تازيون خبرون

Daily Archives: October 11, 2016

اومپوريءَ کي انتهاپسندي خلاف ڳالهائڻ ڳلي پئجي ويو، موتمار ڌمڪيون

ممبئي(شوبز نيوز) ڀارتي انتهاپسندن جو شڪار ڀارتي اداڪارن جو انگ ڏينهون ڏينهن وڌندو پيو وڃي، تازو ناليواري اداڪار اوم پوري کي به ڌمڪيون ملڻ شروع ٿي ويون آهن. ڀارتي اداڪار اوم پوري پنهنجي هڪ بيان ۾ چيو آهي ته مونکي انتهاپسندن کان ڌمڪيون ملي رهيون آهن. انتهاپسندن خلاف ڳالهائڻ تي مونکي موت مار ڌمڪيون ڏنيون پيون وڃن. هن چيو ته ڌمڪيون ملڻ کانپوءِ مونکي يا منهنجي گھر ڀاتين کي ڪو به نقصان پهتو ته ان جي ذميوار مودي سرڪار هوندي.

 

مشهور اداڪار گلاب چانڊيو جي زرعي زمين تي با اثرن پاران قبضو ڪرڻ خلاف فنڪارن ۽ قومپرست ڪارڪنن جو احتجاج

ڏوڪري (شوبز نيوز) ٽي وي جو مشهور اداڪار گلاب چانڊيو جي زرعي زمين تي با اثرن پاران قبضو ڪرڻ واري عمل خلاف ڏوڪري سنڌڙي آرٽ ڪلب ڏوڪري جي فنڪارن وفا نعيم ميمڻ، جسقپ اڳواڻ دو دو ديشي، معشوق مشوري ، ڊاڪٽر نصير خاصخيلي، شبن جتو ئي، بلاول جو ڻيجو، اربيلو زخمي اوڏ ۽ ٻين احتجاجن احتجاجي مظاهرو ڪيو. ان موق عي تي هنن چيو ته گلاب چانڊيو سڄي عمر فن جي دنيا سان سلهاڙيل رهيو ان جي زمين تي قبضو مذمت جو ڳو عمل آهي.هنن حڪومت کان گهر ڪئي ته گلاب چانڊيو جي زمين تان قبضو ختم ڪرايو وڃي ٻي صو رت ۾ احتجاج جاري رهندو.

 

92ع جي ورلڊ ڪپ دوران نجم سيٺي پويان پئجي ويو هو: عمران خان

اسلام آباد (اسپورٽس نيوز) ملڪي ڪرڪيٽ ٽيم جي اڳوڻي ڪپتان عمران خان چيو آهي ته پي سي بي ايگزيڪيوٽو ڪميٽي جو چيئرمين نجم سيٺي 1992ع جي ورلڊ ڪپ دوران هٿ ڌوئي منهنجي پويان پئجي ويو هو. پنهنجي هڪ بيان ۾ عمران خان جو چوڻ هو ته 1992ع جي ورلڊ ڪپ دوران جڏهن اسان ڏکيائين جو شڪار هياسين ته صحافي مون کي سخت تنقيد جو نشانو بڻائڻ شروع ڪيو ۽ چيو ته توهان مڪمل طور فٽ نه هيا ته ورلڊ ڪپ نه کيڏو ها، ڏکين مرحلن باوجود اسان ورلڊ ڪپ کٽيو، جنهن کانپوءِ اهو صحافي اسان جو سڀ کان وڏو مداح بڻجي ويو، جنهن جو نالو نجم سيٺي هيو.

 

آسٽريليا جي اڳوڻي جادوگر بالر شين وارن کي نئين دوست ملي وئي

لنڊن (اسپورٽس نيوز) اڳوڻي آسٽريلين ليگ اسپنر شين وارن کي نئين دوست ملي وئي، جنهن سان گڏ هو اڄڪلهه مختلف هنڌن تي ڏٺو پيو وڃي. هن سوشل ميڊيا تي 25 سالن جي خوبصورت ماڊل سارا  ميڪ لين سان گڏ ڪجهه تصويرون جاري ڪيون آهن، جنهن ۾ انهن جو مرڪڻ گهڻو ڪجهه ٻڌائي رهيو آهي، اهو پهريون ڀيرو ناهي ته شين وارن ڪنهن ڇوڪري سان گڏ نظر آيو هجي، هالي ووڊ فنڪارا لز هرلي کي ڇڏڻ کانپوءِ هو درجن کن سهڻين کي ڄار ۾ ڦاسائي چڪو ۽ عمر ۾ پاڻ سان اڌ سارا ميڪ لين سان گڏ ڊيٽنگ تي هو نئين دوست جا مسلسل  تعريفن جا گيت ڳائي رهيو آهي.

 

مملڪت اي مملڪت اچو، سنڌ کي ٻيهر علم سان سنواريون: محمود شام

تمام گهڻا مهرباني سنڌو نديءَ جي امرت پيئڻ وارن جي. ايترو سرور، ايترو ڪيف، اسان دل کولي رکي. اوهان به دل جون ڳالهيون ڪيون. مون کي يقين ٿيڻ لڳو آهي ته اسان سڀ گڏجي هڪ مثالي صوبو بڻائي سگهون ٿا. اهي حڪمران به اسان مان ئي آهن، جڏهن اوهان ۽ اسان سڀ گڏجي اُنهن تي زور وجهنداسين ته، هي سڀئي سائين، مخدوم، زردار، پير، سيد، جاگيردار، زميندار، سردار مجبور ٿي ويندا. آخر اُنهن کي رهڻو ته هتي ئي آهي. اُنهن جي اولاد کي به پنهنجي ٻنين، ڪيٽين، ٻيلن، جهنگن ۽ ڳوٺن جي زندگي گذارڻي آهي. اسان تعليم جي موضوع تي ڪجهه هفتا خيالن جي ڏي وٺ ڪنداسين. اُن جي سُٺائين ۽ خرابين تي ڳالهائڻو آهي. سنڌ سدائين علم ۽ ادب جو مرڪز رهي آهي. شاهه لطيف، سچل سرمست، شهباز قلندر ۽ ٻيون درگاهون اسان کي اهو ئي پيغام ڏين ٿيون ته علم هن ڌرتيءَ جو زيور آهي. علم، جيڪو دلين کي روشن ڪري ٿو، جيڪو روح کي تازگي بخشي ٿو. مرزا قليچ بيگ، آءِ آءِ قاضي، پير علي محمد راشدي، پير حسام الدين راشدي، هن ئي سرزمين جا فرزند آهن ۽ شهيد ذوالفقار علي ڀُٽو، جنهن پنهنجي زندگيءَ ۾ قابليت ۽ بهادريءَ جو سڪو، آمريڪا، چين، هندستان ۽ يورپ ۾ مڃرايو. پوءِ جنهن سڀني مسلمان سربراهن کي لاهور ۾ گڏ ڪيو. ڪيڏا نه وڏا وڏا ماڻهو، شاهه فيصل، معمر قذافي، انور سادات، بومحي الدين، ياسر عرفات؛ ڪيترائي ستارا لاهور ۾ چمڪيا. شهيد ڀُٽو به سنڌ جو قابلِ فخر فرزند هو. پوءِ شهيد محترمه بينظير ڀُٽو. سڀني سنڌو درياهه جو پاڻي پيتو هو. جي ايم سيد کي ڪير ڪيئن ٿو وساري سگهي، سياسي نظرياتي اختلاف پنهنجي جڳهه تي. پر اي ڪي بروهي کي به فراموش نٿو ڪري سگهجي. ايوب کهڙو، عبدالستار پيرزادو، عبدالحفيظ پيرزادو، اُهي سڀ سنڌ جي اسڪولن، ڪاليجن مان ئي پڙهي اڳيان آيا هُئا. شيخ اياز جي لازوال شاعري ڪهڙو پيغام ڏي ٿي، امر جليل جون ڪهاڻيون ۽ ڪالم ڪهڙو سنيهو ڏئي رهيا آهن. تعليم، تهذيب جو بنياد آهي، اها درسگاهن ۾ پرورش وٺي ٿي. شهيد ذوالفقار علي ڀُٽو انسٽيٽيوٽ آف سائنس اينڊ ٽيڪنالوجي (زيبسٽ) لاڙڪاڻي ۾ امريڪا جي نامور صدر ابراهيم لنڪن جو هڪ خط لڳل آهي، جيڪو هُن پنهنجي پُٽ جي استاد کي لکيو هو. هڪ صدرِ مملڪت، پنهنجي پُٽ جي تربيت، روشن مستقبل جي لاءِ اُن ٽيچر کي ڪهڙي نموني گذارشون ڪيون.

اڄ جي حڪمرانن کي اُن مان سبق حاصل ڪرڻ گهرجي، جيڪڏهن ڪري سگهن. منهنجي پڙهندڙن، پنهنجي پنهنجي علائقن ۾ تعليم جا مسئلا اُٿاريا آهن. اُهي ڪالم جي آخر ۾ پڙهجو. مان اهو عرض ڪرڻ چاهيندس ته اسان وٽ انگريز جي اچڻ کان پهريان ديني مدرسا هُئا، خانقاهون هيون، نهايت وسيع ويڪرا، جتي انسانن جا ذهن کُلندا هُئا. استادن جون جُتيون سڌيون ڪندي شاگرد گهڻو ڪجهه سکندا هُئا. انگريزن جيڪي سرڪاري اسڪول، يونيورسٽيون قائم ڪيون، اُنهن ۾ به وسعتن جو خيال رکيو ويندو هو. وڏا وڏا ڪلاس روم، اسيمبلي جو کليل ميدان، فٽ بال، هاڪي، ڪرڪيٽ، والي بال جا گرائونڊ، ڊوڙڻ جي لاءِ کليل ٽريڪ، جمنازيم، اهڙن اسڪولن ۽ ڪاليجن ۾ تعليم حاصل ڪرڻ وارن جا ذهن به تمام گهڻا وسيع هوندا هُئا. هاڻ تعليم کاتو رشوتون وٺي ننڍن ننڍن بنگلن ۾ پرائيويٽ اسڪول کولڻ جي اجازت ڏئي ڇڏيندو آهي. اهڙن ننڍن ننڍن گهرن ۾ شاگردن جا روح قيد ٿي ويندا آهن.

گلا تو گهونٽ ديا اهلِ مدرسه ني ترا،

ڪهان سي آئي صدا لااله الاالله.

ايندڙ هفتي اسڪولن جي بلڊنگن کي موضوع بڻائينداسين. اوهان جي مدد جي ضرورت آهي. اوهان جا ٻار ڪٿي پڙهي رهيا آهن؟ پڙهائي ڪيئن ٿي رهي آهي؟ مان والدين سان گڏ ٽيچرز کي به گذارش ڪندس ته هو پنهنجا تجربا ٻُڌائين. تجويزون ڏين. اهڙي نموني تعليم کاتي جي اڳوڻن اعليٰ آفيسرن کي به درخواست آهي ته اُهي به پنهنجا قيمتي مشورا ڏين. هُنن کي پنهنجي ملازمت جي زماني ۾ وزيرن جون ڪهڙيون ڪهڙيون غلط فرمائشون پوريون ڪرڻيون پيون، اُهي ٻڌائين. سنڌ جو تعليمي منظر صاف ڪرڻ سان ئي سنڌ کي مثالي بڻائي سگهجي ٿو.

هاڻ اچو پڙهندڙن جي پيغامن ڏانهن. تمام گهڻيون شڪايتون آهن. منهنجو عرض اهو هوندو ته پنهنجو ۽ پنهنجي شهر جو نالو ضرور لکو ته جيئن مسئلو حل ڪرڻ ۾ آساني ٿئي. هڪ ڀيرو ٻيهر اها درخواست آهي ته هن ڀيري اسڪولن ۽ ڪاليجن جي بلڊنگن تي معلومات ۽ راءِ ڏيو.

ترقياتي ڪم صرف ڪاغذن ۾ ٿي رهيا آهن. اسڪول اوطاقون بڻيل آهن. شهر جو ۽ پنهنجو نالو ناهي لکيو. قاضي شمس الدين مڱريو لکي ٿو، مُلڪ ۾ ڪرپشن، دهشتگردي عروج تي آهي، تعليم ئي اُن مسئلي جو حل آهي. سنڌ جي قديم ترين پڪي کان اسد ميراڻي اِهو فخر ظاهر ڪيو آهي ته 1974 کان چانهه پيئڻ سبب مشهور آهي. هُن جي چانهه ايتري مشهور آهي جو پري پري کان نوجوان موٽر سائيڪلن ۽ چنگچين تي چانهه پيئڻ ايندا آهن.

ممتاز علي جمالي دادو کان لکي ٿو، سنڌ جي وڏي وزير سيد مراد علي شاهه جي حلقي سنڌ اسيمبلي جي 73 جي آءِ يو سي چني ۾ حڪومت جا 33 پرائمري اسڪول آهن، جن مان 10 اسڪول هلن ٿا باقي بند آهن. حلقه 73 ۾ هڪ به سرڪاري اسپتال ناهي. ايمبولينس سروس به ناهي. غريب ماڻهن کي بيماريءَ جي حالت ۾ تڙپندي ڪنهن ويجهي شهر جي وڏي اسپتال ۾ کڻي وڃڻو پوندو آهي. مراد علي شاهه پنهنجي حلقي تي توجه ڏي. ضلعي خيرپور تعلقي ڪوٽڏجي کان بشير احمد ملاح لکي ٿو ته سنڌ ۾ گڊ گورننس (سُٺي حڪمراني) نالي ڪا شيءِ ناهي. علي حسن رحيمون ننگرپارڪر کان چئي رهيو آهي ته سنڌ جو وڏو وزير مراد علي شاهه سُٺي سوچ ۽ تبديلي کڻي ميدان ۾ لٿو آهي، پر جيستائين اسان جي تعليم جي صورتحال بهتر نه ٿيندي، تيستائين ڪجهه به بهتر نه ٿيندو. پوءِ به اسان کي وڏي وزير مان تمام گهڻيون اُميدون آهن. مشتاق احمد هوتاڻي پي پي پي (شهيد ڀُٽو) تعلقه سانگهڙ کان هڪ سُٺو جملو لکيو آهي ته ”رستي تي پٿريون هُجن ته سُٺو جوتو پائي هلي سگهجي ٿو، پر جيڪڏهن سُٺي جوتي اندر ڪا پٿري هُجي ته پوءِ سُٺي ۽ صاف رستي تي به هلڻ مشڪل ٿي ويندو آهي.“ انسان ٻاهر جي مشڪلاتن کان نه بلڪه پنهنجي اندر جي ڪمزورين کان هارائيندو آهي. تمام سٺي ڳالهه مشتاق احمد صاحب. جاويد مهر سنڌ پبلڪ لائبرري گلستان جوهر ڪراچي کان لکي ٿو، سُٺا ماڻهو اُن روشنيءَ جيان هوندا آهن، جيڪي فاصلا گهٽ ته ناهن ڪري سگهندا، پر منزل آسان ضرور بڻائيندا آهن. بدرالنساء دايو حيدرآباد مان توجه ڏياري ٿي ته ڪاپي ڪلچر تي وڌيڪ لکو، اهو ڪلچر تعليمي نظام کي اڏوهيءَ جيان کائي رهيو آهي. تمام گهڻي مهرباني. سينئر صحافي غلام رسول بروهي شادي لارج مٺي تعلقي بدين مان لکي ٿو ته سنڌ جي ٻهراڙيءَ وارن علائقن ۾ ماڻهن کي پيئڻ جو صاف پاڻي ميسر ناهي. منڇر ڍنڍ ۾ ٽيهه سالن کان اسپري ناهي ٿيو. غريب ماڻهو پنهنجي اولاد کي تعليم ڏياري نٿا سگهن. ’عبرت‘ ۾ اسان جو رفيق ڪار بخت علي بوزدار پنهنجي شهر گهوٽڪي جي باري ۾ لکي ٿو، اسان جي ڳوٺ ۾ صرف هڪ پرائمري اسڪول آهي. پرائمري اسڪول الله بخش ڪلادي، اُتي صرف هڪ استاد رکيل آهي، جيڪو پهرين کان پنجين درجي تائين پڙهائيندو آهي سو به صرف سنڌي ۾. گهوٽڪي ۾ تعليم جو ٻيڙو ٻُڏل آهي، حالانڪه تعليم وارو وزير گهوٽڪيءَ جو آهي.مان تمام گهڻو ٿورائتو آهيان اُنهن سڀني جواب ڏيندڙن جو. هاڻ انتظار آهي،

اوهان جي تبصرن جو، اسڪول ۽ ڪاليجن جي بلڊنگز متعلق. ڀلي سرڪاري هُجن يا پرائيويٽ. پنهنجي دوست ساٿين، مٽن مائٽن کي به چئو ته هن نيڪ ڪم ۾ حصو وٺن. پنهنجي آس پاس وارن اسڪولن جي باري ۾ تفصيل ضرور ٻُڌائين.

 

حسينت هميشه زنده رهندي…!!!! غلام مصطفي جمالي

امام الانبياءِ خاتم النبين حضرت محمد رسول الله صلي الله عليه وآله وسلم، الله تعاليٰ جا نهايت برگزيده آخري رسول آهن. سندن آندل پيغام اسلام انسانيت جي هر دور هر ماحول هر زماني لاءِ. ابدي ڪاميابين ڪامرانين ظاهرباطن دين و دنيا جي سعادتن جو علمبردار آهي.امن، اخوت، محبت رواداري، اتحاد، اتفاق، شجاعت،بهادري، عدل و انصاف، حق ۽ سچ کي سر بلند رکڻ جو داعي دين اسلام آهي. اسلام جي فطرت ۾ عظمت عزت سربلند عروج ترقي ۽ هر دور ۾ زنده رهڻ جي صلاحيت جو عظيم الشان راز سمايل آهي، اسلام جي سن هجري جي ابتدا، آقاءِ نامدار حضرت محمد رسول صه جي هجرت فرمائڻ واري مبارڪ همايون دور سان ٿيل آهي، حضرت محمد رسول صه جي هجرت امت جي ڪاميابي عروج بلندي جي عظيم تاريخ آهي. بهرحال اسلامي سال جي سن هجري جي شروعات محرم الحرام جي مقدس مهيني کان ۽ آخري ماهه مبارڪ ذوالحج شريف آهي. ذوالحج جو مهينو جنهن ۾ سيدنا ابراهيم عليه اسلام جن پنهنجي زندگي جي پياري متاع ۽ سرمايي سيدنا اسماعيل عليه اسلام يعني پنهنجي عظيم فرزند جي قرباني الله تبارڪ و تعاليٰ جل جلاله جي رضا ۽ حڪم موجب ڏني هئي. الله تعاليٰ پنهنجي پياري خليل الله حضرت ابراهيم عليه السلام جي ان عظيم ايثال ۽ قرباني ڏني هئي. حضرت اسماعيل ذيبح الله عليه اسلام کي الله جي راهه ۾ قربان ڪرڻ جي بدلي ۾ جنت مان دنبو حضرت جبرائيل عليه اسلام جي معرفت موڪليو. جيڪو حضرت اسماعيل عليه اسلام جي جاءِ تي بدلي ۾ قربان ٿي ويو ۽ سيدنا اسماعيل عليه اسلام بچي ويو، اسلامي هجري جي سال جي آخري ماهه ۾ سيدنا ابراهيم عليه اسلام مثالي قرباني ڏني، جنهن کي تاريخ انسانيت ياد رکي پئي ٻئي طرف نظر ڪجي ٿي ته:

اسلام جي سال جي شروعات محرم شريف يعني عزت واري مهيني کان ٿئي ٿي، اهو مبارڪ مهينو گهڻين يادن کان وڌيڪ، آقاءِ نامدار، مدني تاجدار سرور ڪائنات صه جي عظيم الشان خاندان شريف حضرت علي المرتضيٰ شير خدا، فاتح خيبر جي وڏي شان ۽ مان واري فرزند حضرت سيده ڪائنات سيده عابده طيبه طاهره خاتون جنت فاطمته الزهره رضي الله عنها، جي فرزند دلبند، جگر جي ٽڪري سيد شباب اهل الجنته، امام علي مقام عظمت نشان، شجاعت ۽ شهادت جي وڏي نامدار رهنما و رهبر امام سيدنا و مولانا آقا حضرت حسين عالي مقام رضي الله عنه، اسلام جي خاطر اسلام وارن لاءِ عظمت ناموس مصطفيٰ صه لاءِ تاريخ انسانيت ۾ ممتاز ۽ عظيم منفرد ۽ مثالي اسلام جي راز ۽ رمز جي راهه يعني عزيمت تي هلي ڪري عزيمت جي رستي هلندي دنيا جي عالمي تاريخ ۾ بي مثال، لاجواب قرباني پيش ڪئي. سيده الشهداءِ امام حسين عالي مقام رضي الله عنه جي شهادت قرباني سمورن پهرين اڳ وارن ۽ آخر وارن ۾ منفرد مثالي نوعيت جي شهادت ۽ قرباني آهي. اسلامي سال جي شروعات ۽ پڇاري، ابتدا ۽ انتها قرباني سان ٿيل آهي، ان فلسفي ۾ اونهو راز ۽ عظيم سبق سمايل آهي، جنهن جي مطابق اسان سڀني مسلمانن کي پنهنجي من ۾ ان رمز ۽ راز کي جاري ساري رکڻو آهي. يعني اسلام جي سربلنديءَ حق سچ جي فتح و نصرت لاءِ انسانيت جي اقدار جي تحفظ لاءِ اسلامي برتري قومي ۽ عالمي سطح تي مٿي بلند مقام لاءِ علم و عرفان سائنس جي ميدان ۾ ڪاميابي لاءِ سياست سماجي عمراني ديني روحاني مذهبي اسلامي دنياوي ڪامراني فلاح صلاح اصلاح لاءِ فقط ۽ فقط جهاد واري عظيم المرتبت راهه ۽ قرباني ۾ سمايل آهي.(اهو جهاد عين اسلامي اصولن جي مڪمل پاسداري ۾ اسلامي مملڪت جي سربراهه جي شان ۽ مان واري قيادت هيٺ منظم تربيت يافته فوج جي صورت ۾ هجي ته بهتر نتيجا خيز ثابت ٿيندو.)اهو جهاد ۽ قرباني توهان اسان کي سربلنديءَ جي مٿاهين مقام تي پهچائيندو، عظمت رفته کي بازياب ڪرائي ڏيندو. اگر مسلم امت بزدلي، بي همتي، سستي ڪاهلي، فرضن ۾ ڪوتاهي ۽ لاپرواهي ڪندي ته اسان توهان کي مرادين ناڪامين جي اونداهه ڪارن ڪنن جي تري ۾ ڌڪي ڇڏينديون. بزدليءَ سبب اسان جون صلاحيتون ختم ٿي وينديون اي اسلامي ملت جو احساس ۽ شعور رکڻ وارو مسلمان ڀائرو! اسلام جي سال جي ابتدا ۽ انتها واري ان وڏي سبق آموز، حق شناس سبق کي ياد رکو، اهو درس عظمت عزت مان شان آبرو فتح نصرت بلندي ۽ ترقي ۽ هميشه جي زندگي کي ڪامياب پابنده رکڻ جو درس آهي. اهو جهاد ۽ ڪاميابي جو درس آهي، نجات جو سبق آهي، قومن کي عروج ۽ هميشه وارو بلند رتبو فقط انهي لئي رستي تي هلڻ سان ملندو آهي، امام عاليمقام سيدنا حسين شهيد ڪربلا رضي الله عنه جن ظاهري طور شهادت جو تاج پائي هميشه هميشه لاءِ زنده جاويد بڻجي ويا. ”شهادت هي مطلوب و مقصود مومن نه مال غنيمت نه کشور کشائي“.پاڻ هن فاني دنيا مان ته هليا ويا، پر يزيد پليد ۽ ان جي باطل پرست شيطاني ٽولي کي هميشه جي شڪست ڏني، اهڙي شڪست ڏني جو رهندي دنيا تائين يزيديته مرده باد رهي آهي ۽ رهندي. حسنيت ۽ امام عالي مقام حضرت سيدنا امام حسين رضي الله تعاليٰ عنه هميشه هميشه لاءِ زنده باد آهن ۽ رهندا..

*****

 

تعليم کان ڀٽڪيل 30 لک ٻارڙن جو مستقبل …!

ڪجهه ڏينهن اڳ سنڌ جي وڏي وزير جي صدارت هيٺ سنڌ ايجوڪيشن فائونڊيشن جي بورڊ جو اجلاس ٿيو. اجلاس ۾ وڏي وزير مراد علي شاهه سنڌ جي سرڪاري اسڪولن جو تعليمي معيار خانگي ادارن کان گهٽ هجڻ جو اعتراف ڪندي چيو ته سنڌ حڪومت سرڪاري ادارن ۾ پڙهندڙ هڪ ٻار تي مهينو 800 رپيا خرچ ڪري ٿي، سرڪاري اسڪولن ۾ استادن جون پگهارون به خانگي شعبي جي تعليمي سسٽم جي پگهارن کان وڌيڪ سٺيون آهن، پوءِ به سرڪاري اسڪولن جي ڪارڪردگي ڇو بهتر ناهي؟ وڏي وزير چيو ته سرڪاري اسڪولن ۾ آئون استادن جي اعليٰ سطحي ٽريننگ لاءِ هڪ اڪيڊمي قائم ڪرڻ گهران ٿو ته جيئن صوبي ۾ معياري تعليم کي هٿي وٺرائي سگهجي ۽ ان سان گڏوگڏ اسان کي  سرڪاري اسڪولن ۾ ڊسيپلين پڻ آڻڻو پوندو، ان لاءِ اسان کي سخت اُپاءُ وٺڻا پوندا. وڏي وزير جو چوڻ هو ته 30 لک ٻار جيڪي اسڪولن کان ٻاهر آهن، انهن کي اسڪولن ۾ وٺي اچڻو آهي، اُن لاءِ آئون 500 رپيا هر ٻار کي ماهوار ڏيڻ لاءِ تيار آهيان. وڏي وزير جو اهو به چوڻ هو ته اسان سائنس، انگريزي ۽ رياضي ٽيبليٽ ذريعي ٻارن کي سيکاري سگهون ٿا. تعليمي شعبي ۾ ٽيڪنالاجي کي استعمال ڪريو، هاڻي ٻار انهي ۾ گهڻو تيز ٿي چڪا آهن. هن هدايت ڪئي ته اهڙا سافٽ ويئر بڻايا وڃن ته جيئن ٻار ٽيبليٽ ذريعي ٻڌي ۽ لکي سگهن. سنڌ جي وڏي وزير سيد مراد علي شاهه پاران تعليم ۽ صحت جي بهتريءَ لاءِ کنيل قدم يقينن ساراهه جوڳا آهن، وڏو وزير انهن ٻنهي شعبن جي ڪارڪردگيءَ متعلق ڪيترائي ڀيرا ڳڻتيءَ جو اظهار ڪري چڪو آهي، جنهن مان سندس سنڌ دوستيءَ جو بخوبي اندازو ٿئي ٿو. پر ورهين کان وڌندڙ جهالت جي انڌاري کي کن پل ۾ ختم نه ٿو ڪري سگهجي ۽ جيڪڏهن هنگامي بنيادي تي اُپاءَ ورتا به وڃن، تڏهن به نتيجا ظاهر ٿيڻ لاءِ ڪجهه وقت ضرور درڪار هوندو. وڏي وزير پاران سرڪاري اسڪولن جي ڪارڪردگيءَ تي ڳڻتيءَ جو اظهار بجا آهي ۽ اِها پڻ حقيقت آهي ته خانگي شعبي جي ڀيٽ ۾ گهڻو خرچ ڪرڻ باوجود سرڪاري اسڪولن جو رزلٽ ڪو خاطر خواهه نه ٿو هجي، جنهن بابت ماهرن توڙي عام ماڻهن جي الڳ الڳ راءِ آهي. ائين به ڪونهي ته ڪو هر خانگي اسڪول جي رزلٽ بهتر آهي، ڪيترائي ڪمائيءَ جي خيال کان کوليل خانگي اسڪول سرڪاري اسڪولن کان به پوئتي آهن، پر جيئن ته انهن اسڪولن ۾ ٻارن تي والدين جي توجه هجي ٿي ۽ اُهي اسڪول کان علاوه ٽيوشن جهڙي مرض تي به ڳري رقم خرچ ڪن ٿا، جنهن ڪري اسڪولن جي ڪارڪردگيءَ تي سوال نه ٿا اُٿن. اُن جي اُبتڙ سرڪاري اسڪولن ۾ پڙهندڙ ٻارن جي اڪثريت بنهه غريب هجي ٿي، جن جا والدين پيٽ پالڻ ۾ پورا هجن ٿا ۽ اُهي بس لوڪ لڄا خاطر ٻارن جو اسڪولن ڏانهن رُخ ڪرائين ٿا، جنهن ڪري خانگي ۽ سرڪاري اسڪولن جي ڪارڪردگيءَ ۾ ڏينهن رات جو فرق هجي ٿو. اُن کان علاوه سرڪاري ۽ خانگي شعبن جي نصاب ۾ پڻ خاصو فرق هجي ٿو. سرڪاري اسڪولن ۾ ورهين کان هلندڙ ساڳيو ئي نصاب پڙهايو وڃي ٿو،

اسان هنن سٽن ذريعي اهو چونداسين ته تعليم لاءِ سڀني کي پنهنجو پنهنجو ڪردار ادا ڪرڻ گهرجي ته جيئن روڊن تي گهمندڙ ۽ غلط ڪمن طرف متوجهه ٿيندڙ ٻارڙن جو مستقبل بهتر ٿي پئي.