تازيون خبرون

Daily Archives: March 10, 2017

ڪرينه جي معاوضو وڌائڻ جي مطالبي تي پريانڪا ۽ دپيڪا تي ڇتي تنقيد

ممبئي (شوبز نيوز) بالي ووڊ اداڪاره ڪرينا ڪپور معاوضو وڌائڻ واري مطالبي تي دپيڪا ۽ پريانڪا تي تنقيد ڪئي آهي بالي ووڊ اسٽار ڪرينه ڪپور پنهنجي منفرد فيشن اسٽائل سان گڏوگڏ حاضر دماغي سبب به شهرت رکي ٿي ته اداڪاره پنهنجي بيباڪ تبصرن سبب به تڪرارن جو شڪار رهي آهي پر هاڻي هڪ ڀيرو ٻيهر هن پنهنجي ساٿي اداڪارائن تي تنقيد ڪئي آهي ڀارتي ميڊيا موجب هڪ تقريب دوران ڪرينا ڪپور پاران اداڪارن جو معاوضو وڌائڻ واري مطالبي تي سوال ڪيو هو ته هن نالو وٺڻ کان سواءِ دپيڪا ۽ پريانڪا کي تنقيد جو نشانو بڻائيندي چيو ته بالي ووڊ مان هالي ووڊ ۾ ڪم ڪرڻ جو اهو مطلب نه آهي ته توهان جو معاوضو وڌايو ويندو. ۽ نه ئي ڪنهن جي برانڊ ويليو وڌي ٿي.

 

فلم نور جو ٽريلر جاري، دبنگ گرل سوناڪشي صحافڻ جي روپ ۾ نظر ايندي

ممبئي (شوبز نيوز) بالي ووڊ جي دبنگ گرل سوناڪشي سنها جلد پنهنجي مداحن کي صحافي جي روپ ۾ نظر ايندي پاڪستاني مصنفه صبا امتياز جي مشهور ناول ڪراچي يو آر ڪلنگ مي تي ٻڌل بالي ووڊ جي نئين فلم نور جو آفيشل ٽريلر جاري ڪيو ويو آهي 2014 ۾ شايع ٿيندڙ ناول ڪراچي يو آر ڪلنگ مي جي ڪهاڻي هڪ عورت صحافي تي ٻڌل آهي سنهيل سپي جي هدايتڪاري ۾ ٺهندڙ ڊرامه فلم نور ۾ سوناڪشي سنها نور نالي صحافي جي روپ ۾ مرڪزي ڪردار ادا ڪندي جڏهن ته فلم جي وڌيڪ ڪاسٽ ۾ پورب ڪوهلي، ڪانان گل، شيباني داديڪر ۽ وڌيڪ شامل آهن ياد رهي ته بالي ووڊ جي نئين ايندڙ فلم نور هلندڙ سال 21 اپريل تي سئنيمائن ۾ پيش ڪئي ويندي.

 

شاهه رخ خان پشاور ظلمي ۽ ڪلڪتا نائٽ رائيڊرز ۾ سيريز ڪرائڻ جي پيشڪش ڪري ڇڏي

ممبئي (اسپورٽس نيوز) بالي ووڊ جي اسٽار ۽ ڪلڪتا نائٽ رائيڊرز جي مالڪ شاهه رخ خان پشاور ظلمي ۽ ڪلڪتا نائٽ رائيڊرز ۾ سيريز ڪرائڻ جي پيشڪش ڪئي آهي نجي ٽي وي موجب شاهه رخ خان پاڪستان سپر ليگ ۾ فتح حاصل ڪندڙ پشاور ظلمي جي مالڪ جاويد آفريدي کي مبارڪباد ڏيندي تجويز پيش ڪئي ته پشاور ظلمي ۽ ڪلته نائٽ رائڊرز ۾ نيوٽرل هنڌ تي سيريز ڪرائي وڃي پنهنجي بيان ۾ شاهه رخ خان چيو ته ٻئي حڪومتون راضي ٿي وڃن ته سيريز دبئي يا لنڊن ۾ ڪرائي سگهجي ٿي. ۽ هڪ ڀيرو اهو سلسلو شروع ٿي ويو ته ٻنهي ملڪن ۾ انٽرنيشنل ليول تي به ڪرڪيٽ جا رستا کلي ويندا. ذريعن موجب پشاور ظلمي جي مالڪ جاويد آفريدي شاهه رخ خان جي تجويز تي عملدرآمد ڪرائڻ لاءِ پراميد آهي ۽ امڪان آهي ته ٻنهي ٽيمن ۾ جلد سيريز جو اعلان ٿي سگهي ٿو.

 

شاهه رخ خان جي ٽيم کي ڪلڪتا نائيٽ رائيڊرز، پشاور زلمي يا ڪنهن به ملڪ جي ليگ سان مئچ کيڏڻ جي خبرن جي ترديد

اسلام آباد (اسپورٽس نيوز) انڊين آءِ پي ايل ۾ شاهه رخ خان جي ٽيم کي ڪلتا نائيٽ رائيڊرز، پشاور زلمي يا ڪنهن به ملڪ جي ليگ سان مئچ کيڏڻ وارين خبرن جي ترديد ڪري ڇڏي آهي جڏهن ته جاويد آفريدي به ان کي افواهه قرار ڏنو آهي سماجي ويب سائيٽ ٽوئيٽر تي ڪلڪتا نائيٽ رائيڊر جي آفيشل اڪائونٽ مان جاري ڪيل پيغام موجب ان جي ٽيم سمورين ڪوڙين رپورٽن جي ترديد ڪري ٿي، ڪلتا نائيٽ رائيڊرز پاران ڪنهن به ٽيم سان مئچ کيڏڻ لاءِ رابطو نه ٿيو هو. پشاور زلمي جي جاويد آفريدي به اهڙي قسم جي خبرن جي ترديد ڪئي آهي. ياد رهي ته ان کان اڳ اهي ميڊيا رپورٽس سامهون آيون هيو ته شاهه رخ پشاور زلمي جي مالڪ جاويد هاشمي کي پاڪستان سپر ليگ ۽ انڊين پريمير ليگ جي فاتحه ٽيمن ۾ مقابلي جي تجويز پيش ڪئي هئي.

 

نواز ليگ جون سنڌ ۾ وڌندڙ سياسي سرگرميون: صاحب خان ڀٽي

ايندڙ اليڪشن جي تياري لاءِ سمورين سياسي جماعتن ورڪ تيز ڪري ڇڏيو آهي، نواز ليگ سنڌ جو رخ ڪيو آهي ته پيپلزپارٽي پنجاب ۾ پنهنجا پير ٻيهر ڄمائڻ جي ڪوشش ڪرڻ ۾ مصروف آهي ۽ ٻنهي جماعتن سياسي سرگرميون تيز ڪندي عوامي ميڙاڪا ڪوٺائڻ جو سلسلو به شروع ڪري ڇڏيو آهي، وزيراعظم نوازشريف به گذريل ڏينهن ٺٽي ۾ ترقياتي پيڪجن جو اعلان ڪيو آهي، جنهن کي سياسي حلقه سنڌ ۾ نواز  ليگ جي پهرين وک قرار ڏئي رهيا آهن، بهرحال هن وقت هڪ طرف آدمشماري ته ٻي طرف وري سرحدن تي ڇڪتاڻ سبب سڄي قوم ڳڻتي ۾ ورتل آهي  جنهن سبب سياسي سرگرميون اهڙي ماحول آڪسيجن طور ڪم اچي رهيون  آهن، ڇاڪاڻ ته جيڪي به اڳواڻ عوامي ميڙاڪا ڪوٺائي رهيا آهن انهن سان عوام جو به فائدو ٿي رهيو آهي، هڪ ته سڪيورٽي جا انتظام سخت ڪيا وڃن ٿا ته مٿان وري عوام به  سياسي اڳواڻن جا اعلان ٻڌي خوش ٿي  رهيو آهي،  جنهن سان  اهو محسوس ٿي رهيو آهي ته ملڪ ۾  سياسي اڳواڻ  چاهين ته خوشگوار ماحول پيدا ٿي سگهي ٿو،  جيڪڏهن ڏٺو وڃي ته سنڌ ۾ ن ليگ هن وقت مڪمل طور مضبوط نه آهي ۽ نه ئي ڪو  اهم اڳواڻ هن وقت نواز ليگ ۾ شامل آهي.

ڪجهه عرصو اڳ لاڙڪاڻي ۾ نواز ليگ جو جهنڊو ڦڙڪائندڙ ممتاز ڀٽو هو جنهن به نواز ليگ کان عليحدگي اختيار ڪري ڇڏي آهي، باقي ڪجهه آڱرين تي ڳڻڻ جيترا اڳواڻ آهن جن  بابت اهو چوڻ مناسب نه ٿيندو ته نواز ليگ سنڌ مان به ڪجهه سيٺو ن ٻهاري سگهندي، هونءَ ته نواز ليگ ڪراچي سميت سڄي سنڌ  ترقياتي ڪم ڪرايا آهن پر ان باوجود عوام هن وقت به پيپلزپارٽي سان گڏ آهي، ان جو سڀ کان وڏو سبب  اهو آهي جو نواز سرڪار سنڌ جي عوام کي ڪا خاص ترجيح نه ڏني آهي، جنهن سبب نواز ليگ هن وقت تائين سنڌ ۾ پنهنجا پير مضبوط نه ڪري سگهي آهي، اهڙي طرح پيپلزپارٽي به پنجاب سميت ٻين صوبن ۾ ڪا خاص ڪارڪردگي نه ڏيکاري سگهي آهي، جيتوڻيڪ  پ پ چيئرمين بلاول ڀٽو زرداري پنجاب سميت ٻين صوبن ۾ پيپلزپارٽي جون سرگرميون وڌائڻ ڪوششون ڪري رهيو آهي پر ان باوجود اهو نه ٿو چئي سگهجي ته ايندڙ اليڪشن ۾ پيپلزپارٽي ملڪ مان اڪثريت سان ڪامياب ٿي سگهندي، رهي ڳالهه نواز ليگ جي  ته هن حڪومت ۾ هڪ طرف ڪراچي جو امن بحال ٿيو آهي ته مٿان وري ترقياتي منصوبا به مڪمل ٿيا آهن، ڀلي کڻي اهي ڪنهن به حڪومت ۾ شروع ٿيا هجن پر انهن جو افتتاح ته نواز ليگ ئي ڪيو آهي.

جيڪڏهن نواز ليگ سنڌ مان ڪامياب نه به ٿئي پر ان  باوجود پنجاب ۾  سندس ڪاميابي جا سئو سيڪڙو امڪان آهن، ڇاڪاڻ ته نواز ليگ پنجاب اندر رڪارڊ ترقياتي ڪم ڪرايا آهن، ڪرڪيٽ کان ويندي گرين  بس منصوبي  سميت ٻيا کوڙ سان  منصوبا نواز سرڪار ئي ڏنا آهن، رهي ڳالهه بدامني جي ته مشرف جي حڪومت ۾ به ڊرون حملا ٿيندا هئا ۽ آپگهاتي ڌماڪا به ڪيا ويندا هئا پر هن وقت ۾ نه ته 12 مئي جهڙو سانحو پيش آيو آهي ۽ نه ئي  وري ڪراچي ۾ ڀتي خورن جو راڄ قائم ٿيو آهي، هن وقت ڪراچي ۾ امن امان جي صورتحال به بحال آهي، جيتوڻيڪ هن وقت سرحدن تي ڇڪتاڻ برقرار آهي ، جنهن سبب ملڪ اندر دهشتگردن خلاف ڪارروايون به جاري آهن،. بهرحال  گذريل ڏينهن وزيراعظم نوازشريف  مڪلي ۾ جلسي کي خطاب ڪندي چيو ته ڪراچي کان حيدرآباد موٽر وي  مڪمل ٿيڻ وارو آهي، حيدرآباد کان سکر تائين به موٽر وي کي جلد  ٺاهيو ويندي، ايتري قدر جو وزيراعظم نوازشريف ٺٽي ۽ سجاول ۾ پيئڻ جي صاف پاڻي جي لاءِ 20، 20، ڪروڙ رپين جو اعلان  ڪيو.

وزيراعظم نوازشريف ٺٽي جي شاعر علي محمد اڏيراڻيءَ  جو علاج سرڪاري خرچ تي ڪرائڻ جو به اعلان ڪيو، جيڪو پڻ سٺو سنوڻ آهي، وزيراعظم نوازشريف شاعر جو علاج ڪرائڻ  وارو اعلان ڪندي چيو ته سندس علاج ضرور ڪرايو ويندو ڀلي کڻي مٿس لک خرچ اچن. وزيراعظم نوازشريف پنهنجي خطاب ۾ اهو به چيو ته صحت ڪارڊ جي ورهاست کان اڳ کين سروي ڪرائڻي پوندي جنهن جي لاءِ کيس ڪجهه مهينا ڏنا وڃن، ان کان پوءِ هو پاڻ اچي ڪارڊ  ورهائيندو.، وزيراعظم جو چوڻ هو ته ٺٽي ۽ سجاول ۾ بجلي، پاڻي ۽ گئس کان پوءِ يونيورسٽي به ايندي، ٽي ويءَ تي ٻڌي چڪو آهي ته هتان جي عوام جي ساڻس محبت آهي، بهرحال هن وقت وزيراعظم نوازشريف ته سنڌ ۾ سياسي سرگرمين جي شروعات ڪري ڇڏي آهي پر ان سان گڏ هاڻ پيپلزپارٽي کي به سنڌ ۾ پنهنجيون سرگرميون ٿوريون وڌائڻيون پونديون،  جيڪڏهن ڏٺو وڃي ته  پيپلزپارٽي هونءَ ته سنڌ ۾ تمام گهڻو مضبوط آهي پر  وزيراعظم جي ٺٽي واري جلسي بعد پيپلزپارٽي کي هڪ ڀيرو ٻيهر پنجاب بدران سنڌ ۾  سرگرميون  وڌائڻيون پونديو. هونءَ ته بلاول ڀٽو زرداري پنجاب ۾ ڪجهه عرصو اڳ جلسا ڪري چڪو آهي پر  ان باوجود نواز سرڪار پنجاب تمام گهڻو مضبوط آهي، تنهن جي ڀيٽ ۾ اهو چوڻ  ته  پيپلزپارٽي پنجاب ۾ پنهنجا پير مضبوط ڪري وٺندي اهو چوڻ مناسب نه ٿيندو، ڇاڪاڻ ته نوازسرڪار پنجاب ۾ جيڪي به منصوبا  شروع ڪيا آهن انهن کي مڪمل به ڪيو آهي،

جيڪڏهن هن وقت سنڌ ڏي نظر ڦيرائينداسين ته هتان جو وڏو وزير  سيد مراد علي شاهه به 63 اسڪيمن تي بي اعتمادي ظاهر ڪري چڪو آهي ۽ اهو  به انڪشاف ٿيو آهي ته سنڌ جي ماڻهن کي گدلو پاڻي پياريو پيو وڃي، جيڪڏهن  سنڌ جا حڪمران ئي  اهڙيون ڳالهيون ڪن ته پوءِ آخر انهن مسئلن کي حل ڪرڻ ڪنهن جي ذميواري آهي، جيڪڏهن سنڌ جا زهريلو پاڻي پي رهيا آهن ته اها سنڌ حڪومت جي ئي ذميواري آهي ته انهن کي صاف پاڻي فراهم ڪري پر افسوس اڃا تائين اهڙا ڪي به خاص قدم نه کنيا ويا آهن. جنهن مان  اهو محسوس ٿئي ته  ايندڙ وقت ۾ سنڌ جي  عوام کي پيئڻ جو صاف پاڻي فراهم ٿيندو. بهرحال هن وقت ڳالهه هلي رهي آهي  سياسي سرگرمين جي  ته نوازسرڪار سنڌ ۾ دبنگ  انٽري ڪري ڇڏي آهي  جنهن جي شروعات ٺٽي شهر کان ڪئي وئي آهي ۽ ٺٽي جي عوام کي بجلي ۽ پيئڻ جي صاف پاڻي فراهم ڪرڻ سان گڏ يونيورسٽي ٺاهڻ جو به اعلان ڪيو آهي، هاڻ ڏسڻو اهو آهي ته واقعي نواز سرڪار ٺٽي جي ماڻهن کي بجلي، پاڻي ۽ گيس فراهم ڪرڻ واري اعلان کي پورو ڪندي يا وري اهو اعلان صرف اعلان ئي رهجي  ويندو، جئين ماضي جي حڪومتون ڪنديون رهيون آهن، هاڻ ڀلي کڻي چونڊن ۾ ٿورو عرصو اچي بچيو آهي پر اهي اعلان هن وقت وڏي اهميت رکن ٿا ڇاڪاڻ ته سنڌ جا ڪيترائي اهڙا ڳوٺ آهن، جيڪي بنيادي  سهولتن کان محروم آهن. پيپلزپارٽي کي به گهرجي ته پنجاب ۾ ڀلي کڻي سياسي سرگرميون جاري رکيون وڃن پر ان سان گڏ ڪراچي جي سنڌي وسندين تي به ڌيان ڏنو وڃي ته جئين ڪراچي ۾ قائم قديم سنڌي وسندين جا ماڻهو  به بنيادي سهولتن کان محروم نه رهجي وڃن.

sahibalisindhi@gmail.com

 

 

وزيراعظم نواز شريف جو  ٺٽِي وارو دورو ..؟؟: غلام مصطفيٰ جمالي

ملڪ جي ڪنهن به صوبي جي ننڍي توڙي وڏي شهر لاءِ ملڪي وزيراعظم جو دورو وڏي اهميت رکندڙ آهي.پر پاڪستان جهڙي ملڪ جي عوام جي بدقسمتي چئجي يا سندن مقدر ڇو ته کين سندن چونڊيل وزيراعظم جو ديدار ان وقت نصيب ٿيندو آهي جڏهن ملڪ اندر ڪو وڏو حادثو پيش ايندو آهي.پوءِ چاهي اهو ڪو وڏو روڊ حادثو هجي يا دهشتگرد پاران ڪيل ڪو خدڪش حملو.مطلب ته جڏهن به ملڪي عوام جو جاني توڙي مالي نقصان ٿيندو آهي ته ان وقت ملڪي وزيراعظم عوام سندن سار لهڻ لاءِ عوام وٽ اچڻ جي ذهمت ڪندو آهي.نه ته اڪثر پاڪستاني حڪمرانن جي اها روايت رهي آهي ته هئنين ڪنهن به مسئلي اندر هو عوام وٽ لڙي نه آيا آهن،ائين به ناهي ته پاڪستان عوام مسئلن کان آجي آهي، پاڪستاني عوام ته هيمشه مسئلن ۾ گهريل رهيل آهي خاص طور تي پاڪستان جو صوبو سنڌ، سنڌ صوبو هزارين سالن جي تاريخ رکندڙ آهي صوبو آهي ۽ صوفين جي سرزمين آهي سنڌ جي سونهن ۽ ثقافت مهمان نوازي هنرن ۾ سڄي دنيا ۾ مشهور آهي سنڌ  بهادرن ڏاهن دانشورن اديبن عالمن اوليائن جي ڌرتي آهي، قدرتي وسيلن سان مالا مال سنڌ پنهنجن سان پيار ڪندڙن جو ديس آهي.

پيرن فقيرن اوليائن جي سڏجندڙ سنڌ ڌرتي جنهن جي ننڍن وڏن شهرن ڳوٺن ۾ الله پاڪ جي ولين، برزگن جا روضا موجود آهن، جيڪي انسان ذات جي ڀلائي خدمت جو سبق ڏيندا رهيا آهن  سنڌ جو عوام  ڪيترن ئي مسئلن ۾ گهيريل آهي سنڌ ۾ ڪو هڪ مسئلو نه آهي بلڪي سڄي سنڌ  مسئلن جي ور چڙهيل آهي قدرتي  وسلين  تيل گئس ۽ ٻين وسيلن سان  مالا مال  آهي جيڪا  ڪنهن  به  تعارف جي  محتاج  نه  آهي  سنڌ  ۾  حالات   عوام کي  ايترو ته  مجبور  ڪن  ٿا  جو  عوام  پنهنجي جائز حقن  جي  حاصلات  لاءِ  سنڌ جي ننڍن وڏن شهرن جي پريس ڪلبن شهر جي مک چوراهن ٽي احتجاج ڪرڻ   تي مجبور ٿي  وڃي  ٿي هر  وقت  جي  سرڪار  سدائين  عوام  جي  حقي  حقن جي حاصلات لاءِ ٿيندڙ احتجاجن کي  ڀلي  ٻڌو  اڻ  ٻڌو ڪري  پر  احتجاج  ڪندڙ عوام  کي  اهو  يقين  هوندو  آهي ته سندن جائز مسئلن لاءِ ٿيندڙ احتجاجن  کي  ملڪ جي آئين ۾ايتري  اهميت  ضرور مليل  آهي جو هر وقت جي سرڪار  جائز  مسئلي  جي  حل  لاءِ  ضرور  ڪوشش ڪندا رهن ٿا، سنڌ مسئلن جي ور چڙهيل آهي ۽ حڪومت پنهنجا نواز پاليسي اختيار ڪري ڇڏي آهي جتي غريب انسان کي سرڪاري نوڪريون ملڻ هڪ خواب بڻجي ويو آهي، سنڌ جا لکين بيروزگار ۽ ڪروڙين غربت سٽيل ماڻهو اميد ڪن ٿا وقت جي حڪمرانن مان ته حڪمران سندن مسئلي جو نوٽيس وٺندا ۽ کين بهتر تعليم، روزگار ۽ بنيادي سهولتن سميت انصاف جي فوري فراهمي لاءِ اثرائتا عملي قدم کڻندا سنڌ ۾ بيروزگاري مهانگائي ايڏو ته مسئلو ٿي ويو آهي جنهن کي ختم ڪرڻ حڪمرانن جي وس ۾ نه آهي.

سنڌ ۾ بدترين غربت، بيروزگاري ۽ حڪمرانن جي بي حسي جو ثبوت آهي سڀ کان وڏو مسئلو هن جديد ۽ سائنسي دؤر ۾ هزارن سالن کان آباد سنڌي سنڌ ۾ تعليم جهڙي انمول تحفي کان محروم آهن تعليم سان ئي قومون ترقي ڏانهن وک وڌائينديون آهن ۽ ترقي يافته ملڪن سان گڏ ڪلهو ڪلهي سان ملائي بيهنديون آهن اها تعليم ئي آهي جنهن سان انسان هن سائنسي ۽ ترقي واري دور ۾ داخل ٿي چڪو آهي سنڌ جا اڪثر سياستدانن، حڪمران سنڌ جي ترقي عوام جي خوشحالي وارو دڳ وساري چڪا آهن سنڌ جي عوام کي چوندي ڏٺو ويو آهي ته. سنڌ جو ڪهڙو به ضلعو هجي سنڌ جي موجوده صورتحال جو جائزو وٺجي ٿو ته سنڌ جا ڪيترائي علائقا جديد تيز ترقي واري سائنسي دور ۾ به بنيادي سهولتن جي حوالي سان انتهائي پٺتي پيل خطو نظر اچي ٿو ۽ انهي جو بنيادي سبب سنڌ حڪومت پاران فلاحي ۽ ترقياتي اسڪيمن لاءِ مخصوص ڪيل رقم جو درست نموني سان استعمال ٿيڻ ناهي گذريل ڪيترن ئي سالن کان سنڌ ۾ هلندڙ ترقياتي اسڪيمن تي من پسند ڪامورا شاهي جي ڪرپشن ڪميشن وصولي رهي آهي انهن ترقياتي رٿائن کي مڪمل ڪرڻ لاءِ ڪميشن وصولي ۽ ڪرپشن ڪلچر جو خاتمو به آندو وڃي عوام لاءِ سوال بڻيل آهي،سنڌ اندر اهڙيين حالتن اندر ميان نواز شريف جو ٺٽي وري واري دور سنڌ لاءِ ڪهڙو پيغام آهي اهو به هڪ والسيه نشان آهي،ميان نواز شريف ٺٽي جي شيرازين برادري جي دوري تي ٺٽي اچڻو هو جتي کيس مڪلي گرائونڊ تي عوام جي هڪ وڏي ميڙاکي کي خطاب ڪرڻو هو،

جڏهن ته ميان نواز شريف جي اچڻ کان پهرين جلسي گاهه مان ٽي افغاني مشڪول ماڻهو گرفتار ڪيا ويا هئا جيڪا پڻ ملڪ جي ميڊيا تي هڪ وڏي بريڪنگ نيوز جي صورت ۾ سامهون آئي هئي،ٻئي طرف ميان نواز شريف جي آجيان لاءِ شيرازي برداري ميان نواز شريف جي کاڌي جي لاءِ سنڌ جي شهر سانگهڙ مان خاص باروچي گهرايا ويا هئا جن کي ميان نواز شريف جي ماني تيار ڪرڻي هئي ان وقت جي ميڊيا جي روپورٽ جي مطابق ته ميان نواز شريف جي کاڌي لاءِ تتر،ٻڪري جو گوشت،مڇي.مٽن سجي،پاپليٽ مڇي،جهينگا،يعني گانگٽ،سميت ڪيتريون ڊشِيون تيار ڪيون ويون هنيون،ميان نواز شريف جي ٺٽي واري دوري مان اهو صاف لڳي رهيو آهي ته ميان نواز شريف سنڌ اندر پنهنجو سياسي دورو شروع ڪري ڇڏيو آهي،جڏهن ته ٺٽِي واري دوري اندر اهو به صاف ظاهر هو ته سنڌ جون ڪيتريون ئي مشهور شخصيتون نواز شريف سان ملي ڪري سندس پارٽِي ۾ شموليت جون اعلان ڪنديون،جڏهن ته اهو به ٻڌايو پيو ويو ته ميان نواز شريف ٺٽي ۽ سجاول اندر وڏي ڪنهن اسڪيم جو پڻ اعلان ڪندو،برحال ميان نواز شريف جو ٺٽي وارو دور ڀلي ڪهڙي به نويت جو هجي پر سوال وري به ساڳيو آهي ته ڇا اهو ميان نواز شريف جو دور سياسي مفاد کان هٽي ڪري آهي يا ميان نواز شريف پنهنجي سياسي کي مظبوط ڪرڻ لاءِ ٺٽي آيو،جيڪڏهن ڳالهه سياست جي آهي ته هن وقت به ٺٽي اندر پ پ توڙي ن ليگ جون سياسي پارٽيون جيڪي نه رڳو وڏي اڪثريت رکن ٿيون پر ائي پارٽيون اندروني طاقت به رکن ٿيون،شايد ڪنهن جي ياد هجي ته انهي اندروني طاقت اندر گذريل اليڪشن اندر جهيڙي دوران مخلتف پولنگ اسٽيشنن اندر خون پڻ ٿي چڪا آهن،انڪري هن وقت پوري سنڌ اندر سياست جو هڪ نئون دور شروع ٿيو آهي انڪري ميان نواز شريف به پنجاب سميت سنڌ اندر به پنهنجون مصروفيات وڌائڻ ٿو چاهي،مان سمجهان ٿو ته اها هڪ سٺي ڳالهه آهي هر سياستدان کي اهو جهموري ۽ آئيني هڪ آهي ته هو ملڪ اندر سياست ڪري پر اتي عوام کي انهي سياست مان ڪهڙو رليف ٿو ملي اهو به هڪ سوال آهي جيڪو سدائين کان سوال بڻيل آهي جنهن جو هن وقت ڪنهن وٽ به ڪو جواب ناهي،

*****

 

 

بدامني جو خطرو…

ڪنهن دور ۾ دنيا جا ڪيئي خطا جنگي ميدان بڻيل هوندا هئا، ان جو بنيادي سبب اهو هو ته دنيا تي راڄ ڪرڻ جي سوچ ۽ خواهش ڪجهه گهڙين ۾ ئي اولهه ۽ اوڀر جي قوتن کي ويڙهائي لکين جانيون ڳڙڪائي ڇڏيون، پر اُن وقت سنڌ ئي اهو خطو هو، جتي امن جي هاڪ هئي، محبتن جي خوشبو ٻهڪندي پئي هئي ۽ نفرتن کان وانجهيل اها سنڌ ملڪان ملڪ مقبول هئي، پر اڄ اسان جي سماج کي فرقي پرستي ۽ انتهاپسندي جي سوچ يرغمال بڻائي ڇڏيو آهي ۽ اهڙي سوچ رکندڙ قوت هتي پنهنجي مرضي جا قانون ۽ منشا هلائڻ گهُري ٿي، اهڙيون قوتون اڄ به هتي پلجي رهيون آهن، جن هتي بدامني، لاقانونيت ۽ انساني رت وهائڻ ۾ مک ڪردار ادا ڪيو آهي. مڃون ٿا ته جنرل راحيل شريف جي دور ۾ آپريشن ضرب عضب سان دهشتگرد هيڻان ضرور ٿيا، پر ختم نه ٿيا ۽ انهيءَ ڳالهه جي عڪاسي گذريل مهيني لاهور، ڪوئيٽا، پشاور ۽ قلندر جي نگريءَ ۾ ٿيل دهشتگردي جون ڪارروايون ڪن ٿيون ۽ هن وقت سنڌ  جي اهم شهرن ۾ دهشتگرديءَ جو خطرو ڄاڻائيندي سيڪيورٽي الرٽ جاري ڪيو ويو آهي، جنهن گهڻن سوالن کي جنميو آهي. هاڻي ته مزارن جي سيڪيورٽي وڌائڻ جي ڳالهه سامهون آئي آهي، جنهن ۾ خاص طور سنڌ جي ڀٽائي سرڪار کان علاوه شهباز قلندر ۽ حضرت عبد الله شاهه اصحابي ۽ ٻين مزارن جي سيڪيورٽي وڌائڻ جي ڳالهه ڪئي وئي آهي. سنڌ جي آءِ جي پوليس ڪجهه ڏينهن اڳ هڪ اجلاس ۾ وڏي وزير کي بريفنگ ۾ ٻڌايو هو ته سنڌ ۾ ست سئو جي لڳ ڀڳ صوفي بزرگن جون درگاهون آهن، جن مان ته ڪيترن ئي درگاهن کي چؤديواري به ناهي. آءِ جي سنڌ پوليس جي اها ڳالهه واضح ڪري ٿي ته سنڌ حڪومت جو اوقاف کاتو، جيڪو مختلف درگاهن تان ڪروڙين رپيا اوڳاڙي ڪري ٿو، اهي پئسا آخر ڪيڏانهن وڃن ٿا جو انهن درگاهن جي حفاظت خاطر ڪي به جوڳا انتظام نه ڪيا ويا آهن. افسوس ته اهڙي صورتحال ۾ فول پروف سيڪيورٽي ڪيئن ٿي ممڪن بڻجي سگهي، جڏهن ان جا بنيادي انتظام ئي نه ڪيل هجن. اڳي ڪو هڪ ڌماڪو ٿيندو هو ته هر ڪو افسوس ۾ ورتل نظر ايندو هو، پر هاڻي ته روزانو ڪنهن هڪ واقعي ۾ ڏهه کان به وڌيڪ جانيون ضايع ٿي وڃن ته ائين محسوس ڪيو وڃي ٿو، ڄڻ ته مٿي تان ڪو پکي پرواز ڪري ويو، جنهن مان اهو ثابت ٿئي ٿو ته اسان جي سماج ۾ بيحسي ايتري قدر پنهنجا پير ڄمائي ورتا آهن، ڄڻ ته انسان پنهنجي ڪائناتي حيثيت به وڃائي ويٺو آهي. سنڌ جيڪا صوفين جي ڌرتي آهي، انهن هستين ۽ ولين جي جنم ڀومي آهي، جن سڄي دنيا ۾ امن، سلامتي ۽ محبتن جو پيغام پکيڙيو، پر اڄ ان جي عيوض سنڌ ۽ سنڌ جي پرامن ماڻهن کي مختلف صورتن ۾ بدامني جي باهه ۾ ڌڪي نيست ۽ نابود ڪرڻ جا سانباها ٿي رهيا آهن. سنڌ حڪومت آخر انهن قوتن کي هتان لوڌي ڪڍڻ کان ڇو لنوائي رهي آهي، جيڪي هتي جي وسيلن تي قابض ٿيڻ سميت امن ۽ سلامتي لاءِ خطرو بڻيل آهن!؟ هاڻ ته مختصر وقفي بعد ٻيهر دهشتگردي جا واقعا روز جو معمول بڻجي چڪا آهن، اهڙي صورتحال ۾ به اقتدار ڌڻين اک نه کولي ته پراون کان وڌيڪ پنهنجا ئي مياري سڏبا.