تازيون خبرون

Daily Archives: April 3, 2017

درگاهه جي گاديي نشين 4 عورتن سَميت 20 مريدن کي قتل ڪري ڇڏيو، گرفتار

سرگوڌا  (اين اين آءِ/ ويب ڊيسڪ)سرگوڌا ۾ هيانءَ ڦاڙيندڙ واقعو پيش آيو آهي، روحانيت جي لاءِ ايندڙ دهشتگ جي وَر چڙهي ويا، درگاهه جي گادي نشين پنهنجي ساٿين سان گڏجي 4 عورت سميت 20 ڄڻن کي وحشياڻي تشدد جو نشانو بڻائڻ کان پوءِ کين قتل ڪري ڇڏيو، پوليس درگاهه جي گادي نشين عبدالوحيد سميت 7 ڄڻن کي گرفتار ڪري ورتو آهي، سرگوڌا واقعي جهالت جي دور جي ياد تازي ڪري ڇڏي آهي، واقعو سرگوڌا جي ڳوٺاڻي علائقي 95 اتر ۾ قائم درٻار ۾ پيش آيو جتي علي محمد گجر جي گادي نشين عبدالوحيد پنهنجي ساٿين سان گڏ درگاهه تي موجود 6 عورت سميت 22 ٺڄڻن کي نشو کارائي بيهوش ڪيو پوءِ مٿن ڏنڊن ۽ خنجرن جا وار ڪيا جنهن جي تصديق سرگوڌا جي ڊپٽي ڪمشنر لياقت چٺا به ڪئي آهي، تشدد کان پوءِ درگاهه مان 2 عورتن سيمت 3 ماڻهو زخمي حالت ۾ ڀڄي ڊي ايڇ ڪيو اسپتال پهتا، زخمن سان چور عورت پاڻ تي ٿيندڙ ظلم جو داستان بيان ڪيو، ڊاڪٽرن زخمين جي حالت بابت ٻڌايو ته سندن ڄنگھن ۽ چيلهه تي تشدد ۽ خنجرن جي وار جا نشان موجود هئا، سڀني ماڻهن تي تشدد نشي جي حالت ۾ ڪيو ويو هو، واقعي ۾ قتل ڪيل 17 ماڻهن جي سڃاڻپ ٿي وئي آهي، قتل ٿيندڙن مان ٻن جو تعلق اسلام آباد سان، هڪ جو ميانوالي سان، ٻن جو ڪاليه ۽ ڪيترائي مقامي ماڻهو شامل هئا، هڪ ئي خاندان جي ڇهه ماڻهو پڻ مري ويا آهن، ايس ايڇ او موجب جوابدار ماڻهن کي اگھاڙو ڪري تشدد ڪندا رهيا، متولي عبدالوحيد سميت 5 ڄڻن کي گرفتار ڪيو ويو آهي، جوابدار عبدالوحيد اليڪشن ڪميشن جو ملازم به آهي، پنجاب جي وڏي وزير شهباز شريف سرگوڌا واقعي جو نوٽيس وٺندي رپورٽ طلب ڪري ورتي آهي. 16 لاشن جو پوسٽ مارٽم مڪمل ڪيو ويو آهي.سرگوڌا ۾ 20 مريدن کي موت جي ننڊ سمهاريندڙ جوابدار عبدالوحيد اعتراف ڪندي چيو آهي ته ان کي شڪ هو ته مقتول ماڻهو ان کي زهر ڏيڻ چاهين ٿا، ڊي سي سرگوڌا موجب جوابدار ڏوهه جو اعتراف ڪندي ٻڌايو ته انهن سمورن ماڻهن کي پهريان نشي واريون شيون پياريون ۽ پوءِ دوستن سان گڏ ڏنڊن ۽ خنجرن جا وار ڪري انهن کي موت جي ور چاڙهي ويو، جوابدار ٻڌايو ته ان کي شڪ هو ته ان جي پير علي احمد گجر جيڪو 2 سال اڳ لاڏاڻو ڪري ويو هو ان کي زهر ڏنو ويو هو ۽ اهو به شڪ هو ته هاڻ ان کي به زهر ڏيڻ جو منصوبو جوڙيو پيو وڃي ان لاءِ مون کي پنهنجي پير جي قتل جو بدلو وٺڻ ۽ پاڻ کي بچائڻ لاءِ انهن سمورن ماڻهن کي موت جي ور چاڙهي ڇڏيو.

 

عمران خان جو مقصد ملڪ ۾ انتشار ۽ فساد ڦهلائڻ آهي: مريم اورنگزيب

اسلام آباد (اين اين آءِ) سڌ سماءَ جي مملڪتي وزير مريم اورنگزيب چيو آهي ته پاڪستان جو ٽيون ڀيرو چونڊيل وزيراعظم پنهنجي اولاد جو جواب ڏئي رهيو آهي، عمران خان کان جواب گهرون ٿا ته گاريون ڏئي رهيو آهي، خان صاحب اهو وقت پري نه آهي جڏهن توهان کي به پنهنجي اولاد وانگر ملڪ ڇڏڻو پوندو، عمران خان ڪوڙ ڳالهائڻ تي ملڪ ۾ فساد وجهڻ ۽ ڪي پي ڪي جي عوام کي ڌوڪو ڏيڻ تي الله کان معافي گهرو ۽ 2018 جي تياري ڪريو، هڪ بيان ۾ هن چيو ته عمران خان توهان جيترا به ڪوڙا الزام لڳايو ۽ ڪيترو به رڙيون ڪريو، 2018 ۾ عوام کي جواب ڏيڻو پوندو، هن چيو ته عمران خان ملڪ جي قوم جو سڀ کان وڏو مسئلو توهان آهيو، عمران خان توهان جو سڀ کان وڏو مسئلو پاڪستان جي ترقي آهي ۽ توهان هر اداري تي الزام لڳائڻ جو ٺيڪو کنيو آهي، ڪي پي ڪي ڏيڍ سال کان احتساب ڪميشن کي تالو لڳل آهي، هن چيو ته عمران خان توهان کان ته ڪجهه به نه ٿيو، اڃا به وقت پاڪستان جي ترقي ۽ خوشحالي ۾ وزيراعظم نواز شريف جو ساٿ ڏيو.

 

سنڌ کي ان جو حق نه ملندو ته خاموش نه ويهنداسين: خورشيد شاهه

سکر(بيورو) مخالف ڌر اڳواڻ سيد خورشيد شاهه چيو آهي ته اسان پاڪستان کي خوشحال ڏسڻ چاهيون ٿا، اهو سياست ڇا ڪندو جيڪو جيل ۽ پوليس جي لاٺي چارج کان ڊڄندو هجي، جلسي کي خطاب ڪندي سيد خورشيد شاهه چيو ته شادي جي پروگرامن ۾ وزيرن ۽ ٻين اڳواڻن کي دعوت ناهي ڏني ويندي، سنڌ کي پاڻي ڏنو وڃي، بجلي ڏني وڃي ۽ ان جو حق ڏنو وڃي، 2014 ۾ لوهي جي ديوار بڻجي اسان جمهوريت کي بچايو، هڪ ليڊر ورڪر لٺيون کائي رهيا هئا ۽ اهو گهر ۾ لڪيو ويٺو هو، اسان جي سياست گار گند واري ناهي، هن چيو ته هاڻي ماڻهو پاناما جي پاڇي ۾ جي رهيا آهن، جيڪڏهن سنڌ کي ان جو حق نه ملندو ته اسان خاموش نه ويهنداسين.  حڪمران صوبائي مسئلن کي اهميت نه ٿا ڏين ۽ وفاق جي ناقص پاليسين جي ڪري صوبن وچ ۾ نفرتون جنم وٺي رهيون آهن، خورشيد شاهه چيو ته پيپل زپارتيءَ سدائين وفاق جي مضبوطيءَ جي ڳالهه ڪئي آهي پر اسان جي ڳالهه ڪير به ٻڌڻ جي لاءِ تيار نه آهي، سنڌ ۽ بلوچستان کي نظر انداز ڪيو پيو وڃي، ڏکڻ پنجاب جو حال ته سنڌ کان به خراب آهي، پاڻيءَ جي لاءِ سنڌ ۽ بلوچستان جو عوام دانهون ۽ رڙيون ڪري رهيو آهي، اسان پارليامينٽ ۾ آواز اٿاريو ته حڪومت طرفان 5 هزار ڪيوبڪ فٽ پاڻي وڌايو ويو، سنڌ کي في الحال پورو پاڻي ڏنو وڃي جيئن بلوچستان کي به پاڻي ڏئي سگھون، خورشيد شاهه جو چوڻ هو ته ڪجھه ماڻهو نااهليءَ جي ڪري اهڙا قدم کڻندا آهن جنهن سان ملڪ کي ڪو نه ڪو نقصان پهچندو آهي، حڪمران معاملن کي اهميت نه ٿا ڏين، وفاق جي ڳالهه ڪندڙن کي ڀِت سان ڇو لڳايو ويندو آهي اهڙن قدمن سان نفرتون جنم وٺنديون آهن ۽ ملڪ کي سخت نقصان پهچي سگھي ٿو.36

 

شهيد ڀٽو کي ڪوڙي ڪيس ۾ ڦاسي ڏني وئي: نثار کهڙو

لاڙڪاڻو(اي پي پي) پاڪستان پيپلز پارٽيءَ شهيد ذوالفقار علي ڀٽو جي عدالتي قتل جي تاريخ ۾ درستگيءَ لاءِ ڀٽو قتل ڪيس جي ريفرنس تي جلد ٻڌڻيءَ ڪرڻ جو سپريم ڪورٽ جي چيف جسٽس کان مطالبو ڪري ڇڏيو آهي. اهڙو مطالبو آچر ڏينهن پيپلز پارٽي لاڙڪاڻو سٽي جي اڳوڻي صدر آفتاب ڀٽو پاران شهيد ذوالفقار علي ڀٽو جي عدالتي قتل ۽ نشاني تي جمهوريت جي علمبردار پاڪستان پيپلز پارٽي ڇو؟ جي عنوان هيٺ ڪرايل سيمينار ۾ ڪيو ويو. ان موقعي تي خطاب ڪندي پاڪستان پيپلز پارٽي سنڌ جي صدر نثار احمد کهڙو چيو ته شهيد ذوالفقار علي ڀٽو کي هڪ ڪوڙي ڪيس ۾ ڦاسي ڏني وئي ۽ فيصلو ڏيندڙ ان وقت جي جج پاران ڪيل اعتراف کان پوءِ هاڻي ثابت ٿي چڪو آهي ته شهيد ذوالفقار علي ڀٽو جو قتل عدالتي قتل هو. هن چيو ته شهيد ذوالفقار علي ڀٽو جو عدالتي قتل اڄ به انصاف جو منتظر آهي ۽ اسين سپريم ڪورٽ جي چيف جسٽس کان مطالبو ٿا ڪيون ته اڳوڻي صدر آصف علي زرداريءَ پاران شهيد ذوالفقار علي ڀٽو جي قتل بابت داخل ريفرنس تي جلد ٻڌڻي ڪري تاريخ ۾ درستگي ڪئي وڃي ۽ پيپلز پارٽيءَ سان انصاف ڪيو وڃي.. قانون سڀني لاءِ برابر هجڻ گهرجي. پ پ پ سنڌ جي جنرل سيڪريٽري وقار مهدي چيو ته شهيد ڀٽو کي عوام سان محبت ڪرڻ جي ڏوهه ۾ ڦاسي چاڙهيو ويو ۽ آمرن اهو سوچيو ته شهيد ڀٽو کي ڦاسي ڏئي پيپلز پارٽيءَ کي ختم ڪيو ويندو پر پيپلز پارٽي موجود آهي ۽ رهندي. ان موقعي تي خطاب ڪندي پيپلز پارٽي سنڌ جي اطلاعات سيڪريٽري عاجز ڌامراهه چيو ته شهيد ذوالفقار علي ڀٽو ملڪ کي آئين ڏنو ۽ ايٽمي قوت بڻايو پر عوام کي شعور ڏيڻ جي ڏوهه ۾ سندس عدالتي قتل ڪيو ويو . هن چيو ته تاريخ ۾ جڏهن کان پيپلز پارٽي وجود ۾ آئي آهي تڏهن کان پيپلز پارٽيءَ کي نشانو بڻائڻ جو عمل اڄ ڏينهن تائين جاري آهي پر حسينيت وانگر ڀٽو ازم هميشه لاءِ عوام جي دلين ۾ موجود رهندو. ان موقعي تي صوبائي وزير سيد سردار شاه چيو ته سياست جي تاريخ ۾ سڀ کان وڏيون قربانيون ڀٽوز جون آهن. هن چيو ته اڄ عدالتون شايد صرف پيپلز پارٽيءَ لاءِ آهن ، ماضيءَ ۾ آصف علي زرداريءَ کي الزامن تحت 11 سال قيد ۾ رکيو ويو ان جو به اسان کي حساب ڏنو وڃي. هن چيو ته پيپلز پارٽيءَ کي نشانو ٺاهڻ بند ڪيو وڃي، هن چيو ته شهيد ذوالفقار علي ڀٽو ڪيس جي ريفرنس جي ٻڌڻي ڪري پيپلز پارٽيءَ سان انصاف ڪيو وڃي. ان موقعي تي سينيٽر سسئي پليجو خطاب ڪندي چيو ته شهيد ذوالفقار علي ڀٽو جو عدالتي قتل منظم فيصلي تحت ڪيو ويو جنهن ڪيس جي فيصلي ۾ انصاف چاهيون ٿا. هن چيو ته شهيد ذوالفقار علي ڀٽو عوام کي شعور ڏنو ان کي ڦاسيءَ چاڙهي سمجهو ويو ته پيپلز پارٽي ختم ٿي ويندي پر پيپلز پارٽي اڃان به وڌيڪ جذبي سان آمرن سان مهاڏو اٽڪائڻ لاءِ ميدان ۾ آهي. ايم پي اي خورشيد احمد جوڻيجو چيو ته شهيد ڀٽو کي ايٽمي پروگرام تان هٿ کڻڻ لاءِ ٻاهرين ملڪن کان ڌمڪيون پڻ مليون هيون پر هو اٽل رهيو ۽ ملڪ کي ايٽمي قوت بڻائي ڏيکاريو ۽ هن ملڪ ئي آئين ڏئي پاڪستان جو نالو دنيا ۾ روشن ڪرايو. ايم پي اي روبينا قائمخاني ۽ ايم پي اي خيرالنساءِ مغل چيو ته پاڪستان پيپلز پارٽيءَ کي عوام ۾ پذيرائي هجڻ سبب اڄ به ملڪ رخن کان نشاني تي رکيو پيو وڃي. تقريب کي پاڪستان پيپلز پارٽي ضلعي لاڙڪاڻي جي صدر عبدالفتاح ڀٽو پڻ خطاب ڪيو. سيمينار ۾ ٺهراءُ پاس ڪري سپريم ڪورٽ جي چيف جسٽس کان مطالبو ڪيو ويو ته تاريخ ۾ درستگي لاءِ شهيد ذوالفقار علي ڀٽو جي عدالتي قتل بابت اڳوڻي صدر آصف علي زرداري پاران موڪليل ريفرنس جي جلد ٻڌڻي ڪئي وڃي. جڏهن ته شهيد ذوالفقار علي ڀٽي ۽ شهيد محترمه بينظير ڀٽو کي خراج تحسين پيش ڪندي پ پ پ جي چيئرمين بلاول ڀٽو زرداري ۽ ڪو چيئرمين آصف علي زرداري جي قيادت تي مڪمل اعتماد جو اظهار ڪيوويو،

 

نيب جو قانون مڪمل طور تي ناڪام ٿي چڪو آهي، سڀني جو برابر احتساب ٿيڻ گهرجي: سينيٽ چيئرمين

سکر (اين اين آءِ) سينيٽ جي چيئرمين ميان رضا رباني چيو آهي ته نيب جو قانون مڪمل طور تي ناڪام ٿي چڪو آهي، سڀني جو احتساب برابر ٿيڻ گهرجي، نيشنل سيڪيورٽي، پرڏيهي پاليسي سميت تمام فيصلا پارليامينٽ ۾ ٿيڻ گهرجن، آچر تي سکر ايئرپورٽ تي ميڊيا سان ڳالهائيندي سينيٽ جي چيئرمين ميان رضا رباني نيب تي ڪڙڪي پيو ۽ چيو ته نيب مڪمل طور تي ناڪام ٿي چڪو آهي، احتساب سنڀي جو برابري واري بنياد تي ٿيڻ گهرجي، سينيٽ جي چيئرمين احتساب لاءِ نيشنل اڪائونٽي بلٽي ڪميشن قائم ڪرڻ جي تجويز پڻ ڏني، رضا رباني چيو ته ڪجهه طاقتون ملڪ ۾ سول حڪمرانن جي بالادستي نٿيون چاهين ان لاءِ ذوالفقار ڀٽي جو عدالتي قتل ڪيو ويو، هن چيو ته سيڪيورٽي، پرڏيهي پالسي سميت سمورا فيصلا پارليامينٽ ۾ ٿيڻ گهرجن، ان کانپوءِ سينيٽ جو چيئرمين ڳڙهي خدا بخش ۾ پ پ جي قائد ذوالفقار علي ڀٽو ۽ شهيد راڻي بينظير ڀٽو جي مزار تي حاضري ڀري گلن جي چادر چاڙهي ۽ فاتح خواني ڪئي.

 

اسان لوڊشيڊنگ جي خاتمي نه، لوڊشيڊنگ گهٽائڻ جو واعدو ڪيو هو: خواجا آصف

سيالڪوٽ (ويب ڊيسڪ): پاڻي بجليءَ واري وفاقي وزير خواجا آصف چيو آهي ته پاڻي کوٽ سبب لوڊشيڊنگ ٿي رهي آهي، پاڻي کوٽ سان 4 کان ساڍا 4 هزار ميگا واٽ بجلي جي گهٽتائي آئي آهي، موجوده بجلي جو بحران عارضي آهي، هن چيو ته اپريل ۾ پاڻي جي مقدار ۾ اضافو ٿيڻ شروع ٿي ويندو، 116 ارب رپيا ريڪوري ۽ لائن لاسز جي مد ۾ بچايا آهن، اسان اپريل 2017 تائين لوڊشيڊنگ ختم ڪرڻ جو واعدو نه ڪيو هو، اسان لوڊشيڊنگ گهٽائڻ جو واعدو ڪيو هو.

 

پ پ کي آءِ جي نه گھر جو منشي کپي، کين اي ڊي خواجا ڀانءِ نه پيو: سعد رفيق

لاهور (ويب ڊيسڪ) ريلوي واري وفاقي وزير خواجا سعد رفيق جو چوڻ آهي ته پيپلز پارٽيءَ کي سنڌ ۾ ميرٽ تي ڪم ڪندڙ آءِ جي قبول نه آهي ڇو ته کين ايماندار پوليس آفيسر نه پر گھر جو منشي کپي، سنڌ حڪومت کي اي ڊي خواجا ڀانءِ نه ٿو پوي، لاهور ۾ ميڊيا سان ڳالهائيندي خواجا سعد رفيق جو چوڻ هو ته سياسي مخالف مون کي هيٺاهين ڏيکارڻ جي لاءِ ريلوي کي ٽارگيٽ بڻائي رهيا آهن، عمران خان سانحن تي سياست نه ڪري ڇو ته سندس الزام جي ڪا حيثيت نه آهي، عمران خان هوش ۾ گھٽ هوندو آهي ۽ جڏهن به هوش ۾ ايندو آهي ته ابتو سُبتو بيان ڏيندو آهي، عمران خان اسان کي سدائين شرم ڏياريندو رهيو آهي پر پاڻ شرم ناهي ڪندو، سعد رفيق چيو ته اسان جي پيپلز پارٽيءَ سان ڪا ڊيل نه پئي ٿئي، هُنن جي پنهنجي سياست ۽ اسان جي پنهنجي سياست آهي، پيپلز پارٽي کي هاڻي سنڌ ۾ رليف نه ملندو ڇو ته پيپلز پارٽيءَ سنڌ ۾ سياسي طور فارغ ٿي چڪي آهي، زرداري آئينو ڇو نه ٿو ڏسي،  ڪرپشن بابت زرداري صاحب جي پارٽي کي ته ڳالهه ئي نه ڪرڻ گھرجي جڏهن ته پيپلز پارٽيءَ کي سنڌ ۾ ميرٽ تي هلندڙ آ3 جي نه پر گھر جو منشي کپي، کين اي ڊي خواجا ڀانءِ نه ٿو پوي.36

 

آصف زرداري کان پڇو وڃي سري محل ڪيتري ۾ ورتو، ڪرپٽ ماڻهو ڪنهن به پارٽي جو هجي قوم کي ان خلاف اُٿڻو پوندو: عمران خان

تلا گنگ (اين اين آءِ) پي ٽي آءِ جي چيئرمين عمران خان چيو آهي ته آصف زرداري کي به ايندڙ اليڪشن وڙهڻو آهي ۽ اسان توهان کان پڇنداسين ته سري محل ڪيترن پيسن ۾ ورتو، توهان به ڪنهن قطري شهزادي کي پڪڙيو، 21 سالن کان ملڪ تبديل ڪرڻ جي جدوجهد ڪري رهيا آهيون، تمام جلد پاڪستان تبديل ٿيڻ وارو آهي، اي ڊي خواجه غلط ڪم نه ڪرڻ نه ڏئي رهيو، سنڌ حڪومت کي ميرٽ وارا آفيسر پسند نه آهن پر ان کي اهي آفيسر پسند آهن جيڪي ان کي مال ڪمائي ڏين، شرجيل ميمڻ 5 ارب جي ڪرپشن ڪئي، پاڪستان ۾ ائين آيو جيئن ورلڊ ڪپ کٽي آيو هجي، نواز شريف جو پاناما ڪيس ڪرپشن ۽ مني لانڊرنگ جو آهي، ميان صاحب نقل ڪرڻ لاءِ عقل گهرجي، جيستائين اسان گڏجي ڪرپٽ حڪمرانن کي شڪست نه ڏينداسين تيستائين اڳتي نه وڌي سگهنداسين، آچر تي تلا گنگ ۾ جلسي کي خطاب ڪندي عمران خان چيو ته تمام جلد ملڪ تبديل ٿيڻ وارو آهي. 21 سالن کان ملڪ کي تبديل ڪرڻ جي جدوجهد ڪري رهيا آهيون، پي ٽي آءِ هڪ صوبي جي نه پر سڄي ملڪ جي پارٽي آهي، سڄي ملڪ جا مسئلا حل ڪنداسين ڇو ته باقي سموريون پارٽيون صرف صوبن تائين محدود آهن، هن چيو ته اسان کي گهڻو ڪجهه مليو آهي پر اسان فائدو نه ورتو، پي ٽي آءِ ڪي پي ڪي ۾ ڪيترن ئي هنڌن تي تبديلي آندي آهي، ڪي پي ڪي پوليس کي ٺيڪ ڪري سياسي مداخلت ختم ڪري ايماندار آءِ جي آندوسين، ڇو ته جڏهن آءِ جي ميرٽ تي ايندو ته پوليس به صحيح ڪم ڪندي، ڪي پي ڪي جي پوليس بين الاقوامي پوليس جو مقابلو ڪري ٿي پر سنڌ جي آءِ جي اي ڊي خواجه کي ان لاءِ تبديل ڪيو ويو ڇو ته هو غلط ڪم ڪرڻ نه ڏئي رهيو هو ۽ پ پ وارن کي ماڻهو اهي پسند آهن جيڪي غلط ڪم ڪري پيسو ڪمائين ٿا، عمران خان چيو ته پاڪستان جو سڀ کان وڏو مسئلو ڪرپشن آهي، هن چيو ته آصف زرداري کان پڇنداسين ته سري محل ڪيترن پيسن ۾ورتو ۽ سوئيزر لينڊ ۾ 7 ملين ڊالر ڪٿان آيا، ان ڪري آصف زرداري توهان به ڪنهن قطر جي شهزادي کي ڳوليو ڇو ته توهان کي به ان جي ضرورت پوندي.

ڪرپشن جي خاتمي لاءِ عوام کي ردالڪرپشن جو آغاز ڪرڻو پوندو: سراج الحق

اسلام آباد (ويب ڊيسڪ): جماعت اسلامي امير سراج الحق چيو آهي ته منهنجي جماعت ان ڳالهه جي اجازت نٿي ڏئي ته ڪو شخص قانون هٿ ۾ کڻي، جلسي کي خطاب ڪندي سراج الحق چيو ته حڪمرانن جي ڪرپشن سبب سڄي ملڪ ۾ ڪرپشن وڌي وئي آهي، هن چيو ته ٿاڻي، پٽوار خاني هر اداري ۾ ڪرپشن جي مارا ماري آهي، سراج الحق چيو ته حڪومت بيروزگاري جي خاتمي ۾ ناڪام ٿي چڪي آهي، هن نظام کان بغاوت ڪرڻي پوندي، ڪرپشن جي خاتمي لاءِ عوام کي ردالڪرپشن جو آغاز ڪرڻو پوندو.

 

اپريل ۾اهم فيصلا ٿيندا، پاڪستان جو سياسي منظر ڀوائتو ٿيڻ وارو آهي: شيخ رشيد

لاهور (ويب ڊيسڪ) عوامي مسلم ليگ جي سربراهه شيخ رشيد چيو آهي ته اپريل پاڪستاني سياست جي اهم فيصلن جو مهينو آهي ۽ ملڪ جا سياسي منظر ناما تمام خوفناڪ ٿيندا پيا وڃن، لاهور ميڊيا ۾ ڳالهائيندي شيخ رشيد جو چوڻ هو ته پاڪستان جو سياسي منظر تمام ڀوائتو ٿيڻ ڏانهن وڌي رهيو آهي، هلندڙ مهيني پاڪستان جي سياست بابت فيصلا سامهون ايندا ۽ 15 اپريل کان سياست ۾ تمام گرمي اچي ويندي، شيخ رشيد جو چوڻ هو ته پيپلز پارٽي4 جي ڊيل واري باٿروم ۾ سڀ اگھاڙا آهن ۽ ملڪ جون سڀ سياسي پارٽيون عوامي مسئلا حل ڪرڻ ۾ خراب طرح ناڪام ٿي ويون آهن، سندس چوڻ هو ته فوج پوئتي رهي جمهوريت کي بچائڻ چاهي ٿي ۽ ملڪ کي اڳتي وٺي وڃڻ چاهي ٿي.