تازيون خبرون

Daily Archives: April 8, 2017

سڃاڻپ سنڌ ڏني، ڳڻبس بلوچن ۾، بلوچستان جو مستقبل روشن آهي: آصف زرداري

جعفر آباد  (اين اين آءِ) اڳوڻي صدر آصف علي زرداري چيو آهي ته حڪمرانن کي ڄاڻ نه آهي ته سي پيڪ پاڪستان جو منصوبو آهي، سي پيڪ تي ڪجهه ماڻهن کي غلط فهميون ٿي رهيون آهن، ڀارتي وزيراعظم اسان جو پاڻي بند نٿو ڪري سگهي، اسان ڪيترائي رستا ڳولي ورتا آهن، ان رستن ۾ بلوچستان جو حصو پهريون بڻجي ٿو، اڳوڻي صدر تحريڪ پاڪستان جي اڳواڻ مير جعفر خان جمالي جي 50 هين ورسي ۾ شرڪت لاءِ هيليڪاپٽر ذريعي جعفر آباد پهتو جتي هڪ جلسي کي خطاب ڪندي هن چيو ته سي پيڪ تي ڪجهه ماڻهن کي غلط فهميون ٿي رهيون آهن، هن چيو ته اهو پختونن ۽ پاڪستان لاءِ آهي، ذاتي منصوبن لاءِ نه، هاڻ اسان کي سوچڻو اهو آهي ته اسان انهن کان ڪيئن پنهنجون شيون واپس وٺون، اسان کي انهن کان پنهنجون سموريون زمينون واپس وٺڻيون آهن ۽ بلوچن کي ڏيڻو آهن پر زور سان نه، هن چيو ته مان گذريل ڏينهن حب جي دوري وقت به چيو هو ته آدمشماري جي سلسلي ۾ بلوچن سان زيادتي ٿي رهي آهي، جيڪڏهن زيادتي ٿي آهي ته پهريان ته جوان پهاڙن تي چڙهيل هئا، پوءِ اسان ڪراڙا به چڙهي وينداسين، آصف زرداري سوال ڪيو ته بلوچستان ۾ پهاڙن تي چڙهي اسان ڪنهن جو نقصان ڪيو، هن جواب ڏنو ته اسان جو ئي نقصان ٿيو، اسان جي ڀائرن، نياڻين، ڀائٽيا ۽ بزرگ مارجي ويا ۽ قومون تباهه ٿي ويون، اهي قومون جن کي اسان فخر سان ڏسندا هئاسين، آصف زرداري بلوچن کي مخاطب ٿيندي چيو ته توهان جو علائقو ملڪ جو سڀ کان وڏو علائقو آهي، جڏهن ته توهان پنهنجو پاڻ کي ڇو غلط استعمال ٿيڻ ڏيو ٿا، توهان وٽ هر شيءِ موجود آهي، جيڪڏهن مونکي الله سائين موقعو ڏنو ته سمورن ڪچن واهن کي پڪو ڪندس ۽ توهان کي نئين انداز سان پاڻي هلائڻ سيکاريندس ۽ مفت ڊرپ ايگريشن به ڏيندس. هن چيو ته مون کان ماڻهو پڇن ٿا ته مان وزيراعظم ڇو بڻيس ته مان انهن کي چوندو آهيان ته جيڪڏهن مان وزيراعظم بڻجا هان ته ڇا مان 18 هين ترميم ڪري سگهان ڇا مان پختونن کي انهن جو حق ڏياري سگهان هان ان ئي سبب مان صدارت جو اميدوار بڻيس ۽ پارليامينٽ جي فورم تان مون کي چونڊيو ويو، هن چيو ته منهنجي سڃاڻپ سنڌ کان ملي، جڏهن ته منهنجو شمار بلوچن ۾ ٿئي ٿو.

 

باني ايم ڪيو ايم نفرت ڦهلائي هر ڪميونٽي کي ويڙهايو، وائيٽ پيپرز بوکلاهٽ جو نتيجو آهي: وڏو وزير

ڪراچي (اسٽاف رپورٽر) سنڌ جي وڏي وزير سيد مراد علي شاهه چيو آهي ته ايم ڪيو ايم جي وائيٽ پيپر کي ڏسي افسوس ٿيو، وائيٽ پيپر ڏسي ايئن لڳو ته سڀ ايم ڪيو ايم باني بڻجڻ چاهين ٿا، وائيٽ پيپر ذريعي ماضي وانگر نفرت ڦهلائڻ جي ڪوشش ڪئي وئي، هن چيو ته ايم ڪيو ايم لنڊن ۽ پاڪستان جو رابطو آهي يا نه پر وائيٽ پيپر ۾ اها ئي نفرت آهي، هن چيو ته 1985ع واري نفرت جي سياست ٻيهر شروع نه ڪرڻ ڏينداسين، لنڊن کان باني ايم ڪيو ايم نفرت ڦهلائي ۽ هر ڪميونٽي کي ويڙهايو، ڌرڻا ۽ وائيٽ پيپرز بوکلاهٽ جو نتيجو آهن، مراد علي شاهه جو وڌيڪ چوڻ هو ته آءِ جي سنڌ جو مسئلو حل ٿي ويندو، آفيسرن جون بدليون ٿينديون رهنديون آهن، آءِ جي سنڌ جي بدلي به ٻين آفيسرن وانگر بدلي آهي، آءِ جي سنڌ جي معاملي تي جيڪو صوبائي حڪومت چاهيندي، اهو ئي ٿيندو.صوبائي حڪومت ڪي فور رٿا تي ٿيندڙ خرچن جو 90 سيڪڙو برداشت ڪري چڪي آهي، جڏهن ته وفاق ان منصوبي لاءِ اڄ تائين رڳو 10 سيڪڙو فنڊ مهيا ڪيا آهن. هن اهڙن خيالن جو اظهار اڄ ڪراچي چيمبر آف ڪامرس اينڊ انڊسٽري (ڪي سي سي آءِ) پاران ايڪسپو سينٽر ڪراچي ۾ ڪرايل 14هين ”ماءِ ڪراچي“ نمائش کي بطور مهمان خاص خطاب ڪندي ڪيو. ان موقعي تي وڏي وزير سان صنعت وارو صوبائي وزير منظور وساڻ ۽ ٻيون ڪاروباري شخصيتون پڻ گڏ هيون. وڏي وزير سيد مراد علي شاهه جي ايڪسپو سينٽر آمد تي سراج قاسم تيلي، ايس ايم منير، زبير موتي والا، ڪراچي چيمبر آف ڪامرس جي صدر ۽ ٻين معزز شخصيتن آجيان ڪئي. وڏي وزير سيد مراد علي شاهه ”ماءِ ڪراچي“ نمائش جي افتتاحي تقريب کي خطاب ڪندي چيو ته عوام جي سهڪار سان ڪراچي جو سنهري دور واپس آڻينداسين ۽ ڪراچي جي رونقن کي بحال ڪنداسين. هن چيو ته ڪراچي جي ترقي پاڪستان جي ترقي آهي ۽ ڪراچي جي ترقي کان بغير پاڪستان جي ترقي ممڪن ئي نه آهي. هن پاڻي جي بحران تي ڳالهائيندي چيو ته ڪي فور رٿا ڪراچيءَ کي پاڻي جي فراهم ڪرڻ واري وڏي رٿا آهي جنهن تي لاڳت اٽڪل 25 ارب رپين تائين آهي ۽ صوبائي حڪومت هينئر تائين انهيءَ رٿا تي ٿيندڙ ڪم جو 90 سيڪڙو خرچ برداشت ڪيو آهي، جڏهن ته وفاق ڄاڻايل رٿا لاءِ فقط 10 سيڪڙو فنڊ فراهم ڪيا آهن. هن چيو ته ڪي فور رٿا کي ايندڙ سال جون تائين مڪمل ڪيو ويندو. هن وڌيڪ چيو ته ڪراچي ۾ پاڻي جو وڏو مسئلو آهي. هن چيو ته ڪجهه رٿائن ۾ وقت ضرور لڳو آهي، پر هاڻي ترقياتي رٿائن تي مڪمل ڌيان ڏئي رهيا آهيون ۽ تمام جلد جاري ترقياتي رٿائن کي مڪمل ڪيو ويندو. وڏي وزير سيد مراد علي شاهه چيو ته ٻٽي ٽيڪس جو معاملو سنڌ حڪومت طرفان نه آهي بلڪه وفاق پاران ڳرا ٽيڪس لڳايا وڃن. هن چيو ته سي سي آءِ واري اجلاس ۾ ان بابت قانون واري وفاقي وزير جي اڳواڻي ۾ هڪ ڪميٽي بڻائي وئي هئي ۽ ڪميٽي جي اجلاس ۾ مون چيو هو ته آئين جي آرٽيڪل 158 ۾ ان بابت موقوف بلڪل چٽو آهي ۽ ٻين صوبن پڻ منهنجي موقف جي حمايت ڪئي هئي. هن وڌيڪ چيو ته ايس بي آر بابت سنڌ حڪومت کي واپارين جو سهڪار گهربل آهي. هن وقت ڪراچي سميت سموري صوبي ۾ امن امان جي صورتحال گهڻي بهتر آهي ۽ اهو ئي سبب آهي ته ٻاهرين ملڪن مان وڏي انگ ۾ پرڏيهي سيڙپڪار ڪراچيءَ جو رخ ڪري رهيا آهن. هن چيو ته ڪراچي منهنجو شهر آهي ۽ مونکي ڪراچي جي مسئلن بابت چڱي ريت ڄاڻ آهي. هن چيو ته اسان نوي جي ڏهاڪي جي سياست ۾ نٿا وڃڻ چاهيون. هن چيو ته ايندڙ سال چونڊن ۾ پاڪستان پيپلز پارٽي رڳو سنڌ ۾ نه پر سموري پاڪستان ۾ سوڀ ماڻيندي. هن چيو ته اسان پنهنجي ڪارڪردگي جي بنياد تي عوام وٽ وينداسين. افسوس جو اظهار ڪندي هن چيو ته ڪجهه ماڻهو وائيٽ پيپر جاري ڪري رهيا آهن ته ڪي وري ڌرڻا ڏئي رهيا آهن، جيڪا مناسب ڳالهه نه آهي. هن چيو ته ڪراچي اسانجو شهر آهي ۽ جيڪي ڪم صوبائي حڪومت جا آهن اهي ڪم اسان ڪنداسين. ڪراچي چيمبر جي صدر شميم احمد فرپو ”ماءِ ڪراچي“ نمائش جي ڪامياب سفر تي ڳالهائيندي چيو ته ماءِ ڪراچي نمائش جي شروعات 2004ع ۾ ٿي هئي ۽ اها مسلسل 14هين نمائش آهي. هن چيو ته ماءِ ڪراچي نمائش جي ڪري شهر جي اصل ۽ خوبصورت شڪل دنيا آڏو ايندي. هن چيو ته ملڪ ۾ ڪاروبار کي وڌيڪ آسان ڪرڻ جي ضرورت آهي. ان کانپوءِ وڏي وزير سيد مراد علي شاهه ”ماءِ ڪراچي“ نمائش ۾ لڳل مختلف اسٽالن جو دورو پڻ ڪيو. وڏي نمايان ڪارڪردگي جو مظاهرو ڪندڙ ڪمپنين کي گولڊ ميڊل، شيلڊز ۽ ٽرافيز پڻ ڏنيون. تقريب کي ناليوارن صنعتڪارن سراج قاسم تيلي ۽ زبير موتي والا پڻ خطاب ڪندي چيو ته هن وقت ڪراچي ۾ واقعي ترقياتي ڪم ٿي رهيا آهن جنهن جا مثبت نتيجا تمام جلد عوام آڏو هوندا.

 

ملڪ جي ڏيوالي هجڻ جون ڳالهيون ڪرڻ وارن جي عقل جو ڏيواليو نڪري ويو: مريم اورنگزيب

اسلام آباد (اين اين آءِ) سڌ سماءَ جي مملڪتي وزير مريم اورنگزيب چيو آهي ته عمران خان اردو ۾ ڪوڙ ڳالهائي ٿڪجي پيو آهي ۽ هاڻ انگريزي ۾ ڪوڙ ڳالهائڻ لڳو آهي، عمران خان پاناما تي سياست ڪرڻ ڇڏي پنهنجوڌيان ڪي پي ڪي جي عوام تي ڏئي، ملڪ جو ديواليا هجڻ جون ڳالهيون ڪرڻ وارن جي عقل جو ديواليو نڪري ويو آهي، هن چيو ته عمران خان هاڻ انگريزي ۾ ڪوڙ ڳالهائڻ شروع ڪيو آهي، هن چيو ته پاڪستان ۾ ماڻهو سياست ۾ عوام جي خدمت ڪرڻ اچن ٿا انهن وانگر پيسو ٺاهڻ نٿا اچن، هن چيو ته پي ٽي آءِ جي چيئرمين جي منفي سياست تباهه ٿي رهي آهي ڇو ته هو وقت مان ڪجهه نه سکي رهيو آهي، هن چيو ته عمران خان صحيح چيو آهي ته هو پاڪستان جو سياستدان آهي ئي نه، پاڪستان ۽ ان لاءِ بهتر آهي ته هو برطانيا هليو وڃي، ان جي نااهلي ۽ منفي سياست سبب کيس 2018 ۾ برطانيا وڃڻو پوندو.

 

ڇوڪرين کي عدالت ۾ طلب ڪرڻ کان سواءِ ڪو ٻيو رستو نظر نه پيو اچي: سپريم ڪورٽ

اسلام آباد (ويب ڊيسڪ) سپريم ڪورٽ ڪوهستان وڊيو اسڪينڊ ڪيس ۾ نادران چيئرمين سرن جان بيب ۽ بازيخا بيبي جا تفصيل طلب ڪندي ڪيس جي ٻڌڻي 20 اپريل تائين ملتوي ڪري ڇڏي آهي، جسٽس اعجاز افضل چيو آهي ته جيڪڏهن ڇوڪرين جو جيئرو هجڻ ثابت ٿئي ته معاملو ختم ٿي ويندو، ڇوڪرين کي عدالت ۾ طلب ڪرڻ کان سواءِ ڪو ٻيو رستو نظر نه پيو اچي، عدالت ۾ ڇوڪرين جي سڃاڻپ ڪير ڪندو، ڇوڪرين کي عدالت ۾ پيش ڪرڻ ۾ گھٻراهٽ ڪهڙي آهي، ان تي والدين جي وڪيل موقف اختيار ڪيو ته قبيلائي رسمن موجب ڇوڪرين کي عدالت ۾ پيش نٿو ڪري سگھجي، جسٽس اعجاز افضل چيو ته علائقي جو دورو ڪندڙ ڪميشن جي رپورٽ تي شڪ پيدا ٿي چڪا آهن، افضل ڪوهستان جي وڪيل چيو ته ڇوڪرين جو ڊي اين اي ٽيسٽ ڪرائي سگھجي ٿو ان تي جسٽس اعجاز افضل چيو ته وڪيل صاحب ڇوڪرين جو ڊي اين اي ٽيسٽ ايترو سولو ناهي، جڏهن ته جسٽس مقبول باقر چيو ته ٻن ڇوڪرين نادرا جو رڪارڊ حاصل ڪرڻ جي درخواست ڏني هئي، ڇوڪرين جو بائيو ميٽرڪ ٽيست ڪرائڻ  ڇو پيا گھٻرايو.

 

رهيل سَهيل دهشتگرديءَ تي به تمام جلد قابو آندو ويندو: صدر ممنون حسين

اسلام آباد (اين اين آءِ) صدر ممنون حسين چيو آهي ته قوم دهشتگردي جي خاتمي لاءِ گڏ آهي، ملڪ جي مختلف علائقن ۾ دهشتگردي ۽ لاقانونيت جا مسئلا ظاهر ٿي رهيا آهن جنهن تي ڪافي حد تائين ضابطو ڪيو ويو آهي، آپريشن ضرب عضب جي ڪاميابي کانپوءِ هاڻ آپريشن رد الفساد ذريعي دهشتگردن ۽ انهن جي سهولتڪارن خلاف ڪارروايون جاري آهن، حڪومت دهشتگردي جهڙي فتني جو مٿو ڪچلڻ لاءِ پرعزم آهي، صدر اها ڳالهه ايوان صدر ۾ ڪمانڊ اينڊ اسٽاف ڪوئيٽا ڪاليج جي تربيت هيٺ آفيسرن سان ملاقات دوران ڪئي، جنهن ۾ ڪوئيٽا ڪاليج کانسواءِ اعليٰ عملدارن شرڪت ڪئي، صدر ان موقعي تي فوجي آفيسرن سان ڳالهائيندي چيو ته بدامني ۽ دهشتگردي سان منهن ڏيڻ لاءِ پاڪ فوج، سيڪيورٽي فورسز ۽ سول انتظاميا جي بي خوف ڪردار ۽ قربانين سبب دنيا اڄ مضبوط پاڪستان طرف ڏسي رهي آهي، هن چيو ته بلوچستان ۾ بدامني ۽ دهشتگردي سان منهن ڏيڻ لاءِ هٿياربند فوج جي ڀرپور ڪاررواين سبب بلوچستان ۾ امن بحال ٿيو آهي، ان سلسلي ۾ سيڪيورٽي فورسز جون قربانيون تعريف جوڳيون آهن، هن چيو ته ملڪ جي اقتصادي پاليسي صحيح دڳ تي هلي رهي آهي ۽ ان جا سٺا نتيجا ظاهر ٿي رهيا آهن، هن چيو ته حڪومت بجلي جي بحران تي ضابطو ڪرڻ لاءِ هنگامي بنيادن تي ڪم ڪري رهي آهي، ان لاءِ پن بجلي جي ذخيرن ۾ واڌ، ڪوئلي مان پيدا ڪيل بجلي ۽ ان کانسواءِ وڌيڪ سمورن ذريعن کي ڪتب آندو پيو وڃي، هن چيو ته ڪمانڊ اسٽاف ڪاليج هربي ۽ اسٽريٽجڪ تربيت جي سلسلي ۾تاريخي ڪردر ادا ڪيو آهي.

 

ملڪ مان لوڊشيڊنگ جو خاتمو اولين ترجيح آهي: نواز شريف

اسلام آباد (اين اين آءِ) وزيراعظم محمد نواز شريف چيو آهي ته ملڪ مان توانائي جي کوٽ کي ختم ڪرڻ ان جي حڪومت جي پهرين ترجيح آهي، منصوبن جي تيز رفتاري سان تعمير توانائي جي بحران تي ضابطو ڪرڻ ۾ مدد ملندي، چين ۽ پاڪستان ۾ تعاون جاري رهندو، هو جمعي تي پاور ڪنسٽريڪشن ڪارپوريشن آف چائنا جي چيئرمين بورڊ آف ڊائريڪٽرز ۽ صدر يان زي يانگ سان ڳالهائي رهيو جنهن وفد سان گڏ ساڻس ملاقات ڪئي، وزيراعظم چيني وفد کي ڀليڪار ڪندي چيو ته پاڪستان ۽ چين ۾ گڏيل احترام ۽ اعتماد تي ٻڌل لازوال دوستي قائم آهي، وزيراعظم چيو ته چين پاڪستان اقتصادي راهداري تحت پاڪستان سمورن منصوبن تي وقت سر ۽ موثر عملدرآمد لاءِ مڪمل طور تي پرعزم آهي، هن چيو ته سي پيڪ کي حقيقت جو روپ ڏيڻ اسان چين جي وزارتن ۽ ادارن جي مدد تي ٿورائتا آهيون، هن چيو ته ملڪ مان توانائي جي کوٽ ختم ڪرڻ ان جي حڪومت جي پهرين ترجيح آهي، هن چيو ته پاور چائنا کي ٽرانسميشن لائينز ۽ آبي ذخيرن ۽ بجلي جي پيداوار سميت هائيڊرو پاور پراجيڪٽس ۾ سيڙپڪاري جا موقعا ڳولڻ جي دعوت ڏني آهي، ان موقعي تي يان زي وزيراعظم پاران آجياڻي تي ان کي ڀليڪار ڪيو ۽ چيو ته چين ۽ پاڪستان وچ ۾ تعاون جاري رهندو.

 

۲۰۱۴ع ۾ آصف زرداري نواز شريف کي استعيفيٰ ڏيڻ کان روڪيو: خورشيد شاهه

خاريان (اين اين آءِ) قومي اسيمبلي ۾ مخالف ڌر اڳواڻ خورشيد شاهه چيو آهي ته 2014 ۾ پ پ جمهوريت جو ساٿ ڏنو، 2014 ۾ نواز شريف استعيفيٰ جو رستو اختيار ڪري رهيو هو، ميڊيا سان ڳالهائيندي هن چيو ته وفاق سنڌ ۾ خطرناڪ راند کيڏي رهيو آهي، وفاق صوبن ۾مداخلت ڪرڻ بند ڪري، سنڌ ۾ امن فوج ۽ صوبائي حڪومت سبب ٿيو آهي، هن چيو ته 18 هين ترميم کانپوءِ صوبن کي مسئلا حل ڪرڻ جو اختيار آهي.

 

ٻين تي الزام هڻڻ ۽ ٻين تي گند اڇلائيندڙن وٽ ڪجھه به نه آهي: چوڌري نثار

راولپنڊي (ويب ڊيسڪ) وفاقي گھرو وزير چوڌري نثار عليءَ جو چوڻ آهي ته ڪجھه ڌريون غلطم ڪم کي نه ٺيڪ ڪم کي روڪڻ جون ڪوششون ڪنديون آهن، سٺو ڪم ڪرڻ ۾ تمام گھڻيون رڪاوٽون وڌيون وينديون آهن، حڪومت عوام کي بنيادي سهولتن جي فراهميءَ جي لاءِ پرعزم آهي، راولپنڊيءَ ۾ تقريب کي خطاب ڪندي چيو ته پهريان دهشتگرديءَ جا هرروز واقعا ٿيندا هئا، ته ڪنهن جي ڪن تي جونءِ به نه چرندي هئي، تقرير ڪرڻ سڀني کان سولو ڪم آهي، ڪو چريو به تقرير ڪري سگھي ٿو، دهشتگرديءَ جي خلاف جنگ کي منطقي انجام تي پهچائينداسين،  الزام هڻڻ جو ڪو علاج نه آهي، ماضيءَ جي حڪومتن ۾ ڪرپشن جو روز نئون اسڪينڊل سامهون ايندو هو، ٻين تي الزام هڻڻ ۽ ٻين تي گند اڇلائيندڙن وٽ ڪجھه به نه آهي.36

 

پاناما ڪيس جو فيصلو پاڪستان جي سياست تبديل ڪري ڇڏيندو: عمران خان

اسلام آباد (ويب ڊيسڪ): پي ٽي آءِ سربراهه عمران خان چيو آهي ته پاناما ڪيس جو فيصلو پاڪستان جي سياست تبديل ڪري ڇڏيندو، سياست ۾ ماڻهو رڳو پئسا ٺاهڻ ايندا آهن، هڪ تقريب کي خطاب ڪندي عمران خان چيو ته پاناما ڪيس جو فيصلو اشرافيه جي طرز حڪومت کي تبديل ڪري ڇڏيندو، اسان پنهنجي جمهوري حق لاءِ اٿي بيٺاسين، منهنجو ڌيان هنن ڏينهن ۾ پاناما جي پچ تي آهي، پهريون ڀيرو هڪ طاقتور شخص مني لانڊرنگ ۽ ڪرپشن ۾ پڪڙيو ويو آهي، پاڪستان ۾ تاريخي موقعو آهي هاڻي پاناما ڪيس جو فيصلو به اچڻ وارو آهي، فيصلو پاڪستان جي سياست کي تبديل ڪري ڇڏيندو، عمران خان چيو ته خيبر پختونخواهه جي پوليس پاڪستان جي بهترين پوليس آهي، اليڪشن فڪسرز هاڻي ميچ فڪسرز بڻجي ويا آهن، هن چيو ته پاڪستان کان ٻاهر رهڻ جو ڪڏهن ناهي سوچيو، پاناما ڪيس پارليامينٽ ۾ کڻي وياسين ته سڀني چيو ته جاچ ٿيڻ گهرجي، باويهه سياسي جماعتن چيو ته چونڊن ۾ ڌانڌلي ٿي هئي، اميد آهي ته ايندڙ هفتي پاناما ڪيس جو فيصلو اچي ويندو، هن چيو ته پاڪستان ۾ منهنجون پاڙون مضبوط آهن، مان واحد ڪپتان هيس جنهن کي پسند جي ٽيم نه ملي ته استعيفيٰ ڏئي ڇڏي، عمران خان چيو ته هاڻي مارشل لا لڳائڻ تمام ڏکيو ڪم آهي، برطانيه ۾ ادارن کي ڪم ڪندو ڏسي اندازو ٿيو ته جمهوريت ڇا ٿيندي آهي، ڪوئي ميڊيا کان بچي وڃي ته سوشل ميڊيا جي نظر ۾ اچي وڃي ٿو، ميڊيا ڪنهن کي معاف ناهي ڪندو، عمران خان چيو ته جيڪڏهن مان انگلينڊ ۾ نه رهان ها ته سياست ۾ نه هجان ها، 70، 80 ۽ 90 جي ڏهاڪن ۾ پاڪستان جو نقصان ٿيو، فوجي مداخلت به سسٽم کي ٺيڪ ٿيڻ نه ڏنو، وزيراعظم کي ڪرڪيٽ جي معاملي ۾ مداخلت نه ڪرڻ گهرجي، ڪرڪيٽ سبب ڪينسر اسپتال ٺاهي ۽ هلائي، ڪينسر اسپتال لاءِ 700 ملين رپيا جمع ڪيا، هن چيو ته ڪينسر اسپتال جي حوالي سان چار ارب رپين جي خساري کي منهن ڏنو، مان وزيراعظم ئي بڻجڻ چاهيان ٿو، چونڊ وڙهي ڇا نواز شريف ٿاڻيدار بڻجڻ چاهي ٿو، منهنجي وزيراعظم بڻجڻ جو هڪ سبب ادارن کي مضبوط بڻائڻ آهي، وزيراعظم بڻجڻ جو ٻيو سبب سمورن انساني ذريعن جي ترقي تي خرچ ڪرڻ آهي، عمران خان چيو ته تعليم کانسواءِ ڪجهه حاصل نٿو ڪري سگهجي، اسان 80 ۾ غلطي ڪئي، آمريڪا سان ملي افغان جهاد نه ڪرڻ گهربو هيو، اسان ڊالر وٺي جيڪڏهن جهادي پيدا ڪيا ته ڊالر ڏئي ماري به ڇڏيا، ان سڄي عمل ۾ اسان جو ڏاڍو نقصان ٿيو، هن چيو ته آمريڪا کي چئي پاڪستان تي ڊرون حملا ڪرايا ويا، قيمت پاڪستان جي ماڻهن کي ڀرڻي پئي، ٽرمپ ايترو خراب ناهي، جيترو مان سوچي رهيو هيس، هو ته  صفا خراب نڪتو، جڏهن مون ٽرمپ کي آمريڪا جو صدر بڻجندي ڏٺو ته چيو ته هڪ تهذيب جي تنزلي ٿي، عمران خان چيو ته ڌانڌلي جي جاچ لاءِ قائم ڪيل جڊيشل ڪميشن 40 سفارشون ڏنيون، اسان چارٽر آف ڊيمانڊ جلد آڻينداسين، پهريون اليڪشن ڪميشن شفاف بڻائڻ جو مطالبو ڪنداسين، سمورن سياست دانن جي نظر ايندڙ چونڊن تي هوندي آهي، چونڊن جو نه ماڻهن جي بهتري جو سوچي رهيا آهيون، پي ٽي آءِ سربراهه چيو ته جناح جا دشمن به ڄاڻيندا هيا ته اهو مقصديت تي يقين رکندو آهي، منهنجي خيال ۾ ڪي پي ڪي حڪومت ٻين حڪومتن کان بهتر آهي، اسان انساني ترقي تي ڪم ڪيو، هن چيو ته جنرل (ر) راحيل شريف ڪراچي ۾ امن لاءِ قدم کنيا، سنڌ جي گورنر محمد زبير شريف خاندان جي ڪرپشن جو دفاع ڪيو، محمد زبير چوي ٿو ته قطري خط صحيح هيو، هائيڊل بدران مهانگي بجلي پيدا ڪرڻ سبب برآمدات متاثر ٿيون، ڪراچيءَ ۾ امن جو ڪريڊٽ نواز شريف کي ڏيڻ جو گورنر سنڌ جو بيان بيوقوفاڻو آهي.

 

ن ليگ جي سياست ۾ ننڍن صوبن جو ڪو به حصو ناهي: مولا بخش چانڊيو

کاريان(ويب ڊيسڪ) پاڪستان پيپلز پارٽي جي اڳواڻ مولا بخش چانڊئي چيو آهي ته ن ليگ جي سياست ۾ ننڍن صوبن جو ڪو به حصو ناهي. اسان جي پنجاب اچڻ تي اعتراض ڇو پيو ڪيو وڃي. کاريان ۾ ميڊيا سان ڳالهائيندي مولا بخش چانڊئي چيو ته پيپلز پارٽي پنجاب ۾ جنم ورتو آهي، گورنر ڪجهه به ڳالهائي سگهي ٿو ته ان کي ڪير به روڪي نٿو سگهي. هن چيو ته ڪير آهي جنهن متحده خلاف وائٽ پيپر جاري ناهي ڪيو، سنڌ ۾ ن ليگ وٽ هڪ ئي ايم اين اي هو جيڪو اسان وٽ اچي ويو. هن وڌيڪ چيو ته راحيل شريف جي وقت ۾ هنن جي حڪومت ڇا هئي اها سڀني خبر آهي.