تازيون خبرون

Monthly Archives: March 2017

ماهرا خان ۽ شاهه رخ خان جي فلم رئيس جي ”ظالما“ گاني ريڪارڊ قائم ڪري ورتو

ممبئي(شوبز نيوز) شاهه رخ خان ۽ ماهره خان جي فلم رئيس جتي ڪاميابي جو ريڪارڊ قائم ڪيو آهي اتي هاڻِ فلم جي گاني ”ظالما“ به ريڪارڊ ٺاهي ڇڏيو آهي. تفصيل مطابق فلم رئيس جو گانو ”ظالما“ جي ريليز ٿيندي ئي ڇانئجي ويو هو، هاڻي گاني يوٽيوب تي هن وقت تائين 1 ارب کان وڌيڪ ڀيرو ڏسڻ جو ريڪارڊ قائم ڪري ورتو آهي، پاڪستاني اداڪارا ماهرا خان خوشيءَ جو اظهار ڪندي سماجي رابطي جي ويب سائٽ انسٽاگرام تي ان گاني جو ڪلپ اپ لوڊ ڪيو ۽ پنهنجي پيغام ۾ چيو آهي ته هي گانو 100 ملين کان به وڌيڪ ڀيرو ڏسجي چڪو آهي.

 

پاڪستاني ۽ ڀارتي فلمن ۾ اداڪاريءَ جا جوهر ڏيکاريندڙ سارا لورين سريلنڪا ۾ فن جو مظاهرو ڪندي

ڪراچي (شوبز نيوز) پاڪستاني ۽ ڀارتي فلمن ۾ پنهنجي اداڪاريءَ جا جوهر ڏيکاريندڙ خوبصورت اداڪارا سارا لورين سريلنڪا ۾ پنهنجي فن جو مظاهرو ڪندي. رپورٽن موجب سريلنڪا جي راڄڌاني ڪولمبو ۾ بالي ووڊ جي اڳوڻي ناليواري اداڪارا زينت امان، پونم ڍلون ۽ جتيندر کي ڀيٽا پيش ڪرڻ لاءِ تقريب ٿيندي، جنهن ۾ سارا لورين پنهنجي ادائن جا جلوا ڏيکاريندي. هوءَ سڀاڻي 31 مارچ ۽ ٻه اپريل تي گولڊ ايئر جي نالي سان زينت امان، پونم ڍلون ۽ جتيندر جي گيتن تي پرفارم ڪري کين خراب پيش ڪندي.27

 

آءِ سي سي وٽان انصاف نه مليو ته ڀارت خلاف عدالت وينداسين: شهريان خان جو اعلان

لاهور(اسپورٽس نيوز) پي سي بي چيئرمين شهريان خان چيو آهي ته پي ايس ايل جي ٻئي ايڊيشن جي ڪامياب ٿيڻ تي پاڪستان جي عوام کي مبارڪباد ڏيان ٿو، پي سي بي چيئرمين پريس ڪانفرنس ڪندي چيو ته ايندڙ پي ايس ايل جو فائنل ڪراچي ۾ ٿيندو، هن چيو ته ويجهي مستقبل ۾ پاڪ-ڀارت سيريز جو ڪوبه امڪان ناهي، سمجهوتي تحت 6 سيريز کيڏڻيون هيون، شهريار خان چيو ته پي ايس ايل جي ٽئين ايڊيشن لاءِ تياريون شروع ڪيون ويون آهن، هن چيو ته پي ايس ايل 3 جون ميچون پاڪستان جي مختلف شهرن ۾ ٿينديون، پاڪستان سپر ليگ جو فوري آڊٽ ڪرڻ جو فيصلو ڪيو ويو آهي، هن چيو ته پاڪ ڀارت سيريز لاءِ آءِ سي سي ۾ آواز بلند ڪنداسين، سندس چوڻ هو ته قانوني رستو اختيار ڪرڻ کانسواءِ ٻيو ڪو رستو ناهي بچيو، پهريان ڀارتي بورڊ کي نوٽيس ڏينداسين پوءِ آءِ سي سي جي تڪراري ڪميٽي ۾ وينداسين، هن چيو ته ايم او يو سائن ٿيڻ باوجود 6 سيريز مان 2 ضايع ٿي چڪيون آهن، سندس چوڻ هو ته اپريل ۾ آءِ سي سي جو اجلاس ٿيندو، اسان جو ڪيس مضبوط آهي اسان کي ملين ڊالرن جو نقصان ٿي چڪو آهي، پي سي بي چيئرمين چيو ته جيڪڏهن آءِ سي سي ڪميٽي ۾ مسئلو حل نه ٿيو ته پوءِ عدالت وينداسين، هن چيو ته مودي جي رويي مان اهو ئي ٿو لڳي ته اهي اسان سان ڪرڪيٽ کيڏڻ لاءِ تيار ناهن، سندس چوڻ هو ته اميد آهي ته پاڪستان جي بايو مڪينيڪل ليبارٽري آءِ سي سي رينڪنگ ۾ اچي ويندي، هن چيو ته جائلز ڪلارڪ پاڪستان مان گهڻو خوش ٿي ويو، جائلز ڪلارڪ چيو ته سيپٽمبر ۾ ورلڊ اليون پاڪستان ۾ 4 ميچون کيڏندي. شهريان خان 2018ع ۾ پي سي بي کان ڪناره ڪشي ڪرڻ جو اعلان پڻ ڪيو، هن وڌيڪ چيو ته پي سي بي اينٽي ڪرپشن يونٽ گهڻو سٺو ڪم ڪيو آهي، سندس چوڻ هو ته محمد عرفان پنهنجي غلطي جو اعتراف ڪيو آهي، عرفان کان سواءِ ٻيو ڪنهن به ڏوهه جو اعتراف ناهي ڪيو، جون ۾ ورلڊ ڪپ ٿي رهيو آهي اسان جي ٽيم ان لاءِ تياري ڪري رهي آهي.

 

پاڪستان سان سيريز کيڏڻ ۾ بي سي سي آءِ کي نه پر مودي سرڪار کي مسئلو آهي: شاهد آفريدي

ڪراچي(اسپورٽس نيوز) قومي ڪرڪيٽ ٽيم جي اڳوڻي ڪپتان شاهد آفريدي جو چوڻ آهي ته پاڪستان سان سيزير بورڊ آف ڪرڪيٽ ڪنٽرول ان انڊيا( بي سي سي آءِ) جو نه پر مودي سرڪار جو مسئلو آهي. ڪراچي جي ايڌي هوم ۾ ٽرافي جي پڌرائي جي موقعي تي ميڊيا سان ڳالهائيندي شاهد آفريدي چيو ته انگلينڊ ۾ ٿيندڙ آءِ سي سي چيمپئنز ٽرافي دوران پاڪ ڀارت ميچ کيڏڻ ضرور ويندس. هن چيو ته پاڪستان ۽ ڀارت وچ ۾ ڪرڪيٽ سيريز ضرور ٿيڻ گهرجي ۽ ٻنهي ملڪن وچ ۾ سيريز جي لاءِ بي سي سي آءِ کي نه ڀارتي کي مسئلو آهي. ان کان اڳ شاهد آفريدي آءِ سي سي چيمپئنز ٽرافي سان گڏ ايڌي هوم کارادر پهچي بلقيس ايڌي ۽ فيصل ايڌي سان ملاقات ڪري سندس خيريت معلوم ڪئي..

 

سپريم ڪورٽ جي حڪم تي ڊي جي نيب سميت 4 ڊي جيز گهر ڀيڙا ٿي ويا…!

جسٽس امير هاني مسلم جي سربراهي ۾ جسٽس قاضي فائز عيسيٰ ۽ جسٽس سردار طارق مسعود تي ٻڌل سپريم ڪورٽ جي ٽه رڪني بئنچ نيب ۾ غيرقانوني ڀرتين ۽ ترقين بابت پاڻمرادو نوٽيس ڪيس جي ٻڌڻي ڪئي. عدالت ٻڌڻي مڪمل ڪرڻ کانپوءِ ڊي جي نيب عاليه رشيد سميت چئن ڊي جيز کي فوري طور تي عهدن تان هٽائڻ ۽ 200 کان وڌيڪ آفيسرن جي ڇنڊڇاڻ لاءِ خصوصي ڪميٽي جوڙڻ جو حڪم ڏئي ڇڏيو. جڏهن ته عاليه رشيد کانسواءِ ڊي جي نيب لاهور ميجر برهان علي، ڊي جي بلوچستان طارق محمود ۽ ڊي جي نيب ڪراچي ميجر منير احمد کي فوري طور تي هٽائڻ جو حڪم ڏنو. عدالتي حڪم ۾ چيو ويو آهي ته نيب خالي پوسٽن تي ٽن مهينن اندر ٻيهر ڀرتيون ڪري،  ميجر برهان، ميجر طارق ۽ ميجر منير کي رٽائرمينٽ کانپوءِ سمورا فائدا ڏنا وڃن جڏهن ته هٽايل آفيسرن کي ضرورت تحت ڪانٽريڪٽ تي رکي سگهجي ٿو. سپريم ڪورٽ نيب جي چئن آفيسرن فهد خان، ياسر محمود، ڪريم بخش ۽ هڪ ٻئي کي چئن هفتن ۾ هايئر ايجوڪيشن ڪميشن مان منظور ٿيل تعليمي ادارن جا سرٽيفڪيٽ پيش ڪرڻ جو حڪم ڏنو آهي. عدالت فيصلي ۾ چيو آهي ته آفيسرن جي ڪميٽي انهن چئني ماڻهن کي شوڪاز نوٽيس جاري ڪندي ۽ مقرر مدي ۾ سرٽيفڪيٽ پيش نه ڪرڻ تي انهن کي فارغ ڪيو ويندو. سپريم ڪورٽ پنهنجي فيصلي ۾ 200 کان وڌيڪ نيب جي ٻين آفيسرن بابت فيصلي لاءِ ٽه رڪني ڪميٽي جوڙڻ جو به حڪم ڏنو آهي. ڪميٽي ۾ سيڪريٽريٽ اسٽيبلشمينٽ، ڊي جي هيومن ريسورسز نيب ۽ فيڊرل پبلڪ سروس ڪميشن جو نمائندو شامل هوندو. اها ڪميٽي ٻن مهينن ۾ نيب آفيسرن بابت ڇنڊڇاڻ مڪمل ڪرڻ جي پابند هوندي. واضح رهي ته پنهنجي عهدي تان هٽايل نيب جي ڪرپشن جي خاتمي جي اشتهاري مهم جي سربراهه عاليه رشيد پهرين تعليم کاتي ۾ ڪانٽريڪٽ تي ملازم هئي، سپريم ڪورٽ ۾ روبرو نيب پنهنجي لکت واري جواب ۾ اعتراف ڪيو هو ته اداري ۾ سوين ماڻهن کي قاعدن کان هٽي ڪري ڀرتي ڪري ترقيون ڏنيون ويون آهن. ٻڌڻي دوران سپريم ڪورٽ عاليه رشيد کي نيب ۾ آگاهي مهم بابت ڊائريڪٽر مقرر ڪرڻ تي سخت ڪاوڙ جو اظهار ڪندي چيو هو ته شعور پيدا ڪرڻ جدا ۽ ٽينس کيڏڻ جدا شيون آهن، راندين جي شعبي سان لاڳاپو رکندڙ عاليه رشيد کي نيب ۾ ڊائريڪٽر ڇا جي لاءِ لڳايو ويو آهي.

 

ڪاپي ڪلچر ڪيئن ختم ڪجي؟: تحرير. شيرمحمد سولنگي

سنڌ ۾ تعليم جي تباهيءَ جو ٻيو مکيه ڪارڻ اسان جا شاگرد آهن، جن کي پڙهڻ سان ڪابه دلچسپي ناهي، نه وري سندن والدين کي ڪو فڪر آهي ته سندن اولاد پڙهي پوي. ان صورتحال امتحانن ۾ ڪاپيءَ کي وڌيڪ هٿي ڏني آهي. ڪاپي وڌڻ سبب سنڌ جا شاگرد ٻين صوبن جي شاگردن سان مقابلي جهڙا نه رهيا آهن. گڏيل چٽا ڀيٽيءَ کان وٺي مقابلي جي ٻين امتحانن ۾ سنڌ جون سيٽون گهڻي ڀاڱي خالي رهجي وڃن ٿيون، جڏهن ته اسان جا شاگرد ملڪ جي اعليٰ تعليمي ادارن ۾ داخلائون نه ٿا وٺي سگهن. ڪاپيءَ جي شڪل ۾ سنڌ کي لڳل اها اڏوهي اسان نسل تباهه ڪري رهي آهي. جنهن تي ڪو به ڌيان ڏيڻ لاءِ تيار ناهي. سنڌ جي ساڃاهه وندن کي ان پاسي جيترو ڌيان ڏيڻ گهرجي، اهو نه پيو ڏنو وڃي، ان کان علاوه اسان جي سرڪاري نظام ۾ چيڪنگ سسٽم نه آهي

سنڌ ۾ نائين-ڏهين جماعت جا امتحان شروع ٿي ويا آهن. ڪالهه پهرين ڏينهن امتحاني مرڪزن ۾سرعام ٿيندڙ ڪاپيءَ ۽ وقت کان اڳ پرچو آئوٽ ٿيڻ تي بورڊ اختيارين توڙي انتظاميا جي پت وائکي ڪري ڇڏي. جتي سکر، لاڙڪاڻو، حيدرآباد، ميرپورخاص ۽ ڪراچي ڊويزنن  ۾ پرچا وقت کان اڳ آئوٽ ٿيا، اتي  سنڌ ۾ ميٽرڪ جي پهرين پيپر ۾انتظاميا جي ڪاپي روڪڻ واري دعويٰ ڌوڙ ٿي وئي. رپورٽن موجب لاڙڪاڻي تعليمي بورڊ جي نگراني ۾لاڙڪاڻي، قمبر-شهدادڪوٽ، جيڪب آباد، شڪارپور، ڪشمور-ڪنڌڪوٽ ۽ دادو جي ميهڙ ۽ ڪي اين شاهه تعلقن ۾ ڪالهه نائين جماعت جي شاگردن ۽ شاگردياڻين کان سنڌي لازمي جو پرچو ورتو ويو، جنهن دوران اميدوارن جا والدين پنهنجي ٻارن کي ڪاپي ڪرڻ لاءِ وڏي تعداد ۾ امتحاني سينٽرن ٻاهران پهتا، جيڪي گائيڊ مان سوالن جا جواب ڪڍي پنهنجي ٻچڙن ڏانهن موڪليندا رهيا، جڏهن ته امتحاني سينٽرن اندر به اميدوار جديد ٽيڪنالاجي جو فائدو وٺندي واٽس اپ گروپن ۽ انٽرنيٽ ذريعي به سرعام ڪاپي ڪندا رهيا، لاڙڪاڻي  ۾ نائين ڪلاس جو سنڌي پرچو آئوٽ  ٿي ويو، شهر ۾ قائم فوٽو اسٽيٽ جي دڪانن تي سنڌي جو حل پيپر 100 رپين ۾ وڪرو ٿي رهيو هو. هوڏانهن تعليمي بورڊ طرفان جوڙيل ويجيلنس ٽيمن توڙي ڇاپا هڻي 192 شاگردن، شاگردياڻين کي ڪاپي ڪيس ڪيو، جڏهن ته 34 اميدوارن کي ڪاپي تبديل ڪرڻ ۽ 20 اميدوارن کي ٻين بدران ويهڻ تي سينٽرن مان بي دخل ڪيو ويو. ٻئي پاسي امتحاني سينٽرن تي بجلي جي اک ٻوٽ به جاري رهي، ڪيترن امتحاني سينٽرن تي بجلي غائب رهي، جنهن ڪري لاڙڪاڻي جي گرلس هاءِ اسڪول ۾ هڪ شاگردياڻي ساجده چنو بيهوش ٿي وئي، جڏهن ته لاڙڪاڻو شهر جي گجڻ پور هاءِ اسڪول ۾ شاگرد ممتاز ڏاهاڻي بجلي نه هجڻ دوران بيهوش ٿي ويو، بجلي بند هجڻ سبب شاگرد ۽ شاگردياڻين کي امتحانن دوران مشڪلاتن سان منهن ڏيڻو پئجي ويو آهي. سکر ۾ انگلش ون جو پيپر 20 منٽ دير سان شروع ڪيو ويو جڏهن ته چيڪنگ جي باوجود شاگرد گائيڊون ۽ حل پيپر امتحاني مرڪز اندر کڻي  وڃڻ ۾ ڪامياب ٿي ويا،سکر ۾امتحان جي پهرين ڏينهن ئي نائين ڪلاس جي انگريزي جو پرچو وقت کان اڳ آئوٽ ٿي ٻاهر پهچي ويو، جنهن بعد پيپر آئوٽ ڪندڙ مافيا ان پرچي کي حل ڪرائي گهرن ۾ رکيل فوٽو اسٽيٽ مشين تان حل ٿيل پيپر پيسن عيوض وڪرو ڪيو ۽ اهو پيپر ڪيترن ئي اميدوارن جي مائٽن پيسن سان خريد ڪري موبائل ذريعي پنهنجي مائٽ اميدوارن کي واٽس اپ ڪيو. تعليمي بورڊ سکر جي چيئرمين سيد مجتبيٰ شاهه گورٽمينٽ هاءِ اسڪول الفلاح، گرلز ڊگري ڪاليج، ڊبل سيڪشن هاٰ اسڪول ۽ ٻين امتحاني سينٽرن تي پهچي امتحان جو جائزو ورتو ۽ امتحان وٺندڙ انويجيليٽرن کي ڪاپي روڪڻ لاءِ پڻ هدايتون ڏنيون، تعليمي بورڊ جي چيئرمين مجتبيٰ شاهه گورنمينٽ هاءِ اسڪول الفلاح مان ڪاپي ڪرڻ جي الزام هيٺ ۱۰ شاگردن کي ڪاپي ڪيس ڪري امتحاني سينٽرن مان ٻاهر ڪڍي ڇڏيو. شڪارپور ۾به نائين ڪلاس جي سنڌي پرچو واٽس ايپ جي ذريعي آئوٽ ٿي ويو جڏهن ته ڏهرڪي ۾ به انگلش ون جو پرچو واٽس اپ ذريعي آئوٽ ٿي ويو، ڦلجي ۾ جيئن ئي پيپر شروع ٿيو ته  حيدرآباد بورڊ جو چيئرمين پروفيسر ڊاڪٽر محمد ميمڻ ٽيم سميت دوري تي پهتو، جتي هن سرعام ٿيندڙ ڪاپي ۽ ناقص سڪيورٽي انتظامن تي ناراضگي ظاهر ڪئي.ڀان سيد آباد ۾ نائين ڪلاس جي ھلندڙ پيپر ۾ اي ايس پي سيوھڻ سميع ملڪ جي اڳواڻي ۾ پوليس ھائير سيڪنڊري اسڪول جي امتحاني سينٽر تي چڙھائي ڪري پيپر ڏيندڙ شاگردن کي ڪاپي ڪرڻ جي الزام ۾ ڪلاسن مان ٻاھر ڪڍي شاگردن کي لٺيون ھڻي کين 10 منٽن تائين مرغو بڻايو، لٺيون لڳڻ سبب نائين ڪلاس جي شاگرد  احسان علي گائينچي.امداد علي مڱڻھار ۽ عرفان علي گنڀير سميت 5 شاگرد زخمي ٿي پيا. ور شهر جي هاءِ اسڪول ۾ پير پٺو پوليس انچارج ۽ اي وي سي سي پوليس ٺٽو جي جمعدار وچ ۾ ڪاپي ڪرائڻ تان جهيڙو ٿي پيو، پوليس اهلڪارن وچ ۾ پئي انچارج ۽ جمعدار کي ڇڏائي جهيڙو ختم ڪرايو.نواب شاهه، قاضي احمد، سڪرنڊ، مٽياري، هالا ۽ ٻين امتحاني مرڪزن تي ڪاپيءَ جي ڌم متل رهي. ميرپور خاص تعليمي بورڊ  جي ميرپورخاص، عمرڪوٽ، ٿرپارڪر ۽ سانگهڙ ضلعن ۾انتظاميا جي بي ڌياني سبب نائين  جماعت جي پيپر ۾ڪاپي جا رڪارڊ ٽوڙيا ويا. هوڏانهن  ڪراچي ۽ حيدرآباد جي ڪيترن ئي  امتحاني مرڪزن ۾ شاگردن لوڊشيڊنگ دوران پيپر حل ڪيو.ٻي طرف سنڌ سرڪار ميٽرڪ جي امتحانن ۾ ٿيندڙ ڪاپي  روڪڻ لاءِ سختي سان منهن ڏيڻ جو فيصلو ڪيو آهي. سکر، لاڙڪاڻي، حيدرآباد ۽ ميرپورخاص بورڊن جي نگراني ۾ هلندڙ امتحانن دوران پرچا آئوٽ ٿيڻ تي وڏي وزير مراد علي شاهه ڪاوڙ جو اظهار ڪندي چيو آهي ته جيڪي ماڻهو پيپر آئوٽ ڪرڻ ۾ ملوث آهن، انهن کي گرفتار ڪيو وڃي. وڏي وزير چيو ته هن معاملي ۾معافي جي ڪا به گنجائش ناهي. هن بورڊ ۽ يونيورسٽي جي سيڪريٽري کي معاملي جي رپورٽ پيش ڪرڻ جو حڪم ڏنو.

امتحان شروع ٿيڻ کان ٻه ڏينهن اڳ سنڌ جي وڏي وزير سيد مراد علي شاهه امتحان ڏيندڙ شاگردن کي مخاطب ٿي هڪ خط لکيو، جنهن ۾ وڏي وزير کين اپيل ڪئي ته اهي پنهنجي اولاد جي بهتر مستقبل لاءِ ڪاپيءَ جي خاتمي جي سلسلي ۾ سرڪار جو هٿ ونڊائين. پر سنڌ جي ڪنهن به ڪنڊ مان اهڙي خبر نه ملي ته ڪو فلاڻو امتحاني سينٽر ڪاپيءَ کان بچيل رهيو.

امتحان جي پهرئين ڏينهن سکر ۾  پرچو آئوٽ ٿيو، جڏهن ته گهڻن سينٽرن تي ڪاپيءَ  جي ڌم متل رهي، ڪيترائي شاگرد ڪاپي ڪيس ڪيا ويا. تعليمي بورڊ حيدرآباد جي نگراني ۾ نائين ۽ ڏهين ڪلاس جي ساليانن امتحانن ۾ به ساڳئي صورتحال رهي. حيدرآباد جي اڪثر سينٽرن تي ڪاپي جي ڌم رهي، ڪاپي جي روڪٿام لاءِ ڪيل دعوائون کوکليون ثابت ٿي ويون. ٻئي طرف تعليمي بورڊ لاڙڪاڻو جي نگراني ۾ اتر سنڌ جي 6 ضلعن ۾ نائين ۽ ڏهين ڪلاس جا پيپر شروع ٿي ويا آهن، ڪالهه ڊويزن جي ڇهن ضلعن ۾ نائين ڪلاس جي سنڌي ڪمپلسري جو پيپر ٿيو، جنهن دوران امتحاني سينٽرن ٻاهريان ڪاپي ڪرائيندڙن جا هجوم موجود هئا. سنڌ ۾ امتحانن جي حالت ڪا اڄوڪي ناهي ۽ نه وري ڪنهن ڌارئي اسان مٿان اهو عذاب نازل ڪيو آهي، پر اها بيماري گذريل ٽن چئن ڏهاڪن کان سنڌ جا نسل ڳڙڪائي رهي آهي. جيڪا اسان پنهنجي لاءِ پاڻ تجويز ڪئي آهي. سنڌ ۾ آيل ان بيماريءَ جا ڪارڻ گهڻا ئي آهن. پر مکيه ڪردار استاد ۽ شاگرد جو آهي.

سنڌ ۾ 1988ع کانپوءِ اهڙا ستاد ڀرتي ڪيا ويا، جن کي نه پڙهائڻ سان دلچسپي هئي ۽ نه وري انهن کي پڙهائڻ پئي آيو. سنڌ ۾ وڏيرن پنهنجي مرضيءَ سان ڪوٽا هيٺ استاد ڀرتي ڪرائي، تعليم جي ٻيڙي ٻوڙي. 1988ع کان شروع ٿيل اهو سلسلو ڪنهن نه ڪنهن صورت ۾ اڃا تائين جاري آهي، جنهن جي ڪري اسان وٽ نيچرل سائنس ۽ سوشل سائنس جي مضمونن جا استاد ئي ناهن، جيڪڏهن استاد آهن ته تجربي گاهه ۽ ٻيون سهولتون ناهن. سرڪار ساليانو اربين رپيا خرچ ڪرڻ جي باجود گهربل نتيجا نه ٿي ڏئي سگهي. جنهن جو ڪارڻ سرڪار پاران تعليم ۽ خاص طور امتحانن جي مانيٽرنگ نه ڪرڻ آهي..

سنڌ جي تعليمي معيار جي بهتريءَ لاءِ لازمي آهي ته ڊگهي مدي تائين فائدو ڏيندڙ پاليسيون جوڙيون وڃن، جنهن سان نه رڳو سنڌ تعليمي ميدان ۾ ترقي ڪري پر ان جا اثر سمورن شعبن ۾ به نظر اچن. ان لاءِ لازمي آهي ته تعليم کاتي، تعليمي بورڊن مان ڪرپشن جو خاتمو آندو وڃي، اسڪول ۾ نه پڙهائيندڙ استادن کي فارغ ڪري انهن جي جاءِ تي نوان استاد ڀرتي ڪيا وڃن. نصاب جو نئين سر جائزو وٺي، وقت ۽ حالتن پٽاندڙ نصاب لاڳو ڪيو وڃي. سنڌ ۾ حقيقي تعليمي ايمرجنسي تڏهن نظر ايندي جڏهن شاگرن ۽ استاد وچ ۾ اعتماد وارو ناتو بحال ٿيندو، هر اسڪول تعليمي طور تڏهن سرگرم نظر ايندو، جڏهن  اسان انهن تعليمي ادارن جي پاڻ به مالڪي ۽ وارثي ڪندي نظر اينداسين. تنهن ڪري حڪومت جيڪڏهن حقيقي طور سنڌ مان ڪاپيءَ جو خاتمو آڻڻ چاهي ٿي ته ڪاپيءَ  قانوني، اخلاقي ۽ سماجي ڏوهه قرار ڏئي، ان تي وڌ کان وڌ سزائون مقرر ڪيون وڃن، جيئن اسان پنهنجا ايندڙ نسل بچائي ، تعليم يافته سنڌ جي پيڙهه رکي سگهون

 

آپريشن ”ردالفساد“  پائدارامن ۽ استحڪام آڻيندو: آرمي چيف

بهاولپپور (ويب ڊيسڪ): آرمي چيف جنرل قمر جاويد باجوه بهاولپور گيريزن آفيسرن کي خطاب ڪندي چيو آهي ته دهشتگردي خلاف جنگ پاڪستاني فوج کي دنيا جي بهترين فوج بڻائي ڇڏيو، پاڪ فوج جي سڌ سماءَ بابت ترجمان اداري آءِ ايس پي آر  پنهنجي پڌرائي ۾ ڄاڻايو آهي ته آرمي چيف جنرل قمر جاويد باجوه بهاولپور گيريزن جو دورو ڪيو، جتي کيس آپريشنل تيارين ۽ سڪيورٽي آپريشنز جي بريفنگ ڏني وئي، آءِ ايس پي آر موجب آرمي چيف جنرل قمر جاويد باجوه جوانن کي خطاب ڪندي چيو ته آپريشن ”ردالفساد“ ملڪ ۾ ديرپا امن ۽ استحڪام آڻيندو، هن چيو ته اسان جا جوان پاڪ فوج جي اصل طاقت آهن، آءِ ايس پي آر پنهنجي پڌرائيءَ ۾ وڌيڪ ڄاڻايو آهي ته آرمي چيف جو چوڻ هو ته جوان روايتي جنگ لاءِ بهترين طور تيار آهن، سڪيورٽي آپريشنز دوران نوجوان آفيسرن جي جذبي عيوض امن قائم ٿيو آهي، پاڪ فوج جا جوان آفيسر منهنجو فخر آهن، آرمي چيف جنرل قمر جاويد باجوه انسٽيٽيوٽ ميڊيڪل سائنس جو افتتاح ڪيو ۽ جوانن کي تعليم ۽ صحت جي منصوبي بابت آگاهي ڏني.

 

پ پ جي ق ليگ کي چونڊ اتحاد جي آڇ، پانامه ڪيس بعد سياسي ڪارڊ شو ڪندس: آصف زرداري

لاهور (ويب ڊيسڪ) پيپلز پارٽيءَ مسلم ليگ ق کي چونڊ اتحاد جي آڇ ڪري ڇڏي آهي، آصف علي زرداريءَ پاناما ڪيس جي فيصلي کان پوءِ جي حڪمت عمليءَ جي صف بندي شروع ڪري ڇڏي آهي، اڳوڻي صدر آصف علي زرداريءَ جو چوڻ آهي ته پاناما ڪيس کان پوءِ پنهنجي سياسي ڪارڊ شو ڪندس، ميدان سجندو ته مخالفن کي منهن ٽوڙ جواب ملندو، پيپلز پارتيءَ ۽ ق ليگ جي قيادات وچ ۾ سياسي ويجھڙايون وڌڻ لڳيون آهن، پيپلز پارٽيءَ مسلم ليگ ق جي اڳواڻ ڪام علي آغا پيپلز پارٽيءَ جي آڇ جي تقديق ڪري ڇڏي آهي، ڪامل علي آغا جو چوڻ هو ته آڇ جو پارتي اجلاس ۾ جائزو ورتو ويندو، آصف علي زرداريءَ جي ايندڙ سياسي صف بنديءَ جي لاءِ پارٽي اڳواڻنس ان صلاحون آصف علي زرداري ۽ بلاول ڀٽو زرداري جو صف بنديءَ کي پاناما ليڪس جي فيصلي کان پوءِ آخري شڪل ڏيڻ تي اتفاق ٿيو آهي.36

 

فوجي عدالتن جي مدي ۾ واڌ: قومي اسيمبلي بعد سينيٽ به بل جي منظوري ڏئي ڇڏي

اسلام آباد (ويب ڊيسڪ): سينيٽ قومي اسيمبلي مان منظور ٿيل فوجي عدالتن جي مدي ۾ ٻن سالن جي واڌ واري بل جي منظوري ڏئي ڇڏي، 28هين ترميم جي حق ۾ 78 ووٽ ۽ مخالفت ۾ 3 ووٽ ڏنا ويا، جمعيت علماءِ اسلام ف ۽ بلوچستان نيشنل پارٽي جي سينيٽرز اجلاس ۾ حصو نه ورتو، پختونخوا ملي عوامي پارٽي جي گل بشريٰ، عثمان ڪاڪڙ ۽ اعظم خان موسيٰ خيل  28هين ترميم جي مخالفت ۾ ووٽ ڏنو، واضح رهي ته سينيٽ جي گذريل اجلاس ۾ آرمي ايڪٽ ۾ ڪيل ترميمن کي اڪثريت راءِ سان منظور ڪيو ويو، جڏهن ته فوجي عدالتن جي قيام واري مدي ۾ ٻن سالن جي واڌ جي منظوري نه ڏني هئي، سينيٽ مان منظوري کانپوءِ 28هين ترميم کي صدر ممنون حسين ڏانهن موڪليو ويندو، جنهن کانپوءِ ان کي ايڪٽ آف پارليامينٽ جو درجو حاصل ٿي ويندو، واضح رهي ته جنوري 2015ع ۾ فوجي عدالتن جي قيام جي حوالي سان 21هين آئيني ترميم پارليامينٽ ۾ منظور ڪئي پئي وئي ته رضا رباني روئڻهارڪو ٿي ويو هو.

 

سنڌ حڪومت وفاق جي گئس منصوبن تي اعتراض واري ڇڏيا، وريراعظم کي خط

ڪراچي (اين اين آءِ) سنڌ حڪومت وفاق پاران پنجاب ۾ گئس لائين بعد جا 97 منصوبا شروع ڪرڻ تي لکت طور تي اعتراض واري ڇڏيا ميڊيا رپورٽ مطابق سنڌ جي وڏي وزير سيد مرادعلي شاهه وزيراعظم نوازشريف کي خط لکيو جنهن ۾ پنجاب ۾ گئس لائين واڌ جا 97 منصوبو شروع ڪرڻ تي لکت طور تي اعتراض واريا ويا مرادعلي شآهه پنهنجي خط ۾ چيو ته اطلاعن مطابق وفاق 37 ارب رپيا گئس منصوبا پنجاب ۾ شروع ڪيا آهن جڏهن ته پنجاب ۾ گئس نيٽ ورڪ جي واڌ آرٽيڪل 198 جي خلاف ورزي آهي ڇو ته ان قسم جي منصوبن ۾ واڌ تي وفاقي حڪومت خود پابندي هنئي آهي جيڪڏهن سنڌ ۾ پابندي آهي ته پنجاب ۾ ڪهڙي طرح گئس ڏني پئي وڃي سياسي بنيادن تي خاص علائقن کي گئس فراهم ڪرڻ سان ناراضگي وڌي ويون آهن مرادعلي شاهه پنهنجي خط ۾ چيو ته پنجاب ملڪ جي ڪل 3 سيڪڙو گئس پيدا ڪري ٿو ۽ 42 سيڪڙو استعمال ڪري ٿو گئس جي پيداوار جي لحاظ کان سڀ کان وڏي صوبي سنڌ کي نظرانداز ڪيو پيو وڃي. سوئي سدرن گئس ڪمپني سنڌ ۾ ڳوٺاڻن شهري علائقن ۾ گئس ڏيڻ کان انڪاري آهي اداري جو چوڻ آهي ته سنڌ ۾ گئس ڏيڻ تي وفاق پابندي مڙهي آهي وزيراعظم گئس جي فراهمي تي هڪ طرفي پابندي کي فوري ختم ڪرائي سمورا رهائشي صنعتي ۽ ڪمرشل سيڪٽرن کي فوري گئس فراهم ڪيو وڃي.