تازيون خبرون

Monthly Archives: April 2017

هر سين تي فرح ۽ گوري جا خيال حساس ۽ منفرد نوعيت جا هوندا آهن: شاهه رخ خان

ممبئي(شوبز نيوز) بالي ووڊ سپر اسٽار شاهه رخ خان چيو آهي ته مون ڪجهه عورت هدايتڪارن سان ڪم ڪيو پر فرح خان ۽ گوري شندي سان ڪم ڪرڻ تمام گهڻو مزو آيو ڇو جو جيڪڏهن ڪو سين جذباتي يا ڪاميڊي آهي ته ان سين تي ٻنهي جا خيال حساس ۽ منفرد نوعيت جا هوندا آهن. ڀارتي سڌ سماءَ وارن ذريعن موجب ڪنگ خان شاهه رخ عورت هدايتڪارن سان ڪم ڪرڻ جي حوالي سان چيو آهي ته مونکي هميشه کان اهو يقين رهيو آهي ته عورتون وڌيڪ محنتي ۽ فرض شناس هونديون آهن ۽ انهن سان ڪم ڪري منهنجو ڪم آسان ٿي ويندو آهي.

 

عاليه ۽ سڌارٿ بابت افواهن سبب عاليه تي ڪو فرق نه ٿو پوي: سوني

ممبئي(شوبز نيوز) بالي ووڊ اداڪاره عاليه ڀٽ جي والده سوني رازدان جو چوڻ آهي ته عاليه ڀٽ ۽ سڌارٿ ملهوترا بابت جيڪي افواهون پکڙجي رهيون آهن ان سان عاليه ڀٽ تي ڪو فرق نه ٿو پوي. ڀارتي سڌ سماءَ وارن ذريعن موجب سوني جو چوڻ هو ته عاليه ايندڙ مهيني کان ٽيليويزن تي پڻ نظر ايندي. هن جو چوڻ هو ته ڪير به اهو نه ٿو چوي ته عاليه سڌارٿ سان پنهنجو وقت ضايع ڪري رهي آهي ۽ ان ئي سبب سيٽ تي دير سان ايندي آهي پر هوءَ ته سيٽ تي وقت کان اڳ پهچندي آهي.

 

پاڪستاني وڪيٽ ڪيپر بيٽسمين سرفراز احمد ٽيسٽ ڪرڪيٽ ۾ 2 هزار رنسون مڪمل ڪري ورتيون

ڪنگسٽن( نيوز) پاڪستاني ٽيم جي وڪيٽ ڪيپر ۽ بيٽسمين سرفراز احمد ٽيسٽ ڪرڪيٽ ۾ 2 هزار رنسون مڪمل ڪري ورتيون آهن. هن اهو اعزاز ويسٽ انڊيز خلاف ٽيسٽ سيريز جي پهرين ميچ جي چوٿين ڏينهن حاصل ڪيو، سرفراز احمد ويسٽ انڊيز خلاف ٽيسٽ سيريز جي پهرين اننگز ۾ شاندار بيٽنگ جو مظاهرو ڪيو ۽ هڪ ڇڪي ۽ پنجن چؤڪن جي مدد سان اڌ سينچري مڪمل ڪري ٽيسٽ ڪرڪيٽ ۾ 2 هزار رنسون مڪمل ڪري ورتيون. سرفراز هن وقت تائين 34 ميچن جي 59 اننگز ۾ 42.59 جي شرح سان 2002 رنسون اسڪور ڪيون آهن، جنهن ۾ سندس ٽي سينچريون ۽ 12 اڌ سينچريون شامل آهن.

 

ڀارتي اوپنر لوڪيش راهول جي فٽنس مسئلن سبب آءِ سي سي چيمپئنز ٽرافي ۾ شرڪت نه ڪرڻ جو امڪان

ممبئي( نيوز) ڀارتي ٽيم جي اوپننگ بيٽسمين لوڪيشن راهول جي فٽنس مسئلن سبب هلندڙ سال شيڊول آءِ سي سي چيمپئنز ٽرافي ۾ شرڪت نه ڪرڻ جو امڪان آهي. راهول ڪلهي جي انجري ۾ مبتلا آهي ۽ اڄڪلهه صحت جي بحاليءَ واري عمل مان گذري رهيو آهي. انجري سبب راهول هلندڙ آءِ پي ايل ۾ به شرڪت نه ڪئي. چيمپئنز ٽرافي جون ۾ شيڊول آهي، جنهن ۾ ڀارتي ٽيم ٽائٽل جو دفاع ڪندي. ا

 

وزيراعظم کان ٿيندڙ استعيفيٰ جو مطالبو: صاحب خان ڀٽي

وڏي ڪورٽ جي وڏي فيصلي بعد هڪ ڀيرو ٻيهر سياستدان ميدان تي لهي آيا آهن، ڪجهه جماعتون سپريم ڪورٽ جي فيصلي تي مٺايون ورهائي رهيون آهن ته ڪجهه وري سپريم ڪورٽ جي ججن کي سلام پيش ڪري رهيون آهن، تحريڪ انصاف سربراهه عمران خان به سپريم ڪورٽ جي فيصلي کي قبول ڪندي وزيراعظم نوازشريف کان ٻيهر استعيفيٰ جو مطالبو ڪري ڇڏيو آهي، ڪجهه اڳواڻ چئي رهيا آهن ته سپريم ڪورٽ جو فيصلو نوازشريف جي حق ۾ آهي ته ڪجهه وري عمران خان جي حق ۾ قرار ڏئي رهيا آهن، مطلب ته ٻئي پارٽيون فيصلي تي خوش نظر اچي رهيون آهن پر پيپلزپارٽي هن ڀيري ن ليگ کان ٿورو وڌيڪ ئي ڪاوڙيل نظر اچي رهي  آهي، جنهن سبب وزيراعظم کان فوري طور استعيفيٰ جو مطالبو ڪيو  آهي، ق ليگ اڳواڻ چوڌري  شجاعت حسين جي رهائشگاهه تي ڪجهه ڏينهن چار پارٽين جو اجلاس ٿيو هو ، ايتري قدر جو جماعت اسلامي جي امير سراج الحق جي قيادت چوڌري شجاعت سان ملاقات ڪئي هئي، جنهن بعد هڪ گڏيل پريس ڪانفرنس ۾ وزيراعظم کان  به استعيفيٰ جو مطالبو ڪيو ويو هو، تحريڪ انصاف سربراهه عمران خان چئي رهيو آهي ته پاناما فيصلو تاريخي هو، جيڪو صدين تائين ياد رکيو ويندو. عمران خان ته اهو به چيو هو ته تاريخ ۾ پهريون ڪنهن وزيراعظم خلاف ڪارروائي ٿي رهي آهي، جيڪڏهن ڏٺو وڃي ته  پيپلزپارٽي جي  حڪومتي دور ۾ ته اڳوڻي وزيراعظم يوسف رضا گيلاني کي به هٽايو ويو آهي ته پوءِ آخر ڪهڙي ريت اهو تاريخ ۾ پهريون ٿيو آهي،

هڪ ٻي اڳوڻي وزيراعظم خلاف قانوني ڪارروائي شروع ٿي هئي، وزيراعظم نوازشريف پهريون وزيراعظم آهي جنهن جي خلاف جاچ جو حڪم ڏنو ويو آهي، بهرحال هن وقت پيپلزپارٽي کي به وفاق جون ناانصافيون ۽ زيادتيون ياد اچي ويو آهن، جنهن سبب هڪ ٻه ڏينهن اڳ سڄي سنڌ ۾ بجلي جي اڻ اعلانيل لوڊشيڊنگ، پاڻي جي کوٽ ۽ مسئلن خلاف ڌرڻا هنيا ويا هئا پر ان باوجود ن ليگ جي ڪن تي جونءَ به نه چري هئي، هونءَ ته سنڌ ۾ گذريل ڪيترن ئي ڏهاڪن کان ناانصافيون ٿينديون پيون اچن پر ان باوجود پيپلزپارٽي طرفان  اهڙي نموني احتجاج نه ڪيو ويو هو، جهڙي ريت هن وقت احتجاج ڪيو پيو وڃي، هونءَ ته سنڌ ۾ ڌارين جي لوڌ جو سڀ کان وڏو مسئلو آهي پر ان باوجود ان اهم مسئلي تي پيپلزپارٽي طرفان ڪڏهن به اهڙي ريت احتجاج نه ڪيو ويو  آهي، جهڙي ريت هن وقت ٿي رهيو آهي، جيڪڏهن ڏٺو وڃي ته سنڌ ۾ اهڙا  ڪيترائي ڪچي جا علائقا آهن جتي بجلي جي سهولت نه هئڻ جي برابر آهي، ايتري قدر جو  ڪيترن ئي ملازمن کي پگهارون به نه ملي رهيون آهن جيڪي روزاني جي بنياد تي احتجاج ڪري رهيا آهن پر انهن جي دانهن ورنائڻ وارو ڪير نه آهي، جڏهن  سنڌ جي استادن پنهنجن مطالبن جي مڃتا لاءِ ڪراچي ۾ احتجاج ڪيو ويو هو ته ان وقت سنڌ حڪومت طرفان انهن استادن تي واٽرڪينن ۽ لاٺي چارچ جو استعمال ڪيو ويو هو، ايتري قدر جو ٻين پارٽين طرفان به احتجاج ڪيا ويا هئا  پر انهن خلاف ڪا خاص ڪارروائي نه ڪئي وئي هئي.

بهرحال هن وقت پيپلزپارٽي وفاق کان تمام گهڻو ناراض نظر اچي آهي، جنهن سبب وزيراعظم نوازشريف کان استعيفيٰ جو مطالبو ڪيو آهي، ڪجهه ڏينهن اڳوڻي صدر آصف علي زرداري طرفان پريس ڪانفرنس ۾ چيو ويو هو ته هنن ن ليگ جو ساٿ ان ڪري ڏنو هو جو کين جمهوريت کي بچائڻو هو، پر هاڻ هو نوازشريف جو ساٿ نه ڏيندا، اهڙي صورتحال باوجود وزيراعظم نوازشريف  هن وقت تائين پيپلزپارٽي سان ڪا خاص ڳالهه نه ڪئي آهي ۽  نه ئي وري هن وقت تائين سمررين پارٽين کي اعتماد ۾ وٺڻ جي ڪوشش نه ڪئي آهي ، جنهن مان لڳي رهيو آهي ته ٻنهي پارٽين  ۾ ويڇا وڌي ويندا. جيڪڏهن ڏٺو وڃي ته مخالف ڌر جي اڳواڻ خورشيد شاهه ڪجهه ڏينهن اڳ اسيمبلي ۾ چيو هو ته کين خدشو آهي ته اڳوڻي صدر آصف زرداري جي ويجهي ساٿين کي متان طالبان کي وڪرو نه ڪيو وڃي ۽ اهو به چيو هو ته جيڪڏهن سندن هڪ ماڻهو کي ڪجهه به ٿيو ته ان جو ڪيس وفاقي حڪومت تي داخل ڪرايو ويندو. هن وقت جيڪڏهن ڏٺو وڃي ته پيپلزپارٽي آصف زرداري جي ويجهي ساٿيجي گمشدگين تي نواز سرڪار کان بلڪل ناراض نظر اچي رهي آهي، باقي رهي ڳالهه تحريڪ انصاف جي سربراهه عمران خان  جي ته ان طرفان هن ڀيري ڪو خاص رد عمل نه ڏيکاريو ويو آهي،

پاناما ڪيس جي فيصلي بعد جماعت اسلامي، تحريڪ انصاف ۽ ٻيون کوڙ ساريون جماعتون وزيراعظم نوازشريف کان استعيفيٰ جو مطالبو ڪري رهيون آهن پر ان باوجود ن ليگ اڳواڻ پاناما ڪيس جو فيصلو اچڻ بعد خوشي وچان مٺايون به ورهائي رهيا آهن، هڪ طرف حڪمران جماعت جا ڪارڪن جشن ته ٻي طرف مخالف تنظيمون وزيراعظم نوازشريف کي فوري طور وزيراعظم جي عهدي تان استعيفيٰ جو مطالبو  ڪندي نظر اچي رهيون آهن، تحريڪ انصاف سربراهه عمران خان ته وزيراعظم نوازشريف ۽ اڳوڻي صدر آصف علي زرداري کي ڪرپٽ چئي ڇڏيو آهي، ايتري قدر جو  آصف علي زرداري بابت بيان ڏيندي اهو به چيو آهي ته آصف زرداري ڪرپٽ آهي پر منافق نه آهي، جماعت اسلامي جي امير سراج الحق به وزيراعظم کي عهدو ڇڏڻ جي صلاح ڏني آهي ۽ چيو آهي ته پاناما ڪيس جي فيصلي بعد وزيراعظم نوازشريف صادق ۽ امين ناهي رهيو، جنهن سبب کيس عهدي تي نه رهڻ گهرجي، هڪ ٻه ڏينهن اڳ لاهور ۾ به ميڊيا سان ڳالهائيندي سراج الحق چيو ته نون ليگ اڪثريت  ۾ آهي، ڪنهن ٻئي کي به وزيراعظم بڻائي سگهجي ٿو، جي آءِ ٽي جي جاچ مڪمل ٿيڻ تائين وزيراعظم کي استعيفيٰ ڏيڻ گهرجي، جاچ مڪمل ٿيڻ بعد ڀلي ٻيهر وزيراعظم ٿئي جنهن تي ڪنهن کي به اعتراض نه هوندو.

هاڻ ڏسڻو اهو آهي ته تحريڪ انصاف، پيپلزپارٽي ۽ ٻيون جماعتون پاناما فيصلي تي وزيراعظم کي استعيفيٰ ڏيڻ لاءِ راضي ڪري وٺنديون يا وري ماضي جهڙي ريت ڌرڻن ۽ احتجاجن واري سياست شروع ڪئي وئي هئي، اهڙو عمل ٻيهر شروع ڪيو ويندو، بهرحال هن وقت سڄي ملڪ صرف هڪ بحث ٿي رهيو آهي اهو پاناما ئي آهي، هن ڀيري تحريڪ انصاف بدران پيپلزپارٽي نواز ليگ تي ٿورو وڌيڪ ڏمريل نظر اچي رهي آهي، سڀ کان وڏي ڳالهه اها آهي جو هن ڀيري وزيراعظم نوازشريف پيپلزپارٽي کي پرچائڻ جي ڪا به ڪوشش نه ڪئي آهي ۽ نه ئي پيپلزپارٽي جي احتجاجن بابت ڪو خاص بحث ڪيو ويو آهي. رهي ڳالهه وفاق طرفان سنڌ ٿيندڙ زيادتين جي ته اهو ڪا نئين ڳالهه نه آهي، گذريل ڪيتري ئي عرصي کان قومپرست ڌريون احتجاج به ڪري رهيون آهن پر انهن جي احتجاجن تي ڪو به ڌيان نه ڏنو ويو هو، هاڻ صرف فرق ايترو آهي جو پيپلزپارٽي  وفاق جي ناانصافين جو راڳ ڳائي رهي آهي، ڪجهه ڏينهن اڳ اسيمبلي ۾ وڏي وزير سيد مراد علي شاهه صرف وفاق کي گيس بند ڪرڻ جي ڌمڪي ڏني هئي ته ان وقت نواز ليگ اڳواڻ خاموش ٿي ويا هئا، ان مان صاف ظاهر آهي ته وفاق سنڌ کي ڪيترا حق ڏئي رهيو آهي، معدني وسيلن جي ڦرلٽ بابت صرف سنڌ جي ڪامورن کي ئي خبر آهي پر افسوس جو اهو اعليٰ ايوان ۾ ان بابت آواز نه اٿاريندا آهن، جيڪڏهن سنڌ جا وزير چاهين ته وفاق ڪڏهن به سنڌ جي حصي جو پاڻي، بجلي ۽ گيس روڪي نه ٿو سگهي ۽ سنڌ کي سمورا حق ملي ويندا.

Sahibalisindhi@gmail.com

 

دادو ۾ پي ٽي آءِ جو جلسو، ۽ تبديل سياسي صورتحال: سيد شفقت حسين

پاڪستان تحريڪ انصاف چيئرمين عمران خان22 اپريل تي دادو ۾ هڪ وڏو عام جلسو ڪيو، سنڌ جي اڳوڻي وڏي وزيرلياقت علي جتوئي دادو جي جلسي ۾ با ضابطا طور تي نه صرف اعلان ڪيو آهي پر گذريل 10 سالن جي وڏي عرصي دوران حڪومتن کان پري رهڻ ۽ نواز شريف پاران مسلسل نظرانداز ڪرڻ بعد هن پي ٽي آءِ ۾ شموليت ڪرڻ سان گڏ پنهنجي پارٽي عوامي اتحاد پارٽي کي به پي ٽي آءِ ۾ ضم ڪيو ۽ وڏو جلسو رکرائي پنهنجي سياسي طاقت جو ڀرپور مظاهرو ڪيو آهي،

پي ٽي آءِ سربراهه عمران خان دادو جي جلسي ۾ پهچڻ لاءِ لاڙڪاڻي جي موهن جي دڙي جي ايئرپورٽ کان شاندار استقبال ڪرڻ لاءِ لياقت علي جتوئي ساٿين سان گڏجي هزارين ڪارڪنن لاڙڪاڻي کان زبردست ريلي جي صورت ۾ دادو جلسي گاهه تائين وڏي شان مان سان آندو ويو، مختلف شهرن ۾ قائم ڪيل استقباليه ڪيمپن ۾ موجود لياقت جتوئي جي ساٿين پاران عمران خان کي زبردست طريقي سان ڀليڪار ڪندي سنڌي ٽوپي اجرڪن جا تحفه  ڏئي گلن جي ورکا ڪئي وئي، سنڌ جي مهمان نوازي ۽ ثقافت کي پڻ اجاگرڪيو ويو، هر هنڌ پي ٽي آءِ جا پينا فليڪس، جهنڊا، بينر لڳل هجڻ ڪري دادو ۾ ڄڻ ڪا اليڪشني ماحول پيدا ٿي ويو هجي،

لياقت علي جتوئي کي گذريل هڪ ڏهاڪي دوران پ پ پ کان ملندڙ سياسي ناڪامي، عام اليڪشن سميت بلدياتي چونڊن ۾ بري شڪست ملڻ بعد کيس ڪيترائي ويجها دوست به سياسي وفاداريون مٽائي  کائنس دور ٿي چڪا، گذريل هڪ سال اڳ پي ايس 76 جي صوبائي سيٽ تي ضمني اليڪشن ۾ لياقت جتوئي پاران اليڪشني بائيڪاٽ ڪرڻ کانپوء سندس جي سياسي طاقت کي تمام وڏو ڌڪ رسيو، جنهن بعد ڪجهه عرصي کان پوِء جتوئي برادران بابت افواهه هئا ته  پ پ پ ۾ شموليت ڪندا، پر شايد ٽاسڪ ۽ ڳالهين ۾ تضاد هجڻ ڪري اهڙو فيصلو نه ٿي سگهيو، ڪجهه ئي عرصي بعد اڳوڻوسينيٽر صداقت علي جتوئي اسلام آباد ۾ پي ٽي آءِ سربراهه عمران خان سان ملاقات ڪري پنهنجي ڀاء لياقت علي جتوئي جي پي ٽي آءِ ۾ شموليت جي راهه هموار ڪئي، هڪ طرف پاناما ڪيس بابت فيصلن اچڻ بعد پهريون ڀيرو پاڪستان تحريڪ انصاف پاران دادو ۾ سياسي ميدان سجايو ويو جتي دادو جي سياسي پچ تي ڪپتان عمران خان نه صرف سياسي ڇڪا هنيا آهن پر دادو جي سياست ۾ وڏي تبديلي آڻي ڇڏي آهي،

سياسي حلقن موجب دادوتاريخي حوالي سان ويٽنام طور مشهورآهي، دادو پ پ پ جو مضبوط قلعو رهيو آهي،جتي پ پ هميشه راڄ ڪندي رهي آهي، اهڙي هنڌ عمران خان جو جلسو شاندار ۽ ڪامياب ٿيڻ تي” دادو ۾ جادو“ واري ڳالهه کي ورجائي ڇڏيو آهي، دادو ۾ جتوئي ڀائرن پاران وڏي جلسي رکرائڻ ۽ پي ٽي آءِ جا جهنڊا ۽ بينر لڳڻ کان پوء پيپلز پارٽي ۽ انهن جي سياسي حلقن تي وڏوسياسي اثر انداز ٿيو آهي، هڪ طرف پي ٽي آءِ جو جلسي ۾ عمران خان نواز شريف جي پاناماڪيس کي سندس ئي خلاف قرار ڏيندي وزارت عظمي تان استيفي جو مطالبوڪيو آهي، جلسي دوران هن الله تعالي کان دعا گهري آهي ته آصف علي زرداري جهڙو سياستدان نه بڻائي،

سياسي حلقن ۾ پاناما ڪيس واري فصلي بعد پي ٽي آءِ پاران ملڪ جو پهريون سياسي جلسو دادو۾ ٿيو جتي عمران خان گرما گرمي ۾ گو نواز گو ۽ آصف علي زرداري تي تيز ۽ تکا ڇوهه ڇنڊيا ويا،

پي ٽي آءِ جي دادو واري جلسي ملڪي سطح جي سياست ۾ وڏي اهميت ڏني پئي وڃي،  دادو جي پي ٽي آءِ واري جلسي جا تجزيا تبصرا ۽ بحث مباحثه پڻ سياسي حلقن ۽ صحافي اينڪرن ۾  پڻ چهچٽو شروع آهي، ڇو جو پ پ پ حڪومت دوران دادو جهڙي ويٽنام شهر ۾ مخالف پارٽي جو جلسو ممڪن ته ٿي سگهي ٿو پر ايڏي وڏي جلسي ٿيڻ جي توقع تمام  گهٽ هئي، جهڙي طرح لياقت جتوئي دادو جي جلسي ۾ ”جادوگري جا جوهر“ ڏسيا آهن، اهڙي جلسي ٿيڻ کان پوء پ پ پ جي چونڊيل نمائندن ۽ اڳواڻن تي وڏو وزن ڪرائي وڌو آهي،

دادو جي تازي سياسي صورتحال تبديل ٿيندي پئي وڃي، پ پ جي حلقن ۾ اندروني اختلافن هجڻ ڪري پ پ جا پراڻا ورڪر به دل شڪسته جو شڪار ٿي رهيا آهن، لياقت جتوئي جهڙي حريف سياستدان دادو جي سياست ۾ پي ٽي آء جي انٽري لڳائڻ بعد هڪ دفعو ٻيهر پنهنجي سياست کي سرگرم ۽ تيز ڪري ڇڏيو آهي، تيزسياسي مهم دوران ڪيترن ئي ماڻهن ۽ پ پ پ جي ويجهن ماڻهن لياقت جتوئي سان ملاقات ڪندي پي ٽي آءِ ۾ شموليت اختيار ڪئي آهي، دادو ۾ پي ٽي آءِ جي وڏي جلسي ٿيڻ بعد هينئر تائين پ پ جي چونڊيل ايم پي ايز يا ايم اين ايز پاران پي ٽي آءِ جلسي جوڪو رد عمل ظاهر ڪيو ويو آهي ۽ نه ئي وري پارٽي اختلافن جي خاتمي جي ڪا حڪمت عملي ڪئي وئي آهي،

گذريل 10 سال پ پ وارن جا سياسي عتاب برداشت ڪندڙ لياقت جتوئي پنهنجي سياسي مهارت سان اندروني طور تي پ پ جي اهم اڳواڻن سان رابطن کي تيز ڪيو آهي، جو ڪنهن به وقت پ پ دادو ضلعي مان صفايو ڪرڻ جو به امڪان ٿي سگهي ٿو، پ پ ضلعي دادو جي ٻن اهم اڳواڻن پير مظهر الحق ۽  رفيق احمد جمالي جي ٻن ڌرين ۾ سالن کان هلندڙ ذاتي اختلافن سبب کڻي ائين چئجي ته پهريون ڀيرو پي ٽي آءِ کي دادو ۾ وڏي جلسي ڪرڻ جو موقعو ڏنو ويو آهي، جتي لياقت جتوئي پ پ وارن 10 سالن جي سياسي ڪاوڙ جي ڪسر پڻ ڪڍي ڇڏي آهي،

2018 جي عام اليڪشن ايتري ته پري ناهي پر هڪ ئي سال مس اٿس، پي ٽي آءِ جي جلسي کان پوء دادو ضلعي جي تبديل ٿي ويل سياست جا نتيجا ايندڙ عام اليڪشن ۾ ضرور ظاهر ٿيندا، عام ماڻهن سميت نوجوانن ۾ نئين سياسي هوا گهلڻ سان سياسي تبديلي جي امڪانن کي به رد نه ٿو ڪري سگهجي، پ پ کي پي ٽي آء سنڌ ۾ اگر ٽف ٽائيم ڏئي سگهي يا نه اها الڳ ڳالهه آهي پر دادو ضلعي ۾ پي ٽي آءِ پ پ پ کي ٽف ٽائيم ڏيڻ جي اصل موڊ ۾ آهي، هڪ طرف پ پ پ قيادت اگر پ پ دادو جي اڳواڻن ۾ اختلاف نبيري نه سگهي ته شايد پ پ ٽڪيٽ هولڊرن جي ڊگهي قطار به جهڪي ٿي سگهي ٿي، سياسي وفاداري مٽائڻ جهڙيون سندن مٿان تهمتون ۽ داغ به لڳڻ جا امڪان آهن، ۽ پارٽي اڳواڻ باضابطا اختلافن کي ختم نه ڪيو ويو ته پوءِ ايندڙ اليڪشن ۾ پ پ پ وارا هڪ ٻئي جون تنگون ڇڪڻ ۾ لڳي ويندا، اهڙي نموني سان سڄو سياسي فائدو پاڪستان تحريڪ انصاف اڳواڻ لياقت علي جتوئي کي حاصل ٿي سگهي ٿو..

 

اختلافي نوٽ تي ايترو گوڙ ڇو….؟

چيف جسٽس جي سربراهي ۾ سپريم ڪورٽ جي بئنچ بني گالا ۾ غيرقانوني اڏاوتن جي خلاف درخواستن جي ٻڌڻي ڪئي. ٻڌڻي دوران عمران خان چيو ته بني گالا ۾ تيزي سان غيرقانوني اڏاوتون ٿي رهيون آهن ان کي روڪڻو پوندو، بني گالا ۾ ناجائز قبضا آهن جنهن تي چيف جسٽس چيو ته زندگي ٻن شين پاڻي ۽ هوا تي قائم آهي، ڏسڻو پوندو ته بني گالا ۾ ٿيندڙ اڏاوتون قانون موجب آهن يا نه، جيڪي وڻ وڍجي ويا اهي ته واپس نه ٿا اچي سگهن پر نئين وڻڪاري ٿي سگهي ٿي. چيف جسٽس عمران خان کي مخاطب ٿيندي چيو ته فيصلن ۾ اختلافي نوٽ سڄي دنيا ۾ اچن ٿا پر جيترو شور هتي مچايو ويو آهي ٻئي هنڌ نه ٿو ٿئي، ملڪي نظام ۽ عدليه جي لاءِ هي وقت اهم آهي، ادارا مضبوط ٿيندا ته ملڪ اڳيان وڌندو، اسان سڀني کي گڏجي ملڪ جي تشخص لاءِ ڪم ڪرڻو پوندو، توهان عام ماڻهو نه آهيو، توهان جي آواز سان بهتري به اچي سگهي ٿي ۽ خرابي به پيدا ٿي سگهي ٿي، موجوده حالتن ۾ توهان کي اهم ۽ تعميري ڪردار ادا ڪرڻو آهي، توهان قوم کي بي اعتمادي جي فضا مان ڪڍڻ ۾ پنهنجو ڪردار ادا ڪيو. آئون توهان جي ڪپتاني ۾ ايچيسن ڪاليج ۾ ڪرڪيٽ کيڏي چڪو آهيان، مون کي اڄ به اهو شاٽ ياد آهي جيڪو توهان ايترو ته زور سان هنيو هو جو بال چرچ کان ٻاهر هليو ويو هو.  جڏهن ته سي ڊي اي ۽ آءِ سي ٽي پنهنجي رپورٽ عدالت ۾ جمع ڪرائي ۽ عدالت اها رپورٽ عمران خان جي وڪيلن کي ڏيڻ جي هدايت ڪندي راول ڊيم جي چوڌاري حددخلين بابت به رپورٽ طلب ڪري ورتي جڏهن ته عدالت چيو ته باٽنيڪل گارڊن ۽ نيشنل پارڪ ۾ ڪنهن به قسم جي ڪا واڍيءَ نه ڪئي وڃي.

 

هيري اسٽائلز گلوڪاره ٽيلر سويفٽ سان محبت جو اعتراف ڪري ورتو

لاس اينجلسي(شوبز نيوز) هالي ووڊ گلوڪاره هيري اسٽائلز گلوڪاره ٽيلر سويفٽ سان محبت جو اعتراف ڪري ورتو. آمريڪي ميڊيا موجب هالي ووڊ گلوڪاره هيري اسٽائلز تازو ئي ميڊيا تي اهو اعتراف ڪري ورتو آهي ته کيس گلوڪاره ٽيلر سويفٽ سان محبت آهي ۽ هو جلدئي ٽيلر سان مڱڻي جو پڻ اعلان ڪندو. في الحال ٻنهي جو ڌيان ڪيريئر تي آهي ٻنهي کي مختلف تفريحي هنڌن تي ۽ هوٽلن ۾ پڻ گڏ ڏٺو ويو آهي

 

اميتاڀ بچن فلم ”سرڪار 3“ جا ڪجهه سين ٻيهر شوٽ ڪرائيندو

ممبئي(شوبز نيوز) بالي ووڊ ميگا اسٽار اميتاڀ بچن فلمساز رام گوپال ورما جي نئين فلم ”سرڪار 3“ جا ڪجهه سين ٻيهر شوٽ ڪرائيندو. ڀارتي سڌ سماءَ وارن ذريعن موجب ميگا اسٽار اميتاڀ بچن چيو آهي ته فلم ”سرڪار 3“ جا ڪجهه منظر ٻيهر شوٽ ڪيا پيا وڃن ۽ هو ان حوالي سان سبب جلدي ٻُڌائيندو. هن دنيا جي سڀ کان وڏي فلم انڊسٽري کي اڳتي وڌائڻ لاءِ فلمسازي جي عمل جي دستاويزي ڪاري جي اهميت تي زور ڏنو. فلم سرڪار 3 رام گوپال ورما جي سرڪار سيريز جي ٽئين فلم آهي. فلم ۾ اميتاڀ بچن سڀاش نگري جو ڪردار ادا ڪندو. فلم ۾ يامي، گوتم، جيڪي شيروف، منوج باجپائي، امت سڌ، روهني هٿنگڙي، رونت راءِ ۽ ڀرت ڊڀولڪر شامل آهن.

 

يونس خان ٽيسٽ ڪيريئر ۾ 10 هزار رنسون ٺاهيندڙ پهريون پاڪستان بيٽسمين بڻجي ويو

لاهور(اسپورٽس نيوز) ويسٽ انڊيز خلاف پنهنجي ڪرڪيٽ ڪيريئر جي آخري ٽيسٽ سيريز کيڏندڙ پاڪستان جو مشهور بيٽسمين يونس خان ٽيسٽ ڪيريئر ۾ 10 هزار رنسون ٺاهيندڙ پهريون پاڪستان بيٽسمين بڻجي ويو. ويسٽ انڊيز خلاف جميڪا ٽيسٽ دوران يونس خان 10 هزار رنسن جو سنگ ميل پار ڪري ورتو. ميچ کان اڳ يونس خان کي اعزاز حاصل ڪرڻ لاءِ 23 رنسون گهربل هيون جنهن ۾ هن محتاط انداز ۾ کيڏندي نه رڳو ٽيسٽ ڪيريئر ۾ 10 هزار رنسون مڪمل ڪيون پر پاڪستان جو پهريون ڪرڪيٽر پڻ بڻجي ويو. يونس خان 116 ٽيسٽ ميچن ۾ 34 سينچرين ۽ 33 اڌ سينچريون ٺاهي 52.39 جي شرح سان 10 هزار رنسون مڪمل ڪري ورتيون. يونس خان ٽيسٽ ڪرڪيٽ ۾ 9 وڪيٽون پڻ حاصل ڪري چڪو آهي. واضح رهي ته يونس خان تي ساٿي ڪرڪيٽر دٻاءُ وجهي رهيا آهن ته هو ٽيسٽ تان رٽائرڊ نه ٿئي ۽ وڌيڪ هڪ يا ٻه سال ملڪ جي خدمت ڪري.