تازيون خبرون

Daily Archives: March 8, 2017

”را“ جي زبان ڳالهائيندڙ قوم جو ليڊر نٿو ٿي سگھي: رانا ثناءُ الله

لاهور (اين اين آءِ) پنجاب جي قانون واري وزير رانا ثناءُالله خان چيو ته عمران خان جي پرڏيهي رانديگرن جي حوالي سان بيان جي سخت مذمت ڪندي بيان واپس وٺڻ ۽ قوم کان معافي وٺڻ جو مطالبو ڪندي چيو آهي ته هن جيڪا زبان استعمال ڪئي اها پاڪستان جي دشمنن جي زبان آهي عمران خان پنهنجي بيان سان ظاهر ٿي ويو آهي عمران خان ثابت ڪري ڇڏيو ته هو ملڪ ۽ قوم جو ليڊر نٿو ٿي سگهي. جهاد ۽ افغانستان جي نالي تي ڊالرن جي برسات ڪٿان ٿي هئي ۽ ڊالرن کي حلوو سمجهي ڪير کائيندو رهيو آصف زرداري جي تجويز مطابق فوجي عدالتون قائم ڪيون ويون ته مقصد ختم ٿي ويندو پنجاب اسيمبلي جي احاطي ۾ ميڊيا سان ڳالهائيندي رانا ثناءُالله چيو ته عمران خان جو پنهنجي ڳالهائڻ تي ڪنٽرول نه آهي پرڏيهي مهمانن جي لاءِ جيڪا زبان استعمال ڪئي ويئي اها توهين جهڙي آهي هن چيو ته عمران خان هميشه پنهنجي مخالفن جي خلاف به گهٽيا زبان استعمال ڪندو آهي. هن چيو ته سراج الحق پنهنجي ڳالهائڻ ۾ سٺي زبان استعمال ڪري ۽ سراج الحق هڪ طرف اتحادي ۽ ٻئي طرف مخالف آهي هن چيو ته آصف زرداري جي تجويز مطابق فوجي عدالتون قائم ڪيون ويون ته مقصد ختم ٿي ويندو (ن) ليگ فوجي عدالتن تي ٽن سالن جي واڌ چاهي پئي پر سمورين پارٽين جو اتفاق ٻن سالن تائين ٿيو آهي قوم چاهي ٿي ته فوجي عدالتن جا مقصد پورا ٿيڻ گهرجن فوجي عدالتن جي فيصلن ٻن ٻن سال اپيلن ۾ رهڻ آهي ته پوءِ ڪوبه فائدو نه آهي هن ڊفينس جي ڌماڪي واري حوالي اسن چيو ته ان جي نوعيت م فرانزڪ ليبارٽري جي جاچ آئي آهي ته اهو واقعو گئس ڌماڪو هو ۽ گئس سان ڌماڪو ڪيئن ٿيو ان جي جاچ ٿي رهي آهي.

 

ٽي وي انڊسٽري ڀارتي توڙي عربي ڊرامن کي پوئتي ڇڏي ڏنو آهي: صبا قمر

لاهور (شوبز نيوز) ناليواري اداڪارا ۽ ماڊل صبا قمر چيو آهي ته نوجوان فنڪارن ٽي وي ڊرامن کي وڌيڪ بهتر بڻايو آهي، جنهن سبب اسان جي ٽي وي انڊسٽري ڀارتي توڙي عربي ڊرامن کي پوئتي ڇڏي ڏنو آهي. پنهنجي هڪ انٽرويو ۾ خوبصورت اداڪارا صبا قمر جو چوڻ هو ته ملڪي ٽي وي انڊسٽريءَ ۾ وڌيڪ بهتري جي گنجائش موجود آهي، جنهن لاءِ نوان موضوع ۽ جديد ٽيڪنالاجي وقت جي اهم ضرورت آهي. هن چيو ته مان پنهنجي فني ڪيريئر دوران هر قسم جا ڪردار سٺي طريقي سان نڀايا آهن پر خواهش آهي ته ڪو اهڙو ڪردار نڀايان، جنهن کي ماڻهو سدائين ياد رکن.27

 

پاڪستان ۾ وڏو ٽئلينٽ موجود آهي پر اڳتي وڌڻ جا موقعا نه هجڻ برابر آهن: ماريا خان

لاهور (شوبز نيوز) اداڪارا ۽ ماڊل ماريا خان چيو آهي ته پاڪستان ۾ وڏو ٽئلينٽ موجود آهي پر اڳتي وڌڻ جا موقعا نه هجڻ برابر آهن، شوبز ۾ پڙهيل لکيل ماڻهن جو هجڻ ڏاڍو ضروري آهي. پنهنجي هڪ انٽرويو ۾ خوبصورت اداڪارا ۽ ماڊل ماريا خان جو چوڻ هو ته حڪومت کي سرڪاري سطح تي فن ۽ فنڪارن کي اڳتي وڌڻ لاءِ مناسب قدم کڻڻ گهرجي ته جيئن نئين ٽئلينٽ جي حوصلا افزائي ٿي سگهي. هن وڌيڪ چيو ته ماڊلنگ ۾ مصروفيتن سبب گهر لاءِ مناسب وقت ڪڍڻ ڏکيو ٿي ويو آهي، مان پنهنجي ذاتي زندگي ۾ ڪجهه جي به مداخلت برداشت ناهيان ڪندي.27

 

پاڪستان سپر ليگ لاءِ پاڪستان ايندڙ پرڏيهي رانديگر فٽيچر يا سپر؟

لاهور (اسپورٽس نيوز) پاڪستان سپر ليگ لاءِ پاڪستان ايندڙ پرڏيهي رانديگر فٽيچر يا سپر؟ ڪپتان جي طور تي ڪنهن پنهنجي ٽيم کي 2 ٽي ٽوئنٽي ورلڊ ڪپ کٽريا آهن ته ڪنهن جي بهترين اننگز 260 رنسون آهن، تفصيل موجب پاڪستان جو مان وڌائڻ جيڪي عالمي شهريت حاصل ڪندڙ ڪرڪيٽر پاڪستان سپر ليگ کيڏڻ لاهور آيا انهن جي ڪيريئر تي هڪ نظر وجهون ٿا، ڊيرن سمي بطو ڪپتان ويسٽ انڊيز کي 2 ٽي ٽوئنٽي کٽرائي چڪو آهي، رچرڊ کي عمران خان کان بهتر ڪير ڄاڻي ٿو ان جو پاڪستان اچڻ اعزاز جي ڳالهه هئي يا نه، ويسٽ انڊيز جو مارلن سموئلز 71 ميچون کيڏي چڪو آهي ۽ ان جي بهترين اننگز 260 رنسون آهن، ڪرس جارڊن 31 ون ڊي ۾ 43 ۽ 8 ٽيسٽ ۾ 21 وڪيٽون وٺي چڪو آهي، ڏکڻ آفريڪا جو وڪيٽ ڪيپر مورن وينوڪ 17 ون ڊي ميچن ۾ ڏکڻ آفريڪا لاءِ 425 رنسون ٺاهي چڪو آهي، پنهنجي ملڪ جي کيپ حاصل ڪرڻ ۽ هڪ ميچ ئي کيڏڻ وڏو اعزاز آهي، ياد رهي ته پي ٽي آءِ جي چيئرمين عمران خان پي ايس ايل لاءِ پاڪستان ايندڙ رانديگرن کي فٽيچر قرار ڏنو هو.

 

آدمشماري نالي تي سنڌ سان ٿيندڙ نئين ٺڳي: ماھم سنڌي / ميرپورخاص

پاڪستان ۾ وڏي عرصي ترسڻ بعد سپريم ڪورٽ جي ناراضگي ۽ ڏنل فيصلي اڳيان مجبورن گوڏن سميت ڪنڌ جھڪائيندي  ،  موجوده نواز شريف جي حڪومت ڇھين آدمشماري ڪرڻ جي حامي ڀريندي ان جون تياريون شروع ڪري ڇڏيون آھن جيڪي پنھنجي آخري مرحلي ۾ داخل آھن . پھرين مرحلي ۾ 15 مارچ تي گھر گھر ٽيمن جو وڃي ڳڻپ وارو عمل شروع ڪيو ويندو ۽ باقاعدگي سان ان عمل جي شروعات ٿي ويندي . 15 کان 17 مارچ تائين گھرشماري جو عمل ٿيندو ،  18 کان 27 مارچ تائين آدمشماري ، 29 ۽ 30 مارچ تي فارمن جي ڇنڊ ڇاڻ ڪئي ويندي.
آدمشماري جو ھڪ فائدو اھو به آھي ته اها خبر پوي ٿي ته ڪھڙي قوم جا ماڻھو ڪيتري اڪثريت سان رھن ٿا . ان ڏس ۾ انھي قوم جي ٻولي ان جي ثقافت ۽ تھذيب جي اوسر لڳاپيل ھوندي آھي. سڀني صوبن سميت سنڌ لاء اھا آدمشماري ۽ ان جا انصاف تي ٻڌل  نتيجا انتھائي اھم آھن ، پر ڇا سنڌ جي آدمشماري ۾ صحيح انگ اکر ظاھر ڪري  انصاف جي علامت بڻيل سپريم ڪورٽ  پنھنجي فيصلي ۾ ڪامياب ويندي ؟   يا اھي نتيجا انھن ڌانڌلين ، انھن سياسي خوشنودين ۽ قومي تعصبن جي ور چڙھي ويندا جئين ھميشه کان سنڌ ۾ ٿيندو آيو آھي . ان جي روڪڻ لاء آواز اونچا ته ٿيندا رھيا آھن ، پر ڪو اهڙو بند ناھي ٻڌجي سگھيو جو وڏي ڀاءُ پنجاب جي زوري مصلحت ۽ ان جي حق ڦٻائڻ واري زور آوري کان بچي سگھجي . سنڌ صوبي سان شروعاتي تعصباڻو رويو رکندڙ موجوده حڪومتي ڌُر ، جئين ته ھنئير سي پيڪ منصوبو ، ترقياتي منصوبن ، ميٽرو بسن ۽ ٽرينن سميت جيڪو به پرڏيهي يا ملڪي پراجيڪٽ ھجي ،  ان تي سنڌ جو فائدو ڏسڻ لاء ھڪ اک نه ڌري رهي آھي ، بلڪه ماٽيلي ماءُ وارو سلوڪ جاري و ساري رھندو پيو اچي . سنڌ ۾ ڌڙا ڌڙ افغاني پٺاڻن جي آبادڪاري ۽ انھن کي اتي ڄمائڻ لاء روزگار جا ذريعا مهيا ڪري ڏيڻ ڪري سڀ کان پھريون حق ڌرتي ڌڻين جو کسجي رھيو آھي . رھائشي ڪالونيون ھجن ، روزگار جا وسيلا ھجن ،  انھن جا فرمائشي مدرسا هجن ،  انھن جو الڳ بازارون ھجن ،   فئڪٽرين ۽ ٻين منصوبن تي ڀرتيون هجن ، سڀ جون سڀ  سھولتون انھن تائين پھچايون پيون وڃن جنھن سبب نا صرف سنڌين جي آبادي گھٽ پئي ٿئي پر ھٿ ٺوڪي انھن کي پوئتي ڌڪيو پيو وڃي . آدمشماري ڪرائڻ جو مطلب ئي اھو هوندو آھي ته آبادي موجب وسيلن جي ،  خوراڪ جي ، ٻين منصوبن جي آمدني موجب ورڇ ڪئي وڃي . پر موجوده صورتحال ۾ سنڌ جي آدمشماري ڪرائڻ فقط ھڪ ٺڳي لڳي رھي آھي ، جنھن ۾ ھنن کي گھربل حق ملڻ ته پري جي ڳالھ ، پر ابتو انھن جي آبادي گھٽائي ڌارين جي وڌايل آبادي ظاھر ڪئي وڃي ٿي . ماضي وانگر اڄ به  انھن تائين وڌيڪ وسيلا پھچائي انھن کي پرائي ڌرتي تي وڌيڪ خوشحالي ڏئي مستقل بنيادن تي ترسايو پيو وڃي جنھن جو سڌو سنئون نقصان سنڌ واسي ئي ڀوڳين پيا  .

فيبروري جي ئي آخري ھفتي ۾ تڪڙي  آدمشماري بابت سينيٽ جي ناڻي ڪميٽي جو اجلاس ٿيو .  جنھن ۾ آدمشماري جا ماھر ويٺل ھئا تن اجلاس ۾ بحث دوران   سنگين قسم جا انڪشاف ڪندي سخت ڳڻتي جو اظھار ڪيو آھي . انھن ٻڌايو ته  آخري ڳڻپ جيڪا 1998ع ۾ ٿي ھئي ان موجب سنڌ صوبي جي آبادي  60 لک کان 70 لک گھٽ ظاھر ڪيل آھي جيڪو وڏو انگ آھي  . پر اھو ڪڙو سچ آھي ته پنجاب سميت سڀني صوبن مان لڏپلاڻ ڪري ڪيترا ئي ملڪي ۽ ڌاريا سنڌ ۾ پنھنجا مستقل اڏا ٺاھيو ويٺا آھن . انتهائي اھميت جي حامل ان نڪتي کي ردي جي ڪتابن جيان اڄ تائين صفا سستو سمجھيو ويو آھي . سڀني ماھرن موجب  تڪڙي بنيادن تي ڪرايل ھن آدمشماري ۾ اقوام متحده جا اصول ۽ شفافيت بابت سڀئي نڪتا شامل ٿي ئي نه سگھندا . ماھرن موجب غير ملڪي ٽيمون ايڏو جلد ٿيل ان آدمشماري  جي ڪا مانيٽرنگ نه ڪري سگهندا . ماضي جو ئي مثال ڏسون   ھڪ وڏي غلطي ته اھا ڪئي وئي جو 1951ع واري آبادي ۾ سنڌ جي سڄي ملڪي  آبادي جو فقط 18 سيڪڙو ،  1961ع ۾ 20 سيڪڙو ،  1972ع ۾ 21  سيڪڙو ڄاڻايل آھي .  جيڪا 1981ع  واري  آبادي ڳڻپ   ۾ جڏھن ضياء الحق جي آمريت ھئي ان موجب سنڌ جي ڪُل آبادي ملڪ جو 23 سيڪڙو ڄاڻائي وئي .   حيرت جي ڳالھ اھا آھي ته 9 سالن دوران سنڌ جي آبادي صرف ھڪ سيڪڙو وڌيل ڄاڻائي وئي جيڪا سنڌ واسين سان ھڪ وڏي ٺڳي ھئي . ضياء الحق جي ڪاري دور ۾ جيتري قدر ڌارين کي سنڌ ۾ رھڻ جا جيترا اجازتناما جاري ٿيا ، اُھي ڪنھن کان ڳجھا ناھن . ھر عام ماڻھو به انھي تي آساني سان نتيجي تي پھچي سگھي ٿو ته ڪئين دوکي سان سنڌ جي وڌيل آبادي کي گھٽ پيش ڪيو پئي ويو. ملڪي لڏپلاڻ دوران به 50 سيڪڙو ماڻھو سنڌ اندر آباد ٿيا  جيڪي وسيلن تي ته قابض  آھن ،  پر 40 لکن کان وڌيڪ ملڪ ۾ رھندڙ ڌارين کي نيڪالي بابت  وس وارين اختيارن مان ڪنهن جي ڪَن ۾ جونءَ به نه پئي سُري . ورهاڱي بعد 28 لک مهاجر ته رڳو ڪراچي حيدرآباد ۾ رھائي ، انهن جي نالي زمينون ملڪيتون ڪري فرسٽ ڪلاس شھري جون سھولتون ڏنيون ويون جيڪي ھڪ سنڌي کي به ميسر نه هيون . 13 لک ھندن کي لڏائي ان جي ڇڏيل جائدادن تي قبضو ڪري اھي به ڌرتي ڌڻين ۾ ورھاست بدران انھن کي ڏنا جيڪي سنڌي ٻولي جي الف ب به ڄاڻندا نه هئا .

اوڀر بنگال جي 1971ع ۾ ٽٽڻ بعد بنگالي پورھيتن جي وڏي تعداد مغربي پاڪستان جو رخ ڪيو ، جن جي سڄي تعداد کي پنجاب يا ٻي ھنڌ ترسائڻ بدران سڌو سنڌ طرف نيو ويو . ان وچ ۽ ٽنھي صوبن جي لڏپلاڻ ڪندڙ مزدورن به سنڌ جي  وڏن شھرن ڪراچي حيدرآباد کي محفوظ پناھگاھ سمجھيو ۽ اتي ڊيرا ڄمائڻ کي ترجيح ڏيندي اتي رھڻ لڳا . ان وقت شھيد ذوالفقار ڀٽي تڪڙا پاسپورٽ جاري ڪري وچ اوڀر ۾ پورھيتن کي موڪلڻ جي پاليسي جاري ڪئي هئي،  پر سنڌ مان معمولي تعداد ۾ پورھيت ٻاھر ويا .   اھو سڻڀو گرھ به پنجاب ۽ ٻين صوبن جي وات جو ذائقو وڌائيندو رھيو . پوئين ڳڻپن ۾ سنڌ ۾ موجود في ڪٽنب پنج فردن تي مشتمل ڏيکاريو ويو آھي ،  جيڪا حقيقتن جي نفعي آھي . ٻھراڙي وارن علائقن ۾ ته پنج کان مٿي 10 تائين ھڪ خاندان جا فرد ھوندا آھن جن ۾ اڪثريت ھيٺين طبقي ھاري مزدورن جي ھجي ٿي . نوان پرڻيل جوڙا جيڪي گڏيل خاندان ۾ رھن ٿا ،  اھي به گھٽ تعليم ۽ عدم دلچسپي سبب الڳ خاندان نمبر ناھن لکرائيندا بلڪه ھڪ ئي خاندان جي ڳڻپ ۾ ڳڻجي ويندا آھن . نئي آبادڪاري ۾ سنڌ حڪومت کي ورغلائي ۽ ان تي  هڪ طرف دٻاءُ بڻائي زبردستي ۽ ٻي طرف ان جي تعاون  سان موڪليل ڌاريا جيڪي ڪراچي شھر ۾ سنڌين کي اقليت ۾ بدلائي ڇڏيو آھي ،  انھن جي تعداد وڌنڌي پئي وڃي  . ان بعد جيڪي به سنڌ جا وڏا شھر آھن اتي اصلوڪي سنڌين کان وڌيڪ ڌارين جون ڪالونيون اڏيون ويون آھن . جئين ته   مھاجرن جون ڪالونيون  ، بنگالين جون ڪالونيون ،  پٺاڻن ۽ پنجابين جون ڪالونيون وغيره . ٻيو ھتي اھڙو ڪو قانون به لاڳو نه پيو ڪيو وڃي جنھن سان ڌارين کي ڪا پراپرٽي خريدڻ ۽ ان جي مالڪي جو تڪڙو حق حاصل نه ٿئي ، پر اتي ھر ڪو نواب ۽ پنھنجي مرضي ساڻ پنھنجا فائدا ڏسي سنڌ حڪومت جي تعاون سان گھربل فائدا حاصل ڪري رھيو آھي . سنڌ سان نا انصافي جي شروعات تڏھن ٿي جڏھن ورھاڱي بعد لڏپلاڻ جو گهڻو بار سنڌ تي وجھي ان جي آبادي ۾ تمام گھڻو واڌارو ڪيو ويو  .  ان بعد روس جڏھن ٽٽو ته افغانستاني نام نھاد  جھادي پٺاڻن کي ضياءالحق پناھ ڏئي پاڪستان ۾ سنڌ اندر ترسايو . انهن کي پوء ڪيتريون ئي ملڪيتون ۽ روزگار جا ذريعا فراھم ڪيا ويا جن سان سنڌين ۾ احساس محرومي جو احساس ۽  ڌرتي ڌڻين جي حق تلفي ٿيندي رهي .

ويجھي ئي منھنجي مشاھدي ۾ منھنجو شھر ضلعو ميرپورخاص جيڪو ڊويزن جي حيثيت ٿو  رکي اتي پوئين 15سالن کان ڌڙا ڌڙ پٺاڻن جي داخله جاري  آھي . عورتن جي مارڪيٽن ۾ ،  ريشمي بازار ھجي ،  لُنڊا بازار ھجي ، توڙي ٻيا ڪاروباري مرڪز ھر ھنڌ انھن جي ڪثير تعداد گھمي ڦري پئي . سنڌين جي تعداد جي ڀيٽ ۾ پٺاڻ گھڻا نظر اچن پيا . انھن جي ئي تعاون سان جتي پوئين سالن ۾ چند ئي مسجدون ھونديون ھيون ھاڻ تڪڙا تڪڙا مدرسا ،  ھاسٽلن سميت جوڙي انھن ۾ ٻار ڀرتي ڪيا پيا وڃن . انهن جي شفافيت ڪيتري قدر مشڪوڪ آھي انھي ٽاپڪ تي ڳالھائڻ لاء ضلعي حڪومت پڻ خاص دلچسپي نٿي وٺي . ضلعي ميرپورخاص  جي تعلقي ڪوٽ غلام محمد طرف سفر ڪرڻ سان ۽ مل ملائڻ سان  پٺاڻي نوجوانن جا اھڙا ته رايا ھجن ٿا جو لڳي ٿو اھي ڪنھن مدرسي جا شاگرد نه پر ڪنھن دھشتگردي ڦھلائيندڙ ٽولي جا ميمبر ھجن .

سنڌ اندر  ٿيندڙ ايندڙ هفتي ۾ ڳڻپ جي حوالي سان ڪيترن ئي اصلوڪي رھواسين جا شناختي ڪارڊ ايمرجنسي بنياد تي ٺاھڻ جي اعلان بعد به تيزي ناھي آئي . ڌارين جي ساڳي ئي پيڙھ پيڙاھ اڄ به موجود آھي جن بابت سنڌي قومپرست  جماعتون يڪجا ٿي آواز اٿاري ھدايتون جاري ڪري سجاڳي مھم ھلائي رھيون آھن پر اھو سڀ ايترو لاڀائتو ثابت نه پيو ٿئي  . سنڌ جا خدشا پري ڪرڻ بدران ساڳي ئي صورتحال ۾ تڪڙي آدمشماري ڪرائڻ ھڪ طرف سنڌ خلاف سازش آھي،  ٻيو سڌو سنئون ٺڳي جو ٺاھ  جنھن ۾ سنڌي قوم کي اقليت ۾ ظاھر ڪري پنجاھ سيڪڙو کان به وڌيڪ آبادي غير سنڌين جي شامل ڪئي ويندي . جنھن سان لاڳاپيل قومي وجود ھڪ دفعو ٻيھر پنھنجي حقن کان رهجي ويندو . سنڌ جي موجوده آبادي ملڪي آبادي جي 32 سيڪڙو کان به مٿي بيهي ٿي پر خدشو ان ڳالھ جو برقرار آھي ته سنڌ جي آبادي گھٽ ڄاڻائي ويندي ۽ ڌارين جي لوڌ کي ڪڍڻ بابت ڪا گھربل منصوبابندي نه  نظر اچڻ جو سنگين مسئلو  موجود آھي .  جيستائين سنڌ جي سڄاڻ ۽ سڄڻ ڌرين جا خدشا ختم نه ٿا ڪيا وڃن  ۽ ڌارين جي نيڪالي نٿي ٿئي  تيستائين آدمشماري ڪرائڻ  سنڌ جي حق ۾ بھتر هرگز نه بيھندو .

 

سنڌ جي عورتن تي ٿيندڙ ناانصافين، زيادتين جو آخرنوٽيس ڪير وٺندو…؟: ليکڪ عبدالجبار ميمڻ

جڏهن ته اڄ سڄي دنيا ۾ عورتن جو عالمي ڏينهن ملهايو پيو وڃي. پر سنڌ جون عورتون اڄ به زيادتين، ناانصافين جي ور چڙهيل آهن. جڏهن ته ٻين ملڪن ۾ عورتن کي تعليم سان گڏ سٺن عهدن تي ڏٺو وڃي ٿو ۽ انهن کي سٺن نگاهن سان  ڏٺو ويندو آهي. پر اسان جي هن ساڙولي سماج ۾ سنڌ جي عورتن کي خبر ناهي ته ڪهڙي گناهه جي سزا ملي رهي آهي. ڇو ته اسلام ۾ عورتن کي مڙدن جيترا برابري جيترا حق مليل آهن. پر تنهن هوندي به اسان جي هن گندگي سماج  ۽ سوسائٽي ۾ هر ڪو ماڻهو عورت ماءُ ۽ ڀيڻ کي سٺي نگاهه سان ڏٺو وڃي ٿو. باقي ٻين عورتن کي ڀري نگاهه سان ڏسي انهن جي مٿان الزامن جو بارشو وسايون وڃن ٿيون. جڏهن ته ڪيتري ئي عرصي ڏاڏي آدم جي دور کان وٺي ڪيترائي عور تن مٿان نا جائزحد کان وڌيڪ پهاڙ ڪيرائي انهن کان جيئڻ جو حق کسيو وڃي ٿو. جڏهن کان عورتن جي حقن لاءِ قومي توڙي صوبائي اسيملين ۾ ٺهراءُ پاس ڪيا ويا ته عورتن تي ڪنهن به قسم جو ٿيندڙ تشدد جو نوٽيس وٺي جوابدارن کي ڪفر ڪردار تائين پهچايو ويندو. پر اڄ ڏينهن تائين انهن جوڙيل قانون تي ڪو به عمل نه ٿي سگهيو آهي. جنهن سبب اڄ جون عورتون گهرن تائين محدود ٿيڻ تي مجبور آهن ۽ انهن مٿان گهرولي تشدد، جنسي ڏاڍائي، اغوا ۽ بيدردي سان قتل ڪيو وڃي ٿو. ان جي خون سان اڄ ڏينهن تائين ڪو به قانوني حساب سان انصاف سان نه ٿي سگهيو آهي. ويتر حڪومت جي ٿاڦيل قانون جي لتاڙ سبب ويتر عورتون وڌيڪ عذاب جو شڪار آهن. جڏهن ته اڄ به سنڌ جي عورتن کي ڏاڏي آدم جي دور کي ورجائي زندهه دفنايو آهي. ۽ جنسي ڏاڏائي جو شڪار ٿيڻ بعد انهن کي اغوا ڪري بيدردي سان قتل ڪرڻ وارو سلسلو تيز ٿي ويو آهي. جڏهن ته اڄ به عورتون انصاف جي اوسيڙي لاءِ ڪورٽن، جيلن، دارال مان جا چڪر ڪاٽي ٿڪجي پيون آهن. ۽ اتي پاڻ کي محفوظ نه سمجهيون رهيون آهن. جڏهن ته حڪومرانن جي بيحسي سبب سنڏ جون عورتون هڪ پاسي حقن کان محروم آهن ۽ ٻئي پاسي بکن ، بيمارين، غذائي کوٽ سبب بي يارو مددگار هوندي پنهنجون حياتيون وڃائي رهيون آهن، پر حڪمرانن جي لاپرواهي سبب ايوانن ۾ جون به نٿي چري جو اهي پنهنجي جوڙيل قانونن مطابق عورتن کي جائز حق ڏياري انهن مان زندگي جي بيچيني ختم ڪئي وڃي. پر جڏهن ته جيستائين حڪومت عورتن کي وڌندڙ تشدد واري عمل کي نه روڪي سگهندي تيستائين سنڌ جون عورتون ظلم ۽ زيادتن جو شڪار بڻجنديون رهنديون.جڏهن حڪومت جي بي حسي ۽ نااهلي سبب اڄ جون عورتون فرش کان عرش تائين پهچڻ گهرجي ها پر تعليم کان وٺي انهن جا سمورا حق کسي انهن کي  دٻاءُ جو شڪار بڻائي اعليٰ منزل تائين پهچڻ ئي نٿو ڏنو وڃي، جڏهن ته حڪومت کي گهرجي ته جوڙيل قانون کي دفن ڪرڻ بجاءِ اپاءُ وٺي عورتن مٿان دردن جا پهاڙ ڪيرائيندڙ جوابدارن کي ڦاسي تي لٽڪايو وڃي. ته جيئن عورتن سان بي رحماني ٿيندڙ وارڌاتن تي گهتٽائي ٿي اچي سگهي. ڇو جو سنڌ جون عورتن جون اڄ به اميدون آسون دٻجي رهيون آهن. جيئن ڀٽائي چوي ٿو ته

جيس  ته سور

سامايس ته سک ويا

اهي ٻئي پور

مون نماڻيءَ نصيب ٿيا….

جڏهن ته اڄ حڪمرانن جا عورتن جي حقن جي لاءِ جوڙيل قانون تيزي سان لوز ٿي چڪا آهن، تنهن ڪري بااثر ڌرين جو مظلوم عورتن مٿان وحشياڻي تشدد، جنسي ڏاڍائي، اغوا ڪري بي دردي سان انهن کي قتل ڪري انهن جون حياتيون کسيون پيون وڃن. جڏهن ته حڪمرانن کي گهرجي ته عورتن مٿان ٿيندڙ تشدد جو ترت نوٽيس وٺي جوابدارن کي عبرت ناڪ سزائون ڏنيون وڃن ته جيئن عورتن سان ٿيندڙ واقعن ۾ گهٽتائي ٿي سگهي.

 

 

افغان زمين جو پاڪستان خلاف استعمال…..!

هي پهريون ڀيرو ناهي، بلڪه ان کان به ڪيئي ڀيرا اڳ افغانستان جي سرحدي علائقن مان پاڪستاني سيڪيورٽي فورسز جي چيڪ پوسٽن تي دهشتگردن جا حملا ٿيندا رهيا آهن، نه صرف دهشتگردن، پر افغان حڪومتي فورسز پاران به پاڪستاني حدن ۾ مارٽر گولا فائر ڪري سرحدي حدن جون خلاف ورزيون ڪيون ويون آهن ۽ اهڙن واقعن ۾ هيستائين پاڪستان پنهنجي فورسز جون ڪيتريون ئي قيمتي جانيون وڃائي چڪو آهي. گذريل مهيني لعل شهباز قلندر جي مزار تي سئو جي لڳ ڀڳ قيمتي جانيون ڳڙڪائيندڙ ۽ ڪئين معصوم ماڻهن کي سڄي ڄمار لاءِ معذور ڪندڙ دهشتگردن جي حملي بعد پاڪستاني حڪومت افغان سرحد کي هر قسم جي آمد رفت لاءِ بند ڪري ڇڏيو، جڏهن ته سيڪيورٽي ۽ چيڪنگ جي نظام کي به اڳ کان وڌيڪ سخت ڪيو آهي، پاڪستان جي اهڙي سخت فيصلي سان اڄ نه صرف افغانستان پر ان سان لڳندڙ پاڪستاني علائقن ۾ ماڻهن جي اچ وڃ بند ٿيڻ ڪري ٻنهي ملڪن جو عوام پريشانين ۽ مشڪلاتن کي منهن ڏئي رهيو آهي، گڏوگڏ پاڪ افغان سرحد وٽان ٿيندڙ هر قسم جو ڪاروبار ۽ واپار به بند آهي، جنهن سبب اربين رپين جو نقصان ٿي رهيو آهي، نتيجي ۾ افغان حڪومت پاڻ اهو اعتراف ڪري رهي آهي ته سرحد بند ٿيڻ ڪري افغانستان جو واپار ۽ ڪاروبار ٺپ ٿي ويو آهي، جنهن ڪري ان کي وڏو معاشي نقصان پهچي رهيو آهي.افغانستان جي سرحد وٽان پاڪستاني چيڪ پوسٽ تي دهشتگردن جي حملن ۾ پاڪ فوج جا پنج جوان شهيد ٿي ويا آهن، جن ۾ ٻه نائيڪ ۽ ٽي سپاهي شامل آهن. آءِ ايس پي آر جي جاري ڪيل رپورٽ موجب مهمند ايجنسي ۾ افغان علائقي مان دهشتگردن پاڪستاني فورسز جي چيڪ پوسٽ تي اوچتو حملا ڪري ڏنا، جنهن جو ڀرپور جواب ڏئي دهشتگردن جي وڌيڪ ڪارروائين کي ناڪام بڻايو ويو، جڏهن ته جوابي ڪارروائي ۾ ڏهه جي لڳ ڀڳ دهشتگرد به ماريا ويا. ٻئي طرف اهڙي واقعي تي افغان سفير کي پرڏيهي آفيس ۾ طلب ڪري سخت احتجاج ڪيو ويو آهي ۽ کيس هڪ احتجاجي خط به ڏنو ويو آهي، جنهن ۾ پاڪستان مطالبو ڪيو آهي ته افغانستان پنهنجي سرحدي علائقن ۾ موجود دهشتگردن جي خلاف ڪارروائي ڪري ۽ پنهنجي سيڪيورٽي نظام کي بهتر ۽ مضبوط بڻائي. جڏهن ته آرمي چيف جنرل قمر جاويد باجوه پڻ ان واقعي جي مذمت ڪندي چيو آهي ته دهشتگرد پاڪستان ۽ افغانستان جا گڏيل دشمن آهن، ان ڪري پاڪ افغان سرحد تي دهشتگردن جي اچ وڃ روڪڻ لاءِ گڏيل قدم ضروري آهن.ان حقيقت کان قطعي انڪار نٿو ڪري سگهجي ته افغانستان جي سرزمين تي ڪيئي غيرملڪي ايجنسيون، خاص ڪري ڀارت ۽ سندس ڳٺ جوڙ ۾ شامل عنصر پاڪستان کي هر لحاظ کان نقصان پهچائڻ لاءِ منصوبابندي جوڙيندا رهيا آهن. پشاور جي آرمي پبلڪ اسڪول تي 16 ڊسمبر تي ڪيل وحشياڻي ڪارروائي هجي يا چارسده يونيورسٽي تي دهشتگردن جو حملو يا وري رتوڇاڻ جا اهڙا ٻيا واقعا، انهن مان نوي سيڪڙو ڪارروائين جا پيرا افغانستان طرف ئي ويا آهن ۽ تازو پاڪستاني چيڪ پوسٽن تي ڪيل حملا به انهن دهشتگرد عنصرن جي منصوبابندين جي هڪ ڪڙي آهي.اسين سمجهون ٿا ته خطي ۾ موجود سڀئي ملڪ ان وقت تائين محفوظ نٿا ٿي سگهن، جيستائين انهن ملڪن جي زمين هڪٻئي خلاف استعمال ٿيندي رهندي، گڏوگڏ دهشتگردن جي مالياتي توڙي کين عسڪري سکيا فراهم ڪرڻ سميت جيڪا به سندن سپورٽ ٿي رهي آهي، انهن حرڪتن کي به ٻنجو ڏيڻو پوندو، ٻي صورت ۾ خطي جو ڪوبه ملڪ اڪيلي سر محفوظ نٿو ٿي سگهي.