تازيون خبرون

Daily Archives: March 13, 2017

پاڪستان ۾ جمهوريت مضبوط ۽ دهشتگردي گهٽ ٿي رهي آهي: مريم اورنگزيب

اسلام آباد (ويب ڊيسڪ): مملڪتي وزير مريم زورنگزيب چيو آهي ته گڏيل مفادن واري ڪائونسل جي اجلاس ۾ مردم شماري تي اتفاق ٿيو، مردم شماري آئيني ذميداري آهي، هن چيو ته صحيح انگن اکرن سان فيصلو ڪرڻ حڪومت جو ويزن آهي، هن چيو ته مردم شماري لاءِ فوج جو ڪردار انتهائي اهم آهي، مردم شماري جو عمل مارچ کان مئي تائين جاري رهندو، پهرين مرحلو 15 مارچ کان 15 اپريل تائين جاري رهندو، ٻيو مرحلو 25 اپريل کان 25 مئي تائين جاري رهندو، هن چيو ته مردم شماري ۾ مقامي ماڻهن کي استعمال ڪيو ويندو، ماضيءَ ۾ مردم شماري ۾ دير جا مختلف سبب هئا، مريم اورنگزيب چيو ته پهريون ڀيرو مردم شماري ۾ کدڙن فقيرن جي به داخلا ڪئي ويندي. مريم اورنگزيب چيو آهي ته پاڪستان ۾ جمهوريت مضبوط ٿي رهي آهي، حڪومت جي محنت سبب ماضيءَ جي ڀيٽ ۾ دهشتگرديءَ ۾ واضح گهٽتائي ٿي آهي، مريم اورنگزيب چيو ته پاڪ فوج ۽ عوام دهشتگردن خلاف ويڙهه بهادري سان وڙهي آهي، سندس وڌيڪ چوڻ هو ته ماضيءَ جي ڀيٽ ۾ دهشتگردي جي واقعن ۾ واضح گهٽتائي آئي آهي، حڪومت مخلتف شعبن ۾ نوجوانن کي موقعا فراهم ڪري رهي آهي، مريم اورنگزيب وڌيڪ چيو ته پاڪستان ۾ جمهوريت مضبوط ٿي رهي آهي،پاڪستان لاءِ قربانيون ڏيندڙ کي هــُو سلام پيش ڪري ٿي.36

 

مردم شماري ۾ هر فرد جي ڳڻپ يقيني بڻائي وڃي: سنڌ حڪومت جو وفاق کان مطالبو

ڪراچي (ويب ڊيسڪ): سنڌ جي وڏي وزير سيد مراد علي شاهه مردم شماري جي حوالي سان ناڻي واري وفاقي وزير اسحاق ڊار کي خط لکي ڇڏيو آهي، وڏي وزير چيو آهي ته مردم شماري ۾ هر فرد جي ڳڻپ يقيني بڻائي وڃي، قومي سڃاڻپ ڪارڊ نه هئڻ تي ٻيا دستاويز قبول ڪيا وڃن، مردم شماري کي قابل قبول بڻائڻ لاءِ قدم کڻڻا پوندا، هن چيو ته ويب سائيٽ سان گڏوگڏ ضلعي آفيسن ۾ به فهرستون لڳايون وڃن، مردم شماري جو ڊيٽا روزاني بنيادن تي پبلڪ ڪيو وڃي.

 

مردم شماري قومي فرض آهي، 2 لک جوان مقرر ڪيا ويندا: پاڪ فوج

اسلام آباد (ويب ڊيسڪ): ڊي جي آءِ ايس پي آر چيو آهي ته مردم شماري قومي فرض آهي، مردم شماري جي لاءِ 2 لک جوان مقرر ڪيا ويندا، هٿياربند فوجن جي مدد سان 1998 ۾ مردم شماري هڪ مرحلي ۾ ٿي هئي، هن چيو ته هر بلاڪ ۾ هڪ سپالي عملي سان گڏ موجود هوندو، سپاهي هر گهر ۾ ويندو ۽ فارم ڀرائيندو، ڊيٽا چيڪ ڪرڻ لاءِ نادرا سسٽم لنڪ هوندو، ڊي جي آءِ ايس پي آر ميجر جنرل آصف غفور چيو ته غلط ڊيٽا ڏيڻ کي ڏوهه تصور ڪيو ويندو، مردم شماري لاءِ پي بي ايس جي سهڪار سان ماسٽر ٽرينرز جي تربيت ڪرائي وئي، ماسٽر ٽرينرز کان عملي جي تربيت ڪرائي وئي، عوام کي درخواست آهي ته مردم شماري لاءِ سهڪار ڪن.

 

ايم ڪيو ايم پراڻيون اٽڪلون پئي آزمائي، مڪاني ادارن ۾ گهوسٽ ڀرتي ڪيا ويا: پيپلز پارٽي

ڪراچي  (اين اين آءِ) پ پ جي مرڪزي اڳواڻ سعيد غني چيو آهي ته ايم ڪيو ايم وارن کي جيڪي به خالي پلاٽ نظر آيا اتي قبضو ڪري ويهي رهيا ايتري قدر جو پارڪ، گرائونڊ ۽ نالن کي نه بخشيو ۽ ان جي عادت آهي ته اها ايترو گوڙ ڪري ٿي جو ماڻهو ان کي سچ سمجهڻ شروع ڪن ٿا، ايم ڪيو ايم خلاف ڪا به تحريڪ عدم اعتماد نه آڻي رهيا آهيون، ٻيهر هيرو نٿا بڻجڻ چاهيون، جنهن جڳهه تي آهن اتي ئي ويٺا رهن، ڪراچي ۾ پ پ اڳواڻن سان پريس ڪانفرنس ڪندي هن چيو ته ايم ڪيو ايم جو مطالبو هو ته اختيار هيٺين سطح تائين منتقل ڪيا وڃن، اسان اختيار به ڏنا ۽ انهن جي مدد لاءِ سالٽ ويسٽ مئنجيمينٽ بورڊ به جوڙيو پر معاملو اهو آهي ته جيڪي اختيار ايم ڪيو ايم وٽ آهن اهي ان ۾ ڪم ڪري رهيا آهن يا نه، هن چيو ته ڪراچي جي ميئر وسيم اختر کي ايتري خبر ناهي ته شهر جي صفائي ڪي ايم سي جو ڪم ناهي پر اها ذميواري ڊي ايم سيز جي آهي، پهريان اسڪول ۽ اسپتال وٽ به ڪي ايم سي وٽ هئي، اسان اها به ڊي ايم سي کي منتقل ڪري ڇڏي آهي، سنڌ حڪومت ڪي ايم سي کي هر مهيني 50 ڪروڙ رپين جي گرانٽ ڏئي ٿي، روڊ رستا ٺاهڻ مڪاني اڳواڻن جو ڪم هو پر اهو به سنڌ حڪومت ٺهرائي رهي آهي، اسان مڃون ٿا ته اسان جو ڪجهه ڏوهه هوندو پر پنهنجي ذميواري سنڌ حڪومت تي وجهڻ نااهلي جو وڏو مثال آهي، وسيم اختر جون جيڪي ذميواريون آهن اهي سرانجام ڏئي پوءِ ڪنهن ذميواري جي ڳالهه ڪري، هن چيو ته ايم ڪيو ايم خلاف ڪا به عدم اعتماد تحريڪ نه آڻي رهيا آهيون.  مختلف سياسي پارٽِين سان تعلق رکندڙ مقامي اڳواڻن پ پ ۾ شامل ٿيڻ جو اعلان ڪيو آهي، سينيٽر سعيد غني چيو آهي ته سنڌ حڪومت تي متحده ڪارڪنن جون جبري وفاداريون تبديل ڪرائڻ جو الزام قيامت جي نشاني آهي، ڪراچي جي ميئر جي صفائي مهم تي تنقيد ڪندي هن چيو ته ميئر جي خلاف تحريڪ عدم اعتماد آڻي ان کي هيرو نٿا بڻائڻ چاهيون، سعيد غني چيو ته ايم ڪيو ايم پاران سنڌ حڪومت تي متحده ڪارڪنن جون زبردستي وفاداريون تبديل ڪرائڻ جو الزام قيامت جي نشاني ۽ ڌانڌلي جي الزامن ۽ مذاق جي برابر آهي، هن چيو ته ڪراچي ميئر کي مشورو ڏيان ٿو ته اهو پنهنجي مصروفيتن کان ٿورو وقت ڪڍي مڪاني ايڪٽ جو مطالعو ڪري ته ان کي اختيارن جي خبر پئجي ويندي، ان موقعي تي پي ٽي آءِ ، ايم ڪيو ايم ، پاڪ سرزمين پارٽي ۽ آل پاڪستان مسلم ليگ جي ثمينا سلام، فاطمه عباس، نديم، شاهد خان، حامد جعفري ۽ ٻين پ پ ۾ شامل ٿيڻ جو اعلان ڪيو، پ پ جي اڳواڻن پارٽي ۾ شامل ٿيندڙن کي ڀليڪار ڪندي چيو ته 2018 جي چونڊن ۾ پ پ ڪراچي ۾ سڀ کان وڏي پارٽي بڻجي  سامهون ايندي، سعيد غني چيو ته پ پ ايندڙ چونڊن ۾ شهر جي انهن علائقن مان ڪامياب ٿيندي جتي هڪ پارٽي وڏي اڪثريت سان ڪاميابي حاصل ڪندي رهي آهي، هن چيو ته رڙيون ڪندڙ ايم ڪيو ايم جو هڪ پراڻي عادت آهي يعني ايتريون رڙيون ڪيون وڃن ته جيئن ماڻهو ڪوڙ کي سچ سمجهڻ تي مجبور ٿي وڃن، ڪراچي جا سمورن ڊي ايم سيز کي فنڊ جاري ڪيا ويا آهن پر ايم ڪيو ايم 60 هزار گوسڙو ملازم ڀرتي ڪيا جيڪي ڪم نٿا ڪن، واٽر بورڊ ۾ نگران حڪومت جي دور ۾ 5 هزار ملازم ڀرتي ڪيا ويا، اهي سمورا گوسڙو ملازم سرڪاري نوڪري نٿا ڪن، هن چيو ته ايم ڪيو ايم جي قائد جي جلسي ۾ جيڪي هزارين ماڻهو شريڪ ٿيندا هئا اهي گوسڙو مڪاني ملازم هئا جنهن سبب ڪي ايم سي کي تباهه ڪيو ويو.

 

پاڪ فوج ۾ نيو ائيرڊيفنس سسٽم شامل ڪري ڇڏيو، سي پيڪ منصوبو ڪامياب بڻائڻ لاءِ چين جي مدد کي اهميت ڏيون ٿا: آرمي چيف

راولپنڊي (اين اين آءِ) پاڪ فوج پنهنجي دفاعي نظام نئون ايئر سسٽم شامل ڪري ورتو، جيڪو هيٺين ۽ وچين اڏام ڪندڙ هوائي حدفن کي ڳولي نشانو بڻائڻ جي صلاحيت رکي ٿو، آءِ ايس پي آر موجب پاڪ فوج پنهنجي هوائي دفاعي نظام ۾ نئون ايئر ڊفينس سسٽم ايل واءِ 80 شامل ڪيو آهي، چيف آف آرمي اسٽاف جنرل قمر جاويده باجوه نئين سسٽم جي شموليت واري تقريب ۾ خاص مهمان هو جيڪو آرمي آڊيٽوريم ۾ ڪوٺائي وئي. ايل واءِ 80 چيني ساختا موبائيل ايئر ڊفينس سسٽم آهي، آرمي چيف تقريب کي خطاب ڪندي چيو ته ان سسٽم جي شموليت سان موجوده ۽ مستقبل ۾ هوائي خطرن جي بچاءَ واري صلاحيت ۾ واڌ ٿي آهي، آرمي چيف جي اچڻ تي ڪمانڊر آرمي ايئر ڊفينس ليفٽيننٽ جنرل محمد زاهد لطيف مرزا ان جي آجيان ڪئي.   آرمي چيف جنرل قمر جاويد باجوا اسپيشل سيڪيورٽي ڊويزن هيڊ ڪوارٽر جو دورو ڪيو آهي. آءِ ايس پي آر موجب آرمي چيف دوري دوران ڳالهائيندي چيو ته پاڪ فوج سي پيڪ جي سيڪيورٽي لاءِ پرعزم آهي، سي پيڪ منصوبو ڪامياب بڻائڻ لاءِ چين جي مدد کي گهڻي اهميت ڏيون ٿا. هن چيو ته پاڪ فوج سي پيڪ خلاف دشمن جي ايجنڊا بابت چڱيءَ ريت واقف آهي، اسان دشمنن جي ڪوششن کي ناڪام بڻائڻ لاءِ مڪمل تيار آهيون. ان موقعي تي آرمي چيف جنرل قمر جاويد باجوا کي اسپيشل سيڪيورٽي ڊويزن ميڪنزم تي بريفنگ ڏني وئي، جنهن تي آرمي چيف تيارين ۽ انتظامن جي ساراهه ڪئي.

 

هولي جو تهوار نيڪي جي قائم رهڻ ۽ بدي کي شڪست جو پيغام آهي: نواز شريف

اسلام آباد (ويب ڊيسڪ): وزيراعظم نواز شريف هندن جي مذهبي تهوار هولي بابت بيان جاري ڪندي چيو آهي ته هولي موسم جي تبديلي، بهار جي آمد جو پيغام آهي، پاڪستان جو موسم به تبديل ٿي رهيو آهي، بهار جا ڏينهن موٽي رهيا آهن، وزيراعظم چيو ته مذهبن وچ ۾ گڏيل امن جا ڏينهن موٽي رهيا آهن، ملڪ ۾اقليتن کي پنهنجي مرضي موجب زندگي گهارڻ جي پوري آزادي حاصل آهي. ڪنهن سان مذهب جي بنياد تي امتيازي سلوڪ نه ٿيڻ گهرجي، پاڪستان خطي ۾ آباد هر قبيلي ۽ هر برادري لاءِ امن جو مرڪز آهي، نواز شريف چيو ته حڪومت مذهبي اقليتن سان قاعداعظم جو عهد نڀائڻ جي پابند آهي، افسوس آهي ته فساد لاءِ اسلام جي نالي کي استعمال ڪيو ويو، اسلام هڪ انسان جي قتل کي پوري انسانيت جو قتل قرار ڏئي ٿو، اقليتن کي پنهنجي مذهب تي عمل جي مڪمل آزادي هئڻ گهرجي، نوڪرين ۽ ٻين معاملن ۾ اقليتن کي احساس محرومي نه هئڻ گهرجي، هن چيو ته هولي جو تهوار نيڪي جي قائم رهڻ ۽ بدي کي شڪست جو پيغام آهي.

 

بلاول ڀٽو جي اٽڪل 3 مهينن جي خاموشي کانپوءِ هڪ ڀيرو ٻيهر پنهنجي 4 مطالبن کي مڃرائڻ جي تحريڪ شروع ڪرڻ جو فيصلو

لاهور (اين اين آءِ) پ پ چيئرمين بلاول ڀٽو زرداري اٽڪل 3 مهينن جي خاموشي کانپوءِ هڪ ڀيرو ٻيهر پنهنجن 4 مطالبن کي مڃرائڻ جي تحريڪ شروع ڪرڻ جو فيصلو ڪيو آهي، ميڊيا رپورٽ موجب هن پارٽي اڳواڻن کي هدايت ڪئي آهي ته حڪمران پارٽي تي دٻاءُ وڌائڻ ۽ مطالبن کي مڃرائڻ لاءِ سڄي پنجاب ۾ ريلين جي انقاد لاءِ انتظام ڪيا وڃن،  پ پ 4 مطالبن جي مهم جي شروعات 27 ڊسمبر 2016 تي بينظير ڀٽو جي ورسي جي موقعي تي ڪيو هو پر پنجاب جي شهر فيصل آباد ۾ 19 جنوري 2017 تي ٿيل ريلي کانپوءِ مهم ٿڌي ٿي وئي هئي ڇو ته بلاول آمريڪا جي دوري تي هليو ويو هو.

 

مان جڏهن اسپتال ۾ هيس جنرل باجوه ان وقت 10 ڪور جو ڪمانڊر هيو: پرويز مشرف

ڪراچي (ويب ڊيسڪ): اڳوڻي صدر پرويز مشرف چيو آهي ته هو سياسي ۾ رهي وزيراعظم نه ٿو ٿيڻ چاهي ۽ نه ئي ڪو عهدو وٺڻ چاهي ٿو پر هو صرف معاونت جو ڪردار ادا ڪرڻ چاهي ٿو، هن چيو ته مان جڏهن اسپتال ۾ هيس ته جنرل باجوه ان وقت 10 ڪور جو ڪمانڊر هيو، نجي ٽي وي پروگرام ۾ ڳالهائيندي هن چيو ته منهنجي ڪوشش آهي ته وکريل ايم ڪيو ايم کي گڏ ڪيو وڃي، ايم ڪيو ايم ۾ ڪو به پسنديده ڌڙو ناهي پر سڀني سان گڏ آهيان، هن چيو ته ايم ڪيو ايم وکريل آهي، ڇاڪاڻ ته انهن وٽ اهڙو ليڊر ناهي، جيڪو انهن کي گڏ ڪري سگهي، اهي منهنجي ڪافي عزت ڪندا آهن، پرويز مشرف چيو ته منهنجي دور ۾ الطاف حسين جا لاڳاپا را سان نه هيا، جيڪڏهن مون کي خبر هجي ها ته ان کي سڌو ڪريان ها.

 

ن ليگ ايم اين جاويد لطيف جي نالي وٺڻ کي پنهنجي توهين سمجهان ٿو: عمران خان

پشاور (اين اين آءِ) پي ٽي آءِ جي سربراهه عمران خان چيو آهي ته جاويد لطيف خلاف وزيراعظم جي ايڪشن جو انتظار آهي، ليگي قومي اسيمبلي جي ميمبر اخلاق جون سموريون حدون پار ڪري ڇڏيون آهن، جيڪڏهن انهن کي اسيمبلي مان کڻي ٻاهر ڦٽو نه ڪيو ويو ته يقين ٿي ويندو ته نواز شريف جي اشاري تي مراد سعيد کي نشانو بڻايو ويو، نوشهره ۾ قاضي حسين احمد ميڊيڪل ڪامپليڪس جي افتتاحي تقريب کي خطاب ۾ عمران خان چيو ته جاويد لطيف مراد سعيد جي خلاف جيڪي لفظ استعمال ڪيا، نواز شريف کي ان تي معافي وٺڻ گهرجي، جاويد لطيف کي پارليامينٽ کان ٻاهر ڪڍڻو پوندو، جيڪڏهن ان جي پارٽي جو ڪو ايم اين اي اهڙو ڪم ڪري ها ته پارٽي مان ڪڍي ڇڏيان هان، عمران خان چيو ته جاويد لطيف جو نالو وٺڻ مان پنهنجي توهين سمجهان ٿو، تقريب ۾ خطاب ۾ هن چيو ته قومون روڊ، رستا ۽ پلون ٺهڻ سان نه بڻجنديون آهن، اسان اسڪول، يونيورسٽين ۽ اسپتالن جو افتتاح نٿا ڪريون، نواز شريف هميشه روڊن جي افتتاح ڪندو رهي ٿو، سڄي ملڪ ۾ ڪي پي ڪي پوليس وانگر اسپتالن جو به چرچو هوندو، هن چيو ته پرويز خٽڪ ۽ عاطف خان کي انسانن تي پيسو خرچ ڪرڻ تي داد ڏيندي چيو ته اسپتالن مان سياسي مداخلت ختم ڪرڻ تي پرويز خٽڪ تعريف جو حقدار آهي، ايندڙ چونڊن ۾ پي ٽي آءِ ٻيڻا ووٽ کڻي ڪامياب ٿيندي، اڳوڻين حڪومتن عوام کي ڪرپشن ڏنو، هن سال نئين عوام کي تبديلي نظر ايندي.

 

دهشتگرديءَ جي خاتمي ۾ اصل رڪاوٽ حڪمرانن جون غلط پاليسيون آهن: سراج الحق

لاهور  (اين اين آءِ) جماعت اسلامي جي امير سينيٽر سراج الحق چيو آهي ته پاڪستان ۾ انقلاب جو  ذريعو بندوق نه پر پولنگ اسٽيشن آهي، جماعت اسلامي جمهوري، جڏهن ته باقي پراپرٽي پارٽيون آهن، ٻين پارٽين ۾ پيءُ کان پٽ ۽ ڏوهٽي کي اقتدار ڏنو وڃي ٿو، اسان هر طرح جي دهشتگردي جي خلاف آهيون چاهي اهو ماڻهو، ادارو ڪري يا حڪومت ڪري، ملڪ ۾ ضمني بجيٽ جي ڪا ضرورت نه آهي، اسان ان کي رد ڪريون ٿا، نيشنل ايڪشن پلان ۽ رد الفساد جو اهو مقصد ناهي ته سياسي پارٽين تي پابندي لڳائي وڃي، سياسي سرگرمين تي پابندي جو مطلب آمريت کي هٿي وٺرائڻ آهي، لاهور ۾ خطاب ۽ ميڊيا سان ڳالهائيندي هن چيو ته عالم سڳورا دهشتگردي جي خلاف آهن ۽ هاڻ حڪومت به ثابت ڪري ته اها به دهشتگردي جي خلاف آهي، هن چيو ته ن ليگ ۽ پ پ پرويز مشرف جي پاليسين تي هلي رهيون آهن، ضمني بجيٽ جي ڪا به ضرورت نه آهي، ايترو عرصو گذري ويو پر حڪمران قوم کي هڪ زبان نه ڏئي سگهي جنهن قوم جو تعليمي نظام ورهائجي وڃي اها ڪيئن هڪ قوم بڻجي سگهي ٿي، وزيراعظم به بادشاهي مسجد جي خطيب وانگر واعض ۽ نصيت ڪندو رهي ٿو.