تازيون خبرون

Daily Archives: May 17, 2016

اڪشي ۽ سوناڪشي جي ”نمستي انگلينڊ“ جي شوٽنگ آگسٽ ۾ شروع ٿيندي

ممبئي (شوبز نيوز) بالي ووڊ اداڪارا اڪشي ڪمار ۽ سوناڪشي سنها هڪ ڀيرو وري فلم ۾ گڏ اچي رهيا آهن ۽ سندن ايندڙ فلم جي شوٽنگ لنڊن ۾ ٿيندي، ڀارتي ميڊيا جي رپورٽن مطابق فلمساز وپل شاهه پنهنجي ايندڙ فلم” نمستي انگلينڊ“ جي شوٽنگ آگسٽ جي وچ ڌاري شروع ڪندو، جنهن ۾ اڪشي ڪمار ۽ سوناڪشي سنها مرڪزي ڪردار ادا ڪري رهيا آهن، وپل شاهه انهن رپورٽن کي رد ڪيو آهي ته سندس اها فلم ” نمستي لنڊن“ جو سيڪوئل آهي، جنهن ۾ مک ڪردار اڪشي ڪمار ۽ ڪترينا ڪيف ادا ڪيو هو، سندس چوڻ هو ته ”نمستي انگلينڊ“ جي ڪهاڻي ”نمستي لنڊن“ کان بلڪل مختلف آهي، فلم جي شوٽنگ لنڊن کانسواءِ ممبئي ۽ ڀارتي پنجاب ۾ به ٿيندي.

ميرا جي فلم هوٽل جي پروموشن، انگريزي ۾ سوال پڇڻ تي ڪاوڙجي پئي

ڪراچي (شوبز نيوز) ميرا فلم “هوٽل” جي پروموشن جي هڪ تقريب ۾ سندس انگريزي متعلق سوال تي ڪاوڙجي پئي. تقريب دوران عورت صحافي سوال ڪيو ته ميرا جي انگريزي ته تمام گهڻي مشهور آهي، ڇا ميرا جي فلم به مشهور ٿيندي؟ اهو سوال اداڪاره کي خاص پسند نه آيو، جنهن سبب ماحول اڻ وڻندڙ ٿي پيو ۽ هن چيو ته رڳو انگلش ۾ ڪيل سوال جو جواب انگريزي ۾ ڏيندي هن چيو ته اوهان جو چينل اردو ۾ آهي، جڏهن اهو چينل انگلش ۾ ٿيو، تڏهن انٽرويو ۾ ڏينديس. هن چيو ته پاڪستاني اسٽارز کي ملڪ کان ٻاهر عزت ملي رهي پر ملڪ ۾احترام ناهي، هن چيو ته پاڪستانين کي گهر ته هو پنهنجي اسٽارز جي عزت ڪن، سندن مذاق نه اڏائن. ن چيو ته جيڪڏهن هو ڀارت ۾ هجي ها ته کيس گهڻي عزت ملي ها. خيال رهي ته پنهنجي “گلابي انگريزي” سبب مشهور اداڪاره ميرا اڄڪلهه پنهنجي فلم “هوٽل” جي پروموشن ۾ آهي.

 

سيرينا وليمز اٽالين ٽينس ٽورنامينٽ جو وومين سنگلز ايونٽ کٽي ورتو

روم (اسپورٽس نيوز) آمريڪا جي نالي واري ٽينس اسٽار ۽ عالمي نمبر ون سيرينا وليمز اٽالين اوپن ٽينس ٽورنامينٽ جو وومينز سنگلز ايونٽ کٽي ورتو آهي، هن فائنل ۾ هم وطن ميڊيسن ڪيز کي هارائي 2002ع کان پوءِچوٿون ڀيرو ڊبليو ٽي اي ٽائيٽل کٽي ورتو، اٽلي ۾ جاري ڊبليو ٽي اي ايونٽ ۾ کيڏيل فائنل ميچ ۾ سيرينا ويلمز روايتي راند پيش ڪندي هم وطن ميڊيسن ڪيزکي هارائي ٽورنامينٽ کٽي ورتو، سيرينا وليمز چوٿون ڀيرو ايونٽ پنهنجي نالي ڪيو آهي.

 

قومي ٽيم ايشين سڪس ريڊ اينڊ ٽيم ايونٽ سنوڪر چيمپين شپ ۾ شرڪت لاءِ اڄ ابوظهبي رواني ٿيندي

اسلام آباد (اسپورٽس نيوز) 6 رڪني اسنوڪر ٽيم ايشين سڪس ريد اينڊ ٽيم ايونٽ اسنوڪر چيمپين شپ ۾ شرڪت لاءِ (اڄ) اڱاري واري ڏينهن ابوظهبي رواني ٿيندي، پاڪستان بليئرڊ اينڊ اسنوڪر ايسوسي ايشن (پي بي ايس اي) جي صدر عالمگير شيخ مطابق چيمپين شپ 18 کان 26 مئي تائين ابوظهبي ۾ کيڏي ويندي، جنهن ۾ 4  رانديگر ۽ 2 آفيشلز ويندا، رانديگرن ۾ بابر مسيح، محمد بلال، اسجد اقبال ۽ محمد آصف شامل آهن، جڏهن ته آفيشلز ۾ نويد ڪباڙيا ۽ شبير حسين بطور ريفريز ٽيم سان گڏ هوندا، هن چيو ته ايونٽ جي تياري لاءِ قومي رانديگرن جي تربيتي ڪيمپ ڪراچي ۾ جاري آهي.

 

دلچسپ موڙ اختيار ڪري ويل پاناما ليڪس معاملو: واحد پارس هيسباڻي

پاناما پيپرز جي پهرين قسط ۾ جڏهن شريف خاندان جي فردن جا نالا سامهون آيا ته هر پاسي کان وٺ پڪڙ شروع ٿي وئي. جيتوڻيڪ ان وٺ پڪڙ ۾ سڀني پنهنجو حصو ڳنڍيو، پر جيڪو شخص هٿن مان نڪتو پئي ويو اُهو عمران خان عرف عام سونامي هو، هو وزيراعظم جي استعيفيٰ کان گهٽ ڳالهه ٻڌڻ لاءِ تيار نه هو، اسلام آباد واري طويل ڌرڻي ۾ جيڪو مقصد حاصل ڪرن کان هي محروم رهجي ويو هو، اهو مقصد هي هن موقعي مان ماڻڻ چاهي پيو. ويچاري وزيراعظم 2 ڀيرا ٽي وي تي اچي قوم کي خطاب ڪيو، ان معاملي جي شفاف جاچ ڪرائڻ جو يقين ڏياريو، ايستائين جو ڏوهه ثابت ٿيڻ جي صورت ۾ استعيفيٰ ڏئي گهر هليو وڃڻ جو واعدو به ڪيو، سپريم ڪورٽ کي خط لکيو ويو، پر انهن سڀني تدبيرن جو ڪو به فائدو نه ٿيو، وزيراعظم جو گهيرو جيئن پوءِ تيئن تنگ ٿيندي نظر آيو. اهو سلسلو ان انداز ۾ جاري ئي هو ته پاناما پيپرز جي ٻي قسط سڄو وايو منڊل ئي تبديل ڪري ڇڏيو. ان قسط کانپوءِ سياسي حمام اندر سڀ هڪ جهڙا نظر آيا. اها نواز ليگ هجي، پيپلز پارٽي هجي، متحده قومي موومينٽ هجي، تحريڪ انصاف هجي يا ڪا ٻي ڌر، انهن جا پنهنجا ماڻهو ان ۾ ظاهر ٿي پيا. پهرين قسط ۾ ته ڪي 200 پيارا پاڪستاني آف شور ڪمپنيون ٺاهيندڙن ۾ شامل هئا، پر ٻي قسط ۾ اِهو تعداد 400 هو، يعني پهرين قسط کان به ٻيڻو. چيو پيو وڃي ته اڃا ته ان جون ڪيتريون ئي قسطون اچڻيون آهن ۽ انهن ۾ اڃا ڪيترا پردا نشين ظاهر ٿيڻا آهن.

تحريڪ انصاف جو سربراهه جيڪو هٿن مان نڪتو پئي ويو خيرن سان ان جي به آف شور ڪمپني جا دستاويز سامهون آيا آهن. جيتوڻيڪ پهريان ڳالهه اِها سامهون آئي ته هِن همراهه پرائي ديس ۾ صرف هڪڙو فليٽڙو ورتو هو، جنهن جا 2 ڏوڪڙ بچائڻ لاءِ ان کي ظاهر نه ڪيائين، هي پاڻ به اُها ڳالهه وڏي فخر سان ٻڌائي رهيو هو ته بلڪل مون فليٽ خريد ڪيو هو، ٻه ڏوڪڙ به بچايم پر اُهو کپائي وري به پئسا پاڪستان ئي کڻي آيس ۽ بني گالا ۾ اچي ’غريباڻو گهر‘ ٺهرايم…. پر هاڻي ته قصو گهڻو اڳتي تائين وڌيل نظر اچي رهيو آهي. ٽيون ڏينهن اطلاعات ۽ نشريات واري وفاقي وزير پرويز رشيد جيڪا پريس ڪانفرنس ڪئي آهي، ان ۾ خان صاحب جي آف شور ڪمپني هجڻ جي نه صرف ڳالهه ڪيائين، پر کيس پهرئين نمبر جو ڏوهاري پڻ چيائين. عمران خان جي جنهن آف شور ڪمپني جو ٻڌايو وڃي ٿو اها نيازي سروس لميٽيڊ جي نالي سان آهي، جيڪا 1983ع ۾ رجسٽرڊ ڪرائي وئي. جيتوڻيڪ تحريڪ انصاف جي قيادت توڙي هيٺين سطح جي ليڊر شپ انهن وضاحتن سان ڳالهه کي ڳُڙ ڪرڻ جي ڪوشش ۾ مصروف آهي ته خان صاحب جيڪو فليٽ ورتو هو، اُهو نيٺ وڪڻي هتي اچي گهر ٺهرايائين، پر سرڪاري ڌر جنهن کي هن همراهه جا زهر جا ڍڪ پياريل آهن، اها ڪٿي ٿي معاملي کي ائين آيو ويو ٿيڻ ڏئي! اِها اِهو چئي رهي آهي ته ڳالهه هڪڙي فليٽ جي هجي يا پوري اپارٽمينٽ جي، ڏوهه ڏوهه ئي آهي. هي همراهه جيڪو پاڻ کي صفا اڇو اجرو چئي رهيو هو، ان جي اِها اڇائپ اجرائپ ڪيڏانهن وئي؟ اها اِهو سوال به اٿاري رهي آهي ته جڏهن خان صاحب 2002ع واري اليڪشن ۾ حصو ورتو ته پنهنجي گوشوارن ۾ ان شيءِ جو ذڪر ڇو نه ڪيو. بهرحال ڊگهي عرصي کان سور سهندڙ سرڪار کي مس مس وارو مليو آهي، ۽ هي ان واري کي باقاعدي وڄائڻ جي موڊ ۾ نظر اچي رهي آهي.

هن بدليل منظرنامي ۾ ڄڻ ته وزيراعظم جو اڄوڪو اعلانيل پارلياماني خطاب به سولو ٿي پيو آهي. شروع ۾ اِهو چيو پئي ويو ته وزيراعظم پارليامينٽ ۾ اِن ڪري نٿو اچي جو هُن لاءِ مخالف ڌرين جي تيز ۽ ڪڙن سوالن جو جواب ڏيڻ ڏکيو آهي، ڇو ته ڪالهه تائين صورتحال اِها هئي ته پاناما ليڪس معاملي ۾ سڀني کان وڏو ڏوهاري شريف خاندان ئي نظر اچي رهيو هو، پر هاڻي معاملو گهڻو ڦهلجي ويو آهي. پهرين ڳالهه ته مخالف ڌريون خاص ڪري تحريڪ انصاف اها تڪڙ نه ڪندي جيڪا هُو ڪجهه ڏينهن اڳ تائين ڪري رهي هئي ۽ جيڪڏهن هِن تڪڙ ڪئي تڏهن به وزيراعظم وٽ انهن کي جواب ڏيڻ جو مواد موجود آهي، رهيو معاملو پيپلز پارٽي جو ته ان جي به ڪافي ماڻهن جا اِن پاناما پيپرز ۾ نالا شامل آهن. بهرحال وري به ڏسجي ته اڄ واري اجلاس جا ڪهڙا منظر جڙن ٿا.

هاڻي جڏهن پاناما پيپرز واري معاملي جا اثر هر پاسي وگهريل نظر اچي رهيا آهن ۽ ڪابه ڌر بچيل ناهي ته بهتر ائين ئي ٿيندو ته هِن معاملي تي اجايو جذبات ٿيڻ جي هِن کي آئيني ۽ قانوني طريقي سان نبيرڻ جي ڪوشش ڪئي وڃي. حڪومت طرفان موڪليل ٽي او آرز کي سپريم ڪورٽ رد ڪري ڇڏيو آهي، هاڻي بهتر ائين ئي ٿيندو ته حڪومت ۽ مخالف ڌريون گڏجي ٽي او آرز جوڙين، جنهن ۾ سڀني پاسن کي رکيو وڃي ته جيئن جاچ وارو عمل سولو ٿي سگهي. پاناما پيپرز وارو معاملو ائين عام به ناهي ته هوائي توائي به ناهي، جنهن کي نظرانداز ڪري ڇڏجي يا سياسي گوڙ ۾ وڃائي ڇڏجي، هي وڏو بلنڊر آهي، جنهن جي انصاف ڀري جاچ ٿيڻ کپي ۽ جنهن جنهن ماڻهو به هِن ۾ حصو ڳنڍيو آهي، ان کان حساب ڪتاب ٿيڻ گهرجي. ان حوالي سان سياسي پارٽين جي به ذميواري آهي ته اُهي پنهنجي ماڻهن کي اجايا ڪک رکڻ بدران انهن کي سندن ڏوهه جي سزا ڀوڳڻ لاءِ اڪيلو ڇڏي ڏين، ان سان ائين ٿيندو ته هڪ طرف قانون جو بول بالا ٿيندو ته ٻئي طرف اڳتي جي لاءِ انهن کي سمجهه ۾ به اچي ويندو ته غلط عمل جو نتيجو ڇا آهي.

وزيراعظم جي اڄ واري پارلياماني خطاب کي تماشو بڻائڻ بدران صبر سان ٻڌڻ گهرجي ۽ جتي جتي به سوال پيدا ٿين، اُهي پارلياماني تقدس جي دائري اندر ضرور اٿارڻ گهرجن ۽ انهن جي جواب طلبي ڪرڻ گهرجي، ان سان گڏوگڏ حڪومتي ڌر تي به اِها ذميواري آهي ته اها ايڪسٽرا جذباتي ٿيڻ جي معاملن جي نزاڪت کي ڏسي، سمجهي ۽ حل جو سوچي. جيتوڻيڪ هينئر پاناما ليڪس جي دائري ۾ ڪيترائي ڪردار سامهون اچي ويا آهن، پر اقتداري مسند تي هجڻ ڪري سرڪاري ڌر جي وڌيڪ ذميواري آهي ۽ ان کي روين جي حوالي سان ٻين کان منفرد هجڻ گهرجي، جيڪڏهن سرڪاري ڌر جي ڪنهن ماڻهوءَ تي ڏوهه ثابت ٿئي ٿو ته بجاءِ ان جو تحفظ ڪرڻ جي، ان جي پشت پناهي ڪرڻ جي  ان کي احتساب لاءِ پيش ڪرڻ گهرجي.

هن وقت پاناما ليڪس معاملو دلچسپ موڙ اختيار ڪري ويو آهي. هِن جي پهرين قسط جاري ٿيڻ وقت جيڪي منظر هئا، ٻي قسط جاري ٿيڻ کانپوءِ اهي وڏي پئماني تي تبديل ٿي ويا آهن. هاڻي اهي رڙيون ۽ اهو گوڙ نه پيو ٻڌجي جيڪو شروعاتي ڏينهن ۾ هو. ائين محسوس ٿي رهيو آهي ته هرڪو پاڻ بچائڻ ۾ مصروف ٿي ويو آهي. جيتوڻيڪ حڪومت هِن معاملي مان مڪمل طور تي پنهنجا پاند آجا ته نه ڪرائي سگهي آهي، پر اڳ جي ڀيٽ ۾ مٿس پريشر ڪافي حد تائين گهٽجي ويو آهي، هاڻي هي به جواب ڏيڻ جي پوزيشن ۾ اچي وئي آهي، بلڪه هن جواب ڏيڻ شروع به ڪري ڇڏيا آهن، خاص ڪري تحريڪ انصاف هن جي نشاني تي آهي. روز روز پريس ڪانفرنسون ٿي رهيون آهن، ان جي موٽ ۾ تحريڪ انصاف جو اهو ري ايڪشن ناهي جيڪو شروعاتي ڏينهن ۾ هو. اهي سڀ معاملا پنهنجي جڳهه تي سياست ۾ موقعن مان ڀرپور فائدا حاصل ڪرڻ واري روايت پراڻي آهي پر اِن جو مطلب اِهو نه هجڻ گهرجي ته سڀ حدون پار ڪري وڃجن. حڪومت هن معاملي کي گهڻو جذباتي بڻائڻ کان پرهيز ڪري. اها ڳالهه ڌرين لاءِ به فائدي واري آهي ته سسٽم لاءِ به فائدي واري آهي ته هِن معاملي جو قانوني ۽ جمهوري حل ڪڍيو وڃي ۽ هِن بابت جيڪو ڪجهه به طئي ڪرڻو آهي، اُهو پارليامينٽ اندر ڪرڻ کپي، ڇو ته جمهوري سسٽم ۾ پارليامينٽ ئي معاملن کي نبيرڻ جي بهترين جڳهه هوندي آهي، جتي بحث مباحثا به ٿيندا آهن ته مسئلن جو حل به نڪرندو آهي ته قانون به جڙندا آهن. اسان جي صلاح اها آهي ته حڪومت کي سڀني مخالف ڌرين کي اعتماد ۾ وٺي هِن معاملي جي جاچ لاءِ گڏيل نموني ٽي او آرز طئي ڪرڻ گهرجن ۽ سپريم ڪورٽ کي انهن مطابق جاچ ڪميشن جوڙڻ جي گذارش ڪئي وڃي ۽ پنهنجا پنهنجا فيصلا  ٻڌائڻ جي عدالت کي فيصلو ٻڌائڻ ڏنو وڃي.

جنهن انداز ۾ ڇڪتاڻ وارو سلسلو نظر اچي رهيو آهي، اُهو ڪنهن به نموني بهتر ناهي، اِن سان غير جمهوري قوتن کي جمهوريت مٿان وار ڪرڻ جو موقعو ملندو. هڪ وڏي قرباني ۽ هڪ ڊگهي انتظار کانپوءِ جڏهن جمهوري سسٽم بحال ٿيو آهي ۽ ان پنهنجو پاڙون مضبوط ڪرڻ شروع ڪيون آهن ته جمهوريت ۾ ويساهه رکندڙ سڀني ڌرين جي اِها ذميواري آهي ته اُهي هِن سسٽم جي پائيداري لاءِ پنهنجو ڪردار ادا ڪن ۽ جيڪي به اختلاف ۽ اعتراض آهن اُهي جمهوري دائري اندر ئي حل ڪرڻ گهرجن.

wahidparas@yahoo.com

 

 

52 هين سالياني عرس جي مناسبت سان قلب جي شمع روشن ڪندڙ صوفي بزرگ پير مٺا سائين:ۡ عبدالفتاح عباسي

سنڌ جي سونهاري سرزمين هر دور ۾ عظيم هستين کي جنم ڏنو آهي ۽ سنڌ پنهنجي خطي جي اندر بزرگان دين اوليا الله، ڪامل هستين، درويشن، صوفي بزرگن خلق خدا جي حوالي سان شاندار ڪردار ادا ڪيو آهي، لازوال خوبين جي مالڪ اوليا الله بزرگن سنڌ جي سرزمين جي اندر ڀٽائي سرڪار جي شعر جي تشريح جيان پوري عالم جي لاءِ دعاگو بڻجي جيڪو بي مثال ۽ شاندار تاريخي ڪردار ادا ڪيو آهي، اهو جنگين جي فاتحن کان به ڏٺو وڃي ته ان حوالي سان منفرد ۽ انوکو آهي، ڇوته هڪڙا ماڻهو جنگ جي ميدان ۾ تلوار ۽ تير سان جنگيون فتح ڪن ٿا، پر اهي شخص جن جي شخصيت جي سحر سان انسانيت جي اندر واري قلب جي اندر جيڪا روحانيت جي شمع روشن ٿئي ٿي ۽ اسم اعظم الله جون برڪتون ڇائنجن ٿيون، ان جو ڪو مثال نٿو ٿي سگهي، قلبي ذڪر جي تنوار عاشقن جي عظيم خوراڪ آهي ۽ هي جيڪي ذڪر ۾ فنا في الله، فنا في الرسول ﷺ، فنا في الشيخ ۾ گم ٿي وڃن ٿا، انهن جا درجا، انهن جون محنتون، انهن جون ڪاوشون ۽ انهن جو مقام اعليٰ درجي تي رهي ٿو، ڇاڪاڻ ته اهي پنهنجي نفس کي مارين ٿا ۽ زندگي جي عيش و عشرت زندگي جي رونقن بجاءِ پنهنجي رب ڪريم جي رضامندي لاءِ جهر جهنگ وستي واهڻ نگر نگر ۾ انسانيت جي خيرخواهي ۽ ڀلائي جي پرچار ۾ نيڪي جي دعوت عام ڪرڻ ۾ نڪري پون ٿا ۽ اهي صوفي ازم جي حقيقي فلسفي تي عمل ڪندي جيڪو دڳ وٺن ٿا، اهو نهايت ئي انسانيت امن، پيار، محبت، اخوت، ڀائيچارو ۽ پريت جو پيغام آهي ۽ ان ۾ ئي انسانيت جي بقا ۽ سلامتي آهي، اوليا الله، درويشن، بزرگن ۽ صوفين رب تعاليٰ جي رضامندي لاءِ ۽ پنهنجي محبوب حضرت محمد مصطفيٰ ﷺ جن جي خوشنودي لاءِ جيڪي ڪشالا ڪاٽين ٿا ۽ منزلون طئي ڪن ٿا، اهي بظاهر ڪن ماڻهن لاءِ ڀل جو ڏکيون هجن ۽ سفر اڻانگو هجي، پر انهن اولياءِ الله ڪامل هستين، صوفي بزرگن لاءِ ڏينهن توڙي رات عشق الاهي ۾ جيڪا زندگي بسر ٿئي ٿي، اها هڪ کليل ڪتاب جيان رهي ٿي، سماج جي اندر هي تڏي تي ويهندڙ ۽ راتين جو رب پاڪ تعاليٰ جي عاجزي انڪساري نياز نوڙت ۽ نه صرف پنج وقت نماز بلڪه انهن جون راتين جون راتيون تهجد کانپوءِ سڏڪن جا آواز لازمي طرح پنهنجي لاءِ نه ٿا ٿين. بلڪه اهي پنهنجي حلقاءِ احباب، امت جي خيرخواهي ۾ جاري ٿين ٿا ۽ انهن جو روئڻ ٻاڏائڻ ۽ رب جي خوشنودي حاصل ڪرڻ هڪ مثالي محنت آهي، ڀٽائي سرڪار فرمايو آهي ته:

طالب ڪثر سونهن اي رومي جي رهاڻ،

پهرين وڃائي پاڻ، پسڻ پوءِ پرين جو. (شاهه لطيف)

يعنيٰ سڀ کان پهرين پاڻ کي وڃائڻو آهي معنيٰ دنيا جي بي رنگيءَ مان پاڻ کي آزاد ڪرائيندي صرف ۽ صرف رب العالمين جي رضا تي راضي ٿيڻ کي پنهنجو مقصد حيات بڻائڻو آهي ۽ پوءِ جيڪو رب تعاليٰ جو پسڻ ٿئي ٿو، اهو نهايت رحمت، بخشش ۽ عنايتن جو کليل ثمر ٿئي ٿو. سنڌ جي اندر جيڪڏهن ڏسجي ته پير جو ڳوٺ حضرت سورهيه بادشاهه رحه، هالا وارا بزرگ مخدوم محمد سرور نوح رحه ۽ حضرت محمد عبدالغفار المعروف پير مٺا سائين نقشبندي فضلي رحمت الله عليه (لاڙڪاڻو رحمت پور) سنڌ جون اهي گاديون آهن، جيڪي سڀ کان وڌيڪ هزارين لکين مريدن، عقيدتمندن، زائرين جو مرڪز ۽ محور آهن، انهن بزرگن جا مريد نه صرف سنڌ، پنجاب، بلوچستان، خيبرپختونخوا، آزاد ڪشمير ۾ آهن، پر جاپان، آمريڪا، برطانيه، ايران، عراق، شام، جرمني، ڪوريا، ڀارت، بنگلاديش توڙي ٻين ملڪن ۾ بيشمار تبليغي سفر جاري رکندا پيا اچن.

حضرت پير مٺا سائين رحه جي والد گراميءَ جو اسم مبارڪ يار محمد نقشبندي رحه هيو، جيڪي شريعت ۽ طريقت ۾ جامع علم و عمل جا مجمع البحر هئا، سندن جي مادري زبان سرائيڪي هئي ۽ پاڻ اصل پراڻي سنڌ جي ملتان جي ڀرسان ڳوٺ جلکال پور پير والا ضلع ملتان جا رهواسي هئا. سندن جي ادبي روحاني شاعري جي ڪهڙي ڳالهه ڪجي ۽ پاڻ حمد، نعت، منقبت سميت مختلف صنفن تي لازوال شاعري ڪئي آهي، سندن اکر موتين جا داڻا هئا. حضرت پير مٺا سائين رحمت الله عليه تصوف جي واٽ وٺندي ۽ انهي سنڌ کانسواءِ هند ۾ به اجمير، دهلي، بمبئي، احمد آباد ۽ ٻين شهرن ۾ جيڪي اسلام جي پرچار ڪئي ۽ لکن جي تعداد ۾ عقيدتمند مريدن خدمت ۾ رهيا، اهي اسم اعظم جي نعمت سان مالا مال ٿيا، الله تعاليٰ جي رضا جي انهي دڳ ۾ هن ڪامل هستي ڪيترائي مريد بڻايا ۽ پاڻ سلسله عاليه نقشبنديه ۽ قادريه ۾ پڻ سبق درس ڏيندا رهيا، زندگي جي معاملات ۾ هر وک تي شريعت ۽ طريقت جي معرفت سان مالا مال زندگي گذري، پاڻ سچا پڪا عاشق رسول ﷺ هئا ۽ سندن جي سموري زندگي عشق رسول ﷺ سان ڀرپورگذري. حضرت محمد عبدالغفار المعروف پير مٺا سائين رح 8 شعبان المعظم 1384هجري بمطابق 12 ڊسمبر 1964ع تي هن فاني دنيا مان حقيقي مالڪ ڏانهن راهي ٿيا. سندن اولاد ۾ حضرت خواجه خليل الرحمان نقشبندي غفاري رحمت الله عليه هئا، جيڪي به وقت جا عظيم ديني عالم ٿي گذريا ۽ سندن جو وصال 7 ذوالقعد 1396 هجري بمطابق 21 آڪٽوبر 1976ع تي ٿيو، جنهن کانپوءِ صاحبزاده سائين محمد مظهر جان جانان رحمت الله عليه گادي نشين جون خدمتون ڏيندا رهيا ۽ انهن جي وصال کانپوءِ سندن صاحبزادو سائين محمد عبدالغفار ثاني درگاهه سان وابسته  رهن ٿا.

 

 

پانامه ليڪس: وزير اعظم جو مخالف ڌر کي جواب

وزيراعظم نوازشريف پاناما ليڪس معاملي تي  قومي اسيمبلي جي اسپيڪر کان مخالف ڌر جي اڳواڻ ۽ ٻين سياسي پارٽين  جي اڳواڻن جي مشوري  سان پارلياماني  ڪميٽي جوڙڻ  جي درخواست ڪندي چيو آهي ته  اسان ماضي ۾ سخت ۽ هڪ طرفي احتساب مان گذريا آهيون ۽ اڄ به ڪنهن به احتسابي عمل کي منهن ڏيڻ لاءِ تيارآهيون قومي اسيمبليل جي اجلاس ۾ خطاب ڪندي وزيراعظم  نوازشريف چيو ته پاناما ليڪس جي رپورٽ ۾ واضع چيو ويوآهي ته آف شور ڪمپنين سان تعلق جو مطلب هرگز اهو ناهي ته ڪو شخص  بدعنواني  ڪندڙ هجي، انهي ۾ منهنجي ٻن پٽن جو ذڪر به آيو آهي، جيڪي گذريل ڪيترن ئي سالن کان  پرڏيهه ۾  رهن ٿا ۽ لکين ٻين پاڪستانين  جيئان اتي جي قانون ۽ ضابطن  تحت ڪاروبار ڪري رهيا آهن، منهنجي دوستن جي اها راءِ هئي ته ڇو ته پاناماپيپرز ۾ منهنجو ڪٿي به ڪو ذڪر ناهي،  انهي لاءِ مونکي اڳڀرائي ڪرڻ ۽ پاڻ کي احتساب لاءِ پيش ڪرڻ جي ضرورت نه هئي پر منهنجو رد عمل اهو هو ته انهي سان منهنجي ذات جو تعلق ناهي پر منهنجي خاندان  جو ذڪر آيوآهي، انهي ڪري اهو معاملو مونکي بااختيار ڪميشن حوالي ڪرڻ گهرجي ته جيئن سموري معاملي جي ڇنڊ ڇاڻ ڪري حقيقتون  اڳيان آڻجن، اپوزيشن  جي مطالبي تي هن پهرين ئي قوم  کي خطاب ۾ ڪميشن  جي قيام جو اعلان  ڪيو، انهي ڳالهه  جو پختو يقين رکان ٿو ته پنهنجي زندگي  ۾ انصاف  جي اعليٰ ترين  ايوانن  مان گذرندڙ جج صاحب به رٽائر ٿي ويا آهن، جيڪي امانت ۽ ديانت  سان اڻڌري  انصاف جي گهرج  پوري ڪري سگهن ٿا،

افسوس ٿيو آهي ته انهي تي رد عمل کانپوءِ اهڙو ماحول پيدا ڪيو ويو جو  شهرت رکندڙ  ججن لاءِ به ڪميشن  جي سربراهي  ڪرڻ ڏکيو ٿي ويو،  اپوزيشن جي ڪاميٽي جي تجويز  اڳيان آئي ۽ انهي تي به حڪومت هاڪاري  رد عمل جو اظهار ڪيو پر اسان جي رابطن  کانپوءِ به ڪاميٽي  تي ڪا اڳڀرائي نه ٿي،پوءِ چيو ويوته ايف آءِ اي کان جاچ ڪرائڻ گهرجي، جنهن لاءِ اپوزيشن  کي پنهنجي اعتماد وارن آفيسرن کي نامزد ڪرڻ جو چيو ويو پر انهي کي به نظر انداز ڪيو ويو ، پوءِ واحد  مطالبو  رڳو اهو هو ته سپريم ڪورٽ  جي ججن  تي ٻڌل  ڪميشن کي قبول ڪيو ويندو، جنهن جي سربراهي چيف جسٽس پاڻ ڪري، مان 22 اپريل تي قوم کي خطاب دوران اهو مطالبو به تسليم  ڪرڻ جو اعلان ڪيو ،مونکي يقين هو ته پنهنجو واحد مطالبو تسليم  ٿيڻ بعد اپوزيشن  مطمئن  ٿي ويندي ۽ جاچ  جو انتظار ڪندي  پر ٽي او آرز  کي به تڪراري   بڻايو ويو، اسان جي جامع  ٽي او آرز  جي جڳهه تي 15 ٽي او آرز پيش ڪيا ويا، اپوزيشن  جا اهي ٽي او آرز  ڪنهن بدعنواني جي خاتمي  بدران هڪ  فرد جي چئو طرف  گهمن ٿا ۽  اهو شخص مان آهيان،

ٽي او آرز  ۾ چيو ويوآهي ته  جتي به وزيراعظم  جو لفظ اچي انهي جي معني ٰ  رڳو نوازشريف  ورتي وڃي، انهن ٽي او آرز  جو دلچسپ  پاسو اهو آهي ته جنهن شخص  جو پانامه ۾ ذڪر  به  نه هو، انهي لاءِ چيو ويو به ڪميشن جوڙي  جاچ شروع  ٿيڻ  کان پهرين فرد جرم لڳايو وڃي، ايوان کي يقين ڏياريان ٿو ته  حڪومت انهي معاملي  جي بنا دير فوري ۽ جامع  جاچ  چاهي ٿي،  اسان نٿا چاهيون ته  ملڪ ڪنهن ڇڪتاڻ هٿان يرغمال بڻجي ۽  اسان وري دينا جي اڳيان تماشو بڻجون، اهڙن معاملن  ۾ سير  ملڪ ۽ قوم  جي مفادن ۾ ناهي هوندي،  اسان انهي معاملي جي نيڪ نيتي  سان  ڇنڊ ڇاڻ چاهيون ٿا، کليل دل سان چئي رهيا آهيون ته  ڪنهن مسئلي  تي ڪنهن ڳالهه کي انا جو مسئلو نه ٿيڻ ڏيون، اسان ملڪ  جي انا جو پرچم بلندرکڻ چاهيون ٿا، پلئه صاف آهي، اسان کي ڪنهن آئين قانوني ڇوٽ جي  ضرورت نه ناهي، ماضي ۾ڪيترائي ڀيرا هڪطرفي احتساب مان گذريا آهيون ۽ اڄ به  احتساب جي عمل  کي منهن ڏئي رهياآهيون ۽ تيارآهيون، اهو به چاهيون ٿا ته بدعنواني ،اختيارن جي ناجائز استعمال  مان فائدو  کڻندڙن، ٽيڪس چوري ڪندڙن، ڪڪ بيڪس وٺندڙن، پيسا غيرقانوني طور تي ٻاهر موڪليندڙن ۽ قرض معاف ڪرائيندڙن جي اصل ڪهاڻي  به قوم جي اڳيان اچي وڃي، منهنجي دل ۾ پارليامينٽ  جي تمام گهڻي عزت آهي، اهو ايوان  قانون جي حڪمراني ۽ جمهوريت  جي علامت آهي،انهي ايوان جو نمائندو ٿيڻ منهنجي لاءِ اعزاز جي ڳالهه آهي، منهنجي ايوان کي گذارش آهي ته  ايوان احتساب جي نظام تي غور ڪري ۽ اهڙو احتسابي نظام جوڙي، جيڪو پڳون نه لاهي، اهو سلسلو بند ٿيڻ گهرجي ۽ انهي نظام تي سموري قوم کي اعتمام ۾ وٺڻ گهرجي.