تازيون خبرون

Daily Archives: March 27, 2017

حڪومت جي ناقص پاليسين سبب هاري ۽ واپاري نتيجا پيا ڀوڳين: آصف زرداري

لاهور (اين اين آءِ)اڳوڻي صدر آصف علي زرداري سان لاهور چيمبر جي وفد ملاقات ڪئي آهي، ملاقات دوران ڳالهائيندي اڳوڻي صدر آصف زرداري چيو ته پرڏيهي قرضن جي شرح خطرناڪ حد کي ڇهي رهي آهي، پرڏيهي قرض بلند ترين وياج جي شرح تي ورتا پيا وڃن، آصف زرداري چيو ته حڪومت جي ناقص پاليسين  جو نتيجو هاري ۽ واپاري ڀوڳي رهيا آهن، تيل جي قيمتن ۾ گهٽتائي جا ثمر عوام تائين منتقل نه پيا ٿين، پ پ ٻيهر حڪومت ۾ اچي واپارين لاءِ سرمائيداري جا دروازا کوليندي، اسان ميدان ۾ نڪرڻ وارا آهيون هاڻي انهن کي ٻڌائينداسين ته چونڊ ڪيئن وڙهي ويندي آهي، پهرين به اسان پنجاب ۾ شڪست نه کاڌي، اسان کي آر او اليڪشن سان هارايو ويو، پنجاب ۾ ڪهڙيءَ طرح شفاف اليڪشن ٿيندا آهن، اسان ٻڌائينداسين، آصف زرداري چيو ته ملتان ۾ جلسو ڪنداسين ۽ انهن کي ٻڌائينداسين ته جلسو ڇا کي چوندا آهن  ٻئي طرف آصف علي زرداري ايندڙ عام چونڊن کي شفاف بنائڻ لاءِ سمورين پارٽين سان رابطا ڪرڻ جو اعلان ڪندي چيو آهي ته گذريل چونڊن ۾ اسان جا هٿ ٻڌل هئا پر هاڻي اسان جا هٿ کليل آهن. پ پ ڪڏهن به شڪست ناهي کاڌي جڏهن ته اسان آر اوز اليڪشن مان ضرور شڪست کاڌي آهي. اهڙن خيالن جو اظهار هن پ پ جي اڳواڻ حاجي عزيز الرحمان چن پاران پنهنجي اعزاز ۾ آجياڻي واري تقريب کي خطاب دوران ڪيو. آصف علي زرداري چيو ته مان تواهن جو جوش ڏسي چئي سگهان ٿو ته توهان مقابلي لاءِ تيار آهيو هن چيو ته مان پاڻ ميدان ۾ آهيان بلاول به ميدان ۾ آهي توهان جون نياڻيون به ميدان ۾ آهن اسان مقابلو ڪنداسين ۽ انهن کي خبر پئجي ويندي ته اليڪشن ڪنهن کي چوندا آهن. هن چيو ته پ پ قربانيون ڏنيون آهن هتي شهيدن جون ڀينرون ۽ نياڻيون آهن مون کي ياد آهي ته جڏهن بينظير ڀٽو لاهور آئي هئي ته سڄو لاهور بند ٿي ويندو هو انشاءَ الله هاڻي به لاهور بند ٿي ويندو. هن چيو ته توهان جو پراڻو نعرو آهي ته ڀٽو دي نعري وجنگي پر توهان جي ساٿ سان ڀٽو جا نعرا وڄندا. ايڪ زرداري سب پي ڀاري نه پر ايڪ زرداري سب سي ياري جو نعرو لڳايو.

 

ڪرپشن ڪندڙ چوڌري نثار کان ڊنل آهن، شرجيل ميمڻ قوم کي جواب ڏئي: مريم اورنگزيب

اسلام آباد (اين اين آءِ) سڌ سماءَ واري مملڪتي وزير مريم اورنگزيب چيو آهي ته ڪرپشن ڪندڙ چوڌري نثار کان ڊڄي رهيا آهن شرجيل ميمڻ صاحب توهان پنهنجي چوري ۽ ڪرپشن کي لڪائڻ لاءِ اجايون ررڙيون ڪري رهيا آهيو چوڌري نثار پاڪستان جو گهرو وزير آهي ان جي ديانتداري ۽ ڪردار تي آڱر کڻڻ کان اڳ پنهنجي اندر ۾ جهاتي پائي ڏسو. شرجيل ميمڻ صاحب توهان جيتريون رڙيون ڪندو اوترو چوڌري نثار جي احتساب کان بچي نه ٿا سگهو. جواب ته ڏيڻو ئي پوندو. هڪ بيان ۾ مريم اورنگزيب چيو ته شرجيل ميمڻ ررڙيون ڪري پنهنجي چوري ۽ ڪرپشن نه ٿو لڪائي سگهي. هن چيو ته چوڌري نثار کي پاڪستاني قوم اعتماد ڪري گهرو وزير بڻايو آهي شرجيل ميمڻ صاحب توهان قوم کي جواب ڏيو ته چوري ۽ ڪرپشن ڇو ڪئي؟ هن چيو ته چوڌري نثار اهو نالو آهي جيڪو وزيراعظم جي سوچ موجب پاڪستان کي دهشتگردي کان پاڪ ڪري رهيو آهي. چوڌري نثار اهو آهي جيڪو توهان جي گذريل دور جي ڪرپشن جو گند صاف ڪري رهيو آهي.

 

قانون ۽ ملڪ دشمني ڪندڙ خلاف سخت ڪاروائي ڪنداسين: وڏو وزير

ڳڙهي خدابخش (اين اين آءِ) سنڌ جي وڏي وزير سيد مرادع لي شاهه چيو آهي ته مڪاني نمائندن کي گاڏيون انهن جي ضرورت لاءِ ڏنيون پيون وڃن انهن جي مرضي وٺن يا نه وٺن ڪراچي ڊي ايم سيز ۾ ڪچرو کڻندڙ گاڏيون پهريان کان ئي موجود آهن جن کي تباهه ڪيو ويو آهي سنڌ جي وڏي وزير سيد مراد علي شاهه ڳڙهي خدابخش ۾ ميڊيا سان ڳالهائيندي چيو ته ميان نواز شريف جو سنڌ ۾ اچڻ سٺي ڳالهه آهي ان کي پهريان ئي سنڌ ۾ اچڻ گهرجي ها وڏي وزير اعتراف ڪيو ته ڪراچي ۾ ڪچرو کڻندڙ گاڏيون خراب آهن انهن کي تباهه ڪيو ويو آهي. وڏي وزير ڪچرو کڻندڙن لاءِ نين گاڏين جي ڳالهه به نه ڪئي جڏهن ته اهو چيو ته گذريل ڏينهن سنڌ جي ضلعن جي وائيس چيئرمينن کي استعمال لاءِ نيون گاڏيون ڏنيون ويون هن چيو ته ايم ڪيو ايم جا جيڪي به ماڻهو قانون يا ملڪ دشمني ڪندا انهن خلاف سخت ڪارروائي ڪئي ويندي. مراد علي شاهه چيو ته ايم ڪيو ايم پاڪستان خاطري ڪرائي آهي ته ان جو نه ته ايم ڪيو ايم جي باني سان تعلق آهي ۽ نه ئي لنڊن جي هدايتن تي عمل ڪندا.

 

چوڌري نثار ڦڙتي گھڻي ٿو ڏيکاري، نواز شريف هڪ شهر جو وزيراعظم آهي: شرجيل ميمڻ

ڪراچي (اين اين آءِ) پ پ اڳواڻ شرجيل انعام ميمڻ چيو آهي ته وفاقي گهرو وزير پاڪستان کي پنهنجي جاگير سمجهي ٿو پر اسان ائين ٿيڻ نه ڏينداسين، پاڻ تي لڳل ڪوڙن الزامن کي منهن ڏيڻ لاءِ وطن واپس آيو آهيان نواز شريف وانگر عدالتن تي حملا نه ڪندا آهيون عدالت تي مون کي اعتماد آهي. ميڊيا سان ڳالهائيندي شرجيل ميمڻ چيو ته قلمدان سنڀالڻ نه پر پاڻ تي لڳل الزامن کي منهن ڏيڻ لاءِ واپس وطن آيو آهيان. ڪا به حڪم امتناعي ناهي ورتي پر رضاڪاراڻي طور تي عدالت جي اڳيان پيش ٿيو آهيان. هن چيو ته اسان نواز شريف وانگر عدالتن تي حملا نه ڪندا آهيون پر عدالتن جو احترام ڪندا آهيون. هن چيو ته گهرو وزير کي جيڪو ڪم ڪرڻ گهرجي اهو نه پيو ڪري ۽ غير ضروري شين تي ڌيان ڏئي رهيو آهي. ان کي صرف اپوزيشن تي ڪرڻ ۽ وسڻ ايندو آهي جڏهن ته ملڪ ۾ دهشتگردي جو وڏو واقعو ٿيندو آهي ته هو سوڙ ويڙهي هڪ هفتي لاءِ سمهي پوندو آهي. ڪوئيٽا ڪميشن جي رپورٽ تي ته ان کي اخلاقي طور تي استعيفيٰ ڏيڻ گهرجي ها. هن چيو ته چوڌري نثار وزيراعظم ۽ ان جي خاندان جو نالو اي سي ايل ۾ ڇو نه وڌو ويو هو سمجهي ٿو ته ملڪ سندس جاگير آهي ۽ جيڪو چاهي ڪري سگهي ٿو. پاناما ڪيس ۾ وزيراعظم مني لانڊرنگ ۾ اسحاق ڊار جو نالو اي سي ايل ۾ ڇو نه وڌو ويو.

 

ايندڙ حڪومت پيپلز پارٽي جي ئي هوندي، ڪنهن سان اتحاد جو فيصلو ناهي ڪيو: خورشيد شاهه

ڪوهاٽ (ويب ڊيسڪ): قومي اسيمبلي ۾ مخالف ڌر اڳواڻ سيد خورشيد شاهه چيو آهي ته حڪومت کي چار سال ڏنا، هاڻي مهم شروع ڪئي ته حڪومت گهٻرائجي وئي، ايندڙ حڪومت پيپلز پارٽي جي ئي هوندي، ڪنهن سان اتحاد جو فيصلو ناهي ڪيو، هن چيو ته سياست ۾ ڪو دوست يا دشمن حتمي ناهي هوندو، خورشيد شاهه ميڊيا سان ڳالهائيندي چيو ته ڳالهيون سڀني سان ٿي سگهن ٿيون، پاناما اسڪينڊل تي فيصلو جيڪو به هجي، عوام جي حق ۾ هجڻ گهرجي.

 

ايف سي آدمشماري ۾ خلل وجهڻ جو منصوبو ناڪام بڻائي ڇڏيو: آءِ ايس پي آر

ڪوئٽا(ويب ڊيسڪ) آءِ ايس پي آر جي پڌرائي موجب فرنٽيئر بلوچستان ۾ آدمشماري جي عمل ۾ خلل وجهڻ لاءِ بارودي سرنگهن ذريعي دهشتگردي جو وڏو منصوبو ناڪام بڻائي ڇڏيو. آءِ ايس پي آر طرفان جاري ڪيل بيان مطابق شدت پسند بارودي سرنگهن ذريعي بلوچستان جي علائقي تربت ۽ دشت ۾ آدمشماري جي عمل ۾ خلل ۽ افراتفري پيدا ڪرڻ پيا چاهين جنهن کي ناڪام بڻايو ويو آهي. آءِ ايس پي آر مطابق ايف سي بلوچستان وقت سر ڪارروائي ڪندي رستي تي پيل بارودي مواد کي ناڪارا بڻائي ڇڏيو. سيڪيورٽي ذريعن مطابق شرپسندن تربت-دشت روڊ تي ديسي ساخت بم رکيو هو پر ايف سي ۽ ٻين قانون لاڳو ڪندڙ ادارن وقت تي ڪارروائي ڪندي ان کي ناڪاره بڻائي ڇڏيو، جڏهن ته واقعي جي وڌيڪ تحقيق ڪئي پئي وڃي. ياد رهي ته بلوچستان سميت سموري ملڪ ۾ آپريشن ردالفساد جاري آهي ۽ ان سلسلي ۾ سيڪيورٽي انتهائي سخت ڪئي وئي آهي.

 

اڳوڻي آرمي چيف جنرل راحيل شريف ايندڙ مهيني اسلامي اتحادي فورسز جي ڪمان سنڀاليندو

اسلام آباد (اين اين آءِ) اڳوڻو آرمي چيف جنرل راحيل شريف ايندڙ مهيني ۾ دهشتگردي خلاف جنگ لاءِ سعودي عرب جي سربراهي ۾ قائم ٿيندڙ 39 اسلامي ملڪن جي اتحادي فوج جي اڳواڻ جو عهدو سنڀاليندو جنهن کي مسلم نيٽو جو نالو ڏنو ويو آهي. نجي ٽي وي موجب اڳوڻي جنرل جي ويجهي دوست اعجاز اعواڻ ٻڌايو ته ان معاملي تي سعودي عرب ۽ پاڪستاني حڪومت وچ ۾ اتفاق راءِ قائم ٿي ويو آهي جنهن کانپوءِ حڪومت راحيل شريف کي اتحاد ۾ شموليت لاءِ عدم اعتراض سرٽيفڪيٽ جاري ڪيو آهي. هن چيو ته اڳوڻو آرمي چيف مئي ۾ پهريان کان طئه ٿيل اتحادي ملڪن جي بچاءَ وارن وزيرن جي اجلاس جي موقعي تي حلف کڻي سگهي ٿو ان اجلاس ۾ فورسز جو ڍانچو اتحادي ملڪن جي اهلڪارن جو انگ ۽ وڌيڪ معاملن جي حوالي سان اهم فيصلا ٿيڻ جو امڪان آهي.

 

آصف زرداري، بلاول ڀٽو جو لاهور دوري سان ن ليگ وارا پريشان آھن : اعتزاز احسن

لاهور (اين اين آءِ) پ پ جي سينئر اڳواڻ سينيٽر اعتزاز احسن چيو آهي ته حڪمران پارٽي جي ماڻهن جي روين ۾ بدنيتي آهي، هڪ طرف مختلف منصوبن ۾ اربين رپين جي بچت جي دعويٰ ڪئي پئي وڃي ته ٻئي طرف اربين رپيا ناڪام منصوبن ۾ لڳايا پيا وڃن. مهانگائي ۽ ڪرنٽ اڪائونٽ خسارو وڌڻ بابت مرڪزي بئنڪ جي تازي رپورٽ حڪمرانن جا پول کولي ڇڏيا آهن هڪ انٽرويو ۾ هن چيو ته بلاول ڀٽو کانپوءِ آصف علي زرداري جي لاهور دوري سان ن ليگ وارن جي پريشانين ۾ اضافو چٽو نظر اچي رهيو آهي. جڏهن ته وفاقي ۽ صوبائي وزير پنهنجن بيانن سان به ان جو اظهار ڪري رهيا آهن. پاناما ڪيس جو فيصلو اچڻ کان اڳ حڪمران پارٽي جي ماڻهن جو رويو  درست ناهي، هن چيو ته پ پ جي قيادت جلد پنجاب ۾ جلسا ڪندي موجوده حڪومتي دور ۾ ڪرپشن جا نوان طريقا ڳوليا ويا آهن.

 

احتساب ٿي ويو ته ايوانن ۾ ويهڻ وارا جيلن ۾ نظر ايندا: سراج الحق

پشاور (اين اين آءِ) جماعت اسلامي جي امير سينيٽر سراج الحق چيو آهي ته اميد ڪيون ٿا ته عدالت ڪرپشن جي خلاف ڪيس ۾ عوام جي حق ۾ جلد فيصلو ڏيندي اها وڏي خطرناڪ ڳالهه هوندي ته جيڪڏهن عدالت عوام کي انصاف نه ڏنو ته پوءِ فيصلو چوڪن ۽ چوراهن تي ٿيندو. ڪرپٽ اشرافيه پاڪستان کي ٽوڙيو نظريا پاڪستان کان محروم ڪيو، رنگ ۽ نسل جي بنياد تي ورهايو. ترقيءَ ۾ اهي ئي ڪرپٽ اشرافيه رڪاوٽ بڻيل آحن پاڪستان ۾ جمهوريت ۽ سياست ناهي صرف پيسي جي راند جاري آهي. بد ديانت ۽ ڪرپٽ مافيا پنهنجي سرمائي جي بنياد تي اقتدار تي قابض آهي. اهڙن خيالن جو اظهار هن عتمان زئي چارسده وسيع ۽ اريض ڪميٽي گرائونڊ ۾ خطاب ڪندي ڪيو. ان موقعي تي عالم سڳورن وڪيلن سميت سياسي اڳواڻن جو وڏو انگ جماعت اسلامي ۾ شامل ٿيڻ جو اعلان ڪيو. هن چيو ته چارسده جي عوام اسان جو نه پر اسلامي انقلاب جي آجيان ڪئي آهي شيطان ۽ آمريڪي وفادار پاڪستان تي قابض آهن ڪرپشن خلاف اسان جهاد شروع ڪيو آهي.

 

ٽڪيٽون ڪنهن کي نه ڏيندس، ٽڪيٽن جي لاءِ سڀني جي اهليت مان پاڻ ڏسندس: عمران خان

اسلام آباد (اين اين آءِ) پي ٽي آءِ جي چيئرمين عمران خان چيو آهي ته اسان پنهنجي اميدوارن کي ٽڪيٽ ميرٽ تي ڏينداسين ، ڪارڪنن جي جذبي جو احساس آهي، جيستائين مان مطمئن نه ٿيندس تيستائين پارٽي ٽڪيٽ نه ڏيندس، ميڊيا رپورٽ موجب هن چيو ته ڪي پي ڪي ۾ ڪرپشن ڪندڙ نه بچي سگهندا، جن ماڻهن کي ٽڪيٽ ڏني هئي سڀ کان اڳ انهن جو احتساب ٿيندو ڪارڪن فڪر نه ڪن اميدوارن جي ڪارڪردگي کي ڏسي انهن کي مان پاڻ ٽڪيٽ ڏيندس، اسان جي پارٽي احتساب ۽ انصاف لاءِ ٺهي هئي، هن جو چوڻ هو ته 2013 جي اليڪشن جي تياري نه هئي پر هن ڀيري پوري تياري سان اليڪشن وڙهنداسين.