تازيون خبرون

Daily Archives: March 10, 2017

سنڌ جا شهر ۽ ڳوٺ پنجاب کان به خوبصورت بڻائينداسين، 18ع ۾ اونداهي جو راڄ ختم هوندو: نواز شريف

ٺٽو (اين اين آءِ) وزيراعظم نواز شريف سنڌ جي نئين اڏاوت جو اعلان ڪندي چيو آهي ته صوبي جي شهرن ڳوٺن کي پنجاب جي شهرن ۽ ڳوٺن کان بهتر بڻائينداسين. مسئلا حل ڪرڻ صوبايئ حڪومت جو ڪم آهي، ڪو ٻيو سنڌ جي عوامي جي محرومين کي ختم نه ڪندو ته اسان ڪنداسين. عبدالطليف ڀٽائي ۽ لعل شهباز قلندر جي ڌرتي جي اڄ ختم ڪنداسين. ڪراچي کي به خوبصورت بڻائينداسين، سجاول ٺٽو ۽ ٽنڊو محمد خان ۾ هيلٿ ڪارڊ اسڪيم شروع ڪنداسين. ملڪ ۾ بجلي جي صورتحال بهتر ٿي رهي آهي خميس تي جلسي کي خطاب ڪندي وزيراعظم چيو ته ٺٽي ۾ اچي وڏي خوشي ٿي آهي. نواز شريف عوام کي مخاطب ٿيندي چيو ته جيتري خوشي توهان کي ٿي رهي آهي ان کان ٻيڻي مون کي ٿي رهي آهي وزيراعظم کلندي چيو ته خوشيءَ ۾ هوا به شروع ٿي وئي آهي ۽ جهنڊا به ڦڙڪي رهيا آهن توهان جي منهن خوش ڏسي رهيو آهيان مون کي شيرازي ڀائرن گهرايو آهي، منهنجي ڀائرن مون کي وڏي دير سان گهرايو آهي. مان پهريان اچڻ چاهيان پيو پر اڄ توهان جي خدمت ۾ حاضر ٿيو آهيان. وزيراعظم چيو ته شيرازي ڀائرن جيڪي ڳالهيون ڪيون آهن اهي صوبي جا معاملا آهن جڏهن ته وفاقي حڪومت سمورن مسئلن جي حل جو واعدو ڪري ٿي. اهي سڀ مسئلا صوبي کي حل ڪرڻ گهرجن شيرازي وڏيون اميدون کڻي مطالبا ڪيا آهن هي ٺٽو، سجاول جا مسئلا آهن اهي توهان جا مسئلا آهن ته منهنجا به مسئلا آهن. وزيراعظم چيو ته ٺٽي جي لاءِ 500 بسترن واري اسپتال تعمير ڪئي ويندي ۽ ايڏي وڏي اسپتال پشاور، ڪراچي ۽ لاهور ۾ به ناهي. هن چيو ته صحت ڪارڊ ذريعي سرڪاري ۽ نجي اسپتالن ۾ علاج ٿي سگهندو. هن چيو ته انهن علائقن ۾ بهتري گهٽ آهي جتي ماڻهو بل ادا نه ٿا ڪن. ان موقعي تي سجاول ۽ ٺٽي لاءِ گئس ڏيڻ جو اعلان ڪيان ٿو جنهن تي هڪ سئو 10 ڪروڙ رپيا خرچ ٿيندا جيڪي ٺٽي جي عوام تي قربان آهن. هن چيو ته ڪي ٽي بندر رٿا لاءِ نيشنل هاءِ وي کي حڪم جاري ڪيا آهن انهن کي چيو ويو آهي ته جيتري به انتظامي ۽ عدالتي رڪاوٽون آهن انهن کي ختم ڪري منصوبي کي مڪمل ڪيو وڃي. منصوبي لاءِ 50 ڪروڙ رپين جا حڪم جاري ڪيا ويا آهن. ٺٽي ۽ سجاول ۾ 50 ڪلوميٽر ڳوٺاڻن رستن لاءِ رقم فراهم ڪئي پئي وڃي. ان جو فيصلو گڏجي ڪنداسين. پيئڻ جي صاف پاڻي لاءِ ٻنهي ضلعن لاءِ 20  – 20 ڪروڙ رپيا ڏيڻ جو اعلان ڪيان ٿو. وزيراعظم چيو ته سمنڊ زرعي زمينن کي ڳڙڪائي رهيو آهي اهو صوبائي حڪومت جو معاملو آهي پر اسان سمجهون ٿا ته ان معاملي کي فوري طور تي حل ٿيڻ گهرجي ٺٽو ، سجاول ۽ بدين ۾ ان کي روڪڻ لاءِ بچاءُ بند تعميرڪيو ويندو اهو منصوبو توهان جي زمينن کي سمنڊ جي پاڻي کان محفوظ رکندو ۽ ان جي فزيبلٽي جي اسٽڊي لاءِ حڪم جاري ڪري ڇڏيو آهي جڏهن رپورٽ ايندي ته ڪم شروع ڪيو ويندو. وزيراعظم علي محمد اڏيرائي جو علاج سرڪاري خرچ تي ڪرائڻ جو به اعلان ڪيو. وزيراعظم ٺٽي جي 250 ڳوٺن کي بجلي ڏيڻ جو به اعلان ڪيو. وزيراعظم جو چوڻ هو ته اسان کي جڏهن حڪومت ملي ته ان وقت ملڪ جون حالتون ٺيڪ نه هيون پر اسان جي ڪوششن سان بجلي جي بحران تي قافي ضابطو آندو ويو آهي ۽ انشاءَ الله تعالي!ٰ 2018 تائين ملڪ مان انڌيري جي راڄ کي هميشه هميشه لاءِ ختم ڪيو ويندو. هن وڌيڪ چيو ته مان ٺٽي ۽ سجاول جي عوام ۾ جلد ٻيهر واپس موٽي اچي صحت ڪارڊ ورهائيندس.

 

پ پ پاران فوجي عدالتن جي مدي ۾ 2 سال واڌ رد، هڪ سال واڌ قبول آهي: آصف زرداري

اسلام آباد (ويب ڊيسڪ): پيپلز پارٽي جي شريڪ چيئرمين آصف علي زرداري جي صدارت هيٺ پيپلز پارٽي جو اجلاس ٿيو، اجلاس ۾ سينيٽر فرحت الله بابر، اعتزاز احسن، چوڌري منظور سميت ٻين اڳواڻن شرڪت ڪئي، اجلاس بعد ميڊيا سان ڳالهائيندي پيپلز پارٽي ترجمان فرحت الله بابر چيو ته پيپلز پارٽي پنهنجي 9 نڪاتي ايجنڊه تي قائم آهي، اسان پنهنجي موقف تان ناهيون هٽيا، اسان فوجي عدالتن جي حوالي سان ترميم آڻينداسين، هن چيو ته اهو تاثر غلط آهي ته اسان فوجي عدالتن تي حڪومت جي ڳالهه مڃي ورتي آهي، پيپلز پارٽي حڪومتي مسودي سان اتفاق وارين خبرن جي ترديد ڪري ٿي، فوجي عدالتن جي مدي ۾ هڪ سال جي واڌ قبول آهي، 2 سالن جي واڌ قبول نه هئي، نه ان کي قبول ڪنداسين.

 

نيشنل ايڪشن پلان تي عمل ۾ تيزي آڻڻي پوندي: آرمي چيف

راولپنڊي (اين اين آءِ) ڪور ڪمانڊرز ڪانفرنس دشمن ايجنسين جي پاڪستان مخالف ارادن کي پوري قوم جي حمايت سان ناڪام بنائڻ جو ارادو ڪيون ٿا. آرمي چيف چيو ته ملڪ جي بچاءَ لاءِ هٿياربند فوج پنهنجون ذميواريون نڀائي رهي آهي. دهشتگردي جي تازن واقعن جي رد عمل ۾ موثر ڪارروائيون ۽ لاهور ۾ پي ايس ايل جي فائنل لاءِ انتظامن تي پوليس، ڳجهن ادارن ۽ قانون لاڳو ڪندڙ ادارن جي ڪارڪردگي ساراهه جوڳي آهي ملڪ ۾ پائيدار امن ۽ استحڪام لاءِ ڌرين پاران قومي ايڪشن پلان تي عملدرآمد تيز ڪرڻ جي ضرورت آهي. آرمي چيف چيو ته آپريشن رد الفساد سڄي ملڪ ۾ دهشتگردن ۽ دهشتگردي خلاف ڪيو پيو وڃي ۽ ڪنهن خاص نسل، قوميت يا گروهه جي خلاف ناهي. آءِ ايس پي آر موجب 200 هون ڪور ڪمانڊرز ڪانفرنس خميس تي جي ايڇ ڪيو ۾ آرمي چيف جنرل قمر جاويد باجوه جي صدارت ۾ ڪوٺائي وئي، ڪانفرنس ۾ شريڪ ٿيندڙ جي او اسٽريٽجڪ ۽ سيڪيورٽي صورتحال خاص ڪري ملڪ جي اندروني سيڪيورتي صورتحال جو جائزو ورتو، اجلاس دوران پاڪ افغان سرحد جي صورتحال، لائين آف ڪنٽرول، ورڪنگ بائونڊري تي ڀارت پاران سيز فائر جي خلاف ورزين جو جائزو ورتو ويو آرمي چيف ڪانفرنس ۾ شريڪ ٿيندڙن کي گڏيل عرب امارات جي دوري ۽ قطر جي قيادت سان ملاقاتن بابت آگاهه ڪندي ٻڌايو ته ان جو اهو دورو انتهائي ڪامياب رهيو، جنهن دوران مثبت اڳڀرائي ٿي ڪور ڪمانڊرز ڪانفرنس دهشتگردي جي تازي واقعن جي رد عمل ۾ موثر ڪارروائين ۽ لاهور ۾ فائنل لاءِ انتظامن تي پوليس انٽيلجنس ادارن ۽ قانون لاڳو ڪندڙ ادارن جي ساراهه ڪئي. جڏهن ته اجلاس ۾ شريڪ ٿيڻ جو چوڻ هو ته فوجي عدالتن ۾ واڌ جو دارومدار حڪومتي فيصلي تي آهي. آرمي چيف ڪور ڪمانڊرن کي گذريل سيڪيورٽي ڪانفرنس دوران حڪومتي اختيارن سان ٿيندڙ ڳالهه ٻولهه کان آگاهه ڪيو جنهن ۾ پاڪ افغان سرحد تي مرحلي وار ڇڪتاڻ، افغان مهاجرن جي وطن واپسي، عدالتي ۽ پوليس سڌارا، مدرسا، تعليمي ادارن جا سڌارا ۽ فوجي عدالتن جي سزا يافته دهشتگردن کي ڦاهي ڏيڻ واري عمل جي بحالي بابت ڳالهه ٻولهه ڪئي وئي.

 

ملڪي سلامتيءَ ۽ بقا لاءِ هر امڪاني قدم کنيا ويندا: پاڪستان

اسلام آباد(اي پي پي) پرڏيهي آفيس چيو آهي ته پاڪستان ۽ افغانستان گڏجي دهشتگرديءَ تي ضابطو آڻي سگهن ٿا، سرحدي انتظام ٻنهي ملڪن جي بهتر مفاد ۾ آهي، پاڪستان قومي سلامتيءَ لاءِ گهٽ کان گهٽ دفاعي صلاحيت برقرار رکندو. 13هين اقتصادي تعاون تنظيم سربراهه اجلاس دوران ڪشمير وارو معاملو ڀرپور انداز ۾ کنيو ويو. پاڪ افغان سرحد بند ڪرڻ جو فيصلو ملڪي سلامتي کي نظر ۾ رکي ڪيو ويو. خميس ڏينهن پرڏيهي آفيس جي ترجمان محمد نفيس ذڪريا هفتيوار پريس بريفنگ دوران صحافين جي مختلف سوالن جا جواب ڏيندي چيو ته ڀارت سڄي دنيا ۾ هٿيار خريد ڪندڙ سڀ کان وڏو ملڪ بڻجي ويو آهي پر پاڪستان خطي ۾ طاقت جو توازن ۽ گهٽ کان گهٽ دفاعي صلاحيت برقرار رکندو. ترجمان چيو ته هندي سمنڊ ۾ ڀارت جي ايٽمي سرگرميون خطي ۽ عالمي سطح تي ڳڻتيءَ جو سبب آهن ۽ عالمي ادارا نيوڪليئر سپلائرز گروپ جي رڪنيت ڏيڻ وقت ڀارت جي غير معمولي ايٽمي ۽ دفاعي سرگرمين کي نظر ۾ رکن. پاڪ افغان سرحد جي بندش بابت سوال تي ترجمان چيو ته پاڪستان کي افغانستان سان سرحد بند ڪرڻ کي مجبور ڪيو ويو. لاهور، مهمند ايجنسي ۽ چارسده ۾ ڪيل دهشتگرد حملن جي ذميواري جماعت الاحرار ۽ تحريڪ طالبان قبول ڪئي هئي جن جون افغانستان ۾ محفوظ پناهگاهون قائم آهن، پاڪستان ملڪي سيڪيورٽيءَ کي نظر ۾ رکندي افغان سرحد کي بند ڪيو ڇو ته ملڪ جي سيڪيورٽي اسان لاءِ سڀني کان وڌيڪ مقدم آهي. ترجمان چيو ته هي معاملو ڪيترائي ڀيرا افغان اختيارين آڏو اُٿاريو ويو پر انهن گروپن خلاف ڪابه ڪارروائي نه ٿي. ترجمان چيو ته بارڊر مئنجيمنٽ اهم معاملو آهي پاڪستان ۽ افغانستان گڏجي دهشتگرديءَ تي ضابطو آڻي سگهن ٿا. سعودي عرب ۾ پاڪستان جي کدڙن فقيرن جي گرفتاريءَ بابت هڪ سوال تي ترجمان چيو ته سعودي پوليس جي تشدد سان کدڙي فقير جي فوت ٿيڻ واري ڳالهه ۾ ڪا صداقت ناهي. هن چيو ته اهو دل جو دؤرو پوڻ سبب فوت ٿيو آهي جڏهن ته ٻين کي مقامي قانون جي ڀڃڪڙيءَ تي گرفتار ڪيو ويو. ايڪو سربراهه اجلاس بابت سوال تي ترجمان چيو ته ڪامياب سربراهه اجلاس ۾ ڪيترن ئي ملڪن جي سربراهن ۽ حڪومتي سربراهن شرڪت ڪئي ۽ انهن سي پيڪ منصوبي جي آجيان ڪئي. هن چيو ته سربراهه اجلاس دوران ٻه طرفي ڳالهين ۾ ڪشمير جو معاملو به ڀرپور انداز ۾ اُٿاريو ويو.

 

سنڌ حڪومت 6 هزار ڊاڪٽرن جي ڀرتي جي منظوري ڏئي ڇڏي

ڪراچي (اسٽاف رپورٽر) سنڌ جي وڏي وزير سيد مراد علي شاهه سنڌ پبلڪ سروس ڪميشن جو تحريري ٽيسٽ پاس ڪندڙ ڇهه هزار ڊاڪٽرن جي مقرريءَ واري سمري جي منظوري ڏئي ڇڏي آهي ۽ صحت کاتي کي هدايت ڪئي آهي ته سندن آفر ليٽر جاري ڪيا وڃن. هن اها ڳالهه اڄ نيو سنڌ سيڪريٽريٽ ۾ صبح ساڍي اٺين وڳي صحت کاتي جي پاليسين ۽ ترقياتي رٿائن بابت هڪ اجلاس جي صدارت ڪندي ڪئي. اجلاس ۾ صحت وارو وزير ڊاڪٽر سڪندر مينڌرو، چيف سيڪريٽري رضوان ميمڻ، چيئرمين پلاننگ اينڊ ڊولپمينٽ محمد وسيم، سيڪريٽري صحت فضل الله پيچوهو، ناڻي وارو سيڪريٽري حسن نقوي ۽ ٻيا لاڳاپيل آفيسر موجود هئا. صوبائي صحت واري وزير ڊاڪٽر سڪندر مينڌري وڏي وزير کي بريفنگ ڏيندي چيو ته ميڊيڪل آفيسر گريڊ 17 جي 8128 سينڪشن پوسٽ آهن جن ۾ 6765 مرد ۽ 1363 عورتون شامل آهن، جنهن مان هن وقت 4243 ڊاڪٽر ڪم ڪري رهيا آهن، جنهن سان اها خبر پوي ٿي ته 3885 ڊاڪٽرن بشمول 3329 مرد ۽ 556 عورتن جون پوسٽون خالي آهن. هن چيو ته مان اهو چاهيان ٿو ته 3885 پوسٽن مان 377 پوسٽون 2014ع ۾ ڪانٽريڪٽ جي بنيادن تي ڀريون ويون. سيڪريٽري صحت ڊاڪٽر فضل الله پيچوهي چيو ته 3508 ميڊيڪل آفيسرن جو سيٽون خالي آهن ۽ 3175 پوسٽون وڌيڪ پيدا ڪيون ويون آهن، اهڙي ريت گڏيل طور سموري صوبي ۾ 6683 ميڊيڪل آفيسرن جو پوسٽون خالي آهن. وڏي وزير سيڪريٽري صحت کي هدايتون جاري ڪيون ته جن سنڌ پبلڪ سروس ڪميشن جو تحريري امتحان پاس ڪيو آهي انهن سمورن ميڊيڪل آفيسرن کي آفر ليٽر جاري ڪيا وڃن. سيڪريٽري صحت چيو ته هن ان مقصد لاءِ اوهان وٽ سمري موڪلي آهي. وڏي وزير سيد مراد علي شاهه سمري گهرائي انهيءَ وقت سمريءَ تي صحيح ڪري ڇڏي ۽ صحت کاتي کي هدايت ڪئي ته اهي انهن نون ڊاڪٽرن جي مقرريءَ لاءِ تفصيلي منصوبو تيار ڪيو وڃي ۽ انهن کي آفر ليٽر جاري ڪيا وڃن. هن چيو ته مان چاهيان ٿو ته اوهان صحت کاتي وارا ڪجهه راتيون ننڊ آرام نه ڪريون ۽ نون آفيسرن جا پوسٽنگ پلان تيار ڪيا وڃن. وڏي وزير صحت کاتي کي اها به هدايت ڪئي ته هُو 2014ع ۾ ڪانٽريڪٽ تي ڀرتي ٿيندڙ 377 ڊاڪٽرن جي خدمتن کي مستقل ڪيو وڃي. وڏي وزير چيو ته نون ميڊيڪل آفيسرن کي لازمي طور تي ٻهراڙي وارن علائقن جتي انهن جي گهرج هجي اتي مقرر ڪيو وڃي. هن چيو ته نون مقرر ٿيندڙ ڊاڪٽرن کي گهٽ ۾ گهٽ هڪ سال هائر ايجوڪيشن لاءِ نه موڪل ڏني وڃي ۽ نه ئي انهن جي بدلي ڪئي وڃي. وڏي وزير ان ڳالهه تي پنهنجي ناراضگيءَ جو اظهار ڪيو ته سندس واضح هدايت ۽ اسيمبليءَ جي فلور تي اعلان باوجود ڇهه هزار ميڊيڪل آفيسرن جي مقرريءَ ۾ غيرضروري دير ڪئي وئي ۽ ان سان حڪومت جي ڪارڪردگي متاثر ٿي. هن چيو ته هُو ڪا غيرقانوني ڳالهه نه پيو ڪري، انهن ڊاڪٽرن سنڌ پبلڪ سروس ڪميشن مان تحريري ٽيسٽ پاس ڪيو آهي ۽ انهن جي خدمتن جي تمام گهڻي گهرج آهي ڇاڪاڻ ته اسپتالن ۾ سمورا ضروري اوزار ته موجود آهن پر اتي ڊاڪٽر نه آهن. وڏي وزير سيد مراد علي شاهه هڪ ٻيو پاليسي فيصلو ڪندي چيو ته ڪنهن به اسڪول ۽ اسپتال جي صوبائي ايس اين اِي جي منظوري ڏني ويندي، ان جو هڪ اهو ئي طريقو آهي ته اسڪولن ۽ اسپتالن کي فنڪشنل بڻايو وڃي. هن صحت کاتي جي ترقياتي رٿائن جو به جائزو ورتو. چيئرمين پلاننگ اينڊ ڊولپمينٽ محمد وسيم چيو ته صحت کاتي جو 14 بلين رپين جو ترقياتي بجيٽ آهي جنهن ۾ 9368.75 ملين رپيا 89 جاري رٿائن ۽ 4631.250 ملين رپيا 57 نئين رٿائن لاءِ آهن. هن چيو ته حڪومت صحت کاتي لاءِ مختص ڪيل 14 بلين رپيا مان 6480.526 ملين رپيا جاري ڪري ڇڏيا آهن. جنهن مان صحت کاتي رڳو 2268.678 ملين رپيا استعمال ڪيا آهن. ان تي وڏي وزير سيڪريٽري صحت فضل الله پيچوهي کي هدايت ڪئي ته هُو سمورين رٿائن جي بروقت تڪميل کي يقيني بڻايو وڃي. هن چيو ته مان ڄاڻان ٿو ته اوهان جي ويجهڙائيءَ ۾ صحت کاتي ۾ بدلي ٿي آهي انڪري اوهان سمورن ترقياتي معاملن کي ڏسو ۽ انهن رٿائن کي جلد کان جلد مڪمل ڪرايو. هن چيو ته حڪومت صحت کاتي جي بجيٽ ۾ واڌ ڪئي آهي انڪري لازمي طور تي اهي فائدا سنڌ جي عوام تائين پهچڻ گهرجي.

 

پي اي سي جو اجلاس، ايڊيشنل سيڪريٽري کان وڌيڪ سيڪشن آفيسر گھڻي ڄاڻ ٿو رکي: خورشيد شاهه

اسلام آباد (ويب ڊيسڪ) پبلڪ اڪائونٽس ڪميٽيءَ جو سيد خورشيد احمد شاهه جي صدارت ۾ اجلاس ٿيو، سي پيڪ تحت بجليءَ جي منصوبن تي منصوبا بنديءَ جي وزارت کي بريفنگ ڏني وئي، منصوبا بنديءَ جي سيڪريٽريءَ جي ڪميٽيءَ جي اجلاس ۾ شرڪت نه ڪرڻ تي سيد خورشيد احمد شاهه سخت ڪاوڙ جو اظهار ڪيو، ان موقعي تي سيد خورشيد احمد شاهه جو چوڻ هو ته ايڊيشنل سيڪريٽري کان وڌيڪ سيڪشن آفيسر گھڻي ڄاڻ ٿو رکي، ان موقعي تي پاڻي ۽ بجليءَ واري سيڪريٽريءَ ڪميٽيءَ کي بريفنگ ڏني، جنهن دوران يونس ڊاگا جو چوڻ هو ته سي پيڪ تحت بجليءَ جا ڪُل 19 منصوبا آهن، سي پيڪ جا 12 هزار 114 ميگا وات جي بجليءَ جا منصوبا آهن، ان موقعي تي سيد خورشيد احمد شاهه چيو ته چين کان ڪُل قرض 35 ارب ڊالرن جو آهي، قرض جا ڪهڙا شرط آهن ۽ ان تي سُود ڪيترو آهي، عالمي بئنڪ ۽ ايشيائي بئنڪ جي سود جي شرح ڇا آهي؟ هي عوام جو پئسو آهي ۽ ان کي ئي ادا ڪرڻو آهي.36

 

حڪومت سوشل ميڊيا تان توهين آميز مواد هٽائڻ ۾ ڪا ڪسر ناهي ڇڏي: چوڌري نثار

اسلام آباد (ويب ڊيسڪ): وفاقي گهرو وزير چوڌري نثار جي صدارت هيٺ اعليٰ سطحي اجلاس ٿيو، اجلاس دوران ڳالهائيندي چوڌري نثار چيو ته حڪومت سوشل ميڊيا تان توهين آميز مواد هٽائڻ ۾ ڪا ڪسر ناهي ڇڏي، سوشل ميڊيا تي اهڙي مواد جي اجازت نه ڏينداسين، جيڪو مذهبي جذبا مجروح ڪري، توهين آميز مواد هٽائڻ لاءِ ڪنهن به حد تائين وڃي سگهون ٿا، اهڙي مواد کي هٽائڻ لاءِ مستقل حل ڪڍيو وڃي، انٽرنيٽ تي گستاخانه مواد پڪڙڻ لاءِ سوفٽ ويئر تيار ڪيو وڃي.

 

پرويز خٽڪ جي ليڊرشپ ڪي پي ڪي حڪومت کي ٻين صوبن جي مقابلي ۾ منفرد بڻايو: عمران خان

پشاور (ويب ڊيسڪ): پي ٽي آءِ چيئرمين عمران خان پشاور پهچي ويو، جتي وزيراعليٰ هائوس ۾ اعليٰ سطحي اجلاس جي صدارت ڪري رهيو آهي، اجلاس دوران ڪي پي ڪي جي وڏي وزير پرويز خٽڪ عمران خان کي پنجاب ۾ پختونن سان ناروا سلوڪ بابت آگاهي ڏني، ان موقعي تي ڳالهائيندي عمران خان چيو ته اوهان جي ليڊرشپ ۾ شفافيت، ڪرپشن جي خاتمي ۽ انصاف جي فراهمي بهتر ٿي آهي، هن چيو ته پرويز خٽڪ جي ليڊرشپ ڪي پي ڪي حڪومت کي ٻين صوبن جي مقابلي ۾ منفرد بڻايو.

 

ڪجهه دهشتگرد جبلن تي ۽ ڪجهه ايوانن ۾ ويٺل آهن: سراج الحق

اسلام آباد (ويب ڊيسڪ): جماعت اسلامي امير سراج الحق چيو آهي ته حڪمرانن جي غلط پاليسين سبب اسان جون سرحدون ۽ پاڪستان جنگ جو مرڪز بڻجي ويو آهي، حڪمران مٺو پاڻ کائيندا آهن ۽ ڪوڙو فوج جي وات ۾ وجهڻ جي ڪوشش ڪندا آهن، هن چيو ته پاڪستان ۾ هٿياربند دهشتگردي سان گڏ مالي ۽ نظرياتي دهشتگردي ٿي رهي آهي، ڪجهه دهشتگرد جبلن تي ۽ ڪجهه ايوانن ۽ آفيسن ۾ ويٺا آهن، حڪمرانن جي دهشتگردي سبب عوام ڏکيائين جو شڪار آهي، مسجدن، مزارن تي ڌماڪا ٿي رهيا آهن پر جڏهن ڪارروائي ڪئي ويندي آهي ته انهن ۾ به مسجدن ۽ مزارن کي نشانو بڻايو ويندو اهي.

 

مراد سعيد ڏندن چڪن کان پوءِ جاويد لطيف کي مُڪ وهائي ڪڍي

اسلام آباد (ويب ڊيسڪ) تحريڪ انصاف جي قومي اسيمبلي ميمبر مراد سعيد ڏندن چڪن کان پوءِ مسلم ليگ نواز جي ايم اين اي جاويد لطيفکي مُڪ وهائي ڪڍي، ٻنهي ميمبرن ۾ عمران خان تي ٿيندڙ تنقيد بابت اسيمبليءَ جي راهداريءَ ۾ بحث جاري هو ته ان دوران مراد سعيد ڪاوڙ ۾ اچي ويو ۽ جاويد لطيف کي مُڪ وهائي ڪڍي، ان اوچتي صورتحال تي ٻين اسيمبلي ميمبر حيران رهجي ويا ۽ ٻنهي ميمبرن جي وچ ۾ پئي بچاءُ ڪرايو، ان کان اڳ جاويد لطيف قومي اسيمبلي ۾ بيان ڏنو هو ته تحريڪ انصاف پنهنجي ليڊر عمران خان کي عقل سيکاري، ان تي اسيمبلي اجلاس دوران به ٻنهي ۾ سخت جملن جي ڏي وٺ ٿي هئي ۽ ان دوران اوچتو مراد سعيد جاويد لطيف کي مُڪ وهائي ڪڍي، ان بابت ڳالهائيندي تحريڪ انصاف جي ترجمان فواد چوڌريءَ چيو ته واقعو تمام افسوس جوڳو آهي اهڙا واقعا اسيمبليءَ جي احاطي ۾ نه ٿيڻ گھرجن.36