تازيون خبرون

Daily Archives: November 5, 2016

اورلينڊ وبلون کان ڌار ٿيڻ بعد ڊپريشن جو شڪار ٿي وئي هيم: هاليووڊ اداڪارا مرنڊا ڪير

لاس اينجلس(شوبز نيوز) هالي ووڊ اداڪار مرنڊا ڪير انڪشاف ڪيو آهي ته ڊپريشن جي مريضه رهي آهي، مرنڊا پنهنجي هڪ تازي انٽرويو ۾ چيو آهي ته هوءَ اداڪار اورلينڊ وبلون کان علحدگيءَ بعد 2013ع ۾ ڊپريشن جو شڪار ٿي وئي هئي. مرنڊا مطابق ڊپريشن سبب دل ۽ دماغ کي پهچندڙ اذيت جو اندازو چڱيءَ ريت ٿيو ۽ کيس احساس ٿيو ته حقيقتون ڪيتري قدر تلخ هونديون آهن، ڇاڪاڻ ته هوءَ فطري طور تمام خوش رهڻ واري عورت آهي

 

روس هالي ووڊ اداڪار اسٽيون سيگل کي شهريت ڏئي ڇڏي

ماسڪو(شوبز نيوزس) روس جو چوڻ آهي ته مارشل آرٽس جو ماهر ۽ هالي ووڊ اداڪار اسٽيون سيگل کي روسي شهريت ڏني وئي آهي. ميڊيا رپورٽن مطابق روسي صدر ولادي مير پيوٽن 90ع جي ڏهاڪي ۾ ڪيترن ئي هالي ووڊ فلمن ۾ ڪم ڪندڙ اداڪار جي شهريت جي ڪاغذن تي صحيحون ڪيون. صدر پيوٽن جي ترجمان چيو ته بهترين اداڪار ۽ روس جي باري ۾ سٺا خيال رکڻ جي ناتي سيگل کي شهريت ڏني وئي آهي. سيگل سٺو گٽار به وڄائيندو آهي. هن 2014ع ۾ هڪ ڪنسرٽ به ڪيو. سيگل کانسواءِ فرانسيسي اداڪار جيرارڊ ڊيپر ڊپو آمريڪي مارشل آرٽس فائٽر چيف مينن، آمريڪي باڪسر روئي جونر ۽ آمريڪي سنو بورڊ روڪ وائلڊ کي به روسي شهريت ڏني وئي آهي.

 

پرٿ ٽيسٽ ۾ اسٽارڪ ۽ وارنر آفريڪين کي ڏينهن جا تارا ڏيکاري ڇڏيا

پرٿ (اسپورٽس نيوز) ڏکڻ آفريڪي ڪرڪيٽ ٽيم کي آسٽريليا خلاف پهرين ٽيسٽ ميچ ۾ بالنگ ۾ مچل اسٽارڪ ۽ بيٽنگ ۾ ڊيوڊ وارنر ڏينهن جا تارا ڏيکاري ڇڏيا، پرٿ ۾ پهرين ٽيسٽ ميچ جي پهرين ڏينهن ڏکڻ آفريڪي ٽيم پهرين اننگز ۾ رڳو 242 رنسون ٺاهي ڍير ٿي وئي، مچل اسٽارڪ جي طوفاني بالنگ ۽ هيزل ووڊ جي حملن پروٽيز کي پير کوڙڻ نه ڏنا، اسٽارڪ شاندار بالنگ ڪرائيندي 4 ۽ هيزل ووڊ 3 وڪيٽو ورتيون، ڏکڻ آفريڪا طرفان ڊي ڪاڪ سڀ کان وڌيڪ 64 ۽ باووما 51 رنسون ٺاهيون، ٻيو ڪو بيٽسمين ذڪر جوڳي ڪارڪردگي ڏيکاري نه سگهيو، آسٽريليا جي اننگ شروع ٿي ته ڊيوڊ وارنر باهه ٻاري ڏني ۽ هو ون ڊي ميچ جيان تيز رفتاري سان کيڏندو رهيو، وارنر جي دونهيندار بيٽنگ آفريڪي بالرن جون متيون منجهائي ڇڏيون، ان دوران هو ففٽي هڻي ويو، پهرين ڏينهن جي راند ختم ٿيڻ تائين آسٽريليا بنا ڪنهن نقصان جي 105 رنسون ٺاهي ورتيون، ڊيوڊ وارنر 62 بالن تي 13 چوڪن ۽ هڪ ڇڪي جي مدد سان 79 ۽ مارش 29 رنسون ٺاهي ڪريز تي موجود هئا.

 

فيفا ايراني چاهيندڙن تي ميچ دوران مذهبي نعرا هڻڻ تي ڏنڊ لاڳو ڪري ڇڏيو

زيورخ (اسپورٽس نيوز) فٽبال ايسوسيئيشن فيفا ورلڊ ڪپ ڪواليفائنگ ميچ ۾ تماشائين کي محرم الحرام جي حوالي سان نعرا هڻڻ ۽ ڪارا ڪپڙا پائڻ تي ڏنڊ لاڳو ڪيو آهي. ان ميچ ۾ ايران ڏکڻ ڪوريا کي ٻڙي جي ڀيٽ ۾ هڪ گول سان هارايو. ميڊيا رپورٽن مطابق تهران ۾ اختيارين چاهيندڙن کي چيو ته هو ميچ دوران فٽبال بابت نعرا هڻڻ بدران محرم الحرام جي حوالي سان نعرا هڻن. ڏکڻ ڪوريا جا رانديگر به ميچ دوران ايران سان ٻڌي جي اظهار طور ٻانهن تي ڪاريون پٽيون پائين. فيفا ايران تي 37 هزار پائونڊ جو ڏنڊ لاڳو ڪيو. فيفا ڪروشيا ۽ ڪوسو فٽبال فيڊريشن تي به 6 آڪٽوبر تي ٿيندڙ ڪواليفائنگ ميچ ۾ شامل ٿيندڙ سربيا خلاف نعرا هڻڻ تي ڏنڊ لاڳو ڪيو آهي. واضح هجي ته ورلڊ فٽبال گورننگ باڊي فيفا ميچن دوران ڪنهن به قسم جي سياسي، مذهبي يا واپاري نياپن کان منع ڪري ٿي.

 

ڪيترائي سياسي مستقبل سپريم ڪورٽ جي هٿ ۾!؛ زاهد حسين

پاناما اسڪينڊل جي حل لاءِ هاڻي سڀني جون نظرون سپريم ڪورٽ جي پنج رُڪني بينچ تي کتل آهن. بنا ڪنهن شڪ جي مُلڪ جي سڀ کان وڏي عدالت جي لاءِ اهو معاملو هڪ وڏو سنجيده چئلينج آهي. ان مسئلي هڪ اهڙو سياسي طوفان پيدا ڪري ڇڏيو آهي، جنهن سان موجوده سياسي نظام درهم برهم ٿيڻ جو خطرو هو.

پهريان ته عدالت اِن معاملي کان پوئتي رهي، پر ڄاڻايل رياستي ادارن جي طرفان اسڪينڊل، جنهن ۾ وزيراعظم جا گهر ڀاتي شامل آهن، جي معاملي تي ڪارروائي ۾ ناڪامي کان پوءِ آخرڪار چيف جسٽس انور ظهير جمالي مداخلت جو فيصلو ڪري ورتو آهي. ان ڪيس جو نتيجو ئي مُلڪ جي سياسي مستقبل جي راهه جو تعين ڪندو. پر اڃا به ان مسئلي جي حل واري راهه ۾ رڪاوٽون آهن.

توڙي جو پاناما پيپرز اسڪينڊل جي تحقيقات جي لاءِ عدالتي ڪميشن جي قيام تي حڪومت ۽ پي ٽي آءِ ٻئي متفق آهن، پر ڇا ٻئي ڌريون انڪوائري جي شرطن (ٽي او آرز) سان انهي مسئلي تي به متفق ٿينديون؟ حڪومت ۽ مخالف ڌر گذريل ستن مهينن کان ان معاملي تي متفق نتيجي تي پهچڻ ۾ ناڪام رهيون آهن.

اهڙي صورتحال ۾ پوءِ سپريم ڪورٽ پاڻ ٽي او آرز جوڙيندي. جيتوڻيڪ سڀني ڌرين کي قائل ڪرڻ مشڪل ٿيندو، پر ڪنهن به آئين کان مٿانهين مداخلت کان بچڻ جي لاءِ صرف سپريم ڪورٽ جي طرف کان ٽياڪڙي وارو ڪردار ان مسئلي کان ڪڍي سگهي ٿو.

هڪ چينل مطابق عدالت اهي ريمارڪس ڏنا آهن ته طاقت جي ذريعي چونڊيل حڪومت جو تختو الٽائڻ غداريءَ جي ذمري ۾ ايندو. جيڪڏهن اهو سچ آهي ته اها انتهائي غير معمولي ڳالهه آهي. ڄاڻايل ڪميشن جي اختيارن ۽ ساخت تي گهڻو ڪجهه منحصر آهي. مبهم مينڊيٽ سان گڏ هڪ بي اختيار ڪميشن ان بحران کي وڌيڪ بگاڙي ڇڏيندي. تنهنڪري ان جي ذميواري به هاڻي سپريم ڪورٽ تي عائد ٿئي ٿي.

ان ۾ تعجب ناهي ته عدالتي فيصلو اچڻ کان پوءِ عمران خان پاران ڌرڻي جو فيصلو واپس وٺڻ سان گڏ سياسي گرما گرمي ۾ ترت گهٽتائي آئي آهي. هو صحيح نموني ان اسڪينڊل تي غير جانبداراڻي تحقيق جي لاءِ، ان کي مضبوط مهم جي فتح قرار ڏئي سگهي ٿو. ان ۾ ڪو شڪ ناهي ته عدالت کي صورتحال جي سنگين نوعيت سبب پنهنجي محتاط موقف کي هڪ طرف رکڻ ۽ مداخلت ڪرڻ تي مجبور ڪيو ويو.

پي ٽي آءِ جي حڪمت عملي شايد وقتي طور تي ڪارآمد ثابت ٿئي، پر ان جي جنگ ختم ٿيڻ ۾ اڃا به گهڻو وقت لڳندو. گذريل ٻن ڏينهن جي واقعن ۽ بي رحميءَ سان طاقت جي استعمال حڪومت جي سنگين سياسي بحران کي مُنهن ڏيڻ جي حوالي سان سوال اُٿاريا آهن، جنهن ۾ ڪافي محتاط طريقو اختيار ڪرڻ جي ضرورت هوندي آهي.

اها هڪ حقيقت آهي ته پاناما تحقيقات جو مسئلو ٿوري وقت ۾ حل نٿو ٿي سگهي، ان جو وڏي ۾ وڏو سبب عدالتي ڪميشن ۽ ان جي مينڊيٽ طئي ڪرڻ تي حڪومت جي هٺ ڌرمي ۽ اُن جي آڪڙ پڻ آهي. مالياتي الزامن تي تحقيقات جي لاءِ ذميدار ٻين رياستي ادارن جي مفلوج حالت بحران کي وڌيڪ وڌائي ڇڏيندو. بنا شڪ جي حڪومت وٽ سپريم ڪورٽ جي راءِ تي متفق ٿيڻ کانسواءِ ٻيو رستو ئي نه ٿو بچي.

پر حڪومت جي اندر ان حوالي سان ضرور خدشا موجود هوندا ته اپوزيشن پارٽين پاران جنهن تحقيقات جو مطالبو ڪيو پيو وڃي، ان جو فوڪس وزيراعظم جي خاندان تي هوندو يا نه؟ ان جو هڪ ٻيو خدشو تحقيقات جي ٽائيم فريم جو ٿي سگهي ٿو. ڇو ته پي ٽي آءِ جي اخلاقي فتح شريف حڪومت جي لاءِ سٺو سنئوڻ ثابت نه ٿيندي. عمران خان ڀلي گاديءَ واري شهر کي بند ڪرڻ ۾ ڪامياب نه ٿيو هجي پر بوکلاهٽ جي شڪار انتظاميه ته بلڪل اهو ئي ڪيو آهي ۽ نواز شريف جي اعصاب وڃائڻ پٺيان هڪ سبب اهو به آهي. هن جي سياسي قوت جو مرڪز داءُ لڳل هو. عمران خان هن جي لاءِ وڌيڪ خطرناڪ دشمن ان لاءِ به آهي ته هو پنجاب جي اسٽيبلشمينٽ، جيڪو ٽن ڏهاڪن کان صوبي ۾ شريف خاندان جي سياسي اثر رسوخ پٺيان حقيقي طاقت آهي کي ورهائڻ چاهي ٿو.

پي ٽي آءِ پاران مسلم ليگ (ن) کي شديد ڌڪ ان وقت پهچايو هو، جڏهن هو 2013ع جي چونڊن ۾ هڪ وڏي طاقت طور اڀري. پاناما پيپرز اسڪينڊل ۽ نواز شريف جا فوج سان لاڳاپن ۾ وڌندڙ ڇڪتاڻ پي ٽي آءِ کي مسلم ليگ (ن) جي ڳڙهه ۾ وڌيڪ پيش قدمي فراهم ڪرڻ جي لاءِ موقعو فراهم ڪيو. پنجاب ميدان جنگ آهي، ڪجهه مبصرين اُن کي جي ٽي روڊ جي جنگ به قرار ڏئي رهيا آهن ۽ چون ٿا ته طاقت جي رساڪشي جو فيصلو انهيءَ سان ٿيندو.

1999ع ۾ فوجي مداخلت جي ذريعي نواز شريف جي حڪومت جي خاتمي جي باوجود صوبي جي سول بيوروڪريسي، عدليه ۽ ٻين طاقتور حلقن مان نواز شريف جي حمايت ختم نه ٿي هئي. تنهن ڪري 2008ع جي چونڊن کانپوءِ ان جو اقتدار ۾ واپس اچڻ مشڪل هو به ۽ نه به. 2013ع جي چونڊن ۾ پارٽي پاران پنجاب ۾ پنهنجي طاقت تي مڪمل طور تي انحصار ڪندي وفاق ۾ پنهنجي حڪومت ٺاهي ۽ اهڙي طرح پي ٽي آءِ جي مشڪل چئلينج کي منهن ڏنو. پر اليڪشنز صوبائي طاقتور حلقن جي وچ ۾ پيدا ٿيل ڏار کي واضح ڪري ڇڏيو، اُهي طاقتور حلقا، جيڪي ماضي ۾ پيپلزپارٽي سان اقتدار جي ڇڪتاڻ ۾ نواز شريف جي مڪمل حمايت ڪندا هئا.

هاڻ جيڪڏهن پنجاب هڪ ٻي پارٽي متبادل طور تي سامهون اچي ٿي ته اها پنجاب جي اسٽيبلشمينٽ جي حمايت تي انحصار نه ٿي ڪري سگهي. ڀلي ئي پي ٽي آءِ پاران خيبر پخونتخواهه ۾ حڪومت ٺاهي آهي پر ان جي توجه هاڻ به بنيادي طور تي پنجاب تي آهي.

حڪومت جي لاءِ عمران خان جون اڻٿڪ ڪوششون ۽ رياستي ادارن تي حملن جي باوجود اسٽيبلشمينٽ ۾ هاڻ به ان جي چڱي حمايت موجود آهي. پاناما ليڪس ۽ بگڙيل سول ملٽري لاڳاپن عمران خان کي گاديءَ واري شهر ڏانهن هڪ نئين پيش قدمي جي لاءِ موقعو فراهم ڪيو پر نواز شريف هن ڀيري پي ٽي آءِ ڪارڪنن کي ايتري سولائيءَ سان اسلام آباد اچڻ نه ڏنو.

ان جي بجاءِ هنن جارحاڻي دفاع جي حڪمت عملي ٺاهي. ان دوران هن خبر ليڪ ٿيڻ سان پيدا ٿيل سول ملٽري دٻاءُ کي گهٽ ڪرڻ جي ڪوشش ڪندي وزير اطلاعات کي برطرف ڪيو آهي ۽ ’ملوث‘ ماڻهن خلاف قدم کڻڻ جو واعدو ڪيو آهي. جيئن ته حڪومت پاران شروع ۾ ئي دعويٰ ڪئي وئي هئي ته خبر ڪوڙي آهي، جيڪڏهن خبر ڪوڙي هجي ها ته معاملا ان حد تائين خراب نه ٿين ها.

فوجي قيادت جي ڪجهه ڏينهن ۾ تبديلي شايد انهيءَ مسئلي کي لٽڪائي رکڻ جي لاءِ ڪجهه اعتماد ڪيو آهي. هاڻ سياسي ڇڪتاڻ گهٽ ٿي آهي، پر سياسي ٽڪراءُ اڃان به ختم ناهي ٿيو. اها حقيقت آهي ته نواز شريف جي امتحان جو وقت آهي، ايندڙ ڪجهه مهينا اهم آهن، ان سميت ۽ ٻين ڪيترن ئي مستقبلن جو فيصلو ٿيڻ باقي آهي.

*****

 

حڪومت ۽ اپوزيشن جا ٽي او آر ۽ بلاول جو جلسو….؟؟: غلام مصطفيٰ جمالي

وزيراعظم ميان نواز چيو آهي ته سپريم ڪورٽ جي طرفان ڪيل انڪوائري ڪميشن جي تشڪيل کي قبول ڪيان ٿو.۽ جيڪڏهن الزام ثابت ٿيو ته قانون جي مطابق هر سزا ڀوڳڻ لاءِ تيار آهيان.اهڙِو يقين ميان نواز شريف سپريم ڪورٽ اندر پنهنجي هڪ تحريري بيان ۾ پيش ڪيو آهي،ٻئي پاسي سپريم ڪورٽ چيو هو ته حڪومت توڙي اپوزيشن ميمبر پنهنجا  ٽي او آر  جمع جي ڏينهن ڪنهن به صورت ۾ جمع ڪرائين،جيڪڏهن حڪومت توڙي اپوزيشن ميمبرن ٽي آر اوز جمع نه ڪرايا ته پوءِ عدالت پاڻ ويهي ڪري ٽي  او آر ٺاهيندي.جڏهن ته سپريم ڪورٽ اهو به چيو آهي ته حڪومت توڙي اپوزيشن ميبمرن جي هر ماڻهو کان آف شور ڪمپينن جي باري پڇان ڪئي ويندي ۽ ڪنهن سان به ڪا ريايت نه ٿيندي.جڏهن ته تحريڪ انصاف کي گهرجي ته هوُ ملڪ جي صورتحال کي بگاڙڻ  جي ڪوشش نه ڪري..سپريم ڪورٽ اها به تاقيد ڪئي آهي ته هر حال ۾ (سومر)تائين هڪ رڪني ڪميشن ٺاهي ويندي. جيڪا ٻنهي پاسن جو جائزو وٺندي ۽ پيش ڪيل ٽي او آر  تي فيصلو ڪندي.پر انهي عدالتي فيصلي کانپوءِ اها ته ڳالهه سچ ثابت ٿي آهي ته هي عدالت جو اهو واحد فيصلو آهي جيڪو عمران خان توڙي حڪومت ڌر مرشد جي مليل سڳي جيان چمي ڪري اکين تي رهيو آهي،نه ته عمران خان صاحب انهي پاناما لڪيس معاملي کي وٺي ڪري اچي ملڪ ۾ اهڙو ته ٻڙڌڪ مچايو هوُ جنهن پوري ملڪي نظام کي جام ڪري ڇڏيو هو.پر خير سان اهو معاملو عدالت ۾ هليو ويو آهي جيڪو هاڻ هلندو ئي رهندو.! پر انهي وچ ۾ ملڪ اندر هن وقت چڱي خاصي ماٺار ٿي وئي آهي انڪري هاڻي ملڪ جي اندروني توڙي ٻاهرين معاملن تي غور ويچار ڪرڻ تمام گهڻو ضروري آهي.انڪري حزب اختلاف پنهنجو فرض ادا ڪري. ۽ برسراقتدار حقيقي مسئلن مسائلن تي توجهه ڏي،انهي سلسلي اندر ميان نواز شريف جي هاڻ اها وڏي زميواري آهي ته هوُ سڀني قومي معاملن کي پارليامينٽ اندر کڻي اچي. قومي اسميبلي ۽ سنيٽ جو اجلاس مسلسل جاري هجڻ گهرجي. انهي سلسلي اندر تحريڪ انصاف جي قائد عمران خان تي به اهو فرض لاڳو ٿئي ٿو ته هوُ به انهي پارليامينٽ جي ٿيڻ وارن اجلاسن کي اهيمت ڏي.۽ ايوان ۾ اچي ڪري ڳاليهون ڪري. ۽ اهڙي ريت ٻين ادارن جي ميمبرن کي گهرجي ته هوُ ته پنهنجو ڪم نيڪ نيتئي سان سرانجام ڏين. جئين عوام کي رليف ملي سگهي.عمران خان صاحب کي اهو به سوچڻ گهرجي ته ملڪ اندر لوڊشيٽنگ آهي.بي روزگاري جو عروج آهي، تعليم جا مسئلا آهن،مهنگائي عوام جو جئيڻ جنجال ڪري ڇڏيو آهي، انڪري عمران خان صاحب جي انهي کاتن ۾ ٿيندڙ ڪرپشن کي بي نقاب ڪرڻ لاءِ ايوانن جو رخ ڪرڻو پوندو،۽ مان سمجهان ٿو ته اهو ايوان ئي آهي جتي عمران خان صاحب سٺِي نموني نشادهي ڪري سگهي ٿو.جڏهن ته اها به ڳالهه سامهون هجڻ گهرجي ته پاڪستاني جي ورڪنگ بائونڊري تي پڻ ڪيترا مسئلا پيش اچي رهيا آهن.ڀارت ڪنٽرول لائين ۽ ورڪنگ بائونڊري تي هر روز حملا ڪري رهي آهي.۽ گڏو گڏ ٻنهي ملڪ جي سفارتي عهديدارن تي تخريبڪاري هجڻ جا الزام پڻ لڳي رهيا آهن.۽ دهلي اندر هڪ سفارتي عهديدار  محمود اختر جي گرفتار ڪري تشدد پڻ ڪيو ويو هوُ،۽ کيس موت جي ڌمڪي ڏئي ڪري پنهنجي مرضي جو بيان پڻ ورتو ويو،اهڙي ريت محمود اختر واپس آيو ته پاڪستان پاران دهلي اندر پنهنجي ڇهه سفارتي عهديدارن کي واپس گهرائي ورتو آهي ۽  پاڪستان اندر هڪ اهڙو نيٽ ورڪ پڻ گرفتار ڪيو آهي جيڪو دهشتگردي ۽ جاسوسي ۾ ملوث آهي. ۽ ڀارت جي سفارتي خاني جي اٺ عهديدارن کي پڻ پاڪستان ڇڏڻ جو چيو ويو آهي ۽ ڀارت خد انهن ڇهه عهديدارن کي واپس گهرائي رهي آهي.اهڙي ريت ٻنهي ملڪن جا سفارتي تعلقات پڻ خراب ٿي رهيا آهن.اهڙِي ريت بيرون ملڪي اندر پاڪستان ڪٿي بيٺل آهي اهي سڀ ڳالهيون پارليامنيٽ اندر ئي اچي ڪري چئي سهگجن ٿيون.جتي سوال ڪيو ويندو آهي ۽ حڪومت انهي جو جواب ڏيندي آهي،ٿيڻ ته ائين گهرجي ها ته عمران خان صاحب کي پهرين ئي پارليامينٽ اندر اچي ڪري حڪومت سان روبرو ۽ دوٻدو ڳالهيون ڪرڻ گهرجن ها پر هُن ائين نه ڪيو.!! برحال اڃان به عمران خان صاحب حڪومت سان پارليامينٽ اندر هر معاملي کي سوال ڪري پنهنجا جواب طلب ڪري سگهي ٿو.جڏهن ته پيپلز پارٽِي به پڻ اهڙي ئي سياست شروع ڪري چڪي آهي.ٻئي پاسي پاڪستان پيپلز پارٽي جي اڳواڻ ۽ چيئرپرسن بلاول ڀٽي زرداري رحيم يار خان جي جلسي اندر خطاب ڪندي چيو ته2018ع سندس سال هوندو جيڪڏهن نواز شريف اسان جا چار مطالبا نه مڃندو ته ۽ 2017ع ۾ ئي الڪيشن ٿيندي. اسان جيڪا ملڪ اندر تبديلي آڻينداسين انهي تبديلي کي ڪير به روڪي نه ٿو سگهي،پر مان سمجهان ٿو ته انهي ۾ ڪو شڪ ناهي ته 2018ع پ پ جو سال هجي پر عوام به ڪارڪردگي کي ڏسي ڪري پوءِ پنهنجي اقتدار جي اڳواڻ جو فيصلو ڪندي آهي،هن وقت بلاول سمورو فوڪس پنجاب تي ڪري رهيو آهي ڄڻ سنڌ ته کيس ڏسڻ ۾ نه پئي اچي. انهي جو به هڪ سبب آهي ڇو ته پ پ سنڌ ۾ پنهنجو قعلو تصور ڪندي آهي.انڪري ڪري پ پ کي ڪهڙي ضرورت  جو سنڌ اندر جلسا ڪري جلسو ڪري عوام جي خير خبر لهي،جڏهن ته پنجاب اندر عمران خان ۽ ملسم ليگ ن جي جيڪا سرد جنگ هلي رهي هئي پ پ شايد انهي جو فائدو وٺڻ لاءِ پنجاب جي دوري تي نڪتل آهي،پر مان سمجهان ٿو ته بلاول کي اهو هزگز نه وسارڻ گهرجي ته سندس اصل سڃاڻپ سنڌ آهي،سندس ڌرتي ۽ پنهنجي ماءُ ۽ نانا سائين جي ڌرتي به سنڌ آهي ۽ سندس فرض بنجي ٿو ته انهي سنڌ جي عوام جي به سار سنڀال هلي،هن وقت سندس اندر چونڊيل نمائيندا اهڙي ڀيل ڪري رهيا آهن جيڪا ڪنهن کان ڳجهي ناهي،بلاول کي گهرجي ته انهن خلاف به ڪريڪ ڊائون ڪري جيڪي مسڪينن جي مال کي مال غنيمت سمجهي کائي رهيا آهن،باقي جيڪڏهن بلاول کي سنڌ سان همدرديون صرف ۽ صرف ڳالهين جي حد تائين آهي ته پوءِ مان سمجهان ٿو ته پنجاب ته پري رهيو پر بلاول لاءِ سنڌ اندر به گهڻيون ڏکايون پيش اچي سگهن ٿيون،بلاول چئي رهيو آهي ته 2018ع سندس سال آهي،چوڻ لاءِ ته سڀ ڪجهه آهي پر ڪرڻ لاءِ به ته ڪجهه هجي،بلاول جي جلسي اندر رحيم يار خان اندر ماڻهن جو وڏو انگ موجود هو،جنهن مان اهو به ثابت ٿي ٿو ته ممڪن آهي ته پنجاب اندر به بلاول پنهنجي سياسي کي مظبوط ڪري سگهي پر سوال اتي به سنڌ جو اٿي ٿو ڇو ته ها بلاول جي جنم ڀومي آهي ۽ اتي جي عوام جو بلاول تي وڌيڪ حق آهي جنهن ڌرتي جي عوام پ پ کي ڪڏهن مايوس ناهي ڪيو،انڪري بلاول کي پنجاب نه پر پوري ملڪ اندر سياست ڪرڻ ۽ سياسي جلسا ڪرڻ گهرجن پر انهي سان گڏ سنڌ جي مسئلن تي به وڌيڪ غور ڏيڻ گهرجن

 

 

پانامه ليڪس تي سپريم ڪورٽ جو فيصلو

چيف جسٽس انور ظهير جمالي جي سربراهي ۾ 5 رڪني لارجر بئنچ پاناما ليڪس جي جاچ بابت درخواستن جي ٻڌڻي ڪئي. ٻڌڻي شروع ٿيندي سلمان اسلم بٽ وزيراعظم جو جواب جمع ڪرايو. وزيراعظم طرفان داخل ڪرايل جواب ۾  چيو ويو آهي ته منهنجي ڪا به آف شور ڪمپني نه آهي، آئون لنڊن جي فليٽن، آف شور ڪمپنين ۽ ٻي ڪنهن به جائيداد جو مالڪ نه آهيان، ٽيڪس قانون موجب ادا ڪريون ٿا، ٻار منهنجي زير ڪفالت نه آهن جڏهن ته 2013ع ۾ سمورن اثاثن جو اعلان ڪري چڪو آهيان، آئين جي آرٽيڪل 62 ۽ 63 تحت نااهل قرار نه ٿو ڏئي  سگهجي. جسٽس شيخ عظمت سعيد چيو ته وزيراعظم جي ٻارن جا جواب ڇو ناهن جمع ڪرايا ويا، توهان اسان جو وقت ضايع ڪري رهيا آهيو، توهان کي 15 ڏينهن جو وقت ڏنو ويو هو، اصل ڌر جو ته جواب آيو ئي نه آهي، لکي ڏيو ته مريم نواز منهنجي ڪفالت ۾ نه آهي جنهن تي سلمان اسلم بٽ چيو ته مريم صفدر، حسن ۽ حسين نواز ملڪ کان ٻاهر آهن جنهن تي چيف جسٽس چيو ته ڇا ايندڙ سال جواب جمع ڪرايو ويندو، جيڪڏهن خبر هجي ها ته ائين ڪرڻو آهي  ته اسان عدالت ئي نه لڳايون ها جنهن تي جسٽس آصف سعيد کوسا ڪاوڙ جو اظهار ڪندي چيو ته قانون موجب جيڪڏهن جواب جمع نه ڪرايو ويو ته الزام تسليم ڪري وٺنداسين جنهن تي وزيراعظ۾ جي وڪيل چيو ته جواب داخل ڪرڻ جي لاءِ هڪ هفتي جي مهلت ڏني وڃي، جنهن تي جسٽس عظمت سعيد چيو ته اسان ٻه ڀيرا توهان کي مهلت ڏئي چڪا آهيون، جنهن کانپوءِ عدالت سندن هفتي واري گذارش رد ڪندي سومر تائين جواب داخل ڪرڻ جو حڪم ڏنو.

چيف جسٽس چيو ته سپريم ڪورٽ جي جج تي ٻڌل هڪ رڪني ڪميشن قائم ڪئي ويندي، ڪميشن بااختيار هوندي ۽ معاملي جي جاچ ڪندي ۽ سموريون ڌريون ڪميشن جي ڪم ڪار طريقي بابت تجويزون جمع ڪرائين. ميڊيا جهڙي طرح رپورٽنگ ڪري رهيو آهي ان سان اداري کي نقصان پهچي رهيو آهي، اسان ڪو به فيصلو ڪريون ٿا ته ميڊيا تي تبصرا شروع ٿي وڃن ٿا، اسان ڌرين جي ضابطي ڪار جا پابند نه آهيون.ٻڌڻي دوران سلمان اسلم بٽ چيو ته مريم صفدر وزيراعظم جي ڪفالت ۾ نه آهي، جنهن تي جسٽس شيخ عظمت سعيد چيو ته اها ڳالهه لکي ڏني وڃي. جنهن کانپوءِ ڪيس جي ٻڌڻي سومر تائين ملتوي ڪئي وئي جڏهن ته ان کان اڳ ۾ پاڪستان تحريڪ انصاف، شيخ رشيد ۽ جماعت اسلامي سپريم ڪورٽ ۾ ٽي او آر جمع ڪرايا جڏهن ته عدالت ۾ وفاقي وزير خواجه آصف، خواجه سعد رفيق، دانيال عزيز، شيخ رشيد، عمران خان، شيرين مزاري، شاهه محمود قريشي، جماعت اسلامي جو امير سراج الحق پڻ موجود هئا.