تازيون خبرون

Daily Archives: December 27, 2016

اسان جي دشمني پاڪستان دشمنن سان آهي، دشمن کان بلوچستان جي ترقي هضم نه پئي ٿئي: آرمي چيف

ڪوئيٽا (اين اين آءِ) آمريڪي چيف قمر جاويد باجوا چيو آهي ته بلوچستان جي ترقي پاڪستان جي ترقي آهي سي پيڪ جي وقت سر مڪمل ٿيڻ خطي کي ترقي جي نئين دور ۾ داخل ڪندي بلوچ عوام ملڪ جي دشمنن کي رد ڪري چڪا آهن اڻڄائي ۾ دشمن جي چوڻ تي ايندڙ ڀائرن جي لاءِ اسان جا دروازا هر وقت کليل آهن منهنجو تعلق بلوچ ريجمينٽ سان آهي پاڻ کي بلوچي چورائڻ تي فخر ٿئي ٿو پاڪ فوج قومي يڪجهتي جي مظهر آهي بلوچستان جا نوجوان ملڪ جي بچاءُ ۾ ڪنهن کان به پوئتي نه آهي ڪوئيٽا ۾ بلوچستان ريڪروٽس جي پاسنگ آئوٽ تقريب کي خطاب ڪندي آرمي چيف چيو ته اسان جي دشمني پاڪستان جي دشمنن سان آهي بلوچستان جي ترقي پاڪستان جي ترقي آهي ان لاءِ دشمن بلوچستان جي ترقي ۽ روشن مستقبل ۾ رڪاوٽ وجهي رهيا آهن ۽ صوبي ۾ بدامني ڦهلائي رهيا آهن هن چيو ته بلوچستان پاڪستان جو وڏو ۽ اهم صوبو آهي ۽ الله تعاليٰ صوبي کي بيپناهه وسيلا ۽ خطي جي عوام کي بيپناهه صلاحيتن سان نوازيو آهي هن چيو ته بلوچ عوام دشمن جي چالن کي سمجهي ويئي آهي ۽ ملڪ دشمن ماڻهن کي رد ڪري چڪي آهي. هن چيو ته بلوچستان ۾ نفرت وجهندڙ ڪجهه ماڻهو جلد ختم ٿي ويندا. ان کان پوءِ آرمي چيف پاڪسنگ آئوٽ پريڊ جو معائنو ڪيو جنهن ۾ اعليٰ فوجي اختيارين شرڪت ڪئي آرمي چيف جي اعزازي لٺ ريڪروٽ عرفان علي کي ڏني ويئي جڏهن ته ڪمانڊر سدرن ڪمانڊ جو تلائي تمغو ريڪروٽ لياقت علي کي ڏنو ويو.

 

انتقامي ڪاررواين جو جواب ڏيڻ جو اعلان، حڪومت کي انجام ڀوڳڻو پوندو: پيپلز پارٽي

ڪراچي(اسٽاف رپورٽر)  سُڌ سماءَ واري صوبائي صلاحڪار مولا بخش چانڊيو چيو آهي ته پيپلز پارٽي جي خلاف ڪيل انتقامي ڪارروائي حڪومت کي ڀوڳڻي پوندي. توهان جي ظلم و ستم جي ڪري پيپلز پارٽي ختم نه ٿيندي. مهينو اڳ حڪومت پريشان هئي پر راحيل شريف جي وڃڻ کان پوءِ حڪومت ۾ ساهه پئجي ويو آهي. وزير چون ٿا ته فوج ۽ اسان هڪ صفحي ۾ آهيون پر هاڻي نيشنل ايڪشن پلان جو جائزو وٺڻ وارو ڳالهيون پيا ڪن. حيدرآباد ۾ پريس ڪانفرنس ڪندي مولا بخش چانڊيو وڌيڪ چيو ته فرمائشي پروگرام تي پيپلز پارٽي خلاف ڪيل ڪارروائي نقصانده هوندي. انهي ڪاررواين جي ذميوار حڪومت آهي ۽ حڪومت کي ڀوڳڻو پوندو. اسان محب وطن آهيون ۽ اسان کي ڪو به خوف ناهي. توهان جي ظلم جي ڪري پيپلز پارٽي ڪڏهن به سست نه ٿيندي. پيپلز پارٽي کي ختم ڪرڻ وارا مري کپي ويا. اڌ کان وڌيڪ بيوقوف (ن) ليگ ۾ موجود آهن. ڪجهه وقت پهرين جهموريت مايوس هئي، حڪومت اداس هئي، وزيرن تي ڪڪڙ جيان پاڻي پيل هو، جنرل راحيل شريف جي وڃڻ کان پوءِ حڪومت ۾ ساهه پيو آهي. هن وڌيڪ چيو ته چوڌري نثار جيڪو ڪجهه چوي ٿو کيس روڪڻ وارو ڪير به ڪونهي، اسان چاهيون ٿا ته پيار محبت واري فضا قائم رهي. اسان بلاول ڀٽو جي ايندڙ اعلان جو انتظار ڪري رهيا آهيون، جنهن کان پوءِ اسان پنهنجي ڪم کي شروع ڪنداسين. مولا بخش صحافين کي چيو ته چيئرمين اعلان ڪندو ۽ اسان توهان کي خبر ڏينداسين بلڪه روز روز توهان کي نيون نيون خبرون ملنديون.

 

ناهي چيو ته اي ڊي خواجه نه ايندو، چوڌري نثار معاملي کي تڪراري نه بڻائي: وڏو وزير

ڳڙهي خدابخش(م.ڊ) وڏي وزير سيد مراد علي شاهه چيو آهي ته آءِ جي سنڌ اي ڊي خواجه موڪل جي درخواست ڏني آهي هو موڪل تي آهي. چوڌري نثار هروڀرو تڪراري پيو بڻائي. هو ڳڙهي خدابخش ۾ ميڊيا سان ڳالهائي رهيو هو. صحافي پاران پڇيل هڪ سوال جي جواب ۾ وڏي وزير سيد مراد علي شاهه چيو ته مون اهو ناهي چيو ته اي ڊي خواجه نه ايندو. پنهنجي مرضي سان آءِ جي سنڌ مقرر ڪنداسين. هن چيو ته آصف زرداري جڏهن چاهي ڏيهه اچي ۽ جڏهن چاهي پرڏيهه هليو وڃي، ڳڙهي خدابخش واري جلسي ۾  آصف زرداري سرپرايئز ڏيندو. وڏي وزير وڌيڪ چيو ته بلاول ڀٽو زرداري جڏهن چاهي جتان چاهي چونڊ وڙهي سگھي ٿو، سڄو پاڪستان سندس آهي. هڪ ٻئي سوال جي جواب ۾ وڏي وزير سيد مراد علي شاهه چيو ته رينجرز قانون موجب ڪارروائيون ڪري رهي آهي. هاڻوڪين ڪارروائين جي حوالي سان شڪايت آئي هئي. جاچ ڪرڻ پوليس جو ڪم آهي. هاڻي درخواست ايندي ۽ پوويس ڪارروائي ڪندي. هن چيو ته سنڌ جي ترقي لاءِ خيرات ۽ قرض وٺڻ لاءِ به تيار آهيون.

 

اڳوڻي وزيراعظم شهيد محترمه بينظير ڀٽو جي نائين ورسي اڄ سڄي ملڪ ۾ عقيدت ۽ احترام سان ملهائي ويندي، تياريون مڪمل

ڪراچي (اين اين آءِ) پاڪستان پيپلز پارٽي جي شهيد چيئرپرسن ۽ اڳوڻي وزيراعظم محترمه بينظير ڀٽو جي نائين ورسي اڄ اڱاري تي سڄي ملڪ ۾ نهايت عقيدت ۽ احترام سان ملهائي ويندي، مرڪزي تقريب ڳڙهي خدا بخش ڀٽو ۾ منعقد ٿيندي، جنهن ۾ آصف زرداري، بلاول ڀٽو زرداري، بختاور ۽ عاصفه سميت پ پ جا ايم اين ايز، ايم پي ايز، سنڌ ڪابينا جا ميمبر ۽ ڪارڪنن وڏي انگ ۾ شرڪت ڪندا، ورسي جي تقريبن جي شروعات صبح جو ڳڙهي خدا بخش ڀٽو ۾ محترمه جي مزارتي قرآن خواني سان ڪئي ويندي، جنهن کانپوءِ گڏيل دعا سان لنگر ورهايو ويندو، 12 وڳي جلسو شروع ٿيندو، جنهن ۾ سڄي ملڪ مان ايندڙ شاعر پنهنجي شاعري ۽ مڪالن ذريعي محترمه جي خدمتن کي ڀيٽا پيش ڪندا، جڏهن ته مرڪزي اڳواڻ 4 وڳي کانپوءِ جلسي کي خطاب ڪندا، جلسي جي حوالي سان ڳڙهي خدا بخش ڀٽو ۾ وڏي پيماني تي انتظام ڪيا ويا آهن، جلسي واري هنڌ کي پارٽي جهنڊن ۽ اڳواڻن جي تصويرن سان سجايو ويو آهي، اسٽيج تي به پارٽي اڳواڻن جون تصويرون ۽ جهنڊا هنيا ويا آهن، سڄي ملڪ مان ايندڙ ڪارڪنن جي سهولت لاءِ ڪيمپون قائم ڪيون ويون آهن، جڏهن ته ميڊيڪل ۽ پاڻي جي سبيلن جون ڪيمپون قائم ڪيون ويون آهن، انتظاميا پاران سڪيورٽي جا سخت انتظام ڪيا ويا آهن، ساڍا 6 هزار پوليس آفيسر ۽ اهلڪار ۽ 3 سئو رينجرز اهلڪار مقرر ڪيا ويا آهن، جڏهن ته ٽريفڪ انتظام لاءِ 7 سئو اهلڪار به مقرر ڪيا ويا آهن، پارڪنگ، جلسي واري هنڌ ۽ ٻين علائقن جي سي سي ٽي وي ڪمرائن ذريعي مانيٽرنگ ڪئي ويندي، جلسي کانپوءِ شام جي وقت پ پ جي سينٽرل ايگزيڪيوٽو جو اجلاس نئون ديرو ۾ منعقد ٿيندو جنهن ۾ اهم فيصلن جو امڪان آهي، شهيد بينظير ڀٽو جي نائين ورسي جي سلسلي ۾ پ پ پاران لاڙڪاڻي شهر سميت سڄي ضلعي ۾ 40 کان وڌيڪ آجياڻي واريون ڪيمپون قائم ڪري سڄي علائقي کي بينر سان سنجايو ويو آهي، ڪراچي مان پ پ جا اهم ڳواڻ ۽ سنڌ ڪابينا جا ڪيترائي ميمبر پهريان ئي لاڙڪاڻي پهچي چڪا آهن، پ پ سنڌ جي صدر نثار احمد کهڙو ۽ پ پ عورتن واري شعبي جي صدر فريال ٽالپر گذريل ڪيترن ئي ڏينهن کان ورسي جي انتظامن جي سلسلي ۾ اتي موجود آهن، جڏهن ته جيالا مسلسل قافلن جي صورتن ۾ ڳڙهي خدا بخش پهچي رهيا آهن.

 

ڪجھه ماڻهو سياست ۾ پيسو ڪمائڻ لاءِ ايندا آهن: خورشيد شاهه

سکر(بيورو) قومي اسيمبلي ۾  مخالف ڌر اڳواڻ سيد خورشيد شاهه مخالفن تي تنقيد جا تير هلائيندي چيو آهي ته ڪجھه ماڻهو سياست ۾ پيسا ڪمائڻ ايندا آهن. سکر ۾ پ پ ليڊيز ونگ پاران محترمه بينظير ڀٽو شهيد جي ورسي بابت ڪوٺايل تقريب کي خطاب ڪندي سيد خورشيد شاهه چيو ته ڪي سياستدان اهڙا به آهن جن جو سياست ۾ اچڻ جو مقصد صرف ئي صرف پيسو ٺاهڻ آهي پر ڪجھه ماڻهو وري عوام سان ڪيل واعدن تي جان قربان ڪري ڇڏيندا آهن. خورشيد شاهه وڌيڪ چيو ته بينظير ڀٽو شهيد ۽ شهيد ذُوالفقار علي ڀٽو موت کي شڪست ڏني ۽ کٽي ويا.

 

گوادر منصوبي سان ترقي جون هوائون گھُلنديون ۽ مخالفن جا وات بند ٿي ويندا: خواجه آصف

سيالڪوٽ(م.ڊ) پاڻي ۽ بجلي واري وفاقي وزير خواجه آصف چيو آهي ته مخالفن جي ڳالهين تي ڌيان ڏيڻ جي ضرورت ناهي. ڪارڪن ايندڙ چونڊن تي ڌيان ڏين.  ميڊيا سان ڳالهائيندي وفاقي وزير خواجه آصف چيو ته ملڪ جي معاشي مستقبل ۾ گوادر جي وڏي اهميت آهي. پاڪستان ۾ ترقي جون هوائون گوادر رستي هلنديون. منصوبو مڪمل ٿيڻ سان مخالفن جا وات بند ٿي ويندا. هن چيو ته  ملڪ ۾ جمهوريت پروان چڙهي رهي آهي. ايندڙ سال جي شروعاتي ٽن چئن مهينن ۾ 4 هزار ميگاواٽ بجلي سسٽم ۾ شامل ٿي ويندي. مخالفن پاڻ پنهنجي پيرن تي گوليون هلايون.

 

اسان جي نظر ۾ ڀٽي صاحب جو دور سول آمريت جو دور هو، هڪ ٻئي کي معاف نه ڪيو ته ملڪ اڳتي نه وڌي سگهندو: خواجا سعد رفيق

لاهور(م.ڊ) ريلوي واري وفاقي وزير خواجا سعد رفيق چيو آهي ته اسان جي نظر ۾ ڀٽي صاحب جو دور سول آمريت جو دور هو، هڪ ٻئي کي معاف نه ڪيو ته ملڪ اڳتي نه وڌي سگهندو.  لاهور ۾ ميڊيا سان ڳالهائيندي خواجا سعد رفيق چيو ته اسان وڏي وقت تائين معاف ڪيو ۽ اڳتي وڌڻ جي پاليسي اختيار ڪئي، ڪجهه ماڻهن کي پنهنجي تاريخ تي آڪڙ ڪرڻ جي ضروت ناهي، بينظير جي وڃڻ سان جيڪو خال خالي ٿيو اهو اڃان تائين ناهي ڀرجي سگهيو. بلاول کي پنهنجي ماضي جي تاريخ تي نظر وجهڻ گهرجي.هن چيو ته اسان جي پارٽي ۾ ٻلي جيان ميائون ميائون ناهي ٿيندي، اسان جي پارٽي ۾ صلاحون ٿينديون آهن. اسان جي قيادت ڪيترائي ڀيرا ڪارڪنن جي ڳالهه مڃي پنهنجا فيصلا بدلائي ڇڏيا آهن. هن وڌيڪ چيو ته اسان جي پارٽي ۾ راءِ شماري ٿيندي آهي، قييادت سان بحث ٿيندو آهي. شهباز شريف مون کي حوصلي سان قابو ۾ ڪيو ان کان پوءِ مٺيون مٺيون ڳالهيون ڪندو آهيان. عمران خان ڌرڻي بدران اسيمبلي جو گهيراءُ شروع ڪيو، ڪارڪردگي جي بنياد تي 2018ع  جي اليڪشن کٽيندا، عمران خان پنهنجي صوبي ۾وڃي ۽ ڪم ڪري، پيپلز پارٽي نعرن بدران ڪم ڪري.

 

هندو ۽ عيسائي جيڪڏهن شراب خانا بند ڪرائڻ چاهن ٿا ته مسلمانن کي اعتراض ڇو؟: سنڌ هاءِ ڪورٽ

ڪراچي(م.ڊ)  سنڌ هاءِ ڪورٽ ۾ شراب خانن تي پابندي واري ڪيس جي ٻڌڻي دوران چيف جسٽس رمارڪس ڏيندي چيو آهي ته هندو ۽ عيسائي شراب خانا بند ڪرائڻ چاهين ٿا ته پوءِ مسلمان ڇو مخالفت ڪري رهيا آهن. ڌرين جو موقف ٻڌڻ بعد قانون موجب فيصلو ڪيو ويندو. سنڌ هاءِ ڪورٽ جي چيف جسٽس جسٽس سجاد علي شاهه جي سربراهي ۾ بينچ شراب خانن تي پابندي واري ڪيس جي ٻڌڻي ڪئي. جوابدارن ڌر پاران وڪيل عاصمه جهانگير ۽ ياسين آزاد عدالت ۾ پيش ٿيا، پر درخواست گذار رميش ڪمار پيش نه ٿيو. عاصمه جهانگير عدالت کي گذارش ڪئي ته درخواستگذار پيش ئي نه ٿيو آهي،.چيف جسٽس چيو ته ڌرين جو موقف ٻڌڻ بعد قانون موجب فيصلو ڪيو ويندو. عاصمه جهانگير چيو ته درخواستگذار رميش ڪمار هڪ سياستدان آهي، تنهنڪري هو هندو برادري جي نمائندگي نه ٿو ڪري سگهي. عدالت درخواستگذار جي پيش نه ٿيڻ سبب ٻڌڻي ۱۱ جنوري تائين ملتوي ڪندي ڌرين کي ايندڙ ٻڌڻي تي پيش ٿيڻ جو حڪم ڏنو.

 

وزير اعظم اسيمبلي ۾ ڪوڙ ڳالهايو، سچ اهو آهي ته اسحاق ڊار نواز شريف لاءِ مني لانڊرنگ ڪئي: عمران خان

اسلام آباد(م.ڊ) پاڪستان تحريڪ انصاف جي سربراهه عمران خان چيو آهي ته ماڻهن کي ڊپ آهي ته پاناما ڪيس ايترو ڊگهو ڇو پيو ٿئي، هنن کي خبر آهي ته سپريم ڪورٽ  ۾ ڪوڙ نه هلندو، نواز شريف اسيمبلي ۾ ڪوڙ ڳالهايو جڏهن ته سچ اهو آهي ته اسحاق ڊار نواز شريف جي مني لانڊرنگ ڪئي. اسلام آباد ۾ پريس ڪانفرنس ڪندي عمران خان چيو ته سپريم ڪورٽ ۾ قطري شهزادن جا  خط ڏيکاري ڪوڙ ڳالهايو ويو، ناڻي واري وفاقي وزير اسحاق ڊار مئجسٽريٽ جي سامهون بيان ڏنو ته هن نواز شريف جي ڪٽنب جي لاءِ مني لانڊرنگ ڪئي. اسان چاهيون ٿا ته پاناما ليڪس جي فيصلو جلد ٻڌايو وڃي، پاڪستان جو نظام رڳو ڪمزورن کي پڪڙيندو آهي طاقتورن کي نه. هن چيو ته پاڪستان جو الميو آهي جو ماڻهو چوندا آهن ته نواز شريف کي سزا نه ٿيندي، چوڌري نثار چيو ته نيب جو چيئرمين سپريم ڪورٽ مقرر ڪري ۽ اسان چوڌري نثار جي مطالبي کي ڀليڪار چئون ٿا. اسحاق ڊار حلف نامو ڏنو هو ته هن نواز شريف جي ڪٽنب لاءِ مني لانڊرنگ ڪئي. هن چيو ته نيب جي ڪا به ڪريٽيبلٽي ناهي، نواز شريف خلاف نيب ۾ 12 ڪيس آهن، نيب چيئرمين کي فوري طور استعيفيٰ ڏيڻ گهرجي، ملڪ ۾ ڪرپشن جو سبب ئي نيب آهي، پاڪستان جي تاريخ ۾ اهم ڪيس پاناما آهي، يهودي لابي پهرين ئي پاڪستان جي ايٽمي پروگرام پيٺان پيل آهي، سوشل ميڊيا تي ماڻهو پڇي رهيا آهن ته نيب ٻڌائي ته ڪرپشن مان ڪيترو پيسو ڏيڻو پوندو ۽ ڪيترو پاڻ وٽ رکڻو پوندو. اوگرا ۽ نيپرا جهڙا ادارا به سندن ماتحت ٿين ته حڪومت من ماني ته ڪندي، پنجاب ۾ ڊپٽي ڪمشنرن جي بحالي جي سخت مذمت ڪيان ٿو. هن وڌيڪ چيو ته ريگيوليٽر اٿارٽين جو وزارتن جي ماتحت ٿيڻ قبول ناهي، 27 ڊسمبر  جو انتظار آهي، جيڪڏهن نيب صحيح ڪم ڪري ها ته ملڪ ۾ ڪرپشن نه ٿئي ها.

 

ٽوبا ٽيگ سنگهه ۾ زهريلو شراب واپرائڻ سبب 7 ڄڻا فوت، ڪيترن جي حالت نازڪ

ٽوبا ٽيگ سنگهه (م.ڊ) پنجاب جي شهر فيصل آباد جي علائقي ٽوبا ٽيگ سنگهه ۾ زهريلو شراب واپرائڻ سبب 7 ڄڻا فوت ٿي ويا آهن، جڏهن ته 18 ڄڻن کي ڳڻتي جوڳي حالت ۾ اسپتال منتقل ڪيو ويو آهي، ٽوبا ٽيگ سنگهه جي مبارڪ آباد پاڙي ۾ زهريلو شرب واپرائڻ سبب 7 ڄڻا فوت ٿي ويا، جڏهن ته 18 ڄڻن کي ڳڻتي جوڳي حالت ۾ اسپتال منتقل ڪيو ويو آهي، جتي سندن علاج جاري آهي، پوليس جو چوڻ آهي ته 10 متاثر ماڻهن کي ويجهي اسپتال ڊي ايڇ ڪيو منتقل ڪيو ويو، 8 متاثرن جو الائيڊ اسپتال فيصل آباد ۾ علاج جاري آهي، زهريلو شراب وڪرو ڪندڙن خلاف ڪارروايون شروع ڪري ڏنيون آهن، جڏهن ته جلد ئي اهڙو زهر وڪرو ڪندڙن کي گرفتار ڪيو ويندو.