تازيون خبرون

Daily Archives: May 16, 2016

آف شور ڪمپنين خلاف هُل ڪندڙ پاڻ آف شور ڪمپنين وارا نڪتا: وفاقي حڪومت

اسلام آباد (اين اين آءِ) دفاع واري وفاقي وزير خواجه آصف چيو آهي ته عمران خان جڏهن پڪڙيو ويو ته آف شور ڪمپني جو اعتراف ڪي، هن چيو ته تحريڪ انصاف جي چيئرمين جو آمدني جو ڪو به ذريعو ناهي ۽ هو ٻڌائي ته هو پنهنجا خرڇ ڪٿان هلائي ٿو، تحريڪ انصاف جي چيف شوڪت خانم جي خيرات وارن پيسن مان آف شور ڪمپني ۾ انويسٽمينٽ ڪئي هئي، هڪ انٽروويو ۾ هن چيو ته آف شور ڪمپينن جو شور مچائيندڙ پاڻ آف شور ڪمپنين جا مالڪ آهن، عمران خان 1983 ۾ ٽيڪس بچائڻ لاءِ آف شور ڪمپني بڻائي ۽ هن شوڪت خانم جي خيراتي پيسن کي ان ڪمپني ۾ انويسٽ ڪيو، هن چيو ته عمران خان منهنجي خلاف 10 ارب رپين جي هرجاڻي جي دعويٰ ڪئي آهي، ان دعويٰ مطابق آف شور ڪمپنيون غير قانوني نه آهن، هن چيو ته عمران خان ڪوڙ ڳالهائي ٿو ۽ سندس بيانن ۾ فرق آهي، عمران خان ٻڌائي ته پنهنجا خرچ ڪيئن هلائي ٿو ۽ سندس گهر ۾ ڪهڙي اي ٽي ايم مشين لڳل آهي، هن چيو ته پاڪ چين اقتصادي راهداري منصوبو خطي ۾ انقلاب ۽ اقتصادي ترقي ۽ خوشحالي جو ضامن آهي. خواجه محمد آصف چيو آهي ته پاڪستان مسلم ليگ(ن) جي حڪومت توانائي جي بحران کي ترجيحي بنيادن تي منهن ڏيڻ  جو  پختو عزم ڪيو آهي. آچر ڏينهن هتي پاڪستان مسلم ليگ هائوس ۾ ”اي پي پي” سان ڳالهائيندي هن چيو ته  حڪومت ايندڙ مالي سال جي بجيٽ ۾ بجلي جي پيداوار لاءِ وڌيڪ فنڊ مختص ڪندي ۽ اهو عمل حڪومت جي لوڊ شيڊنگ جي خاتمي واري واعدي پوري ڪرڻ تائين جاري رهندو. وفاقي وزير چيو ته پاڪستان مسلم ليگ(ن) جي حڪومت توانائي جي بحران کي ختم ڪرڻ لاءِ سمورا وسيلا استعمال ڪري رهي آهي ۽ حڪومت جي اثرائتين پاليسين سبب لوڊ شيڊنگ جو وقت گذريل سال جي ڀيٽ ۾  ڪيترائي ڀيرا گهٽجي ويو آهي. ٻئي طرف اطلاعات کاتي جي وفاقي وزير پرويز رشيد چيو آهي ته افتخار چوڌري جي پارٽي نه قومي اسيمبلي ۾ آهي ۽ نه ئي ڪنهن صوبائي اسيمبلي ۾. افتخار چوڌري پاڪستان جي ڪنهن به طبقي جي نمائيندگي ناهي ڪندو، سندس منهن تي اهڙيون ڳالهيون سٺيون نٿيو لڳن، خابرو ادارن موجب پريس ڪانفرنس کي خطاب ڪندي پرويز رشيد جو چوڻ هو ته افتخار چوڌري جي منهن تي اهڙيون ڳالهيون سٺيون نٿيون لڳن، پهرين هو پاڻ کي ان قابل ٺاهن.

APP31-15Sialkot-696x476

وزير اعظم نه ڀڄي، جمهوري سياستدان جي آخري منزل پارليمينٽ آهي: مولابخش چانڊيو

سجاول  (رپورٽر ) سنڌ جي وڏي وزير جي اطلاعات کاتي بابت صوبائي صلاحڪار مولا بخش چانڊيو چيو آهي ته جمهوري سياستدان جي آخري منزل پارليمينٽ آهي، وزير اعظم کي پارليمينٽ کان ڀڄڻ جي صلاح ڏيندڙن سبب پاناما بحران ان منزل تي پهتو آهي، خابرو ادارن موجب پيپلز پارٽي ورڪرز ڪنوينشن کي خطاب ڪندي مولابخش چانڊيي جو چوڻ هو ته ڊاڪٽر فهميدا لاءِ احترام آهي، پر جهڙي ريت هُن پارٽي قيادت تي تنقيد ڪئي ۽ اليڪشن کانپوءِ سياسي حيثيت سان پارٽي جو حصو نه آهي، جيڪڏهن پارٽي جو حصو آهي ته کيس پيپلز پارٽي جي قيادت کي ثابت ڪري ڏيکارڻو هوندو، ان کانپوءِ پارٽي قيادت اهو فيصلو ڪندي ته فهميدا مرزا ۽ حسنين مرزا پيپلز پارٽي ۾ شامل آهن يا نه، سندس چوڻ هو ته رينجرز ۽ پوليس ڪراچي ۾ دهشتگردي جو خاتمو ڪري ڏيکاريو آهي، اڄ ڪراچي ۾ امن جو سبب آپريشن آهي، پ پ هڪ ڀيرو ٻيهر تيزي سان اُڀري رهي آهي، ايندڙ وقت پيپلز پارٽي جي عروج جو وقت هوندو. سجاول ضلعو پ پ پ جو قلعو آهي ۽ پ پ پ هن وقت نئون جنم وٺي رهي آهي پ پ پ سنڌ جي ماڻهن لاءِ ساڳي پارٽي آهي ۽ پ پ پ جو قيام شهيد ذوالفقار علي ڀٽو جو هڪ سياسي معجزو آهي. اهڙين خيالن جو اظهار گذريل رات هن پ پ  پ جي نئين سر تنظيم سازي جي سلسلي ۾ ميرپوربٺورو ڀرسان ڳوٺ راجا رميز زنئور ۾ سجاول ضلعي جي ڪارڪنن کي خطاب ڪندي ڪيو. ان موقعي تي پ پ پ جي صوبائي ڪوآرڊينيشن ڪميٽي جو چيئرمين نثار احمد کهڙو، نفيسه شاه، راشد رباني، سيد مُراد علي شاه پڻ موجود هئا. ان موقعي تي خطاب ڪندي اطلاعات کاتي واري صوبائي صلاحڪار مولا بخش چانڊيو چيو ته سنڌ ۾ پ پ پ سان ڪوبه مقابلي جي همت نه ٿو ڪري سگهي. هن چيو ته پارٽي چيئرمين بلاول ڀٽو زرداري پاران نئين سر تنظيم سازي جو بهترين فيصلو ڪيو ويو آهي جنهن تي هو کيس مبارڪباد پيش ڪري ٿو. هن چيو ته ضلعي صدرن کي مقرر ڪرڻ صرف چيئرمين بلاول ڀٽو زرداري جو اختيار آهي ڪوآرڊينيشن ڪميٽي صرف ڪارڪنن جا رايا وٺي چيئرمين تائين پهچائيندي.

 

ماضي ۾ بجلي جي پيداوار سميت ٻيا ترقياتي منصوبا نه ٺاهي مجرماڻي غفلت ڪئي وئي: صدر ممنون حسين

ڪراچي (اي پي پي) صدر مملڪت ممنون حسين چيو آهي ته ماضي ۾ بجلي جي پيداوار سميت ٻيا ترقياتي منصوبا نه ٺاهي مجرماڻي غفلت جو مظاهرو ڪيو ويو، پر هاڻي ايمان جي حد تائين يقين آهي ته پاڪستان جي مسئلن جو خاتمو ٿي ويندو، پاڪستان ۾ هاڻي بدعنواني نه ٿي هلي سگهي، اها ڳالهه هن گورنر هائوس ڪراچي ۾ نيو ٽيڪ سندن ورهائڻ واري تقريب کي خطاب ڪندي ڪيو، ان موقعي تي گورنر سنڌ ڊاڪٽر عشرت العباد خان ۽ نيوٽيڪ جي ايگزيڪيوٽو ڊائريڪٽر ذوالفقار چيما پڻ خطاب ڪيو، صدر چيو ته پاڪستان جا نوجوان اسان جو قيمتي سرمايو آهن، جن جي مستقبل جي بهتر رٿابندي لاءِ حڪومت سنجيده آهي، موجوده حڪومت نوجوانن کي بامقصد تعليم ذريعي باعزت روزگار فراهم ڪرڻ لاءِ ڪوششون ڪري پئي، ماضي ۾ نوجوانن جي تعليم ۽ تربيت جي حوالي سان ڪوتاهي ٿي، جنهن ڪري انتهاپسندي ۽ شدت پسندي کي هٿي ملي، صدر چيو ته جن قومن پنهنجي افرادي قوت جو صحيح استعمال ڪيو اهي ڪامياب ٿيون، ان سلسلي ۾ نيوٽيڪ وارو ادارو نوجوانن کي مختلف هنرن سان آراستا ڪري نه رڳو معاشري جو فعال رڪن بڻائي رهيو آهي، بلڪه هو ان قابل پڻ ٿي ويندا جو پنهنجن ڪٽنبن جي سنڀال ڪري سگهن، هن نيوٽيڪ جي اختيارين کي هدايت ڪئي ته هو نوجوانن جي تربيت جي حوالي سان صنعتن ۽ واپار جي مختلف شعبن جي ضرورتن کي نظر ۾ رکندي مستقبل جي رٿابندي ڪن.

 

ناڪاري سياست سبب ملڪ کي ڪجهه به حاصل نه ٿيو: سعد رفيق

بهاولپور (م.ڊ) ريلوي واري معاملن جي وفاقي وزير خواجا سعد رفيق چيو آهي ته ناڪاري سياست سبب ملڪ کي ڪجهه به حاصل نه ٿيو، ايران عالمي پابندين باوجدو جيئڻ سکيو، چين غربت کي شڪست ڏئي سگهي ٿو ته پوءِ اسان ڇو نه، بهاولپور ۾ هڪ تقريب کي خطاب ڪندي سعد رفيق جو چوڻ هو ته سياسي قيادت جمهوريت لاءِ جلاوطن به ٿي، جمهوريت لاءِ سياسي قيادت ڦاهين کي ڀاڪر پاتو، مارشلا سبب ملڪ پوئتي پئجي ويو، سندس چوڻ هو ته سازشون ٿينديون رهنديون آهن، اسان کي اڳتي وڌڻ گهرجي، پاڪستان ۾ ڪنهن قسم جي به وسيلن جي گهٽتائي نه آهي، پاڪستان کانپوءِ آزاد ٿيڻ وارا ملڪ ترقي ڪري ويا پر اسان نه، اسان کي غربت ۽ بُک کي شڪست ڏيڻي آهي، ڪوڙ جي سياست سبب ملڪ اڳتي نٿو وڌي سگهي، ڪڏهن ڌانڌلي جو ڊرامو ڪيو ويو ته ڪڏهن پاناما ليڪس جو، سعد رفيق چيو ته پيپلز پارٽي جي خلاف جيڪو ڪم آمر نه ڪري سگهيو اهو بلاول جي پيءُ ڪري ڏيکاريو.

 

سنڌ حڪومت صوبي ۾ بجلي جي ڊگهي لوڊشيڊنگ تي ڳڻتي ظاهر، ناڻي وزير کي وفاق سان رابطي جي هدايت

ڪراچي ( اي پي پي ) سنڌ جي وڏي وزير سيد قائم علي شاهه سڄي صوبي ۾ بجلي جي ڊگهي لوڊشيڊنگ تي افسوس جو اظهار ڪندي سينيئر صوبائي وزير سيد مراد علي شاهه کي هدايت ڪئي آهي ته سخت گرمي ۾ لوڊشيڊنگ گهٽ ڪرڻ لاءِ هو وفاق سان ڳالهائي . هن صوبائي وزير مراد علي شاهه کي وڌيڪ هدايت ڪئي ته هو وفاق کي چئي ته هو سنڌ جي عوام تي رحم ڪري ۽ ڊگهي لوڊشيڊنگ ختم ڪئي وڃي .ٻئي طرفسنڌ جي وڏي وزير سيد قائم علي شاهه ڪورنگي انڊسٽريل ايريا ۾ قائم فيڪٽري ۾ ڪم دوران ٽينڪ ۾ 5 مزدورن جي فوت ٿيڻ جو سختي سان نوٽيس وٺندي سيڪريٽري ليبر کان رپورٽ طلب ڪري ورتي آهي  هن چيو ته موڪل جي ڏينهن مزدور ڇو ڪم ڪري رهيا هئا ۽ فيڪٽري ۾ حفاظتي انتظامن ۾ ڪهڙي ڪوتاهي هئي ان حوالي سان به فوري رپورٽ پيش ڪئي وڃي.

 

لاڙڪاڻي جي صحافي بابو اقبال تي تشدد ۽ ڦُر واقعي جا جوابدار گرفتار ڪيا وڃن:بلاول ڀٽو

ڪراچي(اسٽاف رپورٽر)پاڪستان پيپلزپارٽي جي چيئرمين بلاول ڀٽو زرداري،سنڌ سرڪارکي چيو آهي ته لاڙڪاڻي پريس ڪلب جي صدربابو اقبال جي ڪراچي واري گهر ۾ لڳل ڌاڙي ۾ ملوث جوابدارن جو جلد پتو لڳايو وڃي،ڌاڙي دوران مزاحمت تي بابو اقبال ۽ سندس ڀاءُ زخمي ٿيا.رپورٽن موجب 4 هٿياربندن بابو اقبال جي ڪراچي ۾ گلشن اقبال واري گهر ۾ ڪاهي پيا ۽ گهر ڀاتين کي گن پوائنٽ تي يرغمال بڻائي ڦرلٽ ڪئي جنهن تي بابو اقبال ۽ سندس ڀاءُ مزاحمت ڪئي جواب ۾ جوابدارن مٿس فائرنگ ڪري زخمي ڪيو۽ فرار ٿي ويا، جاري ٿيل بيان ۾ بلاول ڀٽو زرداري واقعي جي مذمت ڪندي لاڙڪاڻي پريس ڪلب جي صدربابو اقبال سان همدردي جو اظهار ڪيو آهي ۽ سندس جلد صحتيابي لاءِ دعا ڪئي آهي ۽ سنڌ سرڪار کي چيو آهي ته زخمي صحافي جي بهترعلاج کي يقيني بنايو وڃي ۽ واقعي ۾ ملوث جوابدارن جو پتو لڳائي کين قانون جي ڪٽهڙي ۾ آندو وڃي

طاقتورن خلاف ڪمزورن کي درپيش حقيقي مسئلا حل ڪرڻ ۾ ناڪامي دهشتگردي جو سبب آهي: پاڪستان

نيويارڪ (اي پي پي) پاڪستان دهشتگردن جي خاتمي لاءِ عالمي سطح تي جامع قدم کڻڻ جي ضرورت تي زور ڏنو آهي ۽ چيو آهي ته طاقتورن خلاف ڪمزورن کي درپيش حقيقي مسئلن کي حل ڪرڻ ۾ ناڪامي دهشتگردي جي نتيجي جو سبب آهي، گڏيل قومن جي سلامتي ڪائونسل ۾ خطاب ڪندي پاڪستان جي سفير مليحه لوڌي دهشتگردي جي خاتمي لاءِ کڄندڙ قدمن کي جامع بڻائڻ جي ضرورت تي زور ڏنو، هن چيو ته دهشتگردي کي ڪنهن مذهب، ثقافت يا خطي سان نه ٿو ڳنڍي سگهجي، پاڪستاني سفير 15 رڪني سلامتي ڪائونسل ۾ دهشتگرد ڪاررواين سبب عالمي امن ۽ سيڪيورٽي کي درپيش خطرن بابت بحث ۾ خيالن جو اظهار ڪيو، هن چيو ته ملڪ کي قومي سطح تي ملڪي، سياسي، اقتصادي ۽ مذهبي ڪارڻن کي نظر ۾ رکندي پنهنجي مسئلن جو حل ڳولڻ گهرجي ۽ اسان کي عالمي سطح تي ناانصافي، اڻ برابري، استحصال ۽ نفرت جهڙن سببن کي ختم ڪرڻ گهرجي، هن چيو ته جيڪڏهن تڪرار ئي دهشتگردي جو سبب هجن ۽ جيڪڏهن ملڪن جي اندر يا ملڪن جي وچ ۾ تڪرارن سان دهشتگردن کي هٿي ملي ته پوءِ دهشتگردي کي هٿي ڏيڻ جو سبب بڻجندڙ تڪرارن کي فوري طور حل ڪرڻ ضروري ٿي پوندو، ته جيئن دهشتگردي کي زور وٺائيندڙ ذريعو ئي ختم ٿي وڃي.

 

ڪراچي ۾ ٽانڪي جي صفائي دوران ساهه ٻوساٽجڻ سبب 5 مزدور فوت، فيڪٽري سيل

ڪراچي(اسٽاف رپورٽر)ڪورنگي جي ويٽا چورنگي ويجهو  فيڪٽري جي ٽانڪي ۾ ڪم دوران 5 مزدور فوت ٿي ويا. خانگي ٽي وي چينل موجب ويٽا چورنگي ويجهو انڊسٽريل ايريا ۾ 5 مزدور فيڪٽري جي هيٺ زمين ۾ ٽينڪ جي صفائي جو ڪم ڪري رهيا ها ته ساهه ٻوساٽجڻ سبب 3 مزدورفوت ٿي ويا جڏهن ته 2 مزدور بيهوش ٿي ويا جن کي جناح اسپتال آندو ويو جتي وڌيڪ 2 مزدور فوت ٿي ويا.  ذريعن جو چوڻ آهي ته فيڪٽري ۾ پلاسٽڪ داڻو تيار ڪيو ويندو هو.جڏهن ته فيڪٽري اندر زمين هيٺ ٽانڪي ۾ 3 مزدور صفائي لاءِ لٿا ۽ ساهه ٻوساٽجڻ سبب فوت ٿي ويا جنهن بعد انهن کي ڪڍڻ لاءِ وڌيڪ 2 مزدور ٽانڪي ۾ لٿا جيڪي بيهوش ٿي ويا ۽ انهن کي ڳڻتي جوڳي حالت ۾ اسپتال نيو ويو جتي وڌيڪ 2 مزدور دم ڌڻي حوالي ڪيو.

 

عمران ۽ حسين نواز جي ڪمپنين ۾ فرق آهي: اعتزاز احسن

اسلام آباد(بيورو) پاڪستان پيپلز پارٽي جي اڳواڻ اعتزاز احسن چيو آهي ته عمران خان ۽ حسين نواز جي ڪمپنين ۾ فرق آهي، عمران خان ڪائونٽي کيڏي فليٽ ورتو جڏهن ته عمران ۽ حسين نواز ٻئي ثابت ڪن ۽ شروعات وزير اعظم کان ڪئي وڃي. خانگي ٽي وي چينل جي پروگرام ۾ ڳالهائيندي اعتزاز احسن چيو ته جيڪڏهن حسين نواز وزير اعظم جو پٽ نه هجي ها ته ڪير ان کي 100 ڊالر ڏئي ها، عمران پنهنجي پاڻ کي رضاڪاراڻي طور پيش ڪيو اسان اهو چيو آهي ته شروعات نواز شريف ۽ ان جي ٻارن کان ڪئي وڃي. هن وڌيڪ چيو ته اسان چئون ٿا ته 1956ع وارو ايڪٽ ٺيڪ ناهي، اهو سول جج جا اختيار ڏيندو آهي، پاناما پيپرز ۾ ايندڙ 630 نالا جسٽس ڏانهن موڪليا وڃن.

 

ملڪ کي ترقي لاءِ ڪرپشن کان پاڪ ڪرڻ ضروري آهي: سراج الحق

لاچي (م.ڊ) جماعت اسلامي جي امير سراج الحق چيو آهي ته ملڪ کي ترقي لاءِ ڪرپشن کان پاڪ ڪرڻ ضروري آهي، بنگلاديش جي جماعت اسلامي جي امير کي پاڪستان سان وفاداري جي پاداش ۾ ڦاهي تي چاڙهيو ويو، ان باوجود به پاڪستاني حڪومت ۽ سياستدان ماٺ ڪيو ويٺا آهن، خابرو ادارن موجب لاچي ۾ جلسي کي خطاب ڪندي سراج الحق جو چوڻ هو ته جماعت اسلامي پاڪستان ۾ مڪمل اسلامي نظام ۽ خلافت چاهي ٿي، جماعت اسلامي جي حڪومت ۾ اچڻ کانپوءِ ملڪ کي حقيقي معنيٰ ۾ اسلامي فلاحي رياست ٺاهينداسين، سندس چوڻ هو ته ملڪ کي ڪرپشن کان پاڪ ڪرڻ لاءِ سڀني سياستدانن کي احتساب لاءِ اڳتي وڌڻو پوندو، سڀني کان پهرين آءُ پاڻ احتساب لاءِ پيش ٿيندس، سراج الحق چيو ته پاناما ليڪس ۾ جنهن جو به نالو آيو آهي ان جو احتساب ٿيڻ گهرجي.