي ذريعي به بنا سبب جي اثرانداز ٿيندا آهن. گذريل 40 ورهين دوران پاڪستان ۽ خليجي اسٽيبلشمينٽ جي ويجهڙائپ سان پاڪستان ۾ ڪيتريون ئي ننڍيون وڏيون سماجي ۽ سياسي تبديلي آيون. عوامي سطح تي سڀ کان واضح تبديلي ته خدا حافظ کان الله حافظ ۾ بدلجي ويندو. 1990ع جي ڏهاڪن تائين امن امان جي بحالي جي لاءِ فوج يا نيم فوجي ادارا جيڪي آپريشن ڪندا هئا، انهن آپريشنن جا نالا جبر الٽر، آپريشن سرچ لائيٽ، آپريشن فيئر پلي، آپريشن مڊ نائٽ جيڪال وغيره هوندا هئا. هاڻ آپريشن راهِ حق، راهِ راست، ضربِ عضب ۽ رد الفساد هوندا آهن.

سياست ۾ هي تبديلي آئي آهي ته افغان مجاهدين کي هڪ تارازي ۾ تورڻ جو مسئلو هجي يا سويلينز فوج جي يا فوج سويلينز کي ٻڌي اڻ ٻڌي ڪري رهي هجي، آمدني کان وڌيڪ خرچ تي پرده پوشي جي لاءِ ڪنهن شهزادي جو خط درڪار هجي يا ڪنهن کي ڪنهن جي خلاف تحريڪ هلائڻ کان پري رکڻو هجي يا حمايت تي راضي ڪرڻو هجي، جڏهن سموريون اندروني ڪوششون ناڪام ٿي وينديون آهن ته وري ڪيس خليجي جرڳي جي اڳيان ويندو آهي ۽ ائين وري سڀ هڪ ڀيرو ٻيهر کلي خوش ٿي رهڻ لڳندا آهن.

پر هاڻ هڪ فرق پيدا ٿي رهيو آهي. شروع جي 30 کان اڳ پاڪستاني پاور پاليٽڪس ۾ توازن ۽ ثالثي جي لاءِ آمريڪي ڪردار نمايان هوندو هو، ايندڙ 30 سالن جي دوران خليجي ڪردار آمريڪا جي جاءِ ورتي آهي ۽ هاڻ چين جو زمانو شروع ٿي چڪو آهي. ٻار هونئن ئي بنا ڪنهن سرپرست جي پنهنجا مسئلا پاڻ حل ڪرڻ جي قابل ناهن هوندا، جڏهن هوندا، تڏهن ئي وڏا ٿيندا نه.

 

پانامه ليڪس فيصلو ۽ وزير اعظم کان استعيفيٰ جو مطالبو…!

سپريم ڪورٽ ۾ پاناما ليڪس ڪيس جي حوالي سان فيصلو اچڻ کانپوءِ مخالف ڌر جي مک پارٽين ۽ سپريم ڪورٽ بار پاران وزيراعظم نواز شريف کان استعيفيٰ جو مطالبو ڪيو ويو آهي، پاڪستان پيپلز پارٽي، تحريڪ انصاف، جماعت اسلامي ۽ سپريم ڪورٽ بار جو چوڻ آهي ته جي آءِ ٽي ۾ موجود آفيسر وفاقي حڪومت جا ملازم هوندا ۽ وزيراعظم جي عهدي تي ويٺل نواز شريف جي موجودگي ۾ اهي صحيح نموني جاچ ڪري نه سگهندا ۽ پراڻي تاريخ اها ٻڌائي ٿي ته نواز شريف انهن تي اثر انداز ٿيڻ جي سڌي ۽ اڻسڌي ڪوشش ڪندو، جنهن ڪري ڪيس جي جاچ تي اثر پئجي سگهي ٿو، فيصلي ۾ ٻن سڀني کان سينئر ججن نواز شريف کي نااهل ڪرڻ جو فيصلو ڏنو هو، ان ڪري اخلاقي طور تي به نواز شريف کي هاڻي هن عهدي تي رهڻ جو ڪو به جواز ڪونهي. اڳوڻي صدر ۽ پيپلزپارٽيءَ جي ڪو چيئرمين آصف علي زرداري موجب  ٻن سينيئر ججن کي سلام ٿو پيش ڪيان جن اهو فيصلو ڪيو ته وزير اعظم کي نااهل قرار ڏنو وڃي، وزيراعظم کي فوري طور استعفيٰ ڏيڻ گهرجي. مون کي خبر آهي ته هو آخري ساهه تائين استعيفيٰ نه ڏيندو پر اسان پنهنجي جدوجهد جاري رکنداسين.سپريم ڪورٽ جو فيصلو پڙهي رد عمل ڏينداسين نواز شريف جو بيان ٿاڻي ۾ ورتو ويندو يا آفيسر وزيراعظم هائوس اچي بيان وٺندا؟، جونيئر ججن جي اڪثريت عوام جو مذاق اڏايو. جي آءِ ٽي جوڙڻ نواز شريف کي ڀڄڻ جو رستو ڏيڻ جي برابر آهي. پاڪستان تحريڪ انصاف جي سربراهه جو چوڻ آهي ته ملڪي تاريخ  ۾ اهڙو فيصلو ناهي آيو، سپريم ڪورٽ جي ججن کي ڀيٽا پيش ڪيان ٿو، جي آءِ ٽي بڻائڻ جو مقصد اهو آهي ته نواز شريف جي موقف کي رد ڪيو ويو آهي. 2 ججن وزير اعظم کي صادق ۽ امين قرار ناهي ڏنو، جاچ ٽيم وزير اعظم جي استعيفيٰ کان سواءِ ڪم نٿي ڪري سگهي ۽ وزير اعظم ان عهدي تي رهڻ وارو اخلاقي جواز وڃائي چڪو آهي. نواز شريف وٽ عهدي تي رهڻ جو اخلاقي جواز ناهي، نواز شريف جو عهدي تي رهڻ ان ڪري بهتر ناهي جو هن خلاف جاچ ٿيندي، جي آءِ ٽي جي جاچ تائين نواز شريف استعيفيٰ ڏئي. مسلم ليگ ق به وزيراعظم نواز شريف کان استعيفيٰ ڏيڻ جو مطالبو ڪري ڇڏيو، چوڌري شجاعت حسين چيو آهي ته سپريم ڪورٽ جي ۲ ججز فيصلو ڏنو آهي ته وزيراعظم نوازشريف نااهل آهي ۽ آرٽيڪل ٦۲،٦۳ تي پورو ناهي لٿو، جي آءِ ٽي کي رد ڪيون ٿا، ڪنهن جج ناهي چيو ته وزيراعظم صادق ۽ امين آهي، ان لاءِ وزيراعظم نوازشريف استيعفيٰ ڏئي جوائينٽ انويسٽيگيشن ٽيم جي سامهون پيش ٿئي. سراج الحق  به اهو چيو آهي ته اخلاقي طور تي پاناما جو فيصلو وزيراعظم لاءِ ٿپڙ آهي، نواز شريف تي ڪرپشن ثابت ٿي وئي آهي، وزيراعظم فوري طور استعيفيٰ ڏي، پنجن مان ٻن ججن اهو چيو آهي ته وزيراعظم هاڻي اهل ناهي رهيو، پنجن ججن اهو به لکيو آهي ته ڪرپشن ڪئي وئي آهي پر ان جي وڌيڪ جاچ ٿيڻ گهرجي ۽ جي آءِ ٽي هجڻ گهرجي، وزيراعظم ۽ سندس حڪومت کي ڪلين چٽ ناهي ملي، ان ڪري وزيراعظم فوري طور تي استعيفيٰ ڏي، اسان نه جهڪيا آهيون نه ئي وري ٿڪا آهيون، نه ئي دٻاءُ ۾ آهيون، انشاالله اهو سفر جاري رهندو، جيستائين ملڪ مان ڪرپشن ختم نٿي ٿئي، سپريم ڪورٽ بار جي سيڪريٽري آفتاب باجوا چيو آهي ته وزيراعظم جي موجودگي ۾ جي آءِ ٽي معاملي جي شفاف جاچ نٿي ڪري سگهي، ڇو جو سمورا آفيسر وزيراعظم جي ماتحت آهن، وزيراعظم نواز شريف استعيفيٰ ڏئي ته جيئن جي آءِ ٽي معاملي جي آزاداڻي جاچ ڪري سگهي.

 

پاناما ليڪس، وزير اعظم نااهل نه ٿيو، سپريم ڪورٽ فيصلو جاري ڪري ڇڏيو

اسلام آباد (اين اين آءِ) سپريم ڪورٽ آف پاڪستان پاناما ليڪس جي جاچ لاءِ جي آءِ ٽي جوڙڻ جو حڪم ڏنو آهي، جي آءِ ٽي ۾ ايم آءِ، ايف آءِ اي، ايس اي سي ٽي جا نمائندا شامل هوندا، جي آءِ ٽي 60 ڏينهن ۾ جاچ مڪمل ڪندي، خميس تي سپريم ڪورٽ روم نمبر هڪ ۾ بينچ جي سربراهه جسٽس آصف سعيد کوسي پاناما ڪيس جو 540 صفحن تي ٻڌل پهريان کان محفوظ ٿيل فيصلو پڙهي ٻڌايو، اهو فيصلو جسٽس اعجاز افضل خان لکيو، بينچ ۾ شامل 5 مان 2 ججن جسٽس آصف سعيد کوسي ۽ جسٽس گلزار احمد وزيراعظم کي ڊي نوٽيفائي ڪرڻ جو چيو، وڌيڪ 3 ججن معاملي جي جاچ جو اظهار ڪيو، قانون موجب 3 ججن جي فيصلي تي عمل ٿيندو، جسٽس آصف سعيد کوسي فيصلو ٻڌائڻ کان اڳ چيو ته فيصلو 547 صفحن تي ٻڌل آهي جنهن ۾ سڀني پنهنجي راءِ ڏني آهي، اميد آهي ته جيڪو به فيصلو هوندو، عدالت ۾ جذبن جو اطهار نه ڪيو ويندو، فيصلي جي شروعاتي نقطن ۾ چيو ويو ته رقم ڪيئن قطر منتقل ڪئي وئي ان جي جاچ ٿيڻ گهرجي، فيصلي ۾ چيو ويو ته نيب جو چيئرمين راضي نه ڏٺو ويو ان جي جاچ ٿيڻ گهرجي، نيب جي چيئرمين پنهنجو ڪم ڪرڻ ۾ ناڪام رهيو، ان لاءِ جي آءِ ٽي جوڙي وئي، فيصلي ۾ چيو ويو ته وزيراعظم نواز شريف ۽ ان جو خاندان حسن ۽ حسين نواز کي جي آءِ ٽي جي اڳيان پيش ٿيڻ جو حڪم ڏيندي هدايت ڪئي وئي ته جي آءِ ٽي هر هفتي کانپوءِ سپريم ڪورٽ بينچ اڳيان پنهنجي رپورٽ پيش ڪري، بي بي سي موجب چيف جسٽس ان رپورٽ جي روشني ۾ هڪ جدا بينچ جوڙيندو، گڏيل جاچ ٽيم ۾ ايف آءِ اي جو هڪ نمائندو هوندو جيڪو ايڊيشنل ڊائريڪٽر جي عهدي کان گهٽ نه هوندو، انکانسواءِ هڪ هڪ نمائندو نيب، سيڪيورٽي ۽ ايڪسچينج ڪميشن ۽ اسٽيٽ بينڪ مان هوندو، آءِ ايس آءِ ۽ ايم آءِ مان به 2 تجربي وارا آفيسر ان ڪميٽي ۾ شامل هوندا، سمورن نمائندن کي ان جي ادارن جا سربراهه نامزد ڪندا، ان ادارن جا سربراهه 7 ڏينهن ۾ نمائندن جا نالا بينچ اڳيان جمع ڪرائين، سپريم ڪورٽ فيصلي ۾ چيو ته ڊي جي ايف آءِ اي وائيٽ ڪالر ڪرائيم جي جاچ ۾ ناڪام رهي آهي، ياد رهي ته جسٽس آصف سعيد کوسي، جسٽس عظمت سعيد شيخ، جسٽس اعجاز افضل، جسٽس گلزار احمد ۽ جسٽس اعجاز الحسن تي ٻڌل 5 ميمبرن واري بينچ روز جي بنياد تي ٻڌڻي کانپوءِ پاناما ڪيس جو فيصلو 23 فيبروري تي محفوظ ڪيو هو.

 

پ پ سپريم ڪورٽ جي فيصلي کي رد ڪري ڇڏيو، وزيراعظم کان استعفيٰ جو مطالبو

اسلام آباد(ويب ڊيسڪ) پاڪستان پيپلز پارٽي جي شريڪ چيئرمين ۽ اڳوڻي صدر آصف علي زرداري چيو ته ٻن سينيئر ججن کي سلام ٿو پيش ڪيان جن اهو فيصلو ڪيو ته وزير اعظم کي نااهل قرار ڏنو وڃي، وزير اعظم کي فوري طور استعيفيٰ ڏيڻ گهرجي، مون کي خبر آهي ته هو آخري ساهه تائين استعيفيٰ نه ڏيندو پر اسان پنهنجي جدوجهد جاري رکنداسين. اسلام آباد ۾ پريس ڪانفرنس ڪندي آصف زرادري چيو ته ملڪ تباهه ٿي رهيو آهي ۽ انهن کي شرم ناهي هو رڳو پنهنجي مفادن ۽ مزي لاءِ سوچي رهيا آهن ۽ ڪري رهيا آهن. سپريم ڪورٽ جي فيصلي جي مذمت ڪيون ٿا، ملڪ بحران ڏانهن وڃي رهيو آهي،  اسان عمران خان کي  پهرين ئي چيو ته اسان سان هٿ ملائي گڏجي سپريم ڪورٽ هلون پر هن ائين نه ڪيو. هن چيو ته 9 مهينن کان قوم سان مذاق پيو ڪيو وڃي، عمران خان ڊرامو ڪيو جنهن جو فائدو وزير اعظم کي ٿيو. عوام کي دوکو ڏنو ويو آهي ۽ مذاق ڪيو ويو آهي، پاڪستان ۾ اڄ جمهوريت ۽ انصاف کي نقصان پهتو آهي جڏهن ته عدالتي فيصلي تي مٺايون ورهائڻ وارن کي شر اچڻ گهرجي. هن وڌيڪ چيو ته سپريم ڪورٽ جو فيصلو پڙهي رد عمل ڏينداسينم نواز شريف جو بيان ٿاڻي ۾ ورتو ويندو؟ يا آفيسر سندس گهر اچي بيان وٺندا، جونيئر ججن جي اڪثريت عوام جو مذاق اڏايو. جي آءِ ٽي جوڙڻ نواز شريف کي ڀڄڻ جو رستو ڏيڻ جي برابر آهي.