تازيون خبرون

Monthly Archives: November 2016

آسٽريلوي ٽيم آخري ٽيسٽ ميچ کٽي وائيٽ واش کان بچي وئي

ايڊليڊ (اسپورٽس نيوز) آسٽريلوي ٽيم ٽين ۽ آخري ٽيسٽ ميچ ۾ ڏکڻ آفريڪا کي 7 وڪيٽن تان شڪست ڏئي وائيٽ واش کان بچي وئي. رپورٽ موجب ايڊليڊ ۾ جاري ٽيسٽ سيريز جي ٽين ۽ آخري ميچ ۾ ميزبان ٽيم ڏکڻ آفريڪا طرفان مليل 127 رنسن جو ٽارگيٽ ٽن وڪيٽن جي نقصان تي پورو ڪري ميچ پنهنجي نالي ڪري ورتي. ڪينگروز طرفان ڊيوڊ وارنر 47 رنسن جي جارحاڻي اننگ کيڏي، جڏهن ته ڪپتان اسٽيون سمٿ 40 ۽ ميٽ رنشا 34 رنسون ٺاهي اڳڀرا رهيا. ان کان اڳ ڏکڻ آفريڪي ٽيم پهرين اننگ ۾ 9 وڪيٽن جي نقصان تي 259 رنسون ٺاهيون هيون ۽ ٻي اننگ ۾ 250 رنسن تي ڍير ٿي وئي هئي، جڏهن ته آسٽريلوي ٽيم پهرين اننگ ۾ 383 رنسون ٺاهيون هيون.27

 

ڪيوبا جو انقلابي اڳواڻ ڪاسترو: ارشاد ڪاغذي

هن سال پنهنجي سالگره ملهائيندي ڪاسترو چيو هو ته هو جلد لاڏاڻو ڪري ويندو ۽ ڪالهه صبح سوير ڪيوبا جي ٽي وي هن جي فوت ٿيڻ جي خبر نشر ڪئي. فيڊل ڪاسترو گھڻي عرصي کان آنڊن جي بيماري وگھي سخت عليل هو. آمريڪا، انقلاب ۽ ڪاسترو جي دشمنن کيس ڪيئي ڀيرا مارڻ جي ناڪام ڪوشش ڪئي پر هو معجزانه طور هر ڀيري بچي ويو. توهان اهو ٻڌي حيران ٿي ويندا ۽ يقين نه ڪندا ته ڪاسترو کي 638 دفعا مارڻ جي ڪوشش ڪئي وئي هئي. اهي حملا جيمز بانڊ طرز جهڙا هئا، هن انهن موتمار حملن جي باري ۾ چيو هو ته ”جيڪي حملا ڪيا ويا ۽ انهن کان بچي ويس، جيڪڏهن اهي اولمپڪ ايونٽ هجن ته مان سونو ٻلو حاصل ڪرڻ جو حقدار آهيان.“ ڪاسترو 1959ع ۾ اقتدار تي قبضو ڪيو، 49 سالن تائين ڪيوبا تي حڪمراني ڪئي. ان کان علاوه آمريڪا جي اينٽيلنجنس ايجنسي سي آءِ اي هن جو تختو اونڌو ڪرڻ جي ڪوشش ڪئي پر هر دفعي ناڪام ٿيا. 10 سال اڳ هن پنهنجي ڀاءُ جي حق ۾ هٿ کنيو هو ۽ ان کي ملڪ جون واڳون سوپي ڇڏيون.

فيڊل ڪاسترو انقلابي اڳواڻ هو، جنهن چي گويرا سان گڏجي ڪيوبا تي حملو ڪيو ۽ اتي ڪميونسٽ حڪومت قائم ڪئي، هو مارڪسزم ۽ لينن ازم جو پيروڪار هو. ڪاسترو 1959ع کان 1976ع تائين ڪيويا جو وزيراعظم ۽ 1976ع کان 2008ع تائين صدر رهيو. 1961ع کان 2011ع تائين هو ڪيوبا جي ڪميونسٽ پارٽي جو سيڪريٽري جنرل رهيو. هن پنهنجي ملڪ ۾ انقلابي سوشلسٽ سڌارا نافذ ڪيا، صنعت، واپار ۽ ٻين کي قومي تحويل ۾ ورتو، هو آمريڪا جو سخت مخالف هو ۽ هميشه آمريڪا ۽ سرمائيداري نظام کي تنقيد جو نشانو بنايو. هن جي اقتدار کي ختم ڪرڻ لاءِ آمريڪا ڪيئي ڪوششون ڪيون پر هر بار آمريڪا کي منهن ڀر ڪِرڻو پيو. ڪاسترو هڪ اهڙو انقلابي هو جيڪو آمريڪا جي ڀر ۾ رهندي به آمريڪا کي ست سُريون ٻڌائيندو هو ۽ ڪڏهن به آمريڪا جي اڳيان نه جهڪيو. هو مرد مجاهد هو جنهن جي ڪري هن آمريڪا سان اکيون اکين ۾ ملائي هر طرح سان مقابلو ڪيو. هن پنهنجي ملڪ ۾ هڪ اهڙو نظام قائم ڪيو جيڪو پورهيت راڄ جي نالي سان مشهور آهي، پنهنجي ديس ۾ پورهيتن جي حڪومت قائم ڪئي، صحت ۽ تعليم جي ميدان ۾ ڪيوبا سموري دنيا ۾ اڳتي آهي ۽ هن جا ڊاڪٽر مختلف ملڪن ۾ ڪم ڪندا رهن ٿا. ڪاسترو پنهنجي ملڪ ۾ غريبن ۾ خوشحالي آندي پر آمريڪا جي گھيري ۾ هوندي ۽ آمريڪا جي بائيڪاٽ باوجود هن پنهنجي ڪڏهن به نه وڪاميو.

فيڊل ڪاسترو 21 صدي جي عالمي سياست جو هڪ مضبوط ٿنڀو آهي. آمريڪا جي صدر اوباما جڏهن ڪيوبا جو دورو ڪيو هو ته ڪاسترو پنهنجي عوام کي خبردار ڪيو هو ته هو آمريڪا جي ٺٺن ۾ نه اچن، ڇاڪاڻ ته آمريڪا سامراج آهي. تاريخ ساز شخصيت فيڊل ڪاسترو 11 آمريڪي صدرن کي تبديل ٿيندي ڏسي چڪو آهي. جڏهن ته دنيا ۾ سوشلسٽ ۽ ڪميونسٽ ڪيمپ کي زوال طرف ويندي به پنهنجي اکين سان ڏسي چڪو آهي پر هو هڪ اڏول جبل جيان پنهنجي ملڪ ۾ ڄمي بيٺو رهيو ۽ سوشلسٽ نظام کي نه فقط بچايو پر پنهنجي ملڪ ۽ راڄ بخت ڀاڳ کي دشمنن کان پڻ بچايو. اڌ صدي اڳ ۾ ”ڏاڙهي واري گوريلا فوج“ ڪيوبا تي قبضو ڪري اتان هڪ آمر کي ڀڄائي سوشلسٽ ڪيوبا جو بنياد وڌو هو. هن کي اڌ صدي اڳ گرفتار ڪري جيل ۾ بند ڪيو ويو ۽ ڪيس هلايو ويو، هن ڪورٽ اڳيان تقرير ڪئي هئي. ”تاريخ مون کي بي ڏوهي قرار ڏيندي.“ جنهن ۾ هن پنهنجو موقف پيش ڪيو هو. هو سچو انقلابي هو ۽ مرندي تائين انهن اصولن ۽ آدرشن تي قائم رهيو، جن لاءِ هن سموري عمر جدوجهد ڪئي هئي. هو مشهور انقلابي چي گويرا جو ساٿي هو، جنهن سان گڏجي ڪيوبا جي انقلاب لاءِ ڪم ڪيو. چي گويرا لاطيني آمريڪا جي ٻين ملڪن ۾ وڙهڻ لاءِ ويو ۽ آمريڪا جي فوج کيس شهيد ڪيو. ڪاسترو به ڪيترن موقعن تي ڪيوبا جي فوجين کي لاطيني آمريڪا جي ملڪن ۾ موڪلي اتان جي مظلوم ۽ محڪوم ملڪن ۽ قومن سان ڪلهوڪلهي ۾ ملائي ويڙهه وڙهي. ان کان علاوه هن ڪيترن ئي ڏهاڪن کا پنهنجي ملڪ جا ڊاڪٽر ٻاهرين ملڪن ۾ موڪليندو رهيو هو جتي هو وڃي اتان جي ماڻهن جو علاج ڪندا هئا.

ڪاسترو انقلابي اڳواڻ هو تنهن ڪري هو آمريڪا سامراج جو سخت مخالف هو ۽ آمريڪا  جا صدر ۽ انتظاميا به هن کي ڪونه ڀائيندي هئي، تنهن ڪري آمريڪا ۽ ڪيوبا جي وچ ۾ ڪيترن موقعن تي جنگ لڳڻ جو خطرو پيدا ٿي پيو هو. ان خطري جي ڪري ڪيوبا ۾ سوويت يونين ميزائل نصب ڪيا هئا، سرد جنگ جو وڏي ۾ وڏو بحران ان وقت شروع ٿيو، جڏهن 1962ع ۾ آمريڪا جي صدر جان ايف ڪينيڊي، آمريڪاجي فوج موڪلي ڪيوبا جي ناڪا بندي ڪئي ۽ ان وقت جنگ جو خطرو پيدا ٿي پيو هو ۽ جيڪڏهن ايئن ٿئي ها ته عالمي جنگ ڇڙي وڃي ها پر خروشوف ڪيوبا مان ميزائل هٽائي جنگ کي ٽاري ڇڏيو. ايترن سنگين گھوٽالن ۽ ڇڪتاڻ جي هوندي به ڪاسترو ڪڏهن به آمريڪا کان مرعوب نه ٿيو ۽ پنهنجي ملڪ، عوام ۽ ساٿين تي ڀروسو رکيو ۽ عوام جي خدمت ڪندو رهيو. هو 2006ع کان سخت بيمار هو ۽ 2008ع ۾ هن پنهنجي ڀاءُ رائول ڪاسترو کي حڪومت سونپي ڇڏي ۽ هو گوشه نشين ٿي ويو. گذريل آگسٽ ۾ پنهنجي سالگره جي موقعي تي ڪانگريس کي خطاب ڪيو هو ۽ پنهنجي حامين سان مليو هو ۽ ايترا سال اڪيلو رهيو. پر هو ڪالهه 90 سالن جي عمر ۾ گذاري ويو. ڪيوبا جي سرڪار پنهنجي انقلابي اڳواڻ جي موت تي 9 ڏينهن جي سوڳ جو اعلان ڪيو آهي. ڪاسترو جي وڇوڙي سان هڪ اهڙو خال پيدا ٿيو آهي، جنهن جو بڻجڻ ڏاڍو مشڪل آهي. لاطيني آمريڪا، ڪيوبا سميت سموري دنيا جا کاٻي ڌر سان واسطو رکندڙ عوام ڪاسترو جي وڇوڙي تي ڏکارو آهي ۽ هرڪو هن عظيم اڳواڻ کي ڀيٽا پيش ڪري رهيو آهي.

 

 

ملڪ جي ترقي ۽ نوجوانن جو ڪرادر .!!!! : غلام مصطفيٰ جمالي

ملڪ جي ترقي ۾ نوجوان جو اهم ڪردار  رهيو آهي پر هن وقت نوجوان تمام گهڻي پريشاني واري زندگي گذاري رهيا آهن .جنهن جو وڏي ۾ وڏو ڪارڻ بي روزگاري آهي .مان سمجهان ٿو  ته جيڪڏهن ڪنهن به مسئلي کي سامهون رکي انهي کي حل ڪرڻ جي ڪوشش ڪجي  ته ڪو به اهڙو مسئلو ناهي جيڪو حل ٿي نه سگهي.!! پر هر روز ملڪ ۾ وڌندڙ ڪرپشن جي اُڏار ملڪ کي آسمان جي بلندين تي پهچائي ڇڏيو آهي، هر اداري ۾ ميرٽ جي لتاڙ ٿي رهي.!! نوجوان ملڪ جا سرمايا آهن ملڪ جا مسبقل آهن پر اڄ جو پڙهيل لکيل نوجوان ڊگريون کڻي دربدر واري زندگي گذاري رهيو آهي، وڏيون وڏيون ڊگريون کڻي نوجوان پٽيوالي جي پوسٽ لاءِ قطارن ۾ بيٺل انهن نوجوان جي درد کي هن ملڪ جا سياسي ڪامورا ڇا سمجهن پر افسوس ته اهو آهي ته جيترو ويڌن هن ملڪ جي پڙهيل لکيل نوجوانن سان آهي اهڙو ويڌن ڪٿي به ڪانهي .!!هن ملڪ اندر سفارشي دور آهي اڻ پڙهيل لاءِ ته پوسٽون آهن پر هڪ پڙِهيل لکيل نوجوان لاءِ صرف ۽ صرف ڌڪا ٿاٻا،  هن ملڪ ۾ نوڪريون انهن کي ملنديون آهن جن جي سفارش هجي يا جن وٽ پيسئو هجي پوءِ چاهي اهي نوڪرين جا اهل هجن يا نه پر کين نوڪري ِضرور ملندي آهي.!! جڏهن ته   وڏيون ڊگريون رکندڙ غريب نوجوان اهائي دربدري واري زندگي بسر ڪري رهيا آهن.!!سفارش تي ڀرتي ڪيل ماڻهو  جيڪي نوڪري جا اهل ئي ناهن هوندا انهن کي نوڪريون ملنديون آهن،  جنهن ڪري ملڪ جا ادارا تباهي جي ڪناري تي اچي پهتا آهن اهي نااهل ماڻهو وڏن آفيسرن جي چاپلوسي ڪري انهن کان نوڪري وٺي عيش آرام واري زندگي گذاري رهيا آهن پر انهن کي خبر ناهي ته سندن نڙي مان گذرندڙ  حرام جو هڪ گرهه به اذيت ناڪ آهي،،،وڏن وڏن نارن ۽ روڊن ۽ چوڪن تي پنهنجي نالي جا پيناپيلڪ لڳائي نوڪري وٺندڙ اهي انسان،  غريب مسڪينن جي حقن جي سري عام لتاڙ ڪري رهيا آهن، پر انهن کان به ڪير پڇي ئي نٿو.!! ڪيترن ئي غريب مسڪينن کي ميرٽ تي نوڪري نه ملڻ سندن اڳيان هلي ڪري اعليءِ  تعليم حاصل ڪرڻ جي ادراي کي پست ڪري ڇڏيو آهي.! هٿن ۾ فائلون  کڻي در در جا ڌڪا کائيندڙ  نوجوان هاڻي تعليم حاصل ڪرڻ بجاءِ مزدوري ڏانهن لاڙو ڪري رهيا آهن ۽ مختلف هنر سکي رهيا آهن جنهن جو اثر شرح خوانگي تي پيو آهي جڏهن ملڪ ۾ ناانصافي راڄ ڪري ۽ حقڪدار کي پنهنجو حق نه ملي ۽ سندن حقن تي داڙو لڳي اهو ملڪ روشن مستقبل جا خواب ڪيئن ٿو ڏسي سگهي.!! ۽ اڄ ان  ملڪ جي  نوجوان کي مايوسي جي منهن ڏسڻو ٿو پوي پر سندن سينن مان حب وطني به ختم ٿي ويندي آهي ۽ پڙهيل لکيل نوجوان غلط رستن جي طرف لاڙو ڪرڻ  شروع ڪري ڇڏيندا آهن جنهن ۾ چوري،ڦرون ڪرڻ تي مجبور ٿي ويندا آهن جنهن مان ملڪ کي فائدو ملڻ بجاءِ نقصان ملي رهيو آهي ڪيترائي نوجوان نوڪريون نه ملڻ ڪري ملڪ کان ٻاهر هليا ويا آهن جتي سندس ڊگرين  جي اهميت ڏسي کين سٺِي پوسٽن تي مقرر ڪيو ويندو آهي جن ڪري اهي ملڪ اسان جي تعليم يافته نوجوانن جي ڊگرين مان فائدو وٺِي رهيا آهن .!!

پرهن  ملڪ اندر شفارش ۽ جعلي ڊگرين تي ڀرتي ٿيل ماڻهن  ملڪ جي ترقي ڏيڻ بجاءِ  ملڪ کي هڪ وڏي بحران ۾ وجهي ڇڏيو آهي ملڪ  اندر جڏهن به نئين ڀرتين جو اشتهار ايندو آهي ته ان اشتهار ۾ هڪ خاص لفظ لکيل هوندو آهي جنهن کي(ميرٽ)سڏيو ويندو آهي  پر افسوس ته اهو لفظ هاڻ صرف تقريرن جي زينت بڻيل آهي،پر جيڪڏهن ميرٽ تي نوڪريون  ڏنيون وڃن هان ته  ملڪ هن وقت وڏي  ترقي جي راهه تي هلندڙ هجي هان. ۽ نوجوان ترقي جي طرف ملڪ سان گڏ اڳرا هجن هان پر هن وقت بيروگاري ايتري ته وڌي وئي آهي جو هر ڪو پڙهيل لکيل نوجوان ميرٽ تي نوڪري نه ملڻ ڪري مايوسي سبب ڊپريشن جو مريض ٿي ويو آهي جنهن جو ڇوٽڪارو  صرف ۽ صرف بهتر زندگي آهي جن ۾ کين سندن حق مهيا ڪيا وڃن ۽ اهي نوجوان ملڪ جي خدمت ڪري ملڪ کي هڪ وڏي بحران مان ڪڍي سگهن ٿا ملڪ جو موجوده صوتحال ڪري سندس زبانن تي انقلاب جا نعرا آهن ۽ انهن نارن کي خاموش ڪرڻ لاءِ حڪومت هڪ پليٽ فارم تي گڏ ٿي سوچڻ گهرجي ۽ ملڪ اندر ڊگرين يافته نوجوان کي زندگين جي باري ۾ سوچڻ گهرجي نوجوان کي پنهنجا حق مهيا ڪيا وڃن ته جيئن هو اهڙي موذي مرض مان ڇوٽڪارو حاصل ڪري سگهن حيلا، وسيلا ۽ ذريعا انسان کي پنهنجين لياقتن ۽ صلاحيتن کي اڀارڻ ۽ اجاگر ڪرڻ ۾ وڏي مدد فراهم ڪندا آهن ڪيترائي اهڙا انسان جڪي ڪجهه به نه هئا  جڏهن کيس محمود جي روپ ۾ حيلا، وسيلا ۽ ذريعا ملي ويا ته وڏا ماڻهو بڻجي ويا ۽ هن جون ذاتي صلاحيتون نکري بيٺيون. پر هن ڌريي امڙ سنڌ ۽ هن جي رهندڙ سنڌ واسين جي نصيب ۾ حيلن، وسيلن ۽ ذريعن جي کوٽ رهي آهي  اها انهي ڳالهه ناهي ته سنڌ ۽ وسيلا آهن يا سنڌ ڌرتي ۾ وسيلن جي کوٽ آهي    ۽ جڏهن به ڪنهن قوم جو اهڙو حشر ٿيندو آهي يا ڪيو ويندو آهي ته پوءِ اها قوم اڻ ڏٺين قوتن ۽ معجزن ۾ ايمان رکڻ شروع ڪندي آهي. هن جي لوچ ته گهٽجي ويندي آهي پر سوچ ۾ اضافو اچي ويندو آهي . انهيءَ سوچ جو بنياد وري وهم ۽ وسوسا بڻجي پوندا آهن ۽ هر ڪنهن فرد جي بصيرت مفروضن تائين محدود ٿي ويندي آهي.

اسان جو اهو ئي حشر آهي ۽ اسان انهيءَ موڙ تي پهچي چڪا آهيون. مفروضا ، وسوسا ۽ وهم اسان جي زندگيءَ جي هر هڪ شعبي ۾ واهيرا ڪري ويٺا آهن. ان ڪري اسان حالتن، واقعن ۽ فردن جي جاچ پڙتال سائنسي بنيادن تي ڪري نه ٿا سگهون، پر ان جي برعڪس انهن بابت پاڻ ڪو نه ڪو مفروضو ٺاهي، انهيءَ تي ڳنڍ ٻڌي بيهي رهون ٿا. تاريخ ۽ تحقيق جي صحت ۽ سند اسان جي انهيءَ مفروضاتي سوچ ڪري مُرجهي پئي آهي. سنڌي ٻوليءَ جو بڻ بڻياد انهيءَ مفروضاتي روين جي ور چڙهي اسان کان اوجهل ٿي ويو آهي . اسان جي مفروضاتي سوچ جو اهو عالم آهي جو سابق وزير اعظم پاڪستان ذوالفقار علي ڀٽي کان زندهه رهڻ جو حق کسيو ويو، سندس مزار جڙي وئي، پر ڪيترا ماڻهو ڪيتري وقت تائين اهو مڃڻ لاءِ تيار ڪونه رهيا ته ڪو سابق وزير اعظم هاڻي هن دنيا ۾ ڪونه رهيو آهي اسان جڏهن ڪنهن کي ”مادي ترقي“ ڪندي ڏسي برداشت ڪري نه ٿا سگهون ته پوءِ قومي ڀلائي جي نالي ۾ اسان جي جاکوڙ ڇاجي لاءِ آهي؟ ۽ ڪنهن جي لاءِ آهي؟ پوءِ اديب جيڪڏهن ڪتاب لکي ته هن رنڍا نه روڙيا ته ٻيو ڇا ڪيو؟ پوءِ جيڪڏهن سماجي ڪارڪن ڪٿي اکين جي ڪئمپ هڻائي ته ڇا ٿيو؟ پوءِ جيڪڏهن ڪنهن سياستدان قوم جي سورن تي ڳوڙها  وهايا ته ڇا ٿي پيو؟ اهڙيءَصورتحال ۾ اسان جو هر قلم – ڌڻي ، هر ڪو سماجي ڪارڪن۽ هر ڪو سياستدان ايئن ڪري رهيو آهي، ڄڻ کوهه ۾ مئل ٻلو موجود آهي ۽ هو ٻه ٽي سو باٽليون  پاڻيءَ جون ڪڍي دل ئي دل ۾ خوش ٿي رهيو آهي ته ايئن ڪرڻ سان هو کوهه کي پاڪ ڪري ڇڏيندو. اسان جي اديبن، سماجي ڪارڪنن ۽ سياستدانن جو انهيءَ ڪري دڪو داخل نه ٿو ٿئي ۽ هنن جي  ڳالهه ۾  ان ڪري اثر پيدا نه ٿو ٿئي جو هو سماج جي داخلي خلفشارڏي توجهه نه ٿا ڏين. اسان مان هرڪو جو هينئن اهڙي عذاب جي اوڙاهه ۾ رجهي رهيو آهي ، ۽ اسان جو هنئن هڪ ٻئي جون ٽنگون ٻانهون ۽ سسيون لڻي رهيا آهيون ته ڪنهن به اسان کي هن آپگهاتي عمل کان روڪڻ جي ڪوشش نه ڪئي آهي. اسان جهڙوڪ ايئن پيا ڪيون ته ڪو غير اسان کي نه ماري باقي اسان هڪ ٻئي کي ڀلي ته گجر جيان ڪٽيندا رهون.ڪنهن خارجي مثبت تبديلي آڻڻ يا ان لاءِ ڪوشش ڪرڻ کان اڳ ”داخلي تبديلي“ نهايت ضروري ۽ اهم آهي. اسان جي سماج جي وجود کي اندران ئي اندران داخلي خلفشار، اجائي اختلاف ۽ بنا سبب دشمنيءَ واري ٽي بي وڪوڙي چڪي آهي ، ۽ اسان جو زور وري انهيءَ مريض جي هٿ منهن ڌوئڻ تي رهيو آهي. هي اسان جي عوام دوست ۽ ڌرتيءَ دوست ساٿين لاءِ هڪ اهم ايجنڊا آهي، انهيءَ کي نظر انداز ڪرڻ اسان سمورن جي ناقابل تلافي غلطي ٿيندي. اسان پنهنجي گهر ۾ موجود نانگ کي کير پيئاري، گهر ۽ در کان ٻاهر نانگ کي مارڻ سان بچي نه ٿا سگهون. ان ڪري اسان کي اڳ ۾ اها هٽ لسٽ ڦاڙڻي پوندي، جنهن ۾ هر ڪنهن جو نالو لکيل آهي، جيڪا اسان پاڻ ٺاهي آهي.

 

 

 

نئين سپهه سالار جي مقرري….!!

صدر ممنون حسين جنرل قمر جاويد باجوه کي نئون آرمي چيف ۽ جنرل زبير حيات کي چيئرمين جوائنٽ چيفس آف اسٽاف ڪميٽي مقرر ڪري ڇڏيو آهي. نئين آرمي چيف جنرل قمر جاويد باجوه جو تعلق انفنٽري بلوچ ريجمينٽ سان آهي. جنرل قمر جاويد باجوه انسپيڪٽر جنرل ٽريننگ اينڊ ايويلويشن (جي ايڇ ڪيو) رهي چڪو آهي جڏهن ته ان کانسواءِ ڪور ڪمانڊر راولپنڊي پڻ رهي چڪو آهي، جنرل قمر جاويد باجوه بلوچ ريجمينٽ جو چوٿون جنرل آهي جنهن کي آرمي چيف مقرر ڪيو ويو آهي جڏهن ته ان کان اڳ ۾ جنرل يحييٰ خان، جنرل اسلم بيگ ۽ جنرل اشفاق پرويز ڪياني پڻ آرمي چيف رهي چڪا آهن جڏهن ته موجوده چيئرمين جوائنٽ چيفس اسٽاف ڪميٽي جنرل راشد محمود جو تعلق پڻ بلوچ ريجمينٽ سان آهي جڏهن ته ان کانسواءِ جنرل قمر باجوه ڪانگو ۾ پڻ امن مشن جي ڪمانڊ ڪري چڪو آهي.

چيئرمين جوائنٽ چيفس آف اسٽاف ڪميٽي مقرر ٿيل زبير حيات جو تعلق فوجي گهراڻي سان آهي ۽ سندس والد ميجر جنرل جي عهدي تان رٽائر ٿيو. جنرل زبير حيات جي او سي سيالڪوٽ جي عهدي تي رهي چڪو آهي ۽ ان کانسواءِ هو ڊي جي اسٽريٽجڪ پلاننگ ڊويزن پڻ رهي چڪو آهي. جنرل زبير حيات چيف آف جنرل اسٽاف جي عهدي تي مقرر هو ۽ سندس ڀاءُ ميجر جنرل احمد محمود حيات ڊائريڪٽر جنرل آءِ ايس آءِ اينالائسزز آهي، جڏهن ته ٻيو ڀاءُ ليفٽيننٽ جنرل عمر حيات پاڪستان آرڊيننس فيڪٽري واهه ڪينٽ جو چيئرمين آهي. جنرل زبير حيات اسٽاف ڊيوٽيز ڊائريڪٽوريٽ جو سربراهه به رهي چڪو آهي. جڏهن ته دفاع واري وزارت پاران ٻنهي سربراهن جي مقرري جو نوٽيفڪيشن جاري ڪيو ويو آهي جڏهن ته عهدن تي مقرري کانپوءِ کين فور اسٽار جنرل طور پڻ ترقي ڏني وئي آهي.

 

پڪ اٿم پاڪستان جي سرزمين تان دهشتگردي جو صفايو ٿي ويندو: جنرل راحيل شريف

اسلام آباد(اي پي پي) هٿياربند فوج جي سربراهه جنرل راحيل شريف مادرِ وطن جي حفاظت دوران حياتين جا نذرانا پيش ڪندڙ پاڪ فوج جي شهيدن کي خراجِ عقيدت پيش ڪيو آهي.آرمي چيف جنرل راحيل شريف اوڪاڙا گيريزن جو الوداعي دورو ڪيو، جڏهن ته هن ملتان ۽ بهاولپور ۾ فوجي جوانن کي خطاب ڪيو. آءِ اي سي آر موجب فوجين کي خطاب ڪندي آرمي چيف چيو ته مون کي يقين آهي ته پاڪستان جي سرزمين تان دهشتگردي جو صفايو ٿي ويندو، رٽائرمينٽ جو فيصلو قوم ۽ ملڪ جي مفاد ۾ ڪيو، منهنجو ايمان آهي ته پاڪستاني قوم دهشتگردي جي خاتمي جو پڪو پهه ڪري ڇڏيو آهي، پاڪستان جا ايندڙ ڏينهن تمام سٺا هوندا، قوم جي خدمت جي لاءِ حاضر آهيان،، آرمي چيف چيو ته سرحدن جي حفاظت جوانن جو جذبو ساراهه جوڳو آهي، اهي اڳتي به عوامي خدمتن لاءِ پنهنجي پيشيوراڻي صلاحيتن جو مظاهرو جاري رکن، جڏهن ته جنرل راحيل شريف اوڪاڙا گيريزن ۾ اسپيشل ٻارن لاءِ اسٽيٽ آف دي آرٽ اسڪول جو افتتاح ڪيو.  هو جمعي ڏينهن الوداعي دؤرن جي سلسلي ۾ 10 ڪور راولپنڊي جي دؤري دوران آفيسرن ۽ جوانن کي خطاب ڪري رهيو هو. آءِ ايس پي آر مطابق جنرل راحيل شريف 10 ڪور جي دؤري تي چڪلالا گيريزن پهتو ته ڪور ڪمانڊر راولپنڊي ليفٽيننٽ جنرل ملڪ ظفر اقبال سندس گرمجوشيءَ سان استقبال ڪيو. فوجي آفيسرن ۽ جوانن کي پنهنجي خطاب ۾ آرمي چيف جنرل راحيل شريف مادرِ وطن جي حفاظت دوران حياتين جا نذرانا پيش ڪندڙ پاڪ فوج جي آفيسرن ۽ جوانن کي خراجِ عقيدت پيش ڪيو. ٻئي طرف هٿياربند فوج جي سربراهه جنرل راحيل شريف سان آمريڪي سفير ڊيوڊ هيل ملاقات ڪئي. آءِ ايس پي آر مطابق جمعي ڏينهن جنرل راحيل شريف سان آمريڪي سفير ڊيوڊ هيل جي ايڇ ڪيو راولپنڊيءَ ۾ ملاقات ڪئي. آمريڪي سفير ڊيوڊ هيل پاڪ فوج جي سربراهه جي قيادت ۾ پاڪ فوج جي دهشتگرديءَ خلاف جنگ ۾ ڪاميابين جي واکاڻ ڪئي

 

ڪشمير مسئلو ايجنڊا ۾شامل نه هجڻ تائين ڀارت سان ڳالهيون نه ڪنداسين: پاڪستان

اسلام آباد (اين اين آءِ) وزيراعظم نوازشريف جي پرڏيهي معاملن واري وزير سرتاج عزيز چيو آهي ته ڪشمير مسئلي جو اصل حل ڪشميرين جي پنهنجي ئي تحريڪ مان نڪرندو ڪشمير جي حوالي سان اسان جي پاليسي بلڪل چٽي آهي اسان ڪشميرين جي سياسي سفارتي ۽ اخلاقي حمايت جاري رکنداسين. سمورن پاڙيسري ملڪن سان پرامن ۽ پاڙيسري برقرار رکڻ چاهيون ٿا ڀارت سان ڪشمير سميت سمورن مسئلن تي ڳالهه ٻولهه ڪنداسين. پنهنجي سرحدن جي حفاظت ڪرڻ ڄاڻون ٿا ۽ ڀارت جي ڪنهن به اڳرائي جو ڀرپور جواب ڏنو ويندو جمعي تي قومي اسيمبلي ۾ لائين آف ڪنٽرول جي حوالي سان پاليسي بيان ڏيندي سرتاج عزيز چيو ته ڀارت ڪشمير مسئلي تان ڌيان هٽائڻ لاءِ لائين آف ڪنٽرول تي اڳرائي ڪري رهيو آهي ۽ ڄاڻي واڻي شهري آبادي کي نشانو بڻائي رهيو آهي هن چيو ته پاڻ کي مهذب ملڪ چورائيندڙ هندستان ڪشمير ۾ ظلم ڪري رهيو آهي سرتاج عزيز چيو ته ڪشمير جي حوالي سان اسان جي پاليسي بلڪل چٽي آهي ۽ اسان انهن جي سفارتي ۽ اخلاقي حمايت جاري رکنداسين. هن چيو ته اسان پنهنجي سرحدن جي حفاظت ڪرڻ ڄاڻون ٿا اسان ڪنهن جي دٻاءُ ۾ نه اينداسين ڀارت پاران لائين آف ڪنٽرول تي اڳرائي سان پيدا ٿيندڙ صورتحال تي بحث ڪندي مسلم ليگ ضياءُ جي اڳوڻ محمد اعجازالحق چيو ته 8 جولاءِ کان پوءِ والاريل ڪشمير ۾ برهان واني جي شهادت کان پوءِ ڪرفيو لڳل آهي هن وقت تائين 150 کان وڌيڪ ڪشميري شهيد ٿي چڪا آهن اهڙي طرح سوين ماڻهو پنهنجي اکين جو نور وڃائي ويٺا آهن. اها دنيا جي سڀ کان وڏي رياستي دهشتگردي آهي هن چيو ته پهريون ڀيرو عالمي سطح تي اهو مسئلو اجاگر ٿيو آهي ان سبب دنيا جو ڌيان هٽائڻ لاءِ ايل او سي تي حملا ٿي رهيا آهن وزيراعظم پهريون ڀيرو جنرل اسيمبلي ۾ ڪشمير جي حوالي سان پنهنجو موقف پيش ڪيو. هن چيو ته اسان جي پاليسي امن جي آهي جڏهن ته لتن جا ڀوت ڳالهين سان نه مڃيندا آهن ڀارت کي سبق سيکارڻو پوندو ان مسئلي کي گڏيل قومن جي سيڪيورٽي ڪائونسل ۾ پيش ڪيو وڃي. پرڏيهي صلاحڪار کي هارٽ آف ايشيا ڪانفرنس ۾ وڃڻ گهرجي. هن چيو ته ڀارتي اڳرائي جو مقصد عالمي سطح تي ڌيان هٽائڻ آهي وزيراعظم پاران پرڏيهي ملڪن وفد موڪلڻ جو فيصلو سٺو قدم هو اهم گڏيل قومن ۾ انهن جي قراردادن جي حوالي سان به ياد ڏياريو هن چيو ته جيستائين ڪشمير جو مسئلو حل نه ٿيندو پاڪستان ۽ ڀارت ۾ امن قائم نه ٿي سگهندو. پاڪستان 70 سالن کان ڪشمير جي مسئلي لاءِ ڪوشش ڪري رهيو آهي ڀارت سان ان مسئلي تي 3 جنگون ٿيون آهن ان مسئلي کي اجاگر ڪرڻ لاءِ پهريون ڀيرو چونڊيل نمائندن کي پرڏيهي موڪليو اسان برطانيا ۾ وڃي پارليمينٽرين سان ملاقاتون ڪيوسين انهن اسان کي ڀليڪار ڪيو ۽ اسان جي ڳالهه ٻڌي ۽ اسان کي خاطري ڪرائي ته ڀارت سان ڪشمير جو مسئلو اٿاريندا هن تجويز ڏني ته اسان کي پرڏيهه ملڪ پاڪستاني سفارتخانن ۾ ڪشمير ڊيسڪ قائم ڪرڻ گهرجي پيپلزپارٽي جي شاهده رحماني چيو ته سنڌ اسيمبلي پاڪستان ۾ وڌندڙ مذهبي جنون کي مدنظر رکندي بل منظور ڪيو آهي هن چيو ته ڀارتي حملا انساني حقن جون خلاف ورزيون آهن اسان ان جي ڀرپور مذمت ڪيون ٿا. هن چيو ته قومي اسيمبلي ميمبر عازي غلاب جمال چيو ته 1940 ۾ فاٽا جي ماڻهن ڪشمير تي قبضو ڪيو هو پر انهن کي واپس گهرايو ويو هن چيو ته ڀارت پاڪستان جي اندروني دهشتگردي جي صورتحال مان فائدو وٺندي واويلا ڪئي ته ڪشمير ۾ غير رياستي ماڻهو ڪارروايون ڪري رهيا آهن برهان واني جي شهادت کان پوءِ صورتحال چٽي ٿي ويئي ته اهو ڪشميرين جي پنهنجي جدوجهد جي آزادي جي تحريڪ آهي هن چيو ته ايل او سي تي ڇڪتاڻ جي معاملي تي حڪومت موثر انداز ۾ اڳتي وڌائي رهي آهي ڪوبه قدم سوچ ويچار کان پوءِ کنيو ويندو مسرت احمد زيد چيو ته ڪشمير جي باري ۾ ڪوئي به پاڪستاني  لاتعلق نٿو رهي سگهي ڇو ته اها اسان جي شه رڳ آهي پارليامينٽ پاڪستان جو سپريم ادارو آهي اتان کان ان مسئلي جي لاءِ اٿندڙ آواز ئي اهميت رکي ٿو. مسلم ليگ (ن) جي ملڪ ابرار احمد چيو ته پاڪستان ڪشمير جي مسئلي تي جنهن انداز ۾ آواز اٿاريو پيو وڃي پوري دنيا کي اسان جو ساٿ ڏيڻ گهرجي ڪشمير جو معاملو گڏيل قومن سميت دنيا جي هر فورم تي اٿارڻ گهرجي. جي يو آءِ (ف) جي محمد جمال الدين چيو ته ڪشمير جي مسئلي تي اسان کي آمريڪا تي اعتماد نه ڪرڻ گهرجي پر اسان کي خود اڳتي وڌڻ گهرجي هن چيو ته جنگ مسئلن جو حل نه آهي ان مسئلي کي سفارتي طريقي مطابق حل ڪرڻ گهرجي. ڊاڪٽر طارق فضل چوڌري چيو ته دنيا جي ڪابه مهذب قوم جنگ جي حالت ۾ به ايمبولينسن ۽ معصوم شهرين کي نشانو نه بڻائيندي آهي ڀارتي ظلم تي دنيا جي خاموشي سمجهه کان ٻاهر آهي هن چيو ته اسان ڀارتي شهرين کي نشانو نه بڻجڻ ڏينداسين. سيد نويد قمر چيو ته اسان ڏسڻ چاهيون ٿا ته ڀارتي حملن جي پويان ڪهڙا مقصد آهن ڀارت پاڪستان کي اڪيلو ڪرڻ چاهي ٿو هن چيو ته بدقسمتي سان ڀارت جو دهشتگردي ۽ ڪشمير جي حوالي سان پروپيگنڊا جاري اهي آمريڪي معاشرو خود ورڇ جو شڪار آهي اسان کي آمريڪي سول سوسائٽي ۽ ٿنڪ ٽينڪس کي آماده ڪرڻو پوندو پاليسي سازي ۾ پارليامينٽ کي فوقيت ڏني وڃي پارليامينٽ جي قومي سلامتي ڪميٽي قائم ڪئي وڃي.

 

پ پ سنڌ هاءِ ڪورٽ جو فيصلو سپريم ڪورٽ ۾ چئلنج ڪندي، ڪميٽي قائم

ڪراچي (اين اين آءِ) اڳوڻي صدر آف علي زرداري ۽ سنڌ جي وڏي وزير ۾ دبئي ۾ ٿيندڙ ملاقات ۾ سنڌ هاءِ ڪورٽ جي فيصلي کي سپريم ڪورٽ ۾ چئلينج ڪرڻ جو اصولي فيصلو ڪيو ويو آهي دبئي ۾ سنڌ جي وڏي وزير سيد مرادعلي شاهه ۽ اڳوڻي صدر آصف علي زرداري ۾ ملاقات ٿي ملاقات ۾ مرتضيٰ وهاب به گڏ هو ملاقات ۾ سنڌ ۾ صلاحڪارن کي قلمدان ڏيڻ جي حوالي سان مشورو ڪيو ويو جڏهن ته سنڌ هاءِ ڪورٽ جي فيصلي کي سپريم ڪورٽ ۾ چئلينج ڪرڻ جو اصولي فيصلو به ڪيو ويو ذريعن چيو ته آصف علي زرداري فاروق ايڇ نائڪ اعتزازاحسن ۽ لطيف کوسي تي ٻڌل قانوني ڪميٽي جوڙي ويئي آهي قانوني ڪميٽي سنڌ هاءِ ڪورٽ جي فيصلي کي سپريم ڪورٽ ۾ چئلينج ڪندي.

 

سنڌ اسيمبلي عورتن تي تشدد خلاف ٺهراءُ منظور ڪري ورتو

ڪراچي(اسٽاف رپورٽر) سنڌ اسيمبلي عورتن تي تشدد خلاف ٺهراءُ اتفاق راءِ سان منظور ڪري ورتو، عورتن تي تشدد خلاف عالمي ڏينهن تي عورت ميمبرز ٺهراءُ منظور ٿيڻ تي سنڌ سرڪار جي واکاڻ ڪندي چيو آهي ته ٺهراءُ  جي منظوري سان عورتن کي تحفظ جو هٿيار فراهم ڪيو ويو آهي، هاڻي قانون تي عمل به ٿيڻ گهرجي. سنڌ اسيمبلي جو اجلاس اسپيڪر آعا سراج دراني جي صدارت هيٺ ٿيو، اجلاس ۾ شروعات ۾ پ پ اڳواڻ ڊاڪٽر عاصم حسين، گورنر سنڌ سعيد الزمان صديقي جي صحتيابي ۽ ناليواري اديب جميل الدين عالي جي پهرين ورسي جي حوالي سان سندس مغفرت لاءِ دعا گهري وئي. اجلاس دوران پ پ ميمبر غزاله سيال ۽ ايم ڪيو ايم ميمبر ناهيد بيگم  عورتن تي تشدد خلاف گڏيل ٺهراءُ پيش ڪيو، جنهن جي اتفاق راءِ سان منظوري ڏني وئي. پ پ جي غزاله سيال چيو ته عورتن کي هڪ جهڙا حق حاصل آهن  ۽ ايم ڪيو ايم ميمبر ناهيد بيگم چيو ته  عورت تي گهريلو تشدد  کي ڪنهن به صورت ۾ تسليم نه ويندو، ٺهراءُ منظور ٿيڻ سان عورتن کي تحفظ ملندو.  فنڪشنل ليگ جي مهتاب اڪبر راشدي چيو ته سنڌ اسيمبلي عورتن جي حقن بابت قانونسازي ڪري هڪ بهتر روايت قائم ڪئي آهي،عورتن جي حقن  جي حوالي سان ٻين صوبن ۾ قانون سازي ناهي ٿيل، هاڻي ان قانون تي عمل به ٿيڻ گهرجي. صوبائي وزير نثار کهڙي چيو ته  سنڌ اسيمبلي عورتن ۽ اقليتن جي حقن بابت قانونسازي ڪئي آهي. اجلاس دوران صوبائي وزير نثار کهڙي خوراڪ کاتي بابت ميمبرز جي سوالن جا جواب پڻ ڏنا. اجلاس ۾ دوران ايم ڪيو ايم ميمبر ظفر ڪمالي پنهنجي سيٽ تي اٿي بيهي چيو ته  اسيمبلي ۾مڇر اچي ويا آهن، جنهن تي اسپيڪر چيو ته مڇر توهان سان گڏ ايوان ۾ آيا هوندا. اسپيڪر چيو ته ڪجهه مڇر ته ايوان ۾ اچي ويهي رهن ٿا، اسپري ان لاءِ نه ٿا ڪرايون جو سڀئي بيهوش ٿي ويندا. اجلاس ۾ ڳالهائڻ جي اجازت نه ملڻ تي اپوزيشن ليڊر خواجه اظهار ۽ نثار کهڙي وچ ۾ سخت لفظن جي ڏي وٺ به ٿي. خواجه اظهار چيو ته کيس اعتراض واري نقطي تي ڳالهائڻ جي اجازت هجڻ گهرجي.

 

وزيراعظم جي ترڪمانستان جي صدر سان ملاقات، مختلف معاملن تي ڳالهيون

اشڪ آباد (م.ڊ) وزيراعظم نواز شريف ٻن ڏينهن جي دوري تي وفد ساڻ ڪري ترڪمانستان پهچي ويو آهي، جتي وزيراعظم نواز شريف ترڪمانستان جي صدر سان ملاقات ڪئي، ان موقعي تي وزيراعظم جو چوڻ هو ته ترڪمانستان ۽ پاڪستان جا لاڳاپا مضبوط ۽ وڌيڪ بهتر ٿي رهيا آهن، روس کي سي پيڪ ۾ شامل ٿيڻ واري خواهش تي ڀليڪار ڪيون ٿا، تاپي منصوبو پاڪستان ۾ گيس جي ضرورت پوري ڪندو، ٻنهي ملڪن وچ ۾ هر سال اعليٰ سطح تي رابطو ٿيڻ گھرجي، چئني ملڪڻ ٽرانسپورٽيشن، رابطن سان ساڍا 3 ارب آباديءَ کي فائدو ٿيندو، ڪافي ملڪ سي پيڪ منصوبي ۾ شرڪت جا خواهشمند آهن، وزيراعظم جو چوڻ هو ته پاڪستان ۽ ترڪمانستان جي دوستي وقت سان گڏ مضبوط ٿي رهي آهي، تاپي پيس منصوبي تي اڳڀرائي ٿي رهي اهي، تاپي منصوبو خطي ۾ بهتريءَ جو منصوبو آهي، پاڪستان ۽ ترڪمانستان وچ ۾ ايئر روٽن ۾ واڌ ڪئي ويندي، سي پيڪ وچ ايشيائي ملڪن سان سلهاڙڻ لاءِ ترڪمانستان راضپو ڏيکاريو، اقتصادي راهداري منصوبي سان سڄي ملڪ ۾ ترقي ٿيندي.36

 

سنڌ حڪومت پوليو جي خاتمي لاءِ هنگامي قدم کڻي رهي آهي: مراد علي شاهه

ڪراچي(اسٽاف رپورٽر) سنڌ جي وڏي وزير سيد مراد علي شاهه سان گلگت بُلتستان جي وڏي وزير حافظ حفيظ الرحمان وزيراعليٰ هائوس ۾ ملاقات ڪئي. ملاقات ۾ گلگت بُلتستان جي وڏي وزير ڪراچي ۾ امن امان جي بهتر صورتحال تي سنڌ جي وڏي وزير کي واڌايون ڏنيون. گلگت بُلتستان جي وڏي وزير سنڌ جي وڏي وزير ۽ سندس ڪابينا کي گلگت بُلتستان جي دوري جي دعوت ڏيندي چيو ته اوهان اتي ڪابينا جو اجلاس به ڪوٺايو، هن چيو ته اوهان جي ۽ سنڌ ڪابينا جي دوري سان گلگت بُلتستان جي سياحت جي شعبي ۾ واڌ ٿيندي ۽ گلگت بُلتستان جي خوبصورت تفريحي هنڌن ڏانهن سياح به راغب ٿيندا ۽ سياحت کي هٿي ملندي. سنڌ جي وڏي وزير سيد مراد علي شاهه سندس دوري جي دعوت قبول ڪندي چيو ته هُو جلد ڪابينا جي ميمبرن سان گلگت بُلتستان جو دورو ڪندو. گلگت بُلتستان جي وڏي وزير سنڌ جي وڏي وزير کي اها آڇ به ڪئي ته هُو گلگت بُلتستان ۾ سنڌ هائوس لاءِ زمين فراهم ڪرڻ لاءِ به تيار آهي ۽ اوهان به ٻين صوبن جيان اتي سنڌ هائوس تعمير ڪرايو. سنڌ جي وڏي وزير سندس ان آڇ کي به قبول ڪندي چيو ته جلد ان حوالي سان لاڳاپيل مامرن جو جائزو وٺي ان رٿا کي به حتمي شڪل ڏني ويندي. گلگت بُلتستان جي وڏي وزير سنڌ جي وڏي وزير کي ميڊيڪل ڪاليج ۾ گلگت بُلتستان جون سيٽون وڌائڻ جي گذارش به ڪئي هن وقت سي ايم سي ۾ گلگت بُلتستان جون ٻه سيٽون آهن. سنڌ جي وڏي وزير چيو ته ان حوالي سان هُو صورتحال جو جائزو وٺندو. ٻئي پاسي سنڌ جي وڏي وزير سيد مراد علي شاهه هوائي فوج جي شهيد آفيسر مريم مختيار کي خراج عقيدت پيش ڪندي ڪراچيءَ ۾ ڪاليج جو نالو سندس ناليءَ تي رکي ڇڏيو. هن گورنمينٽ ڊگري لياقت آباد جو نالو تبديل ڪري شهيد فلائنگ آفيسر مريم مختيار گورنمينٽ گرلز ڊگري ڪاليج لياقت آباد رکڻ واري سمريءَ جي منظوري ڏئي ڇڏي آهي. سنڌ جي وڏي وزير سيد مراد علي شاهه اخبار ۾ شايع ٿيل ان خبر تي جنهن ۾ سنڌ جي ٻن ضلعن دادو جي پيارو اسٽيشن ۽ بدين جي گولاڙچي مان هڪ ڏينهن ۾ پوليو جا 8 ڪيس سامهون اچڻ جو سختيءَ سان نوٽيس وٺندي صوبائي صحت واري سيڪريٽري کان ان حوالي سان فوري رپورٽ گهري ورتي آهي. وڏي وزير چيو آهي ته سنڌ حڪومت صوبي مان پوليو جي خاتمي لاءِ سختيءَ سان ڪوششون وٺي رهي آهي ۽ پوليو جي خاتمي لاءِ ٻارن کي پوليو جا ڦُرا باقاعدگيءَ سان پياريا پيا وڃن، پر انهن سمورين احتياطي قدمن باوجود پوليو ڪيسن جو سامهون اچڻ ڳڻتيءَ جوڳو آهي. هن سمورن لاڳاپيل ادارن کي سختيءَ سان هدايت ڪئي ته پوليو جي خاتمي لاءِ جنگي بنيادن تي قدم کنيا وڃن ۽ سنڌ کي پوليو کان پاڪ ڪرڻ لاءِ دستياب وسيلن سان ڀرپور ريت فائدو حاصل ڪيو وڃي.