تازيون خبرون

Daily Archives: March 14, 2017

ردالفساد جي رفتار کي تيز ۽ عملدرآمد کي يقيني بڻائڻ لاءِ موثر قدم کنيا وڃن : وزير اعظم

اسلام آباد (اين اين آءِ) وزيراعظم محمد نواز شريف جي صدارت ۾ اعليٰ سطحي اجلاس ۾ آپريشن رد الفساد جي اڳڀرائي ۽ ڪاميابين جو جائزو وٺڻ سان گڏ اهو پڪو پهه ڪيو ويو ته پاڪستان جي سلامتي لاءِ انتهاپسندي ۽ دهشتگردي جي خاتمي جي پاليسي لازمي آهي، وزيراعظم جي صدارت ۾ ٿيل اجلاس ۾ آرمي چيف جنرل قمر جاويد باجوه، ڊي جي آءِ ايس آءِ جنرل نويد مختار، پنجاب جو وڏو وزير شهباز شريف، گهرو وزير چوڌري نثار، ناڻي واري وزير اسحاق ڊار، ناصر جنجوعا سميت ٻين شرڪت ڪئي، اجلاس ۾ آپريشن رد الفساد جي اڳڀرائي جو جائزو ۽ ڪاميابين کانسواءِ پاڪ افغان بارڊر مئنيجمينٽ بابت کنيل قدمن جو جائزو ورتو ويو، اجلاس دوران وزيراعظم نواز شريف پاڪستاني فوج ۽ قانون لاڳو ڪندڙ ايجنسين پاران ٿيندڙ هن وقت تائين اڳڀرائي تي اطمينان جو اظهار ڪندي هدايتون ڪيون ته ان جي رفتار کي تيز ڪيو وڃي، اجلاس دوران دهشتگردي جي حوالي سان مختلف قانونن جو جائزو وٺڻ سان گڏ انهن قانونن کي وڌيڪ موثر بڻائڻ جي طريقن جو به جائزو ورتو ويندو، شرڪت ڪندڙ ان ڳالهه تي زور ڀريو ته امن ۽ ترقي جي دشمنن کي ملڪ ۾ امن ۽ استحڪام جي بحالي جي ڪوششن کي برباد ڪرڻ جي اجازت نه ڏني ويندي، ٻئي طرف نيشنل ايڪشن پلان تي عملدرآمد جي ڪوششن ۾ وڌيڪ تيزي آڻڻ، وفاقي ۽ صوبائي حڪومتن پاران ان تي عملدرآمد تي يقيني بڻائڻ جي ضرورت تي به زور ڀريو ويو.

 

نوجوان نسل پاڪستان جو قيمتي اثاثو ۽ تعليم اسان جي قومي ترجيح آهي: آرمي چيف

راولپنڊي (اين اين آءِ) آرمي چيف جنرل قمر جاويد باجوه چيو آهي ته نوجوان پاڪستان جو سڀ کان قيمتي اثاثو ۽ تعليم اسان جي قومي ترجيح آهي، قومي مقصد حاصل ڪرڻ لاءِ ڀرپور مدد ڪنداسين، آءِ ايس پي آر موجب ملڪ جي ڏورانهن علائقن سان تعلق رکندڙ ڪاليجن جي 40 شاگردن تي ٻڌل وفد آرمي چيف سان ملاقات ڪئي، اها ملاقات چيف آف آرمي اسٽاف يوٿ انڪريجمينٽ پروگرام جو حصو هئي، پاڪ فوج جي سربراهه شاگردن سان ڳالهائيندي چيو ته نوجوان پاڪستان جو سڀ کان قيمتي اثاثو آهن، هن شاگردن تي زور ڀريو ته معياري تعليم حاصل ڪرڻ ۽ بلند ترين حدف مقرر ڪري قومي سالميت ۽ ترقي ۾ پنهنجو ڪردار ادا ڪن، آرمي چيف اهو پهه ڪيو ته تعليم اسان جي قومي ترجيح آهي ۽ قومي مقصد حاصل ڪرڻ لاءِ پنهنجون صلاحيتون ڪتب آڻيندي ڀرپور مدد ڪنداسين.

 

مسئلو حل نه ٿيو ته وزيراعظم ۽ سنڌ جي وڏي وزير کي گهرائينداسين: سپريم ڪورٽ

ڪراچي (اين اين آءِ) منڇر ڍنڍ جي گندي پاڻي بابت پاڻمرادي نوٽيس جي ٻڌڻي دوران سپريم ڪورٽ ريمارڪس ڏنا آهن ته سڀ ٽيڪس تي پلجي رهيا آهن پر ڪو ڪم ڪرڻ لاءِ تيار نه آهي ۽ سڄو ڪم ٺيڪي تي هلي رهيو آهي ته وفاقي ۽ صوبائي حڪومتن کي به ٺيڪي تي ڏنو وڃي، سومر تي ڪراچي رجسٽري ۾ منڇر ڍنڍ ۾ گندي پاڻي بابت پاڻمرادي نوٽيس جي ٻڌڻي ٿي، سنڌ حڪومت پاران آر بي او ڊي پراجيڪٽ بابت وفاق ۽ صوبائي حڪومت جي رپورٽ پيش ڪئي جنهن ۾ ٻڌايو ويو ته آر بي او ڊي پراجيڪٽ وفاقي اداري واپڊا جو منصوبو آهي ۽ سنڌ حڪومت ان ۾ حصيدار آهي، ايڊووڪيٽ جنرل سنڌ عدالت کي ٻڌايو ته سنڌ حڪومت پاران منڇر ڍنڍ بابت ٽاسڪ فورس جوڙيو ويو آهي، عدالت سنڌ حڪومت جي جوڙيل ٽاسڪ فورس جو نوٽيفڪيشن رد ڪري ڇڏيو، جسٽس امير هاني چيو ته واٽر ڪميشن جي رپورٽ نعيم احمد بخاري جي خلاف چارج شيٽ آهي جنهن شخص منڇر ڍنڍ کي تباهه ڪيو ان کي ٽاسڪ فورس ۾ شامل ڪيو ويو آهي، جسٽس قاضي فائز عيسيٰ ريمارڪس ڏنا ته سنڌ حڪومت ۾ صلاحيت نه آهي، لاڳاپن جي بنيادن تي عهدا ملن ٿا، ڊي جي انوائرمينٽ عوام جي ٽيڪس جا پيسا مفت ويهي کائي رهيو آهي، قتل هڪ ماڻهو جو ٿئي ٿو، هي سڄي سنڌ ۽ ڪراچي جي ڪروڙين ماڻهن جو قتل ڪري رهيو آهي، انوائرمينٽ جو ڊي جي نااهل شخص آهي ۽ حڪومت نااهلي تي تماشو ڏسي رهي آهي، وفاقي ناڻي واري سيڪريٽري عدالت کي ٻڌايو ته پراجيڪٽ ۾ سنڌ حڪومت حصيدار آهي، عدالت آر بي او ڊي پراجيڪٽ 16 سالن کان مڪمل نه ٿيڻ ۽ منڇر ۾ خراب پاڻي بابت حل نه ڪڍڻ تي ڪاوڙ جو اظهار ڪيو، جسٽس امير هاني مسلم چيو ته بااثر ماڻهن جو ڍنڍن ۾ خراب پاڻي ڇو نٿو وڌو وڃي، همت آهي ته اتي گندو پاڻي وجهي ڏيکارين، جيڪڏهن هڪ مهيني ۾ مسئلو حل نه ٿئي ته وزيراعظم ۽ سنڌ جي وڏي وزير کي گهرائينداسين، عدالت تڪرار ختم ڪرڻ لاءِ ٻنهي حڪومتن کي هڪ مهيني جي آخري مهلت ڏئي ڇڏي.

 

پاڪستان ۾ غربت ۽ ڪرپشن ۾ گهٽتائي ٿي ۽ خوشحالي آئي آهي ؛ مريم اورنگزيب

اسلام آباد (ويب ڊيسڪ): مملڪتي وزير مريم اورنگزيب چيو آهي ته تحريڪ انصاف طرفان عوامي حلقن ۾ غلط تاثر پکيڙيو پيو وڃي، ڪيترن ئي منصوبن جا افتتاح ٿيا آهن، جنهن سان عمران خان کي تڪليف پهتي آهي، هن چيو ته ملڪي ادارن جي توهين ڪئي پئي وڃي، عمران خان جي حق ۾ فيصلا نه ٿا اچن ته اهو الزام تراشي ڪري ٿو، وزيراعظم کي ڇوٽ حاصل آهي پر هن ڪڏهن فائدو ناهي کنيو، مريم اورنگزيب چيو ته پاڪستان ۾ غربت ۽ ڪرپشن ۾ گهٽتائي ٿي ۽ خوشحالي آئي آهي، وزيراعظم نواز شريف عوام جو مقبول ترين ليڊر بڻجي چڪو آهي، وزيراعظم پنهنجي مرحوم والد جي ڪاروبار جو جواب ڏئي رهيو آهي، اسان 70 سالن جو جواب ڏئي رهيا آهيون، هن چيو ته نواز شريف جي سياست پاڪستان جي ماڻهن جي ترقي جي سياست آهي، مريم نواز پاڪستان جو پهريون هيلٿ ڪيئر پروگرام شروع ڪرايو، پاناما ڪيس تي سياست چمڪائي وئي ۽ ميڊيا ٽرائل ڪيو ويو.

 

قومي اسيمبلي اجلاس؛ خورشيد شاهه حسين حقاني کي غدار قرار ڏئي ڇڏيو

اسلام آباد (ويب ڊيسڪ): قومي اسيمبلي جي اجلاس ۾ مخالف ڌر اڳواڻ سيد خورشيد شاهه حسين حقاني کي غدار قرار ڏئي ڇڏيو، خورشيد شاهه چيو ته جيڪو هتي پيدا ٿيو ۽ ٻاهر وڃي غداري ڪري اهڙي شخص کي اهميت ڏيڻ جي صرورت ناهي ۽ نه ئي اهڙي شخص جو ذڪر ايوان ۾ ٿيڻ گهرجي، حسين حقاني پنهنجي تازي لکيل آرٽيڪل ۾ انڪشاف ڪيو آهي ته ”پاڪستان حڪومت جي رضامندي سان سي آءِ پاڪستان ۾ ڪارروايون ڪيون”، اهڙي انڪشاف تي قومي اسيمبليءَ ۾ آواز گونجڻ لڳا، پ پ حسين حقاني جي الزامن جي ترديد ڪري ڇڏي، اڄ قومي اسيمبلي ۾ اعتراض واري نڪتي جو جواب ڏيندي خورشيد شاهه چيو ته اسان اهڙي شخص جي اهميت وڌائڻ نٿا چاهيون، حسين حقاني جي ايتري اهميت ناهي جو ان جو ذڪر ايوان ۾ ڪيو وڃي، ڪجهه سببن جي بنياد تي ان کي سفير جي عهدي تان هٽائي شيري رحمان کي سفير بڻايو ويو، خورشيد شاهه چيو ته جيڪو هتي پيدا ٿيو ۽ ٻاهر وڃي غداري ڪري ان جو ذڪر نه ڪيو وڃي، حسين حقاني جي بيان جي مذمت ڪرڻ ان جي اهميت وڌائڻ آهي، حسين حقاني جو مقصد دنيا ۾ پاڪستان کي بدنام ڪرڻ آهي، اويس لغاري پيپلز پارٽي کان مطالبو ڪيو ته اها حسين حقاني جي الزامن کان لاتعلقي ڪري، حسين حقاني توجهه حاصل ڪرڻ لاءِ پٺيان وار ڪندو آهي، تحريڪ انصاف جي عارف علوي الزام هنيو ته حسين حقاني آمريڪي ايجنٽن کي ويزا جاري ڪيا.

 

جيڪڏهن پ پ پنهنجي برداشت جو مظاهرو ختم ڪيو ته نواز حڪومت کي ڀڄڻو پوندو: بلاول ڀٽو

لاهور (اين اين آءِ) پاڪستان پيپلز پارٽي جي چيئرمين بلاول ڀٽو زرداري پارٽي اڳواڻ بابر سهيل بٽ جي قتل جي سخت مذمت ڪندي چيو آهي ته نواز حڪومت پنهنجا دهشتگرد پ پ جي ڪارڪنن تي دهشتگردي لاءِ ڇوڙي ڇڏيا آهن، بابر سهيل بٽ جو قتل ۽ شوڪت بسرا تي حملو هڪ ئي سازش جو حصو آهي، پنهنجي بيان ۾ هن چيو ته حڪومت وارثن جي مرضي سان ڪيس داخل ڪري، اصل جوابدار گرفتار ڪري، پ پ جي ڪارڪنن برداشت جو مظاهرو ڇڏي ڏنو ته نواز حڪومت کي ڀڃڻو پوندو، هن چيو ته پ پ شهيد بابر بٽ کي خراج تحسين پيش ڪري ٿي ۽ ان جي خاندان جي ڏک ۾ انهن سان گڏ آهي، ان کانپوءِ پارٽي اڳواڻ بابر سهيل بٽ جي قتل جي سوڳ ۾ بلاول هائوس لاهور ۾ شيڊول سمورين تنظيمي سرگرمين کي معطل ڪري ڇڏيو، پنجاب جي اطلاع واري سيڪريٽري مصطفيٰ نواز کوکر پاران جاري بيان موجب بلاول هائوس ۾ سومر تي ٿيندڙ لاهور ۽ قصور جي ضلعي تنظيمي معاملن بابت اجلاسن کي معطل ڪيو ويو آهي، جنهن ۾ بلاول ڀٽو تنظيمي عهدن لاءِ اميدوارن کان انٽرويو وٺڻو هو.

 

ڪي فور تي ڪم جي رفتار تيز ڪئي وڃي ته جيئن ڪراچي واسين کي 2018 ۾ پاڻي حاصل ٿي سگهي: سنڌ جو وڏو وزير

ڪراچي  (اين اين آءِ) سنڌ جي وڏي وزير سيد مراد علي شاهه ايف ڊبليو او ۽ ڪي فور واٽر سپلاءِ پروجيڪٽ جي ڊائريڪٽر کي هدايت ڪئي آهي ته هُو پنهنجي ڪم جي رفتار کي تيز ڪري ته جيئن ڪراچي جي واسين کي 2018ع ۾ پاڻي حاصل ٿي سگهي. هن اها ڳالهه اڄ نيو سنڌ سيڪريٽريٽ ۾ ڪي فور ۽ لياري ايڪسپريس وي تي جاري ڪمن بابت جائزي واري اجلاس جي صدارت ڪندي ڪئي. اجلاس ۾ مڪاني ادارن وارو صوبائي وزير ڄام خان شورو، چيف سيڪريٽري رضوان ميمڻ، پرنسپل سيڪريٽري نويد ڪامران بلوچ، ڪمشنر ڪراچي اعجاز علي خان، ڪمانڊر ايف ڊبليو او بريگيڊيئر وسيم بابر، پروجيڪٽ ڊائريڪٽر ڪي فور سليم صديقي ۽ ٻيا لاڳاپيل عملدارن شرڪت ڪئي. وڏي وزير کي بريفنگ ڏيندي برگيڊيئر وسيم بابر چيو ته ڪي فور پروجيڪٽ تي ڪينجهر ڍنڍ کان ڪراچي تائين هنگامي بنيادن تي ڪم شروع ٿي چڪو آهي. ايف ڊبليو او ٽي يونٽ مقرر ڪيا آهن ۽ مجموعي طور تي 1313 ماڻهو ان پروجيڪٽ تي ڪم ڪري رهيا آهن، مشينري بشمول 128 ڊمپرز، 101 ٽريڪٽرز، 61 واٽر هائوزرس، 83 ايڪسڪيوٽيرز، 42 رولرز، 19 دوزرس ۽ اهڙي طرح جي ٻين اوزارن ذريعي ان پروجيڪٽ تي ڪم ٿي رهيو آهي. واضح هجي ته پروجيڪٽ جي ڊيگهه 121 ڪلوميٽر آهي، اوپن ڪئنال 94.33 ڪلوميٽر آهي، آر سي سي سائيفون 5.26 ڪلوميٽر طويل آهي. ڪي فور پروجيڪٽ جي پئڪيج ۾ 4.9 بلين رپين جا پائپس، 4.9 بلين رپين جو زميني ڪم، 1.18 بلين رپين جا ڪلورٽس، 1.25 بلين رپين جي ڪئنال لائننگ ۽ 2.72 بلين رپين جا ٻيا ڪم شامل آهن. سنڌ جي وڏي وزير سيد مراد علي شاهه کي ٻڌايو ويو ته وفاقي حڪومت پنهنجي پي ايس ڊي پي 17-2016ع ۾ 1000 ملين رپيا مختص ڪيا ويا هئا جنهن مان 400 ملين رپيا جاري ڪيا ويا آهن جڏهن ته سنڌ حڪومت 6 بلين رپيا مختص ڪيا هئا، جن مان 3 بلين رپيا جاري ٿي چڪا آهن. وڏي وزير ايف ڊبليو او تي زور ڀريو ته اهي ڪم جي رفتار کي تيز ڪن ته جيئن باقي 3 بلين رپيا به جاري ڪري سگهجن، هن اهڙيءَ ريت وفاقي حڪومت کي به درخواست ڪئي ته بقايا رقم جاري ڪئي وڃي ۽ ايندڙ مالي سال ۾ پنهنجي حصي جا 9 بلين رپيا به مختص ڪري. ڪي فور پروجيڪٽ جي ڊائريڪٽر سليم صديقي چيو ته زمين کي حاصل ڪرڻ به هڪ مسئلو آهي. هن چيو ته 11936 ايڪڙ سرڪاري ايراضي ۽ 1053.28 ايڪڙ خانگي ايراضي آهي، جيڪا ڪجهه ڳوٺن مان گذري رهي آهي. ان تي وڏي وزير چيف سيڪريٽريءَ کي هدايت ڪئي ته هُو ان مسئلي کي حل ڪري ۽ پروجيڪٽ لاءِ زمين جو انتظام ڪري ته جيئن اهو منصوبو 2018ع ۾ مڪمل ٿي سگهي.

 

وياجي نظام معاشي دهشتگردي آهي، ملڪ ۾ ڪرپشن ۽ وياج جو ڳٺ جوڙ آهي: سراج الحق

اسلام آباد (اين اين آءِ) جماعت اسلامي جي امير سينيٽر سراج الحق چيو آهي ته وياج کي ختم ڪرڻ حڪومت جي ذميواري آهي، وياجي نظام جو خاتمو آئين جي تقاضا آهي، اهو نظام يهودين جو تحفو آهي، وياجي نظام ۾ رهندي ترقي ۽ خوشحالي نٿي اچي سگهي، ان نظام اسان جي معاشي نظام کي تباهه ڪري ڇڏيو آهي، وفاقي شرعي عدالت ۾ ٻڌڻي کانپوءِ ميڊيا سان ڳالهائيندي هن چيو ته وياج جو خاتمو آئيني گهرج آهي، ان معاشري کي تباهه ڪري ڇڏيو آهي، هن چيو ته وفاقي شرعي عدالت حڪومت کي وياجي ڪاروبار بند ڪرائڻ جو حڪم ڏنو هو ان ڪري وياج ختم ڪرڻ حڪومت جي ذميواري آهي، وفاقي شرعي عدالت هڪ معتبر ادارو آهي ۽ وياج جي خلاف ان عدالت جو 1991 جو فيصلو آئيني هو.

 

سنڌ اسيمبلي شفافيت ۽ ڄاڻ تائين پهچڻ جي حق بابت بل 2016 جي گڏيل طور تي منظوري ڏئي ڇڏي

ڪراچي  (اين اين آءِ) سنڌ سيمبلي سومر تي شفافيت ۽ ڄاڻ حاصل ڪرڻ جي حق بابت بل 2016 جي گڏيل طور تي منظوري ڏني، سنيئر وزير نثار احمد کهڙي ان بل جي منظوري کي سنڌ اسيمبلي جو هڪ وڏو ۽ تاريخي قدم قرار ڏيندي چيو ته ان قانون ذريعي عام ماڻهو جي ڄاڻ گڊ گورننس جي قيام ۽ ڪرپشن جي خاتمي ۾ مدد ملندي ۽ جيڪي سرڪاري آفيسر هڪ مقرر وقت دوران گهربل ڄاڻ فراهم نٿا ڪري سگهن انهن لاءِ قيد ۽ ڏنڊ جي سزا به مقرر ڪئي وئي آهي، سومر تي ايوان جي ڪارروائي دوران سينيئر وزير نثار احمد کهڙو سنڌ ٽرانسپيرنسي اينڊ رائيٽ ٽو انفارميشن بل 2016 بابت سليڪٽ ڪميٽي جي رپورٽ ايوان ۾ پيش ڪئي جنهن جي ايوان بنا ڪنهن ترميم جي منظوري ڏني، ان کانپوءِ صوبائي وزير شق وار بل ايوان ۾ منظوري لاءِ پيش ڪيو جنهن کي ايوان بغير ڪنهن ترميم جي گڏيل طور تي منظور ڪيو، ايم ڪيو ايم جي پارلياماني ليڊر سيد سردار احمد چيو ته تمام اهم نوعيت جو قانون آهي، سنڌ جي هر شهري کي اهو حق حاصل آهي ته هو ڪنهن سرڪاري اداري بابت ڪا ڄاڻ حاصل ڪرڻ چاهي ته ان کي بنا ڪنهن رڪاوٽ جي اها ڄاڻ فراهم ڪئي وڃي، هن چيو ته ان قانون جي تياري لاءِ ايوان ۾ موجود سمورن پارلياماني گروپن جي نمائندن وڏي محنت ڪئي آهي ۽ اها تعريف جوڳي ڳالهه آهي ته سينيئر وزير جيڪو سليڪٽ ڪميٽي جو چيئرمين هو سمورن ميمبرن جي مثبت تجويزن کي قانون ۾ شامل ڪيو.

 

ڪراچي جو امن سمورين سياسي پارٽين جي گڏيل ذميداري آهي: چوڌري نثار

اسلام آباد (ويب ڊيسڪ): وفاقي گهرو وزير چوڌري نثار سان سنڌ جي گورنر محمد زبير ملاقات ڪئي آهي، ملاقات دوران وفاقي گهرو وزير محمد زبير کي سنڌ جو گورنر مقرر ٿيڻ تي مبارڪون ڏنيون، سنڌ خاص طور تي ڪراچي ۾ امن امان جي قدمن تي خيالن جي ڏي وٺ ڪئي وئي، ان موقعي تي ڳالهائيندي وفاقي گهرو وزير چوڌري نثار چيو ته محمد زبير جي مقرري سان سنڌ ۾ سياسي عمل وڌيڪ پختو ٿيندو، ڪراچي آپريشن 2013 ۾ وفاقي حڪومت جي هدايت تي شروع ڪيو ويو، ڪراچي آپريشن کي هاڻي منطقي انجام تائين پهچائڻ جي ضرورت آهي، گهرو وزير چيو ته ڪراچي جو امن سمورين سياسي قوتن جي گڏيل ذميداري آهي، وقت اچي ويو آهي ته سموريون سياسي جماعتون پاڻ احتساب جو عمل اڳتي وڌائين، سياسي جماعتون ڏوهارين لاءِ دروازا هميشه لاءِ بند ڪري ڇڏين.