تازيون خبرون

Daily Archives: May 13, 2016

پيش ٿيڻ لاءِ تيار آهيان، خواهش آهي ته چيف جسٽس جلد عدالتي ڪميشن جوڙي: نواز شريف

دوشمبي (اين اين آءِ) وزيراعظم نوازشريف، تاجڪستان جي صدر افغانستان جي چيف ايگزيڪيوٽو ۽ ڪرغستان جي وزيراعظم ڪاسا 1000 توانائي منصوبي جو افتتاح ڪري ڇڏيو. گذريل ڏينهن ڪاسا 1000 منصوبي جي افتتاحي تقريب تاجڪستان جي گادي واري شهر دوشمبي ۾ ٿي جنهن ۾ وزيراعظم پاڪستان محمد نوازشريف افغانستان جي چيف ايگزيڪيوٽو عبدالله عبدالله /ڏسو صفحو 3 بقايا نمبر 17

تاجڪستان جي صدر امام علي رحمانوف ۽ ڪرغستان جي وزيراعظم سورونبي ڪاسا 1000 منصوبي جو افتتاح ڪيو ان موقعي تي پاڻي ۽ بجلي جو وفاقي وزير خواجه آصف، وزيراعظم جوخاص معاون طارق فاطمي سميت چئني ملڪن جا اعليٰ عملدار شريڪ ٿيا بريفنگ ڏيندي عملدارن چيو ته 750 ڪلوميٽر ڊگهي ٽرانسميشن لائين افغانستان جي رستي پاڪستان تائين پهچندي ۽ اهو منصوبو سال 2018 تائين مڪمل ٿي ويندو. تقريب کي خطاب ڪندي وزيراعظم نوازشريف چيو ته ڪاسا 1000 منصوبو وچ ايشيا ۽ ڏکڻ ايشيا جي ملڪن کي پاڻ ۾ ملائيندو ۽ ان سان علائقائي رابطا وڌيڪ مضبوط ٿيندا ۽ تجارت کي هٿي ملندي. وزيراعظم چيو ته منصوبي سان روزگار جا وسيع تر موقعا پيدا ٿيندا ڪاسا 1000 سان پاڪستان کي هڪ هزار، افغانستان کي 300 ميگاواٽ بجلي ملندي ۽ اهو منصوبو ٻنهي ملڪن لاءِ انتهائي مفيد ثابت ٿيندو. جنهن لاءِ تاجڪستان کان ٽرانسميشن لائين افغانستان جي ذريعي پاڪستان آندي ويندي. وزيراعظم چيو ته منصوبي سان ڪيترائي اقتصادي سماجي ۽ ماحولياتي فائدا حاصل ٿيندا ۽ ان سان گڏ توانائي جي کوٽ ختم ٿيندي ۽ ڪاروبار ۾ بهتري ايندي. وزيراعظم نوازشريف 6 مئي 2016 کان دوشمبي ۽ لاهور وچ ۾ تاجڪ فضائي ڪمپني سومون جي جهازن جي آغاز جو خيرمقدم ڪيو ان سان نه صرف ٻنهي ملڪن وچ ۾ سفري سهولت ٿيندي پر اقتصادي لاڳاپا ۽ سياحت ۾ به اضافو ٿيندو. ان موقعي تي مختلف ملڪن جي اعليٰ شخصيتن به خطاب ڪيو. ٻئيط رف وزيراعظم محمد نواز شريف چيو آهي ته منهنجي دلي خواهش آهي ته چيف جسٽس جلد عدالتي ڪميشن جوڙي ۽ ان ڪميشن ۾ پيش ٿيڻ لاءِ تيار آهيان، هن چيو ته جيڪي ڳالهه پارليامينٽ ۾ چوڻي آهي اها پارليامينٽ ۽ عدالتي ڪميشن ۾ چوڻ واري آهي، ساڳي ڳالهه عدالتي ڪميشن ۾ ڪندس، هن چيو ته ڌرڻن وارن پهرين ڏينهن کان وزيراعظم تسليم نه ڪيو آهي، اپوزيشن جي ايجنڊا ڪرپشن جو خاتمو نه پر منهنجو پيڇو ڪرڻ آهي، تاجڪستان مان وطن واپسي تي خاص جهاز ۾ ميڊيا سان ڳالهائيندي وزيراعظم چيو ته پاناما ليڪس معاملي تي عدالتي ڪميشن جلد کان جلد ٺهڻ گهرجي ۽ اها ئي سندس دلي خواهش آهي، نيب کان پاناما ليڪس جي معاملي تي جاچ ڪرائڻ واري سوال تي وزيراعظم چيو ته جڏهن اها تجويز آئي ته ان جو جائزو وٺنداسين، في الحال منهنجي خواهش آهي ته چيف جسٽس عدالتي ڪميشن بڻائي، هن چيو ته ميڊيا انصاف ڪري جن ماڻهن جا نالا پاناما ليڪس ۾ آيا آهن انهن بابت ماڻهن کي آگاهه ڪيو وڃي، هڪ سوال جي جواب ۾ وزيراعظم چيو ته اپوزيشن جي ايجنڊا ڪرپشن جو خاتمو نه پر منهنجو پيڇو ڪرڻ آهي.

 

سنڌ ۾ دهشتگردن خلاف آپريشن وڌيڪ تيز ڪرڻ جو فيصلو، 20 هزار اهلڪار ڀرتي ڪرڻ جو اعلان

ڪراچي (اين اين آءِ) اپيڪس ڪميٽي فيصلو ڪيو آهي ته سنڌ پوليس کي مضبوط بڻايو وڃي ۽ ان حوالي سان صوبي ۾ 20 هزار پوليس اهلڪار ڀرتي ڪيا ويندا، جن مان 8 هزار پوليس اهلڪار ڪراچي مان ڀرتي ڪيا ويندا، جڏهن ته انهن جي تربيت پاڪ فوج ڪندي، اهڙو فيصلو گذريل ڏينهن اپيڪس ڪميٽي جي اجلاس ۾ ڪيو ويو، اجلاس جي صدارت وڏي وزير سيد قائم علي شاهه ڪئي، جڏهن ته گونر ڊاڪٽر عشرت العباد، ڪور ڪمانڊر ڪراچي ليفٽيننٽ جنرل نويد مختار، وقتي چيف سيڪريٽري رضوان ميمڻ، ڊي جي رينجرز ميجر جنرل بلال اڪبر، وڏي وزير جي پرنسپل سيڪريٽري علم الدين بلو، آءِ جي سنڌ اي ڊي خواجه ۽ ٻين شرڪت ڪئي، اپيڪس ڪميٽي موجوده صورتحال تي اطمينان جو اظهار ڪيو ۽ ڪراچي ۾ امن لاءِ نئين حڪمت عملي واضح ڪرڻ جو فيصلو ڪيو، وڏي وزير 20 هزار پوليس اهلڪار ڀرتي ڪرڻ جي منظوري ڏني جنهن ۾ 8 هزار پوليس اهلڪار ڪراچي مان کنيا ويندا، ان موقعي تي ڪور ڪمانڊر ڪراچي چيو ته ڀرتي ٿيندڙ اهلڪارن جي پاڪ فوج تربيت ڪندي ۽ ان لاءِ ضروري انتطام ڪيا ويندا، ڊي جي رينجرز، آءِ جي سنڌ پنهنجي ڪارڪردگي جي باري ۾ آگاهه ڪيو ۽ درپيش چيلينجز جي نشاندهي ڪئي، اجلاس کي ٻڌايو ويو ته ٽارگيٽ ڪلنگ، ڀنگ لاءِ اغوا، ڀتي خوري جي واقعن ۾ گهٽتائي آئي آهي، ٽارگيٽ ڪلنگ ۽ دهشتگردي جي واقعن ۾ 80 سيڪڙو گهٽتائي  ٿي آهي، هر مهيني 80 کان هڪ سئو ماڻهو ٽارگيٽ ڪلنگ جو شڪار ٿيندا هئا پر هاڻي ٽارگيٽ ڪلنگ ايڪڙ ٻيڪڙ واقعو پيش اچي ٿو، اهڙي طرح ڀتي خوري جي واقعن ۾ 85 سيڪڙو ۽ اغوا جي واقعن ۾ 90 سيڪڙو گهٽتائي ٿي آهي، 2013 ۾ اغوا جا 1774 واقعا رپورٽ ٿيا، 2016 جي پهرين 5 مهينن ۾ صرف 13 واقعا رجسٽرڊ ٿيا، اجلاس کي ٻڌايو ويو ته پنجاب ۾ ڇوٽو گينگ خلاف جڏهن آپريشن شروع ٿيو ته سنڌ رينجرز، سنڌ بلوچستان سرحد تي سخت چيڪنگ شروع ڪئي ۽ سنڌو دريا سان گڏ چوڪيون قائم ڪيون، اجلاس ۾ اها ڳالهه نوٽ ڪئي وئي ته ڪراچي شهر ۾ امن امان بحال ٿيڻ جي سبب پراپرٽي جي قيمتن ۾ 23 سيڪڙو اضافو ٿيو آهي، گذريل رمضان دوران ڪراچي جي مارڪيٽس ۾ 70 ارب جي خريداري ٿي، 14 آگسٽ جي موقعي تي 5 ارب رپين جا پرچم ۽ جهنڊيون وڪرو ٿيون، وڏي وزير اپيڪس ڪميٽي کي ٻڌايو ته دهشتگردي ٽوڙ جي 10 خاص عدالتن جو قيام تقريبن مڪمل ٿي چڪو آهي، 6 عدالتون ڪراچي سينٽرل جيل ۾ قائم ڪيون پيون وڃن ۽ ان جون عمارتون جون 2016 تائين مڪمل ٿي وينديون ۽ عدالتون جولاءِ ۾ پنهنجو ڪم شروع ڪنديون. سنڌ هاءِ ڪورٽ پنهنجي لا ٽيم مقرر ڪرڻ جي خاطري ڪرائي آهي جيڪا ڄاڻايل عدالتن ۾ ججز جي مقرري ڪندي. وڏي وزير چيو ته 2 سئو پراسيڪيورٽز جي مقرري جي منظوري ڏني وئي آهي، هن چيو ته ڪنهن جي سفارش تي ڀرتي ڪرڻ جي اجازت نه ڏني ويندي، ڀرتيون صرف ميرٽ تي ڪيون وينديون، اپيڪس ڪميٽي اهو به فيصلو ڪيو ته آءِ جي سنڌ پوليس پنهنجي جي ايس ايم کي 34 لڪيٽرز تائين اپ گريڊ ڪري، ان موقعي تي آءِ جي سنڌ ٻڌايو ته 34 جي ايم ايس لڪيٽرز جي خريداري لاءِ وفاقي سرڪار اين او سي جاري نه ڪري رهي آهي، ان تي وڏي وزير، گورنر، ڪور ڪمانڊر ڪراچي خاطري ڪرائي ته سنڌ پوليس کي جديد اوزار فراهم ڪرڻ لاءِ پنهنجو ڪوششون ڪندا، آءِ جي سنڌ ٻڌايو ته 10 ايم پي اي جون نيون سي سي ٽي وي ڪيمرائن جي تنصيب لاءِ 1.76 ارب رپيا گهربل آهن، اپيڪس ڪميٽي چيو ته ان حوالي سان چيف سيڪريٽري ۽ ناڻي واري سيڪريٽري سان معاملا طئه ڪيا وڃن.  ايپڪس ڪميٽي جي اجلاس بعد ميڊيا سان ڳالهائيندي صوبائي صلاحڪار مولابخش چانڊيي چيو آهي ته صوبائي گهرو وزير سهيل انور سيال کي هٽائڻ بابت اختيار پارٽي قيادت کي آهن، اجلاس ۾ صوبائي گهرو وزير سهيل انور سيال کي هٽائڻ بابت ڳالهه نه ٿي آهي، اجلاس ۾ 20 هزار اهلڪار ڀرتي ڪرڻ جو فيصلو ڪيو ويو آهي.

 

آرمي چيف 5 دهشتگردن جي ڦاهي جي منظوري ڏئي ڇڏي

راولپنڊي (اين اين آءِ) آرمي چيف جنرل راحيل شريف صفوران چورنگي بس، صالح مسجد، سماجي ڪارڪن صبين محمود ۽ قانون لاڳو ڪندڙ ادارن تي حملن ۾ ملوث القائده جي 5 دهشتگردن جي موت واري سزا ۾ واڌ ڪري ڇڏي آهي، پنجن ئي دهشتگردن کي ڪنهن به وقت ڦاهي ڏئي سگهجي ٿي، آءِ ايس پي آر موجب آرمي چيف دهشتگردن کي فوجي عدالتن مان ٻڌايل موت واري سزا ۾ واڌ ڪئي آهي، دهشتگردن ۾ طاهر حسين منهاس ولد خادم حسين، سعد عزيز ولد عبدالعزيز شيخ، اسد رحمان ولد عتيق رحمان، حافظ ناصر ولد افضل احمد ۽ محمد اظهر عشرت ولد عشرت رشيد شامل آهن، دهشتگردن عدالت ۾ پنهنجن ڏوهن جو اعتراف ڪيو آهي، دهشتگرد طاهر حسين منهاس خلاف 10، اسد رحمان خلاف 4 الزام، جڏهن حافظ ناصر ۽ محمد اظهر عشرت خلاف 5-5 الزام تحت ڪيس هلايا ويا ۽ 5 ئي دهشتگردن کي موت جي سزا ٻڌائي وئي.

 

مخالف ڌر اتحاد نواز دشمني قرار: وزير اعظم جي پٽن جون آف شور ڪمپنيون جائز آهن: ن ليگ

اسلام آباد(بيورو) حڪومتي جماعت مسلم ليگ ن جي اڳواڻن جو چوڻ آهي ته وزير اعظم جي ڪا آف شور ڪمپني ناهي، سندس پٽن جون آف شور ڪمپنيون جائز آهن، مخالف ڌر سپريم ڪورٽ جي جاچ کان ڀڄي رهي آهي . اسلام آباد ۾ پريس ڪانفرنس ڪندي ن ليگ اڳواڻ دانيا عزيز چيو ته مخالف ڌر ڄاڻي واڻي معاملا منجھائي رهي آهي. جيڪو سوال پارليامينٽ ۾ پڇيو ويندو ان جو جواب پارليامينٽ ۾ ئي ڏنو ويندو. مخالف ڌر اسان جي سوالن جا جواب ناهن ڏنا. اسان مخالف ڌر جي سوالن جا جواب 70 منٽن ۾ ڏئي ڇڏيا. هن چيو ته مخالف ڌر اتحاد نواز شريف دشمني ۾ ٺهيو آهي. اسان کان سوال ڪيا ويا ته اڌ پارليامينٽ توهان کان به سوال پڇندو، ڇو جو اڌ پارليامينٽ نواز شريف سان گڏ آهي. ان موقعي تي نجڪاري ڪميشن جي سربراهه محمدزبير چيو ته هڪڙي ڳالهه سڀني کي سمجھڻ گھرجي ته ميان صاحب جي ڪا آف شور ڪمپني ناهي، جيڪي آهن سي سندس خاندان جون آهن. آف شور ڪمپنيون ڪو ڏوهه ناهي. هن چيو ته وزير اعظم جي پٽن جون آف شور ڪمپنيون جائز آهن. اهي پرڏيهه ۾ ذاتي ڪاروبار ڪري رهيا آهن.

 

ڳالهيون ڪامياب، آءِ ايم ايف 6.4 ارب ڊالر جي ٽن سالن واري پروگرام تحت پاڪستان کي 5 سئو ملين ڊالرز جي نئين قسط جاري ڪندو

دبئي (اين اين آءِ) پاڪستان ۽ آءِ ايم ايف وچ ۾ توسيع فنڊ سهولت پروگرام تحت يارهين معاشي جائزي ۾ ڪاميابي کانپوءِ آءِ ايم ايف 6.4 ارب ڊالر جي ٽن سالن واري پروگرام تحت پاڪستان کي 5 سئو ملين ڊالرز جي نئين قسط جاري ڪندو، جڏهن ته ناڻي واري وفاقي وزير اسحاق ڊار چيو آهي ته آءِ ايم ايف سان ڳالهيون ڪامياب رهيون، مالياتي خساري ۾ گهٽتائي آهي، ايندڙ مالي سال  2016-17 لاءِ شرح نمو جو حدف 6 سيڪڙو رکيو ويندو، سي پيڪ منصوبو به ملڪ ۾ اقتصادي سرگرمين کي هٿي ڏيڻ ۾ اهم ڪردار ادا ڪندو، پاڪستان اسٽاڪ ايڪسچينج جي انڊيڪس 10 مئي تي 36 هزار 265 پوائنٽس جي بلند ترين سطح تائين پهچي ويو، ملڪ ۾ ناڻي جي شرح جولاءِ کان اپريل 2015-16 دوران 3 سيڪڙو گهٽ رهي، گذريل ڏينهن يارهين معاشي جائزي جي سلسلي ۾ پاڪستان ۽ آءِ ايم ايف وچ ۾ دبئي ۾ ڳالهيون ٿيون، ڳالهين جي ڪاميابي جو اعلان ناڻي واري وفاقي وزير سينيٽر اسحاق ڊار ۽ آءِ ايم ايف جي مشن چيف هيرالڊ فنگر گڏيل پريس ڪانفرنس ۾ ڪيو، ان موقعي تي اسحاق ڊار چيو ته اسان جي ڪارڪردگي انتهائي اطمينان بخش رهي آهي ۽ مارچ 2016 جي آخر تائين تمام حدف حاصل ڪيا ويندا، اسٽيٽ بينڪ آف پاڪستان جا مقامي اثاثا مجموعي عالمي ذخيرن سان گڏ اسٽيٽ بينڪ سان حڪومتي قرضن ۽ بجيٽ جي خساري جي حوالي سان ڪارڪردگي اطمينان بخش رهي آهي، هن چيو ته مارچ 2016 جي آخر تائين بينظير انڪم سپورٽ پروگرام رقم جي منتقلي ۽ بجلي شعبي جي رهتن بابت حدف حاصل ڪيا ويا آهن، هن چيو ته ايف بي آر ٽين ٽه ماهي لاءِ 715 ارب رپين جو حدف عبور ڪيو ۽ اها ڪيترن ئي سالن کانپوءِ زبردست ڪاميابي آهي، ايف بي آر جي حدفن ۾ ڪا به ڪمي نه ايندي، هن چيو ته هلندڙ مالي سال جي پهرين 9 مهينن لاءِ 21 سئو 5 ارب رپين جي حدف جي مقابلي ۾ ايف بي آر 21 سئو 3 ارب رپيا وصول ڪيا آهن ۽ اهي وصوليون گذريل سال جي مقابلي ۾ 19 سيڪڙو وڌيڪ آهن، هن چيو ته مالي سال 2015 ۾ جي ڊي پي 4.24 سيڪڙو شرح نمو حاصل ڪئي جيڪا گذريل 7 سالن ۾ بلند ترين شرح آهي. اسحاق ڊار چيو ته توانائي جي شعبي ۾ سڌارا اسان جي حڪومت جي ترجيحي ايجنڊا ۾ شامل آهن ۽ وزيراعظم ان سلسلي ۾ باقائدگي سان نگراني ڪري رهيو آهي، هن چيو ته توانائي جون ضرورتون پوريون ڪرڻ لاءِ ڪيترن ئي منصوبن تي ڪم جاري آهي، هن چيو ته غير ملڪي ناڻي جا ذخيرا 9 مئي 2016 تي اٽل 21 ارب ڊالر رڪارڊ ڪيا ويا، جنهن ۾ اسٽيٽ بينڪ پاڪستان وٽ 16.125 ارب ڊالر ۽ ٻين بينڪن وٽ 4.802 ارب ڊالرن جا ذخيرا آهن، هن چيو ته بينڪنگ جي شعبي جي ڪارڪردگي بهتر رهي آهي، وفاقي وزير چيو ته ملڪ ۾ ڪاروباري جي آساني لاءِ ماحول کي سازگار بڻايو پيو وڃي، اسان مالياتي شموليت جي جامعه قومي حڪمت عملي اختيار ڪئي آهي جنهن تحت ضرورتمند طبقن جي مالي ضرورتن کي پورو ڪيو ويندو.

 

هلندڙ سال ريلوي کي ساڍا چار ارب رپين جو نقصان ٿيو: خواجا سعد رفيق

لاهور (م.ڊ) ريلوي جي وفاقي وزير خواجا سعد رفيق چيو آهي ته هلندڙ سال ريلوي کي ساڍا چار ارب رپين جو نقصان ٿيو آهي، ڇو ته مسئلن سبب خساري جي گهٽتائي جو هدف پورو ڪرڻ ۾ مشڪلون آهن، اسان گهوسڙو ملازمن جي نشاندهي تي لاڳاپيل ڊويزن جي ڊي اين او ۽ اي اين ڪي ۾ تبديلي جو حڪم ڏنو آهي، خابرو ادارن موجب قائما ڪميٽي ريلوي جي اجلاس ۾ خواجا سعد رفيق جو چوڻ هو ته ريلوي وٽ هڪ ارب کان وڌيڪ ماليت جو اسڪريپ آهي، جڏهن ته اسڪريپ جي قيمت ۾ 10 کان 15 رپين جي گهٽتائي آئي آهي، جيڪڏهن اسڪريپ کي کپايو ويو ته 55 ڪروڙ جو نقصان ٿيندو.

 

12 مئي پاڪستان جي تاريخ جو ڪارو ڏينهن آهي: مولا بخش چانڊيو

ڪراچي (اي پي پي) اطلاعات واري صوبائي صلاحڪار مولابخش چانڊيو چيو آهي ته 12 مئي پاڪستان جي تاريخ ۾ سڀ کان وڌيڪ ڪارو ڏينهن آهي. 12 مئي تي هڪ آمر طاقت ڏيکارڻ جي ڪوشش ڪئي ۽ نيست ۽ نابود ٿي وو. هن چيو ته 12 مئي جي شهيدن جي رت مان ٻرندڙ ڏيئا اڄ به روشن آهن ۽ ان ڏينهن طاقت ڏيکاريندڙ اڄ مڪافات عمل جو شڪار آهن. هن چيو ته اسان پيپلز پارٽي جي جيالن جي عظيم قربانين کي خراج عقيدت پيش ڪريون ٿا ۽ پيپلز پارٽي ڪالهه به جمهوريت جو دفاع ڪيو هو ۽ اڄ به ڪري رهي آهي.

 

جيڪڏهن اعتماد جوڳا جواب نه مليا ته سوال وڌندا ويندا: اعتزاز احسن

اسلام آباد (بيورو) پاڪستان پيپلز پارٽي جي اڳواڻ سينيٽر اعتزاز احسن چيو آهي ته اڄ باضابطا بور تي پنهنجا 7 سوال اسپيڪر کي پيش ڪيا آهن، جيڪڏهن اعتماد جوڳا جواب نه مليا ته پوءِ سوال وڌندا ويندا، خابرو ادارن موجب اپوزيشن پارٽين جي اجلاس کانپوءِ ميڊيا سان ڳالهائيندي اعتزاز احسن جو چوڻ هو ته وزير اعظم جي پارليمينٽ ۾ اچڻ جا منتظر ۽ صحيح جواب ٻڌڻ چاهيون ٿا، اسيمبلي ميمبر وزير اعظم کان وڌيڪ سوال به ڪري سگهن ٿا، سندس چوڻ هو ته چار غير سنجيدا ماڻهو آيا هئا ۽ اسان جي سوالن جو مختصر جواب ڏئي ويا، سوالن جا جواب ۽ حساب وزير اعظم کي ڏيڻو پوندو، وزير اعظم جي ٽن ٻارن جا نالا پاناما پيپرز ۾ آيا آهن ۽ انهن جون ڪمپنين مٿان ڪمپنيون نڪري رهيون آهن، اعتزاز احسن چيو ته ڪميشن ۾ 7 نه پر 700 سوال ٿيندا.

 

ڀارت ۾ جائيداد ٺاهڻ جا ثبوت مليا ته اها جائيداد انهن کي تحفي طور ڏيندس: ڊاڪٽر عاصم

ڪراچي(اسٽاف رپورٽر) عدالت ڊاڪٽر عاص ڪيس ۾ دهشتگردن دهشتگردن جي علاج بابت معاملي تي جاچ آفيسر تي جانبداري جو الزاد رد ڪري ڇڏيو ۽ ڪيس جي ٻڌڻي 16 مئي تائين ملتوي ڪري ڇڏي. دهشتگردي ٽوڙ عدالت ۾ ڊاڪٽر عاصم ڪيس ۾ دهشتگردن جي علاج بابت ڪيس جي ٻڌڻي ڪئي. ڊاڪٽر عاصم حسين، ايس قائمخاني، قادر پٽيل ۽ ايم ڪيو ايم نامزد  ميئر وسيم اختر عدالت ۾ پيش ٿي . عدالت پنهنجي فيصلي ۾ چيو ته جاچ آفيسر تي جاچ ۾ جانبداري جو الزام ثابت ناهي ٿيو. ڊاڪٽر عاصم حسين عدالت جي روبرو چيو ته ڀارت ۾ جائيداد ٺاهڻ جا الزام لڳائيندڙ اها ڳالهه ثابت ڪن ۽ جيڪڏهن هو ثابت ڪرڻ ڪامياب ويا ته اها جائيداد مان انهن کي تحفي طور ڏئي ڇڏيندس.

 

پنهنجي فورس تيار ڪري رهيا آهيون، جلسن ۾ عورتن ڏانهن وڃڻ جي ڪوشش ڪندڙ سڌو اسپتال ويندو: عمران خان

اسلام آباد (اين اين آءِ) تحريڪ انصاف جي سربراهه عمران خان چيو آهي ته فيصل آباد جي جلسي لاءِ پنهنجي فورس تيار ڪري رهيا آهيون ۽ جيڪو به شخص عورتن ڏانهن وڃڻ جي ڪوشش ڪندو اهو سڌو اسپتال پهچندو هڪ انٽرويو ۾ هن چيو ته اسان جي 126 ڏينهن واري ڌرڻي ۾ اهڙو واقعو ڪڏهن به نه ٿيو جنهن ۾ عورتن سان بدسلوڪي ڪئي وڃي. جڏهن ته ڪيترن ئي وقتن تي عورتن جو تعداد مردن کان وڌيڪ هوندو هو جڏهن ته هاڻ عورتن سان بدتيمزي وارا واقعا رونما ٿيا آهن ان تي اسان کي شڪ آهي ۽ اسان ان معاملي جي جاچ ڪري رهيا آهيون هن چيو ته (ن) ليگ جي عورتن کي اسان جي عورتن جو وڏو فڪر ٿي ويو آهي ۽ هڪدم انهن پريس ڪانفرنسون به ڪيون. هن چيو ته هاڻ اسان پنهنجي فورس تيار ڪري رهيا آهيون جيڪو به عورتن ڏانهن وڃڻ جي ڪوشش ڪندو اهو سڌو اسپتال پهچندو.