تازيون خبرون

Daily Archives: March 7, 2017

مهمند ايجنسي ۾ دهشتگرد حملو، 5 فوجي جوان شهيد، 10 دهشتگرد مارجي ويا

اسلام آباد/  مهمند ايجنسي (ويب ڊيسڪ) مهمند ايجنسيءَ ۾ گذريل رات دهشتگردن سرحد پار کان پاڪستاني پوسٽ تي حملو ڪيو، حملي جي نتيجي ۾ 5 جوان شهيد ۽ 10 دهشتگرد مارجي ويا، آءِ ايس پي آر موجب مهمند ايجنسيءَ ۾ گذريل رات دهشتگردن سان مقابلي ۾ نائيڪ ثناءُ الله، نائيڪ صفدر، سپاهي الطاف، سپاهي نيڪ محمد، سپاهي انور شهيد ٿي ويا، جڏهن ته پاڪ فوج جي جوابي ڪارروائيءَ ۾ دهشتگرد مارجي ويا، آرمي چيف جنرل قمر جاويد باجوا ان موقعي تي جوانن جي اثرائتي ڪارروائيءَ کي ساراهيندي چيو ته دهشتگرد گڏيل خطرو آهن ۽ سرحد تي سندن آزاداڻي چرپر روڪڻ ضروري آهي، آرمي چيف چيو ته سرحدي سلامتي ۽ اثرائتي ڪارروائي جي لاءِ جوانن جي سرحد تي موجودگي ضروري آهي، جنرل قمر جاويد باجوا سرحد تي قيمتي انساني جانين جي نقصان تي افسوس جو اظهار ڪيو ۽ وطن جي دفاع جي لاءِ جوانن جي قربانين جي واکاڻ ڪئي، جنرل قمر باجوا افغان سرحد تي جوانن جي موجودگيءَ جي ضرورت تي زور پڻ ڏنو.36 پرڏيهي آفيس پاڪستاني چيڪ پوسٽن تي دهشتگردن جي سرحد پار حملي جي سخت مذمت ڪندي شهيد ٿيندڙ بهادر فوجي جوانن جي پيٽا پيش ڪئي آهي، سومر جي ڏينهن پرڏيهي آفيس پاران جاري بيان ۾ مهمند ايجنسيءَ ۾ افغانستان کان دهشتگردن جي حملي جي سخت لفظن ۾ مذمت ڪئي وئي، پرڏيهي کاتي دهشتگردن جي ناپاڪ ارادن کي خاڪ ۾ ملائيندي شهادت ماڻيندڙ جوانن کي زبردست ڀيٽا پيش ڪندي چيو ته اسان جي بهادر فوجي جوانن وطن جي دفاع جي لاءِ جان قربان ڪئي، شهيدن جي قربانين کي سدائين ياد رکيو ويندو.  افغان سرزمين تان پاڪستاني چيڪ پوسٽ تي دهشتگردن جي حملي ۽ پاڪ فوج جي جوانن جي شهادت تي پرڏيهي آفيس افغان نائب سفير عبدالناصر کي طلب ڪري سخت احتجاج ڪيو آهي، پاڪستاني پرڏيهي کاتي جي آفيس افغانستان مان ٿيندڙ دهشتگرد حملي ۽ پاڪ فوج جي پنجن اهلڪارن جي شهادت تي افغان نائب سفير عبدالناصر کي طلب ڪري سخت احتجاج رڪارڊ ڪرايو، پرڏيهي آفيس پاڪستان ۾ مقرر افغان نائب سفير عبدالناصر احتجاجي خط حوالي ڪندي چيو ته افغان حڪومت واقعي جي مڪمل جاچ ڪرائي نتيجن کان فوري طور پاڪستان کي آگاهه ڪري.36

 

پيپلز پارتي جو فوجي عدالتن جي معاملي کي پارليامينٽ ۾ کڻي وڃڻ جو اعلان

اسلام آباد (ويب ڊيسڪ): پيپلز پارٽي فوجي عدالتن جي معاملي کي پارليامينٽ ۾ کڻي وڃڻ جو اعلان ڪري ڇڏيو آهي، پيپلز پارٽي جي شريڪ چيئرمين ۽ اڳوڻي صدر آصف علي زرداري چيو آهي ته پيپلز پارٽي فوجي عدالتن ۾ هڪ سال واڌ جي تجويز ڏني آهي ۽ ان معاملي کي پارليامينٽ ۾ کڻي وينداسين، فوج هجي يا حڪومت اسان جا دروازا ڳالهين لاءِ هميشه کليل آهن، پريس ڪانفرنس ڪندي آصف علي زرداري چيو ته فوجي عدالتن جا مخالف ناهيون، اسان فوج سان گڏ آهيون، پاڪستان، قوم ۽ فوج اسان سڀ هڪ آهيون، حڪومت کي 9 نڪاتي تجويزون پيش ڪيون وينديون، آئين جو حصو قانون شهادت به لاڳو ٿيندو، ڏوهاري کي پسند جو وڪيل ڪرڻ جو حق به هوندو، 24 ڪلاڪن ۾ جوابدار کي رمانڊ جي لاءِ پيش ڪيو ويندو، هڪ سوال جي جواب ۾ آصف زرداري جو چوڻ هو ته سنڌ لاءِ رينجرز جو قانون ٻين صوبن کان مختلف آهي، قانون اهڙو هجڻ گهرجي، جنهن ۾ دهشتگردي جي به تشريح هجڻ گهرجي، پيپلز پارٽي دهشتگردن جي خلاف جنگ وڙهي رهي آهي ۽ وڙهندي رهندي ۽ اهو به باور ڪرائڻ چاهيون ٿا ته اسان غير سياسي قوتن خلاف گڏجي هلڻ لاءِ تيار آهيون، هن چيو ته سنڌ ۽ پنجاب لاءِ رينجرز جي نوٽيفڪيسن ۾ فرق آهي، سنڌ ۾ رينجرز جا اختيار ٻئي صوبي کان مختلف آهن، دهشتگردي جي لاءِ جٽ بليڪ جو اصطلاح هيو پر جٽ بليڪ ۾ اچي ويو ڊاڪٽر عاصم، اسان پهرين به ضمانتي بڻجي دوستن کان قانون منظور ڪرايا، حڪومت جي ناڪامي آهي، لاهور ۾ ملتان روڊ سال ۾ 3 دفعاڀڄي پوندو آهي، جڏهن ته حڪومت کي پرواهه ناهي ته پوءِ اسان کي ڇا، پاڪستان جي مستقبل جي لاءِ نيشنل ايڪشن پلان جي لاءِ حڪومت وٽ پئسا ناهن، اهڙي حڪومت ناهي ڏٺي جنهن ۾ پرڏيهي وزير نه هجي، نان اسٽيڪٽ ايڪٽر ملڪ جي لاءِ نقصان آهن، اسان انهن سان وڙهڻ لاءِ تيار آهيون، اڳوڻي صدر آصف زرداري چيو ته نيشنل ايڪشن پلان ناڪام ٿيو آهي ته دوستن جي مدد سان ان کي مضبوط بڻائڻو آهي، حڪومت وٽ روڊ ڊاهي ٺاهڻ لاءِ پئسا آهن پر نيشنل ايڪشن پلان لاءِ ناهن، اسان جي دور ۾ سوات آپريشن ٿيو، هڪ ملين آئي ڊي پيز کي واپس اماڻيو ويو، ڪراچي اڄ هڪ سڀ کان وڏو پختون شهر آهي، اسان جو ڪم فوج جي دل شڪني ڪرڻ نه دهشتگردن سان مقابلو ڪرڻ آهي.

 

ايم ڊي واٽر بورڊ کي هٽائڻ جو حڪم، سڀ سيڪريٽري نلڪن جو پاڻي پيئن: سپريم ڪورٽ

ڪراچي (اين اين آءِ) سپريم ڪورٽ ايم ڊي ڪراچي واٽر اينڊ سيوريج بورڊ مصباح الدين فريد کي جلد عهدي تان هٽائڻ جو حڪم ڏيندي چيف سيڪريٽري کي هدايت ڪئي ته ايم ڊي واٽر بورڊ ڪيڊر ڪوسٽ آهي ڪنهن ڪيڊر آفيسر کي ايم ڊي ڪراچي واٽر بورڊ مقرر ڪيو وڃي ٻڌڻي دوران جسٽس قاضي فائز عيسيٰ ريمارڪس ڏنا ته شرم جهڙي ڳالهه آهي ته نيوڪليئر پاور آهي ۽ آلوده پاڻي صاف ڪرڻ جو حل نٿا ڪڍي سگهو جسٽس امير حاني مسلم چيو ته سنڌ جا ماڻهو منڇر ڍنڍ جو زهريلو پاڻي واپرائي مري رهيا آهن تفصيل موجب سومر تي سپريم ڪورٽ ڪراچي رجسٽري ۾ آلوده پاڻي تي پاڻمرادو نوٽيس ڪيس جي ٻڌڻي ٿي واٽر ڪميشن سپريم ڪورٽ رجسٽري ۾ رپورٽ جمع ڪرائي ڇڏي سپريم ڪورٽ رجسٽري ۾ پيش ڪيل واٽر ڪميشن رپورٽ ۾ حقيقتون بي نقاب ٿيون آهن رپورٽ ۾ ڪراچي حيدرآباد ڪوٽڙي بدين ٺٽو لاڙڪاڻو شڪارپور سکر جيڪب آباد ۽ عمرڪوٽ ۾ 85 سيڪڙو آبادي کي گندو ۽ صحت کي خراب ڪندڙ پاڻي جنهن سبب ماڻهو اڪثر مرضن جو شڪار آهن. آبادگاري ۾ به گندو پاڻي استعمال ڪيو پيو وڃي ڪميشن رپورٽ موجب ڪراچي ۽ لاڙڪاڻو 80 سيڪڙو، شڪارپور 88 سکر 82 ۽ حيدرآباد ۾ 85 سيڪڙو پاڻي استعمال جوڳو نه آهي رائس ڪئنال ديهه ڳڙهي ايريگيشن ۽ انڊس ڪئنال ۾ گندو پاڻي شامل ڪيو پيو وڃي ڪراچي ۽ حيدرآباد ۾ سيوريج جڏهن ته جيڪب آباد ۽ ٺٽي ۾ واٽر پلانٽس موجود ئي نه آهن ڪوٽڙي بدين مٺي عمر ڪوٽ ۽ ميرپورخاص ۾ واٽر ٽريٽمينٽ پلانٽس ناڪاره ٿي ويا آهن محمود آباد ۾ واٽر ٽريٽمينٽ پلانٽ جي سوا ايڪڙ ايراضي تي قبضو ۽ غيرقانوني ليز ڏني ويئي آهي شهر جو گندو پاڻي سمنڊ ۾ ڇڏڻ سان آبي حيات مينگروز ۽ ٻين کي خطرا آهن رپورٽ ۾ انڪشاف ڪيو ويو آهي ته آر او پلانٽس جي تنصيب ۾ اربين رپين جو فراڊ ڪيو ويو سڄي صوبي ۾ 700 کان وڌيڪ پلانٽس جي تنصيب ڪئي ويئي ۽ ان کان پوءِ ان جو معيار ۽ ڪارڪردگي تجزيو ڪرڻ کان سواءِ اربين رپين جون ادائيگيون ڪيون ويون لاڙڪاڻي جي 70 لک آبادي آهي رائس ڪئنال ۾ 18 هنڌن تي گندو پاڻي وڌو پيو وڃي جڏهن ته گندي پاڻي لاڙڻي مان جوهي تائين پوکائي ۽ پيئڻ لاءِ استعمال ڪيو پيو وڃي لاڙڪاڻو 88 سيڪڙو جڏهن ته شڪارپور جو 79 سيڪڙو زيرزمين پاڻي پيئڻ جي لائق نه آهي رپورٽ ۾ چيو ويو ته ڪوٽڙي ۾ نسب ڪيل واٽر ٽريٽمينٽ پلانٽ بند ٿي چڪو آهي ڪوٽڙي جو گندو پاڻي ڪي بي فيڊر ۾ وڌو پيو وڃي اهو پاڻي ڪراچي کي فراهم ڪيو پيو وڃي. جسٽس امير حاني مسلم ريمارڪس ڏنا ته هڪ ماڻهو جي زندگي بچائڻ لاءِ 100 ماڻهن جي خلاف ڪيس داخل ڪرائيندا جيڪڏهن هڪ شخص جي زندگي کي به بچائڻ لاءِ اسان کي ڪنهن جي خلاف قانوني ڪارروائي ڪرڻي پئي ته ضرور ڪنداسين سپريم ڪورٽ ايم ڊي واٽر بورڊ مصباح فريد کي فوري طور تي عهدي تان هٽائڻ جو حڪم جاري ڪري ڇڏيو.

 

ڪراچي دهشتگردن جي نشاني تي آهي: مراد علي شاهه

ڪراچي (اين اين آءِ) سنڌ جي وڏي وزير سيد مرادعلي شاهه چيو اهي ته سيوهڻ شريف واقعي کان پوءِ سنڌ حڪومت دستياب وسيلن ۾ ڀرپور امدادي ڪارروايون ڪيون آهن ڪجهه ماڻهن ڏک جي ان گهڙين ۾ اسان جو ساٿ ڏيڻ بدران اسان تي تنقيد ڪئي الله انهن کي هدايت ڏي آپگهاتي بمبار جو تعلق سنڌ سان نه هو اسان جاچ ڪري رهيا آهيون ته آپگهاتي بمبار جي سڃاڻپ به ڪنداسين ۽ ان جي سهولتڪارن ڏانهن به پهچنداسين اسان وفاقي حڪومت کي درخواست ڪئي آهي ته ڪجهه مذهبي تنظيمن کي واچ لسٽ ۾ وڌو وڃي ڇو ته انهن جا دهشتگردن سان سڌا رابطا آهن درگاهن جي سيڪيورٽي جا قدم کنيا آهن ڪراچي دهشتگردن جي نشاني تي آهي سنڌ حڪومت دهشتگردن خلاف وڙهڻ ۽ انهن جي خاتمي جو ارادو ڪري ڇڏيو آهي سياستدانن جي لاءِ وڙهڻ ۽ ٻيا وڏا معاملا آهن دهشتگردي جي خلاف اسان سڀني کي گڏ ٿيڻو پوندو دهشتگردي خلاف جنگ هڪ قومي ڪاز آهي هو سومر تي سنڌ اسيمبلي ۾ سيوهڻ شريف واقعي تي پاليسي بيان ڏيئي رهيو هو وڏي وزير چيو ته سيوهڻ ۾ آپگهاتي ڌماڪي جي ڪجهه منٽن کان پوءِ اسپتال ۾ ايمبولنس گاڏيون موجود هيون جڏهن ته مان اتي رات جو ساڍي 12 وڳي پهتس ته سيوهڻ اسپتال ۾ 25 ايمبولنس گاڏيون موجود هيون ۽ اتي 40 مريض هئا ان اسپتال ۾ ڪوبه وڏو آپريشن نه ٿي سگهيو ان لاءِ وڌيڪ سخت زخمين کي نوابشاهه ڄامشورو ۽ دادو جي اسپتالن ۾ موڪليو ويو وڌيڪ شهرن ۽ ضلعن مان به ايمبولنس گاڏيون ۽ ڊاڪٽر سيوهڻ پهتا هئا نوابشاهه جي ڊپٽي ڪمشنر ايمبولنس گاڏيون ۽ ڊاڪٽر کڻي اتي پهتو هو آرمي چيف ۽ نيول چيف مون سان رابطو ڪيو آرمي ۽ نيوي به اسان جي مدد ڪئي هن چيو ته ماڻهن اسان تي تنقيد ڪئي الله انهن کي هدايت ڏي هو تنقيد ڪندا رهن اسان پنهنجو ڪم ڪندا رهنداسين وڏي وزير چيو ته سيوهڻ بم ڌمامي ۾ 81 ڄڻا شهيد ٿيا ۽ 383 زخمي ٿيا شهيدن ۾ 46 مرد ۽ 10 عورتون ۽ 15 سالن کان گهٽ عمر جا 25 ٻارڙا شامل آهن 81 شهيدن مان 78 جي سڃاڻپ ڪئي ويئي آهي ٽن جي سڃاڻپ نه ٿي سگهي آهي ٻه لاش ايڌي سردخاني ۾ رکيا ويا آهن 383 زخمين مان هن وقت صرف 10 زخمي علاج هيٺ آهن باقي اسپتالن مان ڊسچارج ٿي چڪا آهن سنڌ جي وڏي وزير چيو ته حضرت لال شهباز قلندر جي مزار جي بجلي جو بل ادا ڪيو ويو هو ان باوجود به بجلي ڪٽي ويئي هئي. ڌمال جي وقت شام 6 کان رات 8 وڳي تائين لوڊشيڊنگ ڪئي ويندي هئي سنڌ جي وڏي وزير چيو ته پ پ پ جي دور ۾ راجا پرويز اشرف درگاهه جي لاءِ هڪ بجلي جي الڳ لائين ڏني هئي جنهن ۾ لوڊشيڊنگ نه ڪئي ويندي هئي اها لائين ڪٽي ويئي هئي ۽ اتي بهانو بڻايو ويو هو ته بجلي چوري ٿي رهي آهي چوري روڪڻ بدران سڄي لائين ڪٽي ويئي هن چيو ته اسان موجوده وسيلن ۾ ڀرپور امدادي ڪارروايون ڪيون واقعي ۾ 500 ڄڻا متاثر ٿيا ظاهر آهي ته سيوهڻ ۾ 500 ايمبولنس گاڏيون موجود نه هيون تعلقي اسپتال ڪم ڪري رهي هئي ماڻهن اتي پنهنجي گاڏين ۾ زخمين کي اسپتال پهچايو سيوهڻ اسپتال جي ايم ايس زبردست ڪم ڪيو سيوهڻ ۾ رت ڏيڻ لاءِ ماڻهن جون قطارون لڳل هيون مان سيوهڻ جي ماڻهن کي سلام پيش ڪيان ٿو آرمي چيف نيول چيف ۽ ايئرفورس چيف سان گڏوگڏ ڪورڪمانڊڙ ڪراچي ۽ ڊي جي رينجرز به مون سان رابطو ڪيو ۽ مدد به ڪئي مان انهن جو ٿورائتو آهيان مان رات جو نيوي جي هيليڪاپٽر ۾ سيوهڻ پهتس جڏهن مان اتي پهتس ته آءِ جي پوليس ۽ ايڊيشنل آءِ جي سي ٽي ڊي مون سان گڏ هئا ريسڪيو جو ڪم سٺي طريقي سان ٿيو مان سيوهڻ پهچندي ئي اسپتال ويس ۽ پوءِ درگاهه تي حاضري ڀري مان اتي امن وارو اجلاس منعقد ڪيو ان کان پوءِ نوابساهه ويس ۽ زخمين سان مليس هن چيو ته مان اهو مڃان ٿو ته درگاهه تي نفري گهٽ هئي شاهه نوراني ۾ پهرين دهشتگردي جو واقعو ٿي چڪو هو اسان کي وڌيڪ تيار ڪرڻ گهرجي ها هن چيو ته سيوهڻ مان ڪوبه وي وي آءِ پي پوليس جي هڪ گاڏي پاڻ سان کڻي نه ويس. هن چيو ته اسان درگاهن جي سيڪيورٽي لاءِ پاليسي جوڙي آهي ڇو ته دهشتگرد اتي حملو ڪرڻ چاهين ٿا جتي وڌيڪ نقصان ٿئي هن چيو ته ڪراچي ۾ خطرا آهن ۽ ڪراچي دهشتگردن جي نشاني تي آهي اسان اڄ ئي وڏا هٿيار ۽ بارود پڪڙيو آهي هڪ دهشتگرد پوليس جي مقابلي ۾ مارجي ويو ۽ ڪجهه گرفتار ڪيا ويا آهن هن چيو ته بجلي جي لوڊشيڊنگ سبب درگاهه تي لڳل سي سي ٽي وي ڪئمرا جي فوٽيج بليڪ اينڊ وائيٽ ٿي ويئي هئي ڇو ته ان وقت اتي جنريٽر هلي رهيا هئا ان فوٽيج جي مدد سان به اسان آپگهاتي بمبار جي سڃاڻپ ڪنداسين آپگهات جو ڊي اين اي ٽيسٽ لاءِ موڪليو ويو آهي هن چيو ته سنڌ ۾ ڪجهه مذهبي دهشتگرد موجود آهن خاص طور تي ٻين صوبن سان مليل آهن سرحدي ضلعا خاص طور تي ڪشمور جيڪب آباد ۽ گهوٽڪي ۾ انهن جون سرگرميون ڏٺيون ويون آهن حڪومت بلوچستان سان گڏجي ٻنهي صوبن جي سرحدي علائقن کي مانيٽر ڪيو پيو وڃي هن چيو ته وفاقي گهرو وزير پنهنجي پريس ڪانفرنس ۾ مون ليڪچر ڏي ته مان ان کي اهو چوان ته الله ان کي هدايت ڏي هو صرف سنڌ ۾ هڪ ڀيرو آيو ان کان بعد به هن اسان تي تنقيد ڪئي هن چيو ته سيوهڻ جو واقعو صرف سنڌ تي نه پر سڄي انسانيت جي حملو آهي جيڪي ماڻهو شهيد ٿيا هئا انهن جي جنازي نماز مزار جي اڱڻ ۾ ئي ٿي هئي. اسان ٻئي ڏينهن اتي ڌمال به ڪرائي ٽن ڏينهن ۾ اسان مزار عوام لاءِ کولي ڇڏي هن چيو ته سنڌ حڪومت پڪو پهه ڪيو آهي ته دهشتگردي جي خلاف ويڙهه جاري رهندي ڪجهه مذهبي تنظيمن جي نشاندهي به ڪئي ويئي اهي جنهن جا دهشتگردن سان رابطا آهن. اسان سياستدانن جي لاءِ وڙهڻ لاءِ ٻيا ڪيترائي معاملا آهن پر دهشتگردي جي خلاف اسان سڀني کي گڏ ٿيڻ گهرجي. هن چيو ته سيوهڻ واقعي ۾ مسلمانن سان گڏوگڏ غير مسلم به مارجي ويا آهن اهو انتهائي افسوسناڪ واقعو آهي هونئن ته سڄي سنڌ ۾ هر واقعي جي ذميواري منهنجي آهي پر سيوهڻ نه صرف منهنجو تڪ آهي پر منهنجو گهر به آهي هن چيو ته آپگهاتي بمبار جو تعلقي سنڌ سان نه آهي هن چيو ته ڏک وارين انهن گهڙين ۾ اسان جو ساٿ ڏيڻ بدران ڪجهه ماڻهو اسان تي تنقيد ڪئي ان تي به ڏک ٿيو.

 

نوي جي ڏهاڪي جا ترقياتي ڪم جاري رهن ها ته اڄ پاڪستان ايشين ٽائيگر هجي ها: نواز شريف

اسلام آباد (ويب ڊيسڪ): وزيراعظم نواز شريف ڪويت ۾ پاڪستاني ڪميونٽي کي خطاب ڪندي چيو آهي ته پهرين دور ۾ پاڪستان کي ڪيتريون ئي ترقيءَ جون راهون ڏيکاريون، هن چيو ته پاڪستانين کي درپيش مسئلن تي ڪويت جي امير سان ڳالهيون ڪنداسين، هن چيو ته دهشتگردي سبب ملڪ جي ترقي رڪجڻ سان دهشتگردي وڌي. مون 7 سال جلاوطني ڪاٽي، سببن جو اڄ به پتو ناهي، جيڪو سڀ کان وڌيڪ ڀڄ ڊڪ ڪندو آهي، ڪاميابي ان جو حق آهي، نوي جي ڏهاڪي جا ترقياتي ڪم جاري رهن ها ته اڄ پاڪستان ايشين ٽائيگر هجي ها، وزيراعظم نواز شريف چيو ته پي ايس ايل ڪامياب طريقي ڪرائڻ ۾ ڪرڪيٽ جي فتح آهي، پاڪستان ۾ توانائي جا منصوبا تيزي سان مڪمل ٿي رهيا آهن، هن چيو ته دهشتگردي سبب ملڪ جي ترقي رڪجڻ سبب بيروزگاري وڌي، آمراڻي دور ۾ ملڪي حالتون ڏسي ڏاڍو ڏک ٿيندو هو، بجلي جي لوڊشيڊنگ تي ٿيندڙ هنگاما ختم ٿي ويا آهن، اڄ ملڪ ۾ ايل اين جي سان بجلي جا ڪارخانا لڳائي رهيا آهيون، هن چيو ته مصوبن جي تيز رفتاري خان مڪمل ٿيڻ جو چيني دوست به اعتراف ڪري رهيا آهن، 2018 کان ملڪ ۾ سستي بجلي فراهم ڪئي ويندي. نواز شريف چيو ته پاڪستان عراق سان جنگ ۾ ڪويت جي گهڻي مدد ڪئي، ڪويت جو ساٿ ڏيڻ تي ڪيترين سياسي جماعتن مخالفت ڪئي.

 

عمران خان پي ايس ايل جي فائنل ۾ ڪامينٽري ڪري ها: مريم اورنگزيب

اسلام آباد (اين اين آءِ) سڌسماءَ واري مملڪتي وزير مريم اورنگزيب چيو آهي ته سياسي دٻاءُ جي باوجود ملڪ ۾ آدمشماري ڪرائڻ لاءِ پرعزم آهيون پي ايس ايل جي فائينل جي انعقاد سان پاڪستان ۾ ڪرڪيٽ ٻيهر موٽي آئي آهي وزيراعظم نوازشريف پاڪستان ۾ صرف پاڪستان جي ماڻهن لاءِ ڪم ڪري رهيو آهي ان جو ايجنڊا صرف عوام جي خوشحالي آهي عمران خان ڪرڪيٽ جو اسٽار آهي ان کي اچڻ گهرجي ها ان مئچ لاءِ ان کي اهڙي ئي ڪمينٽري ڪرڻ گهرجي ها جهڙي آءِ پي ايل جي لاءِ انڊيا ۾ ڪئي هئي مهمد ايجنسي ۾ سرحد پار کان پاڪستاني پوسٽن تي حملو مذمت جوڳو آهي پاڪ فوج ملڪ جي بچاءُ لاءِ بي مثال قربانيون ڏنيون آهن شهيدن جون قربانيون رائيگان نه وينديون ميڊيا سان ڳالهائيندي مريم اورنگزيب چيو ته وزيراعظم نوازشريف پاڪستان ۾ صرف پاڪستان جي ماڻهن لاءِ ڪم ڪري رهيو آهي. اڄ جو پاڪستان دهشتگردي جي خوف مان پاڪ اقتصادي طور تي ترقي يافته لوڊشيڊنگ جي اونداهين مان پاڪ ۽ اڳتي وڌندڙ پاڪستان آهي جنهن جو وزيراعظم 2013 ۾ قوم سان واعدو ڪيو هو هن چيو ته نوازشريف جي پاڪستان ۾ هاڻي راندين جو ميدان آباد ٿيو آهي هن چيو ته ميڊيا گذريل ڏينهن جهڙي طرح پرامن ۽ خوف کان پاڪ پاڪستان جي پيغام کي عام ڪيو ان تي پوري قوم ميڊيا کي مبارڪباد ڏي ٿي. هن چيو ته اها هڪ مئچ نه پر هڪ تاريخ ٺهي آهي ملڪ ۾ ڪرڪيٽ ٻيهر بحال ٿي چڪي آهي ۽ آئينده به مئچون ٿينديون. هن چيو ته پاڪ فوج ملڪ جي لاءِ وڏيون قربانيون ڏينديون شهيدن جون قربانيون رائيگان نه وينديون اسان شهيدن جي وارثن سان انهن جي ڏک ۾ برابر جا شريڪ آهيون.

 

دهشتگردي جي ردعمل ۾ پختونن کي هدف بڻائڻ وارو تاثر غلط آهي: خواجا آصف

اسلام آباد (ويب ڊيسڪ): بچاءَ واري وفاقي وزير خواجا آصف چيو آهي ته ڪنهن قسم جو نسلي تعصب نه ٿيندو، دهشتگردي هڪ صوبي تائين محدود ناهي، هن چيو ته دهشتگردي جي ردعمل ۾ پختونن کي هدف بڻائڻ وارو تاثر غلط آهي، دهشتگردن جو ڪو مذهب ناهي، ڪو فرقو يا نسل ڪونهي، هن چيو ته معاملي کي بنا سبب اٿارڻ قومي وحدت متاثر ڪرڻ برابر آهي، منهنجي تڪ ۾ پختونن سان افغان مهاجر به رهندا آهن، چار ڏهاڪن کان افغان مهاجرن جي ميزباني ڪئي، ٽيون نسل هتي آهي، نٿا چاهيون ته اسان جي مهمان نوازي تي حرف اچي ۽ زيان وڃي، خواجا آصف چيو ته سمورا افواهه آهن، ڪنهن به پختون کي ٽارگيٽ نه پيو ڪيو وڃي، پختون اڳواڻ ملي ڪري مسئلي جي حل ۾ ڪردار ادا ڪن.

 

آرمي چيف جي قطري بچاءَ واري وزير ۽ هم منصب سان ملاقات، گڏيل دلچسپي معاملن تي ڳالهيون

راولپنڊي (ويب ڊيسڪ): آرمي چيف جنرل قمر جاويد باجوه قطري دفاع واري وزير ۽ هم منصب سان ملاقات ڪئي آهي، ملاقات دوران گڏيل دلچسپي جي معاملن تي خيالن جي ڏي وٺ ڪئي وئي، آءِ ايس پي آر موجب آرمي چيف قمر جاويد باجوه قطر جو دورو ڪيو آهي، جنهن دوران هن قطري دفاع واري وزير ڊاڪٽر خالد بن محمد العطيه سان ملاقات ڪئي، آءِ ايس پي آر موجب ملاقات دوران قطري دفاع واري وزير پاڪ فوج جي پيشيوراڻين صلاحيتن کي ساراهيو ۽ پاڪستان سان دفاعي سهڪار وڌائڻ جي خواهش جو اظهار ڪيو. ان کان علاوه آرمي چيف قطري هٿياربند فوجن جي سربراهه سان به ملاقات ڪئي، جنهن ۾ علائقائي سلامتي صورتحال ۽ گڏيل دلچسپي جي معاملن تي خيالن جي ڏي وٺ ڪئي وئي، آءِ ايس پي آر موجب هٿياربندن فوجن جي سربراهه خطي جي امن ۾ پاڪ فوج جي ڪردار کي ساراهيو.

 

خواجا آصف وڏا انڪشاف ڪيا آهن، ان ڪيمره بريفنگ ڏني وڃي: خورشيد شاهه

اسلام آباد (ويب ڊيسڪ): قومي اسيمبلي ۾ مخالف ڌر اڳواڻ سيد خورشيد شاهه پارليامينٽ جو گڏيل اجلاس گهرائڻ جو مطالبو ڪري ڇڏيو آهي، مخالف ڌر اڳواڻ سيد خورشيد شاهه چيو ته بچاءَ واري وزير اڄ انڪشاف ڪيا آهن، بچاءَ واري وزير جي بيان تي ان ڪيمرا بريفنگ ڏني وڃي، هن چيو ته نشاندهي ڪرڻي پوندي، ڪير دهشتگرد آهي ۽ ڪير دهشتگردن جو سهولتڪار آهي، سيد خورشيد شاهه چيو ته ملڪ حالت جنگ ۾ آهي، ان ڪيمره بريفنگ ڏني وڃي، پرامن پاڪستان اسان سڀني جو خواب آهي، ان ۾ ڪو شڪ ناهي ته ڀارت اسان جو ازلي دشمن آهي، ڪشمير جو مسئلو حل ٿيڻ تائين حالتون ايئن ئي رهنديون.

 

خواجا آصف وڏا انڪشاف ڪيا آهن، ان ڪيمره بريفنگ ڏني وڃي: خورشيد شاهه