تازيون خبرون

Daily Archives: March 20, 2017

5 ارب رپين جي ڪرپشن: شرجيل ميمڻ اسلام آباد ايئرپورٽ تان گرفتار ۽ آزاد

اسلام آباد (اين اين آءِ) اسلام آباد ايئرپورٽ تان گرفتار ڪيل پ پ اڳواڻ شرجيل ميمڻ کي آزاد ڪيو ويو آهي، ذريعن موجب شرجيل ميمڻ جا ڪاغذ ڏسي ان کي آزاد ڪيو ويو، مڪيش ڪمار چاولا تصديق ڪئي آهي ته شرجيل کي آزاد ڪيو ويو آهي، شرجيل ميمڻ نجي ٽي وي سان ڳالهائيندي چيو ته پنهنجو موقف ميڊيا جي اڳيان پيش ڪندس، هن چيو ته وڪيلن سان صلاح مشورو جاري آهي جنهن کانپوءِ ميڊيا سان ڳالهائڻ دوران عوام کي صورتحال کان آگاهه ڪندس، ان کان اڳ پ پ اڳواڻ کي دبئي مان وطن واپسي تي اسلام آباد ايئر پورٽ تي حراست ۾ ورتو ويو هو، سادو لباس پهريل اهلڪارن جهاز کان ٻاهر ايندي ئي شرجيل ميمڻ کي حراست ۾ ورتو ان دوران هڪٻئي سان منهن ماري ڪئي، ذريعن موجب نيب اهلڪارن شرجيل ميمڻ کي حراست ۾ ورتو هو، شرجيل ميمڻ کي نيب ڪرائيم ونگ جي ڊپٽي ڊائريڪٽر سميت 6 اهلڪار گڏ وٺي ويا هئا، نيب ذريعن موجب شرجيل کي گرفتار نه ڪيو هو صرف پڇا ڪرڻ لاءِ ان کي گڏ وٺي ويا هئاسين، شرجيل ميمڻ نيب ڪراچي کي گهربل هو، ڪراچي جي نيب جي اطلاع تي راولپنڊي جي نيب ڪارروائي ڪئي. پ پ اڳواڻ شرجيل ميمڻ پاڻ تي لڳايل ڪرپشن بابت الزامن کي رد ڪندي چيو آهي ته سمورن ڪوڙن الزامن سان منهن ڏيڻ لاءِ پاڪستان آيو آهيان، جيڪڏهن منهنجي گهر مان هٿ ڪيل 2 ارب لاءِ چيو ويو ته اهي ڪٿي  آهن ۽ ڪهڙي اداري وٽ آهن، ڪرپشن الزام ثابت ٿي وڃن ته عدليه بيشڪ ڦاهي تي چاڙهي، نيب جو ادارو صرف سنڌ ۽ پ پ لاءِ ٺهيو آهي، مون کي گرفتار نه اغوا ڪيو ويو، پاڪستان ۾ هر شخص لاءِ الڳ قانون آهي، پاناما لاءِ الڳ ۽ پ پ لاءِ الڳ قانون آهي، پاڻ سان غير قانوني ورتاءُ ڪندڙن کي معاف ڪيان ٿو، منهنجي گرفتاري جو طريقو غلط هو، پريس ڪانفرنس ڪندي شرجيل ميمڻ گذريل رات اسلام آباد ايئر پورٽ تان پنهنجي گرفتاري ۽ آزادي جي حوالي سان تفصيلي آگاهه ڪيو ان پاڻ تي لڳل الزامن جي به وضاحت ڪئي. هن چيو ته منهنجو نالو اي سي ايل ۾ نوٽيفڪيشن کانسواءِ وڌيو ويو ڪنهن به کاتي نوٽيس نه موڪليو هو، نه اهو ٻڌايو ته منهنجي خلاف انڪوائري ٿي رهي آهي، هن ٻڌايو ته آگسٽ 2015 کان منهنجو ڪراچي ۾ علاج هلي رهيو هو، ڊاڪٽرن جي چوڻ تي علاج لاءِ ملڪ کان ٻاهر ويو هيس، هن چيو ته جنهن ڏينهن منهنجي گهرمان 2 ارب هٿ ٿيڻ جون خبرون ميڊيا تي آيون ان ڏينهن پيمرا جي موجوده چيئرمين مون کي فون ڪيو ۽ تصديق گهري پر مون کي چٽي چيو ته اهڙو ڪجهه به نه آهي، هن چيو ته جنهن ٽي وي چينل گهر تي ڇاپو ۽ 2 ارب رپيا هٿ ٿيڻ جون خبرون هلايون ان جي شڪايت به پيمرا سان ڪئي پر هن وقت تائين ڪو به جواب نه آيو آهي. هن چيو ته اي سي ايل ۾ انهن ماڻهن جو نالو وڌو وڃي ٿو جيڪي ملڪ ۾ موجود هوندا آهن، جڏهن ته ان جو نالو اي سي ايل ۾ ان جي پرڏيهه وڃڻ جي 2 مهينن کانپوءِ وڌيو ويو، جنهن ڏينهن ان جو نالو اي سي ايل ۾ وڌو ويو ان جي ٻئي ڏينهن ان جي وڪيل سنڌ هاءِ ڪورٽ سان رابطو ڪيو ۽ پڇاڻُو ڪيو ته ڪهڙن سبب ڪري ان جو نالو اي سي ايل ۾ وڌو ويو، پرڏيهه قيام دوران لنڊن ۽ دبئي جي اسپتالن ۾ علاج هيٺ رهيس ۽ ميڊيڪل رپورٽون به عدالت کي فراهم ڪندو رهيس جنهن جي بنياد تي ان کي ضمانت ملندي رهي، ڇا نيب صرف پ پ لاءِ ٺهي آهي، هن چيو ته جيستائين اعليٰ عدالت نيب کان ميگا ڪرپشن جا تفصيل گهريا ته لسٽ پيش ڪئي وئي، ان ۾ نواز شريف ۽ اسحاق ڊار ۽ ٻين جا نالا هئا پر انهن جا نالا اي سي ايل ۾ نه وڌا ويا. هن چيو ته جيڪڏهن ملڪ ۾ قانون سڀني لاءِ هڪ آهي ته انهن ماڻهن جا نالا ڇو نه اي سي ايل ۾ وڌا ويا جيڪي ملڪ ۾ هئا، هن چيو جيڪڏهن نيب ۾ همت آهي ته هو وزيراعظم نواز شريف ۽ حڪومتي ميمبرن جو نالو اي سي ايل ۾ وجهي، جڏهن نيب سپريم ڪورٽ ۾ لسٽ پيش ڪئي ته ان کانپوءِ اسپيڪر اياز صادق ۽ پرويز رشيد نيب جي خلاف بيان ڏنا هئا، ان وقت وزيراعظم نواز شريف به نيب خلاف بيان ڏنا هئا جنهن کانپوءِ نيب پنجاب ۾ بلڪل خاموش ٿي وئي، شرجيل ميمڻ چيو ته منهنجي خلاف ڪرپشن ريفرنس داخل ڪرڻ جو فيصلو آڪٽومبر 2016 ۾ ڪيو ويو ۽ ان سلسلي ۾ نه ئي منهنجو موقف ورتو ويو ۽ نه ئي ڪو نوٽيس ڏنو ويو، هن الزام مڙهيو ته ان جو تعلق پ پ سان آهي ۽ پ پ وارن لاءِ ملڪ ۾ قانون مختلف آهي، هن چيو ته مون کي عدالتن تي ڀروسو آهي، هو عدالت ويندو جيڪڏهن ڏوهاري قرار ڏنو ويو ته هو ڪنهن کان رحم جي اپيل نه ڪندو ۽ سزا ملڻ گهرجي، هن چيو ته جهڙي طرح مون کي ساده لباس پهريل اهلڪار وٺي ويا مان ان کي گرفتاري نه پر اغوا چوندس، هو ساده لباس اهلڪارن کان انهن جو تعارف پڇندو رهيو پر انهن ٻڌايو ته اهي ڪير آهن، جڏهن ته ضمانت جا ڪاغذ انهن وٽ موجود هئا، تعارف ڪرائڻ کانسواءِ اهلڪار کنڀيو، پهريان هڪ گاڏي ۾ ويهاريو ويو پوءِ ٻي گاڏي ۾ ويهاريو ويو، جيڪڏهن گرفتار ڪرڻو هو ته ان جو ڪو مهذب طريقو هوندو آهي، گرفتار ڪرڻ کان ڪنهن منع ناهي ڪيو، جيڪڏهن عدالت مان ضمانت ملي وئي ته روز نيب ۾ پيش ٿيندو رهندس، 5 هزار سوال پڇيا ويندا تڏهن به جواب ڏيندس، منهنجي گرفتاري جو طريقو غلط هو، نيب وارن جو سينو ٿڌو ٿي ويو، الله انهن کي خوش رکي مان انهن کي معاف ڪريان ٿو، مون کي ڄاڻ آهي ته نيب جو رول ڪهڙو آهي، جيڪڏهن هن ملڪ ۾ قانون هڪ آهي ته ميگا اسڪينڊل وارن جا نالا اي سي ايل ۾ نه وڌا ويا، نواز شريف، شهباز شريف جا نالا ته اي سي ايل ۾ نه وڌا ويا، جيڪڏهن نيب جي چيئرمين ۾ ايتري همت آهي ته وزيراعظم جو نالو اي سي ايل ۾ وجهي، هن چيو ته نيب کي سڀ ڪارروايون صرف سنڌ ۾ ڪرڻيون آهن، ڇا پاڪستان ۾ پنجاب نٿو اچي، نيب کي طاقت نه آهي ته پنجاب ۾ گهڙي ڏيکاري، رانا مشهود جي وڊيو ڪير به نٿو ڏسي، ڪو هڪ ادارو چوي ته ان نوٽيس موڪليو ۽ مان نه آيس، مان جهاز مان لٿس ۽ اوچتو 8 کان 10 ماڻهو اڳيان اچي ويا، مون صرف هڪ سوال پڇيو ته توهان ڪير آهيو پر ٻڌايو نه ويو، هن چيو ته اهو جهنگ جو قانون آهي، ڇا هو اسان کي چهرن سان نه پيا ڄاڻين، هن چيو ته اسلام آباد ۾ چوڌري نثار ۽ شريف ڀائرن جي مهمان نوازي تي ٿورائتو آهيان جيڪي ماڻهو مون کي وٺي ويا انهن غلط ورتا ڪيو.

 

خان صاحب! روئڻ سان فرق نه پوندو نيب کي ڪرپشن جو جواب ڏيو: مريم اورنگزيب

اسلام آباد (اين اين آءِ) سڌ سماءَ جي مملڪتي وزير مريم اورنگزيب چيو آهي ته عمران خان توهان ساڍن 3 سالن ۾ 25 کان 26 بلين ڪوڙ ڳالهايو ۽ يو ٽرن ورتو، شڪر آهي ته خان صاحب ساڍن  3 سالن ۾ توهان هڪ ٻوٽو ته لڳايو اهو به نه لڳايو ها ته ڪي پي ڪي جي عوام کي ڪهڙو منهن ڏيکاريو ها، نيب کي خط ڪي پي ڪي جو عوام لکي رهيوآهي، خان صاحب توهان رڙيون نه ڪيو ۽ پنهنجي ڪرپشن جو جواب نيب کي ڏيو، هن چيو ته خان صاحب توهان کي جتي ۽ جهڙي هنڌ موقعو ملي ٿو ته توهان هڪ وڌيڪ ڪوڙ ڳالهايو ٿا، هن چيو ته خان صاحب توهان ۽ توهان جا وزيرن کي جڏهن ڪرپشن جا الزام لڳن ٿا ته روئڻ شروع ڪن ٿا ۽ توهان مسلسل ڪوڙ ڳالهائيندي الزام لڳائي رهيا آهيو ان تي توهان کي شرم اچڻ گهرجي، هن چيو ته هاڻ روئڻ سان ڪجهه نه ٿيندو، ڪم ڪرڻ جو وقت گذري ويو، هن چيو ته خان صاحب توهان جي ناڪامي جي پويان توهان جي ڪوڙ ڳالهائڻ جي عادت، منفي سياست ۽ حسد آهي.

 

منظور وساڻ جا خواب سچا ثابت ٿيندا آهن، فاروق ستار ۽ شرجيل جو معاملو الڳ الڳ آهي: وڏو وزير

خيرپور (اين اين آءِ) وزيراعليٰ سنڌ مراد علي شاهه جي خيرپور آمد، قائم علي شاهه ۽ منظور وساڻ سان ملاقاتون، وليمي ۾ شرڪت، وفاق کي آدمشماريءَ بابت شڪايتن جي ازالي لاءِ مڪينزم جوڙڻ گهرجي، جنهن طريقي سان آدمشماري ٿي رهي آهي تنهن کي آخر ۾ ڪير به قبول نه ڪندو، دمشماريءَ دوران هر بلاڪ بابت سمري فارم ڀري هر ماڻهوءَ جي معلومات لاءِ ويب سائيٽ تي رکيو وڃيپيپلزپارٽي ڪنهن جي جاگير ناهي، خدمتون ڪرڻ واري کي پارٽيءَ هميشه ڀليڪار چيو آهي اسين ڪنهن کي پارٽيءَ مان ڪڍندا نه آهيون، قيادت جو هر فيصلو قبول هوندو، شرجيل ميمڻ عدالتي ضمانت ڏيکارڻ بعد آزاد ٿيو ۽ هو سڀاڻي اسلام آباد هاءِ ڪورٽ ۾ پيش ٿيندوفاروق ستار کي شرجيل جيان ضمانت ڪرائي عدالتي حڪمن جي پاسداري ڪرڻ گهرجي، سنڌ جي وڏي وزير سيد مراد علي شاهه چيو آهي ته آدمشماريءَ بابت شڪايتن ۽ اعتراضن جي ازالي لاءِ وفاقي حڪومت کي ڪو مڪينزم جوڙڻ گهرجي، جنهن طريقي سان آدمشماري ٿي رهي آهي تنهن کي آخر ۾ ڪابه ڌر قبول ڪونه ڪندي، هر بلاڪ جي ڪُل آبادي، مردن ۽ عورتن جي تعداد بابت معلومات حڪومت ڇا پر هر عام ماڻهوءَ لاءِ ويب سائيٽ تي رکڻ گهرجي، ته جيئن آدمشماري وارو عمل صاف ۽ شفاف يقيني بڻجي سگهي، خبر ناهي ڇو آدمشماري واري عمل کي تمام ڳجهو ۽ لڪ ڇپ ۾ رکيو ويو آهي، اسين سنڌ جي اعتراضن بابت آدمشماري بابت انچارج وزير ۽ وفاقي وزير اسحاق ڊار کي خط لکي آگاهه ڪري ڇڏيو آهي. جيلاني هائوس خيرپور ۾ اڳوڻي وزيراعليٰ سنڌ سيد قائم علي شاهه سان ملاقات کانپوءِ ميڊيا سان ڳالهائيندي سنڌ جي وڏي وزير سيد مراد علي شاهه چيو ته هر ضلعي ۾ ڊسٽرڪٽ سينسز آفيسرن کي هدايت ڪئي وڃي ته اُهي هر بلاڪ جي سمري انفارميشن ٺاهي اعتراضن ۽ شڪايتن لاءِ پڌري ڪن ۽ اُنهن انگن اکرن بابت ڪو ماڻهو شڪايت يا اعتراض ڪري ته اهي ٻڌڻ لاءِ ڪو هجي ۽ انهن جو ازالو ڪيو وڃي، ان سان صاف شفاف آدمشماري ٿي سگهندي ۽ ماڻهن جو ان تي اعتماد ٿي سگهندو، جيڪڏهن ماڻهن کي آدمشماري واري عمل تي بي اعتمادي هوندي ته پوءِ ان کي ڪير به قبول نه ڪندو. هن چيو ته جنهن طريقي سان هينئر آدمشماري ٿي رهي آهي، ان کي آخر ۾ ڪابه ڌر يا اسٽيڪ هولڊر قبول نه ڪندي سڀ ڪو چوندو ته اهو غلط ٿيو آهي. هڪ سوال جي جواب ۾ سيد مراد علي شاهه پيپلزپارٽي ڪنهن جي جاگير ناهي هيءَ ماڻهن جي پارٽي آهي ۽ ان ۾ خدمت ڪرڻ وارن کي هميشه ڀليڪار چيو ويندو ۽ جيسيتائين وٽن عوامي خدمت جو جذبو هوندو پارٽيءَ ۾ رهندا، پارٽي قيادت جيڪو به فيصلو هوندو اهو سڀني کي قبول هوندو. شرجيل ميمڻ جي گرفتاري ۽ آزادي بابت پڇيل سوال جي جواب ۾ وزيراعليٰ سنڌ جو چوڻ هو ته شرجيل ميمڻ اسلام آباد هاءِ ڪورٽ پاران مليل بيل آرڊر تحت پاڪستان آيو ۽ عدالت جو حڪم هو ته هو 20 تاريخ تي ڪورٽ ۾ پيش ٿيندو ۽ ان کان اڳ کيس گرفتار نه ڪيو ويندو، اسين قانون کان مٿانهين ڪا به شيءِ نه ڪنداسين، کيس اطلاع آهن ته شرجيل ميمڻ سڀاڻي 20 مارچ تي اسلام آباد هاءِ ڪورٽ ۾ پيش ٿيندو ۽ هو عدالت جو فيصلو قبول ڪندو. اِن کان اڳ وزيراعليٰ سنڌ سيد مراد علي شاهه اڳوڻي وزيراعليٰ سيد قائم علي شاهه سان ملاقات ڪئي، ان موقعي تي ايم اين اي ڊاڪٽر نفيسه شاهه، پير فضل حسين شاهه غزاله سيال ۽ ٻيا پڻ موجود هئا. بعد ۾ وزيراعليٰ سنڌ سيد مراد علي شاهه پ پ اڳواڻ سيد جاويد علي شاهه جيلاني سان سندس رهائشگاهه تي ملاقات ڪئي. بعد ۾ سنڌ جي وڏي وزير سيد مراد علي شاهه وساڻ هائوس خيرپور تي صوبائي وزير منظور حسين وساڻ سان ملاقات ڪئي، ان موقعي تي ايم اين اي حاجي نواب خان وساڻ، ضلعي چيئرمين شهريار وساڻ، منور وساڻ ۽ ٻيا پڻ موجود هئا. وساڻ هائوس تي ميڊيا سان ڳالهائيندي وزيراعليٰ سنڌ چيو ته فاروق ستار ڪجهه ڪيسن ۾ گهربل آهي، جنهن ۾ هُن ضمانت نه ورتي هئي، کيس گهرجي ته هو عدالت مان شرجيل ميمڻ جيان ضمانت حاصل ڪري ۽ عدالتي حڪمن جي پاسداري ڪري. بعد ۾ وزيراعليٰ سنڌ سيد مراد علي شاهه ناليواري اديب ۽ شاعر مختيار ملڪ جي ڀائٽي ساگر امتياز ملڪ جي شاديءَ جي تقريب ۾ شرڪت پڻ ڪئي.

 

صدر ممنون حسين هندو ميرج بل 2017تي صحيح ڪري ڇڏي

اسلام آباد (اين اين آءِ) صدر ممنون حسين وزيراعظم جي ايڊوائيز تي هندو ميرج بل 2017 جي منظوري ڏني آهي، صدر جي صحيح کانپوءِ بل کي قانوني حيثيت ملي وئي آهي ۽ اهو سڄي ملڪ ۾ لاڳو ٿي ويو آهي، تفصيل موجب صدر ممنون حسين وزيراعظم نواز شريف جي ايڊوائيز تي هندو ميرج بل 2017 جي منظوري ڏني، ان بل جو مقصد پاڪستان ۾ رهندڙ هندن جي شادي خاندان، ماءُ، ٻار ۽ هندو خاندان جا حق ۽ مفادن جو تحفظ ڪرڻ آهي، ان حوالي سان وزيراعظم نواز شريف چيو ته حڪومت هميشه پاڪستان ۾ رهندڙ اقليتي برادري کي مساوي حق ڏيڻ تي ڌيان ڏنو آهي، هو ڪنهن ٻئي طبقي وانگر ئي محب وطن آهن، ان لاءِ اها رياست جي ذميواري آهي ته انهن کي مساوي تحفظ ڏنو وڃي.

 

پاڪستان پنهنجي سمورن پاڙيسرين سان سمورا حل طلب مسئلا پرامن ڳالهين ذريعي حل ڪرڻ واري پاليسي تي قائم آهي: وزيراعظم

اسلام آباد (اين اين آءِ) وزيراعظم نواز شريف چيو آهي ته پاڪستان پنهنجي سمورن پاڙيسري سان سمورن حل طلب مسئلن تي امن ڳالهين ذريعي حل ڪرڻ واري پاليسي تي عمل ڪري رهيو آهي، پاڪستان جي رشين فيڊريشن ۽ تاتا رستان سميت ان جي مسلم علائقن سان پراڻ لاڳاپا آهن جنهن سان گڏيل مفاد جي سمورن شعبن ۾ اهم اڳڀرائي ٿيندي، هو جمهوريا تاتا رستان جي صدر رستم مڃي فا نووف سان ملاقات دوران ڳالهائي رهيو هو جنهن آچر تي وزيراعظم هائوس ۾ ان سان ملاقات ڪئي، وزيراعظم نواز شريف پاڪستان ۽ روس ۾ خطي ۾ امن امان کي هٿي وٺرائڻ لاءِ مثبت ڪردار ۽ هر شعبي ۾ مضبوط لاڳاپن جي قيام جو عزم ڪيو، تاتا رستان جي صدر ۽ ان سان گڏ پاڪستان جي دوري تي آيل وفد کي ڀليڪار ڪندي وزيراعظم چيو ته گڏيل پراڻا لاڳاپا ان ڳالهه جو ثبوت اهن ته پاڪستان ۽ روس ۽ تعاون وڌائڻ لاءِ هر ممڪن قدم کنيا ويندا، هن روز ڀريو ته پاڪستان سمورن پاڙيسرين سان سمورا مسئلا ڳالهين ذريعي حل ڪرڻ چاهي ٿو، تاتا رستان جي صدر وزيراعظم پاران ان جي پاڪستان جي دوري جي موقعي تي بهترين ميزباني تي ٿورا مڃيا، هن ٻڌايو ته تاتا رستان جو ڪاروباري وفد جي لاهور ۾ فائديمند ملاقاتون ٿيون آهن، وزيراعظم اميد ظاهر ڪئي ته ٻئي ملڪن جي بزنس فورم تي ٻڌل جوائنٽ بزنس فورم گڏيل واپار کي هٿي وٺرائڻ ۾ مددگار ثابت ٿيندو، هن چيو ته بيڪنگ هلال فوڊ، سيمينٽ جي پيداوار ۽ آٽوموٽو انڊسٽري ٽيڪنالاجي، ثقافت ۽ تعليم جي شعبن ۾ تعاون جا موقعا ڳولڻ گهرجن.

 

ترميمن جا بل سومر ڏهاڙي اسيمبلي ۾ پيش ڪيا ويندا: اسحاق ڊار

اسلام آباد (ويب ڊيسڪ): ناڻي واري وفاقي وزير اسحاق ڊار چيو آهي ته ترميمن جا بل سومر ڏهاڙي اسيمبلي ۾ پيش ڪيا ويندا، هن چيو ته فوجي عدالتن جي مدت ۾ واڌ بابت اڱاري تي قومي اسيمبلي ۾ ووٽنگ ٿيندي، ناڻي واري وفاقي وزير چيو ته پيپلز پارٽي جي مطالبي تي قومي سلامتي تي قلمي اسيمبلي ۾ بحث ٿيندو، هن چيو ته ن ليگ جي پارلياماني ڪميٽي جو اجلاس سومر بدران اڱاري تي ٿيندو، نواز شريف پارلياماني ڪميٽي جي اجلاس جي صدارت ڪندو.

 

پاڪستان کي دهشتگردي ڪفيل رياست قرار ڏيڻ آمريڪا جي خواهش نه آهي: اعزاز چوڌري

واشنگٽن (اين اين آءِ) آمريڪا ۾ نئين مقرر ٿيندڙ پاڪستاني سفير اعزاز احمد چوڌري چيو آهي ته آمريڪا ۾ پاڪستان کي دهشتگردي جي ڪفيل رياست قرار ڏيڻ جي ڪا به خواهش نه آهي، ماڻهو ٻنهي ملڪن ۾ پراڻن لاڳاپن کي ڏسڻ چاهين ٿا، ميڊيا رپورٽ موجب پاڪستاني صحافين سان ڳالهائيندي اعزاز چوڌري افغانستان ۾ امن ڳالهين جي حوالي سانچئن ملڪن تي ٻڌل گروپ جيئن ٻين ملٽي لٽرل فورم جي ٻيهر بحالي جي ضرورت تي زور ڀريو، پاڪستاني سفير هڪ سوال جي جواب ۾ چيو ته واشنگٽن جي مخصوص ماڻهو پاڪستان کي دهشتگردي جي ڪفيل رياست قرار ڏيڻ جو معاملو اٿاري رهيا آهن پر آمريڪين جي وڏي انگ پاڪستان کي دهشتگردي خلاف جنگ ۾ پنهنجي اتحادي طور تي ڏسي ٿو، پاڪستاني سفير ڳالهائڻ دوران پاڪستان ۾ ٿيندڙ تازين بهترين بابت چيو ته هن وقت ملڪ اقتصادي اڏام ڪري رهيو آهي ۽ هن وقت ويجها لاڳاپا قائم ڪرڻ ٻنهي ملڪن جي مفاد ۾ آهن، هن چيو ته پاڪستان وفاق جي انتظام هيٺ قبائلي علائقي فاٽا سان اٽڪل دهشتگردن جون محفوظ پناهگاهون ختم ڪيون آهن.

 

آصف علي زرداري پاران سنڌ حڪومت کي ٿرايرڊ يونيورسٽي قائم ڪرڻ جي هدايت

ڪراچي (اسٽاف رپوٽر) اڳوڻي پاڪستان جي صدر ۽ پ پ پ جي صدر جناب آصف علي زرداري وزير اعليٰ سنڌ جي اقليتي معاملن بابت خصوصي معاون ڊاڪٽر کٽو مل جيوڻ سان ملاقات ڪئي ۽ کاتي جي ڪارڪردگي ۽ اقليتي برادري جي ڀلائي لاءِ کينل قدمن  متعلق بريفنگ ڏني. ان موقعي تي هن پاڪستان پيپلز پارٽي جي صدر جناب آصف علي زرداري کي درخواست ڪئي ته ٿرپارڪر جي نوجوانن کي معياري هنري ۽ جديد تعليم مهيا ڪرڻ لاءِ کان علاوه ايگريڪلچر، لائيواسٽاڪ ۽ جنگلات جي شعبن ۾ ريسرچ لاءِ ٿر ايرڊ يونيورسٽي (Thar Arid university ) قائم ڪئي وڃي ، جنهن تي آصف علي زرداري سنڌ حڪومت کي ان سلسلي ۾ فوري عمل ڪرڻ جي هدايت ڪئي. اڳوڻي پاڪستان جي صدر ٿرپارڪر ۾ سولر ذريعي هلندڙ ڪاٽيج انڊسٽري کي قائم ڪرڻ  جي پڻ هدايت ڪئي، ته جيئن مقامي ماڻهن کي روزگار جا بهتر موقعا ميسر ڪري سگهجن. ان موقعي تي آصف علي زرداري چيو ته سنڌ حڪومت گذريل 9 سالن ۾ ٿرپارڪر ضلعي جي ترقي لاءِ خاص مراعات ۽ فنڊ جاري ڪيا آهن. ان موقعي تي ڊاڪٽر کٽو مل جيوڻ اقليتي برادري لاءِ هلندڙ منصوبن بابت ٻڌايو ته اقليتي معاملن واري کاتي تحت ضرورتمندن، مستحق ، بزرگن، معزورن ۽ بيواهن کي طبي امداد ۽ مالي مدد فراهم ڪئي پئي وڃي، جڏهن ته ذهين ۽ ضرورتمند شاگردن ۽ شاگردياڻين کي ميرٽ تي تعليمي اسڪالرشپس به فراهم ڪيو پيون وڃن. ان کان علاوه اقليتي برادري جي عبادتگاهن جي تعمير ۽ انهن کي وڌيڪ محفوظ بڻائڻ لاءِ ڪيترائي منصوبا مڪمل ٿيڻ وارا آهن.

 

بابر بٽ جي قتل تي هر ڪارڪن غمگين آهي، پوليس جوابدارن کي تحفظ پئي ڏئي: اعتزاز احسن

لاهور (ويب ڊيسڪ) پيپلز پارٽيءَ جو اڳواڻ ۽ سينيٽر اعتزاز احسن پ پ جي مقتول اڳواڻ بابر بٽ جي گھر پهچي ويو، بيريسٽر اعتزاز احسن بابر بٽ جي گھرن وارن سان تعزيت ڪئي، ان موقعي تي ميڊيا سان ڳالهائيندي سينيٽر اعتزاز احسن جو چوڻ هو ته پيپلز پارٽيءَ جو هر ڪارڪن بابر بٽ جي قتل تي غم ۾ ورتل آهي، سندس قتل تي سڄو علائقو سوڳوار آهي، سينيٽر اعتزاز احسن چيو ته بابر بٽ جو قتل ناقابل ڀرڻ جوڳو نقصان آهي، پوليس پنهنجي ڪارروائي صحيح نموني نه پئي ڪري، پوليس ڏوهارين کي تحفظ ڏئي رهي آهي، پنجاب غير علائقو بڻجي ويو آهي، شوڪت بسرا تي حملي جي جاچ به درست نه پئي ٿئي، پاناما ڪيس ۾ رڳو 2 خط پيش ڪيا ويا آهن.36

 

بکر ۾ چنگچيءَ رڪشا کي بس جو ٽڪر، عورت ۽ ٻارڙن سميت 8 ڄڻا فوت

ملتان (ويب ڊيسڪ) دريا خان روڊ تي تيز رفتار بس چنگچي رڪشا کي ٽڪر هڻي ڪڍيو، نتيجي ۾ عورت ۽ ٻارڙن سميت 8 ڄڻا فوت ٿي ويا، جڏهن ته چار چڻا زخمي ٿي پيا، بکر جي علائقي دريا روڊ تي تيز رفتار بس چنگچي رڪشا کي ٽڪرهنيو، اکين ڏٺن شاهدن جو چوڻ آهي ته بس ڊرائيور جي ڪنٽرول مان نڪري چنگچي رڪشا تي چڙهي وئي، نتيجي ۾هڪ عورت ۽ 2 ٻارن سميت 5 ڄڻا موقعي تي فوت ٿي ويا ۽ ست ڄڻا زخمي ٿي پيا، حادثي کان پوءِ بس جو ڊرائيور فرار ٿي ويو، حادثي جو اطلاع ملندي ريسڪيو ۽ پوليس جون ٽيمون واقعي واري هنڌ پهچي ويون، لاشن ۽ زخمين کي ڊي ايڇ ڪيو بکر منتقل ڪيو ويو جتي وڌيڪ 3 زخمي علاج دوران فوت ٿي ويا، چئن زخمين جو علاج جاري آهي، ٻئي طرف پوليس جو چوڻ آهي ته حادثي جي اکين ڏٺن شاهدن جا بيان رڪارڊ ڪيا ويا آهن، بس ڊرائيور جي گرفتاريءَ جي لاءِ علائقي جي ناڪا بندي ڪري ڇاپا هنيا پيا وڃن، جلد جوابدار کي قانون جي ڪٽهڙي ۾ آندو ويندو.36