تازيون خبرون

Daily Archives: September 24, 2016

هندو انتها پسندن جي پاڪستاني فنڪارن کي 48 ڪلاڪن ۾ ڀارت ڇڏڻ جي ڌمڪي

ممبئي (شوبز نيوز) ڀارت هميشا ڪنهن نه ڪنهن طرح سان پاڪستان جي خلاف زهر اوڳاڇڻ کان پوئتي ناهي رهندو، پر هاڻي ته اڙي واقعي کانپوءِ  جتي هڪ پاسي ڀارت هٿ ڌوئي پاڪستان جي پويان پئجي ويو آهي ته اتي ئي وري ٻئي پاسي هندو انتها پسند بالي ووڊ ۾ ڪم ڪندڙ پاڪستاني فنڪارن کي 48 ڪلاڪن ۾ ڀارت ڇڏڻ جي ڌمڪي ڏئي ڇڏي آهي.جڏهن ڪيترن ئي پاڪستاني اداڪارن جا ڀارت ۾ نوان پراجيڪٽ هلي رهيا آهن.

 

شادي جي دعوت ڇو نه ڏني؟ ميرا ڪرڪيٽر عامر کان ناراض ٿي وئي

لاهور (شوبز نيوز) فلم اسٽار ميرا شادي جي پروگرام ۾ نه گهرائڻ تي قومي ڪرڪيٽر محمد عامر کان ناراض ٿي وئي آهي. ذريعن موجب فلم اسٽار ميرا پنهنجي هڪ گڏيل دوست ذريعي محمد عامر سان پنهنجي ناراضگي جو اظهار ڪيو آهي ۽ چيو ته شادي ۽ وليمي جي پروگرام ۾ شرڪت لاءِ خصوصي طور پنهنجو سوٽ آرڊر تي تيار ڪرايو هو، پر محمد عامر مون کي نه گهرايو، جنهن تي مان هن کان ناراض آهيان، پر هن کي شادي جون مبارڪون ڏيان ٿي.

 

ڏکڻ آفريقا ۽ آئرلينڊ وچ ۾ واحد ون ڊي سڀاڻي کيڏي ويندي

جوهانسبرگ (اسپورٽس نيوز) ڏکڻ آفريقا ۽ آئرلينڊ جي ڪرڪيٽ ٽيمن وچ ۾ واحد ون ڊي انٽرنيشنل سڀاڻي آچر تي کيڏي ويندي، ڏکڻ آفريقا ۽ آئرلينڊ وچ ۾ ميچ آءِ سي سي جو ايسوسي ايٽ ملڪن کي وڏين ٽيمن خلاف ميچونکيڏڻ جا موقعا ڏيڻ جي پروگرام جو حصو آهي، واضح رهي ته پاڪستان ۽ انگلينڊ وچ ۾ کيڏيل ون ڊي سيريز کان اڳ پاڪستان ۽ آئرلينڊ وچ ۾ 2 ون ڊي ميچن جي سيريز کيڏي وئي هئي.

 

اسپورٽس فائونڊيشن پروگرام ڪرڪيٽ سپر اسٽارز جي زيراهتمام ٽرائلز جو ڪامياب مرحلو لاهور ۾ مڪمل، 26 ۽ 27 تي ڪراچي ۾ منعقد

ڪراچي (اسپورٽس نيوز) اسپورٽس فائونڊيشن پروگرام ڪرڪيٽ سپر اسٽارز جي زيراهتمام ٽرائلز جو ڪامياب مرحلو لاهور ۾ مڪمل، 26 ۽ 27 تي ڪراچي ۾ منعقد ٿيندا جڏهن ته آسٽريليا ۾ ڪوچنگ جي لاءِ رانديگرن جي چونڊ لاءِ  اسپورٽس فائونڊيشن پروگرام ڪرڪيٽ سپر اسٽارز جي زيراهتمام ٽرائلز جو ڪامياب مرحلو لاهور ۾ مڪمل ٿي ويو ڪرڪيٽ سپر اسٽار جو پهريون ٽيلينٽ هنٽ آهي جيڪو پاڪستان ۾ 18 کان 21 سالن جي رانديگرن کي مهيني جي ڪوچنگ جو موقعو فراهم ڪندو

 

جنگ جي خطري هيٺ آيل ننڍو کنڊ ۽ عالمي برادري: الطاف پيرزادو

ڀارت جي انتظام هيٺ ڪشمير، جنهن کي پاڪستان ۾ اسان والاريل ڪشمير سڏيون ٿا، جي علائقي اڙي سيڪٽر ۾ ڀارتي فوجي ڇانوڻيءَ تي هٿياربند حملي ۾ سترهن ڀارتي فوجين جي مارجڻ ۽ ڪيئي زخمي ٿيڻ جي واقعي کانپوءِ ڀارت روايت موجب پاڪستان ڏانهن الزامن جا تير اڀا ڪري ڇڏيا آهن. سياستدان ۽ سرڪاري ڪارندا ته پنهنجي جاءِ تي پر ڀارتي ميڊيا ڇڪتاڻ واري هن صورتحال ۾ ٻرنديءَ تي پاڻي هاري معاملي کي ٺارڻ بدران تيل هاري ممڻ مچائڻ جو ڪم ڪري رهي آهي، جيڪو يقيني طور بنيادي صحافتي ۽ پيشيور اصولن جي ابتڙ آهي.

پاڪستان ۽ ڀارت ۾ هيءَ ڪا پهرين ڇڪتاڻ ناهي، ننڍي کنڊ جي ورهاڱي کان وٺي اهڙا ڪيئي لاها چاڙها، گرميون ۽ سرديون هي ٻئي ملڪ ڏسي چڪا آهن، نه رڳو ايترو پر 1965ع ۽ 1971ع ۾ ٻه سڌيون جنگيون هنن ملڪن وچ ۾ لڳي چڪيون آهن، جڏهن ته هڪ ٻئي خلاف ڳجهين لڙاين جو ته ڪو ڪاٿو ئي ڪونهي. ڀارت دنيا جي وڏي ۽ پراڻي جمهوريت هئڻ ناتي جنهن سهپ، برداشت ۽ ڪشادي دل جو مظاهرو ڪندي نظر اچڻ گهرجي، سو نظر نه پيو اچي. حقيقت هي آهي ته ڀارت دلي طور ننڍي کنڊ جي ورهاڱي کي قبوليو ئي نه آهي. روايتي حريف هئڻ جي ڪري ان کي پاڪستان جي معاشي توڙي دفاعي ترقي ۽ مضبوطي ڪنهن به نموني قبول ناهي. خطي ۾ ايٽمي هٿيارن کان ويندي، وڌ ۾ وڌ هٿيار حاصل ڪرڻ جي روش جو جيتري قدر تعلق آهي ته ان ڏس ۾ ڀارت ئي شروعات پئي ڪئي آهي، هڪ مضبوط جمهوري ملڪ هئڻ ناتي هئڻ ته ايئن گهرجي ها ته ڀاريت، پاڪستان سان وير پاڙڻ بدران ٻه قدم اڳتي اچي تڪرارن جي حَلَ لاءِ اڳڀرائي ڪري ها پر ايئن ڪرڻ بدران ڀارت بس هٿيارن جا ڍير گڏ ڪرڻ ۾ رڌل رهيو، نتيجي ۾ پاڪستان کي به پنهنجو دفاع يقيني بڻائڻ لاءِ گهرج پٽاندڙ هٿيار گڏ ڪرڻ تي مجبور ٿيڻو پيو، هٿيارن جي انهيءَ ڊوڙ هن خطي جي امن کي هميشه لاءِ ٽياس تي ٽنگي ڇڏيو.

عالمي تحقيقي اداري اسٽاڪ هوم انٽرنيشنل پيس ريسرچ انسٽيٽيوٽ (ايس آءِ پي آر آءِ) جي هلندڙ فيبروري ۾ جاري ٿيل هڪ رپورٽ مطابق ڀارت گذريل پنجن سالن ۾ وڌ ۾ وڌ هٿيار خريد ڪندڙ دنيا جو ملڪ بڻيل آهي. رپورٽ ۾ چيو ويو آهي ته 2011ع کان 2015ع تائين دنيا ۾ خريد ڪيل هٿيارن مان مجموعي طور 14 سيڪڙو هٿيار ڀارت خريد ڪيا آهن، جيڪي ڪنهن به ملڪ طرفان خريد ڪيل وڌ ۾ وڌ هٿيار آهن. جڏهن ته آمريڪا، روس، چين، فرانس ۽ جرمني وري هٿيارن جو ڪاروبار ڪندڙ يا ايئن کڻي چئجي ته دنيا جي ملڪن کي هٿيار وڪڻڻ ۾ باقي ملڪن کان گهڻو اڳتي آهن. ڀارت جا چين سان تڪرار به ڪي لڪل ناهن، نه ئي نيپال ۽ برما ۾ ان جي مداخلت ڳجهي آهي، هاڻي ته افغانستان ۾ به پير کوڙي چڪو آهي، پر سندس طرفان هٿيارن جا انبار گڏ ڪرڻ جو ٽارگيٽ بهرحال هميشه پاڪستان ئي پئي رهيو آهي.

پاڪستان ۽ ڀارت ۾ روايتي دشمنيءَ جي ڪري سارڪ جهڙو علائقائي تعاون وارو فورم به خطي جي تعمير ۽ ترقيءَ جو اهڙو ڪردار ادا ڪرڻ ۾ ناڪام ٿيو آهي، جهڙو ڪردار يورپين يونين پنهنجي خطي جي ترقيءَ لاءِ ڪيو آهي. پاڪستان کي شڪايت پئي رهي آهي ته ڀارت پاڪستان خاص ڪري بلوچستان ۽ ڪراچيءَ ۾ مداخلت ڪري رهيو آهي، اهڙو معاملو پاڪستان عالمي فورمن تي به اٿاريندو رهيو آهي پر ڀارت انهن کي الزام تراشي قرار ڏيندي رد ڪندو رهيو آهي. ويجهڙ ۾ بلوچستان مان ڀارتي ڳجهي اداري ”را“ جي ايجنٽ ۽ نيويءَ جي آفيسر ڪُلُ ڀوشن جي گرفتاري توڙي ڀارت جي آزاديءَ واري ڏينهن ڀارتي وزيراعظم نريندر موديءَ طرفان پنهنجي تقرير ۾ بلوچستان جو ذڪر پاڪستان جي معاملن ۾ ڀارت جي مداخلت ناهي ته ٻيو ڇا آهي.

جيتري قدر ڪشمير ۾ آزاديءَ جي تحريڪ جو تعلق آهي ته اها نج مقامي تحريڪ آهي، ڪشميرين جي نمائنده قيادت ۽ اتحاد حريت ڪانفرنس ڪشمير ۾ ٿيل چونڊن ۾ ڪڏهن به حصو ناهي ورتو، تنهن ڪري چئي سگهجي ٿو ته اتي جيڪا حڪومت قائم ٿئي ٿي سا ڪشميرين جي نمائنده قطعي طور به نه ٿي هجي. والاريل وادي گذريل اڍائي مهينن کان ڏاڍ، ڏمر ۽ ڪرفيو جي ور چڙهيل آهي. اتي جيڪي انساني حقن جون خلاف ورزيون ڀارتي سرڪار ۽ فورسز ڪري رهيا آهن، تن عالمي ضمير کي به جاڳائي ورتو آهي، خاص ڪري نوجوان برهان مظفر وانيءَ جي شهادت واري واقعي کانپوءِ صورتحال ڏينهون ڏينهن بد کان بدتر ٿيندي رهي آهي. ڪشمير مسئلو ئي اصل ۾ پاڪستان ۽ ڀارت وچ ۾ تڪرار ۽ ٽڪراءَ جو بنياد آهي، جنهن کي ڀارت تڪرار مڃڻ لاءِ ئي تيار ناهي. سو تڪرار کي تڪرار نه سمجهڻ واري ڀارتي روش ئي آهي جو گذريل 70 سالن ۾ ٻنهي ملڪن ۾ معاملا حل ڏانهن وڌڻ بدران، جتي هئا، اتي ئي آهن، مورڳو اڃا به خراب ٿيا آهن.

پاڪ-ڀارت تڪرار ۽ ڇڪتاڻ کي رڳو علائقائي ۽ ننڍي کنڊ جي روشنيءَ ۾ نه پر عالمي صورتحال جي روشنيءَ ۾ به ڏسڻ گهرجي. افغان جنگ هاڻي جڏهن توڙ ڏانهن وڌي رهي آهي ته آمريڪا خطي ۾ اتحادي تبديل ڪرڻ ۽ پراڻن اتحادين ۽ اعتماد وارن ساٿين کي اکيون ڏيکارڻ شروع ڪيون آهن، جنهن جو مثال پاڪستان آهي. آمريڪا کي افغانستان ۾ جيستائين پاڪستان جي گهرج هئي ان وقت تائين ته پاڪستان، سندس اکين جو تارو به هو ته نيٽو کان ٻاهر وڏو اتحاد به پر ”ڪم لٿو ڊکڻ وسريو“ وانگر آمريڪا پاڪستان کي دهشت گرديءَ جي منهن ۾ ڌڪڻ کانپوءِ هاڻي ان کان منهن به موڙي ورتو آهي، جنهن جو وڏو ثبوت اتحادي سپورٽ فنڊ تحت پاڪستان کي جيڪا امداد ڏني ويندي هئي، سا بند ڪري ڇڏڻ ۽ آمريڪي ڪانگريس ۾ پاڪستان کي دهشت گرديءَ جو سهولتڪار قرار ڏيڻ وارو بل پيش ٿيڻ آهي.

نه رڳو ايترو پر آمريڪا، ڀارت سان فوجي ٺاهه به ڪري ورتو آهي. جنهن تحت ٻئي ملڪ هڪ ٻئي جا فوجي اڏا استعمال ڪري سگهندا. هرڪو سمجهي سگهي ٿو ته جنهن خطي ۾ آمريڪا قائم آهي اتي ڀارت جو نه ته ڪنهن سان ڪو تڪرار آهي نه ڦڏو، تنهن ڪري اها ڳالهه چٽي آهي ته ڀارت ته آمريڪا جا، سندس خطي ۾ فوجي اڏا ڪنهن به جنگي مقصد لاءِ استعمال ڪين ڪندو، ان جي ابتڙ آمريڪا جا ننڍي کنڊ، وچ ايشيا توڙي وچ اوڀر ۾ مفاد آهن، تنهن ڪري اهو ڀارت جا فوجي اڏا استعمال ڪندو. ڪِنِ سينيئر تجزيا نگارن جو خيال آهي ته آمريڪا-ڀارت فوجي ٺاهه اصل ۾ چين ۽ پاڪستان کي للڪارڻ برابر آهي. چين-پاڪستان اقتصادي راهداري منصوبي کي پاڪستان توڙي چين خطي جي تقدير ئي تبديل ڪري ڇڏڻ وارو منصوبو سمجهن ٿا، جڏهن ته ڀارت وري معاشي طور مضبوط پاڪستان، توڙي چين جي اولهه کان اوڀر تائين وڌندڙ ڪردار کي پنهنجي لاءِ خطرو سمجهندي ان خلاف پروپيگنڊه ڪري رهيو آهي. اهڙي طرح هن خطي ۾ چين جو وڌندڙ ڪردار آمريڪا کي به پسند ناهي. اهو ئي سبب آهي جو خطي ۾ نئين صف بندي ٿي رهي آهي. آمريڪا جو ڀارت سان فوجي ٺاهه توڙي ڀارت جو هلندڙ سال مئي ۾ ايران ۽ افغانستان سان واپاري ٺاهه توڙي ايران جي چابهار واري بندرگاهه کي گڏيل طور ترقي وٺرائڻ وارو ٺاهه انهيءَ ڳالهه جي ڪَڙي آهن.

اطلاع آهن ته اڙي واقعي کانپوءِ ڀارت پاڪستان خلاف محدود ڪارروائيءَ جي تياري ڪري رهيو آهي، جڏهن ته پاڪستان به هوائي مشقن کي وڌائي ڇڏيو آهي. اهڙي ڇڪتاڻ واري صورتحال ۾ به اقوامي متحده جي جنرل اسيمبليءَ کي پنهنجي خطاب ۾ وزيراعظم نواز شريف ڀارت کي غير مشروط ڳالهين جي آڇ ڪئي آهي، جيڪو ثبوت آهي ته پاڪستان، ڀارت سان سڀئي حل طلب تڪرار ڳالهين ٻولهين ذريعي حل ڪرڻ گهري ٿو. ڀارت کي به روايتي الزام بازين کان پاسو ڪندي حقيقت کي مڃيندي پاڪستان سان با معنيٰ ڳالهيون ڪرڻ گهرجن، ڇو جو جنگ ڪنهن به مسئلي جو حل ناهي، جنگ ٿيڻ کانپوءِ حل ڳالهين ۾ ئي سمايل هجي ٿو. پاڪستان کي پڻ علائقائي ۽ عالمي سطح تي جيڪي نيون صف بنديون ٿي رهيون آهن، تن کي سنجيدگيءَ سان ڏسڻ گهرجي ۽ ان جي روشنيءَ ۾ پنهنجي عالمي، علائقائي ۽ ملڪ اندر اختيار ڪيل پاليسين جو جائزو وٺڻ گهرجي. پاڪستان اندر قومن جا جيڪي آئيني، قانوني ۽ جائز مسئلا آهن، سي حل ڪندي ملڪ کي چئن اڪاين تي مشتمل حقيقي وفاق بڻائڻ گهرجي، گڏوگڏ علائقائي ۽ عالمي سطح تي پرڏيهي پاليسيءَ ۾ جيڪي غلطيون يا غلطان ٿيا آهن، تن کي به درست ڪري دنيا سان ۽ خطي سان لاڳاپن جي نئين دؤر جي شروعات ڪرڻ گهرجي. جيتري قدر پاڪ-ڀارت لاڳاپن جو تعلق آهي ٻئي ملڪ گهڻي وقت تائين دشمن رهي پاڙي ۾ رهي نه ٿا سگهن.

 

 

جيڪب آباد ۾ ڪٺور دل هٿان ڪٺل ننڍڙي شهلا.!!: غلام مصطفيٰ جمالي

اسان جا نيڻ به وڏا اڀاڳا آهن جن کي سواءِ لڙڪن  جي ٻيو ڪجهه مليو ئي ناهي.! ننڊ جنهن شِيءُ جو نالو آهي اها کين نصيب ئي ناهي.! اسان جا نيڻ به ڪنهن يتيم ٻار جيان معصوم ته گهڻئي آهن پر سندن سنگت سورن سان آهي سندس ساٿي لڙڪ ئي لڙڪ آهن. سندس گيت،غزل،نغما نوحن ۾ تبديل ٿي چڪا آهن کين اڀاڳي هجڻ جو سرٽيفڪيٽ ملي چڪو آهي.!!! سندس منزلون ٻين ماڻي ورتيون آهن.. اسان جا نيڻ سحرائن جي سفر تي نڪتل آهن… سحرا به اهي سحرا جن تي اڃان ڪوبه بادل ناهي برسيو… ان سحرائن جي تتل واري تيز تلوار جيان اسان جي پيرن جي کي زخمي ڪري اسان جي نيڻين جي اڳتي وڌڻ کان جهلي ڇڏيو آهي.۽ چيو آهي ته  اوهانکي سحرا جي سفر ۾ به منزل نصيب نه ٿيندي.. اوهان جون راتيون اوهان جي ڏينهن انهن هي سحرائن ۾ گذرندا.. جن ته بادل ناهن برسيا جيڪي سحرا سفر جي لائقَ ئي ناهن… اوهان سحرائن جا ساٿي آهيو. جڏهن دردن  جا نوحا ڳايون ته سحرا.ئن ۾ محفل مچائجو جئين اهي نوحا ڪير ٻڌي نه وٺي… ۽ سندس دل ۾ اوهان لاءِ رحم جي زنجير جڙي نه پوي،،، اوهان جا گيت، غزل، وايون، نظم، سڀ سحرائن کي سڻائڻ جهڙا آهن  جن ۾ ڀلي ڌرتي جو درد، ڳڀي لاءِ تڙپيندڙ يتيم جنهن معصوم جو رڙ  جيڪا هن اڌ رات اٿي بک وچان ڪئي هجي،ان ڀيڻ جو ڇو نه هجي جنهن جو ڪونڌر ڪالهه ڪسجي ويو جن جي هٿن تي لال مهندي به نه لاٿي  هئي جنهن لاءِ ونواهه جي ويٺل ڪنوار به نه سجائي وئي هئي .جنهن جا موڙ ٻڌڻ کان اڳ مرجهائي جي ويا.. جن لاءِ نه دهل وڳا نه ئي ڪي شرنايون نه ئي ڪا سيج سجائي وئي،

چاهي اهو درد انهي وني جو ڇو نه هجي جنهن جو ور شام مهل چئي ويو ته وني مون لاءِ ماني پچائي رکجان مان اجهو موٽيس پر وني جي مٿان سفيد چني اوڍجي وئي سندس چوڙيون چڪنا چور ڪيو ويون.. سندس سنيڌ مان سندور کي مٽايو ويو سندس چپن جي سرخي مٿي جي بنديا نڪ جي فلي کي لاٿو.ويو..ڇو.ته سندس ور نه موٽيو پر سندس مڙهه ضرور اڱڻ تي ايمبولنس مان لاٿو پئي ويو،،، يا انهن امڙ جي هنجهه جا نوحا ڇو نه هجن جنهن جو جاني جن پٽ جواني ۾ مارجي ويو هجي. جنهن لاءِ هن سپنا ڏٺا هئا جنهن جا خواب اوڌرا رهجي ويا. انهي ماءُ جي جهولي خالي ٿي وئي جنهن جو جوان جواني ۾ ڪنهن قاتل جي هٿان قتل تي ويو.. جنهن کيِ ماءُ وڏا جهول ڀري رب کان انهي جاني پٽ کي گهريُو هُو، ۽ اها جيجل ماءُ جڏهن رات جنهن پل سڀ لوڪ ستل هوندو هو  ته پٽ پاسو ورائيندو هو ته ماءُ جي دل ۾ هزارين وهم وسوا پيدا ٿيندا هئا ءُ ۽ هوُ  بار بار پڇندي هئي ته پٽ ٺيڪ ته آهين..  پر اڄ اها کٽ به خالي آهي جنهن تي هو ستل هوندو هُو اڄ ماءُ جي جهولي به خالي ٿي چڪي آهي جيڪا جهولي هن جهلي ان ڪونڌر کي گهريو هو ………حقيقتون ته الائي ڪيتريون سامهون آهن پر اسان وٽ هاڻ سهپ کي سگهه ناهي اسان جا هانءُ درد ڀوڳي ڀوڳي بيزار ٿي پيو آهي.. هاڻ اسان جي اندر جو انسان ڪپڪائڻ لڳو آهي اسان راتين جا راهي ته اڳ ئي هئاسين  پر هاڻ سحرائن جي سفر جيتري سگهه اسان ۾ ناهي.. هاڻاسان جون  اکيون ڪونڌر ڪسجندي نه نه ٿيون ڏسي سگهن.. ڀيڻ کان ڀاءُ وني کان ور جدا ٿيندي موت جي منظرن هاڻ سوچ جي لوڇ کي مات ڏئي چڏي آهي،اسان جي سنڌ ڌرتي تي رت جو رانديون ڪربلا جهڙا  منظر کڻي اچي ڪڙڪيون آهن مورئڙي جي ڪلاچي رت سان هولي جي راند زور کيڏي کيڏي ٿڪي پئي آهي.. جتي جا جوان جوا،شراب،هيروئين جا آڌي بڻايا وڃن.. انهن قافلن جا انهن قومن جا اڳواڻ ڪنهن رهزن کان گهٽ ناهن هوندا. مان انهي  ڇو جو جواب ٿو گهران انهن کان.. جن سنڌ جي سينڌ ميري نه ٿيڻ جو قسم کنيو هو جن ڀٽائي جي بيتن کي آيتون سمجهو آهي جن سچل،سامي، شاهه عنايت قلندر جي ڪوندري هٿ ۾ وجهي وڏا قول قرار ڪيا هئا ۽ سنڌ سان وچن ڪيو هو ته اسان تون مٿان ٿيندڙ هر ظلم ڪندڙ هر ظالم جي سر سسي کان ڌار ڪري ڇڏينداسين..پوءِ ڇو هي آخر ڪيساتين درد سان ڀريل منظر اڃان جي سامهون هوندا آهن،ڪالهه اخبارن جي پرنٽ جي اها خبر هئي ته جيڪب آباد ۾ هڪ ماءٌ کي سندس کير پياڪ ٻار سميت ڳلو ڪپي سندس دڙ سسمي کان ڌار ڪري ڇڏيو،اهو واقعو ڳوٺ رحيم بخش جتوئي ۾ پيش آيو جتي 30 ورهين جي عابده جتوئي ۽ سندس ٻن ورهين جي معصوم کير پياڪ گلن جهڙي ننڍڙي ٻاڙي شهلا گل جا ڳلا ڪٽيل لاش مليا ڪيڏو به مايوس ۽ بي وس آهيون اسين جيڪي صرف ۽ صرف خبرون پڙهون ٿا ۽ تبصرا ڪيو ٿا،،جنهن مان اهو صاف ٿو لڳي ته هتي تبصري ڪرڻ وارا تمام گهڻا آهن روئڻ وارو ڪوئي ڪونهي.مان پڇان ٿو ته آخر انهن ماءُ ڪهڙو ڏوهه ڪيو هوندو جو انهن کي ايڏي بي دردي سان قتل ڪيو ويو آهي ڪهڙو ڏوهه آهي انهي ٻه سالن جي معصوم شهلا گل جو جنهن اڃان هن دنيا ۾ اکيون ئي مس کوليون هنيون جنهن جي ماءٌ جيجل جو چهڙو به ڌنڌلو ڏسڻ ۾ پيو ايندو هوندو انهي مصوم کي مارڻ ۾ انهي ظالم انسان کي ٿورو به رحم ڪون آيو،ڪوڏي به رحم هو اهو انسان جنهن تي ظلمن جا جبل ڪرايا. اتي اهو سوال به آهي ته ڪير آهي جيڪو انصاف ڪندو ۽ ڪير آهي جيڪو انصاف ڏياريندو.ڇو آخر ڇو انصاف نه پيو ملي. منهجي ڇو….؟جو جواب ملي يا نه ملي من انهن جي اندر جو انسان نڀاڳي ننڊ مان سجاڳ ٿئي.جيئن سنڌ جي سحرا ساوا ٿي پون ۽ اسان جهڙا مسافر جيڪي ڪيترن ئي سالن کان وٺي انهي سحرا جي سفر ۾ منزل جي تلاش ۾ نڪتل آهن سي  ٿڪ ڀڃن.. پر ها محبتن جا شايد وعده وفا ٿين ها ته مجنون صدين جا سفر نه ڪري ها…مومل اهين نڌنڪي ٿي نه مري ها.سئسي سحرا ۾ قافلا وٺي نه نڪري ها.سهڻي دريا جي ويرن جي وڙ نه چڙهي ها پر  شايد اڄ جا وعده به ان سهڻي جي ڪچي دلي جهڙا آهن جيڪي وفا ٿيڻ کان پهرين ڳري ويا جن جي وٽ وجود ته آهي پر کوکلي بدن کان سواءِ کين ڪجهه به ناهي،نه اسان جا سفر کٽندا نه ساهه کي ٿڪ نصيب ٿيندو نه نيڻ لڙڪن کان آجا ٿيندا… پر اسان ڀلي دنيا وارن مان اميدو لاهي ڇڏيو هجن پر الله ۾ آسرو ايڏو آهي جيڏو  پاڻ.الله. اسان ۽ اسان جي اکين کي آس آهي ته سنڌ ضرور پنهجون منزلون ماڻيندي پوءِ پيار امن محبت جي اڌار وٺڻي نه پوندي پيار جا ڀاڪر اسان کي نصيب ٿيندا اسان جا سحرائن  جا سفر ضرور ختم ٿيندا اسان جا لڙڪن ڀنل نيڻ نينڊ جو آعوش جي جولهي جي لولي ۾ ضرور سمهندا پر اهو وقت پري ناهي بس اسان هڪ ٻئي کان ڀلي  رٺل ڇو نه هجون پر پريت کي جوڙي رکون انهي جو پلاند اسان کان ڇڏائي نه وڃي

 

 

پاڪ-ڀارت ڇڪتاڻ ۽گڏيل قومن جو ڪردار…

ڀارت والاريل ڪشمير ۾ فوجي دستا ۽ خطرناڪ هٿيار اڳين مورچن تي پهچائڻ شروع ڪري ڇڏيا آهن، پاڪستان ڀارت کي تنبيهه ڪندي چيو آهي ته پاڪ فوج ڪنهن به خطري کي منهن ڏيڻ لاءِ پوري طرح تيار آهي. بي بي سي جي رپورٽ موجب ڀارتي وزير اعظم نريندر مودي گھڻو وقت ملٽري آپريشن روم ۾ گذاريو، جتي هن ڪنٽرول لائن تي ڀارتي فوج جي چرپر جي تازي صورتحال جو جائزو ورتو. ڀارت پاران والاريل ڪمشير جي اوڙي سيڪٽر تي فوجي چر پر ۾ واڌ جون خبرون ملي رهيون آهن. بي بي سي موجب ڀارتي سرڪاري ذريعن ٻڌايو آهي ته بوفرز توپن ۽ 105 وچين رينج جون ٻيون توپون اوڙي جي چڙي ميدان، موهرا ۽ بونيار ۾ لڳايون پيون وڃن. سونه مرگ ۾ به وڏا هٿيار لڳايا پيا وڃن. انهن جاين کان آزاد ڪشمير ۾ پاڪستان جي دفاعي اڏاوتن کي نشانو بڻائي سگھجي ٿو. جڏهن ته ڀارتي فوجي ذريعن جو چوڻ آهي ته ڄاڻايل علائقن ۾ فوجي مِگ جهازن جي اڏام به شروع ٿي وئي آهي. پر اهو ناهي ٻڌايو ويو ته مِگ جهازن جي اڏام ڪنهن جنگي تيارين جو حصو هئي يا نه.  هوڏانهن ته ڀارتي فوج جي چرپر کي ڏسندي پاڪستان جي هوائي فوج به ملڪ جي اترئي حصي ۾ موٽر وي کي بند ڪري جنگي مشقون مڪمل ڪري ورتيون آهن. پرڏيهي کاتي موجب پاڪ فوج ملڪي بچاءُ لاءِ هر وقت تيار آهي. هوڏانهن وري رپورٽون آهن ته ڀارتي هندو انتهاپسند تنظيم وزير اعظم نواز شريف جي سر جي قميت مقرر ڪري ڇڏي آهي،  هندو انتهاپسند تنظيم جو چوڻ آهي ته جيڪو به وزير اعظم نواز شريف جو سر ڪٽي کڻي ايندو ان کي هڪ ڪروڙ روپيا انعام ڏندو ويندو، ٻئي طرف مودي سرڪار جو جنگي جنون ڏسندي ڀارتي ميڊيا به ميدان تي لهي پئي آهي، ڀارتي ميڊيا پاڪستان خلاف زهر اوڳاڇڻ شروع ڪري ڇڏيو آهي،

ٻئي طرف وزيراعظم نوازشريف والاريل ڪشمير ۾ ڀارتي فورسز جي هٿان معصوم شهرين جي فوتگين جا ثبوت گڏيل قومن جي جنرل سيڪريٽري بان ڪي مون جي حوالي ڪري ڇڏيا. وزيراعظم نوازشريف گڏيل قومن جي جنرل سيڪريٽري بان ڪي مون سان نيويارڪ ۾ ملاقات ڪئي جنهن دوران وزيراعظم ڪشمير جو مسئلو اٿاريو ۽ عالمي اداري جي اڳواڻن کي والاريل ڪشمير ۾ ڀارت هٿان معصوم شهرين جي فوتگين جا ثبوت ڏنا. ان کي رياستي دهشتگردي جي شڪار تي انهن مانهن جون تصويرون به ڏيکاريون بان ڪي مون قابض ڀارتي فورسز طرفان پيلٽ گن جي استعمال واري ظلم جون تصويرون ڏسي افسوس۽ ڳڻتي جو اظهار ڪيو وزيراعظم والاريل ڪشمير جي صورتحال جي حوالي سان بان ڪي مون جي بيان جا ٿورا مڃيا وزيراعظم گذريل 74 ڏينهن ۾ والاريل ڪشمير ۾ 100 ماڻهن جي شهادت ۽ پيلٽ گن جي بيدرداني استعمال کان آگاهه ڪيو جنهن سبب سوين ماڻهو پنهنجي اکين جو نور وڃائي ويٺا آهن. وزيراعظم پنهنجي خطن ۾ سلامتي ڪائونسل جي پنجن رڪن ملڪن جي قيادت عالمي برادري ۽ گڏيل قومن جي جنرل سيڪريٽري جي توجهه ڪشمير جي صورتحال ڏانهن ڇڪرائي. هن بان ڪي مون سان مطالبو ڪيو ته والاريل ڪشمير ۾ عدالت کان مٿانهن موت جي جاچ ڪرائي وڃي. ۽ گڏيل قومن جو فيڪ فائينڊنگ مشن والاريل ڪشمير ۾ صورتحال جي جاچ ڪري. وزيراعظم نواز شريف چيو آهي ته ڀارت اڙي واقعي جي ذميواري به پاڪستان مٿان مڙهي رهيو آهي جنهن سان شڪ شعبا وڌيڪ وڌي ويا آهن، ڀارت والاريل ڪشمير ۾ بيگناهه ڪشميرين کي شهيد ۽ زخمي ڪري رهيو آهي. صحافين سان ڳالهائيندي نواز شريف وڌيڪ چيو ته ڀارت پنهنجي ڏاڍ ذريعي 170 بيگناهه ڪشميرين کي شهيد ۽ ڪيترن ئي زخمي ڪري ڇڏيو آهي جنهن سبب ڪشميري عوام ۾ ڪاوڙ پکڙيل آهي.