تازيون خبرون

Daily Archives: May 18, 2016

مخالفن جي نصيب ۾ صرف ڌرڻا آهن، نئون پاڪستان اسان پيا ٺاهيون: نواز شريف

ڊيرا اسماعيل خان (اين اين آءِ) وزيراعظم ميان محمد نوازشريف چيو آهي ته نئين پاڪستان جي دعويٰ ڪندڙن کي 2018 جي چونڊن ۾ خيبرپختونخواهه به نه رهندو مخالفن جي نصيب ۾ ڌرڻا ۽ اسان جي نصيبن ۾ ڪم لکيل آهي. مخالف ڌرڻا هڻندا رهن ۽ اسان پنهنجو ڪم ڪندا رهنداسين. ملڪ جو نوجوان عمران خان رانديڪو ۽ اسان لاءِ قومي اثاثو آهن جلسي عام کي خطاب ڪندي نوازشريف چيو ته مولانا فضل الرحمان هميشه ڊيرا اسماعيل خان جي مسئلن بابت ڳالهه ٻولهه ڪئي. ۽ اڄ اسان پورو هوم ورڪ ڪري آيا آهيون. زباني اعلان نه پر پنهنجي اعلانن تي عمل ڪرڻ لاءِ آيا آهيون هن چيو ته گئس منصوبي جو افتتاح اوهان جي سامهون ڪيو آهي. وزيراعظم چيو ته پاڪستان جي تاريخ جو سڀ کان وڏو منصوبو پاڪ چين اقتصادي راهداري ڊيرا اسماعيل خان کان گذري ويو آهي جلد هتان ريل گاڏي جو به گذر ٿيندو جنهن کان عوام کي سفري سهولت ميسر ٿيندي. هن چيو ته ڊيرا اسماعيل خان کي پنجاب، بلوچستان ۽ سنڌ سان ملائي رهيا آهيون اها وڏي ڳالهه ۽ سيڙپڪاري اهي جنهن روڊ جو اسان افتتاح ڪيو آهي اهو به ان منصوبي جو حصو آهي 260 ڪلوميٽرن جي منصوبي تي اربين رپيا خرچ ٿي رهيا آهن ان سان ڊيرا اسماعيل خان جي تقدير بدلجي ويندي هن جلسي جي شريڪن کان سوال ڪيو ته ڪهڙو نئون پاڪستان بڻجي رهيو آهي ان تي حاضرين جواب ڏنو نه نه، ڪوبه نئون پاڪستان نه بڻجي رهيو آهي هن عمران خان کي مخاطب ٿيندي چيو ته خيبرپختونخنواهه کي نئون ٺاهي نه سگهيا آهن ۽ اهي نئون پاڪستان ڪٿان ٺاهيندا. عوام ڄاڻي ورتو آهي ته ڪوبه نئون پاڪستان نه ٺهي رهيو آهي. هن چيو ته هن ملڪ جي نوجوانن کي عمران خان رانديڪو سمجهي رهيو آهي پر مولانا فضل الرحمان لاءِ نوجوان پاڪستان جو اثاثو آهن. هن چيو ته مولانا فضل الرحمان اصولن تي اسان جو ساٿ ڏيئي رهيو آهي مسلم ليگ (ن) ۽ جي يو آءِ (ف) وچ ۾ نئين شراڪتداري قائم ٿي رهي آهي جيڪي ڊگهي عرصي تائين هلندي وزيراعظم نوازشريف ڊيرا اسماعيل خان لاءِ 50 ڪروڙ رپين جي ترقياتي پئڪيج جو اعلان ڪندي چيو ته مولانا فضل الرحمان سان گڏجي فيصلو ڪيو آهي ته ڊيرا اسماعيل خان جي اندر هڪ زرعي يونيورسٽي جو قيام ڪيو ويندو هن چيو ته ڊيرا اسماعيل ايئرپورٽ جي تعمير جو انتظار نه ڪيو ويندو پر سول ايسوسيئيشن عملدارن ۽ ايف بي آر کي هدايتون جاري ڪيون ويون آهن ته عالمي ۽ قومي اڏامن جي آمد شروع ڪئي وڃي. وزيراعظم چمشا ڊيم ڪئنال منصوبي لاءِ 120 ارب رپين جي ٻين منصوبن جو به اعلان ڪيو هن چيو ته اڄ جو پاڪستان پهريان جي نسبت سان بهتر پاڪستان آهي ڊيرا اسماعيل خان ۾ گئس اچي رهي آهي پاڻي اچي رهيو آهي ۽ 2018 تائين لوڊشيڊنگ مڪمل ختم ٿي ويندي نه صرف لوڊشيڊنگ ختم ٿيندي پر بجلي کي سستو به ڪيو ويندو. ان کان اڳ نوازشريف يارڪ جي مقام تي 285 ڪلوميٽر جي موٽر وي روڊ جو سنگ بنياد رکيو ۽ اهو موٽر وي ٻن سالن ۾ 129 ارب رپين کان وڌيڪ رقم جي لاڳت سان مڪمل ڪيو ويندو.

 

جمهوريت ڪو خطرو ناهي، وزير اعظم کي سوالن جا جواب ڏيڻا پوندا: خورشيد شاهه مخالف ڌر

اسلام آباد(بيورو) گڏيل مخالف ڌر پاناماليڪس جي حوالي سان وزيراعظم نواز شريف پاران تجويز ڪيل پالياماني ڪميٽي ۾ شامل ٿيڻ تي راضي ٿي وئي آهي، اسلام آباد ۾ مخالف ڌر ۾ شامل پارٽين جي اجلاس کانپوءِ ميڊيا سان ڳالهائيندي خورشيد شاهه چيو ته مخالف ڌر پاناماليڪس جي جاچ بابت حڪومت سان ڳالهين لاءِ تيار آهي، جڏهن ته حڪومت طرفان اڃا تائين ساڻن ڪو رابطو ناهي ڪيو ويو، هن چيو ته وزيراعظم ڪرپشن جي خاتمي لاءِ جيڪا پارلياماني ڪميٽي جوڙڻ جي ڳالهه ڪئي آهي،ان لاءِ به مخالف ڌر پنهنجا نمائندا مقرر ڪرڻ خاطر تيار آهي، سندس چوڻ هو ته ڪميٽي گڏيل صلاح مشوري کانپوءِ پاناماليڪس جي جاچ لاءِ ٽي او آرز ٺاهي ۽ جنهن به فورم تي چاهي، جاچ ڪرائي وڃي، خورشيد شاهه چيو ته مخالف ڌر قومي اسيمبلي ۽ سينيٽ جي اجلاس جو بائڪاٽ ختم ڪرڻ جو به فيصلو ڪيو آهي ۽ هاڻ پارليامينٽ اندر ئي احتجاج ڪيو ويندو، هن چيو ته ميان نواز شريف وڏي دير کانپوءِ ايوان ۾ آيو، جڏهن ته مخالف ڌر جي پارٽين جو ته گهر ئي پارليامينٽ آهي، اهي پنهنجي گهر کان ٻاهر ڪيئن ٿا رهي سگهن؟ خورشيد شاهه چيو ته مخالف ڌر طرفان وزيراعظم کان جيڪي سوال پڇيا ويا آهن، کيس انهن جو جواب ڏيڻو پوندو.

 

پ پ ڪراچيءَ ۾ هيٽ اسٽروڪ جو ذميوار وفاق ۽ ڪي اليڪٽرڪ کي قرار ڏئي ڇڏيو

ڪراچي (اسٽاف رپورٽر) پاڪستان پيپلز پارٽيءَ جي چيئرمين بلاول ڀٽو زرداريءَ چيو آهي ته ڪراچي ۾ هيٽ اسٽروڪ جي ذميوار وفاقي حڪومت ۽ ڪي اليڪٽر آهي، پنهنجي جاري ڪيل بيان ۾ پ پ چيئرمين چيو ته وفاقي حڪومت ۽ ڪي اليڪٽرڪ جي ڪري سنڌ جو عوام سخت گرميءَ ۾ ٻٽي عذاب مان گذري رهيو آهي. هن چيو ته ڪي اليڪٽرڪ بار بار بجلي بند ڪري هيٽ اسٽروڪ پيدا ڪري رهي آهي، وفاقي حڪومت هن وقت تائين بجليءَ جي بحران تگي قابو ناهي آندو، پ پ چيئرمين جو وڌيڪ چوڻ هو ته سنڌ ۾ 16 کان 24 ڪلاڪن تائين بجلي بند رکي پئي وڃي، ڳوٺاڻن علائقن ۾ 24 چويهه ڪلاڪ بجلي نه ٿي ملي، هن چيو ته ڪي اليڪٽرڪ، حيسڪو ۽ سيپڪو عوام جو جيئڻ جنجال ڪري ڇڏيو آهي، سنڌ ۽ بلوچستان ۾ لاڳاپيل ادارن ۽ وفاقي حڪومت جو رويو شرمناڪ آهي، وفاقي حڪومت پاڻيءَ ۽ بجليءَ واري وزارت جو عوام سان رويو تذليل جوڳو آهي، سندس چوڻ هو ته وفاقي حڪومت بجليءَ جي بحران تي قابو آڻڻ وارو واعدو پورو ناهي ڪري سگھي، سنڌ جو عوام ڪي اليڪٽرڪ پاران غير اعلانيل لوڊشيڊنگ جي عذاب کي منهن ڏئي رهيو آهي.

 

نيشنل ڊفينس يونيورسٽي ملٽري آفيسرن جي تربيت ۽ دفاع اسٽرٽيجز جي تڪميل ۾ اهم ڪردار ادا ڪري رهي آهي: ممنون حسين

اسلام آباد (اين اين آءِ) صدر ممنون حسين چيو ته نيشنل ڊفينس يونيورسٽي تعليم سول ۽ ملٽري آفيسرن جي تربيت ۽ دفاعي اسٽريٽجيز جي تڪميل ۾ اهم ڪردار ادا ڪري رهي آهي اهڙن خيالن جو اظهار هن ليفٽيننٽ جنرل ظهير احمد بٽ سان ڳالهائيندي ڪيو جنهن ايوان صدر ۾ ساڻس ملاقات ڪئي. صدر ممنون حسين چيو ته ملڪ ۾ تعليم جو معيار بهتر ڪرڻ جي ضرورت آهي ۽ هن اين ڊي يو جي ڪارڪردگي جي ساراهه ڪئي ۽ ان امر جي تعريف ڪئي ته ادارو نه صرف فوجي ۽ سول آفيسرن کي بهترين تربيت فراهم ڪري ٿو پر پاڙيسري ملڪن جي سينيئر آفيسرن کي به جديد اسٽريٽجڪ ۽ سڪيورٽي پروگرام جي ترجيح ڏئي ٿو صدر ليفٽيننٽ جنرل نظيراحمد بٽ کي اين ڊي يو جو صدر چونڊجڻ تي مبارڪباد ڏني.

 

عالمي برادري کي افغانستان ۾ امن لاءِ ڪردار ادا ڪرڻ گهرجي: پرويز رشيد

اسلام آباد (بيورو) پرويز رشيد چيو آهي ته عالمي برادري کي افغانستان ۾ امن لاءِ ڪردار ادا ڪرڻ گهرجي، عالمي ميڊيا پاڪستان ۾ افغان مهاجرن جي اچڻ کي لاڳيتو نظر انداز ڪري رهي آهي، روس جي افغانستان ۾ مداخلت کانپوءِ پاڪستان 17 لک افغان مهاجرن کي ڀليڪار ڪيو، خابرو ادارن موجب مهاجرن سان لاڳاپيل ڪانفرنس کي خطاب ڪندي پرويز رشيد جو چوڻ هو ته عالمي ميڊيا صرف يورپ، آمريڪا ۽ آسٽريليا ۾ داخل ٿيندڙ مهاجرن جو ئي ذڪر ڪري رهي آهي، سندس چوڻ هو ته عالمي برادري کي افغانستان ۾ امن لاءِ پنهنجو ڪردار ادا ڪرڻو پوندو، جيئن افغان مهاجر واپس پنهنجن گهرن ڏانهن موٽي وڃن.

 

آرمي چيف جي چيني وزير اعظم سان ملاقات، ٻه طرفن لاڳاپن تي ڳالهيون

راولپنڊي/بيجنگ (اين اين آءِ) چيني قيادت پاڪستان جي خودمختياري سالميت، قومي سلامتي ۽ ترقي لاءِ ڀرپور حمايت جاري رکڻ جو عزم ڪندي سي پيڪ منصوبي جي سيڪيورٽي ۽ دهشتگردي خلاف پاڪ فوج جي ڪاميابين جي ساراهه ڪئي آهي جڏهن ته آرمي چيف جنرل راحيل شريف سان ملاقاتن دوران ٻنهي ملڪن کي درپيش گڏيل چئلينجز علائقائي سيڪيورٽي سميت اهم معاملن تي خيالن جي ڏي وٺ ڪئي ويئي آءِ ايس پي آر موجب چيف آف آرمي اسٽاف جنرل راحيل شريف جي چين جي دوري دوران چين جي وزيراعظم سينٽرل ملٽري ڪميشن جي وائيس چيئرمين چيف آف جنرل اسٽاف ۽ پرڏيهي وزيرن ملاقاتون ڪيون ملاقاتن دوران علائقائي سيڪيورٽي جي صورتحال سميت چئلينجز جي حوالي سان خيالن جي ڏي وٺ ڪئي ويئي پاڪستان ۽ چيني اڳواڻن پاڪ چين دوستي کي سدابهار قرار ڏيندي ان عزم جو اظهار ڪيو ته ٻنهي ملڪن وچ ۾ اسٽريٽجڪ لاڳاپا جاري رهندا هنن پاڪ چين اقتصادي راهداري جي پڄاڻي لاءِ گڏجي ڪم ڪرڻ ۽ خطي ۾ امن ۽ استحڪام کي هٿي ڏيڻ لاءِ ڪوششون جاري رکڻ تي به اتفاق ڪيو چين جي سياسي ۽ عسڪري قيادت يقين ڏياريو ته چين پاڪستان جي خودمختياري سالميت قومي سلامتي ۽ ترقي لاءِ ڀرپور حمايت ڪندو رهندو اڳواڻن ڏکڻ ايشيا ۾ امن ۽ استحڪام جي اهميت کي اجاگر ڪرڻ جڏهن ته چيني اڳواڻن آرمي چيف سان ملاقاتن دوران پاڪستان جي چئلينجز کي چين جا چئلينجز قرار ڏنو. جڏهن ته چيني قيادت دهشتگردي خلاف بنا فرق جنگ دهشتگردن جي ٺڪاڻن جي خاتمي جي سلسلي ۾ پاڪستان آرمي جي ڪاميابين جي ساراهه ڪئي جڏهن ته پاڪستان کي ان حوالي سان ڀرپور حمايت جو به يقين ڏياريو.

 

پاڪ آمريڪا لاڳاپا گذريل 15 سالن کان سخت متاثر ٿي رهيا آهن:آصف زرداري

ڪراچي (اين اين آءِ) پاڪستان پيپلزپارٽي جي ڪو چيئرمين آصف علي زرداري چيو آهي ته ايف-16 جهازن جي خريداري تي پاڪ آمريڪا تڪرار گڏيل لاڳواپن جي ڇڪتاڻ جي عڪاسي آهي هن چيو ته گذريل 15 سالن ۾ پاڪ آمريڪا لاڳاپا مشڪل حالتن مان گذري رهيا اهن هن چيو ته پاڪستان خطي ۾ اهم جمهوري ملڪ آهي ۽ پاڪستان کي مستقبل ۾ هڪ وڏي طاقتور طور اڀرڻو آهي هن چيو ته دهشتگردي خلاف جنگ ۾ پاڪستان جي قربانين جو اعتراف ڪرڻ گهرجي. ۽ آمريڪا پاڪستان جي سيڪيورٽي جي ضرورتن کي سمجهڻ جي ڪوشش ڪري هن چيو ته ٻنهي ملڪن جي عملدارن کي لاڳاپن جي بهتري لاءِ قدم وڌائڻ گهرجن.

 

وڏي ڄمار وارن بي گهر ماڻهن لاءِ مرڪز قائم ڪيو وڃي: قائم علي شاهه

ڪراچي (اسٽاف رپورٽر) سنڌ جي وڏي وزير سيد قائم علي شاهه سماجي بهبود کاتي کي هدايت ڪئي آهي ته اهي وڏي ڄمار وارن بي گهر ماڻهن لاءِ هڪ مرڪز قائم ڪن ته جيئن اهي ماڻهو بنا ڪنهن مشقت ۽ ڪنهن جي اڳيان هٿ ڦهلائڻ بنا عزت واري طريقي سان پنهنجي زندگي گذاري سگهن.هن اهڙي هدايت اڄ وزير اعليٰ هائوس ۾ سماجي بهبود کاتي جي هڪ اجلاس جي صدارت ڪندي ڪئي. اجلاس ۾ چيف سيڪريٽري سنڌ صديق ميمڻ، وڏي وزير جو پرنسپل سيڪريٽري علم الدين بلو ۽ سماجي بهبود کاتي واري سيڪريٽري شارق احمد شرڪت ڪئي. سنڌ جي وڏي وزير چيو ته هن ڏٺو آهي ته وڏي ڄمار وارا ماڻهو پنهنجي ضرورتن کي پورو ڪرڻ لاءِ سخت مشقت ڪري يا نه ته ٻئي جي اڳيان هٿ ڦهلائيندا آهن. اهي ٻئي صورتحالون وڏي ڏکوئيندڙ آهن ۽ حڪومت کي ان جو ازالو ڪرڻ گهرجي ۽ انهن وڏي ڄمار وارن بي گهر ماڻهن لاءِ خوبصورت گهر ٺاهيا وڃن جتي هو عزت سان زندگي گزاري سگهن. سماجي بهبود کاتي جي سيڪريٽري شارق احمد ٻڌايو ته وڏي وزير جي هدايت تي “کدڙي فقيرن“ لاءِ ٽي بحالي مرڪز قائم ڪيا ويا آهن جن ۾ کين مختلف شعبن ۾ ڪمپيوٽر جي تربيت فراهم ڪئي ويندي آهي ۽ ٻيا ڪورسز ڪرايا ويندا آهن. اهي ٽي مرڪز ڪراچي، سکر ۽ لاڙڪاڻي ۾ آهن، جتي هر هڪ مرڪز ۾ 20 کان 25 جو انرولمينٽ آهي. وڏي وزير چيو ته اهڙي طرح جا تربيتي مرڪزن سان انهن لاءِ روزگار جا موقعا ميسر ٿيندا ۽ انهن جي طرز زندگي ۾ به تبديلي ايندي. سنڌ جي وڏي وزير سماجي بهبود کاتي کي هدايت ڪئي ته اهي کدڙي فقيرن لاءِ اهڙا وڌيڪ مرڪز قائم ڪن جتي انهن کي بنيادي تعليم به ڏني وڃي. هن چيو ته اسان انهن کي ڪارآمد شهري بڻائڻ چاهيون ٿا، نه ڪي اهي روڊ تي پني ڪري گزارو ڪن. اهي تعليم ۽ تربيت سان کين سرڪاري ملازمت به حاصل ٿي سگهي ٿي. هن چيو ته ڪراچي، حيدرآباد ۽ لاڙڪاڻي ۾ چار دارالامان آهن. سنڌ جي وڏي وزير سيد قائم علي شاهه چيف سيڪريٽري سنڌ صديق ميمڻ کي هدايت ڪئي ته هُو انهن مرڪزن جو ذاتي طور تي دورو ڪري ۽ انهن جي ضروري تعمير، مرمت ۽ ديک بال کي يقيني بڻائي. سيڪريٽري سماجي بهبود ٻڌايو ته سندن کاتو خاص ٻارن ۽ وڏن لاءِ 12 بحاليءَ جا مرڪز به سنڀالي رهيو آهي انهن مان پنج وڏن لاءِ ۽ ست ٻارن لاءِ آهن. هن چيو ته ان کانسواءِ سندن کاتو ٽي دارالاطفال به سنڀالي رهيو آهن، انهن مان هڪ حيدرآباد، هڪ ڪراچي ۽ هڪ سکر ۾ آهي. حيدر آباد ۾ واقعي سينٽر (دارالطفال) خاص طور تي ڇوڪرين لاءِ آهن. شارق احمد وڌيڪ ٻڌايو ته سندن کاتو سموري صوبي ۾ 76 سينٽر به هلائي رهيو آهي جتي اسٽيچنگ ۽ ايمبرائيڊري جي تربيت ڏني ويندي آهي. اهي مرڪز غريب ڇوڪرين ۽ عورتن لاءِ اهم ڪردار ادا ڪري رهيا آهن ۽ هتان تربيت حاصل ڪري عورتون باعزت روزگار حاصل ڪري سگهن ٿيون. هن چيو ته سندن کاتو مختلف ضلعن ۾ اٺ ڪميونٽي ڊولپمينٽ سينٽر به هلائي رهيو آهي. سنڌ جي وڏي وزير چيو ته سماجي بهبود کاتو سٺي ريت ڪم ڪري رهيو آهي پر کين وڌيڪ بهتريءَ جي ضروت آهي. هن چيو ته مان بي گهر وڏي ڄمار وارن ماڻهن لاءِ هڪ سينٽر قائم ڪرڻ چاهيان ٿو جتي 65 ورهين کان وڌيڪ ڄمار وارا  مرد ۽ عورتون رهي سگهن. هن چيف سيڪريٽري سنڌ کي هدايت ڪئي ته هُو ان اسڪيم لاءِ فنڊ مختص ڪرڻ جي ڪم کي يقيني بڻائي.

 

سياسي عدم استحڪام ملڪ ۽ قوم کي وڏو نقصان پهچايو آهي:احسن اقبال

اسلام آباد (بيورو) رٿابندي ۽ سڌارن واري وفاقي وزير احسن اقبال چيو آهي ته سياسي عدم استحڪام ۽ ناقص اقتصادي پاليسين پاڪستان کي تمام گهڻو نقصان پهچايو آهي، اسان سياسي ۽ اقتصادي مسئلن ۾ ورتل آهيون ۽ ان حوالي سان اسان کي قدم کڻڻ جي ضرورت آهي، اهڙن خيالن  جو اظهار هن گذريل ڏينهن اسلام آباد جي خانگي هوٽل ۾ هڪ تقريب دوران ڪيو، هن چيو ته دنيا نئين تبديلن مان گذري رهي آهي، اسان کي انهن موقعن مان فائدو حاصل ڪرڻ گهرجي، اقتصادي ترقي لاءِ چين، پاڪستان اقتصادي راهداري منصوبو هڪ پيڙهه جو پٿر آهي، هن ٻڌايو ته سياسي عدم استحڪام ملڪ ۽ قوم کي تمام گهڻو نقصان پهچايو آهي، هاڻي ملڪ  سياسي عدم استحڪام برداشت نه ڪري سگهندو، سندس چوڻ هو ته اقتصادي پاليسي ماضي ۾ سٺي نه هئي، جنهن ڪري ملڪ ۾ واپار ۽ اقتصاديات ترقي ناهي ڪئي، احسن اقبال چيو ته ميان نواز شريف اقتدار سنڀاليندي ئي اقتصادي ترقي لاءِ اهم قدم کنيا ، جنهن ڪري ملڪ کي ترقي جي رستي تي روان ڪيو ويو آهي.

حڪومت ملڪ ۾ آءِ ٽي انقلاب آڻڻ چاهي ٿي: اسحاق ڊار

اسلام آباد (بيورو) ناڻي واري وفاقي وزير اسحاق ڊار چيو آهي ته حڪومت ملڪ ۾ آءِ ٽي انقلاب آڻڻ چاهي ٿي ۽ ان مقصد لاءِ قدم کنيا پيا وڃن، خانگي ٽي وي نيوز چينل موجب اسحاق ڊار جو چوڻ هو ته معاشي ترقي جو هي سفر جاري رهيو ته پاڪستان دنيا جي 18هين وڏي معيشت بڻجي ويندو، اقتصادي راهداري اقتصادي ترقي ۾ وڌيڪ بهتر ثابت ٿيندي، جڏهن ته معاشي ترقي جو هي سفر ايئن ئي جاري رهيو ته پاڪستان گهڻو اڳتي وڌي ويندي.