تازيون خبرون

Daily Archives: November 8, 2016

سڀني سيف علي خان سان جلد شادي ڪرڻ کان منع ڪيو هو:ڪرينا ڪپور

ممبئي (شوبز نيوز) بالي ووڊ اداڪارا ڪرينا ڪپور ۽ اداڪار سيف علي خان وچ ۾ شادي کانپوءِ اڃا تائين ڪابه اڻوڻندڙ ڳالهه ٻڌڻ ۾ نه آئي ۽ ٻئي ڪافي پرسڪون زندگي گذارڻ ۾ مصروف آهن.  ڪرينا ڪپور هڪ انٽرويو ۾ انڪشاف ڪيو هو ته ڪافي ماڻهن مون کي چيو هو ته شادي کانپوءِ ڪنهن به اداڪار جو ڪيريئر ختم ٿي ويندو آهي ۽ هاڻ سيف علي خان سان شادي نه ڪجان، پر مان پنهنجي فيصلي تان پوئتي نه هٽيس. هاڻ جيئن ته مان هڪ ماءُ بڻجڻ وڃي رهي آهيان، مان ڄاڻان ٿي ته ماڻهو ان تي به هڪ ليبل لڳائي ڇڏيندا پر ان سان مون کي ڪو فرق نٿو پوي، ڪابه شيءَ مون کي ڪم کان روڪي نٿي سگهي ۽ مان چڱي طرح ڄاڻان ٿي ته ذاتي ۽ پيشه وارانه زندگي کي هڪ ٻئي کان الڳ ڪيئن رکڻو آهي.

 

شاهه رخ خان منهنجو روحاني استاد آهي،پنهنجي فلم ٺاهي رهيو آهيان:ساحر لوڌي

لاهور (شوبز نيوز) فلمن ۾ ڪم ڪرڻ ۽ هٽ ٿيڻ منهنجو هڪ خواب آهي، تنهن ڪري پنهنجي ذاتي فلم ٺاهي رهيو آهيان. اهڙن خيالن جو اظهار ٽي وي جي مشهور ڪمپيئر ساحر لوڌي پنهنجي هڪ انٽرويو ۾ ڪيو. هن چيو ته  جڏهن ماڻهو مون کي شاهه رخ خان چئي سڏيندا آهن ته خوشي ٿيندي آهي. هن چيو ته هو فن جي دنيا ۾ شاهه رخ خان کي پنهنجو روحاني استاد سمجهي ٿو. هن چيو ته  ٽي وي تي ڪمپيئر طور عوامي ڀلائي جي حوالي سان جيڪو ڪم ڪري رهيو آهيان ،ان تي فخر آهي.

 

اينڊي مري ڪاميابي جا ڏاڪا تيزي سان چڙهڻ لڳو، پيرس ٽينس ٽورنامينٽ پنهنجي نالي ڪري ورتو

پيرس (اسپورٽس نيوز) برطانيا جي ٽينس اسٽار اينڊي مري پيرس اوپن ٽينس ٽورنامنٽ جو ٽائٽل کٽي ورتو.   ميچ جي فائنل ۾ اينڊي مري جان ازنر کي هارايو، تفصيل مطابق فرانس جي گادي واري شهر پيرس ۾ مينز سنگلز مقابلن جي فائنل ۾ عالمي نمبر ٻه برطانيا جي اينڊي مري آمريڪا جي جان ازنر کي دلچسپ مقابلي کان پوءَ هارائي ٽرونامينٽ کتي ورتي، اينڊمري جو اسڪور 6.3 ،6.7 ،۽ 6_4 رهيو.

 

فلپائني باڪسر ميني پڪيائو ڊبليو بي او ويلٽر ويٽ جو عالمي ٽائٽل کٽي ورتو

لاس ويگاس (اسپورٽس نيوز) فلپائن جي باڪسر ميني پڪيائو ڊبليو بي او ويلٽر ويٽ جو عالمي ٽائٽل کٽي ورتو، هو آڪٽوبر 2015ع ۾ آمريڪي باڪسر فلوئيڊ مي ويدر کان مات کائي ويو هو، ميني پڪيائو ۾ ٿيل مقابلي ۾ هن ورگاس کي گڏيل فيصلي ۾ مات ڏني، 37 سالن جي باڪسر هڪ مات کانپوءِ رٽائرمينٽ جو اعلان ڪيو هو، ان کانپوءِ هن مقابلي لاءِ اعلان واپس ورتو هو، ججن 114، 113، 118، 119 ۽ 118-109 جي گڏيل فيصلي کانپوءِ ميني پڪيائو کي ڪامياب قرار ڏنو.

 

عقل تي لڳل مُهر: وسعت الله خان

هاڻي اهو ئي ڏسو ته دنيا جي ٻئي وڏي شپ بريڪر سينٽر گڏاڻيءَ جي ڪناري آندل آئل ٽينڪر کي لڳل باهه ۾ ٻه درزن ماڻهن جي فوت ٿيڻ جا سبب ڄاڻڻ ۽ اهڙي قسم جي سوين مزدورن کي بنيادي حفاظتي ۽ پيشيوراڻين سهولتن جي عدم فراهميءَ بابت جامع قدمن کڻڻ ۽ اهڙي صورتحال جي ازالي سان نه ته حڪومت کي دلچسپي آهي ۽ نه ئي وري ميڊيا جي هڪ وڏي حصي کي.

مورڳو نااهليءَ جي بنيادي خرابيءَ جي تدارڪ تان ڌيان هٽائڻ لاءِ جيڪي ڳالهيون هلايون پيون وڃن تن ۾ گهڻي مقدار ۾ شايع ٿيندڙ اردو اخبارن ۾ اها خبر به آئي آهي ته هن جهاز کي 19 ميمبرن وارو عملو 22 آڪٽوبر تي گڏاڻيءَ ڪناري ڇڏي ان ڏينهن واپس به هليو ويو هو. (يعني باهه لڳڻ جو سبب اهو آهي)

ڀارتي ۽ پاڪستاني پنجاب ۾ ٿڌ ۾ ڪوهيڙو ڇانئجي وڃڻ معمول جي ڳالهه آهي. گذريل ڪجهه سالن ۾ ماحولياتي تبديلين سبب ان ڌنڌ جون دورانيو هر سال وڌندو ئي رهيو آهي. دهليءَ کان امرتسر ۽ لاهور کان گجرات تائين زرعي ۽ صنعتي بيلٽ ۾ هزارين ڪارخانا هر سال لکين ٽن آلودگي فضا ۾ وکيرين ٿا.

سرحد جي ٻنهي پاسي لکين هاري فصل لڙڻ بعد زمين کي گند گاهه کان صاف ڪرڻ لاءِ باهه لڳائڻ جو سستو طريقو اختيار ڪندا آهن سو ڌنڌ ۾ آلوده ذرڙن جي ملي وڃڻ ڪري هاڻي سموڪ ۽ فوگ جي ميلاپ سموگ نالي خچر پيدا ڪري وڌو آهي.

پاڪستاني سوشل ميڊيا تي آمريڪي خلائي اداري ناسا جي هڪ سيٽلائيٽ تصوير شايع ٿي آهي جنهن مطابق ڀارتي پنجاب ۾ زرعي زمينن کي گاهه گند کان صاف ڪرڻ لاءِ باهيون ڏيڻ جي نتيجي ۾ فضا ۾ سموگ جو مقدار وڌي ويو آهي.

ان تصوير جي بنياد تي ثابت ڪيو پيو وڃي ته سموگ به هڪ سوچيل سمجهيل ڀارتي سازش آهي. پر هي عجيب سازش آهي جنهن جي نتيجي ۾ صرف پاڪستاني پنجابي نه پر دهلي، هريانا ۽ ڀارتي پنجاب به سموگ جي لپيٽ ۾ آهن.

ڪير به نٿو چوي ته صنعتي آلودگيءَ کي ختم ڪرڻ لاءِ ڪارخانن کي جديد طريقا استعمال ڪرڻ تي مجبور ڪرڻ لاءِ اثرائتن قانون ۽ نگرانيءَ جي شڪنجي ۾ آندو وڃي. ڪير به نٿو ٻڌائي ته هاري بغير دونهين جي پنهنجي زمين ڪيئن صاف ڪن؟

بس اهو حل ٻڌايو پيو وڃي ته ڀارت پنهنجو سموگ (ڪوهيڙو) پاڪستان ڏانهن نه ڌڪي. جي ايئن ٿي وڃي ته لاهور کان فيصل آباد تائين ڇانيل سموگ جي ڇٽي ويڙهجي وڃي.

مونکي ياد آهي ته 1999ع ۾ ڀارت راجستان جي علائقي پوکران ۾ ايٽمي تجربا ڪيا ته ان کانپوءِ سنڌ ۾ پيل شديد گرميءَ جو هڪڙو سبب اهو به ٻڌايو ويو هو ته اصل ۾ ايٽمي تجربن ٽيمپريچر وڌائي ڇڏيو آهي. پر ڇا بلوچستان ۾ ايٽمي تجربن سان به ٽيمپريچر ۾ ڪو اضافو ٿيو؟ بلڪل به نه.

هاڻي سموگ جهڙي سنگين مسئلي سان به ايئن ئي ٿي رهيو آهي. مثال طور پنجاب پوليس عمران خان جي حامين تي جهڙي نموني ڳوڙها آڻيندڙ گئس جي انڌا ڌنڌ شيلنگ ڪئي تنهن جو دونهون سموگ جي عذاب جي شڪل ۾ خود پنجاب تي نازل ٿي ويو آهي يا شريف ڀائر پاناما پيپرز جا ثبوت ايتري مقدار ۾ ساڙي رهيا آهن جو آسمان ئي دونهاٽجي ويو آهي.

ڪراچيءَ بابت سڀ ڄاڻين ٿا ته گذريل ڪيئي سالن کان مڪاني ادارن جو مفلوج ٿيڻ ۽ گڊ گورننس جي فقدان سبب پاڪستان جو هي سڀ کان وڏو شهر گند جو ڍير بڻجي چڪو آهي.

ريلوي واري وفاقي وزير سعد رفيق ڪراچيءَ پهچندي ئي ٽوڪيو ته پنجاب جا ننڍا ننڍا شهر به ڪراچيءَ کان وڌيڪ صاف آهن.

ان جو ٺهه پهه جواب صوبائي صلاحڪار مولا بخش چانڊيو اهو ڏنو ته پهريون پنجاب پنهنجي شهرن کي به ڪوهيڙي کان بچائي. ان کانپوءِ ڪراچيءَ جي صفائيءَ جي ڳالهه ڪري. (يعني گندگي ۽ آلودگيءَ جو موضوع به صوبائي خودمختياري مجروح ڪرڻ جي سببن ۾ شامل ٿي ويو)

رياست هلائيندڙن جي سموري ڪوشش اها آهي ته سٺي حڪمرانيءَ تي ڌيان ڏيڻ بجاءِ جڳاڙ، ٽوڪ طنز ۽ ڌيان هٽايو توڙي الزام تراشيءَ ذريعي پنهنجو پاڻ کي ذميواريءَ کان آجو قرار ڏئي وقتي طور ئي صحيح پر جان ڇڏائي وڃي.اهڙي طرح جي رويي سان رياست سسڪي سسڪي گهلجي ته سگهي ٿي پر پنهنجي ڪا مڪامي يا بين الاقوامي توانا سڃاڻپ نه ٿي ٺاهي سگهي. پر توانا سڃاڻپ ڪهڙو ڪمبخت ٿو ٺاهڻ گهري.عذابن جون ڪيئي شڪليون آهن پر عقل تي مُهر لڳي وڃڻ شايد سڀ کان وڏو عذاب آهي.

 

 

سنڌ ادبي ميلي ۾ ٿيل تاريخي ڳالهيون: رياض سهيل

سنڌ جي تاريخ نويس ڊاڪٽر حميده کهڙو جو چوڻ آهي ته هندستان جي سياستدانن کي اندازو نه هو ته ننڍي کنڊ جي ورهاڱي وقت ايڏي پئماني تي لڏپلاڻ ٿيندي ۽ ان حوالي سان ڌرين ۾ لکت ۾ معاهدو به نه ٿيو هو. ڪراچيءَ ۾ پهرين سنڌ فيسٽيول ۾ خطاب ڪندي هن برطانوي راڄ جي تاريخ ۽ پاڪستان جي قيام ۽ ان کان پوءِ جي صورتحال تي روشني وڌي.

انهن ڏينهن ۾ ڊاڪٽر حميده کهڙو جو والد ايوب کهڙو، عبدالله هارون ۽ جي ايم سيد سنڌ جي سياست ۾ سرگرم هئا. حميده کهڙو ٻڌايو ته ننڍي کنڊ جي ورهاڱي وقت اهڙو ڪو معاهدو نه ٿيو هو ته ڀارت مان لڏپلاڻ ٿيندي ڇو جو فقط پنجاب اهڙو صوبو هو جيڪو ورهايو، تنهن ڪري اتان لڏپلاڻ جو امڪان هو پر سنڌ جي ان وقت جي سياستدانن کي بلڪل به اندازو نه هو ته ٻين علائقن مان ايتري لڏپلاڻ ٿيندي جو هتان جي سماجي، سياسي ۽ معاشي صورتحال ئي تبديل ٿي ويندي.

سنڌ جي بمبئيءَ کان عليحدگيءَ واري تحريڪ ۽ محمد علي جناح جي بنيادي نقطن ۾ ان جي ذڪر تي ڳالهائيندي هن چيو ته بمبئي ۾ شامل ٿيڻ سبب هتان جي ماڻهن کي ڪيئي تڪليفن کي منهن ڏيڻو پيو هو. جيڪڏهن ڪنهن کي ميٽرڪ جو امتحان به ڏيڻو پوندو هو ته ان کي سامونڊي جهاز ۾ سوار ٿي بمبئيءَ وڃڻو پوندو هو.

هڪ سوال جي جواب ۾ حميده کهڙو جو چوڻ هو ته سنڌ جي بمبئيءَ کان عليحدگيءَ وقت اهڙي صورتحال نه هئي جو ان وقت جا سياستدان سنڌ جي آزاديءَ جو مطالبو ڪن ها ۽ اهو تاثر به درست ناهي ته سنڌ کي پاڪستان ۾ شامل ٿيڻ کان علاوه آزاديءَ جو آپشن به ڏنو ويو هو.

بلوچستان رياست سان برطانيا جو معاهدو هو ته اهو هندستان مان نڪرڻ وقت بلوچستان کي آزاد ڪندو. او معاهدو ياد ڏيارڻ لاءِ خان آف قلات محمد علي جناح کي پنهنجو وڪيل بڻائي لنڊن موڪليو هو پر هن جي هڪ به نه ٻڌي وئي ۽ هن کي ڀارت يا پاڪستان ۾ شامل ٿيڻ جو مشورو ڏنو ويو. سنڌ جي سياستدانن کي اندازو هو ته سندن مطالبو تسليم نه ٿيندو، تنهن ڪري هنن اهڙو ڪو مطالبو ئي نه ڪيو.

ڊاڪٽر حميده کهڙو پاڪستان ٺهڻ کانپوءِ واري سياست تي تفصيلي ڳالهايو ۽ ٻڌايو ته وفاقي گاديءَ جو هنڌ ڪراچي يا ملتان کي ٺاهڻ جي تجويز هئي پر ڪراچيءَ کي ملڪي گادي بڻائڻ جو فيصلو ٿيو جنهن لاءِ سنڌ حڪومت بيريڪس ۽ آفيسون ٺاهيون پر بعد ۾ ڪراچيءَ کي سنڌ کان الڳ ڪرڻ جي ڳالهه ڪئي وئي جنهن تي ان وقت جي سياستدانن چيو ته برطانوي راڄ ۾ ته ڪلڪتو جيڪڏهن بنگال ۽ ڀارت جي گاديءَ جو هنڌ ٿي سگهي ٿو ته ڪراچي ڇو ڪونه.

حميده کهڙو جو والد ايوب کهڙو سنڌ جو وڏو وزير رهي چڪو آهي. حميده کهڙو پنهنجي والد جي لياقت علي خان ۽ محمد علي جناح سان اختلافن جو ذڪر به ڪيو. هن چيو ته هڪ اجلاس ۾ لياقت علي خان شڪايت ڪئي ته سندس زرعي فارم کي پاڻي نٿو ملي جنهن تي سندس والد کيس ٻڌايو ته هتي ايڏي وڏي آبادي جو آئي آهي جنهن کي پيئڻ لاءِ پاڻي ڏنو پيو وڃي.

حميده کهڙو مطابق پاڪستان جڏهن ڪشمير ۾ پهرين ويڙهه وڙهي ته وفاقي حڪومت سنڌ حڪومت لاءِ پئسا ڏيڻ لاءِ چيو ته سندس والد اعتراض ڪيو ته اهي پئسا هتي جي تعليم ۽ صحت جي شعبن جا آهن هو نٿو ڏئي سگهي. جنهن کانپوءِ گهربل رقم قرض طور وفاقي حڪومت کي ڏني وئي ان کانپوءِ اها رقم واپس ٿي يا نه معلوم نه آهي.

سندس مطابق ان ڇڪتاڻ سبب محمد علي جناح جي چوڻ تي سندس پيءُ جي حڪومت ختم ڪئي وئي. سنڌ جي هڪ ٻئي سياسي خاندان هارون خاندان جي فرد ۽ اقوام متحده ۾ پاڪستان جي اڳوڻي مستقل نمائندي حسين هارون پاڪستان جي قيام جي تاريخ ۽ سنڌ جي صورتحال تي ڳالهه ٻولهه ڪئي.

سندس چوڻ هو ته عالمي جنگ ۾ ڪانگريس برطانوي راڄ جي مدد نه ڪئي هئي تنهن ڪري ان پوري ڀارت ڪانگريس کي ڏيڻ نه ٿي چاهي تنهن ڪري هُن ان کي سزا ڏيڻ لاءِ ڀارت کي ورهائڻ لاءِ پلان ٺاهيو.

حسين هارون پنهنجي والد جون يادگيريون بيان ڪندي ٻڌايو ته آغا خان ڀارت جي پهرين آئين لاءِ لنڊن گول ميز ڪانفرنس جو سربراهه ڪيئن بڻيو.

هن ٻڌايو ته محمد علي جناح ۽ سلطان محمود آغا خان وچ ۾ اختلاف پيدا ٿي ويا، سندس والد عبدالله هارون ٻنهي جو گڏيل دوست هو. آغا خان کيس گهرايو ۽ کيس چيو ته توهان اسان جا گڏيل دوست آهيو جناح کي چئو پاڪستان جي تحريڪ جاري رکي ۽ هُن اهو پيغام وري جناح کي پهچايو. جنهن تي جناح کيس چيو ته آغا خان کي چئُه ته لنڊن ۾ گول ميز ڪانفرنس جي سربراهي ڪري.

حسين هارون مطابق جڏهن سندس والد ان ڳالهه کان آغا خان کي آگاهه ڪيو ته هن چيو ته گانڌي جي اڪثريت جو اڳواڻ آهي تنهن ڪري هن کي ان وفد جي اڳواڻي ڪرڻ گهرجي، جڏهن حتمي فيصلي لاءِ اجلاس جاري هيو ته جناح ڪم جو چئي هليو ويو، آغا خان گاديءَ جو نالو تجويز ڪيو جنهن تي گانڌيءَ چيو ته آغا خان کان وڏي ٻي ڪا شخصيت آهي ڇا، جنهن تي آغا خان چيو ته جي گانڌي جي ايئن سوچي ٿو ته پوءِ هو هن سربراهي اجلاس لاءِ راضي آهي.

(بي بي سي جي ٿورن سان)

 

 

پاناما لڪيس سياسي تاريخ جو اهم ترين فيصلو..!!!: غلام مصطفيٰ جمالي

پاڪستان جي عدالت به هن وقت وڏي امتحان مان گذري رهي آهي.پاناما لڪيس ڪيس.  جتي سپريم ڪورٽ کي سمورن تقاضن کي سامهون رکي ڪري انصاف ڪرڻو آھي اُتي سپريم ڪورٽ  کي عوام جي اعتماد تي به پورو لهڻو آهي.جيڪڏهن ائين نه ٿيو ۽ انصاف اهڙو ٿيو جنهن کي عوام قبول نه ڪيو ته پوء عدليه لاء به ڪيترائي مسئلا پيدا ٿي سگهن ٿا. ۽ جيڪڏهن عدليه پنهنجي انصاف جي تقاضن ۽ عوام جي اعتماد تي پورو لهي فيصلو ٿي ڪري ته پوء عدليه جي وقار ۽ بلندين ۾ اضافو ٿيندو.هميشه سياسي ڪيسن اندر عدالت کي اها مشڪل رهي آهي ۽ سندس فيصلي کي صرف قانوني پر عوامي اعتماد تي پورو لهڻو هوندو آهي.۽انهي معيار تي پورو لهڻ لاء عدالت کي مشڪلاتون پيش اينديون رهنديون آهن ۽ جيڪڏهن عوام فيصلي کان پوء اهو تصور ڪري ته انصاف جا تقاضا پورا ناهن ٿيا ته عدليه جي قبوليت گهٽجي ويندي آهي.۽ پوء عدليه کي عوام اندر مقبوليت ناهي ملندي.

اهڙي طرح اسان وٽ شهيد ذوالفقار علي ڀٽو جي عدالتي ڪيس جي فيصلو ثبوت طور موجود آهي.اهڙي ريت اسيمبليون ٽٽڻ ۽ پوء بحال ٿيڻ جهڙا مثال به سامهون آهن جسٽس نسيم حسن شاهه جڏهن ميان نواز شريف جي حڪومت کي بحال ڪيو ته انهي فيصلي کي چمڪ جو ڪمال قرار ڏنو ويو هوُ ۽ چيف جسٽس سجاد علي شاهه جڏهن محترمه بينظير ڀٽو جي حڪومت بحال ڪئي هئي ته  انهي فيصلي کي ذاتي عداوت قرار ڏنو ڏنو ويو هو.جڏهن ته انکان اعلاو سياستندانن تي لڳل ڪرپشن جا ڪيس ۽ ٻيا بدعنوانين جا ڪيس به اسانجي سامهون آهن.جڏهن ته آصف علي زرداري تي داخل ٿيل مختلف ڪيس ۽ پوء انهن ڪيسن مان باعزت بري ٿيڻ  جهڙا واضع مثال اسانجي سامهون آهن.اهڙي ريت مختياران مائي جو ڪيس اهڙي ضمن ۾ پوري دنيا لاء مثال آهي.۽ پوري دنيا تسليم ڪري ٿي ته مخياران مائي سان زيادتي ٿي هئي.پر جڏهن لاهور هاء جي چيف چسٽس چوڌري اعجاز مختياران مائي سان ٿيل ڏاڍئي واري ڪيس اندر ملزن کي بري ڪيو ته ۽ اهو قرار ڏئي چيو ته ڪا ڏاڍائي وغيره ناهي ٿي. ته پوء ملڪ اندر گهرام مچائڻ مان ڪهڙو فائدو.ان وقت پاڪستاني پوري فرنٽ توڙي اليڪٽيونڪ ميڊيا پريشان ٿي وئي ته هي ڪهڙو فيصلو ٿيو آھي.جڏهن ته چيف جسٽس اعجاز چوڌري صاحب به اهو فيصلو سموري قانوني تقاضن کي سامهون رکي ڪيو ويو هو. ان وقت عدالت صرف فيصلو ڪيو هوُ ۽ اهو به سوچيو هو ته عوام سندس حق آهي يا نه.  سندس فيصلي کان ناراض آهي.يا خوش آهي.اهڙو مئسلو ان وقت لاهور هاءِ ڪورٽ لاءِ نه هوُ.جڏهن ته اهڙي عدالتي فيصلي کان پوءِ  عوام انهي عدالتي فيصلي تي شور  ڪيو ۽ ميڊيا انهي مسئلي کي هڪ وڏو اشو بڻائي ڇڏيو،ان وقت حالتون ڪجهه اهڙيون هنيون جو مجبورن ٿي ڪري ان وقت جي وزيراعظم شوڪت عزيز کي مائي مختياران سان ملاقات ڪرڻي پئي.۽ ان وقت وزيراعظم حڪومتي اختيار استعمال ڪندي انهن ملزمن جي سزا کي روڪرائي ڇڏيو.جڏهن ته هاءِ ڪورٽ لاهور انهن کي بري ڪري ڇڏيو هوُ.جنهن کان پوءِ مڪمل سرڪاري سرپرستي اندر مختياران مائي جي ڪيس کي هلايو ويو.۽ مختياران مائي سپريم ڪورٽ اندر انهي ڪيس کي ٻيهر داخل ڪرايو. جنهن کانپوءِ اهي ملزم ڪيترائي سال جيل اندر رهيا،پر تنهن کانپوءِ به سپريم ڪورٽ مختياران مائي جي درج ڪيل اپيل کي رد ڪري ڇڏيو،

مختياران مائي جي ڪيس جو حوالو انهي ڪري ڏنو آهي جو مختياران مائي جي ڪيس کي پاڪستان اندر تمام گهڻي پذيرائي ملي.مختاران مائي سان زيادتي ٿي انهي ڪري اقوامي متحده ۽ ٻين ادران انهي ڪيس کي هاءَ پروفائيل بڻائي ڇڏيو.۽ کيس اقوامي متحده جي اجلاس جون پڻ دعوتون مليون.جڏهن ته قانون جي نظر ۾ مخيتياران مائي سان ڪابه زيادتي نه ٿي هئي..جڏهن ته ملزم پاڪستان جي اعلي عدالتن مان بري پڻ ٿي ويا. پر انهي فيصلي کي پاڪستان جي عوام قبول نه ڪيو ۽ انهي عدالتي فيصلي تي پاڪستان عوام اهڙو ته شور ڪيو جو اهو اشو وڃي اقوامي متحده تائين پهتو.ان ڪري هن وقت جيڪو پاڪستان جي سپريم ڪورٽ اندر پاناما لڪيس معاملو اچي پهتو آهي انهي فيصلي تي عدالت کي تمام گهڻي احتياط جي ضرورت آهي.هن وقت جيڪي ريماڪس پاناما ليڪس معاملي تي عدالت پاران اچي رهيا آهن انهن مان اهو صاف ظاهر ٿي چڪو آهي ته عدالتي فيصلو ميان نواز شريف جي خلاف ويندو.جڏهن ته ريماڪس ڏيڻ جي معاملي تي اسان وٽ چيف جسٽس افتخار چوڌري جي بهترين مثال سامهون آهي.اهو به ڪيس جي ٻڌڻي دوران تمام گهڻا ريماڪس ڏيندو آهي.جڏهن ته هڪ تاثر اهو به آهي ته ريماڪس تمام گهڻا سخت هوندا آهن،انڪري پاناما لڪيس معاملي تي عدالت کي پنهنجي فيصلي ٻڌائڻ کان پهرين پنهنجي ساک جو خاص خيال رکڻو پوندو.انهي ڪري عدالت جي گهرجي ته هوُ گهٽ ريماڪس واري پاليسي اختيار ڪري.جڏهن ته عدالت کي اها به ڳالهه سامهون رکڻي پوندي ته پاناما ليڪس معاملي تي ٿيڻ وارو عدالتي فيصلو پاڪستان جي تاريخ جو سڀ کان وڌيڪ اهم فيصلو آهي.۽ عدالت جنهن جي خلاف به فيصلو ڏيندي انهي کي پاڪستاني جي عوام کي منهن ڏيڻو پوندو انهن جون ڳالهيون ٻڌڻيون پونديون.جڏهن ته سندس سامهون کٽڻ واري پارٽِي جو جشن ۽ سندس کٽِيون مٺيون ڳالهيون ٻڌڻيون پونديون.اهو به ممڪن ئي ناهي ته هارائڻ واري پارٽي کي ڳاليهون ٻڌڻيون نه پون ۽ کٽڻ واري پارٽي خاموش رهي..!انڪري عدالت کي ڇنڊي ڦوڪي قدم کڻڻا پوندا.ڇو ته جيڪڏهن عدالت ئي سياسي بحران جو شڪار ٿي وڃي ته سندس تحمل نه ٿي سگهندو آهي.

*****

 

ڪراچي جي امن کي وري لڳل نظر ۽ قانون لاڳو ڪندڙ ادارن جون ڪارروايون…..!!!

رينجرز ۽ پوليس سميت قانون لاڳو ڪندڙ ادارن جي مسلسل ڪوششن بعد ڪراچي جو امن بحال ٿي ويو آهي، جنهن سبب عوام سک جو ساهه کڻي رهيو آهي، امن بحال ٿيڻ بعد وري ڪجهه امن دشمن ڪراچي شهر ۾ ٽارگيٽ ڪلنگ ڪري امن امان کي خراب ڪرڻ جي ڪوششن ۾ رڌل آهي، پوءِ اهي ملڪ اندر موجود دشمن هجي يا ٻاهريون دشمن جيڪو مسلسل ڪوشش ۾ آهي ته ڪراچي سميت پاڪستان جو امن بحال نه ٿئي ۽ رت جي راند جاري رهي.

هڪ ڀيرو وري قانون لاڳو ڪندڙ ادارا تحرڪ ۾ اچي ويا آهن، قانون لاڳو ڪندڙ ادارن ڪراچي ۾ دهشتگردن جي ٺڪاڻن جي سرگرم ٿيڻ جي انڪشاف کانپوءِ امن دشمنن جي سهولتڪارن کي گرفتار ڪرڻ جو فيصلو ڪيو ويو آهي، فرقيوارڻي ٽارگيٽ ڪلنگ روڪڻ جي حڪمت عملي به ٺاهي وئي آهي، رينجرز ۽ پوليس ٽارگيٽ ڪلنگ جي تازن واقعن جي رپورٽ به تيار ڪري ورتي آهي،

رپورٽن موجب فرقيواراڻي ٽارگيٽ ڪلنگ ۾ ٽي گروپ ملوث آهن، ٻن کي مذهبي ۽ هڪ کي سياسي پٺڀرائي حاصل آهي، صورتحال ۾ بهتري آڻڻ لاءِ مذهبي جماعتن جي اڳواڻن کي به گرفتار ڪرڻ جو فيصلو ڪيو ويو آهي. ڪراچي جو امن خراب ڪندڙ عنصرن خلاف قانون لاڳو ڪندڙ ادارن جي اهلڪارن ڪارروايون تيز ڪري ڇڏيون آهن، سيڪيورٽي اهلڪارن، رضويه سوسائٽي، ناگن چورنگي ۽ لانڍي سميت مختلف علائقن ۾ آپريشن ڪري مذهبي اڳواڻن سميت 50 کان وڌيڪ ماڻهن کي گرفتار ڪري ورتو آهي، رضويه ۾ گرفتارين جي خلاف رهواسين احتجاجي مظاهرو ڪري روڊ بند ڪري ڇڏيو. ان کان اڳ رينجرز رضويه ۾ ڳجهي اطلاع تي ٽاگيٽڊ آپريشن ڪيو، جنهن دوران سوسائٽي جا ايندڙ ويندڙ رستا بند ڪري آمد و رفت تي پابندي لڳائي وئي.

ٻئي طرف ناگن چورنگي ويجهو پوليس ۽ رينجرز گڏيل آپريشن ڪري مذهبي تنظيم جي اڳواڻ تاج حنفي کي گرفتار ڪيو، هٿيار به هٿ ڪرڻ جي دعويٰ ڪئي وئي آهي. ان کان اڳ هڪ ٻئي مذهبي اڳواڻ علامه مرزا يوسف کي به رينجرز ناظم آباد واري علائقي مان گرفتار ڪيو، رينجرز موجب سرچ آپريشن دوران هٿيار ۽ نفرت پکيڙيندڙ مواد به مليو آهي، جڏهن ته اهل سنت والجماعت جي صدر رب نواز حنفي ۽ مهتمم جامعه صديق اڪبر مولانا شعيب جي گرفتاري لاءِ ڇاپا هنيا پيا وڃن.  هوڏانهن ڪراچي ۾ هلندڙ سال هينئر تائين 29 هزار 536 شهري موبائيل فون کان محروم ٿي ويا آهن، رپورٽ موجب روزانو ڪراچي ۾ 98 موبائيل فون ڦر ٿيڻ جون وارداتون ٿين ٿيون، ان حوالي سان گلشن اقبال وارو علائقو اسٽريٽ ڪرائيم ۾ سڀ کان نمايان آهي. ڪراچي ۾ اسٽريٽ ڪرائيم جي وارداتن ۾ گهٽتائي نه اچي سگهي آهي. جنهن سبب شهرين ۾ بي چيني وڌندي پئي وڃي.