تازيون خبرون

Daily Archives: April 21, 2017

مختلف سياسي، اقتصادي ۽ ثقافتي پسمنظر رکندڙ عورتون ملڪ جي ترقي لاءِ ڪوششون استعمال ۾ آڻين: صدر

اسلام آباد(ويب ڊيسڪ) صدر ممنون حسين مختلف سياسي، اقتصادي ۽ ثقافتي پس منظر رکندڙ عورتن تي زور ڏنو آهي ته هو هر قسم جي خدشن ۽ پريشاني کي نظرانداز ڪندي ملڪ جي ترقي ۽ خوشحالي لاءِ پنهنجون ڪوششون استعمال ۾ آڻين. هن اها ڳالهه بينظير انڪم سپورٽ پروگرام (بي آءِ ايس پي) جي تيار ڪيل ڪتاب ”بي آءِ ايس پي جون ڪهاڻيون“ جي مهورتي تقريب کي خطاب ڪندي چئي. هي ڪتاب سڄي ملڪ مان ۱۴٦ عورتن جي ڪهاڻين تي ٻڌل آهي جيڪو بي آءِ ايس پي طرفان ملندڙ وظيفن سبب انتهائي غريب عورتن ۽ خاندانن جي زندگين ۾ مثبت اثرن جي عڪاسي ڪري ٿو. هي ڪتاب پاڪستان ۾ سماجي تحفظ جي سڀني کان وڏي انقلاب جو آئينو آهي جنهن جي ڪري انهن عورتن کي عزت ۽ معاشي تحفظ مليو. هي ڪهاڻيون ۱۸ علائقائي ٻولين ۾ لکيون ويون ۽ انهن جو مقامي ۽ بين الاقوامي ماڻهن لاءِ اردو ۽ انگريزي ۾ به ترجمو ڪيو ويو. تقريب ۾ بي آءِ ايس پي جي چيئرپرسن ماروي ميمڻ، مذهبي معاملن واري مملڪتي وزير پير امين الحسنات، پارليامينٽ جي ميمبرن، بي آءِ ايس پي جي سيڪريٽري ۽ ترقياتي پارٽنرز سميت سول سوسائٽي جي نمائندن به شرڪت ڪئي. صدر چيو ته عورتون پاڪستان جي آبادي جو تقريبن اڌ حصو آهن، معاشري جي سمورن طبقن کي برابر ۽ تيز ترقي لاءِ پنهنجي ترجيحن، مفادن ۽ مهارت موجب پنهنجو ڪردار ادا ڪرڻ گهرجي ته جيئن ملڪ جي انساني ۽ مادي وسيلا ضايع نه ٿين. صدر چيو ته هي ڪتاب ماڻهن کي پاڪستان ۾ غربت ۾ گهٽتائي لاءِ بي آءِ ايس پي جي ڪوششن ۽ فائدو حاصل ڪندڙ عورتن جي احساسن ۽ تجربن جي باري ۾ آگاهي فراهم ڪندو، هن بينظير انڪم سپورٽ پروگرام جي چيئرپرسن ماروي ميمڻ کي مبارڪباد ڏيندي چيو ته ڪاميابي جا هي داستان وڏي اهميت رکندڙ آهن جنهن سان ٻين عورتن کي معاشي طور تي مستحڪم ۽ خودمختيار ٿيڻ ۾ مدد ملندي. صدر چيو ته هي ڪتاب شايد گهٽ خواندگي جي شرح کي نظر ۾ رکندي غريب، پوئتي پيل ۽ اڻپڙهيل طبقن ۾ گهربل مقصد حاصل ڪرڻ ۾ وڌيڪ لاڀائتو نه ٿئي ان لاءِ ضروري آهي ته ان حقيقي ڪهاڻين جي ذريعي بي آءِ ايس پي جي اهميت تي زور ڏيڻ جي لاءِ ٻيا ذريعا به استعمال ۾ آڻيون. هن تجويز ڏني ته ان ڪتاب جي حقيقي ڪهاڻين جي ٿيٽر جهڙي ٻين ذريعن مان فائدو کڻندي ڊرامن جي شڪل به ڏيڻ گهرجي، جنهن سان انهن جي اثر پذيري ۾ وڌيڪ اضافو ٿيندو، هن ماروي ميمڻ کي سماجي شعبي ۾ خاص طور تي عورتن لاءِ سندس خدمتن جي اعتراف ۾ برٽس پارليامينٽ اسپيڪر ايوارڊ ملڻ تي به مبارڪباد ڏني، ان کان اڳ شروعاتي لفظن ۾ ماروي ميمڻ چيو ته هي ڪتاب هر ضلعي مان عورتن جي پنهنجي علائقائي ٻولين ۾ ڪهاڻين تي مشتمل آهي ته جيئن پيغام کي مقامي سطح تي وڌيڪ موثر انداز ۾ پهچائي سگهجي. غربت جي خاتمي جي لاءِ بي آءِ ايس پي جي ڪوششن کي اجاگر ڪندي هي ڪتاب علائقائي ٻولين جي فروغ ۽ ان پروگرام مان فائدو حاصل ڪندڙ غريب خاندانن جي پيغام کي عام ڪرڻ ۾ مددگار ٿيندو. حويلي (آزاد ڪشمير) مان اڪبر بي بي، استور مان بانو بي بي، جيڪب آباد مان شريمتي نندي، ڪوهلو بلوچستان مان جان بي بي، راولپنڊي مان سميرا بي بي ۽ نوشهره مان مغفره سميت ٦ عورتن جون ڪامياب ڪهاڻيون به تقريب ۾ ڏيکاريون ويون، انهن عورتن حاضرين سان پنهنجي تجربن جي مٽاسٽا ڪئي ته ڪهڙي طرح بي آءِ ايس پي جي مدد سان انهن جي زندگين ۾ مثبت تبديلي آئي ۽ کين مالي طور تي مستحڪم ٿيڻ ۾ مدد ملي. هن مشڪلاتن جي ور چڙهيل زندگي مان نڪرڻ ۾ بينظير انڪم سپورٽ پروگرام جي مدد تي ان جو ٿورو ادا ڪيو.

 

اخلاقي طور فيصلو وزيراعظم خلاف ئي آيو آهي: خورشيد شاهه

اسلام آباد(ويب ڊيسڪ) پيپلز پارٽي جي اڳواڻ خورشيد شاهه چيو آهي ته اخلاقي طور فيصلو وزيراعظم جي خلاف ئي آيو آهي. هن چيو ته منهنجي نظر ۾ فيصلو تمام واضح آهي، سندس چوڻ هو ته ٽي جج پنهنجي ٻن سينيئر ساٿين کان انڪاري ناهن ٿيا بس جي آءِ ٽي جو چيو آهي، مخالف ڌر اڳواڻ خورشيد شاهه چيو ته ٻن ججن واضح چيو ته نواز شريف کي نااهل قرار ڏنو وڃي.خورشيد احمد شاهه چيو آهي ته عوام جون پارليامينٽ مان اميدون آهن، خميس ڏينهن قومي اسيمبلي ۾ اعتراض واري نقطي تي هن چيو ته پارليامينٽ عوام جي اميدن، امنگن ۽ ان جي سوچ جي عڪاسي ڪندي آهي، هن چيو ته اسان کي ايوان جي اندر اها ڳالهه چوندي مسلسل ۱۰ هون ڏينهن آهي ته هن ايوان ۲۳ هين آئيني ترميم منظور ڪئي، اسان جو اهو خيال هو ته ان جو استعمال سياسي ڪارڪنن تي ٿيندو، پر اعليٰ ترين سطح تي اسان کي يقين ڏياريو ويو ته ائين نه ٿيندو، ان حوالي سان آئين ۾ تحفظ ڏنو ويو ته جنهن کي به کنيو ويندو ان کي ۲۴ ڪلاڪن اندر عدالت ۾ پيش ڪيو ويندو پر اڃا تائين حڪومت پاران کان اسان کي جواب ناهي ڏنو ويو. اسان جي کنيل ٽن ماڻهن جي حوالي سان حڪومت پاران اڃا تائين ڪو به جواب ناهي آيو، هن چيو ته فيصلا پارليامينٽ جي اندر ٿيڻ گهرجن، جيڪڏهن پارليامينٽ مستحڪم هوندي ته عوام کي عدالتن جي فيصلي جو انتظار نه ٿيندو، هن چيو ته اسان ايوان مان اڄ به سڄي ڏينهن جو بائيڪاٽ ڪريون ٿا ان سان گڏ ئي پيپلزپارٽي جا ميمبر ايوان مان واڪ آئوٽ ڪري ويا. ان موقعي تي تحريڪ انصاف جي ميمبرن انهن جو ساٿ ڏنو.

 

آرٽيڪل 147 تحت رينجرز وٽ هاڻي به اختيار آهن: مراد علي شاهه

ڪراچي(ويب ڊيسڪ) سنڌ جي وڏي وزير سيد مراد علي شاهه چيو آهي ته رينجرز جي اختيارن جو ڪوبه مسئلو ناهي، رينجرز جي معاملن ۾ هڪ ٻه ٽن جي دير ٿي آهي، هن چيو ته آرٽيڪل 147 تحت رينجرز وٽ هاڻي به اختيار آهن. ايڪسپو سينٽر ڪراچي ۾ ضياءُ الدين يونيورسٽي جي سالاني جلسي کانپوءِ ميڊيا سان ڳالهائيندي سنڌ جي وڏي وزير جو چوڻ هو ته جيڪو اسان جو آئيني حق آهي گيس جي سلسلي ۾ اهو سنڌ جي ماڻهن کي ملڻ گهرجي سنڌ 70 سيڪڙو گيس فراهم ڪندو آهي.

 

جي آءِ ٽي دهشتگردن کان تحقيق لاءِ بڻائي ويندي آهي: سراج الحق

اسلام آباد(ويب ڊيسڪ) جماعت اسلامي جي امير سراج الحق چيو آهي ته جي آءِ ٽي دهشتگردن کان تهقيق لاءِ جوڙي ويندي آهي، سپرمي ڪورٽ وزيراعظم کي ڪلين چٽ نه ڏني ان لاءِ وزيراعظم استعيفيٰ ڏي. سپريم ڪورٽ جي فيصلي کانپوءِ اسلام آباد ۾ ميڊيا سان ڳالهائيندي جماعت اسلامي جي امير چيو ته عدالتي فيصلي سان ثابت ٿيو ته ملڪ ۾ ڪرپشن ٿي رهي آهي، نواز شريف جو وڪيل عدالت کي مطمئن نه ڪري سگهيو. هن چيو ته اڪثر ڪري جي آءِ ٽي دهشتگردن کان تحقيق لاءِ بڻائي ويندي آهي، عدالت تسليم ڪيو ته ڪرپشڻ ملڪ جو سڀ کان وڏو مسئلو آهي ان لاءِ پاناما ڪيس تي به جي آءِ ٽي بڻائڻ جو حڪم جاري ٿيا. سراج الحق چيو سپريم ڪورٽ جو فيصلو ڪرپشن جي موجودگي ظاهر ڪري ٿو، ان فيصلي سان عدالت اسان جي تحريڪ تي تصديق جو ٺپو لڳائي ڇڏيو. هن چيو ته عوام کي وڏي جدوجهد لاءِ تيار رهڻ جي ضرورت آهي عوامي آپريشن کانپوءِ ئي ڪرپشن کان جند آجي ڪرائي سگهجي ٿي. جماعت اسلامي جي امير وڌيڪ چيو ته 2 ججز نواز شريف کي نااهل قرار ڏنو، هن چيو ته بهتر ٿئي ها پنج ئي جج وزيراعظم کي نااهل قرار ڏين ها، سندس چوڻ هو ته عدالتي فيصلي کانپوءِ نواز شريف کي وزيراعظم جي عهدي تان استعيفيٰ ڏيڻ گهرجي.

 

جي آءِ ٽي جي جاچ تائين نواز شريف عهدي تان اسعيفيٰ ڏئي: عمران خان

اسلام آباد(ويب ڊيسڪ) پاڪستان تحريڪ انصاف جي سربراهه عمران خان چيو آهي ته ملڪي تاريخ  ۾ اهڙو فيصلو ناهي آيو، سپريم ڪورٽ جي ججن کي ڀيٽا پيش ڪيان ٿو، جي آءِ ٽي بڻائڻ جو مقصد اهو آهي ته نواز شريف جي موقف کي رد ڪيو ويو آهي. اسلام آباد ۾ پريس ڪانفرنس ڪندي عمران خان چيو ته 2 ججن چيو ته نواز شريف صادق ۽ امين ناهي جڏهن ته پنجن ئي ججن نواز شريف جي ثبوتن کي رد ڪيو، نواز شريف کي استعيفيٰ ڏيڻ گهرجي، آئون قوم طرفان وزير اعظم کي چوان ٿو ته هو استعيفيٰ ڏئي، نواز شريف وٽ عهدي تي رهڻ جو اخلاقي جواز ناهي، نواز شريف جو عهدي تي رهڻ ان ڪري بهتر ناهي جو هن خلاف جاچ ٿيندي، جي آءِ ٽي جي جاچ تائين نواز شريف استعيفيٰ ڏئي. هن چيو ته وزير اعظم ڪرسي تي ويٺو رهيو ته جاچ اثرانداز ٿي سگهي ٿي، اهو ائين ئي آهي جيئن عزير بلوچ تي جي آءِ ٽي جاچ ڪري رهي آهي، جي آءِ ٽي جي بڻجڻ سان وڌيڪ انڪشاف ٿيندا ۽ عوام روڊن تي نه نڪري ها ته ائين ڪڏهن به نه ٿئي ها.

 

پاناما فيصلو ” پڳ ڪري پئي پر عزت بچي وئي“ واري ڳالهه آهي: مولا بخش چانڊيو

ڪراچي(ويب ڊيسڪ) پيپلز پارٽي جي اڳواڻ مولا بخش چانڊئي چيو آهي ته پاناما جو فيصلو ” پڳ ڪري پئي پر عزت بچي وئي“ واري ڳالهه آهي ڇو ته ملڪ جو وزير اعظم هاڻ ماتحت ادارن جي سامهون پيش ٿيندو. ڪراچي ۾ پيپلز پارٽي  جي سڌ سماءَ واري سيڪريٽري مولا بخش چانڊئي ڪيس جي فيصلي تي رد عمل ظاهر ڪندي چيو آهي ته سپريم ڪورٽ فيصلو ناهي ٻڌايو بلڪ ڪيس وڌيڪ هلندو. ملڪ جو زير اعظم هاڻ ماتحت ادارن جي سامهون پيش ٿيندو ان ڪري اخلاقي طور تي نواز شريف کي وزير اعظم نه رهڻ گهرجي ۽ ليگي وزير مٺايون ورهائي رهيا آهن جيڪا شرم جي ڳالهه آهي. هن وڌيڪ چيو ته جي آءِ ٽي وزير اعظم تي عدم اعتماد آهي، ٻن ججن جو نااهلي وارو نوٽ لکڻ وزير اعظم جي لاءِ شرم جي ڳالهه آهي.

 

معياري ۽ سٺيون فلمون ٺهڻ تائين عوام کي سئنيما گهرن ۾ آڻڻ تي مجبور نٿو ڪري سگهجي: حمائمه ملڪ

لاهور (شوبز نيوز) فلم اسٽار حمائما ملڪ چيو آهي ته جيستائين معياري ۽ سٺيون فلمون ٺاهي عوام کي سئنيما گهرن ۾ آڻڻ تي مجبور نٿو ڪيو وڃي، تيستائين اسان جو فلم انڊسٽريءَ کي عالمي مارڪيٽ تائين پهچڻ وارو خواب ساڀيان نه ٿيندو. پنهنجي هڪ انٽرويو ۾ حمائما ملڪ جو چوڻ هو ته پاڪستاني فلمن جي ڪاميابيءَ لاءِ عوام کي سئنيما گهرن جو رُخ ڪرڻ گهرجي، ڇو ته جيستائين ڏسندڙ ائين نه ڪندا، تيستائين فنڪارن جي محنت توڙي سيڙپڪاري جو ڪو فائدو نه ٿيندو. هن چيو ته اڄوڪين حالتن کي ڏسي پاڪستاني فلم انڊسٽريءَ جي معيار کي عالمي سطح تائين پهچائڻ ڏکيو ڪم لڳي رهيو آهي.27

 

ڪاميابي توڙي ناڪامي کي ٻه طرفي طور ڏسندي آهيان: سوناڪشي

ممبئي (شوبز نيوز) بالي ووڊ جي دبنگ گرل سوناڪشي سنها چيو آهي ته مان فلم جي ڪاميابي توڙي ناڪاميءَ کي ٻه طرفي طور ڏسندي آهيان. پنهنجي هڪ انٽرويو ۾ سوناڪشي سنها جو چوڻ هو ته جڏهن منهنجي ڪا به فلم باڪس آفيس تي ڪامياب ٿيندي آهي ته مان ان تي واويلا ناهيان ڪندي پر جيڪڏهن ڪا فلم ناڪام ٿيندي ته به مان اونداهي ڪنڊ ۾ ويهي ماتم ناهيان ڪندي. هن چيو ته پنهنجي پرورش ئي اهڙي طريقي سان ٿي آهي جو مان ڪاميابي توڙي ناڪاميءَ کي ٻه طرفي طور ڏسندي آهيان. سوناڪشي سنها چيو ته ناڪاميءَ جي مقابلي ۾ ڪاميابي ماڻهن کي وڌيڪ تباهه ڪندي آهي، تنهن ڪري غلطين تي سوچڻ بدران انهن مان سکڻ ضروري آهي.27

 

پاڪستان ۽ ويسٽ انڊيز جي ٽيمن وچ ۾ پهرين ڪرڪيت ٽيسٽ اڄ شروع ٿيندي

جميڪا (اسپورٽس نيوز) پاڪستان ۽ ويسٽ انڊيز جي ڪرڪيٽ ٽيمن وچ ۾ ٽن ٽيست ميچن جي سيريز جي پهرين ميچ (اڄ) جعمي کان سبائنا پارڪ ڪنگسٽن جميڪا ۾ شروع ٿيندي، پاڪستان ڪرڪيٽ ٽيم پريڪٽس سيشن ۾ بيٽنگ ۽ فيلڊنگ تي وڌيڪ زور ڏئي رهي آهي، پاڪستان جي ٽي -20  ۽ ون ڊي سيريز ۾ شاندار ڪارڪردگي رهي آهي، گرين شرٽس ٽي -20 سيريز 1-3 ۽ ون ڊي سيريز 1-2 تان پنهنجي نالي ڪئي، يونس خان ۽ مصباح الحق ويسٽ انڊيز خلاف سيريز کان پوءِ ٽيسٽ ڪرڪيٽ تان رٽائر ٿي ويندو، ان لاءِ هو پنهنجي بهترين ڪارڪردگي ڏيکارڻ لاءِ پراميد آهي، پاڪستان ۽ ويسٽ انڊيز جي ڪرڪيٽ ٽيمن وچ ۾ هن وقت تائين کيڏيل سيريز ۾ ٻنهي ٽيمن وچ ۾ 5-5 تانبرابري آهي، ٻنهي ٽيمن وچ ۾ ٻي ٽيسٽ 30 اپريل کان 4 مئي تائين بارباڊوس جڏهن ته ٽئين ۽ آخري ٽيسٽ 10 کان 14 مئي تائين ڊومينڪا ۾ کيڏي ويندي.

 

آسٽريلوي ڪرڪيٽ ٽيم جو هلندڙ سال بنگلاديش جي دوري جو امڪان

ڍاڪا (اسپورٽس نيوز) آسٽريلوي ڪرڪيٽ ٽيم جو هلندڙ سال بنگلاديش جي دوري جو امڪان آهي، اهو آسٽريليا جو 11 سالن کان پوءِ بنگلاديش جو پهريون دورو هوندو، آسٽريليا آخري ڀيرو 2006ع ۾ بنگلاديش  خلاف ان جي زمين تي ٽيسٽ ميچ کيڏي هئي، بنگلاديش ڪرڪيٽ بورڊ (بي سي بي) جي چيف ايگزيڪيوٽو آفيسر نظام الدين چوڌري پنهنجي بيان ۾ ٻڌايو ته اسان جي آسٽريلوي ڪرڪيٽ اختيارين سان ڳالهه ٻولهه جاري آهي ۽ معاملا قطعي ٿيڻ کان پوءِ باضابطه طور شيڊول جو اعلان ڪيو ويندو، توقع آهي ته ٻنهي ٽيمن وچ ۾ ٻن ٽيسٽ ميچن تي ٻڌل سيريز آگسٽ يا سيپٽمبر ۾ کيڏي ويندي.