تازيون خبرون

Daily Archives: April 21, 2017

ڇا نورين لغاري واقعو سنڌ ۾ انتهاپسندي جي تصديق آهي…….!!: اشرف نوناري

سنڌ دنيا جو اهو واحد خطو آهي جيڪو صدين کان مذهبي انتهاپسندي، فرقيواريت ۽ لساني دهشتگردي سميت هر قسم جي تعصب پرستي خلاف مسلسل جهيڙيندو پيو اچي، اسان سنڌي هميشه ان خوشفهمي ۾ رهندي سالن کان ائين چوندا پيا اچون ته اسان سچل، سامي ۽ شاهه عبداللطيف ڀٽائي جي صوفي ازم واري فڪر ۽ فلسفي جا وارث آهيون ۽  سنڌ اندر ڪنهن به صورت ۾ مذهبي انتها پسندي جي ڪابه گنجائش ناهي پر حقيقت ان جي ابتڙ آهي جو سنڌ جي نياڻي نورين لغاري جي دارالخلافت پهچڻ کان ويندي عيسائين جي مذهبي ڏينهن ايسٽر تي خودڪش حملو ڪرڻ واري اعتراف سنڌ جي صوفي ازم واري دعويٰ کي رد ڪندي تصديق ڪري ڇڏي ته سنڌ هن وقت مذهبي انتها پسندن جي لپيٽ ۾ اچي وئي آهي، سنڌ جا ماڻهو باغين سان شامون ملهائڻ، سنڌ فيسٽيول، لاهوتي، صوفي ۽ ثقافتي ميلا ملهائڻ ۾ پورا آهن پر ان باوجود سنڌ اندر مذهبي انتهاپسندي تيزي سان وڌندي پئي وڃي ڇاڪاڻ جو اڄ جڏهن نورين لغاري وارو معاملو سامهون آيو آهي ته ڄڻ پيرن هيٺان زمين نڪري وئي هجي، ڇنڇر 15- اپريل تي لاهور جي پنجاب هائوسنگ سوسائٽي واري علائقي مان نورين لغاري جي بازياب ٿيڻ، سندس دهشتگرد مڙس محمد علي طارق جي مارجڻ، داعش پنجاب جي امير ۽ ڪمانڊر عظيم عرف ابو فوجي جي فرار ٿيڻ  ۽ لاهور ۾ دهشتگردي جي ڪوشش کي ناڪام بڻائڻ هڪ وڏو تاريخي الميو آهي، انهي واقعي جي ٻن ڏينهن کانپوءِ سومر 17- اپريل تي پاڪ فوج جي ترجمان ميجر جنرل آصف غفور  پريس بريفنگ ڏني جنهن جي ٽن ڪلاڪن کانپوءِ ساڳئي ڏهاڙي لمس يونيورسٽي ڄامشوري ۾ نورين واري معاملي تي ڪوٺايل گڏجاڻي کانپوءِ لمس جي وائيس چانسلر پروفيسر نوشاد احمد شيخ وضاحت ڪندي چيو ته لمس جي استادن، آفيسرن، ملازمن، شاگردن توڙي شاگردياڻين جو مذهبي دهشتگرد تنظيم داعش سان ڪوبه تعلق ناهي، نورين لغاري جيڪو ڪجهه ڪيو اهو سندس ذاتي عمل هو،

نورين لغاري جي انهي عمل جو لمس يونيورسٽي سان ڪو تعلق ناهي، نه ئي لمس ۾ داعش جو ڪو وجود آهي ، جڏهن ته ان گڏجاڻي  ۾ نورين واري معاملي تي ڪاميٽي جوڙي وئي ان جي رپورٽ اچڻ کان اڳ  ئي لمس يونيورسٽي جي وي سي لمس ۾ داعش جو وجود نه هجڻ  جي اکيون ٻوٽي تصديق ڪري ڇڏي، دولت اسلاميه عراق شام (داعش) جيڪا عرب ملڪن سان تعلق رکندڙ دنيا جي خوفناڪ مذهبي دهشتگرد تنظيم آهي  جنهن دنيا جي امن ۽ سلامتي کي خطري ۾ وجهي ڇڏيو آهي، داعش شام، عراق، لبيا، يمن، افغانستان کانپوءِ دنيا جي ٻين ملڪن سان گڏو گڏ پاڪستان ۾ پڻ پنهنجا پير مضبوطي سان کوڙي ڇڏيا آهن، القائده، طالبان، ٽي ٽي پي، سجنا گروپ ۽  جيش محمد سميت ڪيترين ئي مذهبي انتها پسند تنظيمن پنهنجي وجود کي ديني مدرسن کان ظاهر ڪرايو جنهن لاءِ سنڌ جي لبرل ۽ سيڪيولر سوچ رکندڙ سنڌين مطالبا ڪيا ته مدرسا انتها پسندي ۾ ملوث آهن ان لاءِ مدرسا بند ڪيا وڃن پر ڪيڏي نه حيرت جي ڳالهه آهي ته داعش جهڙي خطرناڪ تنظيم صوفين جي سر زمين ڄامشوري جهڙي سيڪيولر سوچ رکندڙ شهر جي مادر علمي مان پنهنجو وجود ظاهر ڪرايو اهو به  اهڙو جو سنڌ ڄائي نورين لغاري نه رڳو  خلافت جي شهر پهچڻ تي پنهنجي خاندان کي خوشخبري وارا ميسيج ڪيا، نورين لغاري 10 فيبروري تي لياقت يونيورسٽي مان گم ٿي، 25 فيبروري ۾ سندس گمشدگي جو ڪيس داخل ٿيو، انهي دوران ڊي آءِ جي حيدرآباد ۽ ايس ايس پي حيدرآباد پريس ڪانفرنس ڪندي چيو هو ته نورين جو لاڙو مذهبي جنونيت طرف هو، امڪان آهي ته هن داعش ۾ شموليت اختيار ڪئي آهي،

سن 2015 ع ۾ افغانستان ۾ داعش جي موجودگي ۽ وڌندڙ سرگرمين کانپوءِ ان وقت جي سنڌ جي انتظامي سربراهه آءِ جي سنڌ پوليس غلام حيدر جمالي جي حوالي سان پرنٽ توڙي اليڪٽرانڪ ميڊيا ۾ هڪ خبر شايع توڙي نشر ٿي، جنهن ۾ سنڌ پوليس جي ڪائونٽر ٽيررزم ڊپارٽمينٽ طرفان سنڌ ۾ داعش جي نيٽ ورڪ جي تصديق ڪندي داعش سان تعلق رکندڙ 53 دهشتگردن جي  لسٽ جاري ڪئي وئي، رپورٽن موجب عبدالله يوسف عرف عبدالعزيز عرف ثاقب جي سربراهي ۾ سنڌ ۾ داعش جو نيٽ ورڪ ڪم ڪري رهيو آهي، جنهن جي فنڊنگ سعودي عرب مان ٿئي ٿي  انهي رپورٽ ۾ ڪراچي سان واسطو رکندڙ طيب ۽ علي رحمان انجنيئر  پڻ ان گروپ ۾ شامل آهن، جنهن جو واسطو ڪوٽڙي سان ٻڌايو ويو هو،  اهڙي انڪشاف ۽ داعش جي موجودگي جي تصديق ان وقت ئي سنڌ جي پرامن ۽ سيڪيولر سوچ رکندڙ عوام کي لوڏي ڇڏيو هو ڇو جو داعش جي سنڌ ۾ موجودگي نه رڳو ملڪ پر دنيا جي امن ۽ سلامتي لاءِ وڏو خطرو بڻيل آهي،  سنڌ پوليس جي سنڌ ۾ داعش جي موجودگي واري بيان کانپوءِ  سنڌ پوليس جي ترجمان داعش بابت ٽي وي چئنلن جي رپورٽن ۽ اخباري بيانن کي رد ڪندي ترديد ڪئي ته سنڌ پوليس  سنڌ ۾ داعش جي موجودگي ۽ 53 داعش ڪارڪنن جي ڪا به لسٽ جاري ناهي ڪئي، جڏهن ته ساڳئي  ڏينهن 14 آڪٽوبر 2015  اربع واري شام  وفاقي گهرو وزير چوڌري نثار  علي خان پاران پنجاب  هائوس ۾ ڪيل پريس ڪانفرنس دوران هڪ سوال جي جواب ۾ چيو  ته پاڪستان ۾ داعش جو ڪو به وجود ناهي، هن اعتراف ڪندي چيو ته پاڪستان ۾ 40 کان وڌيڪ مقامي ۽ بين الاقوامي دهشتگرد گروپ موجود آهن، انهن مان ڪنهن به هڪ جو داعش سان رابطو ٿي سگهي ٿو، يا ته ٻيون مذهبي وڙهاڪ تنظيمون داعش جو نالو استعمال ڪري سگهن ٿيون پر پاڪستان ۾ داعش جي موجودگي جا ڪي به اطلاع ناهن، جهڙي طرح 2015ع  ۾ آءِ جي سنڌ سنڌ ۾ داعش جي موجودگي جي تصديق ڪندي داعش جي سهولتڪارن جي لسٽ جاري ڪئي ان بعد بنا ڪنهن جاچ جي وفاقي گهرو  وزير ترديد ڪئي،  اهڙي طرح لمس يونيورسٽي جي وي سي پڻ بنا ڪنهن جاچ جي پنهنجي جان ڇڏائڻ لاءِ لمس ۾ داعش جي موجودگي کي پير ٻڌي رد ڪري ڇڏيو، جڏهن ته نورين ڪيس جي جاچ آفيسر ايس ايس پي حيدرآباد عرفان بلوچ جو چوڻ آهي ته نورين  لمس يونيورسٽي ۾ مذهبي انتهاپسندي جي تبليغ ڪندي ساهيڙين کي پاڻ جهڙو بڻائڻ جي ڪوشش ڪندي رهي، هن پنهنجين ساهيڙين کي  جهادين سان رابطي جو ٻڌائڻ سميت اهو پڻ چيو ته هوءَ به جهاد ڪرڻ چاهي ٿي،

نورين لغاري جا اهڙا انڪشاف توڙي ميڊيا ۾ آيل خبرون سنڌ ۾ مذهبي انتهاپسندي ۽ دهشتگرد تنظيم داعش جي موجودگي جي تصديق ڪن ٿيون، نورين لغاري جي اهڙي انتهاپسند سوچ توڙي مشعال خان جي انتهائي بيدردي سان ٿيل قتل واري واقعي مان ظاهر ٿو ٿئي ته ملڪ جي اعليٰ تعليمي ادارن کي داعش جي سوچ شڪست ڏئي رهي آهي، مدرسن ۾ پڙهندڙ خطابين کانپوءِ اعليٰ  تعليمي ادارن جي سيڪيولر سوچ رکندڙ نوجوانن کي انتها پسند سوچ يرغمال بڻائي رهي آهي، دنيا پئي چيو ته داعش کي ڪٿي به خلافت قائم ڪرڻ نه ڏينداسين پر داعش ته صوفين جي سرزمين  سنڌ جي ڄائي  پڙهيل لکيل خاندان  سان تعلق رکندڙ نورين لغاري جهڙي ڇوڪري جي ذهن ۾ پنهنجي خلافت قائم ڪري ڇڏي آهي، جيڪڏهن اسان کي داعش سميت جيڪي به مذهبي انتهاپسند تنظيمن جي وجود کي پاڙ کان ختم ڪرڻو آهي ته پوءِ اسان پنهنجن تعليمي ادارن توڙي گهرن ۾ انتهاپسند سوچ رکندڙ ڇوڪرن توڙي ڇوڪرين مٿان ڪرڙي نظر رکڻي پوندي، جڏهن ته تعليمي ادارن ۾ هولي توڙي ٻين ڏڻن سميت ثقافتي تهوار ملهائڻ جي اجازت ڏيڻي پوندي ۽ قانون لاڳو ڪندڙن جو ڪردار بهتر ۽ شاگرد دوست بڻائڻو پوندو، جڏهن ته سنڌ جي تعليمي ادارن توڙي درسگاهن مان بنيادپرستي ۽ انتهاپسندي جي رستاروڪ ڪرڻ لاءِ رياستي ادارن ۽ انتظاميه کي پنهنجو ڀرپور ڪردار ادا ڪرڻو پوندو،  سيڪيولر ۽ لبرل سوچ رکندڙ شاگرد تنظيمن کي پنهنجيون سرگرميون شروع ڪرڻ جي اجازت پڻ  ڏيڻي پوندي ته جيئن انتهاپسندانا سوچ کي شڪست  ڏئي سگهجي.

sntmediacellsindh@gmail.com

 

بجلي جو بحران ۽ احتجاج جو فيصلو: صاحب خان ڀٽي

گذريل ڪيتري عرصي کان سنڌ ۾ بجلي جي لوڊشيڊنگ خلاف احتجاج جو سلسلو ٿي رهيوآهي پر صوبائي حڪومت توڙي وفاقي حڪومت بجلي جي اڻاعلانيل لوڊشيڊنگ خلاف اڄ تائين ڪو به نوٽيس نه ورتو آهي ۽ نه بجلي جي بحران جي خاتمي لاءِ ڪي قدم کنيا ويا آهن، پاڻي ۽ بجلي واري وفاقي وزير خواجا آصف بجلي جي بحران جو اعتراف ڪندي چيو آهي ته ڪجهه پلانٽس مرمتي ڪم سبب بند آهن جنهن سبب بجلي جو بحران پيدا ٿيو آهي، اهو ۽ بحران ڪجهه ڏينهن رهي سگهي پر هو ان بحران کي ختم ڪرڻ لاءِ ڪوششون ڪري رهيا آهن، قومي اسيمبلي ۾ مخالف ڌر جي اڳواڻ خورشيد شاهه به بجلي جي بحران جي خاتمي لاءِ قومي اسيمبلي ۾ آواز اٿاريو هو، پر وفاقي سرڪار اڃا به ان ڳالهه تي پير ڄمائي بيٺل آهي ته سنڌ اندر بجلي چوري ٿي رهي آهي، اهو ڪو پهريون ڀيرو نه ٿيو آهي جو وفاقي سنڌ تي اهڙا الزام لڳايا ويا هجن اڳ به اهڙا لفظ استعمال ڪيا ويندا آهن، هن وقت سنڌ ۾ بجلي جو بحران شدت اختيار ڪري ويو آهي، هڪ طرف گرمي آهي ته مٿان وري بجلي جي لوڊيشيڊنگ ۾ اضافو ڪيو ويو آهي، جنهن سبب ماڻهو ٻٽي عذاب ۾ مبتلا ٿي ويا آهن،

هونءَ ته نواز ليگ سرڪار چار سال کان مٿي اقتدار ۾ رهندي صرف اهي ئي دعوائون ڪندي رهي آهي ته هون بجلي جي لوڊشيدنگ جو خاتمو آڻي ڇڏيندا پر هن وقت تائين بجلي جي بحران ته ضابطو نه اچي سگهيو، هونءَ ته اسان جي ملڪ کي قدرت معدني وسيلن سان مالا مال ڪيو آهي پر افسوس جو  انهن قدرستي وسيلن کي استعمال ڪرڻ لاءِ حڪومت ڪي به خاص قدم نه کنيا آهن، هونءَ ته اسان اعلان ته روز ٻڌندا آهيون ته سنڌ مان نڪرندڙ ڪوئلي سان بجلي پيدا ڪئي ويندي پر هن وقت تائين نه ته  بجلي پيدا ٿي سگهي آهي ۽ نه ئي وري بجلي جي لوڊشيڊنگ جو خاتمو اچي سگهيوآهي، ڪجهه وفاقي وزير ته صرف بجلي جي لوڊشيڊنگ جو سبب ڊيمن کي قرار ڏئي رهيا آهن، جن جو چوڻ آهي جيڪڏهن ڊيم هجن ها ته بجلي جي لوڊشيڊنگ نه ٿئي ها، جيڪڏهن ڏٺو وڃي ته هن ملڪ مان گيس ۽ ڪوئلو نڪري رهيو آهي پر ان باوجود صرف اهو چوڻ ته ڊيم هجڻ ڪري بجلي جو بحران ٿيو آهي، اهو سمجهه کان ٻاهر آهي، جيڪڏهن وفاقي سرڪارڪوئلي مان بجلي پيدا تيار ڪري ها ته اڄ هن ملڪ اندر بجلي جو بحران پيدا نه ٿئي ها ۽ نه اڄ هن ملڪ جو عوام سخت گرمي ۾ پريشان ٿئي ها.

پيپلزپارٽي به ڪڏهن به بجلي جي بحران خلاف ايوان ڀرپور نموني آواز نه اٿاريو آهي پر هڪ ٻه ڏينهن اڳ پ پ چيئرمين بلاول ڀٽو زرداري ملڪل اندر وڌندڙ لوڊشيڊنگ کي ڏسندي سڄي ملڪ ۾ احتجاج جو فيصلو ڪيو ۽ ڪارڪنن کي سڄي ملڪ ۾ بجلي جي اڻ اعلانيل لوڊشيدنگ خلاف احتجاج جي هدايت ڪئي  هئي، ان سان گڏوگڏ وزيراعظم نوازشريف جي صدارت هيٺ وفاقي ڪابينا جي توانائي ڪميٽي جو اجلاس به ٿيو هو، جنهن دوران وزيراعظم نوازشريف عملدارن تي ڪاوڙ جو اظهار به ڪيو هو، ايتري قدر جو وزيراعظم نوازشريف بجلي جي لوڊشيڊنگ گهٽائڻ لاءِ سمورا وسيلا ڪتب آڻڻ جي هدايت به جاري ڪئي هئي پر افسوس جي هن وقت تائين بجلي جي اڻ اعلانيل لوڊشيڊنگ جو سلسلو ختم نه ٿي سگهي آهي، پاڻي ۽ بجلي بابت مملڪتي وزير عابد شير علي ته سنڌ تي بجلي جي چوري جو الزام لڳائيندو رهيو آهي، ايتري قدر جو هن اڳوڻي صلاحڪار مولا بخش چانڊي کي بخش نه ڪيو هو ۽ ان خلاف به بيان ڏنو هو ته جيڪڏهن مولابخش به بجلي چوري ڪندو ته ان جي بجلي ڪاٽي ويندي، بهرحال هن وقت بجلي جو بحران سڄي ملڪ ۾ سنگين ٿي  ويو آهي، جنهن سبب ماڻهو پريشان ٿي ويا آهن،

مملڪتي وزير عابد شير علي پنهنجي بيانن ۾ چئي رهيو آهي ته انهن علائقن ۾ بجلي جي لوڊشيڊنگ وڌيڪ ڪئي پئي وڃي جتي بجلي جي چوري تمام وڌيڪ ٿي رهي آهي،  عابد شير علي ته سنڌ تي بجلي جي چوري جو الزام به لڳائيندو رهيو آهي، جهن جي جواب  قومي اسيمبلي ۾ مخالف ڌر جي اڳواڻ خورشيد شاهه چيو هو ته بجلي جي چوري پنجاب ۾ ٿي رهي آهي بس فرق ايترو آهي ته اهي ماڻهو وائکا نه ٿي رهيا آهن، هونءَ ته وفاقي حڪومت بجلي جي بحران جي خاتمي جون وڏيون وڏيون دعوائون ڪري رهي آهي پر افسوس جو سنڌ جا ڪيترائي علائقا هن وقت به بجلي جي سهولت کان محروم بڻيل آهن، ڪجهه عرصو اڳ اهو چيو ويو هو ته جن ڳوٺن ۾ بجلي نه آهي، انهن ڳوٺن ۾ بجلي فراهم ڪئي پئي ويندي پر انهن علائقن ۾ بجلي  ته نه پهچي سگهي پر ايترو ضرور ٿيو جو ڪيترن ئي علائقن ۾ بجلي جون رهتون ڄاڻائي انهن جا ڪنيڪشن ئي ڪاٽيا ويا هئا، هن وقت به سنڌ جا ڪيترائي اهڙا شهر آهن جتي بجلي جي فراهم نه ٿيڻ برابر آهي، جن علائقن ۾ بجلي فراهم ڪئي پئي وڃي انهن علائقن اندر  ٽرانسفر به سڙيل آهن، جيڪي تبديل نه پيا ڪيا وڃن، جنهن سبب رهواسي مجبور ٿي احتجاج ڪندا رهيا آهن ۽ اهڙيون خبرون روز ڪنهن نه ڪنهن اخبار ۾ ڇپجنديون رهيون آهن، هن وقت به ملڪ اندر بجلي جي صورتحال بهتر نه آهي، هڪ طرف قهر جي گرمي  آهي ته مٿان وري بجلي جي لوڊشيڊنگ به وڌيڪ ٿي رهي آهي پر حڪومت اهڙو ڪو به قدم نه کڻي رهي آهي جنهن سان بجلي جو بحران جو خاتمي اچي سگهي، هن وقت خاص طور تي سنڌ جي ٻهراڙين علائقن ۾ بجلي جي لوڊشيڊنگ جي وقت ۾ واڌ ڪئي وئي آهي، ڳوٺاڻا احتجاج به رڪارڊ ڪرائي رهيا آهن پر حڪومت انهن جي احتجاج تي ڪو به ڌيان نه ڏئي رهي آهي، جنهن سبب هڪ ته بجلي جي لوڊشيڊنگ ته مٿان وري گرمي جي لهر شهرين جا حال بي حال ڪري ڇڏيا آهن،

موسميات کاتي طرفان به موسم گرم رهڻ جو امڪان ظاهر ڪيو ويو هو  پر ان باوجود بجلي جي لوڊشيڊنگ جو وقت گهٽائڻ لاءِ صوبائي توڙي وفاقي حڪومت ڪو به عملي قدم نه کڻي سگهي آهي، هڪ ته سنڌ جي ٻهراڙين ۾ سخت گرمي آهي ته مٿان وري بجلي جي بحران سبب منجهند جي وقت بجلي جي بندش کي به منهن ڏيڻو پئي ٿو. هاڻ جڏهن ملڪ اندر بجلي جو بحران وڌي ويو آهي ته تڏهن بلاول ڀٽو زرداري به سڄي ملڪ ۾ بجلي جي لوڊشيڊنگ خلاف احتجاج جو سلسلو ڪرڻ جو اعلان ڪيو آهي جنهن بعد لڳي رهيو آهي ته هن سخت گرمي جي موسم ۾ وفاقي حڪومت بجلي جي لوڊشيڊنگ جي خاتمي لاءِ ڪو نه ڪو قدم ضرور کڻندي،  جيڪڏهن هن وقت به بجلي جي بحران جي خاتمي لاءِ ڪي خاص قدم نه کنيا ويا ته بجلي جو بحران اڃا وڌيڪ ٿي سگهي ٿو،ان جي لاءِ  حڪومت کي وڌيڪ پلانٽس قائم ڪري بجلي جي بحران تي جلد ضابطو آڻڻو پوندو، باقي رهي ڳالهه بجلي جي چوري جي ته بجلي صرف سنڌ نه سڄي ملڪ ۾ چوري ٿي رهي آهي ۽ اهڙو بيان قومي اسيمبلي ۾ مخالف ڌر جي اڳواڻ خورشيد شاهه به ڏنو آهي، هاڻ ڏسڻو اهو آهي ته نوازليگ سرڪار  ڪهڙي ريت بجلي جي بحران کي منهن ٿي ڏئي.

sahibalisindhi@gmail.com

 

 

پانامه ليڪس تي جي آءِ ٽي جوڙڻ جو حڪم..!

ڪالهه ملڪ جي اهم ترين ڪيس جو فيصلو سپريم ڪورٽ آف پاڪستان  جاري ڪري ڇڏيو جنهن ۾ پاناما ليڪس جي جاچ لاءِ جي آءِ ٽي جوڙڻ جو حڪم ڏنو ويو آهي، جي آءِ ٽي ۾ ايم آءِ، ايف آءِ اي، ايس اي سي ٽي جا نمائندا شامل هوندا، جي آءِ ٽي 60 ڏينهن ۾ جاچ مڪمل ڪندي، سپريم ڪورٽ روم نمبر هڪ ۾ بينچ جي سربراهه جسٽس آصف سعيد کوسي پاناما ڪيس جو 540 صفحن تي ٻڌل پهريان کان محفوظ ٿيل فيصلو پڙهي ٻڌايو، اهو فيصلو جسٽس اعجاز افضل خان لکيو، بينچ ۾ شامل 5 مان 2 ججن جسٽس آصف سعيد کوسي ۽ جسٽس گلزار احمد وزيراعظم کي ڊي نوٽيفائي ڪرڻ جو چيو، وڌيڪ 3 ججن معاملي جي جاچ جو اظهار ڪيو، قانون موجب 3 ججن جي فيصلي تي عمل ٿيندو، فيصلي جي شروعاتي نقطن ۾ چيو ويو ته رقم ڪيئن قطر منتقل ڪئي وئي ان جي جاچ ٿيڻ گهرجي، اهو به ٻڌايو ويو ته نيب جو چيئرمين راضي نه ڏٺو ويو ان جي جاچ ٿيڻ گهرجي، نيب جي چيئرمين پنهنجو ڪم ڪرڻ ۾ ناڪام رهيو، ان لاءِ جي آءِ ٽي جوڙي وئي، وزيراعظم نواز شريف ۽ ان جو خاندان حسن ۽ حسين نواز کي جي آءِ ٽي جي اڳيان پيش ٿيڻ جو حڪم ڏيندي هدايت ڪئي وئي ته جي آءِ ٽي هر هفتي کانپوءِ سپريم ڪورٽ بينچ اڳيان پنهنجي رپورٽ پيش ڪري،

پرڏيهي خابرو اداري موجب چيف جسٽس ان رپورٽ جي روشني ۾ هڪ جدا بينچ جوڙيندو، گڏيل جاچ ٽيم ۾ ايف آءِ اي جو هڪ نمائندو هوندو جيڪو ايڊيشنل ڊائريڪٽر جي عهدي کان گهٽ نه هوندو، انکانسواءِ هڪ هڪ نمائندو نيب، سيڪيورٽي ۽ ايڪسچينج ڪميشن ۽ اسٽيٽ بينڪ مان هوندو، آءِ ايس آءِ ۽ ايم آءِ مان به 2 تجربي وارا آفيسر ان ڪميٽي ۾ شامل هوندا، سمورن نمائندن کي ان جي ادارن جا سربراهه نامزد ڪندا، ان ادارن جا سربراهه 7 ڏينهن ۾ نمائندن جا نالا بينچ اڳيان جمع ڪرائين، سپريم ڪورٽ فيصلي ۾ چيو ته ڊي جي ايف آءِ اي وائيٽ ڪالر ڪرائيم جي جاچ ۾ ناڪام رهي آهي، ياد رهي ته جسٽس آصف سعيد کوسي، جسٽس عظمت سعيد شيخ، جسٽس اعجاز افضل، جسٽس گلزار احمد ۽ جسٽس اعجاز الحسن تي ٻڌل 5 ميمبرن واري بينچ روز جي بنياد تي ٻڌڻي کانپوءِ پاناما ڪيس جو فيصلو 23 فيبروري تي محفوظ ڪيو هو.

پاناما ڪيس جي فيصلي تي اڳوڻي چيف جسٽس افتخار چوڌري نجي ٽي وي کي خاص انٽرويو ڏيندي چيو آهي ته پنجن مان ٻن ججن وزيراعظم کي نااهل قرار ڏئي ڇڏيو آهي جڏهن ته باقي ٽن ججن به وڌيڪ تحقيق جو چيو آهي اهڙي طرح ڏٺو وڃي ته نواز شريف حڪمراني ڪرڻ جو اخلاقي جواب وڃائي ويٺو آهي. معزز عدالت ان طرف به ڌيان ڇڪايو آهي ته نواز شريف تقرير ۾ قطري خط، سرمائيڪاري جو ذڪر ناهي ڪيو ۽ بعد ۾ اهي شيون به ثبوت طور پيش ڪيون ويون اهڙي طرح نواز شريف عوام سان ڪوڙ ڳالهايو، اهو ئي سبب آهي ته پاناما ڪيس جي فيصلي ۾ لکيو ويو آهي ته ان غلط بيان ڪئي آهي ۽ قوم سان ڪوڙ ڳالهايو آهي جنهن تي تحقيق جي آءِ ٽي ۾ موڪلڻ جو حڪم ڏنو ويو آهي ته جيئن تفصيلي تحقيق سامهون اچي سگهي، انهن معنائن ۾ ڏٺو وڃي ته معزز عدالت جو فيصلو وزيراعظم خلاف آهي پر فيصلي کان پوءِ حڪمران جماعت مٺائي ڪهڙي ڳالهه تي ورهائي رهي آهي ان تي مونکي گهڻي حيرانگي ٿي رهي آهي. وزيراعظم جي آءِ ٽي اڳيان به ڏوهاري طور بيٺل هوندو ۽ ان کان پهريان ڪڏهن ايئن ناهي ٿيو ته وزيراعظم کي جي آءِ ٽي اڳيان پيش ٿيڻو پيو هجي، جي آءِ ٽي ۾ نالي وارو ڏوهاري بيٺل هوندا آهن جيئن اجمل پهاڙي ۽ ڪامران ماڌوري وغيره جن سئو سئو قتل ڪيا هوندا آهن ان لاءِ وزيراعظم کي سوچڻ گهرجي ته هاڻي اهو ڪهڙن ڏوهارين سان بيٺل آهي.