تازيون خبرون

Daily Archives: May 13, 2016

هاڻ اجائي تنقيد سان مون تي ڪوبه فرق ناهي پوندو :نرگس فخري

ممبئي (شوبز نيوز)  2011ع ۾ ميوزيڪل رومانس فلم ”راڪ اسٽار“ ذريعي بالي ووڊ ڪيريئر شرع ڪندڙ اداڪارا نرگس فخري چيو آهي ته هاڻ اجائي تنقيد سان مٿس ڪوبه فرق ناهي پوندو، هڪ ڀارتي خابرو اداري سان ڳالهائيندي نرگس فخري چيو ته هاڻ ماڻهو جيڪي ڪجهه چون ٿا ، ان سان مون تي فرق نه ٿو پوي، ڇاڪاڻ ته راڪ اسٽار کانپوءِ ڪيترائي ڊرامائي معاملا سامهون آيا، هن چيو ته هاڻ مونکي فلمن جي بهتر سمجهه آهي، تنهن ڪري مونکي ڪابه پرواهه ناهي، بهرحال مونکي ان فلم(راڪ اسٽار) تي تمام گهڻو فخر آهي، هڪ سوال جي جواب ۾ سندس چوڻ هو ته سندس پهرين فلم بابت ناڪاري تاثرن کيس تمام گهڻو مايوس ۽ پريشان ضرور ڪيو، هن چيو ته مان ڪڏهن به اداڪارا ٿيڻ نه پئي چاهيو، مان فلم ۾ ڪم ڪرڻ جو به نه چيو هو، اهي سڀ ڳالهيون مون لاءِ تمام خراب رهيون، نرگس فخري جي ايندڙ فلم ”اظهر“ آهي، جنهن ۾ هوءَ اڳوڻي ڀارتي ڪرڪيٽر محمد اظهر الدين جي اڳوڻي گهرواري سنگيتا بجلاڻي جو ڪردار ڪري رهي آهي، سنگيتا جي ڪردار جي حوالي سان نرگس ٻڌايو ته ان لاءِ مون تي ڪو دٻاءُ نه هو، مان اهو ڪردار جيترو بهتر ڪري سگهيس ڪيو آهي،جيتوڻيڪ منهنجي ۽ سنگيتا جي ڀيٽ ضرور ڪئي ويندي پر مان چاهيان ٿي ته ماڻهن کي لڳي ته مان سنگيتا ئي آهيان.

هاڪي رانديگرياڻي وارو ڪردار چيلينجنگ آهي:عاليا ڀٽ

ممبئي (شوبز نيوز) بالي ووڊ اداڪارا عاليا ڀٽ چيو آهي ته اڙتا پنجاب ۾ سندس هاڪي رانديگرياڻي وارو ڪردار چيلينجنگ آهي ۽ هن اسڪرين تي پاڻ کي مطمئن رکڻ لاءِ وڏي محنت ڪئي آهي، 23 ورهين جي عاليا ڀٽ اڙتا پنجاب ۾ پناهگير بهاري مزودرياڻي جو ڪردار ڪري رهي آهي، جيڪا هاڪي جي رانديگرياڻي به آهي، ممبئي ۾ فلم جو هڪ گانو رليز ڪرڻ واري تقريب  ۾ صحافين سان ڳالهائيندي عاليا ڀٽ چيو ته اڙتا پنجاب تمام گهڻي ڏکي ۽ ذهني طور ٿڪائيندڙ فلم آهي،مان زخم رسڻ کانپوءِ به شوٽنگ جاري رکي، جڏهن ته فلم ۾ ڪم ڪرڻ کان پهرين مان هاڪي جي سکيا به ورتي، جنهن لاءِ ڪنهن به ماڻهو کي سالن جي پريڪٽس گهربل هوندي آهي، سندس چوڻ  هو ته هڪ اداڪارا طور مان رڳو اهو سمجهڻ پئي چاهيو ته هاڪي ڪيئن کيڏي ويندي آهي،جيڪو مان ڪوچ ۽ شاگردياڻين جي مدد سان سمجهي ورتو، عاليا چيو ته مان هاڪي کيڏڻ لاءِ تمام گهڻي محنت ۽ ڪوشش ڪئي،ان لاءِ مونکي ٿوري طاقت ۽ زور به لڳائڻو پيو، جيڪو ڪردار لاءِ تمام ضروري هو.

ڪرڪيٽر شرجيل خان کي ملندڙ ڌمڪين کانپوءِ ايس ايس پي سهائي عزيز سندس گهر پهچي وئي،سيڪيورٽي سخت

حيدرآباد (اسپورٽس نيوز)حيدرآباد پاڪستاني ڪرڪيٽر شرجيل خان کي ملندڙ ڌمڪين کانپوءِ ايس ايس پي سهائي عزيز ۽  پوليس جي وڏن اٽالن سان گڏ سندن گهر پهچي شرجيل خان جي گهر جي سيڪيورٽي سخت ڪري ڇڏي.شرجيل خان پاران سوشل ميڊيا تي جاري ڪيل ويڊيو جنهن ۾ هن کيس ملندڙ ڌمڪين جو ذڪر ڪيو آهي.ان کانپوءِ حيدرآباد پوليس جي سيڪيورٽي سخت ڪري ڇڏي آهي. جڏهن ته شرجيل جي والد جو چوڻ آهي ته شرجيل جو مسلسل پي سي بي رابطو آهي.پي سي بي جي هدايت کانپوءِ ئي ڪو بيان جاري ڪري سگهبوجڏهن ته شرجيل جي حييدرآباد ۾ موجود هجڻ جا اطلاح پڻ آهن هوڏانهن ذريعن جو چوڻ آهي ته شرجيل خان گذريل رات حيدرآباد جي هڪ ڪلب ۾ رٿيل پارٽي ۾ پڻ شرڪت ڪئي آهي.هو هن وقت پنهنجي گهر ۾ موجود ناهي.

فٽنينس مسئلن جو شڪار حفيظ، حارث سهيل، ذوالفقار بابر ۽ عماد وسيم کي بحالي پروگرام ۾ حصو وٺڻ جي هدايت

لاهور (اسپورٽس نيوز) پاڪستان ڪرڪيٽ بورڊ فٽنيس مسئلن جي ور چڙهيل 4 ڪرڪيٽرن محمد حفيظ، حارث سهيل، ذوالفقار بابر ۽ عماد وسيم کي بحالي پروگرام ۾ حصو وٺڻ جي هدايت ڪئي آهي، ميڊيا رپورٽن مطابق قومي ڪرڪيٽ ٽيم جي انگلينڊ واري دوري لاءِ بوٽ ڪيمپ 12 مئي کان ايبٽ آباد ۾ شروع ٿيندي، جيڪا ٻن هفتن تائين جاري رهندي، ان کان پهرين نيشنل اڪيڊمي ۾ لڳايل فٽنيس ڪيمپ ۾ ٽيسٽ پاس نه ڪندڙ ڄاڻايل چئني ڪرڪيٽرن کي پي سي بي طرفان نيشنل ڪرڪيٽ اڪيڊمي ۾ بحالي پروگرام ۾ شامل ٿيڻ جي هدايت ڪئي وئي آهي، هوڏانهن محمد حفيظ پي سي بي کي بحالي پروگرام ۾ رهندي بوٽ ڪيمپ ۾ حصو وٺڻ جي اجازت ڏيڻ لاءِ درخواست ڏني آهي.

پيار جي پرڻڻ ۾ برباد ٿيل گهر..!!: غلام مصطفيٰ جمالي

ڇا.؟سڀ سهڻيون هڪ جهڙيون آهن.يا سڀ سھڻيون هڪ جهڙيون ناهن هونديون، ذات نالا چهرا هڪ جهڙا ٿي سگهن ٿا پر رويا هڪه جهڙا ناهن هوندا، سوچ هڪ جهڙي ناهي هوندي،لباس ٻولي،هڪ جهڙي ناهي هوندي. سهڻيون ته سڀ سهڻيون پر ڪا سسئي آ ڪا سهڻي آ ڪا مومل آ ته هير آ ڪا شيرين آ.. پر حسن جي انڌ تي الائي ڪيترائي گهر اجڙي ويا الائي ڪيترن مائرن جون مرڪون موڪلائي ويون الائي ڪيترا پيءُ جن چيچ مان جهلي هلڻ سيکاريو سي روئي اکين جو نور وڃائي ويٺا، پريم ۽ پريمي جوڙا قصور ڪنهن جو والدين جو جن پڙهائي لکائي وڏو ڪيو جن پنهنجو پيٽ بکيو رکي انهن کي پاليو جن سردي گرمي سر تي سهي اونهاري جا ڪاڙا ڪاٽيا، ۽ ٻچن کي کاريو، يا ڏوهه  ان امڙ جو جنهن ڏهه مهينا پيٽ ۾ رکي موت جي منظر مان گذري ڪري هڪ ڌي کي جنم ڏنو جنهن جو نالو رکڻ لاءِ ڪيترا نالا سوچيا جنهن  جي جنم تي مٽايون ورهايون ويون. جنهن جي جنم جي ڏينهن تي مبارڪ اها ئي ملندي رهي ته نِياڻي جي مبارڪ هجي. ۽ ڄاول انهي ٻار جو ڪير به  نالو ناهي وٺندو سڀ لفظ “نياڻي” استعمال ڪندا آهن..ڇو ته“نياڻي” نالو وٺڻ سان پيار جي هڪ بهار ءُرت جهڙي هوا  اندر جي انسان کي ڏاڍو سرور بخشيندي آهي. پر اها الائي ڇو اها انهن مائرن کي نياڻي اکين ۾ ڌوڙ  وجهي ڌار ڇو ٿيندي آهي.؟ ڇو محبت هن کي ايترو محبور ڪندي آهي جو هو اهو گهر ڇڏي ڏيندي آهي. جتي هو پتڪڙا پير کڻي گهر اڱڻ اڳيان پيءُ جي چيچ جهلي هلڻ سکي جتي سهيلين سان گڏ گڏين راند کيڏي،جتي هو اڱڻ ۾ ٻيٺل نم جي وڻ ۾ لوڏ ٻڌي لڏي،،جنهن گهر ۾ سندس ماءُ پنهنجي پيٽ جو ٽڪر به ان کي کارايو، جتي هو ڀاءُ جي وڙهڻ کان پوءِ ٻئي مٺيون پوري اکين تي رکي روئيندي امڙ کي دانهن ڏيندي هئي ته “امان ادا ماري ٿو” ۽ ماءُ پٽ کي دڙڪا ڏيندي هئي ته “ڇورا” منهنجي ڌي کي ڇو ماريو اٿئي.؟ اڄ اها ماءُ آهي ۽ اها ئي نِياڻي پر اڄ هو ڪنهن کي به سڃاڻِي نه ٿي.! ڪورٽ آ ،قانون آ، ماءُ جي جهولي آ ،پر…! اڄ اها جهولي کالي ڦهليل آ، اها نياڻي اڄ اکين اڳيان ڪنهن ٻئي جي ٿي وئي اڄ هن ممتا جي کير جي هڪ هڪ ڍڪ جو قرض لاهي ڇڏيو…. اڄ هن ماءُ کي سڃاڻڻ کان انڪار ڪري ڇڏيو .

اڄ ته انهي جي اکين پيءُ جي پيار جا سمورا پنا ساڙِي خاڪ ڪري ڇڏيا… اڄ ته قيامت جو ڏينهن ٿي ويو… اڄ ماءُ جي لاڏلي ڌي پيار جي پنج ٻولن خاطر زندگي جا سمورا رشتا ناتا ٽوڙي عشق جي انڌ جي سوار ٿئي ڪنوار بنجي ڪنهن سان گڏ هلي وئي،، پر ماءُ جون اکيون اڃان به نهارين پيون  لڙڪ هارين پيون،، ويڳاڻو پيءُ شرم کان منهن لڪائي دنيا جي کل کان منهن تي ڪپڙو ڏئي واپس موٽيو آهي. جنهن ڪيترن ڏينهن کان ماني ناهي کاڌي جنهن کي اڃان به اهو فڪر آهي منهنجي ڏکي هوندي، هن ماني کاڌي هوندي الاءِ نه پر ماءُ جي ممتا تي ڇا لکان مون وٽ الفاظ آهن پر اهي الفاظ مان جي ممتا کي جوڙڻ جوڳا ناهن پنا ختم ٿي ويندا پڙهڻ وارا ٿڪجي پوندا مان جي ممتا تي لکڻ نه کٽندو. پر مان عنوان ڏنو آهي ته سڀ سهڻيون هڪ جهڙيون ناهن هونديون. پراڄ به سنڌ ۾ ماءُ جي ممتا هٿان مجبور نياڻي پيار کي  قربان ڪري ماءُ جي ممتا جي لڄ رکيو اچن اڄ به پوڙهي پيءُ جي عزت برقرار آهي.،،مان نه ٿو چوان ته محبت نه ڪيو محبت ڪرڻ ڪو ڏوهه ناهي پر جذبات ۾ اچي اهڙا فيصلا نه ڪجن جن سان دليون غمغين ٿين جن سان ماءُ رنج  ٿئي جن سان پيءُ جو هانءُ ڏري ……..

اهڙا فيصلا ڪرڻ کان پهرين هڪ نه پر هزار بار سوچجي ته انهن فيصلن جو آّخر نتيجو ڇا نڪرندو.؟ انهي جا معاشري تي ڪهڙا اثرات پيدا ٿيندا وقت مٽيل آهي حالات مٽيل آهي معاشرو تيزي سان اڳتي وڌي رهيو آهي سائنس ترقي ڪري رهي اسين اهي پراڻا خيال ڇو رکون. جي اها سوچ انهن سهڻين جي آهي ته منهجي نظر ۾ هن ڌرتي تي انهن کان وڌيڪ  بيوقوف ٻيو ڪو به ناهي،، ڇو ته ڪيتريون خبرون نظر مان گّذرينديون رهن ٿيون،،، ته ڪجهه ڏينهن پهرين پسند جو پرڻو ڪندڙ پريمڪا پريمي هٿان قتل..الائي ڪيترا بيان چپجي چڪا آهن انهن موضعن تي . اڄ ڪالهه جي نوجوانن تي الائي ڪهڙو پيار جو جن سوار آهي جو هو انهي ضد تان لهن ئي نٿا. الائي ڪهڙي مٽي جا ٺهيل آهن جن جي ذهن تي ڪوبه اثرنه ٿو ٿئي. پر سندس ذهن ۾ نصيحت جهڙي ڳالهه ڀوڳ يا مشڪري ٿي لڳي. پيار ڪري ..محبت سان محبت حاصل ڪري سگهجي ٿي مان نه ٿو سمجهان ته ڪوبه والدين پنهنجي ٻچي جي خوشي ۾ ناراض هوندو پر وقت جو انتظار ڪرڻ صبر تعمل کان ڪم وٺي پوءِ اهڙا فيصلا ڪجن ته بهترآهي ڇو جو مان نه ٿو سمجهان ته گهر کان ڀڳل عورت کي سواءِ انهي انسان جي جنهن سان هوءُ نڪتي آهي  ٻئي ڪنهن وٽ عزت  هجي ڇو هوءُ جڏهن به ڪو غلط ڪم ڪندي ته هن کي اهو مهڻو ضرور ٻڌڻو پوندو ته جي اهڙِي سٺِي هجي ها ته مائٽ نه ڇڏي هان….توهان پاڻ سوچيو ته اهي لفّظ ٻڌڻ کان پوءِ انهي ڇوڪري تي ڇا گذرندو هوندو جن مائٽن جو گهر ڇڏيو هوندو پيار لاءِ  مڃان ٿو ته پيار محبت هڪ  رشتو آهي جيڪو رکڻ گهرجي محبوب زندگي ۾ ڪرڻ گهرجن ته اهي هڪ دائري ۾ هجن ته بهتر آ اهي اديون جيڪي اهڙي فيصلي ڪرڻ جو ارادو رکن ٿيون يا فيصلي ڪرڻ جون سوچين ٿيون مان انهن کي هٿ ٻڌي اپيل ٿو ڪيان خدرا منهجي والدين کي راضي ڪيو پيار جا پرڻا پيار سان ڪيو جنهن ۾ گهوٽ هجي ڪنوار هجي سيج هجي دهل هجن شرنايون هجن ڀا۽ هجي پيءُ رخصتي ڪري ..باقي والدين جي دلين ۾ ڏار وجهي پرڻا ڪرڻ بلڪل غلط آهن چوندا آهن ڏٺي مان به ڏسجي ته بهتر آهي باقي فيصلا جذبات ۾ ڪرڻ  جهالت آهي ناداني آهي جنهن ۾ سواءِ رسوائي جي ٻيو ڪجهه به ناهي ملندو آخر ۾ مان ايترو ضرور چونديس ته والدين به اولاد جا بهتري لاءِ سوچي سمجهي  فيضلا ڪن ته بهتر آهي.

 

 

سنڌ ڪرپشن ليڪس جو ڇا ٿيندو ؟: جاويد احمد چانڊيو

پاناماليڪس جو چرچو پوري دنيا ۾ ٿي رهيو آهي،پاناما ليڪس جنهن بدعنوان مالدارن پارٽين جو من منجهائي وڌو آهي،پاناما جي زد ۾ ڪيتريون ئي با اثرڌرين جو سک چين تباهه ٿي ويو آهي،جيڪي مالدار پارٽيون حق سچ تي آهن انهن کي ڪو به خطرو نه آهي،بدعنوانن لاءِ رستا تنگ ۽ سوڙها ٿي رهيا آهن، پاناما ليڪس وڏو تعداد بااثر ۽ سياسي ڌرين ۽ غير سياسي ڌرين جو به آهي، پاناما ليڪس مالدار ڌرين کي  منظر عام تي آڻي وائکو ڪري ڇڏيو آهي، پاناما ليڪس جي پڌرائي کان پوءِ ملڪ ۾ وڏو مانڌاڻ نظر اچي رهيو آهي،پاناما ليڪس  جي ٻئي قسط به اچي چڪي آهي،ان ۾ به ڪيترن بااثر سياسي توڙي غير سياسي ڌرين جي مال ملڪيت دولت جي مڪمل طور نشاهدي ڪئي وئي آهي،پاناماليڪس نه رڳو پاڪستان جي مٿي جو سور ثابت ٿئي آهي پر دنيا کي ٿرٿلي ۾ وجهي ڇڏيو آهي،هاڻوڪي صورتحال ۾ دنيا جي ڪيترن ملڪن جا سربراهه به عوامي دٻاءُ جو شڪار بڻجي وياآهن، عوام جي طاقت انهن کي احتساب ۾ پيش ٿيڻ تي مجبور ڪري ڇڏيو آهي، ٽاپ تي آيل مالدار ۽بدعنواني ثابت ٿيڻ کان پوءِ اقتدار کان به الڳ ٿي ويا آهن،۽ اهو سلسلو وڌيڪ جاري آهي، پاناما ليڪس لڪيل سچ ۽ حقيقتون بيان ڪيون آهن،پاناما ليڪس جي زد ۾ آيل ڌريون پنهنجو بچاءُ به ڀرپور طريقي سان ڪري رهيون آهن،پنهنجي دفاع خاطر قانوني رستو اختيار ڪري رهيون آهن ۽عدالتن ۾ صفائي پيش ڪرڻ ڪو غلط طريقو نه آهي،پاناما ليڪس انهن مالدار پارٽين کي ظاهر ڪيو آهي جيڪي دنيا جي ليول تي لسٽ تي داخل آهن ۽ هن کان اڳ ظاهر نه هيون، جيڪي ڪاروباري لحاظ کان عروج ۾ داخل آهن، انهن مالدار پارٽين جون ڪمپنيون اثاثا۽ دولتن جا تفصيل ظاهر ڪيا ويا آهن،

ڪجهه ڏينهن اڳ بلوچستان سان تعلق رکندڙ با اثر بيرو ڪريڪٽ خزاني وارو ڪامور مشتاق رئيساڻي کي گرفتار ڪيو ويو ۽ ان جي نشاهدي تي 63ڪروڙ روڪ رقم سان گڏغير ملڪي ڪرنسي بانڊ جنهن جي ماليت به ڪروڙن ۾ ٻڌائي پئي وڃي اها هٿ ڪئي وئي آهي،نيب تحقيات جو دائرو وسيع ڪري ڇڏيو آهي،گرفتار ٿيل جاچ دوران گرفتار مشتاق رئيساڻي ٻين ڪيترن جا نالا به ظاهر ڪيا آهن جيڪي ڪرپشن ۾ ملوث آهن، هٿ آيل رقم ۾ ٻيا به حصيدار ڄاڻايا آهن،۽ انهن جي گرفتاري جو عمل به شروع ٿي چڪو آهي،سوشل ميڊيا تي بلوچستان ۾ ٿيل ڪرپشن جو قصو عام ٿي چڪو آهي،بدعنوانن جي گرفتاري سان عوام کي هڪ نئين انصاف جي اميد ظاهر ٿئي آهي،سنڌ ۾ ٿيل ڪرپشن به ٽاپ تي رهي آهي،گذريل اٺن سالن کان سنڌ ۾ ڄاڻي واڻي ڀينگ ڪئي وئي آهي، ڪرپٽ مافيا جي ڪارن ڪارنامن ۽ٿيل ڪلورن جي سزا عوام کي ملندي آهي،سنڌ ڪرپشن ليڪس سچ ۽ هڪ حقيقت آهي، تازو محڪمه آبپاشي ۾ 50 ارب رپين جي ڪرپشن جو انڪشاف ٿيو آهي  ۽ ٻين سرڪاري ادارن ۾ وڏي ڪرپشن ٿي رهي آهي، ڪرپشن معاملي کي ڄاڻي واڻي بي خبر ٿيڻ به وڏو ڏوهه آهي، سنڌ ۾ گذريل اٺن سالن کان عوام جا بنيادي مسئلا حل ٿيڻ بجاءِ وڌيا آهن، غريب عوام جو جيئڻ جنجال ٿي ويو آهي،ڪرپشن جو ناسور ڪو نئون نه آهي،

قديم وقت کان ڪرپشن جو ناسورجاري آهي،ڪرپشن جي روڪڻ ۾ جمهوريت حڪومتون مڪمل طور ناڪام ثابت ٿيون آهن،لٽ مار، ڪرپشن ڪرڻ جا جديد انداز ڪيا ويا آهن، سنڌ۾ ڪرپٽ مافياکي ڪرپشن ڪرڻ ۾ وڏي آساني هوندي آهي،ڪرپٽ مافياجي سياسي پٺ ڀرائي هجڻ ڪري ۽ مٿي سطح کان تعلقات مظبوط هجڻ ناتي ڪڏهن به ڪرپٽ مافيا عملي طور قانوني گرفت ۾ اچي نه سگهيو آهي،۽هر قسم جي ڏوهه ۽ سزاکان آجيو رهي ٿو، نمائشي رسمي فرضي ڪارواين سبب ڪرپٽ مافيا ڪنهن وڏي آڙاهه ۾ نه اچي سگهيو آهي،هن موجوده صورتحال ۾ شايد تاريخ جو پهريون بهترين دور آهي جو دهشتگردن ڏوهارين ۽ ڪرپٽ مافيا خلاف عوام جي خواهش مطابق ڪم هلي رهيو آهي،شروعات آهي ۽ مڪمل ڪاروائي سان نتيجايقينن بهترين اچي سگهن ٿا، جائزو وٺبو ته پ پ سرڪار تي ڪرپشن لڳڻ جو داغ هن وقت تائين صاف ٿي نه سگيو آهي ان جي ذميوار پ پ قيادت پاڻ آهي پنهنجي صفن مان ڪرپٽ مافيا جو خاتمو پ پ لاءِ فائديمند رهندو ،عوام جا مسئلا حل ڪرڻ ۾ دلچسپي گهٽ پر وزارتن ۽ عهدن کي حاصل ڪرڻ ۾ گهڻا جتن ٿي رهيا آهن،هن موجوده صورتحال ۾ پ پ ٻن گروپن ۾ واضع ورهايل آهي،ڀوتار لابي ۽ پ پ جا نظرياتي ڪارڪن قرباني ڏيندڙ ڪارڪن  جيڪي بي سهارا لاوارث ۽ انهن جي ڪو به ٻڌڻ وارو نه آهي،ڀوتارلابي جا وڏا ٺٺ آهن،ڪرپٽ مافياڀوتار لابي سان ڀاڱي ڀائيواري ۾ شامل رهي آهي،اهو منظر ٿيڻ کان پوءِ عوام جو ڪهڙو حال هوندو ان جو اندازو ڪرڻ ته آسان رهندو ته عوام چڱائي جي اميد نه رکي،سنڌ جا سرڪاري ادارا ڪرپشن جي ناسور ڪري تباهه ٿي ويا آهن،عوام کي روزگار ڪپڙو اجهو ڏيڻ چرچو ٿي ويو آهي،غريب عوام کي روزگار ڪپڙو اجهو ملڻ ته هڪ خواب ٿي سگهي ٿو ،

ڪرپٽ مافيا ڪرپشن جي ذريعي روٽي ڪپڙو اجهو حاصل  ڪري سگهي ٿو،۽ اهو ٿي به رهيو آهي، چيو وڃي ٿو ته پ پ حڪومت غريب عوام کي روزگار ڏيندي آهي،نيڪ نيتي سان اهڙو عمل آهي ته اهو عوام کي شاندار رليف ڏيڻ برابر آهي،جيڪڏهن انهي ڏنل روزگار تي ڪرپشن ۽ جعلي ڀرتين ۽ پيسن تي نوڪريون وڪرو ڪرڻ جا واڪ هلندا هجن ته پوءِ اهو عوام سان وڏو ظلم آهي،پ پ جي دور ۾ سوين پوليس اهلڪارن جي نوڪري کي برطرفي ٿيڻ جي تلوار  لٽڪي رهي آهي، جعلي ڀرٿين تحت انهن جو نوڪريون خطري ۾ آهن،سپاهي کان ويندي مختلف پوسٽن تي پوليس جون ڀرٿيون اهو ممڪن نه آهي ته پوليس ۾ پ پ حڪومت ۾ پوليس ۾ مفت ۾ ڀرٿي ٿيا هجن، يقينن ان جو اهو جواب آهي ته گهر جو الهه تلهه وڪڻي قرض وياجن تي رقمن جي عيوض لکين رپيا به ٿي سگهي ٿي ، انهن متاثر خاندانن جو هاڻي ڇا ٿيندو ؟ڪرپٽ مافيا جي وڏي لوڌ ملڪ کان فرار ٿي چڪي آهي،انهن تي اربين رپيا ڪرپشن ثابت آهن،ان جي باوجود به معاملي کي دٻائڻ لاءِ سياسي انتقامي ڪاروائين جو شور ڪيو پيو وڃي،بلدياتي ادارن ۾ من پسندي جعلي ڀرٿين جا انڪشاف ٿيا آهن ڏوڪڙن جي عيوض سفيد پوش ماڻهن کي ڀرٿي ڪيو ويو آهي،جنهن ڪري سٽي ۽ ٽائون ۾ ٿيندڙ صفائي جو ڪم ڍاوان ڍول ٿي ويو آهي، سفيد پوش ڀرٿي ٿيل ماڻهون صفائي جا هٿن ۾ ٻوهارا کڻڻ لاءِ تيار نه آهن،سرڪاري فنڊن کي حصا پتيون ڪري ورهايو پيو وڃي،سنڌ جا تاريخي شهر ڪرپشن بدعنوانين بي ڌياني ڪري تباهه ٿي رهيا آهن،سيورينج صفائي جو سسٽم ناڪارا ٿي چڪو آهي شهرن ۾ هر طرف گندگي جا ڍير عوام جي تڪليف اذيت جو سبب بڻيل آهن،

سنڌ جي دل ۽ روشنين وارو شهر ڪراچي گند ڪچري جي ڍيرن ۾ بدلجي چڪو آهي،ان جو به وڏو سبب ڪرپشن بدعنواني جعلي ڀرٿيون فنڊن ۾ گهوٻيون بلدياتي ادارن ۾ گاڏيون ڪچرو کڻندڙ  تباهه حالتن ۾ آهن، مرمت لاءِ آيل رقمون خرچ ڪرڻ بجاءِ ڪرپشن ٿيندي رهي ته پوءِ سڌارو ڪٿان ايندو،خرابيون ۽ ڪرپشن عروج تي هجي ته سڌاري وارو نظام تباهه ٿيندو ۽ بهتري جو تصور  ڪرڻ بيڪار رهندو ،ڪراچي ۾ بلدياتي ادارن ۾ جعلي فرضي ملازمن ڀرٿي ٿيڻ ۽ ماهوار ڪروڙين رپيا لنڊن منتقل ٿيڻ جا انڪشاف ٿيا آهن،پ  پ جي حڪومت گذريل اٺن سالن کان قائم آهي،پ پ جي مرڪزي قيادت اڳوڻو صدر آصف علي زرداري ۽ پ پ ۾ نوجوان نسل بلاو ل ڀٽو زرداري عوامي چونڊيل نمائدن ۽ وزيرن کي بار بار هداتيون مسلسل 8سالن کان ڏيندو رهيو آهي ته اهي پنهنجي علائقي ۾ عوام جا مسئلا حل ڪرڻ لاءِ کليل عوامي ڪچهريون ڪرڻ جا پرو گرام منقعد ڪن ته جيئن عوام پنهنجا مسئلا حل ڪرائي سگهي بدقسمتي سان انهن هدايتن هن وقت تائين عمل ٿي نه سگهيو آهي،سنڌ ڪرپشن ليڪس خطرناڪ حد تائين داخل آهي، ڪرپٽ مافيا کي ڪنهن به صورت۾ نه بخشيو وڃي ،ڪرپشن جو ناسور جڙ کان ختم ڪيو وڃي،ٻين کي سياسي طرح للڪار کان بهتر اهو ٿيندو ته هر هڪ ڌ ر پنهنجي صفن کان ڪرپٽ مافيا جي صفائي ڪري عوام کي نجات ڏياري وڃي ،عوام جا مسئلا نيڪ نيتي سان حل ڪيا وڃن،سکڻن اعلانن کان ننڍڙو به ڪم عملي طرح بهتر رهندو آهي.

******

 

ڪرپشن ….

ڪرپشن ۽ ڪارو ڌن هن ملڪ کي هلائيندڙ نظام جو سهارو بڻايو ويو آهي اها حقيقت آهي، سرڪاري معيشت جي وڌندڙ بحران جي ڪري اسان جي ملڪ ۾ ڪرپشن کي وڌيڪ سگهارو بڻائڻ جي ڪوشش ٿيندي رهي آهي، مهگانگائي، بيروزگاري ۽ رهڻ لاءِ ڇپر ڇانو کان محروم بدحال عوام کي تباهه ڪيو ويو آهي، اصل ۾ بليڪ مارڪيٽ جي سهاري تي ئي بدعنواني جو هي سڄو چرخو هلي پيو، هن ملڪ جا اڪثر حڪمران ۽ ڪاروباري شخصيتون محنت جي ڪمائي حاصل ڪرڻ کان خوفزده آهن، ان ڪري ئي هو ناڪام ٿي چڪيون آهن، ڪِن سياست جو سهارو وٺي ڪرپشن جا رڪارڊ قائم ڪيا آهن ته وري ڪن سفارشي ڪلچر کي برپا ڪري رکيو آهي ۽ اهي ئي عنصر عوام کي درپيش مشڪلاتن ۽ ڏکيائن جا ذميوار آهن. معاشري جو ڪوبه اهڙو فرد، ادارو يا شعبو ناهي بچيو، جيڪو ڪرپشن کانسواءِ هلي سگهندو هجي، هي ڪهڙو ناٽڪ آهي جو جن هن ڌرتيءَ تي جنم ورتو، جيڪي هن ڌرتيءَ جي سيني مان نڪتل اَنُ کائين ۽ ان جو پاڻي پيئن، جن لاءِ هيءَ ڌرتي ڇپر ۽ ڇانو آهي، اتي جيڪڏهن پنهنجن ئي ماڻهن سان دوکو ڪري بدعنواني ڪئي وڃي ته اهڙي ڪردار کي غدار کانسواءِ ٻيو ڇا ٿو ڪوٺي سگهجي؟ اصل ۾ سدائين ڪرپشن جي کلاڙين عوام کي ڄاڻي واڻي مسئلن ۾ ڦاسائي رکيو آهي ته جيئن هُنن لاءِ بدعنواني جا رستا کُليل رهي سگهن. اسان جو معاشرو اڳ ئي تعليم، صحت، بجلي ۽ گئس سميت ٻين بنيادي سهولتن کان محروم رهيو آهي، ان جا ڪارڻ معلوم ڪجن ته اهو ئي پتو پئي ٿو ته ان جا ذميوار اهي ئي نمائنده آهن، جن کي عوام انهيءَ اميد سان ووٽ ڏئي ايوانن تائين پهچايو ته هو اُتي پنهنجي تڪ جي عوام جي اهنجن، مصيبتن ۽ تڪليفن کي ٻڌائي انهن ڏکيائين کان ڇوٽڪارو ڏياريندا، پر هتي ته نظام ئي ان جي ابتڙ هلي پيو، بي وس ۽ لاچار ماڻهن کي رليف ڏيڻ بدران انهن جي زندگين کي اڳ کان به وڌيڪ اذيتناڪ بڻايو ويو آهي. سنڌ جي آبپاشي نظام کي ڪرپشن ۽ بيقاعدگين جي ور چاڙهي هٿ سان تباهه ڪيو ويو آهي، نه ته سنڌ جي نهري نظام جي سڄي دنيا ۾ هاڪ هلندي هئي، پر اڄ جڏهن آبپاشي نظام جو جائزو وٺنداسين ته سواءِ بدعنوانين، ڪامورن جي ڪارن ڪرتوتن ۽ پاڻيءَ جي کوٽ کانسواءِ ٻيو ڪجهه نه ملندو، اهو ئي سڀ کان وڏو ڪارڻ آهي ته جيڪو سنڌو درياءَ جو پاڻي ٿر جي ريت کي به چيري ماروئڙن جي لبن تائين پهچندو هو، اڄ اتي به واريءَ جا دڙا ڪر کنيو مٺي پاڻيءَ جا منتظر بيٺا آهن، پر جنهن انداز ۾ سنڌ جي آبپاشي نظام کي تباهه ۽ برباد ڪيو ويو آهي، ان کي اڳيان رکندي اهو ممڪن نٿو لڳي ته سنڌوءَ جو پاڻي ماروئڙن جي ديس ۾ وڃي پهچي ۽ ماضيءَ جو وهڪرو بحال ٿي سگهي. بهرحال، آبپاشي کاتي ۾ جيڪا ڪرپشن ڪئي وئي آهي، ان کي نندڻ سان گڏ اسين اهو مطالبو ٿا ڪريون ته بدعنواني ۽ بي ضابطگين ۾ جيڪي به ڌريون ۽ ڪامورا ملوث آهن، تن جو گهيرو تنگ ڪري کين قانون جي پڪڙ ۾ آندو وڃي ۽ کين عبرتناڪ سزا ڏئي اهڙو مثال قائم ڪيو وڃي ته جيئن ٻئي ڪنهن به ڪاموري کي سنڌ جي آبپاشي نظام سان ڪرپشن وارو کيڏ کيڏڻ جي جرئت نه ٿي سگهي.