تازيون خبرون

Daily Archives: March 20, 2017

ننڍپڻ ۾ چاڪليٽ جون هر طرح جون ڪليون، سڪا ۽ مهرن کي هيٺان ميڙيندي هيس: انوشڪا

ممبئي(شوبز نيوز) ننڍپڻ ۾ هر ٻار تقريبن هڪ ئي طرح جون حرڪتون ڪندو آهي ۽ والدين جي منع ڪرڻ باوجود به انهن جي ناهي ٻڌندو، پر عام ماڻهن جو خيال هوندو آهي ته ان جي پسنديده شخصيت شايد ڪنهن ٻي دنيا مان ئي آئي آهي ۽ انهن ان شخصيتن جو پنهنجو ئي تصور بڻايو هوندو آهي. اهڙي ئي ڪجهه ننڍپڻ جون خوبصورت يادون انوشڪا شرما پنهنجي مداحن سان شيئر ڪيون جنهن کي ٻڌي سڀ تمام گهڻو حيران ٿي ويا، ڀارتي ميڊيا رپورٽن مطابق بالي ووڊ ادڪارا انوشڪا شرما ٽي وي پروگرام ۾ پنهنجي نئين ايندڙ فلم ”ڦلاري“ جي پروموشن لاءِ پهتي، اداڪارا کان جڏهن پروگرام دوران ننڍپڻ جي عادتن بابت پڇا ڪئي وئي ته ان هڪ اهڙي عادت جو انڪشاف ڪيو جنهن کانپوءِ ان جا مداح ۽ ان پروگرام ۾ شرڪت ڪندڙ ماڻهو حيران ٿي ويا، اداڪاره چيو ته ننڍپڻ ۾ ان کي لڳندو هو ته هوءَ هڪ وڏي ڪٻاڙي آهي ڇو جو هوءَ ننڍپڻ ۾ چاڪليٽ جون هر طرح جون ڪليون، سڪا ۽ مهرن کي هيٺان ميڙيندي هئي.

 

فلم ”بدريناٿ ڪي دلنيا“ ڪامياب، جشن ملهايو ويو

ممبئي(شوبز نيوز) بالي ووڊ اداڪارا عاليه بٽ ۽ ورون ڌون پنهنجي فلم ”بدريناٿ ڪي دلهنيا“ جي ڪاميابي جو جشن ملاهيو، فلم رليز جي پهرين هفتي باڪس آفيس تي شاندار ڪاميابي حاصل ڪئي. ڀارتي ذريعن مطابق عاليه ڀٽ ۽ ورون ڌون پنهنجي فلم ”بدريناٿ ڪي دلهنيا“ جي رلير جي پهرين هفتي ۾ شاندار ڪاميابي جو جشڻ ملهايو جنهن ۾ ٻنهي اداڪارن کان علاوه فلم جو پروڊيوسر ڪرن جوهر، سوناڪشي سنها، جان ابراهم، ڪريتي سينن، اديتيا راءِ ڪپور، تاپسي پنو ۽ ٻيا ويجها دوست شامل ٿيا.

 

اسپاٽ فڪسنگ: 5 رانديگرن جا نالا اي سي ايل ۾ داخل ڪرڻ جو فيصلو

اسلام آباد(اسپورٽس نيوز) ايف آءِ اي اسپاٽ فڪسنگ اسڪينڊل جي تحقيق دوران 5 شڪي رانديگرن جا نالا ايڪزٽ ڪنٽرول لسٽ ۾ شامل ڪرڻ جو فيصلو ڪيو آهي. ايفآءِ اي پنج شڪي رانديگرن محمد عرفان، شاهه زيب حسن، خالد لطيف، شرجيل خان ۽ ناصر جمشيد جا نالا اي سي ايل ۾ وجهڻ لاءِ گهرو وزارت کي سفارش ڪري ڇڏي آهي. شڪي رانديگرن جا نالا اي سي ايل ۾ شامل ڪرن جي سفارش ايف آءِ اي پنجاب جي ڊائريڪٽر ڊاڪٽر عثمان ۽ جاچ آفيسر شاهد حسن طرفان ڪئي وئي آهي ۽ ان ڏس ۾ ان طرفان لکيل خط گهرو وزارت کي ملي ويو آهي. ذريعن جو چوڻ آهي ته ڄاڻايل رانديگرن جا نالا اي سي ايل تي 48 ڪلاڪن دوران شامل ٿي سگهن ٿا.

 

اسپاٽ فڪسنگ ۾ ملوث رانديگرن تي سڄي ڄمار جي پابندي لڳائي وڃي: مصباح الحق

ڪراچي (اسپورٽس نيوز) جاويد ميانداد، شاهد آفريدي ۽ محمد حفيظ کانپوءِ قومي ٽيسٽ ٽيم جي ڪپتان مصباح الحق به ميچ فڪسنگ ۾ ملوث رانديگر تي هميشه پابنديون لڳائڻ جو  مطالبو ڪيو آهي، نيشنلاسٽيڊيم ڪراچي ۾ ميڊيا سان ڳالهائيندي هن چيو ته پي سي بي کي ميچ فڪسنگ جي معاملن تي ڪنٽرول ڪرڻ لاءِ سخت قانون ٺاهڻو پوندو ۽ پي سي بي کي ميچ فڪسنگ ۾ ملوث رانديگرن تي هميشه پابندي لڳائڻ گهرجي، هن چيو ته ٽيم ۾ رانديگرن جي سليڪشن سليڪٽر جو ڪم آهي ان معاملي تي ڪا به ڳالهه نه ڪندس، جڏهن ته جيڪا به ٽيم حتمي هوندي ان کي هر شعبي ۾ سٺي ڪارڪردگي ڏيکارڻ گهرجي.

 

پاڻي جي کوٽ  ۽ سنڌ طاس معاهدي بابت ٿيندڙ ڳالهيون: صاحب خان ڀٽي

1960 ڌاري واري سنڌ طاس معاهدي تي هڪ ڀيرو ٻيهر ڀارت سان ڳالهيون بحال ٿيڻ طرف وڃڻ واريون آهن، ڀارت به  پاڪستان  سان سنڌ طاس معاهدي تي ڳالهيون ڪرڻ لاءِ  ڀارتي انڊس واٽر جي ڪمشنر پي ڪي سڪسينا کي 10 رڪني وفد سان  پاڪستان موڪلي ڇڏيو آهي،  هڪ طرف  سرحد تي ڇڪتاڻ هلي رهي ته ٻي طرف وري سنڌ طاس معاهدي تي ڳالهيون به  ٿي رهيون آهن، گذريل ڏينهن  جڏهن ڀارتي وفد ڏيهه پهتو ته لائن آف ڪنٽرول تي  ڀارتي فوج سيز فائر جي ڀڃڪڙي ڪندي فائرنگ ڪئي جنهن جي نتيجي ۾ 2  ٻارڙا زخمي ٿي پيا هئا، ان کان اڳ نيڪال سيڪٽر تي به فائرنگ ڪئي وئي هئي ۽ ان دوران به ٻه ٻارڙا زخمي ٿي پيا هئا، هڪ طرف افغان سرحد کان دهشتگرد چيڪ پوسٽن تي حملا  پيا ڪن ته مٿان  ڀارت به سرحد تي   مسلسل ڀڃڪڙِ ي ڪري رهيو آهي، بهرحال سرحدي دهشتگردي ۽ سرحد تي ڇڪتاڻ ته گذريل ڪيتري ئي عرصي کان هلي رهي آهي، جنهن جو فوج جا جوان ڀرپور جواب ڏئي رهيا آهن پر هاڻ ڀارت سان پاڻي تڪرار به شروع ٿي ويو آهي، ڀارت به مختلف وقتن تي پاڪستان جو پاڻي روڪڻ لاءِ ڌمڪيون به ڏيندو رهيو آهي. جنهن تي ٻنهي ملڪن طرفان بيانبازي جو سلسلو به هلندو رهيو آهي، ايتري قدر جو  پاڪستان طرفان عالمي سطح تي به سنڌ طاس معاهدي  بابت آواز اٿارڻ جي ڪوشش ڪئي وئي هئي پر ان باوجود  ڀارت هن وقت تائين سنڌ طاس معاهدي  تي ڌمڪيون ڏيندو رهيو آهي.

هن وقت جيڪڏهن ڏٺو وڃي  ته ڀارت اڳ پاڪستان سان سنڌ طاس معاهدي تي ڳالهيون ڪرڻ پسند نه ڪندو هو پر هاڻ وفد پاڪستان موڪليو آهي جنهن مان  اهو محسوس ٿي رهيو آهي  ته ڀارت به ان حساس معاملي کي حل ڪرڻ لاءِ سنجيده آهي ان ڪري  ڀارتي انڊس واٽر ڪمشنر پي ڪي سڪسينا  10 رڪني وفد سان پاڪستان آيو آهي،  ڪمشنر پي ڪي سڪسينا واهگا بارڊر ذريعي  لاهور پهتو  هو جتان هو سخت پهري هيٺ موٽر وي رستي اسلام آباد ويو هو. جيتوڻيڪ ڀارت سان سنڌطاس معاهدي تي ٻن سالن کان پوءِ ٻيهر ڳالهيون ٿي چڪيو آهي، جيڪي 21 مارچ تائين جاري رکيون وينديون ، ايتري قدر جو پي ڪي سڪيسنا جي وفد سان ڳالهين دوران چناب درياهه سان لاڳاپيل مختلف منصوبن تي ڳالهه ٻولهه ڪئي ويندي.

1960ع ۾ ٿيل سنڌ طاس معاهدي راوي ۽ ستلج جو پاڻي کي ملي ويو هو جڏهن ته چناب، جهلم ۽ سنڌو درياهه جو پاڻي پاڪستان کي ملڻو هو پر ان تي به مختلف وقتن تي ڀارت طرفان ڌمڪيون ڏنيون ويون، ايتري قدر جو پاڪستان طرفان ڪيترائي ڀيرا اهي دانهون به ڪيون ويون ته پاڪستان کي پنهنجي حصي جو پاڻي نه ملي رهيو آهي پر ان باوجود گڏيل قومن ڀارت خلاف ڪو به قدم نه کنيو  هو جنهن سبب  ٻنهي ملڪن ڇڪتاڻ پيدا ٿي  وئي هئي جيڪا هن وقت تائين هلندڙ آهي، هونءَ ته پاڪستان ۾ به ڪيتري ئي عرصي کان پاڻي جي کوٽ برقرار آهي پر ان باوجود ڀارت جون ڌمڪيون ملڻ ڳالهه کان سمجهه کان ٻاهر آهي، هڪ طرف پاڪستان جي سنڌ ۽ بلوچستان صوبن ۾ پاڻي جي کوٽ آهي ته مٿان  وري ڀارت طرفان پاڻي بند ڪرڻ جون ڌمڪيون  سمجهه کان ٻاهر نظر اچي رهيون آهن،

هن وقت  ڀارت طرفان پاڪستان ۾ وفد موڪليو آهي، جيڪو سٺو سنوڻ  آهي ان سان ٻنهي ملڪن ۾ سنڌ طاس معاهدي تي ڳالهين ۾ اڳڀرائي جو به امڪان آهي، جيڪڏهن سنڌ طاس معاهدي تي عمل ٿيو ته جيڪي صوبا پاڪستان ۾ پاڻي جي کوٽ جون دانهون ڪري رهيا آهن  انهن کي به پاڻي جي  فراهم ٿي ويندو  ۽ پاڪ ڀارت ۾ ٿيل  سنڌ طاس معاهدي تي اختلاف  ختم ٿي ويندا.  هونءَ ته پاڪستان ۾ وڏا ڊيم ٺاهڻ جا منصوبا ته رٿيل  آهن پر افسوس جو  نه ته پاڻي آهي ۽ نه  ئي  وري اهڙي منصوبي تي پاڪستان جا  سمورا  صوبا متفق ٿي سگهن ٿا اهو صرف ان  ڪري ٿي رهيو آهي ته ننڍن صوبن کي  پنجاب تي ڀروسو نه آهي تنهن جي ڪري ننڍا صوبا گذريل ڪيتري ئي عرصي کان اهي دانهون ڪندا رهيا آهن ته سندن حق غضب ڪيا پيا وڃن پر ان باوجود وفاق هڪ به نه ٻڌندو آهي،

هن وقت ملڪ جيڪي به وڏا ڊيم  آهن اهي صرف پنجاب ۾ آهن ۽ انهن ڊيمن مان ٻين صوبن کي ڪيترو پاڻي ڏنو ويندو آهي شايد ان بابت سنڌ جي ڪامورن کي به خبر نه هوندي تنهن جي ڪري اهي به اهي ئي بيان ڏيندا رهيا آهن ته  سنڌ کي پنهنجي حصي جو پاڻي نه ملي رهيو آهي. اهڙي ريت ٻيا صوبا اهي ئي ساڳيون دانهون ڪري رهيا آهن، هن وقت ٻڌڻ ۾ اچي رهيو آهي ته منگلا ڊيم، باشا ڊيم، تربيلا ڊيم ۾ پاڻي ختم ٿيڻ جي ويجهو پهچي ويو آهي، تنهن جي ڪري  سنڌ جي ٽنهي بئراجن ۾ پاڻي جي کوٽ ٿيڻ شروع ٿي وئي آهي،  ايتري قدر جو ٺٽي ۾ پاڻي جي بحران شدت اختيار ڪري ورتي آهي ۽ ڪينجهر جهيل ۾ به پاڻي گهٽجڻ لڳو جنهن سبب ٺٽي جي شاخن ۽ واهن  ۾  پاڻي جي فراهمي بند ڪئي وئي آهي،

جيڪڏهن  هن مد ۾ به پاڻي جي کوٽ اهڙي ريت رهي ته مٿان وري فصل جي پوکائي جو به وقت شروع ٿي ويندو، هن وقت ته لابارا هلي رهيا آهن جيڪي ڪجهه ڏينهن کان پوءِ ختم ٿي ويندا ۽ڪڻڪ به لهي ويندا پر اڳتي هلي پاڻي جي کوٽ کي ڪهڙي ريت منهن ڏبو هن وقت تائين وفاقي سرڪار ڪا به خاص حڪمت عملي نه جوڙي آهي، بهرحال زراعت جو پاڻي پنهنجي جڳهه تي، جيڪڏهن پيئڻ جي پاڻي جو به بحران ٿي ويو ته پوءِ ان کي منهن ڏيڻ تمام گهڻو مشڪل ٿي ويندو،هونءَ ته سنڌ جو وڏو شهر ڪراچي آهي جتي ٻه ڪروڙ کان وڌيڪ ماڻهو رهن ٿا جتي هزارين گيلن پاڻي مختلف علائقن روز استعمال ٿيندو آهي، جيڪڏهن هن وقت ٺٽي ۾ پاڻي جو بحران ختم نه ڪيو ويو ته پوءِ ان جا سڀ کان وڌيڪ ڪراچي شهر تي پوندا. وفاقي ۽ صوبائي حڪومتن کي گهرجي ته ان حساس معاملي تي حل ڪرڻ لاءِ قدم کڻڻا پوندا. هن وقت ته اهو به ٻڌن ۾ اچي رهيو آهي ته منگلا ڊيم، تربيلا ڊيم ۽ باشا ڊيم ۾ به پاڻي گهٽجڻ لڳو آهي،

جيڪڏهن ڏٺو وڃي ته پاڪستان ۾ انهن ڊيمن کي به ڀرڻ لاءِ پاڻي نه آهي ته پوءِ وڏا ڊيم ڪهڙي ريت ٺاهڻ جا منصوبا ڪيا پيا وڃن، هڪڙو ته سمنڊ ۾ مٺو پاڻي ڇوڙ نه ڪرڻ سبب ڊيلٽا تباهه ٿي رهي آهي ته مٿان وري پاڻي جي کوٽ به وڌي وئي آهي نه ته وفاقي سرڪار ڊيلٽا کي تباهه ٿيڻ کان بچائڻ لاءِ ڪو قدم کڻي رهي آهي ۽ نه ئي صوبن ۾ پاڻي جي کوٽ جو بحران  ختم ڪري سگهي آهي، بهرحال هن وقت سڄي ملڪ ۾پاڻي جي کوٽ شدت اختيار ڪري وئي آهي جنهن کي ختم ڪرڻ وفاقي سرڪار جي ئي ذميواري آهي، جيڪڏهن هن وقت بحران کي ختم نه ڪيو ويو ته مستقبل ۾ پاڻي جو بحران شدت اختيار ڪري وٺندو، هونءَ ته ڀارت سان به سنڌ طاس معاهدي تي ڳالهيون شروع ٿي ويون آهن، جنهن بابت صرف اهو ئي چئي سگهجي ٿو ته اهو ٻنهي ملڪن طرفان سٺو قدم آهي ۽ سنڌ طاس معاهدي  موجب ٻنهي ملڪن کي ڳالهيون هر سال جاري رکڻ گهرجن.

sahibalisindhi@gmail.com

 

 

سنڌ طاس معاهدو، ڀارتي وفد پاڪستان پهچي ويو…!

سنڌ طاس واٽر ڪمشنر جي ٻن ڏينهن وارين ڳالهين جي اڄ سومر کان شروعات ٿيندي جنهن ۾ شرڪت لاءِ ڀارتي وفد واگها جي رستي پاڪستان پهچي ويو آهي، 20 ۽ 21 مارچ تي ٿيندڙ ڳالهين ۾ پاڪستان جو وفد انڊس واٽر ڪمشنر مرزا آصف بيگ ۽ ڀارتي وفد سڪسينا جي قيادت ۾ شرڪت ڪندو جنهن ۾ ٻنهي ملڪن جي آبي معاملن کي غور هيٺ آندو ويندو، پاڪستان ڳالهين لاءِ ايجنڊا تي مشورو مڪمل ڪري آخري شڪل ڏئي ڇڏي آهي، پاڪستان جي اعليٰ آفيسرن سنڌ طاس معاهدي تي ڳالهين لاءِ واگها بارڊر رستي پاڪستان ايندڙ 10 رڪني ڀارتي وفد کي ڀليڪار ڪيو، رپورٽ موجب ڳالهين ۾ چناب درياءَ تي ٺهندڙ 3 تڪرار منصوبا بحث هيٺ ايندا انهن ۾ مايار ڊيم، لوئر ڪلنائي ڊيم ۽ پاڪل دل ڊيم شامل آهن، 1960 ۾ طئه ٿيل سنڌ طاس معاهدي کانپوءِ ٻنهي ملڪن ۾ پاڻي جي تڪرار تي اهو 113 هيون ڳالهيون هونديون، انڊس واٽر ڪميشن موجب ڀارت پاران تعمير هيٺ ڪشن گنگا ۽ رتلي ڊيم تي ڳالهه ٻولهه ايجنڊا ۾ شامل نه آهي. پاڪستان ۽ ڀارت ۾ سنڌ طاس معاهدو 1960ع ۾ طئي ڪيو ويو هو، جيڪو عالمي معاهدو آهي، جنهن کي ائين هڪدم اعلان ڪري ختم ڪرڻ سولو ناهي، ڇوته ان جي ضمانت ورلڊ بئنڪ کنئي هئي، پر ان جي باوجود ڀارت ان معاهدي جون خلاف ورزيون ڪندو پيو اچي، جنهن خلاف پاڪستان مختلف سطحن تي احتجاج به ڪندو رهيو آهي، پر ان جو هن وقت تائين ڪوبه کڙتيل ناهي نڪري سگهيو. ڀارت چناب، جهلم ۽ سنڌو درياءَ تي ڊيم ٺاهي رهيو آهي ۽ سندس پاران ان جو جواز بجلي پيدا ڪرڻ ڄاڻايو ويندو رهيو آهي. اصل ۾ ڀارت پن بجلي پيدا ڪرڻ بهاني پاڪستان جو پاڻي روڪڻ جي رٿابندي جوڙي چڪو آهي ۽ ان حوالي سان هُو ڪيئي ڀيرا ان جو کُلي عام اقرار به ڪندو رهيو آهي، سنڌ طاس معاهدو ختم ڪرڻ سميت مودي پاران اهڙي قسم جي ٻين ڌمڪين جو مقصد ڀارت جي رياستي چونڊن ۾ڪاميابي حاصل ڪرڻ هو ۽ مودي جي جنگي سوچ ٻنهي ملڪن جي عوام ۾ ويڇا وڌائي رهي آهي، جنهن جو نتيجو ائٽمي جنگ جي صورت ۾ به نڪري سگهي  ٿو، اڳ ئي اهي اڳڪٿيون ٿي رهيون آهن ته مستقبل ۾ پاڻي جي معاملي ٿي جنگ ٿي سگهي ٿي ۽ هن وقت جيڪي آثار نظر اچن ٿا، تنهن مان ڀلي ڀت اندازو ڪري سگهجي ٿو ته جيڪڏهن اها اڳڪٿي درست ثابت ٿي ته انهيءَ جنگ جي شروعات هن خطي مان ئي ٿيندي! مودي جو مقصد به اهو ئي آهي ته انهن دريائن تي بَند ٻَڌي پاڪستان طرف وهندڙ دريائن جو رُخ ڀارت طرف موڙيو وڃي ۽ پاڪستان جي زرعي زمينن کي غيرآباد ڪري بنجر بڻائي سگهجي ته جيئن خطي ۾ تڪرارن کي اڃا وڌيڪ هٿي ملي سگهي. ڀارت جي اهڙي سازش تي پاڪستان اهو معاملو عالمي بئنڪ ۾ کڻي ويو ۽ ان کي پنهنجي خدشن کان آگاهه ڪيو، پر ورلڊ بئنڪ به پاڪستان ۽ ڀارت کي گڏيل اجلاس سڏائي معاملا طئي ڪرڻ جي هدايت ڪئي هئي، اهو ئي سبب آهي جو هاڻي ٻئي ملڪ پاڻي معاملي تي ڳالهين جي ميز تي اچي رهيا آهن.دريائن جو پاڻي گهٽجڻ ڪري پاڪستان ۾ جر جو پاڻي به زمين جي مقرر سطح کان هيٺ ٿي ويو آهي، ٻيو ته هتي ٽيوب ويلن جو غيرمعمولي استعمال ڪيو پيو وڃي، جنهن سان به زمين مان نڪرندڙ پاڻي جي سطح تي وڏو اثر پيو آهي، ساڳئي وقت افسوس ته ان ڳالهه تي به ٿئي ٿو ته ڀارت گذريل پنجاهه سالن کان پاڪستان جي دريائن جي منڍ تي ڊيم تعمير ڪري رهيو آهي، جن ذريعي هو پاڪستان جي حصي ۾ ايندڙ پاڻي تي ڌاڙو هڻي رهيو آهي، پر پاڪستاني اختيارين طرفان ايڏي عرصي تائين ان معاملي تي سنجيدگي سان ڪوبه ڌيان نه ڏنو ويو، صرف دانهون ۽ڪوڪون ڪرڻ سان مسئلا حل نه ٿيندا، پاڻي مامرو هجي يا خطي جي ملڪن ۾ ڪشمير سميت ٻيو ڪوبه تڪرار، ان جي حل لاءِ بهتر حڪمت عملي ۽ رٿابندي جي ضرورت هوندي آهي، جنهن جي پاڪستاني اختيارين وٽ کوٽ نظر اچي ٿي ۽ ان جو ڀارت گذريل وڏي عرصي کان فائدو کڻي رهيو آهي. ان ڪري پاڪستان کي اهڙي حڪمت عملي اختيار ڪرڻ گهرجي، جنهن سان نه رڳو ڀارت پاڪستاني دريائن تي ڊيم تعمير ڪرڻ کان هٿ کڻي وڃي، گڏوگڏ پاڪستان پنهنجي حصي جو پاڻي به مڪمل طرح سان حاصل ڪري سگهي.