تازيون خبرون

Monthly Archives: March 2017

سوڊان ۾ قيد سنڌي: عاجز جمالي

اوهان ميڊيا تي ضرور ڏسندا هوندا ته ڪراچي يا پنجاب جو ڪو ماڻهو پرڏيهه ۾ ڦاٿل هوندو، قيد هوندو يا پڪڙجي پيو هوندو يا اغوا ٿي ويو هوندو ته هر طرف واويلا هوندي. ان واويلا جي نتيجي ۾ سرڪار ۾ ٿڙڦٿڙ هوندي. انساني حقن جون تنظيمون اڳيان اينديون، چندا مهم شروع ٿي ويندي پر جيڪڏهن سنڌ جي ٻهراڙين جي ڪنهن به ماڻهوءَ سان ڪو واقعو ٿئي ته هر طرف کان ماٺ ئي ماٺ آهي. ايتري قدر جو ستايل پريشان حال، ڪو سهارو نه ڏسي پريس ڪلب پهچندڙ والدين ڪا پريس ڪانفرنس به ڪن ته پوءِ به ڪنهن جي ڪن تي جونءِ به نه ٿي چُري. ٻه هفتا کن اڳ سوڊان مان بدين جو سنڌي انجنيئر اياز جمالي سوڊاني باغين جي ور چڙهي ويو، جنهن بابت اڃا تائين ڪير به ڪجهه ٻڌائڻ لاءِ تيار ناهي. ظاهر آهي ته غم ۾ ٻڏل پريشان حال ڪٽنب مٿان جيڪو گذرندو هوندو، ان بابت ڪو ٻيو ان ريت محسوس نه ٿو ڪري سگهي. گذريل هفتي اياز جي لانئون لهڻ جي تاريخ مقرر ٿيل هئي. ڪراچيءَ ۾ سندس وني جا حال بس اها ئي ڄاڻندي هوندي. اياز جي امڙ کي دورا پئجي رهيا آهن. سوڊان ۾ اياز جو ڀاءُ بابر جمالي ٻن هفتن کان ڀاءُ جي آزاديءَ لاءِ ڪوششون ڪري ٿڪجي پيو آهي، کيس وڏي سرڪار دم دلاسا ڏيئي رهي آهي. ٻيو مڙوئي خير. وزيراعظم نواز شريف ۽ پيپلزپارٽيءَ جي چيئرمين بلاول ڀٽو زرداري جي نالي سان اخباري بيان ته نظرن مان گذريا پر خبر ناهي ته کين خبر به آهي يا ناهي. جيڪڏهن خبر آهي ته ڪهڙيون سنجيده ڪوششون ورتيون ويون، سا خبر ڪنهن کي به ناهي!
انجنيئر اياز جمالي ۽ سندس ڀاءُ بابر جمالي آئل فيلڊ جا انجنيئر آهن، اطلاع آهن ته ٻئي ڀائر نوڪريون ڇڏي چُڪا آهن. ڇو ته سوڊان جون حالتون ٺيڪ ناهن، حڪومت مخالف باغين پرڏيهين کي ملڪ ڇڏڻ لاءِ چيو آهي. هنن ٻنهي ڀائرن کي گذريل هفتي واپس ڏيهه اچڻو هو ۽ انجنيئر اياز آخري ڏهاڙي تي سوڊاني يارن دوستن کان موڪلائڻ آئل فيلڊ تي ويو ته سوڊاني باغين کيس اغوا ڪيو. انجنيئر اياز جمالي جي آزاديءَ لاءِ سوشل ميڊيا تي هلندڙ ڪوششن سبب پرڏيهه ۾ رهندڙ ڪجهه قومپرست دوستن ذاتي ڪوششون ورتيون ۽ اهو ٻڌايو ويو ته باغين سان رابطي کانپوءِ اهو ٻڌايو ويو ته هو صحيح سلامت آهي ۽ کيس آزاد ڪيو ويندو، پر اهڙي پيغام کي به چار پنج ڏهاڙا گذري چُڪا آهن، انجنيئر اياز جي دوستن ۽ مٽن مائٽن ٻڌايو ته باغين سوشل ميڊيا تي اهو پيغام ڏنو ته پاڪستان جي سرڪار سڌي ريت باغين سان ڳالهائي ته هو انجنيئر اياز جماليءَ کي آزاد ڪندا. پاڪستان سرڪار جا تجربا ٻڌائين ٿا ته هو سڌي ريت حڪومت مخالف باغين سان رابطو نه ڪندا. مون کي ڪجهه سال اڳ بلوچستان مان اقوام متحده جي نمائندي ”سلونڪيءَ جي اغوا جو واقعو ياد پيو اچي. اقوام متحده جي نمائندي ”سلونڪي“ کي تربت جي علائقي مان اغوا ڪيو ويو هو. سرڪاري سطح تي آزاديءَ جون سموريون ڪوششون ناڪام ڏسي اقوام متحده بلوچ قومپرست اڳواڻ نواب خير بخش مريءَ سان رابطو ڪيو. اقوام متحده جي وفد هڪ ٻه چار نه پر اڻ ڳڻيا چڪر ڪاٽيا هئا، هر هفتي هڪ خاص قسم جي جيپ ۾ سوار ٿي گڏيل قومن جو وفد نواب خير بخش مري وٽ پهچندو هو ۽ کيس منٿ ميڙ ڪندو هو ته هو ٽياڪڙي ڪري سلونڪيءَ کي آزاد ڪرائي. اسان کي هر شرط منظور آهي. نواب خير بخش مريءَ باغين سان رابطن لاءِ قومپرست اڳواڻ غلام محمد بلوچ جي اڳواڻيءَ ۾ هڪ ٽيم جوڙي هئي. ڄاڻايل ٽيم ٽن مهينن تائين ڪوششون وٺي نيٺ سلونڪيءَ کي آزاد ڪرايو ۽ اقوام متحده جو نمائندو نواب خير بخش مريءَ معرفت ڌڻين تائين پهتو. پر ساڳئي وقت بلوچستان جي باغين جو مامرو اقوام متحده تائين اٿيو. سلونڪيءَ جي آزاديءَ کان هفتو کن پوءِ غلام محمد بلوچ ۽ سندس هڪ ساٿيءَ جو چچريل لاش تربت ڀرسان مليو. يعني بلوچ باغين کان انتقام ان صورت ۾ ورتو ويو. ظاهر آهي ته ان کانپوءِ به بلوچستان مان چچريل لاشن جو سلسلو بند ٿيو نه باغين ڪارروايون بند ڪيون. اهو سلسلو اڄ به جاري آهي، پر اڄ ته نواب خير بخش مريءَ جهڙو پُل جو ڪردار ادا ڪندڙ ڪو ڪردار به نه رهيو آهي.
سوڊان جا حڪومت مخالف باغي اصل ۾ موجوده بادشاهه جي خاندان جا ئي آهن، سندن اندرين اختلافن سبب بغاوت شروع ٿي ۽ حڪومت مخالف باغي مختلف ڪارروايون ڪن ٿا، خاص ڪري پرڏيهين کي نشانو بڻائين ٿا. معلوم ٿيو آهي ته آئل فيلڊ ۾ ڪم ڪندڙ ڪيترن ئي ماڻهن کي باغين اغوا ڪيو آهي، جن ۾ هندوستاني انجنيئرز به شامل هئا، پر هندوستانين جي بهتر سفارتي تعلقاتن سبب اُهي پنهنجا ماڻهو ڇڏائي ويا پر پاڪستان سان تعلق رکندڙ انجنئير اياز جمالي اڃا تائين ڦاٿل آهي، سڀ ڪو ڄاڻي ٿو ته سفارتي محاذ تي پاڪستان ڪيترو ڪمزور آهي، ان حد تائين جو مستند تي پرڏيهي وزير ئي ڪونهي. اسان جا گهڻا تڻا ماڻهو سنڌ سرڪار کي ڏوراپو ڏين ٿا، هن مامري ۾ سنڌ سرڪار جو ڪردار ايترو ئي جُڙي ٿو ته وفاق مٿان دٻاءُ وجهي ته هو سنڌ سان واسطو رکندڙ انجنيئر کي ڇڏائڻ لاءِ سفارتي محاذ کي سرگرم ڪري، پر سڌي ريت سنڌ سرڪار تي هن مامري ۾ ملامت ڪرڻ نه ٿي ٺهي. ها البته اوورسيز جو وفاقي وزير پير صدر الدين شاهه راشدي سڌي ريت سنڌ سان واسطو رکي ٿو. پير صدر الدين شاهه وٽ پرڏيهي ملازمتن جي وفاقي وزارت آهي، کيس پڻ انجنيئر اياز جمالي جي آزاديءَ لاءِ اسلام آباد مان پنهنجي وزارت کي متحرڪ ڪرڻ گهرجي. ٻڌايو پيو وڃي ته سوڊان سان سفارتي تعلقات نه هجڻ سبب ايٿوپين سرڪار وسيلي رابطو ڪيو ويو آهي، جيڪو به رستو اختيار ڪيو وڃي پر عالمي سطح تي پنهنجي ساک بچائڻ لاءِ ۽ هڪ ڪٽنب کي عذاب مان ڇوٽڪارو ڏيارڻ لاءِ بدين جي اياز جماليءَ کي جلد بازياب ڪرائڻ سرڪار جي بنيادي ذميواري آهي.
نورين لغاري ڪٿي آهي؟
حيدرآباد جي نورين لغاريءَ جو قصو هڪ عالمي خبر بڻيل آهي، هڪ فيس بوڪ پيغام وسيلي اهو ثابت ڪيو ويو آهي ته نورين لغاري ”داعش“ ۾ هلي وئي آهي. نورين جا والدين اڄ تائين اهو چئي رهيا آهن ته سندن ڌيءَ کي اغوا ڪيو ويو آهي، پر حيدرآباد جي پوليس پنهنجي هوڏ تي قائم آهي ته نورين حيدرآباد مان پاڻ هلي وئي آهي، سندس رابطا ڪالعدم تنظيمن سان آهن. سوشل ميڊيا تي سندس سرگرمين کي نظر ۾ رکي پوليس اهڙي دعويٰ ڪئي آهي ۽ ڪجهه ڏينهن اڳ هڪ وڊيو به جاري ڪئي وئي آهي، جنهن ۾ نورين لغاريءَ کي بس تي چڙهندي ڏيکاريو ويو آهي. جيتوڻيڪ نورين جي والد ان وڊيو ۽ بس جي بوڪنگ کي به مشڪوڪ قرار ڏنو آهي، پر فرض ڪريو جيڪڏهن ائين به هجي ته تڏهن به اهو ڪافي ناهي، جنهن بنياد تي نورين لغاريءَ جي مامري تي ڳنڍ ٻڌي بيهي رهجي. نورين کانپوءِ شهباز سومرو جي گمشدگيءَ ميڊيا ۾ پکڙي، جيڪو بعد ۾ ظاهر ٿيو، پر شهباز سومرو جي مامري کي مڪمل ماٺ ڇانئجي وئي. هن مامري تي مون کي ٻه هفتا اڳ ٿيل هڪ ٻيو واقعو ياد آيو. ڀارت جي شهر دهليءَ جي مشهور صوفي بزرگ نظام الدين اولياءَ جي مزار جا گادي نشين پاڪستان آيا، پر ايئرپورٽ تان ئي غائب ٿي ويا. سجاده نشين آصف علي نظامي ۽ ناظم علي نظامي جي  گم ٿيڻ بابت ڀارت جي ميڊيا جڏهن پاڪستان خلاف مُهم هلائي ته اوچتو ٻئي سجاده نشين ڪراچي پهچي ويا. لائينز ايريا جي علائقي ۾ آستانه نظامي ۾ مون ٻنهي گادي نشينن سان ملاقات ڪئي. سندن انٽرويو ڪيو. هنن جو چوڻ هو ته سندن موبائل فون بند هئا، ڪٽنب سان رابطو نه هو. محفلن ۾ مصروف هئا، باقي گم ٿيڻ جي خبرن ۾ ڪا به صداقت ڪانهي. هاڻ ائين ڀلا ٿي سگهي ٿو ته ڪير پرڏيهه ۾ پهچي پنهنجي ڪٽنب سان رابطو نه ڪندو هجي؟ سو به اهڙا گادي نشين جن جا پاڪستان ۾ لکين مريد به هُجن، پر اطلاع آهن ته هي ٻئي گادي نشين ”پڇا ڳاڇا“ لاءِ اصل واڳ ڌڻين وٽ هئا، بعد ۾ کين ڇڏيو ويو. هي واقعو ٻڌائڻ جو هتي اهو مقصد آهي ته هن ملڪ ۾ ڪجهه به ممڪن آهي. هتي ڪيترائي ڳجها پهلوان آهن، ڪيترائي ڳجها ڪارناما روز ٿيندا آهن، ان شڪ کي نورين لغاري جي مامري ۾ نظر ۾ ڇو نه ٿو رکيو وڃي. ممڪن آهي ته نورين کي ”ٽريپ“ ڪيو ويو هجي، ممڪن آهي ته هن قسم جي واقعن ۾ سنڌين خلاف ڪا رٿابندي به ٿيندي هجي. هاڻي سنڌين منجهان ئي اهڙا کوڙ پهلوان پيدا ڪيا ويا آهن، جيڪي پرڏيهه ۾ ويهي سنڌي قوم خلاف وڏا وڏا ڪم ڪري رهيا آهن، اهي سنڌي ئي آهن، ڪي ٻيا ناهن، پاڪستان جي ادارن هاڻي هر هنڌ پنهنجا واٺا پالي رکيا آهن، اهڙن ”واٺن“ تي الڳ الڳ ليبل چنبڙيل آهن، ڪن تي مذهب جو ليبل چنبڙيل آهي، ڪنهن تي قومپرستيءَ جو ليبل، ڪنهن تي جمهوريت جو ليبل ته ڪنهن تي ترقي پسنديءَ جو ليبل پر سمورا ليبل هڪ ئي فيڪٽريءَ ۾ پرنٽ ٿيندا آهن، سڀني جو اسڪرپٽ رائيٽر ساڳيو آهي. سڀني جو ڪعبو قبلو هڪڙو ئي آهي، يعني هن خطي ۾ انتهاپرستي، دهشت، وحشت ۽ بنيادپرستيءَ کي ڪيئن وڌائجي. حقيقي مذهب پرستي سچي قومپرستي، حقيقي جمهوريت ۽ حقيقي ترقي پسندي جو خاتمو ڪيئن آڻجي. هن ملڪ مان انسانيت، جمهوريت، قومپرستي، ترقي پسنديءَ ۽ لبرل خيالن تي پنهنجا واٺا ٿاڦي عوام کي ڪيئن چريو بڻائجي. هن خيال کي سامهون رکي مان ان شڪ جو فائدو وٺي اها ڳالهه پوليس جي گُمان ۾ آڻڻ چاهيان ٿو ته ممڪن آهي ته نورين لغاري جو ڪيس ائين نه هجي، جيئن اوهان سمجهو ٿا. نورين جو والد مدرسي ۾ نورين جي پڙهڻ کان به انڪاري آهي. نورين لغاري مٿان داعش جو هروڀرو ٺپو نه هڻو، تيستائين جيستائين اوهان وٽ ڪو پڪو ثبوت نه اچي. جيتوڻيڪ سنڌ جي تعليمي ادارن مان ڪيترن کي نوجوانن جو لاپتا ٿيڻ اسان سنڌين لاءِ ڳڻتي ۽ فڪر ڪرڻ جو مقام آهي پر هن سڄي صورتحال جي پٺيان ڪنهن نه ڪنهن ڳجهي سازش کي رد نه ٿو ڪري سگهجي. ڇو ته جنرل ضياءَ جي دور ۾ اهڙيون ڪيتريون ئي سازشون ٿيون هيون، جنرل مشرف دور ۾ به اهڙيون ئي سازشون ٿيون ۽ اڄ به  پاڪستان اندر ”جمهوري نظام“ ۽ چونڊيل سرڪار ته موجود آهي، پر اصل حڪمراني ڪا ٻي ڌر ڪري رهي آهي. اقتدار ۽ رياست جي اصل سگهه ان وٽ آهي.
aajizjamlaijamlai@yahoo.com

مفاهمتي پاليسي ۽ ايندڙ عام چونڊون: صاحب خان ڀٽي

ملڪ ۾ مفاهمتي پاليسي تي گامزن حڪمرانن جمهوريت جي ٽرين کي پٽڙي تان لهڻ نه ڏنو آهي  ۽ نه حڪمرانن هن  ڀيري ڪنهن کي جمهوريت جو تختو اونڌو ڪرڻ جي موقعو فراهم ڪيو آهي جنهن سبب جمهوريت هن ملڪ ۾ ڏينهون ڏينهن مضبوط ٿي رهي آهي، جيڪي به حڪومتون عام چونڊن ۾ ڪامياب ٿي اچي رهيون آهن اهي پنهنجو مدو به پورو ڪري رهيون آهن، پيپلزپارٽي به بنيظير ڀٽو جي شهادت کان پوءِ اقتدار ۾ آئي جنهن به پنهنجو حڪومتي مدو پورو ڪيو، نوازشريف به هاڻ پنهنجو مدو پورو ڪرڻ وارو آهي، پر افسوس جو ان مضبوط ٿيندڙ جمهوريت ۾ عوام کي ڪجهه به حاصل نه ٿي سگهيو آهي، هن وقت به ملڪ ۾ بجلي جي لوڊشيڊنگ جو بحران، پاڻي جو بحران ۽ مهانگائي چوٽ چڙهي وئي آهي جنهن سبب عوام ٻٽي عذاب جو شڪار ٿي ويو آهي. هن وقت سڄي ملڪ ۾ دهشتگرد پنهنجيون ڪارروايون ڪري رهيا آهن جنهن سبب ڪيتريون ئي قيمتي جانيون ضايع ٿي چڪيون آهن. حڪمران چئي رهيا آهن ته اهو  سڀ ڪجهه مشرف جي ڪارنامن جو نتيجو آهي جيڪي هو  اڄ ڀوڳي رهيا آهن ته اهڙي ريت  طالبان دهشتگردن بابت اهو ئي چيو وڃي ٿو،  جيتوڻيڪ هن وقت ملڪ اندر دهشتگردي جو مسئلو سنگين ٿي ويو آهي پر ان باوجود حڪمران  ملڪ جي عوام  جي تحفظ لاءِ ڪي خاص قدم کڻندي نظر نه اچي رهيا آهن،

وزيراعظم نوازشريف روزاني جي بنياد تي ترقياتي منصوبن جو افتتاح ڪري رهيو  آهي ته اڳوڻو صدر آصف علي زرداري به پارليامينٽ ۾ اچڻ جا اعلان ڪري رهيو آهي پر ملڪ اندر ٿيندڙ دهشتگردي ڏانهن ڪنهن جو به ڌيان نه وڃي رهيو آهي، هن وقت پيپلزپارٽي جي اڳواڻن پنجاب جو رخ ڪيو  آهي ۽  نوازليگ اڳواڻن سنڌ جي ماڻهن جون همدرديون حاصل ڪرڻ لاءِ هٿ پير هڻڻ شروع ڪري ڇڏيا آهن. ايتري قدر جو نواز ليگ طرفان ناراض ٿي ويل ن ليگ اڳواڻن کي به پرچائڻ لاءِ هدايتون جاري ڪيون ويون آهن ، هاڻ ڏسڻو اهو آهي ته آخر نواز ليگ ڪهڙي ريت سنڌ اندر پنهنجا پير مضبوط ڪري سگهي ٿي،  جيڪڏهن ڏٺو وڃي ته هن وقت سنڌ اندر پيپلزپارٽي جا پير تمام گهڻو مضبوط آهن ۽ پيپلزپارٽي کي سنڌ ۾ شڪست ڏيڻ نواز سرڪار جي لاءِ تمام گهڻو ڏکيو هوندو، ڇاڪاڻ ته پيپلزپارٽي اهڙيون شخصيتون به شامل ٿي ويون آهن جيڪي  چاهين ته بنا پارٽي جي به پنهنجي تڪ تان ڪامياب ٿي سگهن ٿيون پر ان باوجود انهن اهم ماڻهن پيپلزپارٽي شموليت ڪري ڇڏي آهي جنهن مان اهو صاف ظاهر ٿي ويو آهي ته هاڻ پيپلزپارٽي سان فنڪشنل ليگ کان  ويندي نواز ليگ تائين ڪا به جماعت سنڌ اندر اڪثريت سان مقابلو نه ٿي ڪري سگهي، جيڪڏهن پنجاب ڏانهن نظر ڦيرائينداسين ته پي ٽي آءِ به نواز  سرڪار لاءِ  پنجاب ۾ هڪ وڏو چيلينج بڻيل آهي ۽ اتي نواز ليگ ۽ پي ٽي آءِ جو مقابلو ٿيڻ جو امڪان آهي، باقي رهي ڳالهه بلوچستان ۽ ڪي پي جي ته جيڪي ماضي ۾ ماڻهو کٽيندا رهندا هئا اهي ئي ايندڙ چونڊن ۾ ڪاميابي ماڻي سگهن ٿا.  رهي ڳالهه پيپلزپارٽي جي ته  اها  پنجاب ۾ اڪثريت سان ڪامياب نه ٿي سگهندي.

هونءَ ته ڪجهه ڏينهن اڳ پي ٽي آءِ سربراهه  عمران خان به سنڌ جو رخ ڪيو هو پر کيس ايتري موٽ نه ملي سگهي هئي جيتري پيپلزپارٽي کي ملندي رهي آهي،  نواز  ليگ ته حڪومت ۾ آهي ان هوندي به  نواز ليگ  جلسي ۾ ايترا ماڻهو جمع نه ڪري سگهي جنهن کي ڏسي هر هڪ ماڻهو چوڻ تي مجبور ٿي وڃي ها ته هزارين ماڻهو آيا آهن. بهرحال هن وقت پ پ جي شريڪ چيئرمين ۽ اڳوڻي صدر آصف علي زرداري چيو آهي ته وٽن گهڻو ڪجهه آهي پر ڪجهه ڏينهن انتظار ڪرڻو پوندو. آصف علي زرداري طرفان اهو به چيو ويو آهي ته پاڪستان پيپلزپارٽي پنهنجي سياسي صف بندي شروع ڪري ڇڏي آهي، صف بندي  کي حتمي شڪل پاناما ليڪس جي فيصلي کان پوءِ ڏني ويندي. پاناما ڪيس بابت ڳالهائيندي آصف زرداري چيو ته تنظيم سازي ڪري پاناما فيصلي کان پوءِ ۾ متحرڪ ٿي ويندا. وزيراعظم نوازشريف به حيدرآباد جلسي ۾ سنڌ حڪومت تي ڇتي تنقيد ڪئي آهي ۽ چيو آهي ته پيپلزپارٽي 2008ع کان وٺي حڪومت ۾ آهي ان باوجود سنڌ ۾ ڪي به ترقياتي ڪم نه  ڪرايا ويا آهن. ڪجهه ڏينهن اڳ به ٺٽي  جي جلسي ۾ وزيراعظم نوازشريف سمنڊ کي ڀت ڏيڻ جو اعلان به ڪيو هو، جنهن جي واکاڻ به ڪئي وئي هئي پر ان باوجود سمنڊ کي ڀت ڏيڻ  واري اعلان تي عمل نه ٿي سگهيو آهي هن وقت ملڪ اندر پاڻي جو بحران به وڌي ويو آهي ته پر ان باوجود وفاقي حڪومت توڙي صوبائي حڪومتون ڪي به قدم نه کڻي رهيون  آهن.

هونءَ ته تحريڪ انصاف سربراهه عمران خان ملڪي ۾ تبديلي جو نعرو هڻندو آهي پر هن ڀيري وزيراعظم نوازشريف اهو چئي ڇڏيو ته ماڻهو تبديلي جو نعرو هڻندا آهن ۽ هن ملڪ کي تبديل ڪري ڏيکاريو آهي. وزيراعظم نوازشريف حيدرآباد جلسي ۾ ڪارڪنن کي خطاب ڪندي چيو ته  سندن دور ترقياتي ڪم شروع ٿيا ۽ ڪيترن ئي رٿائن تي هن وقت به ڪم هلي رهيا آهن. لوڊشيڊنگ بابت ڳالهائيندي وزيراظم چيو هو ته اڳ ۾ 18 کان 20 ڪلاڪ لوڊشيڊنگ ٿيندي هئي ان کي به هنن  گهٽايو آهي. بهرحال هن وقت سڄي ملڪ ۾ هڪ افرا تفري وارو ماحول پيدا ٿي ويو آهي  اڳ ۾ پي ٽي آءِ ڌرڻا هڻندي هئي ۽  وزيراعظم نوازشريف  جلسي ڪري رهيو آهي فرق صرف ايترو آهي  جو اڳ ۾ ڪرپشن خلاف احتجاج ٿيندا هئا ۽ اڄڪلهه ايندڙ چونڊن لاءِ تياري ڪئي پئي وڃي. هن وقت ڀلي کڻي هتان جا حڪمران اهو چوندا هجن ته هو پنهنجي قوم جي خدمت ڪري رهيا آهن پر افسوس جو هن ملڪ ان جي سڀ ڪجهه ابتڙ ٿي رهيو آهي.هر طرف اهو چيو پيو وڃي ته مفاهمت جي نالي تي قوم کي لٽيو پيو وڃي  پر ڪو به قدم نه کڻي  رهي آهي. هون ءَ ته هن ملڪ اندر بيروزگاري ۽ دهشتگردي عروج تي آهي ۽ امام بارگاهن ۽ مسجدن ۾  به دهشتگردي  جي ڪارروائي ڪئي وئي ۽ حڪمران صرف افسوس وارا بيان ئي ڏيندا رهيا.

هن وقت سرحد تي به ڇڪتاڻ هلي رهي آهي ۽ ان سان گڏ انسان  حقن جي لتاڙ به ٿي رهي آهي. وفاقي سرڪار ته دعويٰ ڪري رهي آهي ته هنن امن امان ڪرائي ڇڏيو  آهي  پر هن وقت به ملڪ اندر  سيوهڻ سانحي جهڙيون دهشتگرد  ڪارروايون ٿيندي نظر اچي رهيون آهن، بهرحال هن وقت  پيپلزپارٽي ۽ نواز ليگ هڪ ٻئي جي آمهون سامهون اچي ويون آهن، اڳوڻو صدر آصف علي زرداري، بلاول ڀٽو زرداري پنهنجو مرڪز پنجاب کي بڻايو آهي ۽ وزيراعظم نوازشريف سنڌ جو رخ ڪيو آهي، وزيراعظم نوازشريف اهڙا ته اعلان ڪيا آهن جو اڳ تاريخ ڪڏهن به نه ڪيا هئا، حيدآباد  جي شهرين لاءِ يونيورسٽي جو به اعلان ڪيو. ان سان گڏ وزيراعظم بين الاقوامي ايئرپورٽ ٺاهڻ جو اعلان ڪيو، حيدرآباد ۾ ميٽرو بس، ڪراچي کان ميرپورخاص تائين مهراڻ ايڪسپريس هلائڻ، پاسڪو معرفت سنڌ مان ڪڻڪ جي خريداري وڌائڻ، حيدرآباد جي شهرين کي هيلٿ ڪارڊ ڏيڻ ۽ حيدرآباد جي ميئر ۽ ڊپٽي ميئر کي ترقياتي ڪمن لاءِ 50 ڪروڙ روپيا ڏيڻ جي اعلان سميت ٻيا به ڪيترائي اعلان ڪيا. هاڻ ڏسڻو اهو آهي ته انهن اعلانن تي چونڊن کان اڳ ئي ڪم شروع ٿي ويندو يا وري ايندڙ  عام چونڊن تائين اهي اعلان صرف اعلان ئي رهندا.

sahibalisindhi@gmail.com

 

 

سنڌ اسيمبلي ۾ منظور ڪيل ٺهراءَ

سنڌ اسيمبلي جي اجلاس ۾ پنجاب پاران سنڌ جي پاڻي چوري ۽ وفاق پاران پاڻي گهٽ ڏيڻ بابت حڪومتي ايم پي اي اي نواب تيمور ٽالپر ٺهراءُ پيش ڪيو ،ٺهراءُ ۾ مطالبو ڪيو ويو ته وفاق  سنڌ جي پاڻي جي شديد کوٽ جو نوٽيس وٺي ۽ سنڌ کي پنهنجي حصي جو پاڻي ڏيڻ ۾ پنهنجو ڪردار ادا ڪري ۽ سنڌ سان ظلم بند ڪيو وڃي. تيمور ٽالپر چيو ته  سنڌ ۾ پاڻي جي کوٽ وڌي وئي آهي، زراعت کي نقصان پهچڻ سان گڏ هاڻ ته جانورن کي به پاڻي نه ٿو ملي، ان ڪري سنڌ سرڪار وفاق سان رابطو ڪري سنڌ کي حصي جو پاڻي ڏياري کوٽ کي ختم ڪرايو وڃي. پاليسي بيان ڏيندي وڏي وزير چيو ته سنڌ ۾ پاڻي جي سخت کوٽ آهي، اسان کي حصي جو پاڻي نه ٿو ڏنو وڃي، ان لاءِ سي سي آءِ جي اجلاس ۾ سنڌ جو ڪيس وڙهندس ۽ اجلاس لاءِ ٻن ڏينهن ۾ وفاق کي خط لکنداسين، وفاق  منهنجي پريس ڪانفرنس جو جواب  نه ڏنو آهي، ڪوٽڙي بئراج تي ربيع جي فصل لاءِ پاڻي جي شديد کوٽ ٿيندي، تربيلا ڊيم جي ليول 6 فوٽ گهٽ آهي، وفاق تربيلا ڊيم کي نه ڀري سگهيو، پر ڳالهيون پاڻي جي سرپلس جون ڪيون وڃن ٿيون  سرپلس پاڻي صرف 2010 ۾ هو، ڊيمن ۾ موجود پاڻي ترجيح بنياد تي زراعت لاءِ هوندو آهي، چشما جهلم ڪئنال مهيني کان بند آهي،  تونسا پنجند ڪئنال کي بند ڪرايو آهي، سنڌ سرڪار خلاف پاڻي تي ڳالهائيندڙ اهو به ڏسن ته 1991 ۾ پاڻي ٺاهه  ۾ اهو نه لکيو ويو هو ته  چشما جهلم لنڪ ڪئنال صرف پاڻي جي کوٽ دوران کوليو ويندو، اهو ڏٺو وڃي ته ان وقت ڪهڙي پارٽي نمائندي ان ٺاهه تي صحيح ڪئي. پاڻي جي معاملي تي وفاق آڏو آواز اٿاريو آهي،ٺهراءَ سان موقف ۾ وڌيڪ طاقت ايندي جيئن وفاق مطالبي تحت پاڻي فراهم ڪري، سي سي آءِ جو اجلاس هر ٽن مهينن کانپوءِ ٿيڻو هوندو آهي، پر گذريل ڊسمبر کانپوءِ اجلاس طلب نه ڪري وفاق قانون جي ڀڃڪڙ ي ڪئي آهي، ان خلاف آواز اٿاريندس، هڪ ٻن ڏينهن ۾ سي سي آءِ اجلاس لاءِ خط لکندس، جنهن ۾ پاڻي ۽ گئس جو معاملو کڻندس.مهتاب اڪبر راشدي ٺهراءَ جي حمايت ڪندي چيو ته سنڌ کي وفاق آڏو مضبوط ڪيس کڻي وڃڻ گهرجي، چشما لنڪ ڪئنال ان لاءِ ٺاهيو ويو ته جڏهن پاڻي جي کوٽ هوندي ته ان کي کوليو ويندو پر اهو ڪئنال 12 ئي مهينا کليل آهي، وفاق آڏو آواز اٿارڻ سان گڏ سنڌ ۾ واهن تي به نظر رکي وڃي ته پاڻي ڪيڏانهن پيو وڃي، فياض ٻٽ چيو ته بدين ۾ پاڻي نه هجڻ ڪري زمينون تباهه ٿي ويون آهن، هاڻي جانورن لاءِ به پاڻي نه آهي، نواز ليگ جڏهن  حڪومت ۾ ايندي آهي ته صوبن کي حصي جو پاڻي نه ملندو آهي، اهو صوبن سان ظلم آهي، ديوان چند چاولا چيو ته سنڌ جو پاڻي پنجاب بند ڪيو آهي ۽ پاڻي اسان جي زندگي ۽ موت جو مامرو آهي ان ڪري سنڌ حڪومت پاڻي بابت پنجاب سامراج آڏو سخت موقف رکي ڪامران اختر  ٺهراءَ جي حمايت ڪندي چيو ته پاڻي جي کوٽ پنهنجي جاءِ  تي آهي پر ڪراچي جي شهرين کي پاڻي جي شديد کوٽ آهي ان لاءَ سنڌ حڪومت ۽ وفاق ڪي 4 منصوبو جلدي مڪمل ڪن، بعد ۾ٺهراءُ يڪراءِ منظور ڪيو ويو. اجلاس ۾ الطاف حسين يونيورسٽين جا نالا تبديل ڪرڻ جو بل پاڪستان پيپلز پارٽي جي سينيئر صوبائي وزير نثار کهڙي پيش ڪيو، ڪراچي ۾ بڻائي ويندڙ يونيورسٽي جو نالو”عبدالستار يونيورسٽي“ جي نالي تي رکيو ويندو، ان کان اڳ سنڌ ڪابينا الطاف حسين جي نالي تي قائم ٿيندڙ يونيورسٽي جو نالو تبديل ڪرڻ جو فيصلو ڪيو هو

دھشتگردي جي چيلھھ ڀڃي ڇڏي ،ايندڙسال لوڊشيڊنگ جي خاتمي جو ھوندو : نوازشريف

حيدرآباد (اين اين آءِ) وزيراعظم نوازشريف هڪ ڀيرو ٻيهر چيو آيه ته دهشتگردي کي ختم ڪري سڪون جو ساهه کڻنداسين 2013 تائين ملڪ ۾ بيچيني ڦهليل هئي هاڻي هڪ نئون پاڪستان ٺهي رهيو آهي دهشتگردي سبب ڪراچي ۾ ڪوبه پرڏيهي اچڻ لاءِ تيار نه هو هاڻي ٻيهر پرڏيهي سيڙپڪاري ڪراچي ۾ اچي رهي آهي ڪراچي ترقي ڪندو ته پاڪستان ترقي ڪندو سي پيڪ جا فائدا سڄي ملڪ کي پهچي رهيا آهن اهو وقت پري نه آهي جڏهن پاڪستان مان مڪمل طور تي بيرزگاري غربت ۽ جهالت جو خاتمو ٿيندو ملڪ ۾ 18-18 ڪلاڪ لوڊشيڊنگ ٿيندي هئي ملڪ ۾ دهشتگردي عروج تي هئي نوڪريون پئسن تي ڏنيون وينديون هيون عوام کي حڪمرانن سان سوال ڪرڻ گهرجي ته توهان پاڪستان جي ڪهڙي حالت ڪري ڇڏي آهي جيڪڏهن اسان ايمرجنسي قدم نه کڻون ها ته اڄ پاڪستان جو اقتصادي طور تي خراب حالت هجي ها سومر تي مسلم ليگ (ن) جي ورڪرز ڪنوينشن کي خطاب ڪندي وزيراعظم نوازشريف ڪارڪنن کي خطاب ڪندي چيو ته توهان جي جوش ۽ جذبي جي تعريف ڪرڻ لاءِ مون وٽ لفظ نه آهن دل جي گهرائين سان توهان کي سلام پيش ڪيان ٿو منهنجو سلام قبول ڪيو وزيراعظم چيو ته حيدرآباد ايندي رستي ۾ مان ڏٺو ته ڪيترائي نوجوان ۽ منهنجون ڀينرون واپس اچي رهيون هيون ۽ هتي ڪافي ماڻهو گڏ ٿيا هئا ۽ آهستي آهستي واپس وڃي رهيون هيون ۽ هو جوش ۽ جذبي سان هتي آيل آهن جڳهه گهٽ هجڻ سبب انهن کي واپس وڃڻو پيو جنهن تي مان انهن کان معذرت گهران ٿو وزيراعظم چيو ته مان ٻيهر حيدرآباد ايندس ۽ انهن سان ضرور ملندس ۽ دل جون ڳالهيون ڪندس. اهو جوش ۽ جذبو ٺٽو بلوچستان پنجاب ۽ ڪي پي ڪي ۾ به ڏٺو آهي قوم جو جوش ۽ جذبو مثالي آهي جنهن تي حيدرآباد وارن کي مبارڪباد ڏيڻ چاهيان ٿو هن چيو ته پاڪستان تبديل ٿي رهيو آهي ۽ نئون پاڪستان ٺهي رهيو آهي 2013 ۾ پاڪستان جو حال ڀرو هو ۽ هر طرف بيچيني ڦهليل هئي دهشتگردي قدم ڄمايا هئا اسان دهشتگردي جي چيلهه چٻي ڪئي آهي ڪراچي دهشتگردي جو شڪار هو اڄ الله تعاليٰ جي فضل ۽ ڪرم سان ڪراچي ۾ امن ۽ سڪون آهي ۽ ماڻهو ڪراچي ۾ ڪاروبار ڪري رهيا آهن وزيراعظم چيو ته دهشتگردي ڀڄي رهي آهي اسان جو پهه پختو آهي اسان ان کي ختم ڪرڻ بغير سڪون سان نه ويهنداسين هن چيو ته حيدرآباد ۾ موٽر وي ٺهي رهيو آهي اهو موٽر وي پهريان ڇونه ٺاهيو ويو مشرف جي حڪومت جي دور ۾ نه ٺاهيو ويو ۽ پوءِ پيپلزپارٽي جي حڪومت هئي ان زماني ۾ موٽر وي ڇو نه ٺاهيو ويو يونيورسٽي ڇو نه ٺهي هيلٿ ڪارڊ ڇو نه ڏنا ويا هن چيو ته روڊن رستن جي حالت خراب هئي ۽ پيئڻ جو صاف پاڻي به ميسر نه هو اسپتالون به نه هيون هن چيو ته ڪراچي ۾ وڃان ٿو ته گنڌ ڪچري جا ڍير لڳا پيا هوندا آهن صرف دوڙ ئي دوڙ نظر ايندي آهي ڪراچي دنيا مان ڇو ڪٽ ٿي ويو ڪراچي ۾ دهشتگردي عروج تي هئي ڪراچي ۾ هاڻي توهان کي ڪاروباري ماڻهو ملندا هن چيو ته بجلي جي حالت تمام خراب هئي جنهن ۾ نه مزدور سڪون ۾ هو ۽ نه پورهيت ۽ نه آبادگار ٽيوب ويل هلائي سگهندا هئا. هن چيو ته جڏهن ماڻهو ووٽ گهرندا آهن ته پاڪستاني عوام کي پڇڻ گهرجي ته توهان ڪهڙا پاڪستان جا معاملا ٺيڪ ڪيا آهن ان کان پوءِ ووٽ جو فيصلو ڪرڻ گهرجي ووٽ جو حقدار ڪير آهي هن هن چيو ته بجلي جو معاملو اسان ٺيڪ ڪري رهيا آهيون هن چيو ته موٽر وي ڪراچي کان حيدرآباد پهچي رهيو آهي ۽ اهو ڇهن روڊن تي رستو ٺهي رهيو آهي جيڪو پاڪستان جو هڪ بهترين روڊ آهي اهو حيدرآباد کان سکر ويندو ۽ پوءِ سکر کان ملتان ويندو ۽ پوءِ لاهور پهچندو موٽر وي ٺهڻ کان پوءِ ماڻهو صبح جو ناشتو حيدرآباد ۾ ڪندا ۽ منجهند جي چانهه لاهور ۾ پيئندا ۽ کاڌو اسلام آباد ۾ کائيندا جڏهن ته عشا جي نماز پشاور ۾ پڙهندا هن چيو ته بلوچستان ۾ ڪيترائي روڊ ٺهي رهيا آهن ڪوئيٽا کان گوادر پشاور مانسهره ڏانهن رستا ئي رستا ٺهي رهيا آهن پاڪستان جو اندروني نقشو تبديل ٿي رهيو آهي. هن چيو ته حيدرآباد جي مسئلن تان اتفاق آهي الله تعاليٰ جي فضل ۽ ڪرم سان نوازشريف جيڪي ڳالهه ڪندو آهي اها پوري ڪري ڏيکاريندو آهي هن چيو ته توهان کي بجلي ۽ سوئي گئس ملندي حيدرآباد جو ميئر ۽ ڊپٽي ميئر لاءِ 50 ڪروڙ رپيا ڏيڻ جو اعلان ڪيان ٿو ۽ حيدرآباد جي عوام کي هيلٿ ڪارڊ ۽ ميٽرو بس جي خوشخبري ٻڌائي رهيو آهيان هن چيو ته هيلٿ ڪارڊ جو دائرو سڄي ملڪ ۾ ڦهلايو ويو آهي ته جيئن غريبن جي علاج لاءِ انهن کي پنهنجا گهر نه وڪڻڻا پون ۽ هو قرضن ۾ نه ٻڏي سگهن. هن چيو ته جلد هيلٿ ڪارڊ پروگرام جي سربراهه مريم نواز حيدرآباد ايندي ۽ پنهنجن هٿن سان ماڻهن ۾ هيلٿ ڪارڊ ورهائيندي وزيراعظم حيدرآباد ۾ يونيورسٽي جي قيام جو اعلان ڪيو ۽ چيو ته ان جو جلد ئي پيڙهه جو پٿر رکيو ويندو.

 

4 سال جمهوريت لاءِ مفاهمت ڪري ڏٺي، آخري سال جارحاڻي اننگز کيڏنداسين: آصف زرداري

لاهور (ويب ڊيسڪ/اين اين آءِ)اڳوڻي صدر آصف علي زرداري چيو اهي ته اسان گذريل 4 سال جمهوريت خاطر مصالحت ڪري ڏٺي پر هاڻي آخري سال ۾ جارحاڻي اننگ کيڏنداسين، سندس چوڻ هو ته اسان مفاهمت جي سياست کي مڪمل طور تي خيرباد چئي ڇڏيو آهي ۽ هاڻي مخالفن جي هر حملي جو جواب سياسي انداز ۾ ڏنو ويندو، جڏهن ته ن ليگ ۽ پي ٽي آءِ جو به جارحاڻو مقابلو ڪيو ويندو، هن چيو ته پارٽي قيادت بلاول ئي ڪندو، بلاول ڀٽو جي جواني منهنجو تجربو پارٽي ۾ نئين جان وجهندا، اڳوڻي صدر ۽ پيپلز پارٽي جي ڪو چيئرمين چيو ته ڪارڪن جلد چڪري ۾ جلسي جي تياري ڪن، انهن سان ايندڙ ملاقات چڪري ۾ ٿيندي اڳوڻي صدر آصف علي زرداري چيو آهي ته بلاول ڀٽو مڪمل طور تي بااختيار ۽ پارٽي جي قيادت به ڪري رهيو آهي ڪارڪن ۽ اڳواڻ پارٽي تي حملو ڪندڙن کي جواب ڏيڻ لاءِ بااختيار آهن عملي طور تي ميدان ۾ نڪتا آهيون اهو ئي سبب آهي جو ڪجهه ماڻهن جون ننڊون حرام ٿي ويون آهن اهڙن خيالن جو اظهار هن بلاول هائوس لاهور ۾ راولپنڊي ۽ سرگودا ڊويزن جي ٽڪيٽ هولڊرن ۽ عهديدارن سان جدا جدا اجلاس کي خطاب ڪندي ڪيو ان موقعي تي قمرزمان ڪائره نديم افضل چن ۽ ٻيا موجود هئا. ان موقعي تي پارٽي جي معاملن سميت گڏيل صورتحال ۽ آئينده جي حڪمت عملي تي خيالن جي ڏي وٺ ڪئي ويئي هن چيو ته پ پ پ عوام جي پارٽي آهي ۽ سڀني تي اهو ثابت ڪرڻو آهي عوام ۽ ڪارڪنن سان رابطا وڌايا وڃن پ پ پ پوري طاقت سان ميدان ۾ ايندي. هن چيو ته پ پ پ جي قيادت سڄي پنجاب ۾ جلسا ڪندي. هن چيو ته پارٽي تي جيڪو حملو ڪندو ڪارڪن ۽ اڳواڻ جواب ڏيڻ لاءِ بااختيار آهن پروپيگنڊا ڪرڻ وارن جو ڀرپور جواب ڏنو ويندو.

 

پاڪستان پاران آمريڪا-ڀارت لاجسٽڪ ۽ ميري ٽائم معاھدو خطري جي گھنٽي قرار

اسلام آباد (اين اين آءِ) وزيراعظم نوازشريف جي قومي سلامتي واري صلاحڪار ناصر خان جنجوعا چيو اهي ته اڳوڻي آرمي چيف جنرل راحيل شريف جي سعودي فوجي اتحاد جي سربراهه جي طور تي مقرري مسلم ملڪن لاءِ خوش آئيند ثابت ٿيندي اڳوڻي آڙمي چيف سعودي فوجي اتحاد جو اڳواڻ ٿيندو ته مسلمانن جي اتحاد ۽ ٻڌي کي هٿي وٺرائڻ جو سبب بڻبو اسان کي هر صورت افغانستان سان لاڳاپا بهتر رکڻا پوندا  افغانستان ۾ پائيدار امن سان ئي روس ۽ وچ ايشيائي رياستن کي سي پيڪ مان فائدو ٿيندو آمريڪا جو ڀارت مان لاجسٽڪ ۽ ميري ٽائيم معاهدو خطري جي گهنٽي آهي سومر تي ميري ٽائيم سيڪيورٽي ڪانفرنس جي موقعي تي ميڊيا سان ڳالهائيندي هن چيو ته جيڪڏهن راحيل شريف سعودي فوجي اتحاد جو سربراهه بڻجي ٿو ته هو مسلمانن جي ٻڌي کي هٿي وٺرائڻ جو سبب بڻبو هن چيو ته راحيل شريف پنهنجن تجربن ۽ سوچ سان مسلم ملڪن جي غلط فهمين کي ختم ڪندو جنهن سان ايران سميت اتحاد مخالف ملڪن کي به فائدو ٿيندو هن چيو ته اسان کي هر صورت ۾ افغانستان سان لاڳاپا بهتر رکڻا پوندا. علائقائي منظرنامي ۾ پاڪستان جي اهميت کي اجاگر ڪندي ناصر خان جنجوعا چيو ته پاڪستان خطي جي وڌيڪ ملڪن لاءِ پرڏيهي دنيا تائين رابطن جو گيٽ وي آهي هن چيو ته ڏکڻ چيني سمنڊ جو 90 سيڪڙو واپار ۽ ان علائقي ۾ منتقل ٿي رهيو آهي ان ڪري اسان کي پنهنجي ساموندي سلامتي ۽ انهن سمورن ڪوششن کي ذهن ۾ رکي ان کي تيار ڪرڻو آهي. هن چيو ته پاڪستان نيوي کي خطي ۾ انتهائي باصلاحيت نيوي قرار ڏيندي چيو ته اسان تعاون جي فضا کي ترجيحي ڏبي. هن چيو ته پاڪستان وڏي عرصي کان دهشتگردي جو مظاهرو ڪري رهيو آهي گذريل 38 سالن کان پاڪستان افغانستان ۾ ڇڪتاڻ واري صورتحال کان متاثر آهي.

 

الطاف حسين يونيورسٽين جا نالا تبديل، عبدالستار ۽ فاطمه جناح رکڻ جو اعلان

ڪراچي (ويب ڊيسڪ): متحده قومي موومينٽ (پاڪستان) سنڌ ڪابينا جي منظوري کان پوءِ پاڪستان پيپلز پارٽي طرفان ڪراچي ۽ حيدرآباد ۾ ايم ڪيو ايم جي باني جي نالي ته قائم ڪئي ويندڙ الطاف حسين يونيورسٽي جو نالو تبديل ڪرڻ واري بل جي حمايت ڪري ڇڏي، اسپيڪر اسيمبلي آغا سراج دراني جي صدارت هيٺ ٿيندڙ سنڌ اسيمبلي جي اجلاس ۾ الطاف حسين يونيورسٽين جا نالا تبديل ڪرڻ جو بل پاڪستان پيپلز پارٽي جي سينيئر صوبائي وزير نثار کهڙي پيش ڪيو، ان موقعي تي ايم ڪيو ايم پاڪستان جي اڳواڻ فيصل سبزواري خيالن جو اظهار ڪندي چيو ته اسان کي نهايت افسوس ٿو ٿئي ته اسان جي مضبوط موقف ۽ جدوجهد باوجود 70 سالن ۾ ڪيترائي ڀيرا اسان جي بزرگن ۽ اسان ماڻهن کي شڪ جي نگاهه سان ڏٺو ويو، پر خير اهو اسان جو ملڪ آهي، اسان جي سرزمين آهي، ۽ ان کي ٺاهڻ ۽ هلائڻ اسان جو ڪم آهي، فيصل سبزواري جو چوڻ هو ته سنڌ جي دل حيدرآباد ۾ پيپلز پارٽي جي حڪومت آهي، جنهن وٽ پئسا به آهن، ۽ اختيار به، تنهن ڪري ان کي گهرجي ته هتي پبلڪ يونيورسٽي ٺاهي، گڏوگڏ انهن ڄاڻايل بل جي حمايت ڪندي چيو ته سنڌ پبلڪ سيڪٽر يونيورسٽي جو قيام عمل ۾ آڻي، ان کي ڪنهن به اهڙي فرد جي نالي سان منسوب نه ڪيو وڃي، جيڪو کلي ڪري يا لڪي ڪري پاڪستان جي سالميت خلاف ڳالهائي، ان کان پوءِ سينيئر صوبائي وزير نثار کهڙي چيو ته ڪراچي ۾ بڻائي ويندڙ يونيورسٽي جو نالو”عبدالستار يونيورسٽي“ جي نالي تي رکيو ويندو، ان کان اڳ سنڌ ڪابينا الطاف حسين جي نالي تي قائم ٿيندڙ يونيورسٽي جو نالو تبديل ڪرڻ جو فيصلو ڪيو هو، وزير اعليٰ هائوس کان جاري ٿيندڙ بيان ۾ ترجمان چيو ته هاڻي انهن يونيورسٽين جو نالو فاطمه جناح يونيورسٽي رکيو ويندو، واضح رهي ته ڊسمبر 2014 ۾ سنڌ اسيمبلي ڪراچي ۽ حيدر آباد ۾ متحده قومي موومينٽ جي باني الطاف حسين جي نالي سان هڪ هڪ يونيورسٽي قائم ڪرڻ جي منظوري ڏني هئي.

 

مسئلن جي باوجود پاڪستنا جي ترقي تي دنيا حيران آهي: مريم اورنگزيب

اسلام آباد  (اين اين آءِ) سڌسماءُ واري مملڪتي وزير مريم اورنگزيب چيو آهي ته پاڪستان جي ترقي کي ڏسي سڄي دنيا حيران آهي تقريب کي خطاب ڪندي هن چيو ته دهشتگردي خلاف جنگ ۾ 55 هزار ماڻهن پنهنجون جانيون قربان ڪيون موجوده حڪومت ۾ دهشتگردي جو خاتمو ممڪن ٿيو آهي ۽ ڪيترن ئي قربانين کان پوءِ ئي پاڪستان ان حد تائين پهتو آهي ته اڄ پاڪستان ترقي جي رستي تي هلي رهيو آهي. ۽ سڄي دنيا مسئلن جي باوجود پاڪستان جي ترقي تي حيران آهي مريم اورنگزيب چيو ته حڪومت نه صرف لوڊشيڊنگ ۾ وڏي گهٽتائي ڪئي آهي پر گذريل 40 منصوبا نه لڳايا آهن انهن تي به ڪم ڪري رهي آهي ۽ وزيراعظم خود انهن منصوبن جي نگراني ڪري رهيو آهي سي پيڪ کي سڄي دنيا ۾ گيم چينجر سمجهيو وڃي ٿو هن چيو ته جمهوريت کي مضبوط ڪرڻ ۾ ميڊيا اهم ڪردار ادا ڪيو آهي پر ان ميڊيا ۾ اهڙا شرپسند ماڻهو به موجود آهن جيڪي منفي پروپيگنڊا ڪري رهيا آهن.

 

آرمي چيف جي ڏکڻ آفريقا جي بچاءَ واري وزير سان ملاقات، مختلف معاملن تي ڳالهيون

راولپنڊي (اين اين آءِ) پاڪ فوج جي اڳواڻ جنرل قمر جاويد باجوا سان ڏکڻ آفريڪا جي بچاءُ واري وزير ملاقات ڪئي آهي آءِ ايس پي آر موجب چيف آف آرمي اسٽاف جنرل قمر جاويد باجوا سان ڏکڻ آفريڪا جي بچاءُ واري وزير اين اين ماپيسا نڪاڪولا سومر تي جي ايڇ ڪيو ۾ ملاقات ڪئي ملاقات دوران بچاءُ ۽ سيڪيورٽي جي شعبن ۾ تعاون سميت گڏيل دلچسپي جا معاملا غور هيٺ آيا جڏهن ته خطي ۾ سيڪيورٽي جي گڏيل صورتحال تي به ڳالهه ٻولهه ڪئي ويئي ڏکڻ آفريڪا جي وزير پاڪستان مان دهشتگردي جي خاتمي لاءِ پاڪستاني فوج تي ڪاميابين جو انحصار آهي ان کان اڳ جي ايڇ ڪيو اچڻ تي مهمان شهيدن جي يادگار تي گلن جا چاڙهي ۽ پاڪستان جي ڦڙت جتي ان کي گارڊ آف آنر پيش ڪيو.

 

صحافت خلاف مارشل لائي حربا استعمال نه ٿيڻ ڏينداسين: خورشيد شاهه

ڪراچي(ويب ڊيسڪ) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته اسان صحافت خلاف مارشل لائي حربا استعمال نه ٿيڻ ڏينداسين، وفاقي حڪومت خاموش تماشائي جو ڪردار ادا نه ڪري، ميڊيا سان ڳالهائيندي مخالف ڌر اڳواڻ سيد خورشيد شاهه چيو ته گلگت بلتستان ۾ پرنٽ ميڊيا جي بندش جمهوريت سوز آهي، حڪومت پرنٽ ميڊيا جي بحالي لاءِ فوري قدم کڻي، جڏهن ته اخبارن جي رهتن جي مد ۾ روڪيل رقم به فوري جاري ڪئي وڃي، هن چيو ته اسان گلگت بلتستان ۾ صحافت جو باعزت مقام هر صورت ۾ بحال ڪرائينداسين. خورشيد شاهه چيو آهي ته ڀاڄين جي اگهن ۾ واڌ حڪومتي ناڪامي جو ثبوت آهي، رياست کي حڪومتي پاليسين جي ناڪامي جي ڪري منهن ڏيڻو پيو پوي. ميڊيا سان ڳالهه ٻولهه ڪندي پيپلز پارٽي جي اڳواڻ خورشيد شاهه جو چوڻ هو ته حڪومت هر معاملي مان جان ڇڏائڻ جي ڪوشش ڪري رهي آهي، ن ليگ وارا ناڪامي کي سازش جو نالو ڏيندا آهن. هن چيو ته حڪومت جو هر معاملي کي سازش قرار ڏيڻ سڀ کان وڏي ناڪامي آهي، ڇا هر سازش نواز حڪومت خلاف ئي ٿيندي آهي ۽ حڪومت پنهنجون ناڪاميون لڪائڻ جي ڪوشش نه ڪري.