تازيون خبرون

Daily Archives: April 12, 2017

پاڪ فوج هر قسم جي چيلينجز کي منهن ۽ جواب ڏيڻ جي ڀرپور صلاحيت رکي ٿي: وزير اعظم

رسالپور (اين اين آءِ) وزيراعظم محمد نواز شريف چيو آهي ته پاڪستان امن سان محبت ڪرڻ وارو ملڪ آهي، پنهنجي پاڙيسري ملڪن سان پرامن لاڳاپا چاهيون ٿا، گڏيل خوشحالي اسان جو هدف هجڻ گهرجي، جڏهن ته ملڪ جي دفاع تي ڪا به سوديبازي نه ڪئي ويندي، پاڪستاني فوج هر قسم جي چيلينجز سان منهن ڏيڻ جي صلاحيت رکي ٿي، پاڪستان ايئر فورس آپريشن ضرب عضب ۾ اهم ڪردار ادا ڪيو ۽ ان جي قيادت جي ڪوششون تعريف جوڳيون آهن، جوان پنهنجي توانائي ملڪ جي بچاءَ ۾ لڳائين، اڱاري تي پي اي ايف اصغر خان اڪيڊمي رسالپور ۾ ڪيڊيٽس جي پاسنگ آئوٽ پريڊ کي خطاب ڪندي وزيراعظم چيو ته پي اي ايف اڪيڊمي مان تربيت حاصل ڪندڙ ڪيڊيٽس مبارڪ جا حقدار آهن ۽ اڄ جو ڏينهن انهن لاءِ خاص اهميت وارو آهي، هن چيو ته گريجيوئيشن مڪمل ڪندڙ ڪيڊيٽس اڄ واري تقريب کي ڪڏهن به نه وساري سگهندا ۽ اهو وقت انهن جي زندگي ۾ ٻيهر نه ايندو، هن چيو ته اسان کي سخت محنت ڪرڻ گهرجي، هن چيو ته توهان جي ڪلهن تي وطن جي بچاءَ جي وڏي ذميواري لاڳو ٿئي ٿي ۽ ملڪ جي سلامتي ۽ تحفظ لاءِ اسان جي هيروز جون قربانيون تعريف جوڳيون آهن، هن چيو ته توهان کي قوم جي اعتماد تي پورو لهڻو پوندو، جڏهن ته هن وقت جي جديد ٽيڪنالاجي سبب توهان تي وڌيڪ اضافي ذميواري لاڳو ڪئي پئي وڃي، توهان کي پنهنجي ڪاميابي جو سفر جاري رکڻ گهرجي ته جيئن پنهنجي ڪيريئر ۾ وڌيڪ ڪاميابيون حاصل ڪري سگهو، هن چيو ته بابائي قوم قائد اعظم محمد علي جناح جي پرامن جي پاڙيسرائپ واري نظريي تحت اسان پنهنجي آزادي جو تحفظ ڪري رهيا آهيون، هن چيو ته جديد دور ۾ جنگيون صرف فوج ذريعي نه وڙهيون وينديون آهن پر ان ۾ قومن جو ڪردار انتهائي اهم آهي، هن چيو ته پاڪستان ايئر فورس ملڪ جي دفاع کي وڌيڪ مضبوط ڪرڻ لاءِ ڪم ڪري، پاڪستان دهشتگردي جي خاتمي ۽ قومي سلامتي جي لاءِ پرعزم آهي، هن چيو ته پاڪستان جي ايئر فورس آپريشن ضرب عضب ۾ اهم ڪردار ادا ڪيو، هن چيو ته پاڪستان پرامن ملڪ آهي، هن چيو ته پي اي ايف اصغر خان اڪيڊمي ۾ اعليٰ معيار جي تربيت فراهم ڪئي پئي وڃي ۽ اڄ جي اها تقريب ڪيڊيٽس جي مخلصاڻا محبت جي ثمر جو نتيجو آهي، هن اهڙي يقين جو اظهار ڪيو ته پاس ٿيندڙ ڪيڊيٽس مڪمل عزم سان ملڪ جي خدمت ڪندا. وزيراعظم محمد نواز پاسنگ آئوٽ پريڊ جو معائنو ڪيو ۽ پاس ٿيندڙ ڪيڊينٽس کي بيج هنيا، 93 ايويئيشن ڪورس ۾ بهترين ڪارڪردگي جو مظاهرو ڪرڻ تي شايان احمد ٽرافي حاصل ڪئي، ايوئيشن جي 113 ڪينڊيٽس گريجيوئيشن مڪمل ڪئي، بهترين ڪارڪردگي تي انڊر آفيسر نوشيروان علي اعزازي شمشير حاصل ڪيو، پاسنگ آئوٽ جي تقريب ۾ 137 هين جي ڊي پي، 83 هين انجنيئرنگ، 93 ايئر ڊفينس، 18 اي اينڊ ايس ڊي، ڇهين نيوي ڪميشن ۽ ٻئي لاجسٽڪ فورس جي ڪينڊيٽس شرڪت ڪئي، وزيراعظم نمبر هڪ چئمپين اسڪوارڊن کي قائد اعظم بينر به ڏنا، 93 ايوسئيشن ڪورس ۾ بهترين ڪارڪردگي تي عمران خان کي ٽرافي ڏني وئي، جڏهن ته انجنيئر جي شعبي ۾ بهترين ڪارڪردگي ڏيکاريندڙ مهرين اعظم ٽرافي ۽ ونگ انڊر آفيسر مبشر آفتاب کي به ٽرافي سان نوازيو ويو، پريڊ ۾ بچاءَ وارو وزير خواجه محمد آصف، ايئر فورس جو سربراهه چيف ايئر مارشل سهيل امان، ڪي پي ڪي جو گورنر ظفر اقبال جهڳڙا ۽ اعليٰ فوجي آفيسرن شرڪت ڪئي.

 

ڪلڀوشن ياديو پاڪستان ۾ تباهي ڦهلائي. موت جي سزا جو فيصلو درست آهي: آصف زرداري

اسلام آباد (ويب ڊيسڪ): اڳوڻي صدر آصف علي زرداري چيو آهي ته ڪلڀوشن ياديو ملڪ دشمن آهي، ان لاءِ ان جي ڦاسي جي حق ۾ آهي، منهنجي دوستن کي اغوا ڪرائڻ ۾ چوڌري نثار جو هٿ آهي، جيڪڏهن چوڌري نثار منهنجي دوستن جي اغوا معاملي ۾ بي وس آهي ته عهدو ڇڏي ڏئي، نجي ٽي وي کي انٽرويو ڏيندي اڳوڻي صدر چيو ته پيپلز پارٽي پاڪستاني شهرين کي موت جي سزا ڏيڻ خلاف آهي، پر جيڪي به ملڪ دشمن عنصر آهن، انهن کي ضرور ڦاسي ڏيڻ گهرجي، اسان پنهنجي حڪومتي دور ۾ ڪنهن پاڪستاني کي ڦاسي نه ڏني پر ملڪ دشمن عنصرن کي ڦاسيون ڏنيون ويون، هن چيو ته ڪلڀوشن ياديو پاڪستان ۾ تباهي ڦهلائي ان لاءِ ان جي موت جي سزا جو فيصلو درست آهي، ڀارتي جاسوس پاڪستان آيو ئي ڇو؟ ڀارتي جاسوس کي سزا ڏيڻ اسان جو حق آهي، پنهنجي دوستن جي گم ٿيڻ معاملي تي ڳالهائيندي اڳوڻي صدر جو چوڻ هو ته سندس دوستن کي وفاقي حڪومت اغوا ڪري رهي آهي، ۽ انهن جي اغوا ۾ گهرو وزير چوڌري نثار جو هٿ آهي، هن چيو ته چوڌري نثار منهنجي دوستن کي بازياب نٿو ڪرائي سگهي ۽ ان معاملي ۾ بي وس آهي ته عهدو ڇڏي ڏئي.

 

عوام عمران خان کي 2018 ۾ پاڪستان کان رخصت ڪندو : مريم اورنگزيب

اسلام آباد (ويب ڊيسڪ): مملڪتي وزير مريم اورنگزيب چيو آهي ته پاناما قوم جو نه اوهان جو سياسي مسئلو آهي، هن چيو ته عمران خان ڪوڙ، نااهلي، فسادي سياست سان پوري قوم جو صبر آزمائي رهيو آهي، هن چيو ته عوام عمران خان کي 2018 ۾ پاڪستان کان رخصت ڪندو، مريم اورنگزيب چيو ته عمران خان خيبر پختونخواهه جي عوام طرف رخ ڪري، پاڪستان جو عوام عمران خان کي رد ڪري چڪو آهي، عمران خان پاناما جو فيصلو سپريم ڪورٽ تي ڇڏي ڏيو، اليڪشن ڪميشن ۾ پرڏيهي فنڊن جو جواب ڏيو، جيڪڏهن چوري ناهي ڪي ته تلاشي ڏيو، سوال جو جواب گار سان نه ڏيو، مريم اورنگزيب چيو ته عمران خان صاحب آرٽيڪل 62، 63 تي پنهنجو جواب اليڪشن ڪميشن ۾ ڏيو.

 

سنڌ هاءِ ڪورٽ جو اي ڊي خواجا کي نه هٽائڻ وارو حڪم برقرار، ڪم جاري رکڻ جو حڪم

ڪراچي(ويب ڊيسڪ) سنڌ هاءِ ڪورٽ آءِ جي سنڌ اي ڊي خواجا ( الله ڏنو خواجا) کي نه هٽائڻ وارو حڪم برقرار رکندي الله ڏني خواجا کي ڪم جاري رکڻ جو حڪم ڏئي ڇڏيو آهي. سنڌ هاءِ ڪورٽ آءِ جي سنڌ کي نه هٽائڻ واري حڪم ۾ 13 اپريل تائين جي واڌ ڪندي آءِ جي سنڌ کي ڪم جاري رکڻ جي هدايت ڪئي آهي، سنڌ هاءِ ڪورٽ ۾ آءِ جي سنڌ کي هٽائڻ بابت ڪيس جي ٻڌڻي ٿي جنهن ۾ عدالت ايڊوڪيٽ جنرل کان سوال ڪيو ته آءِ جي جي مقرر جو طريقيڪار ڇا آهي، عدالت ايڊووڪيٽ جنرل سنڌ کان آءِ جي مقرري بابت وڌيڪ تفصيل طلب ڪندي وفاق ۽ صوبائي حڪومت وچ ۾ ان معاملي بابت ايندڙ ٻڌڻي تي قانون پيش ڪرڻ جو حڪم ڏئي ڇڏيو آهي. عدالت ڪيس جي وڌيڪ ٻڌڻي 13 اپريل تائين ملتوي ڪري ڇڏي آهي.

 

آرمي ايڪٽ تحت جاسوس کي اهڙي ئي سزا ملندي جيڪا ڪلڀوشن کي ڏني پئي وڃي: خورشيد شاهه

اسلام آباد  (اين اين آءِ) قومي سيمبلي ۾ مخالف ڌر اڳواڻ سيد خورشيد شاهه چيو آهي ته وزيراعظم ڪل ڀوشن ياديو جي معاملي تي پارليامينٽ کي اعتماد ۾ نه ورتو، حڪومت دنيا کي ٻڌائي ته پاڪستان قانوني ۽ آئيني ڪم ڪهڙو آهي، زرداري يا پ پ جي ساٿين جي کنڀڻ تي اسان جو احتجاج اصول تي آهي، اسان کي گرفتار ڪرڻ تي نه پر کنڀي غم ڪرڻ تي ڳڻتي آهي، معاملو پارليامينٽ ۾ اٿارينداسين، آڊيٽر جنرل پاڪستان آئيني پوزيشن آهي ان کي خالي ٿيڻ نه گهرجي، اڱاري تي ميڊيا سان ڳالهائيندي هن چيو ته شيڊول موجب پي اي سي اجلاس گهرايون ٿا، اڄ به اجلاس هو، جڏهن ته آڊيٽر جنرل پاڪستان جي اڃاتائين مقرري نه ٿي آهي، ان کانسواءِ اجلاس ٿئي ها ته ان جي قانوني حيثيت کي چيلينج ڪري سگهجي پيو، هن چيو ته تازوئي فوجي عدالتن جي آئيني ترميم منظور ٿي ان ۾ اهو لکيو ويو ته گرفتاري جي 24 ڪلاڪن ۾ عدالت ۾ پيش ڪيو ويندو، جڏهن ته اسان کي گرفتار ٿيڻ تي نه پر کنڀي غم ڪرڻ تي ڳڻتي آهي، ان ڪري قومي اسيمبلي ۾ سخت احتجاج ڪنداسين.

 

سوشل ميڊيا تي بيهوده ۽ ناقابل بيان مواد جي تشهير جاري آهي: چوڌري نثار

اسلام آباد (ويب ڊيسڪ): وفاقي گهرو وزير چوڌري نثار چيو آهي ته پاڪستان ۾ اهڙي مواد ۽ مقدس هستين جي بي حرمتي تي سخت ڳڻتي آهي، وفاقي گهرو وزير چوڌري نثار او آءِ سي جي سيڪريٽري جنرل سان ملاقات ڪئي، ملاقات دوران ڳالهائيندي وفاقي گهرو وزير چوڌري نثار او آءِ سي جي سيڪريٽري جنرل سان انٽرنيٽ تي گستاخاڻي مواد جو معاملو اٿاريو، چوڌري نثار چيو ته سوشل ميڊيا تي بيهوده ۽ ناقابل بيان مواد جي تشهير جاري آهي، اهڙي مواد جي تشهير ڪنهن به مسلمان لاءِ ناقابل برداشت آهي، هن چيو ته هي صرف پاڪستان جو مسئلو ناهي پر دنيا جي 1.6 ارب مسلمانن جو مسئلو آهي، پاڪستان اهو مسئلو انٽرنيٽ جي بين الاقوامي ڪمپنين آڏو اٿاريو آهي، معاملي جو موثر ۽ ديرپا حل اسلامي دنيا جي گڏيل ڪاوشن سان ممڪن آهي، وفاقي گهرو وزير چيو ته او آءِ سي جي سطح تي ان سلسلي ۾ گڏيل حڪمت عملي جوڙي وڃي، هن چيو ته توهين آميز مواد روڪڻ سان لاڳاپيل موثر حڪمت عملي ترتيب ڏني وڃي، هن چيو ته او آءِ سي گستاخاڻي مواد جي روڪ لاءِ مسلم امت جو آواز بڻجي، چوڌري نثار چيو ته او آءِ سي اسلام فوبيا جي حوصلا شڪني لاءِ مسلم امت جو آواز بڻجي، گهرو وزير چيو ته گستاخاڻو مواد روڪڻ لاءِ او آءِ سي جا ميمبر ملڪ ٽيڪنيڪي وسيلا استعمال ۾ آڻين.

 

ڀارت جي پاڪستان کي ڌمڪي: ڪلڀوشن ڀارت جو پٽ آهي، بچائڻ لاءِ ڪنهن به حد تائين وينداسين

نئين دهلي(ويب ڊيسڪ) ڀارت جي پرڏيهي صلاحڪار سشما سوراج پاڪستان کي ڌمڪي ڏيندي چيو آهي ته ڪلڀوشن جي معاملي کان بي خبر ناهيون، ڪلڀوشن ڀارت جو پٽ آهي، هن کي بچائڻ جي لاءِ ڪنهن به حد تائين وينداسين، ضرورت پئي ته ڀارتي صدر سان به رابطو ڪنداسين. ڀارت جي پرڏيهي صلاحڪار سشما سوراج راجيه سڀا ۾ بيان ڏيندي چيو ته ڪلڀوشن جي آزادي جي لاءِ سپريم ڪورٽ جو وڪيل ڪنداسين، ڪلڀوشن جي معاملي تي سندس وارثن سان رابطي ۾ آهيون، ڪلڀوشن تي اڳڀرائي تي پاڪستان ٻطرفن لاڳاپن کي نظر ۾ رکي. هن وڌيڪ چيو ته ڪلڀوشن ياديو خلاف پاڪستان جي ڪارروائي بنا جواز آهي.

 

ڪنهن مسلمان ملڪ يا خلاف جارحيت جو حصو نه بڻجنداسين: خواجا آصف

اسلام آباد(ويب ڊيسڪ) بچاءَ واري وفاقي وزير خواجا آصف چيو آهي ته ڪنهن مسلمان ملڪ يا خلاف جارحيت جو حصو نه بڻجنداسين، راحيل شريف اين او سي جي لاءِ اپلاءِ ناهي ڪيو، اڳوڻو آفيسر ٻن سالن کان پوءِ ڪيڏانهن وڃڻ چاهي ته اين او سي جي لاءِ اپلاءِ ڪري سگهي ٿو، جڏهن اين او سي جاري ڪئي ويندي ته سينيٽ کي اعتماد ۾ ورتو ويندو. سينيٽ ۾ پاليسي بيان ڏيندي خواجا آصف چيو ته اسان ڪنهن فرقي خلاف اتحاد جو حصو نه بڻجنداسين. هن چيو ته سعودي عرب جي سيڪيورٽي اسان جي دلين جي ويجهو آهي، پاڪستان ڪنهن فرقه، مذهب يا فرقي جو ملڪ ناهي بلڪ پاڪستانين جو ملڪ آهي، ايران سان صديون پراڻا لاڳاپا آهن ۽ ايران جا خدشا پري ڪري رهيا آهيون.

 

فيصلو ٻارن خلاف آيو تڏهن به وزيراعظم خلاف هوندو: عمران خان

اسلام آباد (ويب ڊيسڪ): پاڪستان تحريڪ انصاف چيئرمين عمران خان چيو آهي ته پاناما ڪيس ۾ وزيراعظم جي نااهلي يقيني نظر اچي رهي آهي، فيصلو ٻارن خلاف آيو تڏهن به وزيراعظم جي خلاف ئي هوندو، پي ٽي آءِ چيئرمين عمران خان سان پاناما ڪيس ۾ پي ٽي آءِ جي وڪيل بابر اعواڻ ملاقات ڪئي ۽ ڪيس جي فيصلي بابت خيالن جي ڏي وٺ ڪئي، ملاقات ۾ پاناما ڪيس جي فيصلي کانپوءِ آئيني ۽ قانوني حڪمت عملي تي مشاورت ڪئي وئي، عمران خان جو چوڻ هو ته پوري قوم پاناما ليڪس جي ڪيس جي فيصلي جو انتظار ڪري رهي آهي، فيصلو اچڻ بعد قوم شڪر ادا ڪندي، ڪيس ۾ وزيراعظم جي نااهلي يقيني نظر اچي رهي آهي، عمران خان چيو ته فيصلو ٻارن خلاف آيو تڏهن به وزيراعظم خلاف ئي هوندو، عمران خان وڌيڪ چيو ته آرٽيڪل 62 ۽ 63 جي اصل تشريح پاناما ڪيس ۾ ٿيندي، پاناما فيصلي ۾ 62 ۽ 63 جي تشريح سرجيڪل هوندي، اپوزيشن، فوج، ميڊيا ۽ قوم کي انصاف تي ٻڌل فيصلي جو انتظار آهي. ٻئي طرف پاڪستان تحريڪ انصاف جي صدر عمران خان چيو آهي ته پيپلز پارٽي ۽ ن ليگ ۾ ڳٺ جوڙ نه هلڻ ڏينداسين. پاناما ڪيس جو فيصلو ايندڙ هفتي اچي ويندو، ايندڙ چونڊن ۾ ميرٽ تي ٽڪيٽن جو فيصلو پاڻ ڪندس. بني گالا ۾ ايم پي اي رانا علي سلمان سان ملاقات دوران عمران خان چيو ته نواز شريف پاناما جي ڪري پريشان آهي، شريف ڀائرن سڀني ادارن کي قابو ڪيو آهي، عدالت ۽ فوج مان حڪمرانن کي خطرو آهي ان ڪري ان کي بدنام ڪري رهيا آهن. هن چيو ته پامانا جي فيصلي جو سڄي قوم کي انتظار آهي، فيصلو جيڪو به اچي ان کان پوءِ ايندڙ چونڊن جي لاءِ ڪوششون شروع ڪنداسين، ايندڙ چونڊن ۾ ڪارڪنن جي خواهش ۽ پارٽي ويزن موجب ٽڪيٽون ڏنيون وينديون.

 

پاڪستان اندرين ۽ ٻاهرين خطرن کي منهن ڏئي رهيو آهي: سراج الحق

اسلام آباد(ويب ڊيسڪ) جماعت اسلامي جي امير سراج الحق چيو آهي ته پاڪستان اندرين ۽ ٻاهرين خطرن کي منهن ڏئي رهيو آهي ، اسان جي هٿن ۾ ورلڊ بينڪ جون هٿڪڙيون ٻڌيون ويون آهن. ميڊيا سان ڳالهائيندي سراج الحق چيو ته نظام مصطفيٰ صه جي لاڳو ٿيڻ تائين ملڪ محفوظ نٿو ٿي سگهي. هن چيو ته اسان قانون ۽ آئين جي حڪومت چاهيون ٿا جڏهن ته اسان وٽ هتي معاشي دهشتگردي به آهي. هن وڌيڪ چيو ته اسان ڪشميري قيادت سان رابطي ۾ آهيون.