تازيون خبرون

Monthly Archives: May 2016

عالمي برادري کي ٻين عالمي جنگ کان پوءِ مهاجرن جي بدترين بحران کي منهن ڏيڻو پئجي رهيو آهي: انجلينا جولي

گڏيل قومون (شوبز نيوز) گڏيلقومن جي مهاجرن بابت خصوصي نمائنده ۽ اداڪاره انجلينا جولي خبردار ڪيو آهي ته مهاجرن جي امداد لاءِ قائم هيو منسٽرين نظام ناڪام نظام ناڪام ٿي رهيو آهي. جرمن ذريعن پنهنجي هڪ بيان ۾ هن چيو ته سڄي دنيا ۾ 60 ملين ماڻهو بي گهر ٿي چڪا آهن. جڏهن ته عالمي برادري کي ٻين عالمي جنگ کان پوءِ مهاجرن جي بدترين بنهران کي منهن ڏيڻو پئجي رهيو آهي. هن چيو ته معلوم ٿئي ٿو ته دنيا جي سيڪيورٽي خطري ۾ اچي وئي آهي جو ايتري وڏي تعداد ۾ ماڻهو هجرت ڪرڻ تي مجبور ٿي ويا آهن. اداڪاره وڌيڪ چيو ته امدادي ادارن وٽ گهٽ رقم شديد مشڪلاتون اچي رهيون آهن. ان مشڪل وقت ۾ عالمي برادري کي هڪ سنجيده عزم ظاهر ڪرڻ جي ضرورت آهي.

 

پاڪستان ڪرڪيٽ بورڊ سري لنڪن ڪرڪيٽ بورڊ کي باضابطه طور تي خط

لاهور (اسپورٽس نيوز) پاڪستان ڪرڪيٽ بورڊ سري لنڪن ڪرڪيٽ بورڊ کي باضابطه طور تي خط لکيو آهي،جنهن ۾ اهو معلوم ڪيو ويو آهي ته ڇا سري لنڪن ڪرڪيٽ بورڊ هن سال آڪٽوبر مهيني ۾ ويسٽ انڊيز جي ٽيم خلاف پاڪستان جي هوم سيريز جي ميزباني ڪري سگهي ٿو يا نه؟ واضح رهي ته پاڪستان ڪرڪيٽ بورڊ گڏيل عرب امارات ۾ پنهنجي هوم سيريز دوران ٿيندڙ خرچن ۾ گهٽتائي سبب سري لنڪا ۾ سيريز منعقد ڪرڻ جو ارادو رکي ٿو. پاڪستان ڪرڪيٽ بورڊ جي ايگزيڪيوٽو ڪميٽي جي سربراهه نجم سيٺي ڪجهه ڏينهن اڳ ميڊيا سان ڳالهائيندي چيو هو ته پي سي بي ويسٽ انڊيز خلاف سيريز سري لنڪا ۾ منعقد ڪرڻ بابت غُور ڪري رهيو آهي. نجم سيٺي جي اهڙي بيان بعد سري لنڪن ڪرڪيٽ بورڊ جو بيان سامهون آيو هو ته کين سيريز جي ميزباني ڪرڻ تي خوشِي ٿيندي. واضح رهي ته پاڪستان 2009۾ لاهور ۾سري لنڪن ڪرڪيٽ ٽيم تي ٿيل دهشتگردن جي حملي بعد پنهنجو هوم سيريز گڏيل عرب امارات ۾ کيڏڻ تي مجبور آهي.

 

نيوزيلينڊ سيريز کان پهريان قيادت ڇڏيان ها ته ماڻهو چون ها ته ڪپتان ڀڄي ويو: آفريدي

اسلام آباد (اين اين آءِ) پاڪستان ڪرڪيٽ ٽيم جي اڳوڻي ڪپتان شاهد آفريدي چيو آهي ته ان ورلڊ ٽي-20 کان پهريان ئي ڪپتاني ڇڏڻ جو فيصلو ڪيو هو پر ٽيم ۾ ڪوبه دلير نه هو جيڪو پاڪستاني ٽيم جو بوجهه کڻي سگهي ۽ هو پاڻ به نيوزيلينڊ سيريز کان پهريان جيڪڏهن قيادت ڇڏي ها ته ماڻهو سمجهن ها ته ڪپتان ڀڄي ويو هڪ انٽرويو ۾ شاهد آفريدي چيو ته عمر اڪمل ۽ احمد شهزاد پنهنجي غلطين جو احساس ڪن ۽ ماضي کي وساري ٽيم جي واپسي لاءِ وڌ کان وڌ محنت ڪن شاهد آفريدي 22 مئي تي ڪائونٽي کيڏڻ لاءِ ويندو اڳوڻو ڪپتان ٻڌايو ته هو انگلينڊ ۾ پنهنجي فٽنيس تي ڪم ڪندو ۽ پنهنجي فرم مان سليڪٽر جو اعتماد حاصل ڪري قومي ٽيم ۾ واپس ايندو.

 

آف شور ڪمپنين کان لاتعلق بڻيل وزيراعظم جو جواب: جاويد ابڙو

پاناما ليڪس هن ملڪ جي سياستدانن جي چهرن تان جهڙي طرح نقاب لاٿو آهي، ان سان يقينن جمهوريت پسندن کي تڪلييف ۽ دلي اذيت پهتي آهي، ڇوته اسان جي سياستدانن هن ملڪ کي مذاق بڻائي ڇڏيو آهي، ڪڏهن پاناما ليڪس پڌريون ٿي رهيون آهن ته ڪڏهن هنگامو پيدا ڪندڙ انڪشاف ٿين ٿا ته ڪٿي وري هڪ گهر مان نوٽن سان ڀريل ٿيلها، سون ۽ پرڏيهي ڪرنسي ملي رهي آهي، مطلب ته مني لانڊرنگ ۽ ڳجهن اڪائونٽس کان وٺي آف شور ڪمپنين تائين هر سياستدان پنهنجي مفادن جي ڄار ۾ جڪڙيل نظر اچي ٿو. اصل ۾ هن ملڪ تي حڪمراني ڪندڙن عوام جي جمهوريت پسند رويي جو ناجائز فائدو کنيو آهي ۽ ان کي عوام جي ڪمزوري سمجهيو آهي، هن حقيقت کان ڪير به انڪاري ناهي ته قوم جمهوريت، جمهوري ادارن، آئين ۽ قانون جي بالادستي لاءِ وڏيون قربانيون ڏنيون آهن، پنهنجو خون وهايو آهي، پنهنهجا ليڊر وڃايا آهن، دنيا جي ڪنهن به ٻئي ملڪ ۾ اهڙو مثال نٿو ملي، جتي جمهوريت لاءِ ماڻهن ڦٽڪا کاڌا هجن، جيل ڀريا هجن، خون ۽ لڱ ساڙيندڙ نٽهڻ اس ۾ نڪري پگهر وهايو هجي ۽ لٺيون کاڌيون هجن، پر افسوس ته سياستدانن عوام کي ان لاچاري تائين پهچايو آهي جو هو اڄ جمهوريت جو دفاع ڪرڻ کان به گهٻرائي ٿو، هن ملڪ ۾ هي ڪهڙو کيڏ کيڏيو پيو وڃي، جتي هزار ڏيڍ شخصيتون پنهنجي دولت کي بچائڻ ۽ آف شور ڪمپنين کي عوامي مسئلن کي حل ڪرڻ کان وڌيڪ اهميت ڏئي رهيون آهن، 70 ۽ 80 جي ڏهاڪن ۾ جن وٽ پلاٽ به نه هو، اڄ هو ارب پتي، آف شور ڪمپنين ۽ قيمتي گاڏين جا مالڪ بڻجي چڪا آهن ۽ عوام ساڳيو غربت جي چڪيءَ ۾ پيسجي رهيو آهي.

وزيراعظم نوازشريف جي پارليامينٽ جي اجلاس ۾ شرڪت کان اڳ ئي ميڊيا ۾ سندس جنهن تقرير جا امڪان ظاهر ڪيا پئي ويا، لڳ ڀڳ ان جو ساڳيو متن ۽ موقف آهي، ڇاڪاڻ ته پهرين ڏينهن کان وٺي وزيراعظم نوازشريف اهو ئي چوندو رهيو ته پاناما ليڪس ۾ ڄاڻايل ڪابه ڪمپني سندس نالي تي ناهي، پر سندس پٽ پرڏيهه ۾ رهن ٿا، ان ڪري کين دنيا جي ڪنهن به ملڪ ۾ کين ڪاروبار ڪرڻ جو پورو پورو حق آهي، گڏوگڏ اهو به چيو پيو وڃي ته هن ملڪ (پاڪستان) جون قانون وزيراعظم نوازشريف تي ته لاڳو ٿئي ٿو، پر سندس پٽ ان کان آجا آهن!

پاناما ليڪس جو معاملو پارليامينٽ ۾ منهنجي خطاب سان حل نه ٿيندو، ٽئڪس چوري ۽ قرض معاف ڪرائيندڙن جي اصل ڪهاڻي به سامهون آندي وڃي، ڳالهه نڪتي آهي ته هاڻي حقيقت تائين پهچڻو پوندو، منهنجو پلئه صاف آهي، مون کي ڪنهن به استثنيٰ جي ضرورت ناهي، پاناما ليڪس ۾ ته منهنجو نالو نشان ئي ناهي، بلڪه شريف خاندان جي ڪجهه فردن جا نالا آيا هئا، آف شور ڪمپنين جو مطلب بدعنواني ڪرڻ ناهي، پر جنهن شخص جو پاناما پيپرز ۾ ذڪر به ناهي، هن جي خلاف ئي فرد جرم لاڳو ڪيو ويو، مخالف ڌر جي ڪنهن به مطالبي کان اڳ قوم کي خطاب ڪيو ۽ پاڻ کي احتساب لاءِ پيش ڪيو، گڏوگڏ رٽائرڊ جج جي سربراهي ۾ عدالتي ڪميشن جوڙڻ جو اعلان به ڪيو، پر ان کي رد ڪيو ويو، ان بعد چيف جسٽس کي خط لکيو ويو ته جيئن مخالف ڌر مطمئن ٿي وڃي، پر حڪومت جي ٽي او آرز کي تڪراري بڻايو ويو، مخالف ڌر جا ٽي او آرز رڳو هڪ شخص جي چئوطرف گهمندا رهيا ۽ اهو آئون آهيان وزيراعظم نوازشريف…..!

”گذريل 23 سالن دوران شريف خاندان 10 ارب رپيا ٽئڪس ادا ڪيو، ذاتي طور تي 3 ڪروڙ 60 لک رپيا ٽئڪس ڏنو، جنهن جو رڪارڊ ايف بي آر وٽ موجود آهي، لنڊن جا فليٽ هجن يا متحده عرب امارات جي ملڪيت، هڪ به پئسو ملڪ کان ٻاهر نه ويو، دبئي ۽ جدي جون فيڪٽريون وڪڻڻ سان لنڊن ۾ فليٽ خريد ڪيا“، اهو آهي وزيراعظم نوازشريف جو پارليامينٽ جي اجلاس ۾ مخالف ڌر کي ڏنل مختصر جواب.

هلندڙ سال ميانمار ۾ صدارتي چونڊون ٿيون، پر ڪيترن ئي ورهين تائين جمهوريت لاءِ جدوجهد ڪندڙ آنگ سانگ سوچي کي ان ڪري صدارتي اميدوار طور نااهل قرار ڏنو ويو جو سندس پٽ پرڏيهي ملڪ جي شهريت رکن ٿا، پوءِ ڇا پاڪستان جي حڪمراني ۽ نظام ميانمار جهڙي ملڪ کان به خراب ۽ بي ڪار ٿي چڪو آهي جو هتي جيڪڏهن ڪنهن حڪمران جو احتساب ڪيو وڃي ٿو ته هو پاڻ کي ان کان آجو ڪرائڻ لاءِ جمهوري اصولن ۽ قاعدن کان هٽي ڪري ڪم ڪري ٿو؟ سوال اهو آهي ته آخر هتي اهڙا جمهوري مثال ڇو نٿا قائم ڪيا وڃن؟ ها باقي هتي ڪو رڪارڊ قائم ڪرڻو هوندو ته صرف ۽ صرف ڪارو ڌن اڇو ڪرڻ جو، مني لانڊرنگ ڪيئن ڪجي، عوام جي خون پسيني جي ڪمائي مان حاصل ڪيل ٽئڪس ذريعي ڀريل قومي خزاني کي ڪيئن ڦري پئسو پرڏيهه منتقل ڪجي.

اسان جي معاشري ۾ قائم ٿيل رواجن ۽ برين عادتن پاڪستاني معاشري کي خراب کان خراب ترين بڻائي ڇڏيو آهي، سچ ته اهو ئي آهي ته ملڪ جي ادارن کي عوام کان وڌيڪ پنهنجي ذات کي اهميت ڏيندڙ نام نهاد سياسي ٽولن، ڌڙا بندين، مفاد پرستي، سياسي انائن ۽ هٺ ڌرمين تمام گهڻو نقصان پهچايو آهي، ان کان انڪار ناهي ته اسان جي ملڪي ادارن ۾ محب وطن، خوفِ خدا رکندڙ ۽ عوام جي ڀلائي ۽ فلاح لاءِ ڪم ڪندڙ ايماندار ۽ مخلص ماڻهو موجود ناهن، پر بدديانت، مفاد پرست ۽ دوکيباز ٽولا ڀلي اهي سياستدان، بيوروڪريٽ، ٽيڪنوڪريٽ ۽ ٻين شعبن سان تعلق رکندڙ ڇونه هجن، اهي انهن تي حاوي بڻجي چڪا آهن، اهو ئي سڀ کان وڏو ڪارڻ آهي ته اسان جي ملڪ کي ترقي ۽ خوشحالي جي راهه ملڻ محال بڻيل آهي، اسان جي ملڪ جي رڳو جمهوري ادارن ۾ خاميون ناهن، پر غير جمهوري دورن ۾ ڏنڊي جي زور تي پنهنجي حق ۾ فيصلا ڪرائيندڙ واقعا به تاريخ جو حصو آهن، هر جمهوري ملڪ ۾ هر سطح تي پارليامينٽ جو احترام ڪيو ويندو آهي، ڇوته پارليامينٽ ۾ عوام جا چونڊيل نمائندا ايندا آهن ۽ جمهوري ملڪن ۾ پارليامينٽ جون چونڊون ڪنهن دٻاءُ، لالچ لوڀ ۽ بدديانتي تي مشتمل ناهن هونديون، اتي نه ڌانڌلي جي ڪا گنجائش هوندي آهي ۽ نه وري بي بنياد الزام باري جو سهارو ورتو ويندو آهي. ان سان گڏ رياست جي بنيادي ذميواري عوام جا مسئلا حل ڪرڻ هوندي آهي، جنهن جي سربراهي وزيراعظم کي ڪرڻي پوندي آهي، پر جتي وزيراعظم پاڻ ئي پاناما ليڪس جهڙن الزامن جي ڄار ۾ وڪوڙجڻ ڪري پاڻ کي صاف ۽ پوتر ڄاڻائڻ لاءِ وضاحتون ڪندو وتي ته ان ملڪ ۾ انصاف جي گهرجن کي ڪيئن ٿو پورو ڪري سگجي. اصل ۾ اسان جا چونڊيل نمائندا ان ڳالهه کان غافل ٿي چڪا آهن ته هو عوام جا ڪي خادم آهن، جمهوريت جي تعريف به اهڙي ريت ئي ڪري سگهجي ٿي ته عوام جي حڪومت عوام لاءِ هجڻ گهرجي، جيڪا عوام جي ذريعي ئي چونڊي اقتدار تائين پهچائي وڃي ۽ ان عمل جو اندازو ان مان ئي لڳائي سگهجي ٿو ته جمهوريت ئي پارليامينٽ کي محترم ۽ مقدس بڻائيندي آهي. جيڪڏهن ڪابه جمهوريت عوام جي خواهشن ۽ اميدن تي پورو نه ٿي لهي ته اها نه مقدس سڏرائي سگهجي ٿي نه وري ان جي پارليامينٽ جي ڪا اهميت هجي ٿي.

جيڪڏهن پاڪستان جي جمهوريت ۽ جمهوري ادارن جي ڳالهه ڪريون ته اها ڳالهه پڌري ٿئي ٿي ته اسان جي جمهوريت ۽ جمهوري ادارا بدعنوانين، ڪرپشن، مني لانڊرنگ، اختيارن جي ناجائز استعمال ۽ ٻين ڪارن ڪرتوتن جو ڳڙهه بڻجي چڪا آهن، ان جو ڪارڻ اهو آهي ته جيڪي ماڻهو ادارن ۾ پهچن ٿا، اهي ڌانڌلي ۽ دولت جي سهاري پهچن ٿا، اهڙي ريت هو پنهنجي پٺيان ٻين کي به ساڳي رستي وٺي اچن ٿا، نتيجي ۾ انهن کي عوام جا مسئلا حل ڪرڻ جو ڪوبه احساس باقي نٿو رهي، اسان جي ملڪ ۾ جڏهن به جمهوريت آئي ته ان کي صنعت ۽ رڳو پاڻ لاءِ محفوظ سيڙپڪاري جي ور چاڙهيو ويو، اهڙي قسم جي جمهوريت ۽ پارليامينٽ ڪڏهن به قابل احترام مقام ۽ رتبو حاصل نٿي ڪري سگهي.

اسان جي ملڪ جي تاريخ گهڻو ڪري سياسي بحرانن سان ڀري پئي آهي، جيڪي خاص ڪري سياستدانن جي اقتدار تائين پهچڻ ۽ ان جي حفاظت ڪرڻ تائين محدود رهيا آهن ۽ اهي بحران چهرن جي تبديلي باوجود هر دور ۾ ورجايا وڃن ٿا، پر موجوده حڪومت ۾ پاناما ليڪس کانپوءِ آف شور ڪمپنين جو جيڪو شور متو آهي، جيڪڏهن ان کي نظرانداز ڪري معاملي کي دٻايو ويو ته پاڪستان ۾ ڪڏهن به ڪرپشن ۽ بي قاعدگين وارو سلسلو ختم نه ٿي سگهندو، عوام هاڻي ڪرپشن واري عذاب کان ڇوٽڪارو چاهي ٿو، ڇوته عوام کي گهڻن ئي سياستدانن ڪوڙا ڏٽا ۽ دلاسا ڏئي دوکا ۽ دولاب ڪيا آهن، انهن جي هر نعري سان گڏ ڪانه ڪا لالچ جُڙيل رهندي پئي اچي، دوکيباز ۽ فريب ڪندڙ ڪوڙن چهرن هن ملڪ جي غريب عوام کي غلام بڻائي رکيو آهي. اڃا به وقت ويو ناهي، ملڪ ۾ اهڙي احتساب جي ضرورت آهي، جنهن ۾ هڪ معمولي ملازم کان ويندي صوبائي ۽ قومي سطح جي ڪامورن توڙي چيف ايگزيڪٽو کي به ساڳي قطار ۾ بيهاريو وڃي، تڏهن وڃي ان کي بنا فرق وارو احتساب چئي سگهبو، باقي رڳو بنا ڪنهن فرق جي احتساب ڪرڻ جون ڳالهيون ۽ دعوائون ڪرڻ عوام سان دوکو ڪرڻ کانسواءِ ٻيو ڪجهه به ناهي، دنيا ۾ هر هنڌ (پاڪستان کانسواءِ) جمهوريت جي ذريعي ئي ترقي ٿي رهي آهي، پر هتي افسوس آهي ته سياستدانن جمهوريت جي نالي تي  قائم ڪيل نظام ۾ ملڪ کي ڪابه ترقي ناهي ڏني، سواءِ ايذائن ۽ رنجائڻ جي، عوام هاڻي اهو ڄاڻي چڪو آهي ته پارليامينٽ جي ذريعي ملڪ ۾ ڦرلٽ ڪئي وئي آهي، عوام کان ٽئڪس جي صورت ۾ اوڳاڙيل رقمن مان وقت جي حڪمرانن نه رڳو ڏيهه توڙي پرڏيهه ۾ ملڪيتون ۽ اربين رپين جا اثاثا گڏ ڪيا آهن، انهن کي هاڻي انهيءَ ڦرلٽ جو حساب ضرور ڏيڻو پوندو، ڇاڪاڻ ته ملڪ ۾ بنا فرق احتساب ۽ انصاف جو نظام ملڪي سلامتي، عوام جي ڀلائي ۽ خوشحالي لاءِ لازمي ٿي چڪو آهي.

پارليامينٽ ۾ وزيراعظم جي خطاب کان اڳ مخالف ڌر (پيپلزپارٽي ۽ تحريڪ انصاف) اهو اعلان ڪيو ته چيف ايگزيڪٽو جي تقرير دوران ڪوبه گوڙ يا هنگامو نه ڪيو ويندو، پر وزيراعظم کان پاناما ليڪس جي معاملي تي سوال ضرور ڪيا ويندا، ان ۾ ڪو شڪ ناهي ته مخالف ڌر جو اهو فيصلو جمهوريت کي هٿي ڏئي ٿو، ساڳي ريت حڪومت به اهڙي قسم جو رويو اختيار ڪري ته انائن جي ور چڙهيل موجوده سياسي بحران کي ڪنهن حد تائين حل ڪرڻ ۾ مدد ملي سگهي پئي.

javed_abro@hotmail.com

 

 

ماضيء جو آئينو ؛ ” شروعاتي قسم جو انسان“: شفيق شاڪر

هڪ اندازي مطابق زمين تي پهريون انسان30 لک کان 20 لک قبل مسيح جي وچ ڌاري ظاهر ٿيو.ماهرن ان دور جا الڳ الڳ نالا تجويز ڪيا آهن.ڪن ان کي پيليوليٿڪ ايج (Paleolithic Age) ۽ ڪن پلئي اسٽو سين (Pleistocene Age)  لکيو آهي.بهرحال اهو برفاني دور هو جنهن زمين جي گولي تي گهرا نشان ڇڏيا .ڪجھه محقق انسان جي هن زمين تي عمر اٽڪل ست لک سال بيان ڪن ٿا.

ماهرين مطابق شروعاتي انسان ان علائقي ۾ رهندا هئا جن کي هاڻي ڏکڻ آفريڪا يا وچ آفريڪا چيو وڃي ٿو.انهن علائقن ۾ ننڍيون ننڍيون ڍنڍون هيون جن جي ڪناري ڪجھه گھٽ ڊگھا وڻ.ٻوٽا ۽ گند گاه وڏي مقدار ۾ اڀريل هو.ڍنڍن کان ڪجھه مفاصلي تي گاه جا وڏا جھنگ هئا جن ۾ قسمين قسمين جانور رهندا هئا.انهن ۾ اهي وڏا جانور به شامل هئا جيڪي هاڻوڪي هرڻن،باندرن،بگھڙن، شينهن ۽ سوئرن جا ابا ڏاڏا شمار ڪيا وڃن ٿا.نانگ،ڪرڙيون، ڪڇون۽ڪوئن جهڙا ننڍڙا جانور به موجود هئا.جھنگ جي وڻن تي پکي ۽ ڍنڍ جي صاف پاڻيء ۾ مڇيون به ترنديون رهنديون هيون.

زمين جي شروعاتي ماڻهن کي ” هومو هيبلز” (Homo Hebilis) چيو ويو آهي جنهن جي لفظي معنيٰ آهي ”هنرمند“. جن جو قدساڍا چار فٽ،انهن جون ڄاڙهيون ۽ وات وڏا ۽ انهن جون پيشانيون نهايت ئي ننڍيون هيون.سندن رنگ ڪاروجڏهن ته انهن جي پٺي،ٻانهن ۽ ٽنگن تي ڊگھا ڊگھا وار هئا.

چار لک سال قبل مسيح، اڀرندي يورپ ۾ انسانن جي موجودگيء جون گواهيون مليون.انهن ماڻهن کي ”پيٿيڪين ٿراپس“ (Pathicanthropus)جي نالي سان سڏيو ويو. ٻه لک سال قبل مسيح،انسان شڪار جي لاء باقائدي پٿر جي هٿوڙن جو استعمال شروع ڪيو

.30 هزار سال قبل مسيح،جديد انسانن جن کي ” هومو سيپينز“ سڏيو ويو تن پراڻن انسان جي جاء حاصل ڪري ورتي.هٿيار ۽ اوزار پٿرن سان گڏوگڏ  وڏن وڏن جانورن جي هڏين مان به ٺهڻ لڳا. عورتن پٿرن جا اهڙا زيور پائڻ شروع ڪيا جن سان باقائدي جنسي شهوت پيدا ٿيندي هئي يا انهن تي اهڙيون شڪليون ٺاهيون وينديون هيون جن ۾ جنسي ميلاپ جا منظر ڏيکاريا ويندا هئا.نه صرف آباديون وڌڻ لڳيون پر جادو ٽوڻي جو به زور وڌي ويو.انسان رهڻ لاء جبلن جي غارن کي ٽڪي گھر بنايا ۽ انهن جي ديوارن تي خوبصورت نقش ۽ نگار به سجائڻ شروع ڪيا.اهو ئي دور هو جڏهن انسان هڏين مان موسيقيء جا اوزار جوڙيا.1940ع م فرانس جي لاسڪوس ۾ اهڙا غار لڌا ويا آهن  جن جي ديوارن تي بنايل تصويرون 14 هزار کان 25 هزار سال قبل مسيح جون آهن.

15 هزار سال قبل مسيح، انسان يا انسان جهڙي مخلوق جي رهڻي ڪهڻيء ۾وڌيڪ تبديليون آيون .غارن ۾ هاڻي جانورن سان گڏو گڏ عورتن جون به تصويرون جڙڻ لڳيون.چون ٿا ته  انهيء دور ۾ فرانس جي ازالين تهذيب(Azilian Culture) ۾ انسان اشارن سان گڏوگڏ زبان سان به پنهن جي دل جي ڳالهه بيان ڪرڻ جي قابل ٿي ويو.

12 هزارسال قبل مسيح ۾، وڏن وڏن برفاني جبلن پگھرجي پاڻيء جي صورت اختيار ڪئي ۽ انهن جي جڳهه تي جھنگل ۽ واديون پيدا ٿي پييون. 10 هزار سال قبل مسيح اهو ممڪنه زمانو سمجھيو وڃي ٿو جڏهن ايشيا مان انسان.بري ۽ بحري رڪاوٽون ڪاٽي ان سرزمين ۾ داخل ٿيو جنهن کي اڄ ڪلهه آمريڪا چيو وڃي ٿو.اولهه يورپ ۾ ”ميسوليٿڪ دور ”   (Mesolithic Age)شروع ٿيوجيڪو ساڍا ٽي هزار سال جاري رهيو.

8 هزار قبل مسيح ۾ باقائدي زراعت جو ڌنڌو شروع ٿيو،انسان پاڻ ٻج پوکي زمين مان خوراڪ حاصل ڪرڻ شروع ڪئي. چون ٿا ته ان زماني ۾ ئي هڪ اهڙو ٻوٽو به پوکيو ويو جنهن مان اڳتي هلي ڪپهه حاصل ٿي. پٿر جا هٿيار ۽ اوزار دستور مطابق استعمال هيٺ هئا  پر هاڻي انهن کي جدا جدا طريقن سان وڌيڪ چمڪايو ويو۽ انهن جون ڌارون تيز ڪرڻ جو فن به اختيار ڪيو ويو. سمنڊن ،دريائن ۽ ڍنڍن مان مڇيء جي شڪار جي شروعات ٿي.آفريڪا ۾ هن وقت موجود نيگرو نسل جي ماڻهن جو وڏو به ان دور ۾ پيدا ٿيو هو۽ ”جيريڪو“نالي شهر به ان دور ۾ آباد ٿيو.جنهن کي دنيا جي معلوم تاريخ جو پهريون فصيلدار يعني پناه گاه ڏنل شهر چيو وڃي ٿو. ان جا کنڊر اسرائيل ۾ بيت المقدس جي اتر اوڀر ۾ مردار سمنڊ جي اتر ۾ لڌا ويا آهن.

ست هزار قبل مسيح ۾، خود به خود آيل ” نيو ليٿيڪ انقلاب “ (Neolithic Revolution)آيو جنهن کي ”پٿر جو زمانو“ (Stone Age ) به چيو ويندو آهي.ان دور ۾ دنيا جي مختلف حصن ۾ انساني زندگين تمام تيزيء سان ارتقا جون منزلون طيء ڪيون.انهن ڳوٺ جوڙڻ شروع ڪيا۽ زمين سان انهن جو رشتو مضبوط ٿيڻ لڳو ۽هاڻي انهن جانور پالڻ به شروع ڪيا.ڏکڻ اولهه ايشيا کان شروع ٿيندڙ اهو انقلاب 25000 سالن تائين جاري رهيو.هڪ روايت مطابق بحيره روم اهو پهريون سمنڊ هو جنهن ۾ ٻيڙيون هلايون وييون ۽ اهو ئي زمانو هو جڏهن انسان ٻيڙيون بنائڻ ۽ انهن کي سمنڊ ۾ هلائڻ سکيو.

6هزار قبل مسيح ۾، نه رڳو ڳائڻ وڄائڻ جا اوزار ايجاد ٿياپرخود انسان ڳائڻ به ان دور ۾ سکيو.اهو به چيو وڃي ٿو ته ناچ ۽ ناٽڪن جو رواج به ان زماني ۾ ئي پيو.انهيء ئي دور ۾ انسان باقائدي فصل اپائڻ شروع ڪيا ۽ زراعت جي شعبي جا ڪجھه سادا اوزار به ايجاد ڪيا.جڏهن ته پنج هزار سال قبل مسيح ۾،انسان ميسوپوٽيميا (عراق) ۽ اناطوليا (ترڪي) ۾ اس ۾ سڪايل مٽيء جي سرن مان گھر بنائڻ شروع ڪيا.

 

 

اپوزيشن پاران وزير اعظم جو خطاب رد

گڏيل مخالف ڌر وزيراعظم جي بيان کي رد ڪندي، لائحه عمل جوڙڻ جو اعلان ڪري ڇڏيو آهي، اپوزيشن جو موقف  آهي ته وزيراعظم کان 7 سوالن جا جواب گهريا هئاسين پر هو خطاب کانپوءِ 70 سوال ڇڏي ويو آهي، هاڻي ته جده ۽ دبئي به اچي ويو آهي، اسان ته اهو پڇيو ئي ڪو نه هو، وزيراعظم پاڻ ٻڌائي ويو آهي. قومي اسيمبلي ۾ وزيراعظم جي خطاب کانپوءِ اجلاس کي خطاب ڪندي سيد خورشيد شاهه چيو ته وزيراعظم کان اسان پاناما ليڪس بابت رڳو 7 سوال پڇيا هئا پر وزيراعظم تي خطاب کانپوءِ 70 سوال پيدا ڪري ويو آهي ۽ اسان کي ته خبر ئي نه هئي ته جده ۽ دبئي به ان منظرنامي ۾ آهن جن کي وزيراعظم پاڻ ظاهر ڪري ويو آهي. هن چيو ته اسان کي هاڻي تون چور تون خراب آهين واري معاملي ۾ نه پوڻ گهرجي پر اسان صرف جواب چاهيون ٿا،

وزيراعظم کي موقف ڏيڻ جي لاءِ بهترين موقعو پيش ڪيو پر وزيراعظم هو وڃائي ڇڏيو ۽ وزيراعظم اهي انڪشاف ڪيا آهن جن جو ته اسان کي به پتو نه هو. ميڊيا وٽ اسان جا سوال موجود آهن، انهن سوالن ۾ هڪ به اهڙو سوال نه آهي جنهن مان لڳي ته اسان ڪا زيادتي ڪئي آهي. اسان واڪ آئوٽ ان جي لاءِ ڪيو جو وڌيڪ ڪجهه خراب چوڻ بدران عوام وٽ وڃجي ۽ عوام سڀني کان وڌيڪ بهتر جج آهي. ملڪ ۾ بيروزگاري حد کان وڌي وئي آهي، مزدور روزگار جي ڳولا ۾ آهن ۽ ماڻهو اسان کان پڇن ٿا ته توهان ڇا ڪيو آهي. گڏيل مخالف ڌر اڄ 10 وڳي ويهي وڌيڪ لائحه عمل جوڙيندي.

پاڪستان تحريڪ انصاف جي چيئرمين عمران خان چيو ته وزيراعظم پنهنجي پٽن جو نالو ورتو پر ڌيءَ جو نالو نه ورتو، مريم نواز ٻن آف شور ڪمپنين جي مالڪ آهي. وزيراعظم کي پارليامينٽ ۾ ايتريون ڪهاڻيون ٻڌائڻ جي ضرورت ئي نه هئي. وزيراعظم پهريون فليٽ 1993ع ۾ خريد ڪيو ۽ ٻيون فليٽ 31 جولاءِ 1995ع ۾، چوٿون 29 جنوري 2004ع ۽ پنجون 2005ع ۾ خريد ڪيو. مون 1982ع ۾ وزيراعظم کان وڌيڪ ٽيڪس ڏنو ۽ وزيراعظم 2011ع ۾ مريم نواز کي پنهنجي ڪفالت ۾ ظاهر ڪيو.

 

پانامه ليڪس بعد اپوزيشن جو هدف صرف وزير اعظم يعني ”آءُ“ آهيان: نواز شريف

اسلام آباد (اين اين آءِ) وزيراعظم محمد نواز شريف پاناما ليڪس واري معاملي تي عدالتي ڪميشن جي ٽي او آرز بڻائڻ لاءِ اپوزيشن جي مشاورت سان ڪميٽي بڻائڻ جي تجويز ڏيندي چيو آهي ته ڪميٽي گڏيل مشاورت کانپوءِ جاچ لاءِ ٽي او آرز بڻائي جنهن کانپوءِ جنهن به فورم تي چاهيو ته جاچ ڪرائي وڃي، هن چيو ته منهنجو نالو پاناما پيپرز ۾ ناهي، اپوزيشن جي ٽي او آرز ۾ فرد جرم لاڳو ڪيو ويو آهي، منهنجو دامن صاف آهي ڪنهن قانوني ۽ آئيني اثتثنيٰ جي ڪا به ضرورت ناهي، ماضي ۾ به ڪڙن احتسابن مان گذريو آهيان ۽ هاڻ به ان طرح جي احتسابي عمل مان گذرڻ لاءِ تيار آهيان، هن چيو ته چاهيون ٿا ته ٽيڪس چوري ڪرڻ ۽ قرض معاف ڪرائيندڙ جي اصل ڪهاڻي به سامهون اچي، منهنجي والد دبئي وڃي گلف اسٽيل نالي فيڪٽري لڳائي، لنڊن جي فليٽ لاءِ پاڪستان مان هڪ رپيو به نه موڪليو، 23 سالن دوران اسان جي خاندان 10 ارب رپين کان وڌيڪ ٽيڪس ادا ڪيو، ذاتي طور تي 3 ڪروڙ ٽيڪس ادا ڪيو، 1999 ۾ اسان جي ڪاروباري ادارن کي مفلوج ڪيو ويو، تمام ڪاروباري ادارن جي ڇنڊ ڇاڻ ڪري رڪارڊ قبضي ۾ ورتو ويو، حڪومت وقت سرٽوڙ ڪوششون ڪرڻ جي باوجود رتي جي برابري به بدعنواني ثابت نه ڪري سگهي ۽ اسان ظالماڻي ۽ هڪ طرفي احتساب مان سرخرو ٿي ٻاهر نڪتاسين، هن چيو ته ڪاروبار مان سياست ۾ داخل ٿيو آهيان، سياست مان ڪاروبار ۾ نه آيو آهيان، هيليڪاپٽرن ۽ جهازن ۾ گهمندڙ ٻڌائين ته پهريان اهي ڇا هئا؟ معاملو منهنجي استعيفيٰ سان ختم نٿو ٿي سگهي، ڳالهه نڪتي آهي ته اڇا ڪارا پڌرا ٿيڻ گهرجن، گذريل ڏينهن قومي اسيمبلي ۾ اپوزيشن طرفان لڳايل الزامن جا جواب ڏيندي وزيراعظم چيو ته هلندڙ سال جي اپريل جي پهرين هفتي ۾ پاناما پيپرز جي حوالي سان هڪ رپورٽ ميڊيا ۾ آئي ۽ ان ۾ اهڙن آف شور ڪمپنين جي نشاندهي ڪئي وئي جنهن ۾ پاڪستانين جو تعلق ٻڌايو ويو آهي، ان ۾ واضح ڪيو ويو هو ته اهو ضروري ناهي ته اهي سڀ آف شور ڪمپينون غير قانوني هجن، نواز شريف چيو ته منهنجي ٻن پٽن جا نالا به ان ۾ آيا جيڪي گذريل ڪافي عرصي کان پرڏيهه ۾ ترسيل آهن ۽ ٻين لکين پاڪستانين وانگر هو به هلال جو رزق ڪمائي رهيا آهن، هن چيو ته مون کي ساٿين مشورو ڏنو ته منهنجو نالو ان ۾ شامل نه آهي ان لاءِ مون کي پنهنجو پاڻ کي احتساب لاءِ پيش نه ڪرڻ گهرجي پر مون ضروري سمجهيو ته منهنجي خاندان جا نالا شامل آهن ان لاءِ قوم کي خطاب ۾ اپوزيشن جي مطالبي کان اڳ سپريم ڪورٽ جي رٽائرڊ ججز جي سربراهي ۾ ڪميشن قائم ڪرڻ جو اعلان ڪيو، انصاف جي اعليٰ ترين ادارن ۾ مقرر اهي جج رٽائرڊ ٿيڻ جي باوجود به انصاف جا ڪيترائي تقاضا پورا ڪري سگهن ٿا پر اهڙو ماحول پيدا ڪيو ويو، انتهائي سٺي ساک جي مالڪ اڳوڻي چيف جسٽس به ڪميشن جي سربراهي کان انڪار ڪيو، ان کانپوءِ پارلياماني ڪميٽي جي تجويز سامهون آئي جنهن تي مثبت رد عمل ظاهر ڪيو پر ان تان اپوزيشن پوئتي هٽي وئي، ان کانپوءِ ايف آءِ اي کان جاچ جو مطالبو ڪيو ويو ان تي به اسان کين پنهنجي پسند جا آفيسر نامزد ڪرڻ جي آڇ ڪئي پر حاضر سروس چيف جسٽس جي سربراهي ۾ڪميشن قائم ڪرڻ جو مطالبو ڪيو ويو ان تي به 22 اپريل تي قوم کي پنهنجي خطاب ۾ اهو مطالبو تسليم ڪندي ڪميشن بڻائڻ جو اعلان ڪيو پر ان کي به رد ڪيو ويو، حڪومتي ٽي او آرز رد ڪندي ٽي او آرز لاءِ 15 نوان نقطا ڏنا ويا پر ان ۾ شايد ڪنهن سنجيندگي جو عنصر شامل هجي، اپوزِيشن جي ٽي او آرز بدعنواني ۽ ڪرپشن بدران هڪ ماڻهو جي وچ ۾ گهمي رهيا آهن، ان ۾ به چيو ويو ته وزيراعظم کان مراد نواز شريف هوندو جنهن جو پاناما پيپرز ۾ ذڪر ئي ناهي ۽ ان تي فرد جرم لاڳو ڪيو ويو، وزيراعظم چيو ته اسان نٿا چاهيون ته ملڪ ڪنهن ڪشمڪش جو سبب بڻجي، ملڪ جي ترقي ۽ تعمير تي توجهه ڪرڻ لاءِ ان معاملي جي ڇنڊ ڇاڻ ضروري آهي، ڪنهن مسئلي کي اسان انا جو مسئلو نه بڻايو، صرف پاڪستان ئي اسان جي انا آهي، نواز شريف چيو ته اسان جو دامن صاف آهي ڪنهن آئيني يا قانوني اثتثنيٰ جي ضرورت ناهي، اسان ماضي ۾ به هڪ طرفي ڪڙي احتساب مان گذري چڪا آهيون ۽ هاڻ ان لاءِ تيار آهيون، اسان اهو به چاهيون ٿا ته بدعنواني، اختيارن جو ناجائز استعمال، ٽيڪس چوري، غير قانوني طور تي پيسو ٻاهر موڪلڻ، اربين رپين جا قرض معاف ڪرائيندڙ جي ڪهاڻي به عوام جي اڳيان اچي، جيڪڏهن هڪ اخباري ڪهاڻي تي ايترو گوڙ آهي ته پوءِ دستاويزي ثبوت جي حامل ڪيسن جي به جاچ ٿيڻ گهرجي، هن چيو ته هي ايوان احتساب جي جامعه، موثر ۽ بي داڳ ڪردار تي غور ڪري ۽ ميثاق جمهوريت جي به اها هڪ اهم شق هئي. هڪ اهڙو جامعه نظام واضح هجڻ گهرجي جنهن تي سڄي قوم کي اعتماد هجي، جنهن مان اهو بهتان ۽ الزامن وارو ڪلچر ختم ٿئي، نواز شريف چيو ته بي بنياد الزامن سان سياستدانن نه پر سياست به بي وقار ٿي وڃي ٿي ۽ ان سان جمهوريت جو حسن به ختم ٿي وڃي ٿو، وزيراعظم چيو ته اهو به چيو ويو ته مان پارليامينٽ ۾ اچي ڪري سوالن جا جواب ڏيان ته معاملو ختم ٿي ويندو، پر هي معاملو هاڻ ائين ختم نٿو ٿي سگهي نه ئي وري ان کي ختم ٿيڻ ڏينداسين، هاڻ اڇا ڪارا پڌرا ٿيندا، وزيراعظم چيو ته شاهراهه دستور تي ڌرڻي دوران هن ايوان جو ڪردار انتهائي مثبت رهيو، هن چيو ته مون کي لڪائڻ لاءِ نه پهريان ڪجهه هو نه اڄ آهي، منهنجو سڀ ڪجهه کليل ڪتاب وانگر آهي، منهنجو خاندان به کليل ڪتاب وانگر آهي، هن چيو ته سياست ۾ڪجهه ڪمايو يا بڻايو ناهي پر وڃايو ضرور آهي، هن چيو ته مان سياست مان ڪاروبار ۾ نه پر ڪاروبار مان سياست ۾ آيو آهيان، هن چيو ته مان بطور وڏي وزير يا وزيراعظم دفاعي ادارن ۽ ٽرسٽ کي مفت سرڪاري زمين ڏني هوندي، مالي گرانٽ ڏني هوندي، مشينري جي درآمد تي ٽيڪس ڇوٽ ڏني هوندي، شريف ميڊيڪل ڪمپليڪس هڪ وڏي فلاحي اداري طور ڪم ڪري رهيو آهي پر ان لاءِ هڪ انچ ايراضي يا مالي گرانٽ نه ورتي وئي آهي، هن سوال ڪيو ته ڇا ڪرپشن ڪندڙ ۽ سرڪاري ٽجوڙيون ڀريندڙ جو طرز عمل ائين هوندو آهي، اسان جي ڪهاڻي زرق حلال، محنت ۽ وقار، جدوجهد جي ڪهاڻي آهي، هن چيو ته پاڪستان جي قيام کان 11 سال اڳ اسان اتفاق فائونڊري سان پنهنجو ڪاروبار شروع ڪيو، منهنجي والد جو پختو ايمان، ديانت ۽ امانت تي پورو يقين هو، وقت سان گڏ ان ڪاروبار ترقي ڪئي، 1970 ۾ اسٽيل ۽ انجنيئرنگ ۾ سڀ کان وڏو مقام حاصل ڪيو، 1972 ۾ ان کي قومي ادارن ۾ ڏنو ويو ۽ اسان کي هڪ پائي به نه ڏني وئي، ان کان اڳ ادارا ڪروڙين رپين جي منعافي ۾ هئا، 1971 ۾ ساليانو ٽرن اوور 4 ڪروڙ رپين کان وڌيڪ هو، 7 سئو ڪينال تي ٻڌل فيڪٽيري هئي، ان وقت ڊالر 4 رپين جو سي ايس پي آفيسر جي پگهار 5 سئو رپيا ۽ سون 155 رپيا في تولو هو، ان وقت اسان جا هڪ ڪروڙ 80 لک رپيا اسٽاڪ هئا ۽ هي ان وقت جا آهن جنهن وقت اسان جو سياست سان ڪو به تعلق نه هو ۽ اهي ادارا 8 سالن کانپوءِ واپس ڪيا ويا ته ان وقت ان جي مشينري کنڊر بڻجي چڪي هئي، اسان جي والد ان فيڪيٽري کي ٻيهر آباد ڪيو، وزيراعظم چيو ته هڪ سال ۾ ان بي جان ڍانچي کي ٻيهر فعال ڪيو ويو، 1983 ۾ ان جو منعافو 7 ڪروڙ 57 لک رپين تائين پهتو، هي تفصيل انهن ماڻهن لاءِ آهن جيڪي حقيقتن کان ڄاڻي واڻي منهن موڙي رهيا آهن، منهنجي ورهاست ۾ هڪ ترقي ڪندڙ ڪاروبار مليو ۽ خوف خدا جو درس به مليو، اڄ عاليشان گاڏين ۾ گهمندڙ ڦرندڙ ۽ عاليشان محلن ۾ رهندڙ هيليڪاپٽرن ۾ ديان جو سير سفر ڪندڙن کان به اها تقاضا آهي ته هو مناسب سمجهن ته قوم کي پنهنجي آمدني کان آگاهه ڪن، هن چيو ته 70 جي ڏهاڪي ۾ اهي ڪٿي بيٺا هئا ۽ اڄ سندن شاهاڻن خرچن جو ذريعو ڇا آهي، وزيراعظم چيو ته ڪجهه ماڻهو الزام لڳائي رهيا آهن ته اسان ٽيڪس نٿا ڏيون، 23 سالن ۾ اسان 10 ارب رپين جو ٽيڪس ادا ڪيو، ان موقعي تي هن پورا تفصيل اسپيڪر حوالي ڪيا، هن 3 ڪروڙ 60 لک رپين جي ذاتي ٽيڪسن جا تفصيل به پيش ڪيا، وزيراعظم چيو ته 1972 ۾ اتفاق فائونڊري کي هڪ پيسو به معاوضو ڏيڻ کانسواءِ واپس ڪيو ويو، نواز شريف چيو ته اپريل 1983 ۾ اها فيڪريٽري 33.37 ملين درهم وڪرو ٿي، ان وقت اسان جو سياست سان ڪو به تعلق نه هو اسان جي والد عدم تحفظ تحت دبئي ۾ جيڪا سيڙپڪاري ڪئي اها 1999 ۾ ان وقت درست ثابت ٿي جڏهن اسان کي بي دخل ڪيو ويو ۽ اسان جي تمام ڪاروبار جو رڪارڊ قبضي ۾ وٺي ان جو تمام گهرائي سان جائزو ورتو ويو، اسان جا بينڪ اڪائونٽ چيڪ ڪيا ويا، حڪومت ننهن چوٽي جا زور هنيا پر بدعنواني هڪ رتي جي برابر به ثابت نه ڪري سگهي، اسان ان ظالماڻي ۽ هڪ طرفي احتساب مان سرخرو ٿي نڪتاسين، هن چيو ته اسان جي والد جده ۾ اسٽيل ملز لڳائي، جون 2005 ۾ اسٽيل ملز 17 ملين ڊالرز ۾ وڪرو ٿي ان جا تمام دستاويز موجود آهن، ان کي وسيلن ۽ ذريعن سان لنڊن ۾ فليٽ خريد ڪيا ويا، جده اسٽيل ملز يا لنڊن جي خريداري لاءِ پاڪستان مان هڪ رپيو به ٻاهر نه ويو، وزيراعظم چيو ته ڪميشن جي قيام جي حوالي سان چيف جسٽس جو خط مليو ويو آهي، قانوني ماهر ان جو جائزو وٺي رهيا آهن، وزيراعظم اپوزيشن اڳواڻ ۽ پارلياماني ليڊرن جي مشاورت سان پارلياماني ڪميٽي جوڙڻ جي پيش ڪش ڪئي جنهن ۾ جامعه ٽي او آرز ۽ ٻين معاملن کي حتمي شڪل ڏني وڃي ته جيئن بدعنواني ڪندڙن کي قانون جي ڪٽهڙي ۾ آڻي سگهجي ۽ ان حوالي سان ڪميٽي جيڪو تجويز ڪندي ان اڳيان شاهديون ۽ تفصيل رکيا ويندا، هن چيو ته اهو تاثر نه ڏنو وڃي ته ڪجهه ته گناهن ۾ ڀريل آهن ۽ ڪجهه جي لباسن مان فرشتن جي خوشبو اچي ٿي، اصولن جا ڳالهه ڪرڻي آهي ته ان لاءِ الڳ الڳ پيمانا نه هلي سگهندا، جيڪڏهن تورڻو آهي ته سڀني کي هڪ ترازو ۾ تورڻو پوندو، وزيراعظم چيو ته 70 سالن کان قوم کي اهڙن تماشن جي ور چاڙهيو ويو آهي، هن چيو ته خدا خدا ڪري پاڻ سنڀاليو آهي منزلن جو تعين ڪيو آهي، نوجوانن جي مايوس اکين ۾ اميد جو چراغ روشن ڪيو آهي، معيشت مستحڪم، شهرن جو امن واپس ڪرايو آهي، قومي عالمي سطح تي اسان جي وقار ۾ اضافو ٿيو آهي، اڄ هر پاڪستاني تسليم ڪري ٿو گذريل 3 سالن جي ڀيٽ ۾ موجوده پاڪستان سڀ کان وڌيڪ مستحڪم ۽ روشن آهي ۽ 2018 جو پاڪستان اڄ جي پاڪستان کان ڪيترائي ڀيرا مستحڪم ۽ روشن هوند.

 

وزير اعظم 7 سوالن جا جواب نه ڏنا: مخالف ڌر جو قومي اسيمبلي مان واڪ آئوٽ

اسلام آباد(بيورو) مخالف ڌر وزير اعظم پاران سوالن جا جواب نه ڏيڻ تي قومي اسيمبلي جو واڪ آئوٽ ڪري ڇڏيو. اسپيڪر اياز صادق جي صدارت ۾ قومي اسيمبلي جو اجلاس ٿيو، اجلاس ۾ وزير اعظم نواز شريف خطاب ڪيو، وزير اعظم جو خطاب ختم ٿيو ته مخالف  ڌر اڳواڻ سيد خورشيد شاهه خطاب ڪيو. خورشيد شاهه تقرير شروع ڪئي ته مخالف ڌر ميمبرن هُل ڪندي هنگامو ڪيو.ان تي اسپيڪر خورشيد شاهه کي چيو ته هنن کي سمجھايو، توهان جا ساٿي آهن. بعد ۾ مخالف ڌر جا ميمبر خاموش ٿي ويا. خورشيد شاهه پنهنجي تقرير ۾ چيو ته  اسين ستن سوالن جا جواب وٺڻ آيا هئاسين پر وزير اعظم جيڪا تقرير ڪري وضاحت ڪئي آهي ان ۾ هُن ست سوالن مان ستر سوال وڌائي ڇڏيا آهن. هن چيو ته اسان سوچيو هو ته اسان جي ستن سوالن جا جواب وزير اعظم آساني سان ڏئي ڇڏيندو پر هتي ته دبئي به اچي ويو، جدو به اچي ويو، اسان کي سوالن جا جواب ناهن مليا. پارليامينٽ جو وقت ضايع نه ٿو ڪرڻ چاهيان. قوم کي سوالن جا جواب گھرجن. خورشيد شاهه جي انهن لفظن کانپوءِ اپوزيشن ايوان مان واڪ آئوٽ ڪري وئي.  خورشيد شاهه چيو آهي ته وزير اعظم پاران قومي اسيمبلي ۾ اچڻ تي صبر جو مظاهرو ڪنداسين ۽ وزير اعظم کي تقرير کان پوءِ به ايوان ۾ ويهڻ گهرجي. ميڊيا رپورٽ موجب خورشيد شاهه چيو ته وزير اعظم کي ايوان ۾ اچي سڀني سان ڳالهائڻ گهرجي ۽ تقرير کان پوءِ به ايوان ۾ ويهڻ گهرجي. هن چيو ته ميثاق جمهوريت موجود آهي ته پيار سان ڳالهائي رهيو آهيان، آئون اهڙي سياست کي پسند ناهيان ڪندو جنهن سان سسٽم کي نقصان پهچي. بينظير ڀٽو شهيد جي به اها ئي پاليسي هئي جنهن تي اسان به عمل ڪري رهيا آهيون. هن جو چوڻ هو ته پاناما پيپرز تي چيف جسٽس جو جواب اسان جي موقف تي تائيد آهي تنهن هوندي هن ڪميشن جوڙڻ کان انڪار ناهي ڪيو.

 

اپوزيشن ناڪ آئوٽ ٿيڻ ڪري واڪ آئوٽ ڪيو، مخالف ڌر ريڊ لائن پار نه ڪري: حڪومتي وزير

اسلام آباد(بيورو) حڪومتي وزيرن جو چوڻ آهي ته وزير اعظم ايوان ۾ سچ ڳالهائي مخالف ڌر کي ناڪ آئوٽ ڪري ڇڏيو، تڏهن اهي واڪ آئوٽ ڪري ويا. قومي اسيمبلي جي اجلاس کانپوءِ ميڊيا سان ڳالهائيندي وفاقي وزير پرويز رشيد چيو ته وزير اعظم اڳ به مخالف ڌر جي هر مطالبي کي تسليم ڪيو هو، وزير اعظم وٽ سچ ۽ مخالف ڌر وٽ ڪوڙ کان سواءِ ڪجھه ناهي وزير اعظم جڏهن سچ پيش ڪيو ته مخالف ڌر وارا واڪ آئوٽ ڪري ويا. ائين وزير اعظم جي سچ، ڪوڙ کي ناڪ آئوٽ ڪيو. جيڪي ناڪ آئوٽ ٿيا اهي واڪ آئوٽ ڪري ويا ڇو جو انهن وٽ ڪو جواب نه هو. پرويز رشيد چيو ته وزير اعظم جي تقرير مخالف ڌر وارن کي لا جواب ڪري ڇڏيو، ان ڪري انهن  ڀڄڻ جو رستو اختيار ڪيو. هن چيو ته جيڪي ماڻهو پارليامينٽ جي ڊبيٽ جو حصو نٿا وٺي سگھن، پنهنجي مٿان لڳل الزامن جا جواب نٿا ڏئي سگھن، جيڪي ٽيڪس بچائڻ لاءِ آف شور ڪمپنيون ٺاهين ٿا اهي سچ جو مقابلو نٿا ڪري سگھن. ان موقعي تي بچاءَ واري وزير خواجه آصف چيو ته عمران خان کي سڀني سياستدانن کان وڌيڪ آف شور ڪمپنين جو تجربو آهي، هن تڏهن آف شور ڪمپني ٺاهي جڏهن ٻين کي آف شور ڪمپني جي اسپيلنگ نه ايندي هئي. هن چيو ته  عمران خان ماڻهن جي خيرات جا پيسا آف شور ڪمپني ۾ لڳايا. آف شور ڪمپنيون ڏوهه آهي ته سڀ کان وڏو ڏوهاري عمران خان آهي. خواجه آصف چيو ته عمران خان ٻڌائي هوڻ 1993ع ۾ آف شور ڪمپني لاءِ پيسا ڪٿان آندا؟ هن چيو ته ميڊيا انڪشاف نه ڪري ها ته نيازي لميٽڊ آف شور ڪمپني جي خبر نه پوي ها. هي ٻڌائين ته انهن وٽ لکين پائونڊ ڪٿان آيا جنهن سان هنن آف شور ڪمپني ٺاهي. ڪهاڻي هاڻي پري تائين ويندي. هن چيو ته عمران خان زڪوات 70 ڪروڙ رپيا آف شور ڪمپني ۾ لڳائي ڇڏيا. عمران خان چوي ٿو ته هُن پراپرٽي فليٽ وڪڻي ٺاهي، ڇا هُن ڪنگڊم پيلس وڪڻيو آهي؟ خواجه آصف جو چوڻ هوته افسوس جوڳي ڳالهه آهي ته اپوزيشن جي ڪجھه پارٽين غير ذميواري جو مظاهرو ڪيو. هن چيو ته قومي اسيمبلي جي اجلاس کان اڳ اسپيڪر مخالف ڌر جي پارٽين کي اعتماد ۾ ورتو. هڪ پارٽي جو ته صفايو ٿي چڪو آهي ٻيو وري چوي ٿو ته رڳو آئون بچندس. عمران خان اڳ به اهي حرڪتون ڪري چڪو آهي، سوا سئو ڏينهن ايوان کي يرغمال بڻايو خورشيد شاهه کي اڄ ڳالهائڻ گھرجي، کين سڀني کان وڌيڪ وقت ڏنو ويو پر هن ڀڄڻ جو رستو اختيار ڪيو، عمران خان جنهن رستي تي هلي رهيو آهي هاڻي پ پ به ان تي نڪري پئي آهي. انهن کي روڪيو وڃي. هن چيو ته 90ع واري ڏهاڪي ۾ پ پ ۽ ن ليگ ريڊ لائين ٿيون، جنهن سان ملڪ جو جمهوريت جو نقصان ٿيو. مخالف ڌر ريڊ لائن پار نه ڪري.  هن چيو ته الزام بدلي الزام مجبوري ۾ ڏئي رهيا آهيون. هنن سان گڏ هڪ گجرا پارٽي ٻي ٽانگا بارٽي آهي، جيڪا سياست کي گندو ڪري رهي آهي. مخالف ڌر کي رڳو چار ماڻهو پيا هلائين. عمران خان، خورشيد شاهه، اعتزاز احسن اهي سڀ پرويز الاهي جي هٿ چڙهي ويا آهن. اهو چوڻ غير ضروري آهي ته ستن سوالن جا جواب نه مليا هاڻي ستر سوالن جا جواب ڏنا وڃن. خواجه سعد رفيق چيو ته وزير اعظم چئي چڪو آهي ته قانون ۾ خامي آهي ته اها به ختم ڪئي وڃي، اها هڪ وڏي آڇ آهي، جيڪڏهن مخالف ڌر جي ڪا پارٽي سنجيده آهي ته وزير اعظم جي آڇ جو هاڪاري جواب اچڻ گھرجي. اسين ڪوشش ڪنداسين ته مسئلو آساني سان حل ٿي وڃي. هن چيو ته اعتزاز احسن ذاتي سياست ڪري رهيو آهي، ان جي پويان سندس پارٽي جي خراب ڪارڪردگي آهي. عمران خان، شيخ رشيد، اعتزاز احسن ۽ ٻين کي پنهنجو سُور آهي. هڪ سوال جي جواب ۾ خواجه آصف چيو ته نيت صاف ناهي ۽ تڪرار هلائڻو آهي ته هي تڪرار ڏهه سال به هلي سگھي ٿو، پاناما ليڪس جي جاچ لاءِ قانون سازي جي ضرورت آهي ته اها به ٺهي سگھي ٿي. ميثاق جمهوريت تي شهيد بينظير به صحيح ڪئي هئي، ان کي اڳتي وڌايو وڃي. نه ته مسئلو حل نه ٿيندو.

 

پاڪ فوج جون سربراهه جي چين جي فوجي ۽ سياسي قيادت سان ملاقاتون، هٿياربند فوجن ۾ سهڪار وڌائڻ تي اتفاق

بيجنگ (اي پي پي) پاڪ فوج جو سربراهه جنرل راحيل شريف ٻن ڏينهن جي سرڪاري دوري تي چين جي گادي واري شهر بيجنگ پهچي ويو، جتي هن چين جي فوجي ۽ سياسي قيادت سان ملاقاتون ڪيون آهن، پاڪ فوج جي اداري آءِ ايس پي آر طرفان جاري ڪيل پڌرائي مطابق جنرل راحيل شريف بيجنگ پهچڻ تي چين جي هٿياربند فوجن طرفان گارڊ آف آنر پيش ڪيو ويو، پاڪ فوج جي سربراهه جنرل راحيل شريف چين جي آرمي چيف جنرل لي زو چينگ سان ملاقات ڪئي ۽ نئين آرمي هيڊڪوارٽر جي قيام تي چيني هم منصب کي مبارڪون ڏنيون، اجلاس ۾ ٻنهي پاڙيسري ۽ دوست ملڪن جي هٿياربند فوجن جي وچ ۾ تعاون وڌائڻ، تربيت لاءِ وفدن جي مٽاسٽا، ڳجهي معلومات جي ڏي وٺ ۽ چين پاڪ اقتصادي راهداري جي سيڪيورٽي سميت گڏيل دلچسي وارا ٻيا معاملا ڳالهين هيٺ آيا.