تازيون خبرون

Daily Archives: September 25, 2016

اتر سنڌ ۾ ٿيندڙ رينجرز آپريشن ۽ نڪرندڙ نتيجا……!!: حسن ناز سومرو

سنڌ ۾ ختم نه ٿيندڙ دهشتگردي کي پنهنجي منطقي انجام تائين پهچائڻ    لاءِ رينجرز جو آپريشن لازمي ٿي چڪو هو، هڪ طرف سنڌ جي اترين علائقن جنهن ۾ اوٻاڙو، ڏهرڪي، ميرپور ماٿيلو، پنو عاقل، روهڙي، سکر، ڳڙهي ياسين، رتو ديرو، نئون ديرو، لاڙڪاڻو، شڪارپور، ڳڙهي خيرو، جيڪب آباد،ٺل، ڪنڌڪوٽ ۽ ڪشمور جي علائقن ۾ نه فقط لاقانونيت، اقرباپروري، ڌاڙا، ڦرون ۽ اغواءُ جو وارداتون روز جون معمول بڻجي چڪيون هيون پر هتي ڌارين جي آبادڪاري سنڌي ماڻهن جو جيئڻ به جنجال ڪري ڇڏيو هو، هوڏانهن ٻئي طرف بين الاصوبائي دهشتگردن توڙي بين الاقوامي دهشتگردن هنن علائقن ۾ ديرو ڄمائي ڇڏيو هو جنهن جي نتيجي ۾ اتر سنڌ جي علائقن ۾ اغواءَ، ڦرن، قتل، ۽ خودڪش حملا ڪرڻ جون وارداتون عام ٿي چڪيون هيون.

سنڌ جا جيڪي حقيقي سنڌي آهن اهي امن پسند ماڻهو آهن انهن ڪڏهن به زندگي ۾ ڪنهن جو گھر اجاڙڻ يا ڪا چوري يا ڦر جي وارداتن چڱو نه سمجھيو آهي پر هنن سنڌ جي اترين علائقن ۾ بين الاصوبائي گروهن قبضا ڪري سنڌ جي حقيقي سنڌي ماڻهن کي پوئتي ڌڪي هو پاڻ اڳتي اچي سنڌي ماڻهن کي هيسائي ڇڏيو آهي، جڏهن ته غير سنڌي ماڻهو جيڪي مفاد حاصل ڪرڻ وقت پهنجو پاڻ کي سنڌي ظاهر ڪري سرڪار جون سموريون مراعاتون حاصل ڪري رهيا آهن جڏهن ته حقيقي ۽ اصل سنڌي ماڻهن لاءِ ڏاڍا مڙس تي انهن جي ملڪيتن تي قبضا ڪرڻ پاڻ کي سنڌ جو وارث ظاهر ڪري اڇي ۽ ڪاري جا مالڪ بڻجي سنڌين لاءِ آزار جي فضا قائم ڪئي ويئي هئي پر چوندا آهن ته قدرت ڪارساز جا ڪم ئي عجيب آهن هو دلين جا راز چڱي ريت ڄاڻي ٿو سو جڏهن فيصلا انسان جي سمجھ ۽ سوچ کا چڙهي ويندا آهن ته پوءِ قدرت پنهنجا فيصلا پاڻ ڪندي آهي ۽ پوءِ انهن ظالمن جا دل ۽ دماغ ڪم ڪرڻ ڇڏي ڏيندا آهن سو اهڙي طرح سنڌ ۾ قائم اهڙي ظالمانه فضا کي ختم ڪرڻ لاءِ هتي رينجرز آپريشن جي سخت ضرورت هئي. سو اچانڪ سنڌ سرڪار پاران سنڌ ۾ رينجرز جي اختيارن ۾ توصيح ڪري رينجرز کي اتر سنڌ ۾ آپريشن جي اجازت ڏيئي ڇڏي، جنهن جي نتيجي ۾ رينجرز پهرين مرحلي ۾ 60 کان 70 شڪي ماڻهن کي گرفتار ڪيو آهي جن کان پڇا ڳاڇا جاري آهي پر اتر سنڌ جا ماڻهو ايترا آزاد خيال نه آهن جو هو هر ڏوهاري ماڻهو جو ڏس پتو رينجرز کي ڏيئي سگھن ڇاڪاڻ ته انهن ماڻهن کي اڃان به هتي رهڻو آهي ۽ سمنڊ ۾ رهي ڪري مانگر مڇ سان وير رکڻ تمام ڏکيو ڪم آهي، اتر سنڌ ۾ رهندڙ بين الاصوبائي ماڻهن ۾ 90 سيڪڙو ماڻهو ڏوهاري سرگرمين ۾ ملوث آهن، انهن جا ڪم چوري ڪرڻ، ڌاڙا لڳرائڻ، مخبري ڪرڻ سنڌي ماڻهن کي هيسائڻ، سنڌي ماڻهن جي مال ملڪيت کي ڪنهن نه ڪنهن طريقي سان نقصان رسائڻ، سنڌي ماڻهن کي ايترو تنگ ڪرڻ جو هو پنهنجا گھر ۽ پلاٽ ڌارين حوالي ڪري هليا وڃن، سنڌي ماڻهن جي معصوم ٻارڙن کي اغواءَ ڪري انهن کان ڀنگ جي رقم طلب ڪرڻ، بين الاصوبائي ماڻهن کي گھرائي سنڌي ماڻهن کي طرح طرح سان ذليل ڪرڻ جهڙا ڪم شامل آهن، پر جڏهن اهي ڏوهاري اهڙين سنهي سڪي وارداتن مان ڊاپجي نه سگھيا ته انهن انٽرنيشنل دهشتگردن سان رابطو رکي سنڌ ڌرتي جو سڪون ڦٽائڻ چاهيو۽ سنڌ اندر اهڙيون ڪيئي ڪهري ڪاروايون ڪري سنڌي ماڻهن کي رت سان وهنجاريون ويو.

هونئن ته ڪشمور کان جيڪب آباد تائين هڪ اڌ ايم پي اي کان علاوه سمورا ايم پي اي ۽ ايم اين اي بلوچ آهي جيڪي بين الاصوبائي ماڻهو آهن پر انهن سنڌ صوبي کي نڌڻڪو سمجھي سنڌ جو زمينون ڀڳڙن مٺ ۾  خريد ڪري اڄ هو سنڌ جا وارث سڏرائي رهيا آهن جڏهن ته اهڙن غير سنڌي ايم پي ايز يا ايم اين ايز مان حقيقي سنڌي ماڻهن کي ڪوبه چڱائي جي اميد ڪونه آهي، هاڻي ته ڪلور اهو ڪيو پيو وڃي ته سنڌ ۽ بلوچستان جي پٽي  سان رهندڙ سمورن ڌارين جا سنڌ جا شناختي ڪارڊ ٺاهي ڏنا ويا آهن ته جيئن وقت سر اسان کي سنڌي ماڻهن جي ووٽ جي به ضرورت نه پوي.  سو اهي بين الاصوبائي ماڻهو جيڪي نه فقط ڏوهاري قسم يا ماڻهو آهن پر انهن تي ڪيترن ئي ٿاڻن تي ڪيس به داخل آهن پر پوءِ به هو سياسي زور تي اسان جي مٿان مسلط ٿي چڪا آهن.

سنڌ اندر دهشتگردي جي وڌندڙ لهر ۾ به سنڌ اندر رهندڙ غير سنڌي ماڻهن جو وڏو هٿ آهي اسان کي ڪڏهن مسلماني جي چڪر ۾ ته ڪڏهن اسلان جي آڙ ۾ بيوقوف ٺاهي اسان جا ڀاءُ بڻجي ويندا آهن ۽ پوءِ اسان جي ئي وچ ۾ رهي اسان کي ئي ڏنگڻ شروع ڪندا آهن پر اها خبر اسان کي ڏاڍي دير سان پوندي آهي.   هن وقت به سنڌ جي اترين علائقن ۾ دهشتگردن جو وڏو ڄار وڇايل آهي جيڪي اسان وٽ اسلام جي آڙ ۾ اسان جي مسجدن ۽ مدرسن جي بهاني اسان جي وچ ۾ رهي رهيا آهن، اسين سنڌي ماڻهو جيڪي مذهب سان جنونيت واري حد تائين پيار ڪريون ٿا پر اهي دهشتگرد جيڪي اسان جي انهيءَ ڪمزوري مان فائدو وٺي اسان جي ئي ملڪ ۾ اسان جي قوم کي رت سان وهنجاري ڇڏيندا آهن پر اسين سنڌي ماڻهو اهو سڀ ڪجھ پنهنجي اکين سان ڏسندي به خاموش رهندا هيون.

سنڌ جي اترين علائقن ۾ جهڙوڪ شڪارپور ۽ خانپور جتي دهشتگرد پنهنجون قهري ڪاروايون ڪري چڪا آهن انهن جي سهولتڪارن جي جڏهن خبر پئي ته اهي سهولتڪار سنڌ جا ئي ماڻهو هئا پر هو سنڌي نه هئا پر سنڌ ۾ صدين کان رهندڙ آهن پر هنن سنڌ سان نمڪ حرامي ڪندي سنڌ جي ڪونڌرن کي بم ڌماڪن سان ڪهائي ڇڏيو، جڏهن ته انهن مان ڪجھ کي پڪڙيو ويو آهي ته ڪجھ فرار ٿي بلوچستان هليا ويا آهن پر اسين ته اهو چوندا سين ته ٺيڪ آهي دهشتگردي جي واقعي ڪرڻ کان پوءِ ڪجھ ڏوهاري فرار ٿي ويا آهن پر جڏهن ته اڃان کوڙ سارا اهڙا دهشتگرد جيڪي سنڌ جي اترين علائقن ۾ ملن ۽ نام و نهاد مدرسن جي آڙ ۾ پنهنجي واري جو انتظار ڪري رهيا آهن، اڄ کان هڪ سال اڳ ۾ لکي غلام شاه ۾ پڻ  هڪ دهشتگرد تنظيم داعش جا نعرا ديوارن تي لکيا ويا هئا جڏهن ته ان کان اڳ ضلعي جيڪب آباد جي شهر ٺل ۾ پڻ داعش جا نعرا لکيا ويا هئا جڏهن ته ٺل شهر ۾ هن وقت تائين ڪوبه دهشتگردي جو واقعو ته پيش ڪونه آهي پر هن شهر ۾ دهشتگردن جا پيرا ضورور آيل آهن جيڪي مختلف مدرسن ۽ ملن جي روپ ۾ هتي لڪل آهن ۽ اسين سنڌي اٻوجھ ماڻهو انهن دهشتگردن جون ڏاڙهيون ڏسي متاثر ٿيندا آهيون ۽ پوءِ اسلام جي نالي تي اسان کي بي وقوف ٺاهي اسان مان ناجائز فائدا حاصل ڪري وٺندا آهن.

ضلعو جيڪب آباد ۽ ضلعو ڪشمور سنڌ جا اهي آخري ضلعا آهن جيڪي پنجاب ۽ بلوچستان جي بارڊرن سان ڳنڍيل آهن ۽ دهشتگرد به انهن شهرن جو فائدو وٺي سنڌ ۾ داخل ٿيندا آهن  ۽ پوءِ اهي سنڌ ۾ داخل ٿي پنهنجن پليت ارادن ۾ ڪامياب ٿي ويندا آهن.

اڄڪله سنڌ جي هنن علائقن ۾ مدرسن ٺاهڻ جو رجحان تمام تيزي سان وڌي رهيو آهي ۽ انهن مدرسن ۾ ايڊ ڪٿان اچي ٿي ان باري ۾ ڪا ڄاڻ ناهين پر ايترو ضرور چونداسين ته سنڌ ۾ رهندڙ دهشتگرن جا سهولتڪار ماڻهو جيڪي اڪثر ڪچن گھرن ۾ ئي رهندا آهن پر سندن ٺاهيل مدرسا ماربل ۽  ٽائيلس جا آهن آخر ايترو پئسو ڪٿان اچي ٿو…؟؟

اتر سنڌ جا اهي علائقا هميشه چورن ۽ ڌاڙيلن جي آماجگاه رهيا آهن ۽ هتي هر ٿيندڙ ڏوه  جي سرپرستي ڪير ڪندو هو ۽ ڪير ڪري رهيو آهي ان باري ۾ اسان کي ڪجھ ٻڌائڻ جي ضرورت نه آهي ڇاڪاڻ ته ڪجھ ڪم رينجرز به ڪرڻ ڏنو وڃي…..!!

سنڌ جي هنن علائقن ۾ جيڪڏهن ڪنهن ماڻهو کي اغواءَ ڪيو وڃي ٿو ته فقط سنڌي ماڻهن کي اغوا ڪيو وڃي ٿو جيڪڏهن ڪنهن جا ٻار اغواءَ ڪيا وڃن ٿا ته فقط سنڌي ماڻهن جا ٻچا کنيا وڃن ٿا…..! جيڪڏهن ڪوڙن قيسن ۾ ڪنهن کي ڦاسايو وڃي ٿو ته فقط  سنڌي ماڻهن کي ڦاسايو وڃي ٿو، مطلب ته هتي ڌارين باه ٻاري ڇڏي ۽ سنڌي ماڻهن جو جيئڻ جنجال ڪيو ويو آهي، سو اهي ٿيندڙ مسئلا روزانو جي بنياد تي ٿيندا هئا ۽ سنڌي ماڻهن انهن جا عادي ٿي چڪا هئا پر هاڻي ظلم جي انتها ته اها آهي ته پهريان سنڌي ماڻهن کي هڪ هڪ ڪري ماريو ويندو هو پر هاڻي ته ڌارين ماڻهن دهشتگردن سان رابطو رکي سنڌ سوين سنڌي ماڻهن کي هڪ بم سان اڏايو پيو وڃي سو اسين ان باري ۾ چيف آف آرمي اسٽاف جناب راحيل شريف کي گذارش ڪنداسين ته هو اتر سنڌ جي ضلعن ڪشمور ۽ ڪنڌڪوٽ ۾ تمام هڪ وڏي آپريشن ڪرڻ جي سخت ضرورت آهي ته سنڌ ۾ پير ڄمائيندڙ دهشتگردن ۽ انهن جي سهولتڪاري ڪندڙن ڏوهاري ۽ ڌاڙيلن ۽ چورن جي سرپرستي ڪندڙ ۽ ڪيٽيون ٺاهيندڙن خلاف سخت ڪاروائي ڪري سنڌ ڌرتي کي هڪ ڀيرو ٻيهر امن ۽ سک جو مسڪن بڻايو وڃي.

 

بلدياتي چونڊن کانپوءِ سنڌ جي سياسي صورتحال: اسحاق سومرو

سنڌ ۾ بلدياتي اليڪشن ستن مرحلن کان پوءِ بالآخر اختتام تي پهچي ويون. سنڌ ۾ 2013 جي اليڪشن ۾ پاڪستان پيپلزپارٽيءَ ۽ ايم ڪيو ايم جي واضح ڪاميابي جي ٺيڪ اڍائي سالن کانپوءِ به ٻنهي پارٽين ٻهراڙي ۽ شهري علائقن ۾ واضح اڪثريت سان ڪاميابي ماڻي.

سنڌ جي 29 ضلعن مان 24 ضلعن جي چيئرمين ۽ وائيس چيئرمين شپ ۾ پاڪستان پيپلزپارٽيءَ کي مڪمل ڪاميابي ملي، جڏهن ته ايم ڪيو ايم کي ڪراچي ميٽرو پوليٽن ڪارپوريشن، حيدرآباد، ميونسپل ڪارپوريشن، ۽ ميرپورخاص ۾ ڪاميابي ملي. جڏهن ته پوري صوبي ۾ ٽين نمبر تي مسلم ليگ (فنڪشنل) چوٿين نمبر تي مسلم ليگ (ن) ۽ پنجين نمبر تي جمعيت علماء اسلام (ف) کي ڪائونسلرن ۾ ڪاميابي ملي.

ٻين پارٽين پاڪستان تحريڪ انصاف، قومپرست پارٽين ۾ سنڌ يونائيٽيڊ پارٽي، سنڌ ترقي پسند پارٽيءَ ۽ قومي عوامي تحريڪ کي بدترين شڪست ملي. ايستائين جو ٽنهي جماعتن جي مرڪزي آَفيسن واري علائقي قاسم آباد ۾ کين هڪ ڪائونسلر تي به ڪامياب نه ملي سگھي.

پاڪستان جي تاريخ جون هي پهريون سياسي بنيادن تي ٿيندڙ بلدياتي چونڊون هيون، جنهن جي نتيجي ۾ سموريءَ سنڌ ۾ 22 هزار 4 سؤ 80 ڪائونسلرن کان وٺي چيئرمين، وائس چيئرمين، ميئر، ڊپٽي ميئرن سميت عورتن، نوجوانن، اقليتن ۽ هارين، مزدورن جي سيٽن تي سياسي پارٽين جي ڪارڪنن ۽ ليڊرن کي سنڌ جي لکين ماڻهن طرفان ووٽ جي ذريعي چونڊيو ويو.

اليڪشن جي نتيجن مان مجموعي طور تي پوري سنڌ ۾ پاڪستان پيپلزپارٽي 80 سيڪڙو کان به وڌيڪ سيٽن تي پنهنجي پارٽيءَ ورڪرن کي چونڊائڻ ۾ ڪامياب ٿي ۽ هڪ دفعو ٻيهر ثابت ڪيو ته پاڪستان پيپلزپارٽي اڄ به سنڌ جي عوام جي اڪثريتي پارٽي آهي. ياد رهي ته بينظيرآباد (نواب شاهه) شهر ۾ پهريون دفعو ميونسپل ڪارپوريشن جي چيئرمين ۽ نائب چيئرمين شپ تي پاڪستان پيپلزپارٽيءَ جا اميدوار چونڊيا ويا. ٻئي طرف مسلم ليگ (ف) کي خيرپور ۽ سانگهڙ ضلعن ۾ به شڪست، ٿر ۾ اربابن، نوشهري ۾ جتوئين، لاڙڪاڻي ۾ ممتاز ڀٽي جي سربراهيءَ ۾ عوامي اتحاد ۽ ٺٽي جي شيرازين جي غير متوقع حد تائين ناڪاميءَ، انهيءَ تاثر کي پڻ رد ڪري ڇڏيو ته سنڌ ۾ وڏيرن ۽ برادرين جو ووٽ آهي، ڇو ته اهي ماڻهو به مٿئين ڪلاس سان واسطو رکن ٿا. جڏهن ته پوريءَ سنڌ ۾ پاڪستان پيپلزپارٽيءَ جي ڪائونسلر کان وٺي ضلع سطح تائين ڪاميابي مان ظاهر ٿيو ته سنڌ جو عوام هميشه جيان ووٽ هڪ ئي پارٽيءَ يعني پ پ کي ڏئي ٿو. سندس مخالفت ۾ پوري سنڌ ۾ پراڻا جاگيردار، وڏيرا ۽ روايتي مخالف سياسي پارٽيون ۽ بااثر فرد اليڪشن ۾ حصو وٺي رهيا هئا پر کين خاطر خواه ڪاميابي نصيب نه ٿي. ڪراچي جي ٻن ضلعن ۽ باقي ٻين 23 ضلعن ۾ ضلع چيئرمين ۽ وائيس چيئرمين تي پ پ جي ڪاميابيءَ پ پ مخالفن جون وايون بتال ڪري ڇڏيون.

سياسي تجزيه نگارن جو چوڻ آهي ته هن بلدياتي اليڪشن ۾ سنڌ جي قوم پرست پارٽين جي بري شڪست مان ظاهر ٿئي ٿو ته ايندڙ عام چونڊن ۾ سندن ڪوبه مستقبل ناهي. سنڌ جون قوم پرست پارٽيون ڪائونسلر کٽائڻ جي پوزيشن ۾ به نه آهن، هو صرف هڪ پريشر گروپ جي حيثيت رکن ٿيون.

ٻئي طرف جتي مسلم ليگ (فنڪشنل) جي ڪارڪردگي مايوس ڪن آهي، اتي حيرت انگيز طور تي جمعيت علماء اسلام فضل الرحمان گروپ جي پوري سنڌ ۾ 300 کان وڌيڪ ڪائونسلرن کٽي اچڻ، سنڌ جي سياست ۾ هڪ نئين صف بندي ٻڌائي پئي وڃي. اهڙي ڪاميابي جو سهرو شهيد خالد محمود سومرو جي ٻن پٽن راشد محمود سومرو ۽ ناصر محمود سومرو ڏي وڃي ٿو. امڪان آهي ته ايندڙ عام چونڊن ۾ سنڌ جي ڪجھ سيٽن تي بحيثيت پارٽيءَ جي، جي يو آءِ مقابلي جي پوزيشن ۾ اچي سگھي ٿي.

سنڌ ۾ پاڪستان پيپلزپارٽيءَ کان پوءِ هڪ مذهبي جماعت جو خاص طور تي ٻهراڙين وارن علائقن ۾ تيزي سان اڀرڻ گھٽ ۾ گھٽ قوم پرست پارٽين لاءِ وڏو چئلينج آهي، جيڪي سنڌ ۾ هڪ مذهبي جماعت جي 10 سيڪڙو جيترا ووٽ ۽ ڪائونسلر به کٽائي نه سگھيا. سنڌ ۾ بلدياتي اليڪشن جي آيل نتيجن کانپوءِ پ پ جي واضح ڪاميابيءَ جا آفٽر شاڪس، بلدياتي اليڪشن جي آخري مرحلي توڙي نئين وزيراعليٰ سيد مراد علي شاهه جي وزيراعليٰ طور اعتماد واري ووٽ وٺڻ جي موقعي تي چٽا ٿي سامهون آيا آهن. شڪارپور ۾ مسلم ليگ ”فنڪشنل“ جي قومي اسيمبليءَ جي ميمبر غوث بخش مهر ۽ سندس پٽ شهريار مهر جي ضلعي چيئرمين ۽ وائيس چيئرمين تي پ پ جي حمايت ڪرڻ ۽ شڪارپور شهر مان مسلم ليگ (ف) جي ٽڪيٽ تي ڪامياب ٿيل صوبائي اسيمبليءَ جي ميمبر ۽ وزيراعظم جي بنا کاتي واري صلاحڪار امتياز شيخ جي پيرپاڳاري واري پارٽيءَ تان استعيفا ڏئي پ پ ۾ شامل ٿي ٻيهر اليڪشن ۾ حصو وٺڻ، پيرپاڳاري واري پارٽيءَ لاءِ سخت ڌچڪو آهي. جڏهن ته لاڙڪاڻي جي ممتاز علي ڀُٽي ڪاوڙ ۾ اچي نه رڳو نوازشريف جي پارٽيءَ کي الوداع ڪيو پر پنهنجي پٽ امير بخش ڀُٽي کي وزيراعظم جي صلاحڪاريءَ تان استعيفيٰ ڏياري ۽ سنڌ ۾ پنهنجي پارٽي سنڌ نيشنل فرنٽ کي هڪ دفعو ٻيهر بحال ڪرڻ جو اعلان ڪيو آهي. موري جي جتوئين 2013 جي اليڪشن کانپوءِ ۽ بلدياتي اليڪشن ۾ پنهنجي نوشهري ضلع ۽ خاص طور تي موري شهر مان بدترين شڪست کاڌي، جيڪا جتوئي برادران کي موري شهر ۾ ”109“ سالن کانپوءِ پهريون دفعوشڪست آهي.

وفاقي وزير براءِ بيروني ملڪ مرتضيٰ جتوئي جي سوٽ عاقب خان جتوئي سنڌ جي نئين وزيراعليٰ سيد مراد شاهه کي نه رڳو ووٽ ڏنو پر هن ان موقعي تي چيو ته سندس پاڪستان مسلم ليگ (ن) سان هاڻي ڪوبه واسطو نه آهي. ٻئي طرف غير اعلانيه طور تي مرتضيٰ جتوئي جي ننڍي ڀاءُ ۽ اڳوڻي صوبائي اسيمبليءَ جي ميمبر عارف مصطفيٰ جتوئي موري جي شهر ۾ نيشنل پيپلز پارٽيءَ جي جھنڊي واري ٽوپي پائي ماڻهن سان ملاقاتون ڪرڻ جو سلسلو شروع ڪري ڇڏيو آهي. ٺٽي جي اعجاز شاهه شيرازيءَ جو وزيراعليٰ مراد علي شاهه کي ووٽ ڏيڻ به ظاهر ڪري ٿو ته شيرازي به شايد بنا ڪوٺ جي ايندڙ ڏينهن ۾ پ پ جي مضبوط قلعي ۾ ويٺل هوندا.

سنڌ جي ڏهيسر ۽ ٻه دفعا وزيراعلي رهندڙ لاڙڪاڻي جي سردار ممتاز علي ڀُٽي پنهنجي سنڌ نيشنل فرنٽ کي بحال ڪرڻ کان اڳ هڪ سنڌي TV چينل کي انٽرويو ۾ وزيراعظم نواز شريف کي ميار ڏيندي چيو ته هن سڄي سنڌ زرداريءَ جي حوالي ڪري ڇڏي آهي، اليڪشن کانپوءِ کيس رائيونڊ گھرائي 72 طعام کارايا.

نواز شريف سنڌ ۾ نه ته ممتاز ڀُٽي، شيرازين کي سنڀالي سگھيو پر هو ڪراچيءَ مان مسلم ليگ (ن) جي سيٽ تي ڪامياب ٿيندڙ مملڪتي وزير عبدالحڪيم بلوچ کي به نه سنڀالي سگھيو ۽ ان به پ پ ۾ شموليت اختيار ڪري ڇڏي آهي. ساڳئي طرح پير پاڳاري واري پارٽي وري شڪارپور جي غوث بخش مهر ۽ امتياز شيخ کي به وڃائي ڇڏيو. وڃائي ته تحريڪ انصاف پنهنجي ڪراچيءَ مان چونڊيل ميمبر حفيظ الدين کي به ڇڏيو آهي، جنهن نه رڳو تحريڪ انصاف تان استعيفا ڏئي ڇڏي پر پاڪ سرزمين پارٽيءَ ۾ وڃي شموليت اختيار ڪئي. جتي ايم ڪيو ايم ڪراچيءَ، حيدرآباد، ميرپورخاص، جون ميئر ۽ ڊپٽي ميئر واريون سيٽون ته حاصل ڪري وئي پر اڄڪلهه پارٽي پنهنجي تاريخي بحران مان گذري رهي آهي. پارٽيءَ جي ڪيترن ئي اسيمبليءَ ميمبرن پاڪ سرزمين پارٽيءَ ۾ محفوظ پلڙو ڏسي وڃي ان ۾ پناهه ورتي آهي. دلچسپ ڳالهه ته ايم ڪيو ايم وارا پنهنجي قائد الطاف حسين جو نالو وٺڻ کان به ائين لهرائين ٿا جيئن گنجو پاڪيءَ کان لهرائي.  جتي سنڌ ۾ پ پ جي مضبوط پوزيشن ۽ بلدياتي اليڪشن ۾ زبردست ڪاميابيءَ پارٽيءَ جي مقبوليت جي نشاندهي ڪري ٿي، اتي سنڌ ۾ ايم ڪيو ايم، مسلم ليگ (ف)، نواز ليگ ۽ قوم پرست پارٽين جي ناڪامين جو فائدو سنڌ ۾ ايندڙ اليڪشن ۾ پاڪستان پيپلزپارٽيءَ کي ئي ٿيندو.

ياد رهي ته صوبي خيبر پختونخواهه جي 29 ضلعن مان پاڪستان تحريڪ انصاف صرف 14 ضلعن ۾ ضلع ناظم ۽ نائب ناظم چونڊائي سگھي آهي، جڏهن ته 15 ۾ پي ٽي آئي مخالف ناظم ۽ نائب ناظم آهن پر سنڌ ۾ پ پ طرفان وڏي پيماني تي ڪاميابي ۽ 19 هزارن کان به مٿي پارٽيءَ جي ورڪرن ۽ همدردن کي ڳوٺ ۽ يونين ڪائونسل کان وٺي ضلع چيئرمين تائين چونڊائي، سنڌ جي سطح تائين ثابت ڪيو آهي ته اڄ به پاڪستان پيپلزپارٽيءَ هيٺين سطح تائين مضبوط ترين پارٽي آهي، جڏهن ته سندس مخالف جماعتون خاص طور تي مسلم ليگ نواز، مسلم ليگ (ف)، ايم ڪيو ايم توڙي پي ٽي آءِ ٽوڙ ڦوڙ ۽ اندروني اختلافن جو شڪار آهن. پ پ جي مخالفت ۾ ٺهندڙ گرينڊ ڊيموڪريٽڪ الائنس به هاڻي وڃي پيرپاڳاري جي پارٽيءَ جي صدرالدين شاهه، مهتاب اڪبر راشدي، ارباب غلام رحيم توڙي عوامي تحريڪ جي اياز لطيف پليجي تائين محدود ٿي ويو آهي. سنڌ جي جاگيردارن جي پارٽيون بدلائڻ واري پراڻي عادتن توڙي اڀرندڙ سج جي پوڄارين واري سياست تي گهري نظر رکندڙ سياسي مبصرن جو چوڻ آهي ته ايندڙ عام چونڊن ۾ جيڪي ٺيڪ 18 مهيني کانپوءِ ٿي رهيون آهن، انهن ۾ موري جا جتوئي، شڪارپور جا مهر، ۽ ٺٽي جا شيرازي پ پ جي مضبوط ٻيڙيءَ جا سوار هوندا ۽ هڪ دفعو پنهنجيون پارٽيون، وفاداريون ۽ ضميرن کي تين وال ڪندا ۽ پ پ وري پنهنجي روايتي سياست کي برقرار رکندي، سنڌ جي عوام طرفان رد ٿيل لوٽن کي پنهنجي جهولي ۾ پناهه ڏيندي.

 

 

پاڪ-ڀارت ڇڪتاڻ…!!!!

ڀارتي وزيراعظم نريندر مودي پاڪستان سان هڪ هزار سال تائين وڙهڻ جي دعويٰ ڪرڻ سان گڏوگڏ غربت، جهالت ۽ بيروزگاري جي خاتمي لاءِ جنگ ڪرڻ جي آڇ به ڪئي آهي. ڀارتي رياست ڪيرالا ۾ جلسي کي خطاب ڪندي نريندر مودي الزام هنيو ته اڙي ۾ حملو پاڪستان ڪرايو. اڙي حملي ۾ 18 ڀارتي فوجي مارجي ويا، جن کي هو ڪڏهن به نه وساريندا. سندس چوڻ هو ته خطي ۾ عدم استحڪام جو ذميوار پاڪستان آهي ،هو رڳو رتو ڇاڻ چاهي ٿو. نريندر مودي پنهنجي خطاب ۾ پاڪستان تي دهشتگردي کي هٿي وٺرائڻ جو به الزام مڙهيندي چيو ته ڀارت دهشتگردي سامهون ڪڏهن به نه جهڪيو آهي ۽ نه جهڪندو. ڀارتي وزيراعظم پاڪستان جو نالو کڻڻ کانسواءِ چيو ته پاڙيسري ملڪ جا حڪمران هزار سالن تائين وڙهڻ جي دعويٰ ڪندا هئا، اهي ڪاڏي ويا. هو هڪ هزار سال تائين جنگ وڙهڻ جو چئلينج قبول ڪرڻ لاءِ تيار آهن. پاڪستان، بنگلاديش کي نه سنڀالي سگهيو، جڏهن ته هاڻ گلگت ۽ بلوچستان کي به هو نه پيو سنڀالي سگهي. سندس چوڻ هو ته پاڙيسري ملڪ وارا دهشتگردن جون ڳالهيون ٻڌي ڪشمير جا گيت ڳائي رهيا آهن. ٻنهي ملڪن کي غربت جهالت ۽ بيروزگاري خلاف جنگ ڪرڻ گهرجي.

لنڊن ۾ پريس ڪانفرنس ڪندي وزير اعظم نواز شريف چيو ته پاڪستان ذميواراڻو ڪردار ادا ڪري رهيو آهي، والاريل ڪشمير ۾ ڀارتي ظلم ڪنهن کان لڪل ناهي، ڪشمير مسئلو رجسٽرڊ ٿي چڪو آهي.  ڀارت جي ظلم سبب ڪيترائي ڪشميري زخمي ٿيا آهن، ڀارت کي ڪشمير ۾ شهادتن جي جاچ ڪرائڻ گهرجي. سندس چوڻ هو ته گڏيل قومن ۾ سندن موقف ٻڌو ويو آهي، ڪشمير مسئلو رجسٽرڊ ٿي چڪو آهي. اُڙي حملو ڪشمير ۾ ڀارتي ظلم جو رد عمل به ٿي سگهي ٿو، ڀارت کي الزام مڙهڻ کان اڳ سوچڻ گهرجي ها.

وزيراعظم جي پرڏيهي معاملن جي صلاحڪار سرتاج عزيز اڙي ۾ ڀارتي فوجي ڪئمپ تي حملي جي عالمي سطح تي جاچ ڪرائڻ جو مطالبو ڪيو آهي، بي بي سي سان ڳالهائيندي سرتاج عزيز چيو ته ڪنهن به حملي کانپوءِ ڀارت هميشه جاچ کان اڳ ئي اها واويلا مچائيندو آهي ته ان ۾ پاڪستان جون ايجنسيون يا غير رياستي عنصر ملوث آهن، اسان جي خواهش آهي ته ان حملي جي بين الاقوامي جاچ ڪرائي وڃي ته جيئن غيرجانبدار جاچ ٿي سگهي. ڪشمير ۾ هن وقت آزادي جي تحريڪ هلي رهي آهي، اهڙي قسم جي حملي سان پاڪستان ۽ ڪشميرين کي ڪوبه فائدو نٿو ٿئي، بلڪه ڀارتي فورسز طرفان ٿيندڙ انساني حقن جي خلاف ورزين تان ڌيان هٽي ٿو. هي پهريون موقعو ناهي جو ڀارت پاڪستان تي بي بنياد الزام لڳايو آهي، جڏهن صدر ڪلنٽن ننڍي کنڊ جي دوري تي آيو هو ته ڪشمير ۾ تمام وڏو واقعو ٿيو هو، جنهن جو الزام به پاڪستان تي لڳايو ويو هو، پر بعد ۾ پتو پيو ته اهو واقعو ڀارت پاڻ ڪرايو هو. جنهن علائقي ۾ حملو ٿيو آهي، اتي ڀارت جي فوج وڏي تعداد ۾ موجود هوندي آهي، ان ڪري اتي ڪنهن به قسم جي دراندازي ممڪن ناهي. 2009ع ۾ ٿيل ممبئي حملن جو الزام به پاڪستان تي لڳايو ويو هو، تنهن هوندي به ان سلسلي ۾ ڀارت ثبوت فراهم ڪرڻ ۾ بهانا ڳوليندو رهيو. پٺاڻ ڪوٽ جي حوالي سان به ساڳي صورتحال ٿي، ڀارت اڃا تائين ان حملي جا ثبوت ناهن ڏنا. ان جي باوجود پاڪستان ڪشمير ۾ ٿينل حملي جي جاچ ۾ هر قسم جي مدد فراهم ڪرڻ لاءِ تيار آهي.

 

فلمن ۾ بولڊ سين کان پرهيز ناهي: راڌيڪا

ممبئي (شوبز نيوز) بالي ووڊ اداڪاره راڌيڪا چيو آهي ته ان کي فلم ۾ بولڊ سين ڪرڻ کان ڪوبه اعتراض نه آهي فلمساز راڌيڪا جي تقريبن هر سين ۾ هڪ بولڊ سين ضرور رکندا آهيون پر حقيقت اها آهي ته راڌيڪا صرف فلمن ۾ ئي بولڊ نظر نه آهي ان جي سوچ به ڪافي بولڊ آهي. انهن ڏينهن ۾ فلم پارچڊ ۾ راڌيڪا جو بولڊ سين تمام گهڻو مشهور ٿي رهيو آحي ان باري ۾ راڌيڪا چوي ٿي ته ان فلم جي بولڊ سين ۾ مان پنهنجي حدن کي ڪراس ڪيو آهي مون کي لڳي ٿو ته هر ماڻهو هڪٻئي جي جسم کي ڏسڻ لاءِ تيار آهي ۽ ڀارت جي ماڻهن کي اهڙن منظرن ڏسڻ جي ضرورت به آهي اسان ڪاماسوترا جهڙيون فلمون ٺاهيون آهن اسان کي ته اهڙن سوالن کان به بچڻ گهرجي. اسان کي ان سوچ مان مٿي ٿيڻ گهرجي جڏهن ماڻهو ڏسڻ لاءِ تيار آهي ته اسان ڏيکاريندا آهيون هن چيو ته مان ڀارت کان وٺي پرڏيهي ملڪن تائين اسٽيج تي ماڻهن کي بولڊ سين ڪندي ڏٺو آهي. مون کي سمجهه ۾ نٿو اچي ته مون کي پنهنجي جسم کان شرم ڇو اچڻ گهرجي اهو ئي هڪ ذريعو آهي جنهن ۾ هڪ فنڪار جي طور تي استعمال ڪري سگهان ٿي.

 

پاڪستاني اداڪارن کي انتهاپسندن جي ڌمڪين کان ڊنل آهيان: سارا لورين

ممبئي (شوبز نيوز) پاڪستاني اداڪارا سارا لورين چيو آهي ته مان هندو انتهاپسند تنظيم طرفان ڌمڪين کانپوءِ پاڻ کي ڊنل محسوس ڪري رهي آهيان. پنهنجي هڪ بيان ۾ سارا لورين جو چوڻ هو ته ايم اين ايس طرفان پاڪستاني اداڪارن کي ڌمڪين کانپوءِ مان ڊنل آهيان، جيڪڏهن حالتون وڌيڪ خراب ٿيون ته دبئي هلي ويندس ۽ جڏهن صورتحال درست ٿي ته ڀارت موٽي ايندس. هن چيو ته اسان سڀني کي هڪٻئي بدران دهشتگردي خلاف وڙهڻ جي ضرورت آهي. منهنجي دعا آهي ته اڙي حملو دوستاڻي لاڳاپن کي متاثر نه ڪندو.

 

ويسٽ انڊيز خلاف ون ڊي سيريز لاءِ قومي ٽيم جو اعلان

لاهور (اسپورٽس نيوز) ويسٽ انڊيز خلاف ون ڊي سيريز لاءِ پاڪستاني ٽيم جو اعلان ڪيو ويو آهي، جنهن ۾ عمر اڪمل ۽ اسد شفيق جي واپسي ٿي آهي، جڏهن ته ٽيم جي اڳواڻي اظهر علي ڪندو. ٻين رانديگرن ۾ شعيب ملڪ، شرجيل خان، بابر اعظم، سرفراز احمد، محمد رضوان، محمد نواز، عماد وسيم، ياسر شاهه، سهيل خان، راحت علي، محمد عامر، وهاب رياض ۽ حسن علي شامل آهن. واضح رهي ته پاڪستان ۽ ويسٽ انڊيز وچ ۾ ٽن ون ڊي ميچن تي ٻڌل سيريز 30 سيپٽمبر کان شروع ٿيندي.

 

پاڪستان ۽ ويسٽ انڊيز وچ ۾ ٽين ٽي 20 ميچ (سڀاڻي ) کيڏي ويندي

ابوظهبي (اسپورٽس نيوز) پاڪستان ۽ ويسٽ انڊيز ڪرڪيٽ ٽيمن وچ ۾ ٽين ۽ آخري ٽي 20 انٽر نيشنل (سڀاڻي ) اڳاري تي ابوظهبي ۾ کيڏي ويندي .گرين شرٽس کي سيريز ۾  0_2 جي فيصلي جوڳي سرسي حاصل آهي .پهرين ميچ ۾ پاڪستان  0 وڪيٽ حاصل ڪئي ۽ ٻين ميچ ۾ 16 رنسن تا ڪاميابي حاصل ڪري سيريز پنهنجي نالي ڪئي