تازيون خبرون

Daily Archives: March 17, 2017

وزير اعظم پاران گوادر لاءِ هڪ ارب جو اعلان، بلوچستان کي پاڪستان جو ٽائيگر بڻائينداسين: نواز شريف

گوادر (ويب ڊيسڪ) وزيراعظم نواز شريف چيو آهي ته ملڪ ۾ روڊ ٺهڻ سان گڏيل ترقي ٿيندي آهي، روڊ ٺهندا آهن ته صنعت ۽ زراعت جي ترقي ٿيندي آهي، پاڪستان، ايشيا ۽ بلوچستان پاڪستان جو ٽائيگر بڻجندو، گوادر ۾ عوامي جلسي کي خطاب ڪندي وزيراعظم نواز شريف جو چوڻ هو ته بلوچستان هاڻي محروم نه آهي، محروميون دور ڪرڻ جو سبب بڻجندو، اڄ ترقيءَ جو هر رستو بلوچستان مان نڪرندي نظر اچي رهيو آهي، اسان وڏي حوصلي  سان ملڪ کي ٽريڪ تي آڻڻ جي ڪوشش ڪئي آهي، روڊن کان پوءِ اسڪول، ڪاليج ۽ اسپتالون به ٺهنديون، حڪومت ملي ته لوڊشيڊنگ، تباهه ٿيل خزانو، بند صنعتون ۽ دهشتگردي عروج تي هئي، بلوچستان مان 11 سئو ڪلوميٽر ڊگھو روڊ ٺهي رهيو آهي، روز بلوچستان جي منصوبن بابت جائزو وٺندو رهندو آهيان، ڪو ڏينهن اهڙو ناهي گذرندو جڏهن اسان گوادر ۽ بلوچستان جي ڳالهه نه ڪندا هجون، گوادر ۽ بلوچستان روز اسان جي ايجنڊا ۾ هوندو آهي، اڄ گوادر جون زمينون سون کان به وڌيڪ قيمتي بڻجي ويون آهن، بلوچستان جي وڏي وزير کي يقين ٿو ڏياريان ته بلوچستان جي ترقيءَ ۾  ساڻس گڏ بيٺل آهيون، اڄ گوادر ايندڙ ماڻهو شاهراهه جي تعريف ڪري رهيا آهن، انهن علائقن ۾ روڊ ٺاهيا جتي انتها پسندي ۽ دهشتگردي هئي، وڏو وزير سٺو ڪم ڪري رهيو آهي، گوادر ۾ 300 ميگا واٽ بجليءَ جا ڪارخانا لڳايا پيا وڃن، ڪجھه ڳالهين جي نتيجن ۾ وقت لڳي ويندو آهي پر نتيجا ضرور نڪرندا آهن، 19 ارب رپيا بلوچستان جي عوام تي قربان آهن هي سندن حق آهي، 3 سالن ۾ بلوچستان جي ترقيءَ جي لاءِ جيڪو ڪجھه ٿيو اهو ماضيءَ ۾ ڪڏهن به نه ٿيو، گوادر ضلعي جي ماڻهن کي هيلٿ ڪارڊ جاري ڪيا ويندا، 100 ڪروڙ رپين جو گرانٽ رکيو آهي جيئن يونيورسٽي ٺهرائي وڃي، گوادر ۾ ملڪ جي بهترين اسٽيٽ آف دي آرٽ يونيورسٽي ٺهڻ گھرجي، اهڙي يونيورسٽيءَ جو اسلام آباد جا ماڻهو گوادر يونيورسٽيءَ ۾ اچي پڙهن، گوادر ۾ هڪ بهترين يونيورسٽي ٺهڻ گھرجي، مقامي ماڻهن کي گوادر جي زمينن مان فائدو ناهي پهتو، گوادر ۾ زمين جي اصل مالڪن کي خوشحاليءَ ۾ حصو ملڻ گھرجي، زمينن سان اربين رپيا فائدو وٺندڙ ماڻهو مقامي نه آهن، مقامي ماڻهن جي زندگيءَ جو معيار بهتر ڪرڻ اصل ضرورت آهي، جلد سي پيڪ ۾ صاف پاڻيءَ جو پراجيڪٽ لڳڻ وارو آهي، بلوچستان ۾ روڊن جو ڄار وڇائي رهيا آهيون، گوادر چين جي سرحد سان لڳي رهيو آهي، گوادر جي گھٽين ۽ روڊن جي لاءِ 100 ڪروڙ رپين جو اعلان ٿو ڪيان، احسن اقبال کان پڇندس ته انهن شاگردن جي داخلا جو ڇا ڪيو، ٻارڙيون به پڙهنديون، اوهان به ملڪ جي ترقيءَ ۾ حصو وجھو، وزيراعظم چيو ته گوادر جي 50 نوجوانن کي چيني زبان سيکارڻ جي لاءِ چين موڪليو ويندو.36

 

مردم شماري جو ڪم قائدن ۽ ضابطن جي ابتڙ ٿي رهيو آهي: مراد علي شاهه

ڪراچي(ويب ڊيسڪ/اسٽاف رپورٽر) سنڌ جي وڏي وزير سيد مراد علي شاهه چيو آهي ته اسان بهترين حڪمراني، ٽيڪس جو نظام ۽ ڪاروباري ماحول کي بهتر بڻائڻ تي محنت سان ڪم ڪيون پيا. اهڙن خيالن جو اظهار اڄ هن ڪراچي جي مقامي هوٽل ۾ بطور مهمان خاص امريڪن بزنس ڪائونسل (ABC) کي ٽيڪس جي نظام بابت رائونڊ ٽيبل ڪانفرنس سان ڪيو. اجلاس ۾ آمريڪي قونصل جنرل مس گريس ڊبليو شيلٽن کان علاوه صوبائي وزير مڪيش ڪمار چاولا، وڏي وزير جو پرنسپل سيڪريٽري نويد ڪامران بلوچ، چيئرمين سنڌ روينيو بورڊ، ايڊيشنل آئي جي سنڌ پوليس مشتاق مهر ۽ ٻين اهم شخصيتن شرڪت ڪئي. وڏي وزير آمريڪن بزنس ڪائونسل  جي اجلاس کي خطاب ڪندي چيو ته اسان سٺي حڪمراني، ٽيڪس جو نظام ۽ ڪاروبارص ماحول بهتر بڻائڻ تي محنت سان ڪم ڪيون پيا. هن چيو ته منهنجي ڪوشش آهي ته پبلڪ پرائيويٽ پارٽنرشپ تحت صحت ۽ تعليم جي شعبن ۾ سڌار آڻيان. هن وڌيڪ چيو ته ڪراچي ۾ ڪاروباري سرگرمين کي وڌيڪ وڌائڻ لاءِ صنعتي زون ۾ انفرا اسٽرڪچر کي هٿي وٺرائڻ آهي. سنڌ جي وڏي وزير سيد مراد علي شاهه ميڊيا جي نمائندن سان ڳالهائيندي چيو ته آئون مڃان ٿو ته سنڌ ۾ ايراني تيل جي غير قانوني درآمد ٿئي پئي. هن چيو ته هيءُ مون پهرين ڀيرو ٻڌو آهي ته ٽائلون پڻ اسمگل ٿين ٿيون. اسان امن ۽ امان جي صورتحال بهتر ڪرڻ لاءِ انقلابي اُپاءُ ورتا آهن. هن وڌيڪ چيو ته اسان ٽارگٽڊ آپريشن جاري رکيو آهي ۽ پوليس ۾ ميرٽ جي بنياد تي ڀرتيون ڪيون پيا. هن چيو ته سنڌ جي ڳوڻاڻن علائقن ۾ پهرين ماڻهو قافلن جي صورت ۾ نڪرندا هئا، هاڻي امن ۽ امان جي صورتحال مثالي آهي. اسٽريٽ ڪرائم جي شڪايتون هاڻي گهٽجي ويون آهن، ماڻهو مڃين ڪونه ٿا پر اها هڪ حقيقت آهي. وڏي وزير چيو ته انهي سڄي آپريشن جي ڪاميابي ڪراچي جي عوام کي وڃي ٿو، جنهن اسان جي حمايت ڪئي ۽ انهيءَ ۾ اسان جو ساٿ ڏنو ۽ سڀئي قانون لاڳو ڪندڙ ادارا گڏجي ڪم کي سرانجام ڏيون پيا. هن چيو ته اسان شهيد ٿيندڙ پوليس اهلڪارن کي سٺو معاوضو، ڪٽنب لاءِ پگهار ۽ ٻارن جي تعليم جا خرچ ادا ڪرڻ سندن سٺي ۽ مثبت پاليسي بڻائي آهي. هن چيو ته شهر ۾ سمورا روڊ تعمير هيٺ آهن، جنهن سبب ٽريفڪ جا مسئلا درپيش آهن، جيئن ئي روڊ تعمير ٿي ويندا اوهان خوش ٿيندو. هي منهنجو شهر آهي، مون هن شهر کي امن جو گهر، روشنين جو شهر ۽ روزگار فراهم ڪندڙ شهر بڻائيندس.وڏي وزير ٻڌايو ته ڪراچي ۾ 100 ملين ڊالر جي سيڙپڪاري  پائپ لائين ۾ آهي. وڏي وزير سان چيئرمين سنڌ روينيو بورڊ درخواست ڪئي ته اوهان ٽيڪس جا مسئلا حل ڪيو. انهيءَ تي وڏي وزير انهي بابت پڪ ڏني ته هو ناڻي کاتي جو وفاقي وزير اسحاق ڊار سان ڳالهايو آهي ۽ ڪجهه ڳالهيون ڪيون به آهن. وڏي وزير چيو ته آئون اوهان لاءِ حاضر آهيان. اوهان بي فڪر سيڙپڪاري ٿي سيڙپڪاري ڪيو. هن چيو ته سنڌ روينيو بورڊ گذريل سال 61 بلين روپيا گڏ ڪيا هئا ۽ هلندڙ سال 71 بلين روپين جو ٽارگيٽ آهي. اسان جي ڪوشش آهي ته سنگل روينيو اٿارٽي قائم ڪيون ته جيئن ون ونڊو آپريشن ڪري سگهون. اسان شهر ۾ صفائي جو ڪم مشيني طريقن سان ڪيون پيا ۽ چائنيز ڪمپني انهيءَ ڪم لاءِ پهچي وئي آهي. ڪمپني 18000 ڪچري جون ٽوڪريون سائوٿ ۾ ورهائي ڇڏيون آهن، سائوٿ ۽ ايسٽ ۾ صفائي جو ڪم ٻاهر کان ڪرائي چڪا آهيون. هن وڌيڪ چيو ته آئون ڊي ايم سيز کي صفائي لاءِ اربين روپيا ڏئي چڪو آهيان، پر هو ڪم نه ڪري سگهي. هاڻي ٻاهر کان ڪم وٺون پيا. پر اهو ڊي ايم سيز جي مرضي سان ٿئي پيو. هن چيو ته ڪراچي ميٽروپوليٽين ڪارپوريشن(KMC)، ڪراچي واٽر اينڊ سيوريج بورڊ (KWSB) ۾ هزارن جي انگ ۾ اضافي عملو موجود آهي جن مان ڪجهه ملازم ڪم ڪن پيا. هن وڌيڪ چيو ته اسان کي شهر ۽ شهرين جي خدمتن لاءِ ڏينهن رات ڪم ڪرڻو پوندو. ان موقعي تي وڏي وزير سيد مراد علي شاهه جي ڪم ۽ سندس خدمتن کي ساراهيو ويو.
ٻئي طرف وڏي وزير سيد مراد علي شاهه چيو آهي ته مردم شماري جا جيڪي قاعدا ۽ ضابطا سامهون رکيا ويا انهن جي ابتڙ ڪم ٿي رهيو آهي، وفاقي ناڻي واري وزير سان گڏجي انهن کي مردم شماري جي حوالي سان خدشن بابت آگاهه ڪندس. وڏي وزير وفاقي وزير اسحاق ڊار سان رابطو ڪري مردم شماري جي خدشن بابت آگاهه ڪندو، هن چيو ته پهرين به اسحاق ڊار سان ان سلسلي ۾ رابطو ڪيو هو، ان ملاقات ۾ اسان کي ٻڌايو ويو ته بلڊنگ جي هر فليٽ کي ڳڻيو ويندو، جڏهن ته هاڻ اطلاع ملي رهيا آهن ته مردم شماري۾ هر گهر کي ناهي ڳڻوي ويو.

آرمي چيف ٽن ڏينهن جي دوري تي چين پهتو، اعليٰ فوجي ۽ سول عملدارن سان ملاقات

راولپنڊي(ويب ڊيسڪ) آرمي چيف جنرل قمر جاويد باجوه ٽن ڏينهن جي دوري تي چين پهچي ويو، جتي هن چين جي اعليٰ فوجي ۽ سول عملدارن سان ملاقات ڪئي، ملاقات ۾ چيني  عملدارن پاران خطي ۾ امن امان قائم رکڻ ۾ پاڪ فوج جي ڪردار جي واکاڻ ڪئي وئي .آءِ ايس پي آر موجب ٻنهي ملڪن پاران فوجي لاڳاپن کي اڳتي وڌائڻ تي اتفاق ڪيو ويو، آرمي چيف پاران پاڪستان جي ڏهاڙي جي موقعي تي پريڊ لاءِ پيپلز لبريشن آرمي جو دستو موڪلڻ تي ٿورو مڃيو. آءِ ايس پي آر موجب آرمي چيف جنرل قمر جاويد باجوه چيني ايگزيڪيٽو نائب وزيراعظم زانگ گائو لي، وائيس چيئرمين سينٽرل وائس ڪميشن جنرل فان چنگ لانگ، چيف آف جوائنٽ سروس ڊيپارٽمينٽ جنرل فانگ فيوجي ۽ ڪمانڊر پيپلز لبريشن آرمي جنرل لي زو چنگ سان ڌار ڌار ملاقاتون ڪيون. آءِ ايس پي آر موجب ملاقات ۾ آرمي چيف چيو ته پاڪستان علائقائي استحڪام، سلامتي لاءِ مثبت ڪردار جاري رکندو، جڏهن ته پاڪ فوج علائقائي استحڪام ۽ سلامتي لاءِ ڪوششون جاري رکندي. آءِ ايس پي آر موجب چين جي اعليٰ قيادت ملاقات ۾ علائقائي سڪيورٽي، معاشي، دفاعي سهڪار ۽ گڏيل مفادن جي حوالي سان ڳالهائيندي پاڪستان جي موقف سان اتفاق ڪيو. آءِ ايس پي آر جي پڌرائي موجب قيادت پاران خطي جي امن ۽ استحڪام ۾ پاڪستان جي مثالي ڪردار جي واکاڻ ڪئي وئي، طالبان، القاعده ۽ ٻين انتها پسند گروپن خلاف پاڪستان جي ڪارروائيون جي به ساراهه ڪئي.

عمران خان، جهانگير ترين خلاف ريفرنس فني بنيادن تي خارج ٿيو: مريم اورنگزيب

اسلام آباد (ويب ڊيسڪ): مملڪتي وزير مريم اورنگزيب چيو آهي ته تاثر ڏيڻ جي ڪوشش ڪئي وئي ته عمران خان، جهانگير ترين کي ڪلين چٽ ملي وئي، عمران خان چوندو هيو ته اليڪشن ڪميشن سوال پڇڻ جو مجاز ناهي، هڪ طرف نواز شريف کي چوندا آهن ته 70 سال پراڻو جواب ڏنو وڃي، هن چيو ته عمران خان جمهوريت لاءِ برطانيه جا مثال ڏيندو آهي، عمران خان اها جمهوريت چاهي ٿو، جنهن ۾ اهو وزيراعظم بڻجي، عمران خان جيترو ڪوڙ ڳالهائيندو آهي، اوترو سچ به ٻڌائيندو ڪري، مملڪتي وزير چيو ته عمران خان، جهانگير ترين خلاف ريفرنس فني بنيادن تي خارج ٿيو، سپريم ڪورٽ ۾ سچ ڳالهائڻ لاءِ عمران خان وٽ ڪجهه ناهي.

 

ناموس رسالت ايمان جو حصو آهي، معاملي تي آخري حد تائين وينداسين: چوڌري نثار علي خان

اسلام آباد (اين اين آءِ) وفاقي گهرو وزير چوڌري نٿار علي خان واضح ڪيو آهي ته ناموس رسالت ايمان جو حصو آهي، معاملي جي آخري حد تائين وينداسين ناموس رسالت جي حوالي سان ڪنهن مسلمان جي دل ۾ ذري برابر به اختلاف راءِ نه ٿو ٿي سگهي پر توهين رسالت ڪندڙ دشمن اسلام نه پر انسانيت جا دشمن آهن پرڏيهي ڪمپينن کي اصل پيغام ان وقت ويندو جڏهن مسلمان سڀ گڏ ٿي ان جي خلاف آواز اٿاريندا. مسلم ملڪن ساٿ نه ڏنو ته اڪيلو قدم کڻندو. ڊان ليگس جي حوالي سان اڃا تائين گهرو وزارت کي رپورٽ نه ملي آهي الطاف حسين گذريل 20 سالن ۾ وڏا ڏوهه ڪيا آهن ڇا ان کي ڪٽهڙي ۾ آڻڻ جون ڪوششون غلط آهن برطانوي گهرو وزير ايندڙ مهيني پاڪستان اچي رهيو آهي ان سان به ڳالهه ٻولهه ٿيندي خميس تي ميڊيا سان ڳالهائيدي گهرو وزير چوڌري نٿار چيو ته وزيراعظم مون کي اها ذميواري ڏني آهي ۽ ان تي ڪيتريون ئي گڏجاڻيون ٿي چڪيون آهن ايف آءِ اي جي حوالي سان گهرو وزارت جي اها ذميواري آهي گهرو وزير چيو ته ناموس رسالت جي حوالي سان ڪنهن مسلمان جي دل ۾ ذري برابر به اختلاف راءِ نه ٿو ٿي سگهي. هن چيو ته گهرو وزير جي حيثيت سان هڪ پاڪستاني ۽ مسلمان جي حيثيت سان منهنجي اها ذميواري آهي ته مان ان ڳالهه کي يقيني بڻايان ته ڪنهن بيگناهه تي گستاخي جو الزام نه لڳي  جنهن جا نتيجا ان شخص ۽ خاندان لاءِ تباهه ڪارڻ ٿي سگهن ٿا هن ٻڌايو ته ان سلسلي ۾ پهرين هدايت مان پاڪستان ٽيلي ڪميونيڪيشن اٿارٽي جي چيئرمين کي ڏني ته فوري طور تي فيس بوڪ ۽ وڌيڪ سروس ڏيندڙن کي هدايت ڪئي وڃي ته گستاخ واريون پوسٽون بلاڪ ڪيون وڃن ۽ مون کي گذريل ڏينهن رپورٽ ملي ته سوشل ميڊيا تي موجود اهڙي مواد کي بلاڪ ڪيو ويو آهي. هن ٻڌايو ته ٻئي هدايت اها ڪئي وئي ته فيس بڪ خاص طور تي ۽ ڪجهه وڌيڪ سروس مهيا ڪندڙ اسان سان شيئر ڪن ته اهڙي ڏوهه جي پويان ڪهڙا ماڻهو ملوث آهن گهرو وزير چيو ته مان آمريڪا ۾ مقرر پاڪستاني سفير کي چيو آهي ته هو هڪ اسپيشل آفيسر مقرر ڪري جيڪو روز آمريڪي وفاقي جاچ بيورو ٽي ٽي اي ۽ سوشل ميڊيا ويب سائيٽس سان رابطي ۾ رهي ته جيئن جيڪو اسان چاهيون ٿا ۽ جيڪو پاڪستاني قوم چاهي ٿي ان کي آخري انجام تائين پهچايو وڃي ڇو ته اهو هڪ بين الاقوامي مسئلو بڻجي چڪو آهي ان ڪري اسان هڪ اهڙو وڪيل مقرر ڪرڻ جو فيصلو ڪيو آهي جيڪو اهو سڄو عمل ڄاڻيندو هجي. گهرو وزير چيو ته اهڙي قسم جو مواد پاڪستان مان اپلوڊ ٿئي ٿو ايف آءِ اي ۽ ڳجها ادارا ان جو ڪافي حد تائين ڄاڻ وٺي چڪا آهن جڏهن ته جن ماڻهن جو اورينجن آمريڪا يا ڪنهن ملڪ ۾ آهي انهن تائين فيس بڪ ۽ وڌيڪ ويب سائيٽس جي مدد کانسواءِ نه ٿو پهچائي سگهجي. هن چيو ته گذريل ڏينهن فيس بڪ جي ذريعي پرڏيهه کان هڪ تصوير اپ لوڊ ڪئي وئي جنهن ۾ ظفر اقبال جهڳڙا کي امڪاني چيف جسٽس آف پاڪستان جي طور تي ڏيکاريو ويو ۽ ادارن جي مذاق اڏائي وئي. هن چيو ته جيڪو پاڪستان تي يقين نه ٿو رکي جيڪو پاڪستان خلاف نعرا ٿو هڻي ان کي سياست جي اجازت ڪيئن ڏئي سگهون ٿا برطانيا کي بار بار ياد ڏيارينداسين ته توهان جي انصاف وارو معيار اوچو آهي ۽ توهان ان معاملي ۾ به انصاف جو مظاهرو ڪيو گڏيل قانوني تعاون لاءِ برطانيا کي خط لکي رهيا آهيون ته جيئن هڪ ٻئي جي موجود جوابدارن کان جاچ ۾ آساني ٿي سگهي.

 

سچ سڀني جي سامهون آيو، اياز صادق بليڪ ميل ڪرڻ ڪوشش ڪئي: عمران خان

اسلام آباد(ويب ڊيسڪ) پاڪستان تحريڪ انصاف جي سربراهه عمران خان چيو آهي ته اڄ سچ سڀني جي سامهون واضع ٿي ويو آهي، هو پارليامينٽ مان مايوس ٿيا ته ڪرپشن وارو معاملو کڻي سپريم ڪورٽ پهتا.اسلام آباد ۾ ميڊيا سان ڳالهائيندي عمران خان چيو ته مون واعدو ڪيو ته اهو ڪوڙو ٿابت ٿيو ته سياست ڇڏي ڏيندس، پاناما جي معاملي تي تي قومي اسيمبلي جي اسپيڪر کي چيو هو ته نواز شريف خلاف ريفرنس اليڪشن ڪميشن موڪليو پر هن نواز شريف بجاءِ منهنجي خلاف ريفرنس موڪليو. هن چيو ته ملڪ ۾ رڳو نالي جي جمهوريت آهي، اسپيڪر مون کي بليڪ ميل ڪرڻ جي ڪوشش ڪئي، اسپيڪر کان پڇان ٿو ته منهنجو ريفرنس موڪليو ته پوءِ نواز شريف جو ڇو ناهي موڪليو. هن وڌيڪ چيو ته مخالف ڌر جو ڪم حڪومت جو پيسو غلط جاءِ استعمال تي آواز اٿارڻ آهي، اسپيڪر نواز شريف سان گڏجي منهنجي زبان بند ڪرڻ جي ڪوشش ڪئي. مون انگلينڊ ۾ 33 سيڪڙو ٽيڪس ڏنو هو، پاڪستان کان ٻاهر سڀ ڪجهه منهنجي نالي تي هو ڪنهن عرب شهزادي مون کي تحفو ناهي ڏنو.

 

سنڌ حڪومت گهر شماري دوران اڏاوت هيٺ عمارتن تي نمبر لڳائڻ تي اعتراض واري ڇڏيو

ڪراچي(ويب ڊيسڪ) سنڌ حڪومت گهر شماري دوران اڏاوت هيٺ عمارتن تي نمبر لڳائڻ تي اعتراض واري ڇڏيو آهي. ڪو آپريٽو سوسائٽيز واري صوبائي وزير ڄام اڪرام ڌاريجو چيو آهي ڪراچي ۾ اڏاوت هيٺ عمارتن جو انگ هڪ لک 60 هزار کان وڌيڪ آهي. سندس چوڻ آهي ته آدمشماري دوران اڏاوت هيٺ عمارتن جي داخلا سان گهٽ ۾ گهٽ 10 لک ماڻهن جا غلط نالا درج ٿي سگهن ٿا، جنهن ڪري اڏاوت هيٺ عمارتن تي نمبر لڳائڻ کان روڪڻ لاءِ وفاق کي خط لکڻ تي غور ڪيو پيو وڃي. وزير اعليٰ جي ترجمان چيو آهي ته اڏاوت هيٺ عمارتن تي نمبر لڳائڻ سان ڪراچي ۾ تڪبندين تي به فرق پوندو.

 

جتي بجلي چوري گهڻي آهي اتي لوڊشيڊنگ 18 کان 20 ڪلاڪ ڪئي پئي وڃي: عابد شيرعلي

اسلام آباد(ويب ڊيسڪ) پاڻي ۽ بجلي واري مملڪتي وزير عابد شير علي قومي اسيمبلي ۾ جواب پيش ڪندي چيو آهي ته جنهن علائقي ۾ بجلي چوري گهڻي آهي، ان علائقي ۾ لوڊشيڊنگ 18 کان 20 ڪلاڪ ڪئي پئي وڃي، پنجاب ۾ به لوڊشيڊنگ ٿي رهي آهي. اجلاس ۾ جواب پيش ڪندي عابد شير علي چيو ته پيپڪو جي 340 فيڊرن تي لوڊشيڊنگ نه ٿي رهي آهي. هن چيو ته بجلي جي ٽرانسميشن سسٽم کي بهتر ڪيو ويو آهي، رهتون ادا نه ڪندڙ علائقن ۾ 18 کان 20 ڪلاڪ لوڊشيڊنگ ڪئي پئي وڃي. عابد شير علي چيو ته درگاهن مان پوري پوري علائقي کي بجلي فراهم ڪئي پئي وڃي، ماضي ۾ جنهن علائقي ۾ 15 کان 18 ڪلاڪ لوڊشيڊنگ ٿيندي هئي هاڻي انهن علائقن ۾ لوڊشيڊنگ گهٽ ٿي رهي آهي.

 

جيڪو چيو ان تي شرمندو آهيان: جاويد لطيف مراد سعيد کان معافي گهري ورتي

اسلام آباد (اين اين آءِ)قومي اسيمبلي ۾ مسلم ليگ (ن) جي اڳواڻ جاويد لطيف قومي اسيمبلي جي لابي ۾ پنهنجن لفظن تي شرمندگي جو اظهار ڪندي معافي گهري آهي ميڊيا رپورٽ موجب قومي اسيمبلي جي اجلاس ۾ جاويد لطيف بنا شرطن جي معافي گهري آهي هن چيو ته ان ڏينهن جيڪو ڪجهه منهنجي زبان مان نڪتو ان تي شرمندو آهيان ۽ مان مراد سعيد جي فيملي کان معافي گهران ٿو. هن چيو ته ڪنهن جي امڙ يا نياڻي جي باري ۾ ڪا به ڳالهه نه ٿيڻ گهرجي ها. مون کي پنهنجي لفظن تي شرمندگي آهي ان موقعي تي قومي اسيمبلي جي ميمبر شاهد گل آفريدي ٻڌايو ته جاويد لطيف ۽ مراد سعيد جي جهيڙي جو معاملو جرڳي حل ڪيو ۽ ٻنهي پارٽين جرڳي تي فيصلي تي اعتماد ڪيو.