تازيون خبرون

Daily Archives: October 4, 2016

سياسي قيادت سرجيڪل اسٽرائيڪ جي دعويٰ رد رڪري ڇڏي، ڀارتي جارحيت خطي جي امن لاءِ خطرو قرار

اسلام آباد( م.ڊ) پارلياماني پارٽين جي سربراهي اجلاس ۾ ڪشمير ۾ ڀارتي ظلمن ۽ بلوچستان ۾ هندستاني مداخلت جي مذمت ڪندي ڀارتي جارحيت کي خطي جي امن لاءِ خطرو قرار ڏنو ويو. عالمي برادي کان مطالبو ڪيو ويو آهي ته ڪشمير بابت گڏيل قومن جي ٺهرائن تي عملدرآمد ڪرايو وڃي. اسلام آباد ۾ وزيراعظم نواز شريف جي صدارت هيٺ پاڪ ڀارت ڇڪتان ۽ ڪشمير جي صورتحال تي پارلياماني پارٽين جو سربراهي اجلاس ٿي گذريو. اجلاس ۾ والاريل ڪشمير ۾ ڀارتي ظلمن، بلوچستان ۾ ڀارتي مداخلت، ڪلڀوشن ياديو جي سرگرمين جي مذمت ڪئي وئي. اجلاس کانپوءِ جاري ڪيل گڏيل پڌرنامي ۾ چيو ويو آهي ته وزيراعظم نواز شريف جي صدارت هيٺ ٿيل اجلاس ۾ ڀارتي فوج ۾ شهيد پاڪ فوج جي جوانن لاءِ دعا ڪرائي وئي. پڌرائي موجب ڪشمير مسئلي تي عوام، سياسي پارٽيون ۽ فوج متحد آهن. ڀارتي جارحيت خطي ۾ امن لاءِ خطرو آهي. ڪشمير بابت گڏيل قومن جي ٺهرائن تي عملدرآمد ڪرايو وڃي. ڀارت خلاف سرگرم فوج کي خراج تحسين پيش ڪريون ٿا. اجلاس ۾ چيو ويو ته بلوچستان پاڪستان جو وفاقي ايڪو آهي، ڪلڀوشن ياديو جون سرگرميون مذمت جوڳيون آهن. بلوچستان ۾ ڀارتي مداخلت جي مذمت ڪجي ٿي. سياسي پارٽين جي سربراهي اجلاس جي پڌرائي ۾ وڌيڪ چيو ويو آهي ته ڀارت پاڻ ڪشمير مسئلو گڏيل قومن ۾ کڻي ويو، هاڻي ان کي اڻٽُٽ حصو قرار ڏئي رهيو آهي، ڪشمير ڀارت جو اڻٽٽ انگ هجڻ واري دعويٰ کي رد ڪريون ٿا ۽ پاڪستان ڪشميرين جي اخلاقي، سياسي مدد جاري رکندو. اجلاس ۾ چيو ويو ته ڀارت ڪشميرين ۾ ڪجهھ ڏينهن دوران 110 ڄڻا شهيد ڪري ڇڏيا آهن. 8 ڏينهن ۾ ڀارتي فوج جي فائرنگ ۾ 7 سئو کان وڌيڪ ڪشميري اکين جي نور کان محروم ٿي ويا. پڌرائي ۾ وڌيڪ چيو ويو آهي ته سارڪ ڪانفرنس ۾ شرڪت کان انڪار واري ڀارتي عمل جي مذمت ڪريون ٿا، پاڻي کي هٿيار طور استعمال ڪرڻ وارو ڀارتي عمل به مذمت جوڳو آهي. گڏيل پڌرائي موجب سرجيڪل اسٽيرائيڪ جي ڀارتي دعويٰ نسورو ڪوڙ آهي. ڪشميرين جي تحريڪ تعريف جوڳي آهي ۽ اجلاس ان تحريڪ جي حمايت ڪري ٿو. ڀارت ڪشمير مسئلي تان ڌيان هٽائڻ لاءِ دهشتگردي ڪري رهيو آهي. اجلاس جي پڌرائي موجب پرڏيهي خطري کي منهن ڏيڻ لاءِ قومي اتحاد برقرار رکيو ويندو، هر قسم جي اڳرائي کي منهن ڏيڻ لاءِ قوم متحد آهي. ان کان اڳ اجلاس ۾ خطاب ڪندي وزير اعظم نواز شريف جو چوڻ هو ته وقت اچي ويو آهي ته سڄي دنيا جا ملڪ ڪشمير جي مسئلي کي نبيرڻ لاءِ پنهنجو ڪرادا ادا ڪن . وڌيڪ چيو ته ڪشمير معاملي تي پوري قوم جو متحد ٿيڻ سٺو سنئوڻ آهي. اڄ جي گڏجاڻي کان ملڪي سياسي قيادت پاران واضح پيغام ڏنو ويندو، هن چيو ته برهان مظفر واني جي شهادت کانپوءِ ڪشمير مسئلو بين الاقوامي ڌيان جو مرڪز بڻجي ويو آهي.37

 

پيپلز پارٽي ڪشمير مسئلي تي حڪومت جي حمايت جو اعلان ڪري ڇڏيو

اسلام آباد (اين اين آءِ) پاڪستان پيپلز پارٽي جي چيئرمين بلاول ڀٽو زرداري چيو آهي ته ڪشمير مسئلي جي حل سان خطي ۾ امن قائم ٿيندو، ڀارتي جارحيت خلاف متحد ٿي جواب ڏيڻ جي ضرورت آهي، قومي اتحاد سان ڪامياب ٿينداسين، عمران خان جي سولو فلائيٽ ٻين پارٽين لاءِ مشڪل آهي، جمهوريت خلاف ڪنهن به قدم جو حصو نه بڻجنداسين، سومر تي اي پي سي ۾ شرڪت کانپوءِ ميڊيا سان ڳالهائيندي هن چيو ته ڪشمير مسئلي تي ڪا به سوديبازي نه ڪئي ويندي، ڪشمير مسئلي تي سموريون سياسي پارٽيون گڏ آهن، هن چيو ته فوجي طاقت سان ڪشمير مسئلو حل نٿو ٿي سگهي، ڳالهين سان امن قائم ٿي سگهي ٿو، هن چيو ته ڀارت ظلم سان ڪشميرين جو رستو نٿو روڪي سگهي، ڪشمير عوام ڄاڻي ٿو ته پرامن جدوجهد سان اها آزادي ماڻيندي، اسان پهريون قدم کنيو آهي ۽ ڪشمير اشو تي حڪومت سان گڏ آهيون، هن چيو ته ڀارتي اخلاقي طور تي جنگ هاري چڪو آهي، هن چيو ته هندو قومپرستن جي رد عمل سان ڀارت جي پوزيشن ڪمزور ٿي وئي آهي، اها پاڪستان لاءِ هڪ ٽرننگ پوائنٽ آهي، اسان کي گڏجي ڀارت جو جواب ڏيڻو پوندو، جيڪڏهن گڏجي ڀارت کي جواب نه ڏنو ويو ته اسان جي پوزيشن ڪمزور ٿي ويندي، هن چيو ته عمران خان احتساب جي حوالي سان تمام سٺا نقطا اٿاريا آهن، هن جو نوجوانن کي متحرڪ ڪرڻ تعريف جو ڳو عمل آهي.

 

ايل او سي تي ڀارتي جارحيت ڪشمير صورتحال تان ڌيان هٽائڻ جي ڪوشش آهي: پاڪستان

اسلام آباد (اين اين آءِ) پرڏيهي سيڪريٽري اعزازاحمد چوڌري چيو آهي ته ڪشمير مسئلي جي معاملي تي پاڪستان ۾ عالمي سطح تي پذيرائي ملي آهي برهان واني جي شهادت تي ڪشميري عوام جو ردعمل مثالي هو ايل او سي تي ڀارتي جارحيت والاريل ڪشمير جي صورتحال تان ڌيان هٽائڻ جي ڪوشش آهي اسان جي پاليسي عدم مداخلت تي ٻڌل آهي جارحيت جو جواب ڀرپور انداز ۾ ڏنو ويندو. سومر تي وزيراعظم نوازشريف جي صدارت هيٺ ٿيندڙ پارليماني پارٽين جي اجلاس دوران شريڪ ٿيندڙن بريفنگ ڏيندي پرڏيهي سيڪريٽري اعزازاحمد چوڌري چيو ته پاڪستان ڪشمير مسئلي کي عالمي سطح تي ڀرپور انداز ۾ اجاگر ڪيو وزيراعظم نوازشريف 11 اڳواڻ ملڪن جي اڳيان ڪشمير مسئلي ۾ ڀارتي جارحيت جو معاملو اٿاريو هن چيو ته ڪشمير مسئلي جي معاملي تي پاڪستان جي بين الاقوامي سطح تي پذيرائي ملي آهي. او آءِ سي گروپ به پاڪستان جي موقف جي حمايت ڪئي آهي. هن چيو ته برهان واني جي شهادت تي ڪشميري عوام جو ردعمل مثالي هو. سرجيڪل اسٽرائيڪ جي دعويٰ ڪوڙ تي ٻڌل آهي هن چيو ته سنڌ تاس معاهدي تي ڀارت شوشو ڇڏيو پوءِ پاڻ ئي پوئتي هٽي ويو. ڀارت وائڙائپ جو شڪار آهي.

 

مسلسل ڪارروائين سبب دهشتگردن جي چيلهه چٻي ڪري ڇڏي آهي: وڏو وزير

ڪراچي (اسٽاف رپورٽر) سنڌ جي وڏي وزير سيد مراد علي شاهه سندس حڪومت سنڌ صوبي ۾ نيشنل ايڪشن پلان تي ان جي اصل روح مطابق عملدرآمد لاءِ ڀرپور ريت ڪم ڪري رهي آهي. هن چيو ته سنڌ صوبي مان ٽارگيٽ ڪلنگ، ڀنگ لاءِ اغوا، ڀتا خوري ۽ دهشتگردي جي خاتمي جو واحد رستو آهي. هن اها ڳالهه اڄ نيو سنڌ سيڪريٽريٽ ۾ اپيڪس ڪميٽيءَ جي فيصلن تي عملدآمد ڪراڻ واري اجلاس جي صدارت ڪندي ڪئي. اجلاس ۾ سنڌ جي وڏي وزير جي قانون واري صلاحڪار مرتضيٰ وهاب، اطلاعت واري صلاحڪار مولابخش چانڊيو، چيف سيڪريٽري سنڌ صديق ميمڻ، آءِ جي سنڌ اي ڊي خواجه، ايڊووڪيٽ جنرل ضمير گهمرو، گهرو سيڪريٽري رياض سومرو ۽ سيڪريٽري قانون شرڪت ڪئي. آءِ جي سنڌ پوليس وڏي وزير کي بريفنگ ڏيندي چيو ته نيشنل ايڪشن پلان تحت لائوڊ اسپيڪر ايڪٽ جي خلاف ورزي ڪرڻ جا 2278 ڪيس داخل ڪيا ويا آهن جنهن تحت 1584 ماڻهن کي گرفتار ڪيو ويو آهي. هن چيو ته 1195 چالان ڪيل ڪيسن مان 260 جو فيصلو ڪيو ويو آهي هن وقت 132 ڏوهاري جيل ۾ آهن، 980 ضمانت تي آهن 219 کي آزاد ڪيا ويا آهن.  سنڌ ۾ غيرقانوني رهندڙ افغانين بابت ڳالهائيندي آءِ جي سنڌ چيو ته 1512 ڪيس داخل ڪيا ويا آهن جنهن مان 1197 عدالتن ۾ چالان ڪيا ويا آهن. جڏهن 198 ڪيسن جو فيصلو ٿي چڪو آهي، جڏهن ته  2768 گرفتار افغانين مان 1293 جيلن ۾ آهن. هن چيو ته نفرت مواد ڦهلائيندڙ جي حوالي سان 119 ڪيس داخل ڪيا آهن جنهن مان 76 چالان ڪيا ويا آهن ۽ 16 ڪيسن جو عدالتن مان فيصلو ٿي چڪو آهي، هن وقت 26 ڏوهاري جيل ۾ آهن ۽ 13 ضمانت تي آهن جڏهن ته 23 کي آزاد ڪيو ويو آهي. آرم ايڪٽ جي خلاف ورزي بابت آءِ جي سنڌ چيو ته 17564 ڪيس داخل ڪيا ويا آهن جنهن مان 16166 جو چالان ڪيو ويو آهي جنهن مان 1771 جو فيصلو ٿي چڪو آهي. پوليس ۾ آرم ايڪٽ تحت 16597 ڏوهارين کي گرفتار ڪيو جنهن مان 10817 جيلن ۾ آهن 72 پوليس تحويل ۾ آهن 7268 ضمانت تي آهن ۽ 1576 کي آزاد ڪيو ويو آهي. ڪومبنگ آپريشن جا تفصيل ٻڌائيندي آءِ جي سنڌ چيو ته گڏيل طور تي 3069 آپريشن ڪيا ويا جنهن مان 1989 ڪراچي، 325 سکر ۽ 610 لاڙڪاڻي ۾ ڪيا ويا ۽ هينئر تائين 4513 ڏوهارين کي گرفتار ڪيو ويو آهن، هن وقت 3193 مختلف جيلن ۾ آهن، 889 ضمانت تي آهن جڏهن ته 179 کي آزاد ڪيو ويو آهي. بند گروهه ۽ ذيلي قومپرست تنظيمن خلاف ڪيل ڪاررواين بابت بريفنگ ڏيندي اي ڊي خواجه چيو ته 75 ڪيس رجسٽر ڪيا ويا آهن ۽ سمورن کي عدالت ۾ چالان ڪيو ويو آهي جنهن مان 5 ڪيسن جو فيصلو ٿي ويو آهي، پوليس 86 کي گرفتار ڪيو آهن 56 جيلن ۾ آهن ۽ 13 ضمانت تي آهن. آءِ جي پوليس مذهبي دهشتگردي بابت ٻڌايو ته 165 ڪيس داخل ڪيا ويا آهن جنهن مان 157 ڪراچي ۾ داخل ڪيا ويا آهن جنهن تحت 195 جوابدارن کي گرفتار ڪيو ويو آهي. پوليس 120 ڪيسن جا چالان عدالتن ۾ پيش ڪيا آهن، جنهن مان عدالتن رڳو 6 ڪيسن جو فيصلو ڪيو آهي، ۽ 169 دهشتگرد جيل ۾ آهن جڏهن ته 11 ضمانت تي آهن ۽ 15 کي آزاد ڪيو ويو آهي. هن چيو ته ڪلعدم مذهبي تنظيمن جي 116 دهشتگردن کي مختلف ڪارروائين ۾ ماريا ويا آهن. فرقيواڻي دهشتگري بابت آءِ جي سنڌ چيو ته 159 ڪيسن مان 155 ڪراچي جا شامل آهن جنهن تحت 131 جوابدارن کي گرفتار ڪيو ويو آهي. 114 ڏوهارين کي گرفتار ڪيو ويو آهي. جنهن مان 4 ڪيسن جو عدالتن مان فيصلو ڪيو ويو آهي، 197 ڏوهاري جيل ۾ آهن، 19 ضمانت تي آهن ۽ 15 کي آزاد ڪيو ويو آهي جڏهن ته 21 فرقيواڻي دهشتگردي مقابلن ۾ ماريا ويا آهن. هن چيو ته پوليس دهشتگردي بابت فنانس ڪرڻ جا 7 ڪيس داخل ڪيا آهن جن مان 6 ڪيسن جا چالان عدالتن ۾ پيش ڪيا آهن. پوليس 11 ڏوهارين کي گرفتار ڪيو ۽ اهي سمورا جيلن ۾ آهن. هن چيو ته پوليس نيشنل ايڪشن پلان تحت وال چاڪنگ ڪندڙ خلاف به ڪارروائي ڪئي آهي 546 ڪيس داخل ڪيا آهن، 471 ڪراچي، 64 سکر ۽ 11 لاڙڪاڻي ۾ داخل ڪيا ويا آهن. 546 ڪيسن مان 47 ڪيسن جا چالان عدالتن ۾ چالان پيش ڪيا آهن 3 ڪيسن جو فيصلو ٿيو آهي، هن چيو ته وال چاڪنگ ڪندڙ 78 جوابدارن کي گرفتار ڪيو آهي جنهن مان 22 جيلن ۾ آهن ۽ 50 ضمانت تي آهن. سنڌ جي وڏي وزير چيو ته هُو نيشنل ايڪشن پلان جي اجلاس ۾ مدرسن جي رجسٽريشن واري مامري کي کڻندو. هن چيو ته ان مسئلي تي قومي اتفاق راءِ هئڻ گهرجي. هن ٻڌايو ته 2309 مدرسن کي بند ڪيا ويا آهن. سنڌ پوليس ايس ايس پي انٽيليجنس سي ٽي ڊي تحت اينٽي ٽيررزم فناسنگ يونٽ قائم ڪيو آهي. وڏي وزير سيد مراد علي شاهه سنڌ ۾ نيشنل ايڪشن پلان تي ٿيندڙ اڳڀرائي تي پنهنجي اعتماد جو اظهار ڪيو ۽ هن چيو ته پراسيڪيوشن جي سائيٽ ۾ وڌيڪ بهتري جي ضرورت  آهي. هن  چيو ته حڪومت سنڌ پوليس کي جديد تربيت ۽ هٿيارن ڏئي انهن جي صلاحيتن کي وڌائڻ جي ڪوشش ڪري رهي آهي.

 

آرمي چيف جنرل راحيل شريف جو اسٽرائيڪ ڪورمنگلا جو دورو، آرمي جي آپريشنل تيارين جو جائزو ورتو

راولپنڊي (اين اين آءِ) آرمي چيف جنرل راحيل شريف اسٽرائيڪ ڪورمنگلا جو دورو ڪري آرمي جون آپريشنل تيارين جو جائزو ورتو ڪمانڊر اسٽرائيڪ ڪور پاڪ فوج جي اڳواڻ کي بريفنگ ڏني. آءِ ايس پي آر موجب جنرل راحيل شريف سومر تي اسٽرائيڪ ڪور منگلا جو دورو ڪيو ۽ فوج جي آپريشنل تيارين جو جائزو ورتو ڪماندڙ اسٽرائيڪ ڪور آرمي چيف کي بريفنگ ڏني. ڪور ڪماندڙ لاهور ڪور ڪماندڙ گجرانوالا ڪور ڪمانڊر پشاور ۽ ڊائريڪٽر جنرل ملٽري آپريشن به ان موقعي تي ان سان گڏ هئا.

 

عوام پاران رد ڪيل عمران خان کي علاج جي ضرورت آهي: خواجه سعد رفيق

اسلام آباد(م.ڊ) هاڻي گهر ويٺي ريل جي ٽڪيٽ بل ڪرايو، موبائل فون تي تصديقي پيغام وصول ڪريو، پاڪستان ريلوي اي ٽڪيٽنگ نظام متعارف ڪرائي ڇڏيو، وفاقي وزير ريلوي سعد رفيق جو چوڻ هو ته اي ٽڪٽنگ نظام گرين لائن ٽريننز تي لاڳو هوندو، 8 مهينن جي دوران تمام ٽرينن کي اي ٽڪٽنگ سان جوڙيو ويندو، اي ٽڪٽنگ تي سروس چارجز هوندا جيڪي ڏيڻا پوندا،  وفاقي وزير خواجه سعد رفيق اي ٽڪٽنگ سسٽم جي افتتاحي تقريب جي موقعي تي ميڊيا سان ڳالهائيندي چيو ته اڄ جو ڏينهن پاڪستان ريلوي جي تاريخ ۾ انتهائي اهيمت رکي ٿو، شروع ۾ اي ٽڪٽنگ جو نظام گرين لائن ٽرينن تي لاڳو ڪيو ويو آهي، لاهور ۽ راولپنڊي جي وچ ۾ هلندڙ ريل ڪارز کي به اي ٽڪٽنگ ۾ شامل ڪيو ويو آهي، عمران خان بابت ڳالهائيند خواجه سعد رفيق چيو ته عوام عمران خان کي رد ڪري ڇڏيو آهي، ڀارت پاڪستان جي سرحدن تي اڳرائي ڪري رهيو آهي پر هي ملڪ ۾ تماشو ڪري رهيو آهي،عجيب ماڻهو آهي نه عقل، نه دليل نه وري سمجهي ٿو هن شخص کي ڪنهن علاج جي ضرورت آهي.

 

ڪور ڪمانڊر ڪراچي جي وڏي وزير سان ملاقات، محرم دوران سيڪيورٽي انتظامن تي ڳالهيون

ڪراچي (اسٽاف رپورٽر) سنڌ جي وڏي وزير سيد مراد علي شاهه سان ڪور ڪمانڊر ڪراچي نويد مختار هڪ اهم ملاقات ٿي جنهن ۾ ايپڪس ڪميٽي جي فيصلن بابت پيش رفت، صوبي جي گڏيل امن امان جي صورتحال، محرم دوران سيڪيورٽي انتظام ۽ شهر ۾ ٽارگيٽڊ آپريشن بابت خيالن جي ڏي وٺي ڪئي وئي. ٻنهي وچ ۾ ملاقات اڄ وزير اعليٰ هائوس ۾ ٿي. ڪور ڪمانڊر ڪراچي نيشنل ايڪشن پلان تحت قائم ڪيل ايپڪس ڪميٽي جو ميمبر به آهي. هن وزيراعظم نواز شريف جي صدارت هيٺ ٿيندڙ نيشنل ايڪشن پلان جي اجلاس ۽ مجموعي سيڪيورٽي بابت ڳالهه ٻولهه ڪئي. سنڌ حڪومت ايپڪس ڪميٽيءَ جا اڃا تائين 16 اجلاس گهرايا آهن جنهن ۾ اهم فيصلا ڪيا ويا آهن.

 

عمران خان شاهه محمود قريشي کي پارلياماني پارٽيز ڪانفرنس ۾ وڃڻ کان روڪيو هو: شيخ رشيد

اسلام آباد (اين اين آءِ) عوامي مسلم يلگ جي اڳواڻ شيخ رشيد احمد چيو آهي ته عمران خان شاهه محمود قريشي کي وزيراعظم جي صدارت هيٺ پارليماني ڪانفرنس ۾ وڃڻ کان روڪيو هو مان عمران خان کي چيو ته شاهه محمود قريشي کي ڪانفرنس ۾ شرڪت کان نه روڪيو وڃي نجي ٽي وي سان ڳالهائيندي هن چيو ته پارليماني پارٽي ڪانفرنس ۾ مون نه گهرائي گهٽ عقل جو ثبوت ڏنو ويو آهي اجلاس ۾ اهڙن ماڻهن کي به گهرايو ويو جيڪي چون ٿا ته خدا جو شڪر آهي ته اسان پاڪستان ٺهڻ جي گناهه ۾ شامل نه ٿياسين هن چيو ته اجلاس ۾ جن ماڻهن کي گهرايو ويو اهي سڀ نوازشريف جا سپورٽر آهن هي ڀارت کي اکيون نٿا ڏيکاري سگهن هن چيو ته نوازشريف جيڪڏهن وڏي دل رکندو هجي ها ته مون کي ۽ چوڌري ڀائرن کي به گهرائي ها جيڪڏهن آصف زرداري کي فون ڪيو هو ته عمران خان کي به فون ڪري دعوت ڏيڻ گهرجي ها. هن چيو ته وزيراعظم ان کان گهٻرائجي ويو آهي هو ڄاڻي ٿو ته ان سان سخت سوال ڪيا ويندا ان لاءِ ڪانفرنس ۾ نه گهرايو ويو.

 

ملڪ جي 64 سيڪڙو ايراضيءَ تي پنج سيڪڙو ماڻهن جو قبضو آهي: سينيٽر سراج الحق

اسلام آباد (م.ڊ) جماعت اسلاميءَ جي امير سراج الحق چيو آهي ته ملڪ جي 64 سيڪڙو ايراضيءَ تي 5 سيڪڙو ماڻهن جو قبضو آهي، اسان جي قومي پاليسي هاري دوست ناهي، اسلام آباد ۾ ميڊيا سان ڳالهائيندي هن چيو ته هاري پئڪيج مان به مخصوص طبقي فائدو ورتو، سينيٽر سراج الحق جو وڌيڪ چوڻ هو ته پاڻيءَ جي کوٽ جي ڪري بلوچستان ۾ باغ تباهه ٿي رهيا آهن، هن چيو ته خراب زمينن جي لاءِ هنگامي بنيادن تي پروگرام جي ضرورت آهي، سراج الحق موجب ننڍن هارين کي بنا وياج قرض ڏنو وڃي.

 

ڀارت خوشفهمي ۾ نه رهي، جيڪڏهن حملو ٿيو ته ڀرپور جواب ڏينداسين: پرويز مشرف

ڪراچي (اين اين آءِ) آل پاڪستان مسلم ليگ جي سربراهه پرويز مشرف چيو آهي ته ڀارت فوج سرحد تي ڪابه سرجيڪل اسٽرائيل نه ڪئي آهي پر جيڪڏهن ڀارت حملو ڪيو ته ان ڳالهه کي مدنظر رکي ته اسان بوٽان نه آهيون جو خاموشي سان ويهي رهيون ڀارتي لابي آمريڪا ۾ پاڪستان جي خلاف تيزي سان ڪم ڪندي پاڪستان جي خلاف سازشن ۾ مصروف آهي پاڙيسري ملڪ جي سازشن سبب پاڪستان عالمي سطح تي اڪيلائپ جو شڪار ٿي رهيو آهي جيڪو ملڪ جي مفاد لاءِ صحيح نه آهي. گڏيل قومون ۽ آمريڪا خطي جي صورتحال جو جائزو وٺي ۽ ٻنهي ملڪن ۾ پيدا ٿيندڙ ڇڪتاڻ کي گهٽ ڪرائڻ ۾ پنهنجو ڪردار ادا ڪري پاڙيسري ملڪن جي سازشن تي ميڊيا ڀرپور مطالبو ڪيو اهڙن خيالن جو اظهار هن هڪ خصوصي انٽرويو ۾ ڪيو پرويز مشرف چيو ته اڙي حملي کي بنياد بڻائي ڀارت هر سطح تي پاڪستان جي خلاف سازشن ۾ مصروف آهي. هن چيو ته عالمي سطح تي پاڪستان جون ڪمزوريون سامهون آيون آهن جن کي فوري طور تي ختم ڪرڻ جي ضرورت آهي. هن چيو ته منهنجي دور ۾ ڀارڊر تي ڇڪتاڻ تمام گهڻي هئي ڀارت پنهنجون فوجون سرحد تي وٺي آيو هو جڏهن ته پاڙيسري ملڪ جا ناپاڪ ارادا خاڪ ۾ ملائڻ جي لاءِ اسان به سرحد تي وڏي انگ ۾ فوج مقرر ڪئي هئي هن چيو ته پاڪستان اهو واحد ملڪ آهي جتي ملڪي سالميت تي سمورا ماڻهو گڏ ٿي وڃن ٿا ڀارتي فوج ۾ ايتري صلاحيت نه آهي جو هو سرجيڪل اسٽرائيڪ ڪري سگهي پر جيڪڏهن ڀارت اهڙي غلطي ڪئي ته ان کي اسان جي جوانن پاران ڀرپور جواب ڏنو ويندو. هن چيو ته گڏيل قومن جي اجلاس ۾ ڪشمير جو موضوع بحث هيٺ آيو جيڪو منهنجي لاءِ مسرت جو سبب بڻيو. پاڪستان کي آمريڪا کان گڏيل رابطن سبب ٻين معاملن تي ڳالهه ٻولهه ڪرڻ گهرجي ته جيئن عالمي سطح تي اسان جو موقف به ٻڌو وڃي.