تازيون خبرون

Daily Archives: April 7, 2017

آءِ جي سنڌ کي هٽائڻ تي اسٽي آرڊر نڪتل هو ته کيس ڪيئن هٽايو ويو؟: سنڌ ھاءِ ڪورٽ

ڪراچي (ويب ڊيسڪ) سنڌ هاءِ ڪورٽ ۾ آءِ جي سنڌ جي مقرري ڪيس جي ٻڌني ٿي جنهن ۾ صوبائي حڪومت آءِ جي سنڌ جي برطرفيءَ بابت حلفي بيان جمع ڪرائي ڇڏيو آهي، سنڌ هاءِ ڪورٽ ۾ آءِ جي سنڌ جي مقرري ڪيس جي ٻڌني دوران ايڊووڪيٽ جنرل سنڌ سيڪريٽري سروسز طرفان حلفي بيان جمع ڪرايو، سنڌ حڪومت طرفان جمع ڪرايل بيان ۾ چيو ويو آهي ته اي ڊي خواجا جون خدمتون وفاق حوالي ڪرڻ تي عدالتي توهين ناهي ڪئي،  سيڪريٽري سروز موجب اي ڊي خواجا او پي ايس تي ڪم ڪري رهيو هو، سنڌ هاءِ ڪورٽ انيتا تراب ڪيس جي فيصلي تي عمل جو حڪم ڏنو هو، سنڌ هاءِ ڪورٽ جي فيصلي جي خلاف ورزي نه ڪئي وئي. هلندڙ هفتي آءِ جي سنڌ اي ڊي خواجا جي بدليءَ بابت سنڌ هاءِ ڪورٽ ۾ ڪيس جي ٻڌڻي ٿي، عدالت پڇاڻو ڪيو ته آءِ جي سنڌ کي هٽائڻ تي اسٽي آرڊر نڪتل هو ته کيس ڪيئن هٽايو ويو؟ ٻڌڻيءَ دوران اي جي سنڌ چيو ته هي قدم عدالتي حڪمن جي خلاف ورزي جي زمري ۾ نٿو اچي، عدالت پڇاڻو ڪيو ته آءِ جي سنڌ کي هٽائڻ جو معاملو ته تڪراري هو کيس ڪيئن هٽايو ويو؟ جنهن تي اي جي سنڌ جواب ڏيندي چيو ته اسان سپريم ڪورٽ جي حڪمن تي عمل کي يقيني بڻايو آهي، جنهن تي عدالت فوري سوال ڪيو ته ڇا سنڌ حڪومت حڪم خلاف سپريم ڪورٽ سان رجوع ڪيو هو؟ ياد رهي ته انيتا تراب ڪيس ۾ سپريم ڪورٽ واضح طور بيان ڪيو آهي ته جيڪڏهن ڪو سول سروينٽ ڪنهن عهدي تي رکيو وڃي ته گھٽ ۾ گھٽ ان عهدي تي ٽن سالن تائين لازمي طور رهندو، جيستائين ان خلاف ڪنهن ڪرپشن، بدعنواني خا قانون خلاف ڪم ڪرڻ جون شاهديون موجود هجن. سپريم ڪورٽ سرڪاري آفيسرن کي تحفظ فراهم ڪيو آهي هو پنهنجي اعليٰ عملدارن جي هر فيصلي کي مڃڻ جا پابند ناهن جيڪڏهن اعليٰ عملدار ڪنهن غير قانوني ڪم جي هدايت جاري ڪندا ته سپريم ڪورٽ جي فيصلن جي روشني ۾ آفيسر انهن غير قانوني فيصلن کي مڃڻ کان انڪار به ڪري سگھن ٿا.36

 

حڪومت کي ٽف ٽائيم ڏيڻ جو اعلان، عوام کي حڪومتي پاليسين تي نٿا ڇڏي سگهون: بلاول ڀٽو زرداري

لاهور (اين اين آءِ)پ پ چيئرمين بلاول ڀٽو زرداري چيو آهي ته موجوده حڪومت چونڊ مهم دوران عوام سان ڪيل واعدن ۽ منشور تي عملدرآمد ۾ مڪمل طور تي ناڪام ٿي وئي آهي، عوام پاناما ڪيس جي فيصلي جو شدت
سان انتظار ڪري رهيو آهي، پ پ عملي طور تي ميدان ۾ نڪري چڪي آهي، ان لاءِ حڪمرانن جي چهرن تي پريشاني صاف نظر اچي رهي آهي، اهڙن خيالن جو اظهار هن بلاول هائوس لاهور ۾ ملاقات لاءِ ايندڙ پ پ جي مرڪزي اطلاع واري سيڪريٽري چوڌري منظور، پنجاب جي جنرل سيڪريٽري نديم افضل چن، ڪي پي ڪي جو جنرل سيڪريٽري فيصل ڪريم ڪنڊي ۽ ٻين سان ڳالهائيندي ڪيو. ان موقعي تي پارٽي جي تنظيم سازي، گڏيل سياسي صورتحال ۽ عوامي مسئلن تي تفصيلي ڳالهه ٻولهه ڪئي وئي. هن چيو ته موجوده حڪومت چونڊ مهم دوران عوام سان ڪيل واعدن مان هڪ به پورو نه ڪيو آهي، هن چيو ته جلد ئي سڄي صوبي ۾ جلسا ڪري عوام کي اصل نتيجن کان آگاهه ڪنداسين عوامي مسئلن تي احتجاجي مظاهرن جي حڪمت عملي جوڙڻ جي هدايت ڪري ڇڏي،  هن چيو ته عوام کي حڪومتي پاليسين  ۽ عوام دشمن قدمن جي رحم ڪرم تي تي نٿا ڇڏي سگهون، بلاول ڀٽو زرداري چيو آهي ته لوڊشيڊنگ هجي يا ادارن جي نجڪاري، حڪومت کي هر ميدان ۾ ٽف ٽائيم ڏيڻو آهي، نواز شريف عام چوندن ۾ جيڪي واعدا ڪيا هئا اهي پورا نه ڪا آهن، عوامي مسئلن جي حل لاءَ ڪارڪن روڊن تي اچڻ ۽ احتجاج جي تاري ڪن. هن چيو ته قوم پاناما ليڪس جي فيصلي جو سختي ۽ بي صبري سان انتظار ڪري رهي آهي، حڪومت چونڊن ۾ عوام سان ڪيل واعدا پورا ناهن ڪيا، هن چيو ته تنظيم سازي جو عمل هڪ مهيني ۾ مڪمل ڪري حڪومت کي ٽف ٽائين ڏينداسين، پيپلز پارٽي چيئرمين بلاول ڀٽو زرداري سان مرڪزي، پنجاب ۽ خيبر پختونخواهه جي اڳواڻن ملاقات ڪئي.

 

سنڌ ۽ پنجاب ۾ حادثا، ھڪ ئي ڪٽنب جي 9 ڀاتين سميت 11 ڄڻا فوت

ڪراچي  (اين اين آءِ) سنڌ ۽ پنجاب ۾ حادثا، 11 ماڻهو فوت، تفصيل موجب: گلشن غازي يوسي 33 ۾ جابلو ڇپ ڪرڻ جو اطلاع ملندي ئي ايڊمنسٽري بلديا غلام فريد، ميونسپل ڪمشنر وسيم مصطفيٰ سان گڏ حادثي واري هنڌ پهچي امدادي سرگرمين جي فراهمي لاءِ سموريون هلڪيون ۽ وڏيون مشينري ۽ ماڻهو گڏ ڪري پهاڙي ڇپون هٽائڻ ۽ متاثر ٿيل گهرن مان واسطيدار گهرن کي خالي ڪرائڻ جو ڪم شروع ڪيو، حادثي ۾ هڪ ئي خاندان جا 5 ڄڻا فوت ٿيڻ تي ايڊمنسٽيٽر ڏک جو اظهار ڪندي چيو ته انتظاميا ان حادثي ۾ فوت ٿيندڙ ماڻهن جي وارثن سان ڏک ۾ برابر جي شريڪ آهي، ان موقعي تي موجود آفيسرن کي پهاڙ جي چوٽي تي آباد گهرن کي فوري طور تي خالي ڪرايو ويو ۽ مشينري ذريعي هٽائڻ جا حڪم جاري ڪندي چيو ته جيستائين پهاڙ جي چوٽين کي درست نه ڪيو ويندو ان وقت تائين گهرن کي خالي رکيو وڃي، هن وڌيڪ چيو ته افسوسناڪ حادثي ۾ فوت ٿيندڙ 5 ڄڻن جي دفنائڻ جو خرچ هو پاڻ برداشت ڪندو، ميونسپل ڪمشنر فوتگين تي ڏک جو اظهار ڪندي چيو ته وڌيڪ ماڻهو جيڪي جبل جي مٿان يا هيٺ آباد آهن اهي انتظاميا سان تعاون ڪن ۽ پنهنجا گهر فوري طورتي خالي ڪن، مڪاني آفيسرن امدادي ڪم جي حوالي سان بريفنگ ڏيندي ٻڌايو ته متاثرن لاءِ انتظاميا پاران رليف ڪيمپ قائم ڪئي وئي آهي، جڏهن ته ڪرندڙ ڇپن کي هٽائڻ سان گڏ وڌيڪ خطرناڪ ڇپن کي هٽائڻ لاءِ به هنگامي طور تي قدم شروع ڪيا ويا آهن، علائقي ۾ ڪي اليڪٽرڪ پاران بجلي ڪٽڻ سبب رليف جي ڪم ۾ رڪاوٽ سبب جنريٽرن جي موجودگي کي يقيني بڻايو ويو آهي. ٻئي طرف  پنجاب جي علائقي پتوڪي ويجهو وين ۽ بس ۾ ٽڪر جي نتيجي ۾هڪ خاندان جي 4 ڀاتين سميت 6 ماڻهو فوت ۽ 12 کان وڌيڪ زخمي ٿي پيا.  ملتان روڊ جي باءِ پاس تي نعمت چوڪ وٽ ساهيوال کان لاهور ويندڙ وين ۽ بس ۾ ٽڪر ٿيو.  حادثي جي نتيجي ۾ هڪ عورت سميت 6 ڄڻا فوت ٿي ويا ۽  12 کان وڌيڪ ماڻهو زخمي ٿي پيا.  ريسڪيو ٽيمن پهچي فوتين جا لاش ۽ زخمين کي مقامي اسپتسال منتقل ڪيو، جتي ڇهن ڄڻن جي حالت ڳڻتي جوڳي ٻڌائي پئي وڃي.  ريسڪيو ذريعن جو چوڻ آهي ته حادثو تيز رفتاري سبب پيش آيو.

 

اداڪاره سني ليون اسڪرپٽ رائيٽنگ ۽ ايڊيٽنگ سکڻ لاءِ اسڪول ۾ داخلا وٺي ڇڏي

لاس اينجلس  (شوبز نيوز) بالي ووڊ ۾ بهادري وارا منظر عڪسبندي ڪرڻ جي حوالي سان شهرت رکندڙ اداڪاره سني ليون اسڪرپٽ رائيٽنگ ۽ ايڊيٽنگ سکڻ لاءِ اسڪول ۾ داخلا وٺي ڇڏي، اداڪاره سني ليون تازن ڏينهن ۾ فلمي دنيا کان پري آمريڪي شهر لاس اينجلس ۾ موڪلون گذاري رهي آهي ۽ سوشل ميڊيا تي مداحن کي سير تفريح جون تصويرون شيئر ڪري پنهنجي مصروفتين کان آگاهه ڪندي رهي ٿي پر ان سان گڏ هاڻ سني ليون پاران ايندڙ نئين خبر سڀني کي حيران ڪري ڇڏيو آهي، سني ليون لاس ايجلس جي اسڪول ۾ داخلا ورتي آهي، هن جو چوڻ هو ته مان ان ڪورس لاءِ ڪافي اڳ سوچيو هو پر فلمي مصروفتين سبب نه ڪري سگهيس پر هاڻ نيون شيون سکڻ لاءِ ٻيهر اسڪول وڃڻ تي ڪافي نروس آهيان.

 

راني مکرجي ٿوري وقفي کانپوءِ پنهنجي نئين فلم ”هچڪي“ جي شوٽنگ شروع ڪري ڇڏي

ممبئي (شوبز نيوز) بالي ووڊ جي ناليواري اداڪارا راني مکرجي ڪجهه عرصو وقفي کانپوءِ پنهنجي نئين فلم ”هچڪي“ جي شوٽنگ شروع ڪري ڇڏي آهي. رپورٽن موجب 39 ورهين جي راني مکرجي پنهنجي نئين فلم ”هچڪي“ جي شوٽنگ شروع ڪري ڇڏي آهي، اها فلم سندس ڌيءُ جي پيدائش کانپوءِ يش راج فلم پراجيڪٽ سان فلمي دنيا ۾ واپسيءَ لاءِ پهرين فلم آهي. راني مکرجي آخري ڀيرو 2014ع ۾ ايڪشن فلم ”مرداني“ ۾ نظر آئي هئي، جنهن ۾ هن هڪ پوليس اهلڪارا جو ڪردار نڀايو هو.27

 

قومي ڪرڪيٽ ٽيم جي ڪپتان مصباح الحق ريٽائرمينٽ جو اعلان ڪري ڇڏيو

لاهور(اسپورٽس نيوز) قومي ڪرڪيٽ ٽيم جي ڪپتان مصباح الحق ويسٽ انڊيز خلاف سيريز کان پوءِ ريٽائر ٿيڻ جو اعلان ڪري ڇڏيو آهي. قومي ڪرڪيٽ جي ڪپتان مصباح الحق ريٽائرڊ مينٽ جو اعلان ڪري ڇڏيو آهي. ميڊيا سان ڳالهائيندي هن چيو ته ويسٽ انڊيز جي خلاف سيريز ڪيريئي جي آخري سيريز هوندي. هن چيو ته تياري سٺي آهي، ڪوشش آهي ته سيريز ۽ ڪيريئر جي سٺي پڄاڻي ڪيان. هن اعتراف ڪيو ته گذريل 2 3 ميچن ۾ سٺي ڪارڪردگي ناهي ڏيکاري سگهيو. ڪوشش آهي ته هي سيريز سٺي کيڏان ۽ کٽيان.

 

پاڪستان ۽ ويسٽ انڊيز جي ٽيمن وچ ۾ 3 ميچن جي سيريز جي پهرين ون ڊي ميچ اڄ پرو ويڊس ۾ کيڏي ويندي

لاهور (اسپورٽس نيوز) پاڪستان ۽ ويسٽ انڊيز جي ٽيمن ۾ 3 ون ڊي ميچن جي سيريز جي پهرين ميچ اڄ جمعو 7 اپريل تي پرو ويڊس ۾ کيڏي ويندي، پاڪستان کي پنهنجي ريڪنگ بهتر بڻائڻ لاءِ سيريز کٽڻ ضروري آهي، اها سيريز ٻنهي ملڪن لاءِ ان لحاظ کان به اهميت واري آهي ڇو ته ٻنهي ٽيمن کي هڪ ڏينهن واري عالمي ڪپ ۾ سڌو سنئون شرڪت لاءِ اچڻو آهي ۽ جيڪا ٽيم ان سيريز کي اڪثريت سان کٽڻ ۾ ڪامياب ٿي وئي ان جا امڪان روشن ٿي ويندا، جڏهن ته ٻي ٽيم کي ڪواليفائنگ مرحلي مان گذرڻو پوندو، هن وقت 5 پوائنٽ جي واڌ سان پاڪستان عالمي درجابندي ۾ اٺين، جڏهن ته ويسٽ انڊيز نائين نمبر تي آهي.

 

لاهور واقعو ،خدڪشي حملي جي پيرا ڪيڏانهن ويا..؟؟: غلام مصطفيٰ جمالي

پاڪستان جي ڪيترن علائقن ۾ ڏينهون ڏينهن وڏي تيزي سان خدڪش حملن ۾ اضافو ٿي رهيو آهي. سوال اهو آهي ته ڇا پاڪستان هن افسوسناڪ ۽ تباه ڪُن لهر جو رُخ موڙي سگهندو؟ حالت ايتري تيزي سان خراب ٿي رهيا آهن. جن کي ڏسي چئي سگهجي ٿو ته پاڪستاني سرڪار هن لهر کي قابو ڪرڻ ۾ ناڪام ٿي رهي آهي. سمورو پختون علائقو، جنهن ۾ اُتر ڏکڻي سرحدي صوبو ۽ قبائلي علائقا شامل آهن ۽ اُتر بلوچستان جو پختون قبضي وارا علائقا، طالبان جي اثر هيٺ آهن، ايستائين جو پنجاب ۽ سنڌ ۾ به خدڪش بمبار پيدا ٿي رهيا آهن .جنهن جي ڪري پوري ملڪ جو امن هڪ سواليه نشان بڻيل آهي.جڏهن ته انهي دهشتگردي جي حوالي سان ملڪ جي فوج تي هڪ نظر وجهجي ته انهي فوج به وسان ناهي گهٽايو.ڇو ٿه پاڪستان آرمي انهن دهشتگردن جي خلاف جيتري ويڙهه ڪئي آهي.۽انهي ويڙه اندر پنهنجي قوم جي بقا لاءِ. پنهنجا ڪيترائي نواجوان شهيد ڪرايا آهن. اها به سڀني کي خبر آهي.۽ اڃان به پاڪ فوج جا جوان انهي دهشتگردن سان وري رهيا آهن.پر ڪالهه جيڪو لاهور آدمشماري واري وين تي خدڪش حملو ٿيو جنهن ۾ فوجي جوانن سان گڏ آدمشماري وارو عملو موجود هو جنهن ۾ چار فوجي نوجوان شهيد ٿي ويا آهن،۽ آدمشماري واري ٽيم جا پڻ 7 ڄڻا شهيد ٿي ويا آهن ۽ 17 ڄڻا زخمي آهن جن مان ڪيترن جي حالت نازڪ آهي،لاهور اندر خد ڪش حملو ٿيو.ان کي ڏسي ڪري مونکي جرنل راحيل شريف جو اهو بيان ياد اچي ويو.جيڪو جنرل راحيل شريف پنهنجي عهدي تان استيفيٰ کان پهرين ميڊيا تي ڏنو هو.ته ان ۾ جنرل راحيل شريف ويندي ويندي هڪ بهترين ڳالهه ڪئي ته ان وقت تائين فوج ڪجه نه ٿي ڪري جيستائين پاڪستاني عوام اسان سان ملي ڪري انهي دهشتگردن خلاف انهي جنگ ۾ فوج جو ساٿ نه ٿي ڏئي.انهي ڪري مان جرنل راحيل شريف جي انهي ڳالهه مان سورهن آنا مطعمين آهيان.ڇو ته فوج ته ٻاهرين سطح تي دهشتگردن سان وڙهي رهي آهي.جڏهن ته ملڪ جي اندروني علائقي سطح تي هڪ نظر وجهجي ته هر ماڻهو انهي ڳالهه ۾ فوج سان تعاون ۾ رهي ته پنهنجي علائقي اندر ڪنهن مشڪوڪ ماڻهو کي ڏسي يا کيس اهڙي اطلاع هجي ته ڪو ڪنهن لاءِ وڏي سازش ڪري رهيو آهي.ته انهي جو هڪ دم سڪيورٽي عملي کي اعلاع ڏي جئين ڪنهن وڏي واقعي کي روڪي سگهجي.

پر ڏنو وڃي ته پاڪستان اندر انهي ڳالهه جو شعور پاڪستان جي عوام ۾ ذري جيتري جو به ناهي.جڏهن اڃان ڪالهه جي ڳالهه آهي.جڏهن ته پاڪستان جي تاريخ اندر خدڪش حملن تي ويهي لکجي ته شايد ڪيترا پنا ڀرجي وڃن.پر خدڪش حملن جي واقعن جي تاريخ نه کٽندي.لاهور اندر ٿيل خد ڪش حملو جنهن اندر شهيد ٿيلن جو انگ  10 ٻڌايو پيو وڃي.جڏهن ته 17کان وڌيڪ زخمي آهن.جن زخمين مان به ڪيترن  جي حالت ڳتڻي جوڳي ٻڌائي پئي وئي.عيد لاهور ۾ بيديان روڊ جي آدمشماري لاءِ پاڪ آرمي ۽ آدمشماري جي ٽيم کي خدڪش حملي جو نشانو بڻايو ۽ هي خدڪش حملو ان وقت ٿيو جڏهن پوري ملڪ اندر آدمشماري ڪرائي پئي وڃي انڪري هن حملي مان صاف ظاهر آهي ته اهو حملو آدمشماري کي روڪڻ جي هڪ سازش آهي جڏهن ته ڌماڪي ۾ استعمال ٿيندڙ بارود خطرناڪ استعمال ڪيو ويو هو جڏهن ته ڪالهه خد راڻا ثناالله چيو هو ته پاڪستان اندر ٿيندڙ دهشگردي جي منصوبا بندي افغانستان جي علائقي ڪنٽر مان ڪئي وڃي ٿي،.جڏهن لاهور واقعي جي زميواري اڃان ڪنهن به دهشتگرد تنظيم قبول ناهي ڪئي.مان سمجهان ٿو ته هن وقت پاڪستان اندر جيڪا دهشگردي واري صورتحال پيدا ٿي چڪي آهي .انهي ڪري مان سجهان ٿو ته هي اهي عناصر آهن.جيڪي پاڪستان اندر هڪ وڏي فرقيواريت جنگ ڪرائڻ ٿا چاهين.جڏهن ته پاڪستان جيڪو اڳ ئي انتهاپسندي جي گهيري ۾ آهي.ڇو ته ڏٺو وڃي ته پاڪستان اندر فرقيواريت ايتري حد تائين وڌي وئي آهي جو هر ڪو مخالف جماعت جا پير ڪڍڻ ۾ پورو آهي.مان سجهان ٿو ته اهو اسلام ته درس ناهي ڏنو ته اوهان ڪنهن بي گناه کي ويهي ماريو.انهن جو رت وهايو.انهن جي ٻچن کي يتيم ڪيو.جڏهن ته لاهور ۾ بيديان روڊ روڊ ڪو پهريون واقعو ناهي انکان پهرين به لاهور اندر مال روڊ خدڪش حملو ٿيو ان حملي جي زميواري به لشڪر جهنگوي وارن ئي قبولي هئي. سنڌ صوبي توڙي ملڪ جي چئني صوبن اندر نه رڳو دهشتگرد آهن پر ان کان وڌيڪ ڀارتي ايجنسي “را“جا ماڻهو به موجود آهن  جيڪي ملڪ اندر دهشتگردي ڪري رهيا آهن.انهي ڪري شايد پوري قوم انهي ڳالهه تي سوچيندي هوندي ته “را“جي پاڪستان اندر دهشتگردي ۽ انهن دهشتگردي جي واقعن ۾ شامل هجڻ جو ريگٽ ڪيترن ئي ڏينهن کان وٺي ٻڌي رهيا آهيون.پر اڄ تائين انهي “را“خلاف ڪا ڪاروائي ڇو ڪون ڪئي وئي آهي.

لاهور اندر هي خدڪش حملو ٿيو.جنهن جي نتيجي ۾ چار پاڪ فوج جي نوجوان ۾ 6 ڄڻا شهيد ٿي ويا.جيڪڏهن ڏسجي ته اهو سڀ ڪجهه پاڪستان جي امن امان جي بگاڙ جي زميوار صرف ۽ صرف ڀارتي ايجنسي “را“آهي اڄ به پاڪستاني قوم پنهنجي پيارن جا لاش ميڙي رهي آهي.مان ڪالهه کان وٺي مختلف انڊيا جا نيوز چيئلن ڏسي رهيو آهيان ته انهن نيوز چيئلن تي پاڪستان اندر ٿيل خدڪش حملي کي ڪهڙي شڪل ڏئي پيش ڪيو ٿو وڃي.پر مون انڊيا جي ڪنهن به چيئلن تي اها نيوز نه ٻڌي ته پاڪستان ۾ ڪو قهر ڪڙڪيو آهي.سواءِ هڪ ٻه چيلئن جي.جيڪي پڻ اهو ٻڌائي رهيا هئا ته.پاڪستان اندر خدڪش حملي جا ڪارڻ پاڪستان اندر وڌندڙ فرقيواريت آهي.جڏهن ته پاڪستان جي ڀيٽ ۾ انڊيا تي هڪ نظر وجهي ته پاڪستان کان وڌيڪ انڊيا ۾ تمام گهڻي فرقيواريت آهي.ڇو ته انڊيا اندر ڪيترن ئي قسمن جا هندو رهن ٿا.جن جا پاڻ ۾ تمام گهڻا اختلاف آهن.پر اڄ تائين انهن هندن پيٽن تي بم ٻڌي ڪري پنهنجي جا لاش نه ڪرايا.جڏهن ته انهي ڀيٽ اندر پاڪستان ۾ اهو مهينو کالي ناهي جنهن اندر ڪو خدڪش حملو نه ٿيو هجي.هن وقت تائين پاڪستان انهي وڌندڙ خدڪش حملن جي ڪري پنهنجي قوم جو تمام گهڻو نقصان ڪري چڪو آهي.جڏهن ته ڪالهه ٿيل لاهور واقعو به نه پهريون واقعو آهي نه آخري ڇو ته ملڪ اندر اڃان به اهي دهشتگرد موجود آهن.جيڪي پاڪستان جي قوت کي ڪمزور ڏسڻ چاهين ٿا.جڏهن ته انهي وڌندڙ دهشتگردي ملڪي ماحول تي پڻ تمام گهڻا اثارات وڌا آهن.ڪو واپاري پاڪستان اندر کلي واپار نه ٿو ڪري سگهي ڪو شهري شهر مان خريداري نه ٿو ڪري.سگهي.ڪو سياح ملڪ گهمي نه ٿو سگهي. الاءِ ته ملڪ ۾ ڪهڙي ڊپ واري فضا هلي رهي آهي.جنهن پوري عوام کي حراسان ڪري ڇڏيو آهي.آخر پاڪستاني قوم ڪڏهن سک جو ساه کڻندي.۽ ڪڏهن پنهنجي مرضي ۽ آزادي واري زندگي گذاري سگهندي.ڪيڏي نه افسوس جهڙي ڳالهه آهي ته قومن پنهنجي بقا لاءِ ۽ پنهنجي ايندڙ روشن مسقبل لاءِ ڏينهن رات هڪ ڪري اهي منزلون ماڻيون.جن جا انهن خواب ڏٺا هئا ۽ اسين انهي قوم جا هوندي به سسڪين وارو ساه کڻي رهيا آهن.لاهور واقعو آدمشماري کي روڪڻ جي سازش آهي ته پوءِ ڇا ملڪ ۾ اڃان نه اهڙيون سازشون ٿي سگهن ٿيون خاص طور ٿي سنڌ صوبي ۾ جيڪو صوبي سڪيورٽي جي حساب سان ننڌڻڪو بڻيل آهي،ڪالهه سنڌ جي آءِ جي اي ڊي خواجه بيان ڏنو آهي ته سموري صوبي اندر سڪيورٽي جي انتظامن کي سخت ڪرڻ جي هدايت جاري ڪئي وئي آهي جيڪو هڪ سٺو ۽ بهترين عمل آهي پر مان سمجهان ٿو ته ان لاءِ به آءِ جي سنڌ جي انهي بيان کي عملي جامو پارائڻو پوندو ڇو ته سنڌ پوليس جي ڪارگردگي اهڙي سٺي ناهي جنهن جو مثال سيوڻ شريف درگاهه تي ٿيندڙ خدڪش حملو آهي،انڪري آءِ سنڌ کي سنڌ پوليس جي سخت نوٽيس وٺي ڪري هدايتون جاري ڪرڻيون پونديون،

 

 

 

جڏهن سنڌ، سنڌ ڪندڙ دل ڌڙڪڻ ڇڏي ڏنو..!!: دريا خان جهتيال/دادو

سنڌ ڌرتي هونءَ تہ ڪيترن ئي بهادر انسانن کي جنم ڏنو آهي، جن پنهنجي ڌرتي ۽ قوم خاطر پنهنجي سڄي زندگي وقف ڪري ڇڏي آهي ۽ ڪڏهن بہ پنهنجو ڪنڌ جهڪايو نہ، پر سدائين ڪپايو آهي، اهڙن لازوال ڪردارن منجهان بشير خان قريشي بہ هڪ آهي، بشير خان قريشي جي سڀ کان وڏي خوبي سادگي ۽ نوڙت هوندي هئي، ننڍن ٻارن توڙي نوجوانن ۽ بزرگن سان نوڙت ۽ وڏي پيار ۽ چاهہ سان ملندو هئو، هُو سنڌ ۽ سنڌين جي هر مسئلي جي حل لاءِ انهن سان گڏ روڊن تي ويهندو هو، جنهن سبب سڄي سنڌ جا ماڻهو هن سان بيحد محبت ڪندا هئا ۽ ڪندا آهن، هُن سائين جي ايم سيد جو نظريو جهر جهنگ، واهڻ وستي، وڏن شهرن توڙي ننڍن ڳوٺن تائين پکيڙيو، شايد اهو ئي سبب هو جو شهيد بشير خان قريشي سدائين سنڌ جي ازلي ويرين جي اکين ۾ ڪنڊو بڻيل رهيو، بشير خان قريشي سڄي زندگي سنڌ ۽ سنڌي ماڻهن جي حقن لاءِ ڏينهن رات جدوجهد ڪندي گذاري، هُو سنڌ جي واهڻ، وستين سان عقيدت جي حد تائين محبت ڪندو هو، سنڌ ڌرتي جي مسڪين ماروئڙن تي هو هر دم ساهہ ڏيندو هو، هن جي عاجزي هر ماڻهوءَ کي موهي وجهندي هئي، سندس ملڻ ۾ نوڙت، سندس نيڻن ۾ سنڌ ۽ سنڌي ماڻهن لاءِ پيار جو سمُنڊ لهرون پيو هڻندو هو، هو انصاف لاءِ ٻاڏائيندڙ پريس ڪلبن جي آڏو ويٺل ماڻهن سان ملي مسئلا معلوم ڪندو هو، ڪڏهن ڪنهن پيادل مارچ ۾ پگهريل ڪنهن پيرسن کي ڀاڪرن ۾ ڀڪوڙي سندس هٿڙا چمندو هو، هو تہ دردن جي ستايل جيجل امڙين جي احتجاج ۾ شامل ٿي کانئن دُعا جي اپيل بہ ڪندو هو، سنڌ جو پاڻي ڪيس هجي يا هارين جي حقن لاءِ احتجاج، ڪالاباغ ڊيم خلاف ڌرڻو هجي يا سنڌ جي ورهاڱي جي ڪا سازش يا وري سنڌ جي نياڻين کي ڌمڪي وارا خط ملڻ وارو مامرو هجي، هِن دودي جي للڪار سڀ کان اول اٿندي هُئي، هُو هر ڌرتي ڌڻين جي مسئلن تي سدائين سندن سڏ ۾ سڏ ڏئي احتجاج ۾ شامل ٿيندو هو، سَن جي سائين جي ايم سيد جي فڪر، سوچ ۽ سنڌ جو ارڏو عاشق سنڌ جي مسڪين ماڻهن ۾ سدائين محبتون ورهائيندو هو، سيد جي سوچ سان سلهاڙيل سنڌ جي هن البيلي عاشق سنڌ سان پاڻ ملهايو، هُو چوندو هو تہ”منهنجو مرڻ جيئڻ سنڌ سان آهي”، سائين جي ايم سيد جي فڪر جي امين سنڌ جي مُحبت جي ”ڏوهہ” ۾ ڪيترائي سال جيل بہ ڪاٽيو، ڪروڙين ماڻهن جون محبتون گڏ هجڻ باوجود شهيد بشير خان ڪڏهن بہ غرور نہ ڪيو، هو صوفي صفت انسان هو، هن ڪراچي شهر تي پنهنجي مالڪيءَ جو احساس ڏياريندي ان کي پنهنجي سياست جو محور ۽ مرڪز ٺاهيو، هن سنڌ جي حقن تي ڪڏهن ڪا بہ سوديبازي نہ ڪئي، هن کي جڏهن ڪراچيءَ ۾ غير قانوني هٿيار رکڻ جي ڪوڙي ڪيس ۾ گرفتار ڪيو ويو تہ، سڄي سنڌ سندس محبت ۾ چند منٽن ۾  بند ٿي وئي ۽ سراپا احتجاج بڻجي وئي هئي بعد ۾ ڪوڙي ڪيس مان آزاد ٿيڻ تي سڄي سنڌ جي ماڻهن خوشيءَ ۾ مٺايون ورهايون هيون، جڏهن رات جي اونداهيءَ ۾ سنڌ کي انتظامي طور ورهائڻ جو آرڊينس جاري ڪيو ويو هو، تہ شهيد بشير خان قريشيءَ پاران بروقت پريس ڪانفرنس ڪري آرڊينس جي واپسيءَ تائين اڻڄاڻايل مُدي تائين هڙتال ۽ احتجاج جو سڏ ڏنو هو، جنهن بعد ان آرڊينس تان سرڪار هٿ کنيو هو، شهيد بشير خان قرشي هر وقت سنڌ جي ماروئڙن جي لاءِ بي پناهہ جدوجهد ڪئي، هن برادري تڪرارن جي خاتمي لاءِ تمام گهڻيون ڪوششون ورتيون، بشير خان قريشيءَ جي هلي وڃڻ تي ڪيترين ئي ڌرين کيس مان ڏيندي تڪرار ختم ڪري ڇڏيا، بشير خان قريشي 2012ع ۾ جڏهن فريڊم مارچ جو سڏُ ڏنو هو، تہ ان وقت سنڌ ڌرتيءَ جا لکين عاشق پنهنجي سرن جي پرواهہ نہ ڪندي پنهنجي هڙان وَڙان خرچ ڪري پنهنجون گاڏيون ڪرائي 23 مارچ تي ڪراچيءَ ۾ گڏ ٿيا ۽ اهو فريڊم مارچ دنيا جي نظر ۾ پڻ رهيو، تہ هڪ ماڻهو جنهن وٽ ڪو اقتدار ناهي، جنهن وٽ ڪا لالچ ناهي ان  لکين ماڻهو گڏ ڪيئن ڪيا؟، بي بي سي جي رپورٽ موجب 23 مارچ 2012ع تي نمائش چورنگي کان تبت سينٽر تائين فريڊم مارچ ۾ گڏ ٿيل ماڻهن جو تعداد 45 کان 50 لک هو، ان فريڊم مارچ کان پوءِ آخرڪار ٿيو اهو جنهن جو خدشو هو، بشير خان جي دل جڏهن ڌڙڪندي هئي تہ سنڌ جي دل ڌڙڪندي هئي، جڏهن ان دل جي ڌڙڪڻ بند ٿي تہ سموري سنڌ توڙي دنيا ۾ رهندڙ هر سنڌين جي دل مان ڳوڙها وهڻ شروع ٿي ويا، سال 2012ع جي 7 اپريل جو اُڀريل سِج ڌرتي ڌڻين جي حقن لاءِ سوڳوارين جو اهڙو تہ سلسلو کڻي نڪتو، جيڪو اڃا تائين جاري آهي، 7 اپريل تي سڪرنڊ کان ڪجهہ ڪلو ميٽر تي ڳوٺ دڙي مگسي ۾ سنڌ جي عاشق بشير خان قريشي کي هڪ سازش طور زهر ڏئي شهيد ڪيو يو، سندس دِل دڙڪڻ ڇڏي ڏنو، اها دل خاموش ٿي وئي هُئي، جيڪا نہ صرف سنڌ جي مسڪين ماڻهن جي سڏ ۾ سڏ ڏيندي هُئي پر انهيءَ ۾ سنڌ سمايل هُئي، بشير خان قريشي جيڪا سنڌ جي آجپي لاءِ جدوجهد ڪئي تاريخ ان کي ڪڏهن بہ نہ وساري سگهندي، شهيد بشير خان قريشي جو وڇوڙو سنڌ جي ماڻهن لاءِ سواليہ نشان بڻيل آهي، شهيد بشير خان قريشي سنڌ جي آجپي کي ڪنهن بہ موڙ تي نہ ڇڏيو، هُو سڄي قافلي کي اهڙي واٽ تي وٺي وڃي رهيو هو، جتان آجپي واري منزل هڪ ڏينهن ضرور ملڻي هئي، ڪراچيءَ جي ڪامياب فريڊم مارچ ۾ لکين سنڌين جي شرڪت ڏسي سنڌ جي آجپي واري جدوجهد ۾ جاکوڙيندڙ ماڻهو جا حوصلا وڌيا، اُتي وري اهو مارچ دُشمنن کي اک ۾ ڪَنڊي جيان چڀيو هو، 7 اپريل تي اُهو چنڊ هميشہ لاءِ اُبدي آرامي ٿي ويو، جيڪو هن رات جهڙي سماءُ ۾ روشني جو امين هو، جنهن کي ڌرتي ڌڻي سنڌ صدين تائين ساريندي رهندي، سندس شهادت مير مرتضيٰ ڀٽو جيان پيپلز پارٽي جي وفاقي دور ۾ ٿي، حڪومت پاران ڪيترن ئي واعدن باوجود سندس پوسٽ مارٽم رپورٽ منظر عام تي نہ آندي وئي،  اڄ سنڌ جي بهادر پُٽ شهيد بشير خان قريشي جي 5 ورسي آهي، پر اڃا تائين شهيد بشير خان جا قاتل سنڌي قوم جي سامهون نہ اچي سگهيا آهن، اڄ تائين سنڌ جي هر قومي ڪارڪن جو اهو ئي مطالبو آهي تہ سنڌ جي ارڏي عاشق شهيد بشير خان قريشي جي پوسٽ مارٽم رپورٽ سنڌي قوم اڳيان آندي وڃي، قتل ۾ ملوث ڏوهارين کي بيرحماڻا سزا ڏني وڃي، سنڌ جي عاشق تي سنڌ توڙي سڄي دنيا ۾ رهندڙ سنڌي ناز ڪندا رهندا.

رات ڪيڏي بہ ڪاري انڌاري هُجي،

وحشتن جي وريل ڀل تہ واري هُجي،

ها مگر رات جي رهزنن کي چئو،

آءُ ايندُس وري  آءُ ايندُس وري

 

 

اي ڊي خواجه کي هٽائڻ لاءَ سنڌ سرڪار جي هيٽرڪ…!

“وڏي وزير   جي صدارت ھيٺ ٿيل ڪابينا اجلاس ۾ اي ڊي خواجا کي ھٽائڻ جي منظوري ڏني وئي آھي ۽ ان جون جون خدمتون وفاق حوالي ڪيون وينديون. سندس جاءِ تي عبدالمجيد دستي کي سنڌ جو نئون آءِ جي بڻائڻ جو فيصلو ڪندي ڪيو ويو آهي جڏهن ته اي ڊي خواجا آءِ جي سنڌ جو عهدو ڇڏڻ کان انڪار ڪري ڇڏيو آهي،  وفاق ۽ سنڌ حڪومت ۾ تڪرار وڌي ويو آهي اي ڊي خواجه آءِ جو موقف آهي ته منهنجو آءِ جي عهدي تي رهڻ يا نه رهڻ عدالت تي ڇڏيل آهي آهي مان ڪنهن به صورت ۾ استعيفا نه ڏيندس عدالت جيڪو به فيصلو ڪندي اهو قبول هوندو.  هوڏانهن سنڌ سرڪار فوري طور تي ڪابينا جو اجلاس گهرايو جنهن ۾ اهڙا فيصلا ڪيا ويا جڏهن ته سرڪاري پڌرائي ۾ اي ڊي خواجه کي هٽائي سردار عبدالمجيد دستي کي نئون آءِ جي مقرر ڪرڻ جي منظوري بابت ڪو به ذڪر نه ڪيو ويو سرڪاري پڌرائي موجب سنڌ ڪابينا جي اجلاس ۾ پاڻي جي کوٽ کي اڪارڊ مطابق شيئر ڪرڻ، پاڻيءَ جي کوٽ دوران ڪو به ڊيم نه ڀريو وڃي،  پاڻيءَ جي کوٽ دوران سمورا لنڪس ڪينال بند ڪيا وڃن، ڪپهه جي پوکيءَ کي بچائڻ لاءِ سنڌ جي پاڻيءَ جون گهرجون پوريون ڪيون وڃن، اسان کي منگلا ڊيم مان پاڻي ناهي ڏنو ويندو، جيڪڏهن تربيلا ۾ پاڻي نه آهي ته اسان کي پاڻي منگلا ڊيم مان ڏنو وڃي. سنڌ جي وڏي وزير سيد مراد علي شاهه اهو به مطالبو ڪيو ته ڪوٽڙي بئراج کي پاڪستان جو حصو سمجهي پاڻي ڏنو وڃي. وڏي وزير چيو ته مون اجلاس انڪري گهرايو آهي ته سموري صوبي ۾ تمام گهڻي لوڊشيڊنگ ٿي رهي آهي، زرعي ۽ پيئڻ جي پاڻيءَ جو بحران آهي، ماڻهو انهن مسئلن سبب پريشان آهن، انڪري مون سوچيو ته ڪابينا کي اعتماد ۾ وٺان.  اجلاس ۾ ڪابينا کي سيڪريٽري آبپاشيءَ ٻڌايو ته ارسا جي مطابق ربيع جي موسم ۾ پاڻي جي گهٽتائي 17 سيڪڙو تائين هوندي آهي پر هاڻي 50 سيڪڙو کان وڌيڪ آهي. مارچ جي گذريل ڏهن ڏينهن ۾ پاڻي جي صورتحال ڏٺي وڃي ته 55 سيڪڙو آهي ۽ اسڪردو ۾ گرمي پد وڌي رهيو آهي جنهن ڪري برف پگهرجندي ۽ خريف جي شروع ۾ 12 سيڪڙو کوٽ هئي پر اها 50 سيڪڙو تائين وڌي ويندي.

وڏي وزير پاڻي کوٽ تي واضح پاليسي اختيار ڪئي آهي، جنهن مطابق پاڻي جي کوٽ کي رڪارڊ مطابق شيئر ڪيو وڃي، پاڻيءَ جي کوٽ دوران ڪو به ڊيم نه ڀريو وڃي،  پاڻيءَ جي کوٽ دوران سمورا لنڪس ڪينال بند ڪيا وڃن، ڪپهه جي پوکيءَ کي بچائڻ لاءِ سنڌ جي پاڻيءَ جون گهرجون پوريون ڪيون وڃن، اسان کي منگلا ڊيم مان پاڻي ناهي ڏنو ويندو، جيڪڏهن تربيلا ۾ پاڻي نه آهي ته اسان کي پاڻي منگلا ڊيم مان ڏنو وڃي. ڪوٽڙي بئراج کي پاڪستان جو حصو سمجهي پاڻي ڏنو وڃي. صوبي ۾ وڌندڙ لوڊشيڊنگ تي شديد اعتراض آهن، ماڻهو گرميءَ ۾ مري رهيا آهن، اسپتالن ۽ درگاهن کي به بجليءَ جي لوڊشيڊنگ کان نه ٿو بخشيو وڃي.